You are here: HomeNewsGeneralAngels Vision News | March 27, 2017

Angels Vision News | March 27, 2017

Written by  Angels Vision Published inGeneral Monday, 27 March 2017 23:59

District AIDS Prevention & Control Unit (DAPCU) in tuni’n CMO Conference Hall ah PLHIV-te a ding Capacity Building nei in awareness programme toh thuah ua, PLHIV-te haksatna tuamtuamte banah PLHIV-te a dia scheme tuamtuam omte toh kisai genkhawm uhi. Programme ahihleh sunma dak 11:00 in kipan a, T. Benjamin, DIS/DAPCU in vaidawnna thu gen in, hiai programme kizatna ziak pulak a, Dr. Kimngaihching, CMO/CCPur in hasotna thu gen hi. Hiai hun ah teltuam PLHIV mi 25 a kihel banuah SHALOM, DAPCU leh NGO tuamtuam apan palai hunkhop in uap ua, Mrs. Haukim in PLHIV te’n haksatna tuamtuam a tuahte maituah ding dan sinsak in, SHALOM te’n PLHIV-te a dia scheme tuamtuam omte pulak in hiai tungtawn a hamphatna ngah theih ding dan toh kisai sinsak uhi.

T. Benjamin, DIS/DAPCU in a gendan in, Churachandpur District ah ART Centre 2006 kum in kipankhia a, tuni tan in mi 3,587 in registration bawl in, ART ne lel 1,533 omlel a, mi 173-te omna mun suikhiak zohlouh (Lost to Follow-up) om hi’n gen a, tu 2016-17 sung in Lamka Damdawi Inn ah HIV Positive nau nei mi 64 om in, Lost to Follow-up 1 om ziak in December kha in naungek 1 si hi’n gen hi. Naupaai himhim doctor in hoihtak a acheck nung in damdawi neksak ngal hi ua, huai in nu apan naungek lohsawn ding veng a, hiai naungeknu’n hoihtak a damdawi netou hileh naungek kho theilou hehpih huaitak hinna mansuah hilou ding hi’n gen hi. Dr. Kimngaihching, CMO/CCPur in a thugenna ah, government in kuamah khentuam neilou in, a zawng hi’n a haute hitaleh a damtheihna uh etkaina lah ah a kibang in enkol vek a, tua ziak mah in ART Centre pankhia in sum tamtak seng in damdawi a thawn a hawm hi’n gen hi. Tuni chiang in siamna sang mahmahta in, HIV Positive-te a ding in leng damdawi hoihtak tak a thawn in muh ding omta a, i dam peih tantan damdawi nek ding hilel ahihman in, damdawi nek lam ah kuapeuh in kuhkalna suah a, government in hiai tan a hamphatna hon piakte a thawn a mawk beisak mailou ding in hasuan a, kuamah kimawk ngaihsiat mailou a, midang in hiai natna a kailouhna dia palai ginom a pangchiat zaw ding in hasuan hi.

 

XXXXXXX


Joint Action Committee Against Anti-Tribal Bills (JAC-AATB) makaih in zingchiang March 28, 2017 sunma dak 11:00 in YPA GHQ Hall, Hiangtam Lamka ah Public Consultation om ding a, hiai hun ah tribal movement pailel toh kisai banah Manipur Chief Minister thak N. Biren Singh in kihou dia a chialna toh kisai a ngaihdan tuamtuam omte kikup khawmna om ding hi. Thutut kingah dan in, Manipur Chief Minister thak N. Biren Singh in Manipur singtangmite buaina toh kisai banah gam leh leitang a dia hinna ana pia tribal martyr vui nailouh a om mi 8-te tungtang genkhawm ding in JAC-AATB Chief Convenor H. Mangchinkhup kiang ah chialna bawl a, JAC-AATB in kihouna neih theihna dia tribal society tuamtuamte ngaihdan lak masak ngai ahih dan a theihsak a, maban pai ding dan toh kisai a kinthei bangpen thuzak ding ahih dan theisak hi. JAC-AATB in zingchiang a Public Consultation neihna ding ah lunglutna nei society leh mimal tuamtuamte kihel ding in chialna bawl a, mimal tak a hong kilang theilou te’n leng This email address is being protected from spambots. You need JavaScript enabled to view it. tungtawn in tuzan zankim tan a ngaihdan a neihte uh khak teitei ding in ngetna bawl hi.


XXXXXXX


Tuni zinglam dak 11:00 in District Immunization Officer/DFWO, CCpur makaih in Intensified Pulse Polio Immunization (IPPI) Second Round neihna ding toh kisai a Divisional Supervisor leh Sectoral Supervisor dia seh a om te’n DFWO Conference Hall ah training nei uhi. IPPI Second Round ahihleh hongtung ding April 2-4, 2017 sung in neih hiding a, CCpur District in Transit Booth toh sim in Division 7 a khen in Polio Booth 444 hongkhia in naupang kum 5 apan a nuailamte kiang ah Polio (Zeng) dalna damdawi dawnsak hiding hi. Training neihna toh kisai a hoihzaw ding gelna in DIO/DFWO, CCpur in training neih ni ding bikhiah bawl in, tuni’n Tipaimukh Block, Thanlon Block leh Singngat Block a Divisional Supervisor leh Sectoral Supervisor dia seh a om doctor leh nurse-te a ding in training neih hi a, zingchiang in Saikot leh Samulamlan Block te’n nei nawn ding ua, zinghal chiang in Henglep Block te’n training nei ding uhi. Tuaban ah, March 30, 2017 in Zezaw PHC leh Vangai Range huamsung a Divisional leh Sectoral Supervisor dia seh a om te’n training nei nawn ding ua, March 31, 2017 in Town Area a te’n nei in IPPI Second Round toh kisai a training neihna zohsiang hiding hi. Training hunsung in Dr. VC Pau Tonsing, DIO/DFWO, CCpur in sinsak hi.


