You are here: HomeNewsLamka PostThe Lamka Post | November 27, 2015

The Lamka Post | November 27, 2015

Written by  Published inLamka Post Friday, 27 November 2015 14:24

Parliament Winter Session kipan:
Constitution Day chiamtehna in Parliament ah ‘2-day special sittings’ pailel
New Delhi, Nov 26: Tuni Ningani in November 26- December 23, 2015 tan daih ding Parliament winter session kipan a, opposition leh government kal a agenda khenkhatte ziak a Session om ding sousang thei ding a, lauhthawngna liantak a om toh kiton in, Inpi nih a winter session kipatma deuh in Prime Minister Narendra Modi in kiseltuahna(debate) leh kihouna(dialogue) kichi Parliament kha ahi chi’n gen hi.

 

Indian constitution bawlkhetu chia kigen BR Ambedkar pianchampha kum 125 chinna chiamtehna leh zahna latsakna a kibawl Constitution Day lopna dan in ni nih sung(tuni leh zingchiang Ningani) tan daih ding special sitting toh winter session pat in om hi. Parliament winter session pat a hih toh kiton in, tuzingkal a New Delhi a sitting member Khekiho Zhimomi(Nagaland People’s Front) in sihna a tuah ziak in, Mr Zhimomi leh member lui 3te - Ram Kapse, Rudra Pratap Singh leh N Rajendran-te sunna minute 1 sung neihzoh a hih toh kiton in Rajya Sabha Inpi tuni sung a ding in khawlsak in om ngal hi. Rajya Sabha Chairman Hamid Ansari in kum 69 a upa Mr Zhimomi sih sunthu puangkhia hi. Mr Zhimomi a hihleh nitamlou paita in lungphu hat ziak in AIIMS ah admit in om hi. July 2008 akipan April 2010 tan leh April 2010 akipan tunitan in Mr Zhimoni in Rajya Sabha ah term 2 sung Nagaland state ai-oh in member khat in pang hi. Lok Sabha Speaker Sumitra Mahajan inleng Constitution bawltute zahna sangtak pia a, eite Constitution tutan pha in kikheng omlou in minthangtou denlai chi’n gen a, democracy ading a huihsiang (oxygen) pekhetu ahi chi’n gen hi. Rajnath Singh in a gendan in, Indian Parliament in chairman Dr BR Ambedkar nuai a Drafting Committee genkhawm ding chi’n gen hi. Parliament a Constitution tung a lainatna thu i kikupkhawmna uh lohchinna thupitak khat leng ahi chi’n gen hi. Dr BR Ambedkar in eite sum dinmun pansan dingdan bawlkhia a, RBI mukhetu Hilton Young inleng Mr Ambedkar thuhilhna mah paipih ahi chi’n gen hi. Columbia University ah thesis khat a gelkhiakte pansan in Financial Commission phuhkhiak in om chi’n gen hi. Labour Welfare, Agriculture, Irrigation ban ah nasem a kilohte ading Minimum wages leh PF chihte leng Dr Ambedkar in a phutsuah ngen ahi chi’n gen hi. Babasaheb Ambedkar in thusun 7435 ngah a thusun 5100-te koihkhia in na haksatak lohchingtak in semkhia a, Sardar Patel kichi kigawmna ding a panlatu ahihleh BR Ambedkar kichi a gawmkhawmtu ahi chi’n Rajnath in gen hi.

 

Sonia Gandhi inleng a thugenna ah, Constitution bawlna panla khaloute tuni’n Constitution in kichiamna pekhia a, hiai sang a chiamnuih thupizaw bang om lai ding hiam chi’n gen hi. Tuni eite ading in kipahni ahi a, dahna ni leng ahi a ziak ahihleh kum 10 a sim eite hon pitu i constitution paizia uh dengdel lua ahi chi’n gen hi. Jawaharlal Nehru, Sardar Patel, Rajendra Prasad leh Maulana Azad-te a kipan Constituent Assembly in gupna ngah ahi chi’n gen hi.(PTI)

 

 


Politics ah ‘secular’ chih thumal zatkhelh in om: Rajnath Singh
New Delhi, Nov 26: Tuni a Lok Sabha a Dr Ambedkar 125th birth anniversary celebration zatna hun ah Union home minister Rajnath Singh in politics a ‘secular’ chih thumal zatkhelh a om toh kisai ngaikhawk mahmah ahihdan gen hi. Union Home Minister in a genna ah, Dr Ambedkar in Indian constitution ‘Preamble’ ah ‘secular’ kichi thumal zanglou ahihdan gen hi.

 

Home minister in a genzelna ah, NDA government in architect of the Constitution of India Babasaheb Bhimrao Ambedkar mengmuhna leh deihthusam bang a India gamsung a kikhoihkhak theihlouhna (untouchability) kichi khamna dia theihtawp suah ding ahihdan gen hi. Huai banah tulel a BJP makaih NDA government in India gamsung a siangthouna lam toh kisai ngai poimoh leh hiai nasepna pen ‘social movement’ toh kibang a koih ahihdan leng gen hi.

 

Rajnath Singh in Babasaheb Bhimrao Ambedkar tanchin leh panlakna toh kisai a genzelna ah, Dr Ambedkar in khotang leh gamsung a khantouhna kibang leh kikim omtheihna dia ‘reservation’ kichi ana omsak ahihdan leh tulel a government inleng khotang a khantouhna leh khosakna lam a kikimna omna dia ‘reservation’ pen ‘socio-political’ thil ahihziak a sutzoptouh sawm ahihdan gen hi.

