You are here: HomeNewsGeneralAngels Vision News | March 24, 2017

Angels Vision News | March 24, 2017

Written by  Angels Vision Published inGeneral Friday, 24 March 2017 19:50

District TB Officer makaih in tuni’n CMO Conference Hall ah World TB Day zatna om hi. Hiai hun zatna ahihleh Dr. Kimngaihching, CMO/CCPur leh Dr. VC Pau Tonsing, DFWO/CCpur te’n a uap banuah DAPCU Staff, SHALOM, MSF leh GNM Training School a kai student-te banah TB natna apan damsiang leh tulel a TB damdawi ne lel bangzah hiam leng hiai hun zatna ah kihel uhi. Programme ahihleh sunma dak 11:00 in kipan a, Dr. Kimngaihching, CMO/CCpur in World TB Day zatna hongkhia in thugenna hun zang a, Dr. T. Pumzathang, District TB Officer in keynote address gen hi. Thutut kingah dan in, World TB Day kichi ahihleh World Health Organization (WHO) in official a global health awareness campaign 8 a puankhiakte lak a khat hi a, kum teng in March 24 ni in khovel pumpi mun tuamtuam ah zat in om gige hi. World TB Day in a tuppen ahihleh natna lauhuai mahmah leh baihsamtak a kilohsawn theih natna Tuberculosis (TB) kichi sukbeina ding leh hiai natna apan kuapeuh a kiven theihna ding ua sinsakna piak hi’n kigen a, tukum in World TB Day thupi ding in “Unite to end TB; Leave no once” chih zat in om hi.

District TB Officer in a thugenna ah, TB natna kichi sihna tun thei natna ahih banah baihsamtak a midang lohsawn theih natna hi’n gen a, tua ziak mah in pi-le-pute hunlai in hiai natna veikhate kho polam ah koihtuam in ana om sek uhi. Tu khangthak hun ah, siamna leng hong sangta in, TB natna suk damna ding damdawi leng muhkhiak in omta a, himahleh hiai natna apan damsiang taktakna ding in damdawi a course ching a nek teitei ngai a, course tempen zohna ding in kum kimkhat bang lutzou hi’n gen a, hiai natna veikha te’n damdawi course kimtak a anek theihna ding un DOT Provider koih in om a, amaute nna ahihleh damdawi inn apan TB damdawi va lak a neksak hi a, government in course ching a nesak DOT Provider-te a ding in incentive hoih taktak bawlsak in, damdawi course ching a nete kiang ah leng kipahman kilawm huntawk pe gige hi. World TB Day in TB natna apan kiven ding dan sinsak kia hilou in, TB damdawi course ching a nete leh DOT Provider-te pahtawina hun a leng zat a om hi’n gen hi. Programme hunsung in Mrs. Chingthang, Sr. DOT Provider Superviser¸RNTCP/CCpur in DOT Provider mi 10-te kiang ah kipahman piakkhiakna hun makaih in, tuni a programme zatna hun a hong tel TB damdawi ne lellelte kiang ah leng kipahman piakkhiakna nei a, Dr. Khenzamung Samte, MO, District TB Centre in kipahthu gen in World TB Day zatna programme zou uhi.


XXXXXXXX


Joint Action Committee Against Anti-Tribal Bills (JAC-AATB) makaih in hongtung ding March 28, 2017 sunma dak 11:00 in YPA GHQ Hall, Hiangtam Lamka ah Public Consultation om ding a, hiai hun ah tribal movement pailel toh kisai banah Manipur Chief Minister thak N. Biren Singh in kihou dia a chialna toh kisai a ngaihdan tuamtuam omte kikup khawmna om ding hi. Thutut kingah dan in, Manipur Chief Secretary (Home) Dr. J. Suresh Babu in JAC-AATB Chief Convenor H. Mangchinkhup kiang ah laithon khak in tribal movement pailel toh kisai banah sulphate luang vuilouh a omte tungtang Manipur Chief Minister N. Biren in zingchiang (March 25) zinglam dak 10:00 a genkhawm dia chialna bawl ahih dan theisak a, hiai toh kisai in JAC-AATB Chief Convenor H. Mangchinkhup in tuni’n dawnna pia in, Manipur Chief Minister in Manipur singtang bial a ni 571 a upa kiphinna toh kisai sukvengna dia JAC-AATB in hiai bang a chialna a muh pen kipahpih mahmah in, Manipur Government thak in Manipur singtangmite haksatna sukvengna dia lunglutna liantak nei ahih dan taklang hi. Kihouna neih theihna dia JAC-AATB in tribal society tuamtuamte ngaihdan lak masak ngai ahihna ah tu in Public Consultation sam lel ahihman in zingchiang a kihouna ding ah kihel theilou ding ahih dan theisak a, JAC-AATB in consensus a lak zoh hunhun chiang a theisak thak ding ahih dan taklang hi. Public Consultation neihna ding toh kisai in JAC-AATB in lunglutna nei society leh mimal tuamtuamte kihel ding in chialna bawl a, mimal tak a hong kilang theilou te’n leng This email address is being protected from spambots. You need JavaScript enabled to view it. tungtawn in March 27, 2017 nitak tan a ngaihdan a neihte uh khak teitei ding in ngetna bawl hi.


