You are here: HomeNewsLamka PostThe Lamka Post | November 26, 2015

The Lamka Post | November 26, 2015

Written by  Published inLamka Post Thursday, 26 November 2015 17:02

Parliament Winter Session kipan ding:
‘Intolerance’ toh kisai in Inpi ah opposition-te’n Goverment nawk sawm
NEW DELHI, Nov 25: Zingchiang Ningani a kha khat sung phial daih ding Parliament winter session kipan ding a hih toh kiton in tuni’n all-party meeting 2- Lok Sabha Speaker Sumitra Mahajan makaih all-party meeting khat leh Union Parliamentary Affairs Minister Venkaiah Naidu makaih all-party meeting dang khat neih in om hi.

 

Winter Session sung a Goods and Services Tax (GST) bill pass ding lunggulh mahmah ruling NDA government in thubuai om khempeuh genkhawm ding in kimansa in om uh chi’n puangkhin mahle uh Congress makaih opposition party-te’n gamsung lingsak zou mahmah ‘intolerance’ tel in thubuai tuamtuam pansan a National Democratic Alliance (NDA) government nawk ek a sawm utoh kiton in, Parliament Winter Session om ding sousang nawn ding in kilang hi.

 

Parliament Winter Session a kipat toh kiton in, Constitution bawlkhetu B R Ambedkar pianchampha kum 125 chinna zatna leng om ngal ding hi. Hiai a ding toh kisai in Government in Constitution thu toh kisai genkhawmna hun ding in Session ni masa nihte special sitting dan a paipih ding in thupuk hi. Huchi hileh Seppatni chiang a kipan Government in Inpi a agenda luikhiakna a pat toh kiton in Opposition-te’n government nawkna nasatak pan ding uhi.

 

Zan Sepnawnni in senior minister-te’n Inpi a kithutuak tak a pangkhawm a panlakna leh nasep dingdan toh kisai genkhawm uhi. Hiai hun ah tunai zek a thiltung khenkhat a bik in Dadri a kithahna, rationalist MM Kalburgi thahna thubuai leh intolerance a khangtouzelte toh kisai pansan a campaign pailel omte genkhawm uhi. Party khenkhat a bik in Congress, Janata Dal (United) a hihkeileh JD(U) leh CPI-M –te’n intolerance thubuai tungtang kikantuahna ding a notice piak ding in thupuk ua, kipuahthakna ding a poimoh hi a kigen GST toh kisai in Government nawk ek sawm uhi.

 

Congress thusuak in a taklatdan in, maban session om ding ah Haryana a Dalit inkuan khat apan unau naupang nih mei a hallupna thu a ui (dog) zang a kampau kilawmlou zangkhia Union Minister VK Singh tel in minister hunkhop in Congress party thangpaihna maituah maithei ding uhi. GST thubuai toh kisai in Congress in a lungsim diktak puang ngal a, a kisaipih party-te lungtunna sukkhak ahihleh GST Bill pass theih hipan ding chi’n genkhin uhi.

 

Lok Sabha a Congress makai Mallikarjun Kharge in ‘intolerance’ toh kisai genkhawmna ding a notice khat pekhinta uh a hihdan leh Rule 193 nuai a koih hiding chi’n gen hi. CPI(M) General Secretary Sitaram Yechury in a gendan in, “Government in GST Bill toh kisai a home work semkhinlou ahi chi’n gen hi. All-party meeting sap chih leng a om kei a, Inpi a bill sukfel a hihkeileh government in moh a kipuak ding ahi chi’n gen hi. JD(U) –te’n leng Inpi a ‘Rule 267 of suspension of business’ pansan in dal, sathau leh anteh man khanthu toh kisai Inpi a tangkoupih ding in thupuk uhi. Party President President Sharad Yadav in a gendan in, kha 18 paisa sung a ‘intolerance’ khangtouzel a hihdan laktu ‘Ghar Wapasi’, Dadri kithahna thiltung tengteng Inpi ah tangkoupih hiding chi’n gen hi. Parliament a ‘intolerance’ toh kisai genkhawmna ding in notice khat leng piak hiding chi’n gen hi.

 

JD-U general secretary KC Tyagi in a gendan in, Prime Minister in Union Ministers Giriraj Singh, Sadhvi Niranjany Jyoti, Mahesh Sharma, V K Singh leh Sanjiv Balyan-te a paihkhiak masak ding ahi. Debate leh thupukna lakna kia lel huntawklou ahi chi’n gen hi. Tulel in Parliament in a pompih ding finance bills khenkhat tel in, a vek in Bill 38 pompihlouh om denlai hi. GST Bill poimoh tak khat Parliament ah awk den lai a, tu session ah government in pass ngei leng kilam en hi.(PTI)

 


Saudi Arabia kumpi’n Al-Jarba Hospital, College leh Masjit bawlna ding suangphum
Imphal, Nov. 25: Saudi Arabia kumpi Al- Jarba Khaled Wattban Sheikh in tuni, Nilaini in Imphal East District sung Khabeisoi ah Al-Jarba Hospital, College leh Masjit bawlna ding suangphum koih hi.

 

Ni nihsung Manipur veh dia hong zin Saudi Arabia kumpi Al Jarba Khalad Wattban in ahihleh tutung a Manipur hong phak pen a khatveina hi a, aman Jamia Halima Aziz Educational Trust nuai ah Al-Jarba Multi-Specialty Hospital, Al-Jarba Higher Education College leh Al- Jarba Masjit bawlna ding suangphumna hong nei hi.

 

Hiai hun a Saudi Arabia kumpi’n a genna ah, Manipur hong phak masakna pen himahleh Manipur mite siamna leh zintun siamdan hong mukhia ahihdan gen hi. Huai banah tuni a Jamia Halima Aziz Educational Trust nuai ah Al-Jarba Multi-Specialty Hospital, Al-Jarba Higher Education College leh Al- Jarba Masjit bawlna ding suangphumna om pen Manipur Muslimte’n khovel a Islam sahkhua zuite a dia mun siangthoupen suahsak ding a Muslimte’n a damsung ua a veh utna mun uh ahihtheihna dia hoihtak a bawl ding in ngen hi. Muslim sahkhua toh kisai a thil poimoh mahmah 3 bawlkhiakna ding pen Jamia Halima Aziz Educational Trust deihsakna tungtawn a piangkhia ahihman in sinlai naupangte hoihtak a hiai mun pansan a sinsak ding in ngen hi.

 

UAE kumpi’n a genzelna ah, Muslim sahkhua leh tawndan hoih mahleh dikloutak a zat ahihleh siatna tunthei ahihman in khovel a lemna leh muanna tuntu hihsawm chiat ding in ngen hi. Huai banah Jamia Halima Aziz Educational Trust panpihna dia a theihtawp suah ding ahihdan leng gen hi.

 

Tuni a hun zatna ah Badr, Sami Ahmed A. Sheikh of Saudi Arabia, Mohammand Ali Siddiqui Secretary (Al-Jarba Khaled Wattban) leh Dr Tajuddin Asnsari National Commission for SC and ST government of India, M Asnikumar General Secretary BJP leh Dr Antas Khan chihte tel uhi.