 

Huai banah mi tamtak in Dr. Ambedkar pen namniam leh khoihkhak theihlouh bang a ngai in lungsim neutak nei mahle uh India gamsung kigawmna ding a Sardar Vallabhbhai Patel in kigawmna ding a panla a, huaite Dr Ambedkar in ana kaankhawm (binding) leh Jawaharlal Nehru in mipi vaihawmna gam bawlkhiakna ding a dinmun poimohtak ana len ahihdan gen hi.

 

 

 


CM in ‘Make In Manipur’ hongkhia
IMPHAL, Nov 26 : Manipur Chief Minister O Ibobi Singh leh Deputy Chief Minister Gaikhangam, Commerce and Industries minister Gobindas Konthoujam banah Chief Secretary O Nabakishore in tuni, November 26 in City convention centre, Imphal ah “Make In Manipur” kichi tuailai laisiamte a dia sepna bawlkhiakna ding (employment generation) hongkhia uhi. Hiai hun zatna ahihleh Yaiskul MLA Elangbam Chand leh mi poimoh tuamtuam inleng uap uhi.

 


HC Viva voce ni ding taklang
Imphal, Nov. 26: Registrar, High Court of Manipur Golmei Goiphulshillui in theihsakna a bawldan in High Court of Manipur nuai a Driver for the subordinate court of Manipur lakna dia Skill/ Driving test a lohchingte’n hongtung ding Dec 5, 2015 zinglam dak 9:00 a pan in High cour of Manipur a viva voce (interview) nei ding uh hi’n taklang hi. Viva voce a telthei dia lohching ST candidate-te ahihleh Roll No. 0003 - Songthianpau; 0032 - Mangte Kom Robert; 0042 - Lientinthang; 0058 - Keilal Keimang; 0122 - Langkhothang Hangsim; 0149 - H David Lalremruate; 0159 - Paokholal Haokip; 0247 - S. Thyanghoulal; 0298 - G. Lalboi.

 

 


TAMCHON Football Tournament a tel ding SSPP FC-te khakhia
Lamka Nov 26: A 9-veina ONGC Northeast TAMCHON Football Tournament, December 1 a pan December 12, 2015 sung Ambedkar Stadium, New Delhi a om ding a tel ding in Siamsinpawlpi Football Club (SSPP FC) player-te tuni, November 26 sunma dak 11:00 in Siamsinpawlpi Complex, Bungmual ah khakkhiakna om hi.

 

Hiai hun zatna Lianzapau Samte, President SSPP General Headquarter in makaih a, Thangsuanlal Vualnam, Team Manager, SSPP FC in kimawl a kuan dingte banah kimawlna ding toh kisai pulak hi.

 

Hiai hun ah Rev K. Kamchinkhup, Director of Ministries, EBC in, kimawlna ah kithununna a poimohdan leh mahni taksa pumpi thunun zoh poimoh ahihdan gen in, tulai khovel buaina kal ah demna hiam ngaihtuahna tuamtuam om maithei a, himahleh kimawl dingte’n lungsim noplouhna dia zanglou a kimawl kichi ‘politics’ hilou ahihdan theisiam a kimawlna mah a lungsim koih ding a ngen in SSPP FC player-te a ding in thumsak hi.

 

Ricky Vanlallawm, Chairman Standing Committee, SSPP General Headquarter inleng hiai hun ah, Pathian vualzawlna taksa lam leh khalam kia hilou in kimawlna lam ah leng vualzawlna thupitak i tang ua, kimawl dia kuante’n leng ‘discipline’ neitak a kimawl a vualzou a hongkik uh a deihsakthu gen in khakhia (flag-off) hi. C. Hangshing in hiai hun zatna thumna in khak hi.

 

Northeast TAMCHON Football Tournament ah hundang in SSPP FC-te Quarter Final, Semi Final leh Final tanpha ana tungtou ua, ni kum, 2014 in Hmar FC toh Final ana kimawl in penalty ah zoulou uhi. Hiai Tournament ah Northeast India a pan Club 16 kihel ding ua, SSPP FC in a kimawl patna ding un December 2, 2015 sunma dak 11:20 in Chitu REM FC toh kimawl ding uhi.

 


Manipur ah Constitution Day zat in om
IMPHAL, Nov 26: Imphal West district sung Court Hall of Manipur University, Canchipur ah tuni’n Manipur University (MU) National Service Schemes (NSS) Cell saina in Constitution Day-2015 zatna om hi.

 

Hiai hun ah MU Vice-chancellor Prof H NK Sharma in Indian constitution provision tuamtuamte poimohna gen a, students, research scholars leh mi tuamtuamte’n constitution nuai a provision tuamtuamte nouneltak a suichian a, dikloutak a vaihawmna leh constitution toh kituaklou peuhmahte kalhthei ding a panla ding in ngen hi. Gamsung a dia constitution poimohna toh kisai Manipur High Court Advocate, Salam Rupachandra in a genna ah, November 26 ahihleh Constitution Day a zat ahihma in ‘National Law Day’ a zat a om ahihdan gen hi. Indian constitution nuai a India khua-le-tuite’n “fundamental rights and duties” a neihte uh toh kisai taklang kawm in advocate Rupachandra in Constitution Day pen Indian Constitution toh kisai a kisinsakna leh Indian Constittion bawlkhetu (architect) Dr BR Ambedkar theihgigena dia zat a om ahihdan gen hi. Tuni a Manipur University, Canchipur a Constitution Day zatna ahihleh Prof Ksh Bimola of Department of Political Science, MU NSS Cell Program Co-ordinator Ch Ibohal leh college tuamtuam a NSS volunteer-te’n uap uhi.

