You are here: HomeNewsGeneralAngels Vision News | March 25, 2017

Angels Vision News | March 25, 2017

Written by  Angels Vision Published inGeneral Saturday, 25 March 2017 19:53

Divisional Forest Officer, Southern Forest Division makaih in tuni’n Dorcas Hall huangsung a EBC mini Auditorium ah CCpur District sung a kho hausa te’n District Level Officer tuamtuamte toh Forest (Conservation) Act, 1980 toh kisai in Sensitization Programme nei uhi. Hiai hun ah Lamka leh a sehvel apan kho hausa leh District Level Officer hunkhop kihel ua, DC/CCpur R. Sudhan, IAS in leng hiai hun zatna uap hi.

Programme ahihleh sunma dak 11:30 in kipan a, Kham Suanmung Tawmbing, IFS Divisional Forest Officer in vaidawnna thu gen in, A. Bonbirdwaja Singh, IFS (Retd) in “Implication of Forest (Conservation) Act 1980 in Forest Diversion” chih thupi zang in hausa leh district level officer paikhawmte sinsak a, dotna leh dawnna tuamtuam omte dawng in, T. Thangchinlian, MFS Asst. Conservator of Forest, Southern Division in kipahthu gen in sensitization programme zou uhi. DFO/CCpur Kham Suanmung Tawmbing, IFS in kho hausa leh DLO tuamtuam paikhawmte mai ah forest (gammang) kichi nouneltak a pulak in, gammangte kepbit a poimoh dan leh gammang kepbitna dia government in dan a bawl Forest (Conservation) Act, 1980 kichi nouneltak in hilh chian a, Government in India khua-le-tui hihna nei khempeuhte a ding in Fundamental Rights a bawlsak kawmkawm in zui ding Fundamental Duties leng bawl a, huaite lak ah gammang kepbit ding leng Fundamental Duties leng telkha ahihman in kuapeuh in mohpuakna nei ahih dan gen hi.


XXXXXXXXX


Tedim Chin Union (TCU) Headquarter in tuni’n Tedim Chin Cultural Club (TCCC) Hall, Lanva ah Annual Assembly a 56 veina leh General Election nei ua, frontal organization leh Unit tuamtuam apan paikhawm palai te’n 2017-19 sung a TCU Hq a President ding in H. Pau Za Chin telching ua, agenda tuamtuam puaklut a omte leng genkhawm uhi. Programme ahihleh zinglam dak 10:00 in kipan a, hun zatna Pro Pastor Dai Muan Lian in Pathian khut ah laankhia in, Dr. Neng Ngaih Lian, President, TCU HQ in Presidential address gen a, TCU nuai a om Tedim Chin Students Association, Tedim Chin Youth Association, Tedim Chin Cultural Club, Tedim Chin Literature Socoety leh Unit tuamtuamte apan secretary report ngaihkhiakna om hi. Sunnung dak 12:30 apan in General Assembly leh election neih in om a, hun zatna Dr. Neng Ngaih Lian, President in makaih in Assembly nanungpen a thukimna tuamtuam omte simkhatna nei in, TCYA, TCSA, TCCC leh Unit tuamtuam apan agenda puaklut a omte genkhawmna om in, Election Commission-te makaih in 2017-19 sung a vaipo ding kitelna om hi. Frontal Organization leh Unit tuamtuam apan palai paikhawm te’n 2017-19 sung a thulu dia “gam leh minam itna toh kipumkhatna” chih puaklut a om pomkip in, Election Commission-te term kum 3 hisek pen kum 2 hita dia a thupuk banuah guideline-te leng kipsak sem ua, Tedim Chin Cultural Club pen TCU nuai a kahiang khat hi nawnlou in, TCU HQ nuai a department khat hita ding in thupuk ua, Vice President etkaina nuai a om ding in thupuk uhi. Agenda teng genkhit in Election Commission-te makaih in 2017-19 sung a vaipo ding kitelna om a, palai paikhawm te’n President ding in H. Pau Za Chin a telching banuah Vice President ding in S. Khamkhanlam leh Secretary ding in H. Zam Khan Pau telching ua, tuaban ah, Joint Secretary ding in S. Jam Khan Mang, Finance Secretary ding in S. Jam Khan Mang, Treasurer ding in Rangpu leh Information Secretary ding in H. Mungtong leh S. Gin Sian Thang telching ua, telching thak a omte Rev. Lallet Thuomngell, Missions Secretary, CBA in kichiamsakna nei in amaute a ding in Pathian kiang ah vualzawlna ngetsak hi.