 


DIPR in 15-days News reporting course sai ding
Imphal, Nov-25: Directorate of Information & public relations (DIPR) Government of Manipur in January 2016 2nd week lak in Manipur Press Club, Imphal ah 15-days News reporting course sai ding ding hi’n DIPR Director Somorjit Salam in tuni’n notification suahkhia hi.

 

Huai notification in a taklat danin, graduate or 10+2 zousa journalist nasep sem lel lunglutna neite telthei ding uh a, seat 50 lel hon hiding banah participant kuapeuh kiang ah course material piak hiding uhi. Lunglut a telnuamte’n Imphal a Moirangkhom MSRTC old bus parking kiang a DIPR Cash Counter ah course fee Rs. 300 sumtang in piak theih ding hi’n thusuak in taklang hi.

 


By-election nung a thiltung ziak a buaina hihveng kin di’n noh
IMPHAL, Nov 25: Manipur assembly constituency nih a by-election result puankhiak ahihnung zan a BJP worker-te leh Imphal a private financial institution a staff-te kal a buaina ziak a thagumsuahna thiltung toh kisai ngaikhawk mahmah ahihdan Thongju assembly constituency a pan telching a om BJP candidate Thongam Biswajit in gen a, huai banah hiai buaina thiltung toh kisai a baihtheipen a hihveng ding in state government ngen hi.

 

Zan, Sepnawnni nitaklam a by-election result puankhiaknung in Imphal East district Khongman area ah buaina thiltung ziak in thagum suahna tanpha tung a, hiai thiltung ah mi 8 liam in hospital ah etkol in om uhi. Telching a om BJP candidate Th Biswajit in a genna ah, private financial institution leh school leng bawlkhawm UNNACO guard-te’n BJP gumte lak thau in bankap ua, huai thiltung ziak a thagumsuahna piangkhia leh UNNACO huangsung a garite a tamzaw pei nihnei tamtak halsiat a om hidan in gen hi.

 

Hiai thiltung ahihleh Khongman Bashikhong, Uchekon leh Singjamei Kshetri Leikai a pan mipi tamtak in BJP candidate lohchinna kipahpih a lampi a zuihlai un, UNNACO complex kong a guard-te’n mipite ana dal in thau in ana kap ua, tua ziak a buaina huaisetak leh thagumsuahna tanpha piangkhia hidan in thusuak in taklang hi.

 

 


MPC in MLA Lalruatkima tungtang genchian
Aizawl, Nov-25: Mizo Peoples Convention (MPC) Party General Headquarters a Youth wing in tuni a thusuah a bawlna ah MLA Lalruatkima in AMC Deputy Mayor leh Councillor-te zuauthu a kiselpih in khemsawm hidan in taklang a, Lalruatkima in AMC deputy mayor leh Councillor-te thilhih diklou dan a ngohna a bawl leng bulbal bei hi’n taklang hi.

 

Thusuak dan in, MNF party in RTI tungtawn a work order toh kisai a sum zah, issue date, name of contractor leh serial no. a taklat te pansan a MLA Lalruatkima in AMC offcialte a ngohpen velchian masalou a pompah hi a, ngoh in huai Work Order bawltawm maimai hizaw in taklang uhi. MPC Youth wing in hichibang thilhih pen MNF in voter te zuau a khem a vote a piak theihna ding a thilhih hizaw inleng taklang uhi. AMC election ah Congress leh MPC kikawi uh a, a dinmun uh a hoihsim ziak a opposition MNF in vote muh theihna ding a hiaibang thil diklou a bawlna ah a kituahpih gawtna mu ding in leng MPC Youth in a thusuahna uah taklang uhi.

 

 


Sangai Festival ah ‘Food Stall’ khat nohkhiak in om, sample 5 ‘lab-test’ di’n khak
IMPHAL, Nov 25: Imphal East district sung Hatta Kanjeibung a Sangai festival zatna pailel ah, Food Safety Officer (FSO) hihna len dia mohpuakna piak a om in ‘food stall’ khat a pan in an leh nektheih zuaktute’n food stall teng in a zuih ding ua dan kibawl a zuihlouh ziak in khaksak a, hiai mun a food stall bawlthei nawnlou dia nohkhia in stall tuamtuam a kipan food sample chi 5 laboratory test ding a khak hidan in thusuak in taklang hi. 

 

Thusuak in a taklatdan in, Hapta Kanjeibung ah food stall 63 kibawl a, huai lak ah.food stall khat in tualsung a kibawl chikhum chikhat ‘Mayang Makoi’ kichi ah rong zat ding phallouh a hel banah vanzat siangthoulou zang a bawl ahihdan theihkhiak ahihziak in Th Sunil Kumar FSO I/E leh a team-te hiai mun a kipan nohkhia uhi.

 

Huai banah hiai food stall a kipan in food sample 6 lak hi a, huaite Lamphel a food Laboratory a etchet hiding a, sianglou leh mihing damtheihna toh kituaklou ahihdan muhkhiak ahihleh a license leng ‘cancel-sak hiding hi’n FSO in gen hi.

 

Tuni a state health directorate a pan Food Safety team in Sangai Festival zatna a food stall tuamtuam a etchetna uah, food business operators (FBOs) tamtak in nektheih leh an bawlna ah khutbuh bunlou leh kituamlou a bawl uh ahihdan mukhia ua, tunung a siangthou theipen dia nektheih chituamtuam bawl ding in theisak uhi.

 

FSO team-te’n FBO-te kiang ah nektheih bawlna ding toh kisai a zuih ding dan kibawlte hoihtak a zuichiat ding nektheih bawlte siangthoulouh ziak a matkhiak a om leh kum 5 sung suangkultan ahihkeileh Rs 1 - 5 lakh kikal liausak theih ahihdan gen uhi.

 

 


JAC in misite vuina ding in Torbung Sericulture farm hithei chih deihthu taklang
LAMKA, Nov 3: Tuni, Nov 25 sunnung dak 3:00 in JAC Information Centre, KKL Complex ah JAC in ‘press meet’ nei ua, Bill 3 toh kisai leh Tribal Martyr-te vui ding tungtang hilhchetna bawl uhi.

 

Hiai hun a Benjamin Hmar, JAC Jiribam in a genna ah, JAC/Ccpur, JAC/ Jiribam leh ATSUM a pan palai 10 in October 7, 2015 in Lamka nusia in Delhi zuan ua, Delhi ah Union Minister leh central official tuamtuam mu uh ahihdan gen hi. Huai nung in Ministry of Home Affairs (MHA) apan in Bill thum toh kisai a singtangmite, phaizangmite leh a kisaikhakpihte apan ngaihdan lalou a, thupukna bawl hilou ding ahihdan gelhthoh a theihsakna pia ahihdan leh Tribal Martyr-te luang vuikhiak dia theisak hi’n gen hi.