 

November 26 ahihleh kum paisa October 22, 2014 a Prime Minister Narendra Modi in Indu-Mills Compound a Dr Ambedkar Memorial foundation stone a honkhiak hun a Constitution Day leh Indian constitution bawlkhetu Dr Ambedkar theigigena dia zat ding a, a puankhiak ahi hi. Hiai hun a Prime Minister Modi in a genna ah, Constitution Day in a tup-le-ngim ahihleh constitution toh kisai leh Dr Ambedkar tanchin toh kisai student-te kiang a sinsak ding chih ahihdan gen hi.

 


UNLF in police report nial
IMPHAL, Nov 26: United National Liberation Front (UNLF) in tuni’n Police report dungzui a, Thangjam Surjit Singh (35) @ Abung s/o Th Ibopishak Singh of Thangmeiband Sinam Leikai; Singamayum Abe @ Bembem, d/o (late) Safi Singamayum of Nongpok Sekmai Chingkhong, tulel a Langol Housing Complex Type-II a om Haorungbam Yohenba Meitei @ Abung (26), s/o H Sunil Singh of Lamlai Kendra Chalou Mayai Leikai leh Dolaipabam Miyadat Hassan (23), s/o Dp Jalaluddin of Lilong Haoreibi Makha Parking mankhia uh hidan a, a taklat uh nial uhi.

 

UNLF thusuak in a taklatdan in, Police in UNLF cadre hidan a, a matte uh UNLF armed wing Manipur People’s Army toh kisaikhakna neilou uh hidan in M Sak-hen Director in Charge Department of Publicity, UNLF in taklang hi. November 24 a tualsung niteng tanchinbu a kisuah dungzui in Police inThangemiaband sinam leikai area operation a bawlna uah a tung a kitaklang UNLF cadre-te mankhia uh hidan in taklang hi.

 

 


International polo ah England in Thailand zou
IMPHAL, Nov 26: Mapal Kangjeibung Polo ground a 9th Manipur Polo International, 2015 kimawlna pailel tuni, a ni 5na a kimawlna ah England polo team in Thailand team 9-2 goals in zou uhi. Tuni a kimawlna hun ah chief guest in Manipur’ Deputy Chief Minister Gaikhangam pang a, kimawlna en mipi leng nidang sang in tamzaw hi.

 

Zingchiang, Nov 27 in match masa ah United States of America (USA) polo team in England team maituah ding ua, India ai-oh Manipur polo team inmatch nihna ah Australia polo team maituah ding uhi.

 

Kimawlna masate ah USA in Thailand 8-3 in zou a, Australia leng USA in 9-7 goals in zou hi. India team in USA, England leh Thailand leng ana zouta hi. International polo tourney pailel a media committee chairman N Tombiraj in a genna ah, polo team-te lak a league round matches a point tam mu pen team nih telkhiak hiding a, telkhiak a om team-te’n November 29 chiang a final kimawl ding uh hidan in gen hi. (Manipur Update News)

 

 


Kolasib DC in Bairabi leh ONGC Drill Site veh
Aizawl, Nov 26: Kolasib DC H. Lalengmawia, IAS in zan in Bairabi leh Meidum a ONGC Drill Site veh a, huai hun a mipi kikhopna ah thugen hi. Hiai hun ah NH-154 leh ONGC drill site in a sukkhak mipite toh ‘public meeting’ nei ua, Bairabi khopi sung pen Mizoram leh state dangte toh kikawmtuahna mun poimoh leh rail lampi lutna omsun ahihman in khosakna leh omdan a midangte etttontak leh Khristian hindan tawisangtu hidia panla ding in ngen hi. Huai banah mun poimohtak ahihdungzui in, mipite’n innhoih leh van hoihlam sang mah a siamsinna leh tate etkolna lam pibawl zaw ding inleng ngen hi.

 

Huai banah siamsinna lam toh kisai ngai poimoh mahmah ahihdan genkawm in Government department tuamtuam toh pangkhawm a ‘Education Campaign and Literacy Drive’ neihsawm ahihdan DC in gen hi. Huai banah khotang siatna tamtak lak ah innkuan ki-etkolna leh kepna poimoh mahmah a, Mizoram in innsung a nu hoihtak poimoh ahihdan leng gen hi.

 

‘Public Meeting’ zoh in NH-154 keklet ziak a hihbuai a om innkuante kimuhpih a, state government in June 25, 2015 a ‘Eviction Notice’ a suah dungzui a tukha, November 2015 sung ngei a, a tenna innte uh phelkhe ding ding theisak hi.

 

Kolasib khonawl a Meidum a ONGC Drill Site etkhiakna hun a, DC H. Lalengmawia in a genna ah, leivuhna ahihleh zoh hita mahleh hiai mun a kipan thautui lakkhiak theih taktak ding hiam chih bel chiangchiah nailou hidan in gen hi. ONGC in hiai mun a thautui lakkhiakna ding nasepna tawpsan sawm chih thuthang om toh kisai DC in dawnna ah, ONGC in hiai mun a nasepna khawlsan sawmlou hidan in gen hi. (NNN)

 

 


Speaker in Lal Thanzara kichiam sak ding
Aizawl, Nov-26: Mizoram state a Aizawl North–III assembly seat ah November 21, 2015 a by-election a telching a om Congress candidate Lal Thanzara in MLA ding in November 27, 2015 sunma dak 11.00 in Aizawl a Assembly Conference Hall ah MLA din kichiamna nei ding a, Assembly Speaker Hiphei in kichiam sak ding hi.

 

November 21, 2015 a by election ah Lal Thanzara in vote 6.175 mu a, amah khingtu MNF candidate K. Vanlalvena leh NDA candidate Lalduhoma in a vote muh kigawm in a vote muh sang un leng 1,498 a tamzaw mu hi. Lal Thanzara ahihleh tulel a Mizoram Chief Minister Lal Thanhawla pianpih sanggam hi a, office of profit toh kisai a thubuai a neihziakin party minsiat saklouh tupna a kitawp hi a, tutung in Congress candidate a ding nawn ahi hi.