XXXXXXX

Tuibuang a om Thanglunmang leh Pangzawl a om Ch. Mangsuanmung te’n tuni’n Lamka Damdawi Inn Blood bank ah Sisan chauh ziak a tulel a Lamka Damdawi Inn a etkol a om Thangpi (32) s/o Ginkhothang of Suangphuh a ding sisan pia uhi. Thutut kingah dan in, tulel a LamkaDamdawi Inn a etkol a om Master Biakding (12) s/o Thangchinpau of Sinzawl in sisan a poimoh ziak in tuzingkal in a sungkuante CT Lian Guite, MDC kiang ah va tai ua, hiai thu social media tuamtuam ah kapkhiak a om in, CT Lian Guite in leng kin-le-buang in sisan pe ding mi zangsak ngal a, sisan pe ding mi 2 – Thanglunmang leh Ch. Mangsuanmung mu in, Blood bank ah sisan pe ding in va pai ua, vangphat huaitak in Biakding sungkuan te’n replacement ding ana mu man uhi. Huchi kawmkal ah, CT Lian Guite in Damlou-genthei leh haksatak a etkol a om Thangpi va mukha in, sisan poimoh ahih dan ana hilh ua, Master Biakding a dia sisan pe dia kisa mi 2 te’n a sisan manphatak uh Thangpi a ding in pia ua, a sungkuan te’n kipak mahmah uh ahih dan gen uhi. Thangpi ahihleh sisan chauh ziak banah a guh a taang nat ziak a apaisa March 10, 2017 a Lamka Damdawi Inn a admit a om hi a, doctor te’n Imphal a etkol dia refer in tuni sunnung lam in Imphal ah puaksuk in om hi.


XXXXXXX


State Blood Cell, NHM, Manipur saina in tuni’n State Guest House, Sanjenthong, Imphal ah ni 2 sung daih ding Blood Donors’ Motivation Training kipan a, CCPur District apan mi 3 hiai training ah kihel uhi. CCpur District apan Blood Donors’ Motivation Training a tel mi 3-te ahihleh Lt. Suan Hauzel, Thangtinlun, PC Nunga leh H. Romesh hi ua, training ahihleh zingchiang in zousiang ding uhi. Hiai Training ahihleh State Blood Cell, Manipur in West Bengal Voluntary Blood Donors Forum toh kituah a asai uh hi a, Manipur pumpi apan mi poimoh tuamtuam tamtak a kihel uhi. Training hunsung in West Bengal Voluntary Blood Donors Forum leh State Blood Cell apan resource person te’n thupi tuamtuam zang in sinsak uhi.


XXXXXXX


Manipur Chief Minister N. Biren Singh makaih coalition Govt. nuai a Cabinet Minister (Agriculture, Veterinary & Animal Husbandry) tanvou piak a om V. Hangkhanlian in zan in Imphal apan a tenna inn Lamka hongtung in, mimal leh pawl tuamtuam te’n kipahpihna in puamdum silhsak uhi. Zan sunnung lam in Zomi Mothers’ Association (ZMA) GHQ in Agriculture Minister V. Hangkhanlian a tenna inn ah kimuhpih in Zomi Puan silhsak ua, Ngathal Metei Leikai Meira Paibi te'n leng nitak in kipahpih etsakna in pak-khi va ok-sak uhi. Tuabangkal ah, tu Kiginni paita in Siamsinpawlpi JHQ Imphal heutute’n Manipur Legislative Assembly tu term a dia Pu V. Hangkhanlian, MLA in Minister Agriculture/Veterinary - Animal Husbandry leh Pu Vungzagin Valte, MLA in Chairman MTDC Manipur hihna amuh uh kipahpih mahmah ahi chih latsakna in a tenna inn tuak uh pha in BA puandum va silhsak uhi. Hiai hun ah SSPP JHQ Imphal a President In-charge in MLA thak te'n ahihna uh Christian hindan tawisang kawm a diktat leh ginom tak a sepding bangte a hong sep uh a deihsak thu gen in, nidang sang mah in tutung a MLA thakte mipi'n hamphatpih mahmah ding ahih dan lam-et huai a sak thu gen hi.


XXXXXXX


All Tribal Women Union (ATWU) makaih numei pawl te’n tuni’n District Hospital Morgue ah “Piangthaksate Gingtu Hinkhua” chih thupi zang in Seminar nei uhi. Hiai hun ah Lamka khopi sung leh a sehvel apan mi tamtak paikhawm ua, ngeina bang in thumkhawmna leh slogun sapna a neih banuah mi tuamtuam apan thugen ngaihkhiakna leng ua, lungsim a puakgik a neihte uh kikup khawmna hun a zang in, Manipur singtangmi te’n kivaihawmna tuam a neih theihna ding uleh thudik-thutang a vaihawmna a om theihna ding in Pathian buan in thumna nei uhi. Seminar ahihleh sunma dak 11:00 in kipan a, Miss Deborah Zou in “Piangthaksate Gingtu Hinkhua” chih thupi zang in sinsak a, gingtute’ gamtat ding dan tel in thu tuamtuam gen in mipi paikhawm te’n phatuampih mahmah uh hi’n kigen hi.

XXXXX

Read 991 times
Login to post comments