 

Hiai hun ah Manipur Tribal Forum, Delhi (MTFD) leh JAC kal a bangtan kizopna om hiam chih JAC makaite’n a dawnna uah, Delhi ah MTFD in eite a ding mah a panla ahihziak un a panlakna uh kipahpih ahihdan gen ua, November 30, 2015 chiang a Parliament Winter Session om ding a i buaina thu leh Tribal Marytr-te luang tunitan a vuilouh a om tungtang puaklut a sawm ziak ua vuilou phot dia ngetna a bawl uh ahihdan gen hi. Himahleh huai nung a bel Salphate luang vuikhiak theih ding ahihdan leng gen hi.

 

Tribal Martyr-te luang vuina mun ding tungtang ah JPO in a mun ding enkual dia mohpuakna piak ahihdung in, Bungmual a ADC Complex a vui dia panlak himahleh mipi leh press tungtawn a ‘suggestion’ om dungzui in, Torbung Sericulture Farm, Tedim Road tumlam pang hileh chih a deihthu uh ngaihdan press te tungtawn in mipite theisak uhi.

 

 


Police Station kong ah Street Light thuah zouta
LAMKA, Nov 25: High Mash Global Electrification Company in Lamka Police Station kong Traffic point ah Street light ding metres 20 vel a sang machine zang in zan sunnung dak 4:00 in a khuam ding phut uhi. Company-te’n tuni’n Street Light thuah ua, bulb 16 bulh uhi. Electric a pan meivak ding ahih ziak in tuni mah in Police Station sung a Transformer toh zopna ding JCB zang in khuak uhi.

 


Si galna di’n Rs 90,916/- pe khawm
Lamka Nov 25: Lamka Damdawi Inn a JPO Information Centre ah tuni sunnung dak 4:00 tan in mimal leh pawl tuam tuam in Salphate galna ding in Rs. 90,916/- pe khawm uhi. Huaite ahihleh Zomi Community of Canada c/o M. Gouzamang, EM/ADCC in Rs. 47,036/-; Vumkhankhup, Zenhang Lamka in Rs. 100/-; S. Thanglian, Belam Veng, Hqtrs. Veng in Rs. 200/- leh Zomi Agape Christian Church, Scattle W. A.. (USA) c/o BK. Swanno, Hmuia Veng in Rs. 43,580/- pia uhi. Huailou in, zingchiang in Lamka Damdawi Inn a Salphate galna mun ah YPA in singpi awmna toh kisai mohpuakna la ding uhi.

 

 


Malaria Dept in ni 2 sung Thonlon bial veh
Lamka Nov 25: CCpur District Hospital nuai a Malaria Deptt in ni nih sung Thanlon bial ah Monitoring & Evaluation Supervisory Monthly visit va nei uhi. Monitoring & Evaluation Supervisory team-te ahihleh L. Guite, District Malaria Officer in makaih a, amau ni nih sung in PHSC thum leh PHC khat enkhia ua, khochih a ASHA worker-te nasepdan leng enkhia uhi.

 

Malaria Department in Thanlon bial a veh hun ah ASHA worker-te lak ah ‘awareness campaign’ nei ua, hiai hun ah ASHA tungtawn a government a pan hamphatna tuamtuam omte genkhawm uhi.

 

Huaite ahihleh ASHA worker-te’n amau area sung a damlou malaria vei dia muamoh Slide RD Kits zang a sisan a lak uh Malaria Office, CMO Campus ah a piaklut ua leh khat ah Rs. 15 zel mu ding ua, sisan test dia a lak uh Malaria Positive ahihleh mi khat ah Rs. 75 zel mu ding uh ahihdan genpih uhi. Huai banah ASHA worker-te’n damtheihna toh kisai a poimohna lianpi nei ahihna ah ASHA worker-te kikoihdap mailou a, damtheihna toh kisai a naktak a pang ding in hasuan uhi.

 

Malaria Deptt in ahihleh kha teng in bial tuamtuam phak sawm ua, khanawn December in Behiang lam pha ding ua, hiai hun ah PHC leh PHSC ban ah ASHA worker-te nasepdan enkhia nawn ding uhi.

 

 


SSPP FC player-te khakkhiakna om ding
LAMKA, Nov 25: Zingchiang, sunma dak 11 in SSPP/GHQ Complex, Siloam Veng, Bungmual ah, 9th ONGC NE Thomchon Memorial Football Tournament 2015 (1st - 12th December, 2015) sung Ambedkar Stadium, New Delhi a om ding a kuan ding SSPP FC player-te thumsakna leh khakkhiakna om ding hi.

 

Hiai hun ah Lianzapau Samte, President, SSPP-GHQ in SSPP FC player-te pulak ding a, Rev K Kamchinkhup, Director of Mission /EBC in hasotna thugen in thumsak ding a, Ricky L Vanlallawm Guite, Chairman, Standing Committee, SSPP-GHQ in SSPP FC player-te ‘flag off’ ding hi.

 

 


Upa (L) Vumzakhup Vualnam Memorial Trophy final kimawlna om
Lamka Nov 25: A khat veina Upa (Late) Vumzakhup Vualnam Memorial Trophy- 2015 kimawlna, Zenhang Lamka Playground a neih a om tuni, November 25, 2015 sunnung dak 2:00 in Final Match kimawlna om hi. Kimawlna half-time ah program saulou zatna om a, hiai hun Dr. Dallian Haokip, Principal, Blue Star Academy in chief guest hihna toh uap ding chih himahleh lemtanlouhna ziak in a zi, Niangnou in amah sik-le-tang in hiai hun uap a, G. Thangkhosuanmung, Chief of Hiangtam Lamka leh EM/ADCC in guest of honor hihna toh uap hi.

 

Upa Chinzagin Vualnam in patna thumna nei a, V. Tunzamang in vaidawn thugen hi. V. Thangkhanlal in hiai hun ah a pa, phamsa Upa Vumzakhup Vualnam tanchin tomkim gen in, khualliante a pan thugenna om hi.

 

Chief Guest in hiai bang a phamsate min manlouhna dia tu-le-tate’n hiai bang kimawlna a sai uh kipahpih ahihdan leh maban ah leng hon saihtouh zel uh a deihthu gen in, huai dia a poimohna a neihleh panpih dia mansa a om ahihdan uh gen hi.

 

Guest of Honor in hiai tournament, final kimawlna tanpha neih ahihtheihna dia vaisaite kipiak zohna tung ah kipahthu gen a, hiai hun zatna, phamsate phawkna dia thilsai ahih ziak a uap ahihdan gen a, nop bawlna thil hileh bel uaplou ding ahihdan gen in, phamsa Vumzakhup Vualnam leh Tribal Martyr 9-te suunthu gen hi.

 

Final Match ahihleh Suansiamlian Football Club, Zenhang Lamka leh Gual Kilungtuak, Headquarter Veng kimawl ua, Suansiamlian FC in first half tan ah 1 - 0 in lead ua, second half ah GKLT in a ditkik zohlouh banuah, Suansiamlian FC in Goal thum khumbeh in full time tan ah, Suansiamluan FC in 4 - 0 a GKLT zoukhia in, a 1veina Upa (Late) Vumzakhup Vualnam Memorial Trophy - 2015 kimawlna ah Champion hihna la in, kipahman Rs. 5,000 leh Trophy sang uhi.