 

 


AMC & LADC ah buaina omlou in vote khezou
Aizawl, Nov-26: Mizoram state a Aizawl Municipal Corporation (AMC) leh Lai Autonomous District Council (LADC) member ding kitelna tuni zinglam dak 7.00 apan nitaklam dak 4.00 tan in buaina bangmah omlou a zohkhiak a om ahihdan state election official thusuak in taklang hi.

 

State election Commission bikhiah dan in, Aizawl Municipal Corporation (AMC) ward 19 leh Lai Autonomous District Council (LADC) a member 25 telna ding in November 26, 2015 zinglam dak 7.00 apan nitaklam dak 4.00 tan a zoh ding chih ahi. AMC polling station 211 hon a om in LADC ah polling station 103 ah vote khiak in om hi. AMC adia vote kikhia ahihleh tuzan mah in a simna kipan a, LADC a vote kikhiate ahihleh November 28, 2015 in vote sim hiding hi. Election official thusuak danin, AMC election ah vote khiakna ahihleh ballot paper zat a om in a kikhia teng 63.55 per cent tung in LADC ah ahihleh Electronic Voting Machines (EVM) zat in om hi. Sunnung dak 1.00 tan in LADC ah vote kikhia teng 62.21 percent tung hi’n official thusuak in taklang hi.

 

AMC election a dia vote om zah ahihleh 1,92,362 hi a,ward 19 lak ah 6-te numei a dia reserve ahi hi. Polling station 211 a ding in Returning officer 19, assistant Returning officer 19, presiding officers 211, polling officer 422 om in candidate 54 in tuh uhi. Congress leh Mizoram People’s Conference (MPC) akigawm in 19 guang uh a, MNF kitangzial in ward teng ah candidate nei hi. Zoram Nationalist Party leh BJP kigawm National Democratic Alliance (NDA) in seat 16 ah tuh uhi.

 

10th LADC election a member 25 telkhiakna ding ah polling station 103 om in voter 45,757 in candidate 74 lak ah 25 telkhe ding uh a, candidate 74 lak ah independent 10 om uhi. Congress leh MNF in candidate 25 tuak nei uh a, BJP in 10, MPC in 2 leh ZNP in candidate 1 nei hi. LADC election vote simna ahihleh Lawngtlai town ah November 28, 2015 in nei ding uhi.

 

 


33rd GBC Commencement Service nei ding
LAMKA, Nov 26: New Lamka a Grace Bible College in hongtung ding Dec 2, 2015 sunma dak 11:00 in Gospel Centenary Hall ah 33rd Commencement Service nei ding ua, hiai hun ah Rev. Dr. Paul Cornelius, Regional Secretary, ATA (India) in ‘Commencement Message’ gen ding hi.

 


Mizoram ah numei 1 heroin toh mat in om
Aizawl, Nov-26: Mizoram Excise & Narcotics Department in zan nitak in Mizoram state a Champhai district sung Melbuk ah Myanmar mi numei 1 apan in heroin No.4 gram 109 mukhia in amah toh man uh chihthu official thusuak in taklang hi.

 

Heroin No. 4 toh mat a om numei ahihleh Sangneihi (43) of Khopuar village, Myanmar hi a, thudotna hun ah Myanmar apan hon puaklut ahihdan gen chi’n Mizoram Excise & Narcotics Department thupuangtu Peter Zohmingthanga in tuni’n Aizawl ah gen hi. Huai thusuak dan in, huai Heroin No. 4 pen local bazar rate dan in Rs. 3.5 lakhs vel man ding hi.(PTI)

 

 

 

NEWS LAKTOM

ZEO in Headmaster-te kiang ah theihsakna bawl
Zonal Education Officer/Ccpur in theihsakna a bawlna ah, Mid-Day Meal 2015 nuai a ‘kitchen device/untensils’ ngah ding a telkhiak a om school-te a pan headmaster/ headmistress teng in official seal tawi a, November 27, 2015 a kipan DI/Assistant Zonal Nodal Officer, MDM/ Ccpur kimuhpih ding in theisak hi. Telkhiak a om school-te ahihleh Asst Zonal Officer/DI, Ccpur office a notice board ah ettheih ding hi.

 


MLA nominee 2 in PDS antang lakhia
Ccpur District a ding PDS antang October 2015 quota a ding Thanlon AC Nominee in BPL - 464qtls, AAY- 291qtls leh APL- 202qtls la a, Singngat AC Nominee in BPL- 338qtls, AAY- 232qtls leh APL- 179qtls la in tunitan in nominee 5 in amau quata ding lata uhi.

 

 


Salphate galna di’n Rs. 5,000/- pia
Tuni, November 26, 2015 in JAC Finance Committee khut ah Ngoiphai khua in Salphate galna diing in Rs.5,000/- pia uhi. JAC Finance Sub Committee khut ah Salphate galna ding sum tunitan in singtang mite innchih in Rs 100/- chiat piak ding chih toh kisai in khua tuamtuam 60% vel in peta uhi.

 

 


MGNREGS ni 7 a ding work order laktheih
MGNREGS 2015- 2016 a dia 2nd phase ni 7 septheihna ding order suahnung SDO/BDO-te’n Village Authority-te kiang ah work order pekhe panta ua, hausate’n amau area a SDO/ BDO-te kiang ah work order ni 7 a ding laktheihta hi’n thutut kingah hi.

 

 


MNP Demand Generation meeting om ding
Manipur Network of Positive Peoples (MNP) Demand Generation meeting zingchiang, November 27 sunma dak 10:00 in PTC-GHQ hall ah om ding hi. Huai hun ah BRGF tungtang ah DRDA, DSWO, CJM, CAF & PD, NRHM, DAPCU leh ICDS a pan palaite tel ding uhi.