XXXXXXXX


All Tribal Women Union (ATWU) makaih numei pawl te’n District Hospital Morgue a Tribal Martyr-te luang tutpih a niteng a thumkhawmna a neih uh paitou zel in, tuni apan in gam leh leitang a ding banah pawlpi tuamtuamte a ding in tuni’n ann ngawl thumna pan ua, zingchiang in leng sunzom ding uhi. Ann ngawl thumna ahihleh zingkal dak 7:00 in pan ua, mi tuamtuam te’n thugenna hun zang in, lungsim a puakgik a neihte uh kikup khawmna hun in zang ua, Manipur singtangmi te’n kivaihawmna tuam a neih theihna ding uleh thudik-thutang a vaihawmna a om theihna ding in pathian buan in ann ngawl in thumna nei ua, tuni in leng mun tuamtuam apan mi tamtak paikhawm uhi. ATWU makaih numei pawl te’n apaisa February 8, 2016 apan District Hospital Morgue ah gam leh leitang a dia hinna ana pia salphate luang tutpih a thumkhawmna a neih uh tuni tan in tatsatlou in paizomtou zel lai a, niteng in mun tuamtuam apan mipi 70 leh 100 kikal paikhawm zou gige uhi. Tuabangkal ah, numei pawl te’n hongtung ding March 27, 2017 (Seppatni) chiang in Seminar leh thumkhawmna hun zang nawn ding ua, programme ahihleh zinglam dak 10:00 a kipan in, Miss Deborah Zou in “Piangthaksate Gingtu Hinkhua” chih thupi zang in thugenna hun zang ding hi’n thutut kingah hi.


XXXXXXXX


Churachandpur District sung a government nuai a department tuamtuam a sem, sepna apan pension-te kipawlkhawmna All Pensioners Welfare Council, CCPur te’n tuni’n YPA GHQ Hall, Hiangtam Lamka ah Annual General Body Meeting nei in, vaipo ding telna nei uhi. Hun zatna ahihleh zinglam dak 10:30 in kipan a, Rev. Dr. Th. Lamboi Vaiphei in vaidawnna thu gen in, Secretary (Administration) in General Body Meeting masa a thupuk tuamtuam omte simkhia in kum paita sung a activity tuamtuam omte pulak in, L. Thanngur, Vice President makaih in 2016-17 sung a member ana mualliamte suunna hun om hi. All Pensioner Welfare Council, CCPur ahihleh November 22, 2007 kum a ana kiphutkhia hi a, Eden Huan, Hiangtam Lamka ah Head Office nei in, 2008 kum in Society Act nuai ah registration bawl ua, tuni tan in hiai society nuai ah member 639 omlel hi. Secretary in report a piakna ah tu 2016-17 sung in member thak 12 om in, member hihna apan kitawp mi 9 a om banah tukum sung in mi 19 in sihna tuak ua, tulel in member damlai 574 omlel hi’n gen hi. Tuni a General Body Meeting neihna hun ah Secretary (Finance) in 2016-17 sung a sum muhna leh zatkhiakna (Financial Statement) simkhia in, 2017-18 sung a budget ding luikhe a, member paikhawm te’n 2017-20 sung a executive member ding telna Election Officer-te makaih a nei in, 2017-18 sung a budget dia luikhiak a om Rs. 3 lakhs pomkip uhi. 2017-20 sung a vaipo dia telching a om mi 15-te ahihlehRev. Dr. Th. Lamboi Vaiphei, Ginvum Ngaihte, LT Juan Tonsing, H. Nengsong, T. Singneng, S. Sanglian, K. Lainvel, Khamzadong Samte, Chinzalian, Ngulzadal, Khamzadinga, HL Hminga, Khamzachin, L. Thanngur leh Saidoukhum hi ua, hun lemtang masapen ah vaipo dia telching thak a om te’n Office Bearer ding guanna nei ding uhi. Programme hunsung in mi tuamtuam apan thugen ngaihkhiakna om in, LT Juan Tonsing, Secretary (Administration), APWC in meeting resolution simkhia in, thupukna omte pompihna in member paikhawm te’n khut taklam chiat liik ua, Upa Khamzadinga in thumna in General Body Meeting khak hi.


XXXXXXXX


Evangelical Synod Church in “Family Transformation (sungkuan kibawlthakna)” chih thupi zang in March 26, 2017 tan daih ding Synod Conference 2017 zan nitak in ESC Central Church, Chiengkonpang ah pan ua, nitak hun teng biakna kikhop a zat ahih ding banah sunnunglam hun pen seminar hun in zang uhi. Synod Conference 2017 ahihleh zan nitak in Upa Th. Mangngul, Chairman in thumna in hongkhia a, zing leh nitak biakna kikhop hun ah Rev. K. Siemlien, Rev. Thangkhosiem, Executive Director, ESC, Pastor Khailalsiam, B/S Saichang Bial, Rev. T. Kampu, President, AAS Guwahati leh Evan Paukhomang, Secretary, CKKP te’n Tanchinhoih gen ding ua, khawmpi hunsung Sunnung dak 1:00 apan in niteng in thupi tuamtuam zang in Seminar om ding a, Rev. Thangkhosiem, Mrs. Hawiphal leh Rev. T. kampu te’n sinsak ding uhi. Thutut kingah dan in, Evangelical Synod Church nuai ah bial 4 – Phai Bial, Saichang Bial leh Tuilang Kuol hi a, tulel in Phai Bial nuai ah khua 21 om in, Saichang Bial nuai ah khua 10 leh Tuilang Kuol nuai ah khua 12 om lel a, Synod Conference 2017 zatna hun ah hiai bial 3 apan palai 100 val kihel uhi. Tuni sunnung hun a seminar neihna hun ah, hun masa Rev. Thangkhosiem in la in, “Family Challenge for Transformation” chih thupi zang in sinsakna pia a, hun 2na Mrs. Hawiphal, Principal, AAS, Guwahati in la in, sungkuan kikhekna dia numeite mohpuaknate gen hi. Synod Conference 2017 ahihleh March 26 nitak in Rev. Khaigin Gangte, Vicec Chairman in khak ding hi.


XXXXXXXX

Read 832 times
Login to post comments