 

Upa (Late) Vumzakhup Vualnam Memorial Trophy 2015 ahihleh a paisa October 12, 2015 ni a pan kimawl pat hi a, hiai tournament ah team 19 kihel uhi.

 

 


Meghalaya CJ in ADR Centre ding suangphum
Shillong, Nov-25: Shillong khopi sung Mawdiandiang mun a Meghalaya State Legal Services Authority (MSLSA) a dia Alternative Disputes Resolution Centre (ADR) thak bawlkhiakna mun ding tuni’n Meghalaya Chief Justice Uma Nath Singh in suangphumna nei hi.

 

Huai sungphumna hun ah Justice TNK Singh, tulel a Executive Chairman, Meghalaya State Legal Services Authority leh Justice S R Sen leng tel uh a, suangphumna nei Meghalaya Chief Justice Uma Nath Singh ahihleh Meghalaya State Legal Services Authority a Patron-in-Chief leng ahi hi. Huai suangphumna zoh in Meghalaya State Legal Services Authority Multi Utility Van honkhiakna leh khahkhiakna leng Justice Uma Nath Singh leh Judge 2 in neizom uhi. .

 

Alternative Disputes Resolution (ADR) paidan tangpi ahihleh thubuai khatpeuh a buainate neite’n a pom theihtuak ding a negotiation, mediation, conciliation leh arbitration tungtawn a saifel theihte saifel hi a, tulai khangthak hun a innkuansung leh nupa kal buaina khenkhat saina ding a practical a phatuam mahmah hi’n kigen hi.

 

 


Mizoram ah state level Maths competition nei
Aizawl, Nov-25: Mizoram Mathematics Society leh Mizoram Council of Science & Technology & Environment kigawm a saina in tuni’n Mizoram state sung centre 5 ah 7th state-wide Mathematics competition sai uh a, huai ah a kigawm in student 1942 tel uh hi’n official thusuak in taklang hi.

 

Thusuakdan in, Aizawl, Lunglei, Champhai, Serchhip leh Kolasib ah exam centre hon in om a, a telte ahihleh Class V, VIII, X leh XII student te hi uhi. Class V a pan in student 406, Class VIII a pan in student 566, Class X a pan in student 734 leh Class XII a pan in student 236 tel uhi. Aizawl a Exam centre ding in Pachhunga University College zat in om a, huaimun ah student tam exam pen in a kigawm in 1292 exam uhi. Organiser-te a pan thusuakdan in, hiai competition ahihleh Mizo student-te lak a international level Mathematics Olympiad exam hun a tel a tam ding tupna hi’n gen uh a, best performing student-te kiang ah certificate leh sumtang in award piakkhiak hiding in taklang uhi.

 

Mizoram Mathematics Society leh State Council of Educational Research & Training (SCERT kigawm in December 16-28, 2015 sung in teacher leh student bangzahhiam tuak telkhiak a omte lak ah Indian National Mathematics Olympiad (INMO) maituah dingdan sinsakna intensive training om ding hi’n leng thusuak in taklang hi.

 

 


Biswajit in polling booth 38 ah makai in Joykishan in 29 ah makai
IMPHAL, Nov 25: Thangmeiband assembly constituency a BJP candidate Khumukcham Joykishan in vote 12,104 mu in telching hi a, aman polling booth 41 lak ah 29 ah hatpen hihna ngah in a kikhinpih INC candidate Jyotin Waikhom in vote 10,197 mu in polling booths 12 ah makai hi.

 

Thongju constituency a BJP candidate mah MLA Th Biswajit in vote 14,606 mu in polling booth 45 lak ah 38 ah makai a, a kikhinpih INC candidate Bijoy Koijam in vote 11,393 mu in polling booths 6 ah makai hi. Thongju assembly constituency sung Thongju part II Maibi Lampak Sarda Primary School polling booth ah candidate nihte’n vote 356 tuak mu uhi.

 

Joykishan in thuthaksaite kiang a tuni a, a genna ah, Manipur assembly a member 60 omna lak a opposition member poimohtak hiding leh a constituency sung mipite a dia nasem dia kimanta ahihdan gen hi.

 

Tukum February- March assembly session sung a ‘starred questions’ bawl tampen huai hun a Trinamool Congress MLA Kh Joykishan in a genna ah, Manipur assembly innpi a opposition member poimohtak hitou ding ahihdan gen hi. Hiai hun ah Joykishan in starred 7 leh unstarred questions 3 dong a, Naga People’s Front MLA Samuel Risom of Ukhrul assembly inleng ‘starred questions’ 6 leh ‘unstarred questions’ 11 bawl hi.

 

Manipur Assembly constituency nih a by-election neih a omna ziak ahihleh Speaker’s Tribunal in MLA Kh Joykishan of Thangmeiband leh Th Biswajit of Thongju tung a ‘anti-defection law’ tungtawn a May 28, 2015 a ‘disqualification order’ a suah ziak ahi hi. (Manipur Update News)

 

 


International polo matches ah India leh Australia vualzou
IMPHAL, Nov 25: Imphal khopi laizang Mapal Kangjeibung Pologround a 9th Manipur Polo International, 2015 kimawlna pailel tuni a ni lina hita a, tuni a kimawlna ah India team a pan Manipur in England 12-3 goals in zou hi. Zan in Australia team in England 9-7 in lel mahle uh tuni Thailand 8-4 goal in zou uhi.

 

Tuni a kimawlna ah chief guest leh president in Manipur Chief Secretary O Nabakishore leh DGP Manipur Shahid Ahmad pang uhi.

 

Zan in United States of America (USA) in Thailand 8-3 in zou a, England in Australia 9-7 goals in zou hi. Kimawlna ni khatna leh ni nihna ah Manipur team in USA zou a, zingchiang in England polo team leh Thailand team-te kimawl ding uhi. (Manipur Update News)

 

 

 

NEWS LAKTOM

Sangai Festival ah Ccpur District min a tel omlou
Imphal a Sangai Festival zatna pailel a, District teng a pan hiai hun uap dingte ‘routine’ a bawl dungzui un, tuni, November 25, 2015 pen Ccpur District a pante hun ding himahleh Tribal Martyrs 9-te luang vuilouh a Lamka Damdawi Inn morgue a omlai ziak in amaute sunna leh zahtak etsakna in cultural troupe tuamtuam banah District Administration leh District Level Officer lam a pan kuamah a tel omlou hi.

 


Chiengkon ah guta 1 mankhia
Tuni zingkal dak 4:00 vel in Chiengkonpang ah Khupchinpau (30) s/o (L) Ginkhankhual of Khajang, Singngat Sub-Division in vatawt 1 a guklai toh matkhiak in om hi. Amah ahihleh ak 3 leh sahou Kg 2 vel a guk toh matkhawm hi a, vengsung mite’n thuhilhna hoihtak a neihzoh un khahkhia uhi. Ak leh vatawt a gukte ahihleh tuilak ah diahlum vek man a, amah ahihleh khamtheih zongsang hi a, a thil gukte hotel khong a kimantaktak a zuak zel hidan in kipuang hi.