 

 


REGIONAL | NATIONAL | INTERNATIONAL

Garo Hills ah army in Bike a kipua mi 2 kaplum
Tura, Nov-26: Meghalaya state sung East Garo Hills district a Rajasimla apan gamlalou Konchikol kiang lak ah zan nitaknung in armyte’n mi 2 bike a kipua a tailai thau in kaplum uh hi’n police thusuak in taklang hi.

 

Kaplup a omte police in a velchetnung un Sweetbirth D Marak (30) s/o Genjing Sangma of Rajasimla leh Alphius Momin (35) s/o Laping B Marak Rajasimla ahihdan theikhia uh a, kaplup a omte lak ah Alphius Momin pen School a sem teacher hi’n gen uh a, tualsung mite apan report a zakdan un siluang 2-te omna lakvel ah zan nitak dak 8.40 vel in thauging za uh hi’n gen uhi. Tubangkal ah, mi kaplumtu army-te ahihdan uh theihchet a om in army-te’n leng amau gamtatna mah in pom uhi. PRO (Defence) thusuakdan in, bike a tuang mite khawl ding a theihsak himahle uh a khawl louh ziak ua kap a om hi’n gen uh a, Garo National Liberation Army (GNLA) cadre 2 Bike a kipua a tai om chih report a zak ziak a kigalgingtak a omlai ua mi 2-te khamkhawl theih louh a om phet ua muanmoh ziak a kap a om hi un taklang hi. Poikhoihlou mi vantang 2 kaplup ahihthu ah tualsung mite thangpai in fake encounter a mi 2 a thahna thu uh a ziak diktak puangkhe ding a phu in army outpost ah va kiphin uh a, kintak a inquiry bawl ding in leng phu uhi. Hiai thiltung toh kisai in,North Garo Hills DC SC Sadhu in magistrate toh kihou in inquiry pat sawm a om ahihdan leh huai dia police apan report leng hu-ngaih lel ahihdan mipite zasak hi.

 

 


President Pranab Mukherjee in KM Mathew autobiography hongkhia
New Delhi, Nov 26: Rashtrapati Bhavan ah tuni’n President Pranab Mukherjee in ‘The Eighth Ring’ kichi Chief Editor of Malayala Manorama group of newspapers K M Mathew autobiography hongkhia hi. Hiai hun a President Mukherjee in a genna ah, media tungtawn a mimal in dikna leh zalenna a neihte taklat hi a, himahleh technology lam a khantouhna thupitak om ziakin media toh kisai a chouna om leng lohchingtak a zou ding a lam-en ahihdan gen hi.

 

President Mukherjee in a genzelna ah, newspaper leh nipikal teng leh kha teng a suak thukizaknate’n India in zalenna a ngahma a kipan poimohna liantak nei ahihdan gen hi. Hiai hun zatna ahihleh mi poimoh tuamtuam inleng uap ua, President Mukherjee in mimaltak a leng a kitheihpih K M Mathew zahna pe khawm in Malayala Manorama group khantouhna ding leh India in zelenna a sualna a pan a laknate taklang hi.

 

President in a genzelna ah, kumzabi paisa toh teh in media lam a khantouhna thupitak om a, hun paisate ah media lam in gamsung khantouhna dia a panlaknate uh phatthamching ahihdan gen hi. Himahleh technology lam a khantouhna thupitak om in media-te nasepna nawngkaisak thei a, himahleh huai bangkal ah Indian journalists leh editor-te’n technology khanghattak toh hong kibawllem theih uh lam-en ahihdan gen hi. ‘Technology lam a khantouhna hattak leh kintak a om pen deih in deihkei mahle hang leng hon phata ahihman in kitheihmoh bawltheihlouh ahihziak in internet in khovel pumpi khota suahta ahihdan leng President Mukherjee in gen hi.

 

 


Delhi MLA 1 session sungteng suspend in om
Delhi, Nov-26: Delhi Assembly a BJP MLA OP Sharma in Aam Aadmi Party (AAP) MLA Alka Lamba tung a simmohna paukam kilawmlou tak a zatkhum ziakin Delhi Assembly winter session sungteng daih ding in Assembly apan suspend a om hi’n official thusuak in taklang hi.

 

November 24 a Assembly house a nigh shelter thu genkhawm ahihlai in BJP MLA OP Sharma in AAP MLA Alka Lamba tung a simmohna paukam kilawmloutak a zatkhum khit phet in ni 2 sung lel suspend in om hi. Tuni a session kipatnung in AAP MLA Kailash Gehlot in BJP MLA tung a resolution a moved pen Assembly speaker in pomsak in genkhawmnung in Assembly in pom a, huai dungzui a winter session sungteng suspend a om hi’n thusuak in taklang hi. Delhi Assembly session ahihleh November 28, 2015 tan om ding a bikhiah himahleh thungaihtuah ding a tam ziakin December 4, 2015 tan sutzop ding in a hun behlap in om hi.

 

Aam Aadmi Party(AAP) worker tamtak paikhawmte’n tuni’n East Delhi a BJP MLA O P Sharma tenna inn kong ah kiphinnna nasatak vanei uh a, a tamzaw numei a hih bana uah amaute’n AAP MLA Alka Lamba tung a simmoh leh kilawmlou tak a paukam a zat ziak in Delhi Assembly apan paihkhiak ding phu uhi. Deputy Chief Minister Manish Sisodia in tuni’n thuthaksaite samkhawm in BJP in a MLA uh thugen toh kisai in a dinmun taklang ding in ngen a, a kinlam a, a kituahpih action lakkhum ding in theisak hi. BJP in ahihleh huai ngohna pomlou in Assembly a MLA 1 a kimlouh ding deihna ziak a AAP thilhih hi’n ngoh a, Sharma inleng huchibang paukam kilawmlou AAP MLA Lamba tung a zanglou hi’n pang hi.