XXXXXXXXX


Board of Secondary Education Manipur (BSEM) leh Council of Higher Secondary Education Manipur (CoHSEM) nuai a Class X leh Class XII sinlel te’n tuni’n HSLC leh HSSLC exam nei nawn ua, buaina bangmah omlou in a ni 3 ni zousiang uhi. CCpur District ah CCpur District Private Centre Committee-te etkaina nuai ah candidate 2,943 te’n Main Ccentre Ebenezer Academy leh Sub-Centre Don Bosco Hr. Sec. School ah Social Science subject exam ua, candidate 2758 om lak ah 2728 present in, candidate 30 absent hi. Thutut kingah dan in, Main Centre Ebenezer Academy A Block ah candidate 635 present in candidate 5 absent a, B Block ah candidate 487 a present banah candidate 4 absent a, hiai centre ah a kigawm in candidate 1122 present in candidate 9 absent hi. Sub- Centre Don Bosco Hr. Sec. School A Block ah candidate 568 om lak ah 568 present a, B Block ah Candidate 399 om lak ah 6 absent in, C Block ah candidate 641 om lak ah 10 absent a, hia centre a candidate 1597 om lak ah candidate 1587 present in candidate 21 absent hi’n thutut kingah hi. Council of Hr. Sec. Education Manipur (CoHSEM) nuai a Class XII sinlel te’n leng tuni’n Geography subject exam ua, CCPur District sung a Class XII Geography subject la 1022 om lak ah candidate 999 present in, candidate 23 absent hi. Thutut kingah dan in, Rengkai Govt. Hr. Sec. School ah Geography subject la Arts leh Science Stream apan candidate 414 om in, tuni a exam neihna hun ah candidate 410 present in 4 absent a, Rayburn College Centre ah candidate 374 om lak ah candidate 365 present in 9 absent a, VK Tawna College centre tangkha Goeoraphy subject la a omlouh ziak in hiai centre ah exam omlou hi. Tuaban ah, tuni a exam pen Class X HSLC Exam toh a kituah khak ziak in Don Bosco Hr. sec. School centre tangkhate Childrens Training Hr. Sec. School ah exam ua, candidate 234 om lak ah 224 present in candidate 10 absent hi. Ngeina bang in tuni a exam neihna siangthou mahmah in, chiindan kilawmlou ching matkhiak a omlouh banah supply sawm muh ding leng kuamah omlou a, exam centre teng dai khipkhep zou hi.


XXXXXXXXX


Director of Ministries, EBC makaih in EBC Lamka South Division in South Division huamsung a om pastor leh Upa Ordain-te a ding in EBCC College Veng biakinn ah Kris nungzuihna toh kisai in Discipleship Seminar nei uhi. Hiai hun ah Lamka South Division, EBC huamsung a om Pastor leh Upa Ordain banah Upa Pahtakna lai sang mi 250 val kihel ua, hun zatna ahihleh hunbi 2 a kikhen in hunbi masa zinglam dak 9:00 in kipan hi. Seminar ahihleh Rev. V. Nenglian, Divisional Supdt., Lamka South Division in hongkhia in Rev. Paukhanmang Guite, Director of Ministries, EBC in “Philosophy of Discipleship” chih thupi zang in sinsak a, hunbi 2na ah Rev. S. Vungminthang, General Secretary, EBC in “Nungzuitu lungput” chih thupi zang in sinsak nawn a, sunnung dak 3:00 in programme zousiang uhi.