 


Nominee 3 in PDS antang lakhia
Churachandpur District a ding PDS antang October 2015 quata tuni’n MLA nominee 3 in lakhia ua, amau area chiat a PDS sub-agent-te hawm ding in pawkhia uhi. Tuni a PDS antang lakhete ahihleh Tipaimukh AC a di’n BPL- 235qtls, AAY- 117qtls, APL- 106qtls; Henglep AC a di’n BPL- 408qtls, AAY- 446qtls, APL- 150qtls leh Saikot AC a di’n BPL – 680qtls, AAY- 455qtls, APL- 100qtls ahi.

 

 


Sunna:
Pi Telzaniang (90) m/o (L) Thongsuan, Colony, Bungmual, tunitak dak 9:30 vel in teknat in si a, zingchiang in Bungmual hanmual ah kivui ding hi. Amah ahihleh, N. Nengzasuan nupi hi a, a tate’n a sih gaihsan ziak ua, N. Nengzasuan in a kep ahi.

 

 


REGIONAL | NATIONAL | INTERNATIONAL

ANLA in labourer 2 a pimangte khahkhia
Tura, Nov-25: Meghalaya state a Garo Hilss district sung Kharkutta khokiang a PMGSY road a nasepna khat a semlai a paisa November 17, 2015 nitaklam dak 4.00 vel a, a pimang uh labourer Shahujdin Sheikh (35) leh Soleman Ali (42) tuni zinglam dak 4.00 vel in huai khua a pan mun gamlalou ah hing leh dam a khahkhia uh hi’n police thusuak in taklang hi. Thusuak dang in a taklatna ah pimangtute’n mi 2-te khahkhiakna ding in Rs. 2 lakhs piak hidan in gen mahleh huai thu kanchet theihna ding taktak omlou hi.

 

ANLA leh Achik Matgrik Elite Force (AMEF) kigawmte’n labourer 2-te a pimang thu ah helpawlte gamtatna tuamtuamte chimtak leh deihlou mipi 15,000 vel zan in Kharkutta kipunkhawm in rally nei uh a, huai ah ANLA helte lim bawl in mei in hal uhi. Mi pimangtute’n ni 2 sung a khahkhe ding a ngen in, hunchiam sung a khahkhiak ahihkei leh mipi’n helte matkhiakna ding a operation patsawm uh ahihdan taklang uhi. Zan a rally ahihleh North Garo Hills sung a NGO tuamtuam- GSU, FKJGP, ADE, FAF, AAYF leh a dangdang makaihna nuai a neih a om ahi hi. Tumazek inleng Garo Hills bial mipite’n Meghalaya state a diakin Garo Hills bial a Armed Forces (Special Powers) Act koih ding government kiang a phutna in rally thupitak nei uhi.

 

 


Gujarat EC in voter 1 lakhs val min ‘delete’ :Cong
Ahmedabad, Nov-25: Gujarat Congress in Gujarat a zanzek a Municipal Corporation 6 a election om ah Ahmedabad khopi sung a voter 1 lakhs val State Election Commission (SEC) in a paihkhiak (delete) ziak in vote khe theilou uh hi’n taklang uhi.

 

Thusuakdan in, State Election Commission (SEC) in zan khatthu a voter huaizahpi a paihkhiak uh mohpaih kawm in official document 2 suahkhia uh a, hileleng State Election Commission (SEC) official lam in ahihleh Congress lam a pan ngohna thuzuau hidan a taklang in voter kuamah delete omlou hidan in taklang uhi. Gujarat Congress thupuangtu Manish Doshi State Election Commission in a taklat dan a Ahmedabad a voter 39.83 lakhs om himahleh election hun ah voter 38.79 lakhs om in huai in 1 lakhs val delete a om ahihdan chiangsak hi’n taklang hi.Congress in a ngohna ah, SEC in independent body ahihna bang a nasem lou in BJP kahiang bangdan a nasem hizaw dan inleng taklang hi.

 

 


Tuilian ziak in Nov 26 in Central Team in Tamil Nadu pha ding
NEW DELHI, Nov 25: Zingchiang Ningani in high-level central team khat in Tamil Nadu pha ding ua, vuahzu leh tuilian ziak a suksiat suksiat a om vante kaihkhawmna leh chiamtehna masapen vanei ding uhi. Joint Secretary (Home Ministry) Prasad mn makaih central team-te lak ah Agriculture and Power Ministries leh Central Water Commission a kipan official hunkhop leng tel ding ua, tuilian khawktak a tunna mun Chennai, Tiruvallore, Kancheepuram leh Cuddalore districts ban ah union territory of Puducherry a thil kisia omte va kaikhawm ding uhi. Team te’n ni nih sung Tamil Nadu a hun zang ding uh hi’n leng thusuak in taklang hi.

 

Kha masa north-east monsoon a kipat nung vuahzuk ziak a thiltung omte ah mi 122 in sihna tuakta ua, Tamil Nadu leh Puducherry ah tunitan pha in hindan ngeina buaisak denlai hi. Finance Ministry thusuak dungzui in, memorandum khat ngah a hih toh kiton in central team khat in tunung sawtlou in Andhra Pradesh state leng vehpahta ding uh hi’n taklang uhi. November 26, 2015 a tuilian ziak thil suksiat omte lakkhawmna masa nei ding in Government of India in central official team khat sawlkhia hi. Tuilian ziak mah in tunai zek in Tamil Nadu Chief Minister J Jayalithaa in memorandum kimtak khat toh centre kiang ah laithon khat khak hi.(PTI)

 

 


State Govt nasemte sinsak ding in Centre in district 103 ah officer sawl ding
NEW DELHI, Nov 25: Central leh state scheme tamtak omte zatkhiak dingdan toh kisai sinsak ding in Centre in India gamsung pumpi huap in district 103 a officer hunkhop sawlkhe ding in thupuk hi. November a kipan February tan daih ding in state 21 huap in district 103 ah ni 12 sung daih ding program zat ding toh kisai bukimtak Department of Personnel and Training in bawlkhinta hi. Hiai panlakna toh kisai PM Narendra Modi makaihna chikhat hi’n leng officials thusuak om hi.