 

 


April 2016 a kipan in Bihar ah Zu khaam hiding: CM Nitish Kumar
PATNA, Nov 26: Kum nawn April 1 a kipan Bihar state sung a zu kham hita ding hi’n tuni’n Chief Minister Nitish Kumar in gen hi. Hiai thu ahihleh Bihar Chief Minister in kha khat paisa a zu kham ding phu a nupi pawlte’n kiphinna a neih hun ua a gen ahi hi.

 

Huai hun a Nitish Kumar in a genna ah, 1977- 78 inleng Bihar state sung a zu kham sawm himahleh lohchinglou a, zu ziak in midang teng sang a nupite’n thuak zaw uh ahihdan theihkhiak ahih toh kiton in ka official-te kiang ah hiai toh kisai panla a kum nawn April 1 a kipan state sung a zu zuak leh dawn khamna sepsuah ding a mansiangsak ding in ka theisakta chi’n gen hi.

 

Hiai thu ahihleh Bihar Chief Minister 5vei a letna ding a Nitish Kumar in kichiamna a neihnung a mipi a dia thupuan poimoh a neih masak pen hilai hi. Himahleh zu kham ding toh kisai in India gamsung a zu kibawlte kia uap ding hia ahihkeileh zu himhim kham hiding hiam chih bangmah taklat omlou hi.

 

Bihar assembly election neihma tukum July kha in function neihna khat ah state sung a zu zalentak a zuak a om toh kisai a lungkimlou nupi pawl khat in Chief Minister kiang ah kiphinna nasatak nei ua, huai hun in Chief Minister in nupite ngetna thildik mah ahi a, election a vualzohna ngah a vaihawmna ka letnawn leh state sung a zu kham ahiding chi’n thuchiam ana bawlta hi.

 

Thusuak in a taklatdan in, kum paisa in Bihar government in zu zuakna a kipan siah a lakkhawm tungtawn in Rs 3,500 crore mukhia a, kum nawn a kipan zu kham hileh huai tungtawn a siah lakkhawm a omte bang a hudim ding hiam chih theih hinailou hi’n taklang hi.

 

Bihar Chief Minister in hiai thu a puankhak zoh in socia media tungtawn in Nitish Kumar in “Gujarat model” zuihsawm hidan a gen in om hi. 1960 a kipan in Gujarat ah zu kham in ana omta a, huai banah Nagaland, Manipur leh Lakshwadeep ah leng kham in omta hi.

 

Kum paisa inleng Congress makaih Kerala government in kum 10 sung ‘alcohol-free’ hihsak sawm in thupukna bawl a, state sung a zu zuakna mun tamtak khaksak a, huai toh kiton in Kerala ah ‘five-star hotels’ chih louh ah zu muh ding omlou hi.

 

 


Finance Ministry in ‘Implementation Cell’ bawlkhia
New Delhi, Nov-26: Seventh Pay Commission in recommendation a bawlte hoihtak a sepsuah ahihtheihna ding a saizuitu ding in Union Finance Ministry in Implementation Cell khat bawlkhia a, huai cell ahihleh Department of Expenditure ah bawlkhiak ahih banah November 20, 2015 apan kum khatsung daih ding hi. Hiai Implementation Cell ahihleh Joint Secretary level officer in makaih in official dang 9 leng om sak hi a, Under Secretary level officer 2 chihlouh officer dang 7-te ahihleh Director level officer ngen hi uhi.

 

Seventh Pay Commission in Justice A K Mathur makaihna nuai ah apaisa November 19, 2015 in a report uh Union Finance Minister Arun Jaitley kiang ah pelut uh a, huai ah government a semtute salary, allowances leh pension 23.55 per cent a khansak ding recommend hi. Hiai recommendation thak dan in 2016-2017 financial year ah government in Rs. 1.02 lakh crore senbeh phaban ding a, government in implementation cell tungtawn a velchetna a neih zoh in a pom bangbang January 1, 2016 apan zat hita ding hi.

 

 


SC in Maharashtra Govt kiang ah Dance Bar Licences pekhe di’n theisak
NEW DELHI, Nov 26: Supreme Court in tuni’n Maharashtra government kiang ah dance bars ading license ngetna lai piak a omte kal nih sung ngei a pekhe ding in theisak hi. Hun paisa October 15 in SC in Maharashtra assembly in dance bars khakna ding a dan khat a pass-sa uh khawlsak hi.

 

Dance bars khakna ding dan kibawlkhia toh kisai June 2014 in Maharastra Assembly in Maharashtra Police Act puahpha in, kiseltuahna chihleng neilou in kithutuaktak in passed uhi. Kum 2013 bullam in SC in dance bars khamna ding dan kibawl khat phiatsak hi. Kum 2014 a dan puahthak a om toh kisai in restaurant neitute’n chouna nasatak bawlkhum ua, state government in SC thu ngaihsaklou chi’n soisel uhi. Kum 2005 a state government in dance bars khak ding thu a puanma in, Maharastra state sung pumpi a bar 1500 phial ah laam siam numei 75,000 val zat in om uhi. Maharashtra Assembly in dance bars khamna ding dan masapen passed mahleh kum 2006 in Bombay High Court in ‘dan kalh’ chi’n nawlkhinsak hi.(PTI)

 

 


Khosiat ziakin Srinagar airport kikhak zom
Srinagar, Nov-26: Tuimei leh meizun a tam banah vuk tam ziakin Jammu & Kashmir state khopi Srinagar a International airport ah tuni toh sim in ni 2 sung lenna lenglut leh leng pawtom theilou in kikhak chi’n Srinagar a Airport Authority of India Director R K Shinde gen hi.