XXXXXXXXX


Bethany Male Voice te’n “Bangkim Jesu di’n” kichi Gospel Music Video a bawl uh tuni’n EBC Bethany, Zoar Veng, Bungmual ah hongkhia in, a deih khempeuhte lei theih ding in zuak khiat hita hi. Music Video honna programme ahihleh sunma dak 11:00 in kipan a, vengsung leh saptuam sung apan deihsaktu leh ngainatu tamtak kihel ua, H. Doukhanmuan in vaidawnna thu gen in, T. Jamzathang in Bethany Male Voice leh “Bangkim Jesu Di’n” kichi Gospel music video album hong piankhiat dan pulak hi. Aman a gendan in, 2013-14 sung in EBCC Bethany saptuam sung a lawmta mi 8 kipawlkhawm te’n hun lem a neih dandan un lazilna pan in, recording masapen 2015 July kha in nei ua, “Toupa tuh ka hinna” chih laa Faith Tune Studio, Lailam Veng ah khum uhi. Nikum apan in album piching bawl ding lunggulhna liantak nei in, May 27, 2016 laa khum ding zongkhawm in, album piching a ding in laa zilna pan ua, lawmta mi 8 kipawlkhawm te’n kha teng in sum a neih dandan uh kithoh khawm in, sponsor tu ding mi 9 a muh nung un July 1, 2016 in GMS studio ah recording pan in October 4, 2016 in recording teng zousiang ua, tukum February kha sung a music video teng shooting zou uh ahih dan gen hi. Hiai Gospel Music Video album ah phatna, biakna, thumna leh Vangam ngaihna laa 12 om a, hiai tungtawn a kuapeuh in kha lam vualzawlna a ngah uh a lamet thu gen hi. Programme hunsung in album sung a om laa tuamtuam mipi paikhawmte mai ah saa in, Rev. V. Thangkhangin, Director of Missions, EBC in hongkhia in Pathian kiang ah lankhia hi.


XXXXXXXXX


Lamka khopi sung ah vuah hong zuk zek leh hawktui in nullah sung a niin tuamtuam omte tuahkhia in khopi sung thanghuai sak mahmah a, enkai ding leh hahsiangtu ding kuamah om nawnlou in vuah zuk nawn matan om nilouhlouh hi. Hiai toh kisai in awlmohna liantak toh hichibang a niin tamtak omte kilawm salou in Don Bosco Hr. Sec. School Hostel a om naupang te’n Don Bosco gate bul a culvert apan hawktui in niin tamtak hon tuahkhiakte hahsiang in nna sem uhi. Thutut kingah dan in, Don Bosco School in Thengra Leirak Meitei Leikai apan hong kipan school huangsung tawn a pai hawktui luanna nullah hoihtak in bawl ua, himahleh a saklam a om te’n niin tuamtuam paihna dia a zat banuah a dailenbuk lawng teng uh khohsuk sak vek ua, vuah zuk hun chiang in hawktui in nullah sung a om niin tuamtuamte taisuk in, Don Bosco School gate bul a electric transformer kiang a culvert ah kikhawl khawm a, huai in Don Bosco School kiim leh kiang thanghuaisak mahmah in paisuk-paitoute a ding in nawngkai thei mahmah hi. Hiai toh kisai in Don Bosco School in ADC leh District Administration kiang ah ngetna bangzah vei hiam pelut mahle uh ngaihsak in omlou ua, school kiim a hiai bang thil thanghuai tamtak omte kilawmsa lou in Don Bosco Hr. Sec. School Hostel a om naupang te’n tuni’n hahsiang vek ua, niin bulomte school gari zang in Khuga Dam gal ah va paih siang vek uhi. Hichibang niin om te’n khopi sung a thanghuaisak kia hilou in a kiim leh kiang a omte a ding in damtheih huailou ahihman in, kuapeuh in nullah pen hawktui luanna dia kibawl ahih lam phawk thak, niin neng i neihte dustbin ah paih thei chiat leng khopi sung siangthou mai ding a, khantouhna khat leng hiding hi. Tuaban ah, tulel in government department teng under-staff ngen ahihna ah, Khopi sung siangthouna lam enkaitute leng kidaihzou mahmah lou uh ahihman in, government pen kingakna taaklou suak phot a, mipi lam in pan a lak hun mahmahta hi. Tuuktui luan hun kipan ding ahih toh kiton in vengchih in, tuuktui luan ma ngeingei a mahni vengsung a nullah teng ana hahsiang thei leng khopi sung leng siangthou tuan mahmah ding a, damtheihna lam leng tua sang mah a leng hoihzaw ding hi’n kigen hi.


XXXXXXXXX

Read 819 times
Login to post comments