 

State 21 a a ‘central monitoring committee’ in charge makai ding in DoPT in joint secretaries 6 leh additional secretary khat bawlkhia hi. November akipan in hiai state 21 ah under-secretary leh deputy secretary level nuai a DoPT officer 100 val te’n department khenkhat a lak thak a om Group B leh Group C state government frontline functionaries-te ading liuliau a kibawl ‘12-day induction training programme’ saina nei ding ua, land revenue, health and family welfare, education, urban development, rural development, women and child development leh social welfare department a nasem mipite toh houlimna leng nei ding uhi. Government of India panpihna sum zang a training neilel state officer-te’n a sinsaktu central makaite toh amau district a khota kha ah nitak hunk hat zangkhawm ding uhi. Hiai traning a tel ding in district 103 chih ah lak thak a om state government officer 70 telkhiak in om ua, exercise a tel ding in state chih a kipan in district 4-5 telkhiak in om hi. Scheme sepsuah dingdan toh kisai a ni 12 sung training nei ding a telkhiak district tallang khenkhatte lak ah Lucknow, Kanpur, Allahabad, Gurgaon, Jaipur, Udaipur, Thane, Amravati, Kottayam, Kozikode, Thiruvanthapuram, Amritsar, Baramulla, Doda, Mysore, Shimla, Bengaluru, Madurai, Kanyakumari, Bhopal, Gandhinagar, Surat, Rajkot leh Vadodara chihte telkha uhi.(PTI)

 

 


Rahul Gandhi in Bengaluru College ah thugen
BENGALURU, Nov 25: Tuni’n Congress vice president Rahul Gandhi in Mount Carmel College, Bengaluru student-te kiang ah thugenna hun zang hi. Hiai hun a Rahul in a gendan in, Bengaluru a ka hong paima in research lianlou khat ka hih a, tuchiang a mi kuapeuh in a hih bang un Wikipedia ka hongpha chi’n gen hi. Wikipedia ka en kual a, ka theih mahmah numei lasiam tak 3 hiai institution a hong kipan uh a hihdan ka muh in lamdang kasa chi’n gen hi. Alumni list in a kalungsim sukha a, amaute Margaret Alva ji, Kiran Mazumdar-Shaw ji & Nirupama Rao ji chia sam ka hi chi’n gen hi. Kiran Mazumdar-Shaw ji ka houpih ngal a, hiai institution in mahni a kigintakna hon pekhelou hileh Biocon chief a ka pankhak ding kilam enlou ka hi chi’n hon gen hi. Hiai schoo tellou in hichibang lohchinna ka ngah ngeikei ding a, mahni a kigintakna hon pekhia ahi chi’n gen hi. Hiai institution in siamna mai hilou in thuakzohna leng pekhia chi’n Rahul in gen hi. Khotang in kuahiam khat melhoih deuh, gawng deuh, neu deuh chi’n khensawn mahleh kei mit muh in noute melhoihvek in k’on mu chi’n gen hi. Tamil Nadu a vuah tamtak a zukziak a tuilian dinmun toh kisai enkhe ding in High-level Inter- Ministerial Central Team sawl in om ua, bangchidan a mi khat in dawnna teng pekhethei vek mawk ding hiam ? Gamsung a thupukna la hitheivek chiat ding a hon deih ka hi chi’n gen hi. (PTI)

 

 


Kha 3 sung a 3na ding in war exercise nei Army officer khat si nawn
JAISALMER, Nov 25: Pokhran a ‘war exercise’ pailel a tel senior Army officer of Lt Col rank Pankaj Sharma(39) in, zan Sepnawnni nitak in lungphu hat in sihna tuak hi. Sharma a hihleh tulel in Dehradun ah teng hi. Sharma in sihna a tuah toh kiton in, kha 3 sung lel a, war exercise nei army officer 3 in sihna a tuahna leng hita hi. Postmortem zoh a hih chiang in Sharma luang Dehradun tut hiding hi.

 

Senior official khat in a gendan in, Bhaniyana mun unit khat ah Sharma koih in om a, khophawklou a, a puk ziak in, kintak in Army hospital zotpih in om hi. Himahleh doctor-te’n hospital tut ahih nung sawtlou in si khinta chi’n puang uhi.Defence thupuangtu Manish Ojha inleng Sharma sihna toh kisai theichian a hihdan gen hi. Sharma toh semkhawm officer khat in a gendan in, Sharma kichi mi chitak leh officer piching mahmah khat a hi a, galvan etkaina lam toh kisai siamna sangtak khat nei mi khat ahi chi’n gen hi. September 22 in war exercise neilai 75 Armored Regiment officer khat Major Dhruv Yadav in sihna tuak a, October 22 inleng Commanding Officer of 12 Guards Vishnu Prasad in swine flu ziak mah in sihna tuak hi. (TNN)

 

 


Assam CM in Community 6 ST status a koihdi’n phu
Guwahati, Nov-25: Assam Chief Minister Tarun Gogoi in tuni’n Centre government kiang ah Assam state sung a community 6 in Scheduled Tribe (ST) status a koih ding a phutna hun sawttak apan a neih toh kisai in, centre in koih ding in ngen hi. Tarun Gogoi in Centre kiang a statement a khakna ah tribal community 6 te’n ST status a ngah theihna ding ziakte taklang kawm in a dikna leh hamphatna omte uh hise lou a sukpichin sak ahih deihthu taklang hi.

 

Assam state sung Scheduled Tribe (ST) status phu a kiphin a tribal community 6-te ahihleh Koch Rajbongshis, Moran, Muttock, Sootea, Tai Ahom leh tea tribe-te hi uh a, tulel in Other Backward Classes ah telsak in om uhi. Scheduled Tribe (ST) status a koih hile uh tu dinmun sang in hamphatna lianzaw tang ding uh a, hiai thu ah Centre in panla a status sangzaw a koih ding in Chief Minister Tarun Gogoi in ngen hi.

 

 


BJP Parliamentary executive meeting tuni’n nei uh
New Delhi, Nov-25: Centre a vaihawmna len lel National Democratic Alliance(NDA) a party lianpen BJP a Parliamentary party Executive in tuni’n Delhi a Prime Minister Narendra Modi tenna inn ah meeting nei uhi. Huai ah November 26, 2015 a kipan ding Parliament Winter Session hun a strategy tuamtuam ding genkhawm uhi.

 

Tuni a meeting ah hundang banglou takin makai kumlui tallang mahmah khenkhat leng tel uh a, huaite lak ah BJP national President Amit Shah, makai kumlui L K Advani, Murli Manohar Joshi, Union Minister Sushma Swaraj leh Mukhtar Abbas Naqvi party sung a dinmun nei tuamtuam tamtak tel uhi. BJP Parliamentary Executive meeting a zoh phet un Prime Minister tenna inn mah ah NDA a kizoppih makai poimoh bangzah hiam toh meeting sunzom tou nawn uh a, hiai news kaihkhawm tan in bangthu genkhawm uh hiam chihbel detail puangkhe lou uhi.

 

 


Lalu in IAS a muanpente a tate dept ah koihsak
Patna, Nov-25: RJD makai Lalu Prasad tapa upapen tunai zek a Deputy Chief Minister hihna lenthak Tejaswi Yadav in a department let Road Construction Department a Principal Secretary ding in Senior IAS officer Sudhir Kumar guan in om a, Lalu Prasad tapa naupang zawpen Tej Pratap Yadav in a puak Health Department a Principal Secretary ding in IAS officer RK Mahajan guan in om hi.