 

Tuni zinglam tan in tuimei leh vuk kia banah meizun omlai mahleh ni 3 paisa sang in tawmzaw deuh a, sunnunglam a lenna lenglut leh lengkhia om thei ding a lametna om mahleh tuni a di’n leng cancel a omvek khin hi’n gen hi. Srinagar a Meteorological Department thusuak in ahihleh tuzan zankim vel apan J&K phaizang lak ah vuahzu ding leh tanggamte ah vuk kia sah mahmah ding in genkhol khin hi.

 

 


India in Prithvi II missile etkhiakna in kapkhia
Chandipur, Nov-26: India in tuni sunnung dak 12.30 vel in Odisha state sung Chandipur a Integrated Test Range apan in leitual apan leitual mah kap theihna bomb mitnei ‘surface-to-surface missile’ chih a minvoh a om “Prithvi-II” etkhiakna dan in lohchingtak in kapkhia hi.

 

Etkhiakna dan a tuni a kapkhiak a om surface-to-surface missile ‘Prithvi-II’ ahihleh kilometres 350 tan kap theihna bomb mitnei hi a, Chandipur a Integrated Test Range a mobile launcher lak a launch complex-3 apan kapkhiak a om ahi hi. Prithvi-II missile gikdan 4,600 kg vel pha a, galvan 500 – 1000 kg pawthei in melma beihna ding a suanhuaitak ahih banah galdouna taktak in India in phatuampih mahmah ding in thusuak in taklang hi.

 

Tuni a missile etkhiakna dan a kapkhiakna ahihleh Strategic Force Command (SFC) in a neih hi’n defence scientists thusuak in taklang a, Defence Research and Development Organisation (DRDO) a scientist te’n training na kawm in hiai missile kikapkhiak ma leh a kikapkhiaknung tanpha in ngenteltakin enkai uhi. DRDO in Integrated Guided Missile Development Program nuai a, a bawlkhiak hiai Prithvi-II missile ahihleh Indian armed forces nuai a laklut leh defence technology a pom in om khinta hi. February 19, 2015 in leng tuni a etkhiakna dan a kapkhiak a omna mun mah ah Prithvi-II missile kapkhiak in om ta hi.

 

 


India Constitution lam etna zung a hi a, kiseltuahna kichi Parliament kha ahi: PM Modi
NEW DELHI, Nov 26: Tuni November 26 a India a Constitution Day masapen zatna hun a tun toh kiton in, Prime Minister Narendra Modi in India Constituiton kichi gamsung a ding a lam etna petu zung khat ahi chi’n gen hi. India Constitution bawlkhetu Dr B R Ambedkar pianchampha kum 125na chiamtehna dan a “special two-day session” kipatma deuh a Parliament pawlam a thuthaksaite kiang a PM Modi in a gendan in, eite Constitution kichi lam etna(HOPE) zung khahkhetu khat ahi chi’n gen a, H in harmony(kituahna), O in opportunity(hunlem), P in people’s participation( mipite kihelkhakna) leh E in equality( kibatna) gen ahi chi hi.

 

Tuni Ningani zingkal in, PM Modi in twitter ah Constitution Day toh kisai in India mipite kiang ah chibai buk a, na thupitak semkhia Dr Ambedkar zahna sangtak pia ahihdan genkhia hi. November 26, 1949 in Constituent Assembly in India constitution bawlkhia a, India in Republic Day masapen a lopni January 26, 1950 in hiai constitution zatkhiak kipan hi. Tuni mah in kha khat sung phial daih ding Parliament monsoon session kipan a, intolerance( Thuaktheihlouhna) leh thubuai dang dangte pansan a opposition in government nawk ek a sawm toh kisai in Parliament winter session om ding leng sousang ding in gintakna liantak om hi. PM Modi in political party tengteng kiang ah Parliament a kihouna, kikantuahna leh houlimna(dialogue, debate leh discussion)” vaad, vivaad leh samvaad chihte lungsim a vom gige a, pichinpih ding in ngen thakthak hi. Hiai thumal thumte nasepna Parliament kha leng ahi chi’n gen hi. MP tengteng inleng gamsung mipite kilam etnate toh kituak a, a hih theihtawp uh suah a pan a lak ding uh muang ka hi chi’n PM Modi in gen hi. Government in thuaktheihlouhna (intolerance) thubuai toh kisai kiseltuah (debate) phal ding hi’n taklang khin a, hiai ding toh kisai in Modi mahmah in thugen ding chih ahi.

 

Actor Aamir Khan in a gendan in, a zi Kiran Rao in India pawtsan ding thu a genkhak te’n gamsung a thuaktheihlouhna thu a kikantuahna omsa puangsak thak chi’n gen a, hiai thubuai piangkhesak tu opposition Congress-te ahi uh chi’n government in ngawh khum zomah hi. Parliament winter session ahihleh December 23 in bei ding hi.(TNN)

 

 


Khut a gelhthoh(Hand-Written)Passport-te pom hinawnlou ding: Government
NEW DELHI, Nov 26: Zan Nilaini a Government in thupiak abawl dungzui in, India khua-leh-tui hihna chetna ding a kizang khut a gelhthoh( hand-written) passport-te pomtheih hinawnlou ding hi. Government in hun paisa in khut a gelhthoh ‘hand-written passports neite kiang ah November 14 tan a machine zang a simkhiak theih leh muhtheih ding passport ngah chiat ding in theisak khin hi. International Civil Aviation Organization (ICAO) in machine a simkhiak theih ding travel documents leh biometric data toh kithuah zangchiat ding a lemsakpihna a bawl toh kiton in, government in khut a gelhthoh(hand-written) passport-te zangnawnlou ding in thupuk hi. Government official khat in a gendan in, tuni a kipan in gamdang a khualzinna ding in hand-written passport-te pom hinawnlou ding chi’n gen hi. Machine readable passport-te’n zuau pansan a thilchin leh siatna a kipan in bitna hoihzaw nei hi. Kum 2001 ma pek akipan in hand-written passport-te suahkhiak in ana om khinta hi.(PTI)