 

Thusuak danin, Sudhir Kumar ahihleh 1982 batch IAS officer hi a, lalu Prasad in Union Railway Minister a let lai in Railway Ministry ah sem in lalu toh kingaina tak in semkhawm uhi. RK Mahajan leng 1987-batch IAS officer mah hi a, Education department apan Health department len dia suankhiak a om ahih banah Centre a UPA government hunlai in Railway Minister Lalu Prasad nuai ah Executive Director, Public Grievances lenkha ngei hi. Senior IAS officer suankualte ahihleh zan nitak a Bihar Chief Minister Nitish Kumar makaih cabinet leh MLA khenkhat banah party makailian te kithuzaktuah a semkhiak a om hi’n kigen hi.

 

Sudhir Kumar dinmun dopsang a om in Chief Secretary toh rank kikim a koih in om a, IAS officer dang tamtak leng suankual in om uhi. Commissioner of Agriculture Production len Vijay Prakash in a mohuakna omsa banah Vigilance department toh lenkhawm ding a, Principal Secretary to CM DS Gangwar ahihleh Education department ah suankhiak in om hi. Brajesh Mehrotra (89 batch IAS) ahihleh Health department apan Cabinet Coordination department ah suan in om a, 1990-batch IAS KK Pathak leng Registration & Excise Principal Secretary letsak in om hi. Water Resources department a pan suankhiak a om Dipak Kumar Singh in Minor Irrigation department ah mohpuakna piak a om in Rahul Singh (96 batch IAS) ahihleh Finance department a Secretary Expenditure len ding hi.

 

 


J&K’ a Army camp buluhna ah sepaih 1 leh hel 3 kaplup in om; 4 liam
NEW DELHI, Nov 24: Army official khat in agendan in, tuni Nilaini zingkal in Kalsuri Ridge (Tangdhar sector) a kipan in helpawl te’n thau neu leh barrel grenade launchers zang in Line of Control (LoC) kiang Tangdhar sector a om Army camp bukap ua, sepaih khat leh hel 3 in sihna a tuahban ah midang 4 naktak in liam uhi. Helpawl te’n thau a khah ma un thawm dai mahmah a, himahleh thau khahna a neihzoh utoh kiton in kikaptuahna nasatak piangkhia a, hiai thu gelh ahih tan inleng kikaptuahtou denlai uhi.

 

Kikaptuahna mun Tangdhar sector ahihleh Kupwara district sung LoC toh kinai chik ah om a, hun paisa in helte’n India gam guklutna mun ding in zang sek uhi. Gamsung hong guklutte lak a helte leng telkha uhiam chih thuchian bel theih omlou hi. Hiai thu suizuina paitou lel a, operation bangkim zohsiang ahih chiang in genkhiak theih pat ding chi’n official in gen hi.

 

Sepnawni nitak inleng Jammu and Kashmir a Poonch district a om security force-te’n helte kibukna mun Mangnar kho kiang a Dungi Cheed forest area lak buluh ua, galvan khenkhat AK-47 rifle 1 leh a tang 113, Pika ammunition, IED 2, Chinese grenade 1, Pakistani SIM cards leh sum tamtak mukhia uh hi’n leng police thusuak om hi.(PTI)

 

 


Muslim-te’n India a pawtsan kei hial ding uh: AIMIM President Asaduddin Owaisi

HYDERABAD, Nov 25: Muslim-te kichi India mi, a pianna mun uh India kia himailou in India gamsung a ten ding tel uh ahihna toh kiton in, bang thilteng tung leh leng Muslim-te’n India nuse ngeilou ding uh ahi chi’n All India Majlis- E-Ittehadul Muslimeen president Asaduddin Owaisi in gen hi.

 

Gamsung a thuakzohlouhna (intolerance) thiltung omte leh Assam Governor PB Acharya in Muslim-te’n zalentak in Pakistan ahihkeileh Bangladesh zuan thei ding uh chia kampau a zatkhum zawk mah toh actor Aamir Khan zi Kiran Rao in India i pawtsan ngai maimah ding chia Amir Khan a theihsak ziak a sousanna thiltung omte kalh in Mr Qwaisi in hiaibang kampau zangkhia hi. Rashtriya Swayamsevak Sangh(RSS)-te politics kimawlna maimai ah Muslim-te a pukse kei ding uh chi’n Mr Qwaisi in gen hi. Khan in intolerance toh kisai a kampau a neihte Mr Qwaisi in a dawnna ah, film star (Aamir Khan) ading in ka paukhethei kei a, Indian Muslim-te kisaktheihpih huaitham uh ahihdan toh kisai lel genkhe thei ka hi a, ka pukse kei ding a, dog-whistle politics of Sangh Parivar kampau ziak inleng ka sikei ding chi’n gen hi.(PTI)

 

 


PM Modi in all-party meet ah thugen:
Mipite kilam ette Parliament ah i pichinsak ding uh: PM Modi
NEW DELHI, Nov 25: Zingchiang Ningani a Parliament winter session kipan ding a hih toh kiton in, government makaihna toh tuni a ‘all-party meeting’ khat om ah PM Modi in thugenna hun saulou nei hi. Hiai hun in PM Modi in Congress makaih opposition party-te kiang ah ama makaih Government a kipan mipite kilam etna pichinpih a hihtheihna ding a gahsuang ding a Parliament nna semkhesak ding in ngen hi.

 

Gamsung lingsakzou ‘intolerance’ thubuai toh kisai a tunai zek a actor Aamir Khan kampau zatte tel in thubuai tuamtuam ah opposition-te’ thangpaihna maigum Government in maituah petmah ding ahihdan theikawm in tuni’n ‘ all-party meeting’ sam hi.

 

PM Modi in all-party meeting ah GST legislation kichi gamsung mipite lunglutna ahi chia gen a hi chi’n Parliamentary Affairs Minister M Venkaiah Naidu in thuthaksaite theisak hi. Finance Minister Arun Jaitley inleng GST toh kisai lungbuaina omte party paikhawm tengteng kiang ah chiangtak in genkhia hi.(PTI)

 

 


Pakistan jet fighter accident ah numei pilot si
Islamabad, Nov-25: Pakistan military jet fighter khat routine operational training dan a leng lai zan sunnung in gam laizang a Mianwali khopi kiang ah tuahsia in kia a, huai ah numei pilot Marium Mukhtiar si in second pilot Saqib Abbasi ahihleh silou in liamnak sim mahmah hi’n Pakistan air force official thusuak in taklang hi. Pilot 2 te’n lenna a buaisiat phet in eject mek in tunglam ah kikhohkhe tou mahleh uh pilot Marium Mukhtiar pen deihthusam bangtak a huihkhua a parachute a kilap louh ziak in si a, second pilot Saqib Abbasi pen liam mahleh si hiallou hi’n huai thusuak in taklang hi.

 

Thusuak dan in, Pakistan air force a numei pilot lak a jet fighter a lenlai tak a sihna tuak masapen Marium Mukhtiar hi a gen in om hi. Pakistan in kum 2013 a taklatna a neihna ah numei pilot 19 lel nei uh a, Pkaistan military zat jet fighter tuahsia tamlou hi’n leng thusuak in taklang hi. May 2015 in Military helicopter khat tourism project en ding a Norway leh Philippine ambassador te tuanna accident a, huai lai in ambassador te leh a mau zui official kigawm mi 7 si uhi. August 2015 in mallam a Mansehra district ah military helicopter 1 tuahsia in kia a, air ambulance dan a zat a hihziak in mi 12 tuang in a tuangteng a vek un si uhi.

 


Zinling hattak in Peru leh a kim-kiang sawiling
Lima, Nov-25: South America gambup sung a Peru gam ah zan nitaktung in zinling hattak tehna 7.6 magnitude vel a hat om in Peru gamsung leh South America gamte sawiling hi. Hun sawt kihallou in, a hatdan kibang vel mah in zinling om nawn a, hiai zinling kizom a 2vei omte ziakin si-le-liam leh inn-le-lou kisia toh kisai ahihleh report omlou hidan in official thusuak in taklang hi.

 

US Geological Survey thusuak dan in, zinling masapen nitaklam dak 5.45 vel a om in a kipatna munpi ahihleh Peru leh Brazil kigamgi zullam leikawm thuktak 601 kilometers hidan in thusuak in taklang hi. A nihveina ding in minute 5 nungvel in zinling a hatdan kibang mah ling nawn a, huaipen ahihleh a kipatna munpi tuam in hiaipen ah leng si-le-liam leh thil kisia gen-le-sak om tuanlou hi’n official thusuak in taklang hi. Zinling nungzui 3 vei kikhawngling lai in mi khenkhat patau sak sim mahleh lung himoh huailou ding in a nung in dai vengveng in tutan ling nawnlou hi.

 

Zinling ziakin Peru gamsung Cuzco, Tacna, Pucallpa leh Arequipa khopite ah building inn sangte kisawiling in a sung a tengte patausak mahmah a, Chile mallam bial, Argentina, Bolivia, Colombia leh Venezuela gamte leng hiai zinling 2 kizomte’n sawiling phaban in thusuak in gen hi. Peru a zinling thupipen a chiamteh a om ahihleh Pisco khopi zul tumlam munpi a nei apaisa August 15, 2007 a om pen hi a, tehna 7.9 magnitude tungzou in misi 595 hial om hi.

 

 


Queen Elizabeth birthday ni 4 sung lawm ding
London, Nov-25: London Kumpinu hihna sawt lenpen a kigen Queen Elizabeth II in hongtungding April 21, 2016 in kum 90 melmuta ding hi. Kum 90 a valnung May 12-15, 2016 in London khopi polam a amah tenna inn khat ‘Windsor Castle’ ah a birth day lopna thupitak om ding hi.

 

Huai mun ahihleh “Royal Enclosure”zom a dia mun zahtakhuai leh senna sangpen a kigen hi a, hun dang in mivantang luttheihna leng hilou hi. Huai mun a birthday lopna a teldingte a di’n zan in dakkal tamlou sung in ticket 25,000 vel zuakkhiak in om pah hi. Ticket khat zel ah 165 pounds hi a, India sum in Rs. 1,6000 tungzou hi. May 15, 2016-Pathianni in amah leng huai mun ah kihel ding hi. Ticket lei lemtang theilou mi 5,000 leng mun bawlsak hiding uh a, amaute’n ahihleh celebrities a lut lai uh a muh theih ding ban ah screen tungtawn in program bangkim en thei ding uhi.

 

Birthday lopna hunsung ah sakol show a om ding ziak in sakol 900 vel zat hiding a, leitung mun tuamtuam apan lasiam 1,500 lak ah dancer, musician, actor leng tamtak telkha ding uhi.

 

Hichibang khop a thupi in Queen Elizabeth II birth day lop ding chih ahihlai in aman ahihleh a birthday ni taktak private deuh in zang ding a, kumteng a official tak a birthday lopna ‘Trooping the Colour’ chi a kiminvoh ahihleh June 2016 in om ding hi.

 

 


Nepal a kikantuahna venghaklou ding: India
Kathmandu, Nov-25: Nepal gamsung vaihawmna nasatak a kikhekna om ziakin Nepal government leh nelhsiah a om kisa Medheshi party kal ah political thil a kikantuahna nasatak om in kha 2 val paisa sung kihouna omlou hi.

 

September 30, 2015 apan Medheshi party makaih in mipi’n Indo- Nepal gamgi khaktan in a lungkimlouhna uh taklang uhi. Hiai hunsung in Nepal government in Indian officialte tanpha kimuhpih in buaina hihveng pih ding in chial zel mahleh India in direct a hihtheih neilou ahihdan zasak zel hi. Kiphinna a tel Medheshi namte 50 vel Nepal police gamtatna ziak in si uh a, huai nung in ni 1 paisa in Nepal Prime Minister makaih in political party tuamtuam meeting hun ah Medheshi namte thilphut Constitution amendment bawl ding lemsa uhi.

 

Hiai thu ah Indian anbassador to Nepal Ranjit Rae in Nepal haksatna panpih ding a India kiman gige ahihdan genkawm in gam 2 kitanauna pen gamsung mipite kizopna pansan hizaw ahihna ah a suse thei ding om tadihlou hi’n taklang hi. Nepal sung a tengte kal a political thil a kikantuahna leng vengpah ding hidan in gen hi. Hiai thu ah Kathmandu University a vice-chancellor-lui Suresh Raj Sharma in civil societyte leh intellectual lam in government leh kiphinna bawl medheshi namte lak a pressure bawl tuak ngai hizaw dan in taklang hi.

 

 


French police in mun 12,000 luh, mi 165 man
Paris, Nov-25: Islamic State helte’n a paisa November 13, 2015 a Paris khopi sung mun 6 luhna nasatak a neihnung in French police in helte matkhiak sawm in luhna sunzom tou zel uhi. Interior Minister Bernard Cazenueve in a gendan in, police in mun 12,000 luhna a neih nung in muanmoh leh kigolhna nei mi 165 mankheta uh a, galvan tuamtuam 230 leng muhkhiak hita in gen hi.

 

French police hi’n Paris luhna a kigolhna nei a kigen Jawad Bendaoud thudotna hoihtak in nei uh a, amah ahihleh Paris luhna a lemgeltupen hidia muanmoh ziak a kal paita apan hentang a om ahi hi.

 

Paris ah zan in anti-terrorism judge in thudotna ngentel tak in nei a, Bendaoud (29) in ahihleh Paris luhna a tel hidia gintak mi 2 giahna ding petu hi’n leng gen in om hi. BFM TV palai toh Bendaoud in a kihouna ah huai mi 2-te terrorist ahihleh hihlouh theilou in, a ngetna bang ua giahna ding a na pia ahihdan gen a, huai mun ahihleh Nov 18, 2015 in police in luhkhia uhi. Judge in a thudotna tungtawn a bangbang muhkhiak nei hiam chih ahihleh puankhiak hilou hi’n official thusuak in taklang hi.

Read 1677 times
Login to post comments