 

 


26/11 Mumbai beihna a si martyr-te zahna sangpen piak in om
MUMBAI, Nov 26: November 26, 2008 a Mumbai khopi beihna(26/11 Mumbai attacks) hun tuni a kum 7na a chin toh kiton in, Mumbai khopi beitu helte douna a gam ading a hinna pia martyr-te tuni’n amaute theihgigena mun Mumbai Police Gymkhana, south Mumbai a 26/11 police memorial ah pakkhi etlawm taktak pia in zahna sangtak piak in om uhi. Hiai hun zatna ah Maharashtra chief minister Devendra Fadnavis inleng martyr-te tung ah zahna sangtak pia hi.

 

Hiai hun zatna a Fadnavis in a gendan in, 26/11 a Mumbai khopi bitna ding a eite ading a hinna pia kidouna a pang policeman hangsan taktakte tung ah zahna ka pia a, amaute i kisaktheihpih mahmah ua, state bitsemna ding leh galmuan semna ding in pan naktak in i latou zel ding uh chi’ngen hi. Galvan hoihzaw toh kithuam police force tamsem bawlkhiak hiding a, hiaimah state government in poimoh masapen in koih chi’n gen hi. November 26, 2008 a Mumbai khopi beihna hun a hinna pia policemen suangkuante leng program zatna ah tel uhi.

 

November 26, 2008 in Pakistan a kipan hel 10te tuipi tawn in gamsung honglut ua, hehpihna bei in security personnel 18 tel in galmuangtak a om lai minautang mi 166 hong kaplum ua, mi tamtak in liamna a tuah ban uah, sum a crore a sim man huding van tamtak leng suksiat in om hi. Hiai hun in ATS chief Hemant Karkare, Army Major Sandeep Unnikrishnan, Mumbai’s Additional Police Commissioner Ashok Kamte leh Senior Police Inspector Vijay Salaskar –te leng kaplup in om kha uhi. November 26-29 kikal sung Mumbai khopi sung mun tuamtuam beihna hun ah helte’n Chhatrapati Shivaji Terminus, Oberoi Trident, Taj Mahal Palace & Tower, Leopold Cafe, Cama Hospital, the Nariman House Jewish community centre leh mun khenkhat target in nei uhi. Mumbai khopi beitute lak a hingmat khak omsun Ajmal Kasab a hihleh Mumbai khopi beih a hihnung kum 4 zoh in November 21, 2012 in khailup in om hi.(TNN)

 

 


December 2 a kipan Air India’s New Delhi-San Francisco Direct Flight kipan ding
New Delhi, Nov 26: US’ San Francisco International Airport in San Francisco International Airport (SFO) a Air India in service thak a patkhiak ding tungtang ah social media tungtawn in trivia contest khat “titled “NonstopAirIndia” zang in trivia questions 5 dawng ding in mi tamtak chial hi. Hiai Contest results puankhiak a hih toh kiton in tuni’n US’ San Francisco International Airport in New Delhi a kipan popular tech city tan ‘non-stop flight’ masapen December 2 a kipan pankhe ding uh a hihthu puangkhia hi.

 

Director of Communications SFO Charles Schuler in a gendan in, US West Coast a kipan India tan ‘nonstop flight’ masapen –hiai service thak in US leh India a khualzinna hun dakkal lutzah naktak in kiamsakzou ding chi’n gen hi. SFO khut a Air India a honglutna ding contest saina ah kithalawpna liantak neih in om chi’n leng gen hi. Hiai contest tungtawn in, contest a tel te’n Air India a kipan New Delhi tan round-trip economy ticket ngahtheihna chance leng nei uhi. December 2 chiang a service masapen chiamtehna program khat ‘formal ribbon cutting ceremony’ zatna hun ah Venkatesan Ashok, Consul General of Indian tel in US leh India a kipan officials hunkhop tel ding uhi. Air India in kal khat in 3vei- Sundays, Wednesdays leh Fridays chihte ah flight service pankhe ding hi. SFO in international carrier 33 a international destinations 39 val ah non-stop flights pekhia hi. Bay Area a airport lianpen in domestic airline toh kisai US ah khopio 77-te non-stop in kawmtuah den hi.(TNN)

 

 


Russia in Syria ah Air-Defence missile koih ding
Moscow, Nov-26: Turkey in Russia kidouna lenna 1 a kapkhiak nung in gam 2 kal kitheihsiam louhna ziak in NATO force-te’n Russia kidouna lenna a kapkhiak nawn ding venna kawm in Russia in Air-Defence Missile bangzahhiam Syria a koih hiding chi’n President Vladimir Putin in gen hi.

 

NATO nuai a member gam 1 in apaisa kum 50 sung a Russia kidouna lenna a kapkhiak na masapen hi a, Russia in Turkey kidouna lenna a kapkhiak a leh Turkey in dou a om ahihdan NATO theisak pah ding leh huai in NATO gamte kaithou vek ding hidan a thu om ziak a Russia in hiaibang panlakna neih sawm hi’n thusuak in taklang hi. International observer khenkhat in ahihleh Russia leh Turkey kal ah kidouna piangkhelou ding a, hileleng huai kidouna lenna kikapkhia in Syria a leitung gam tuamtuam in helte hihbeina dia a panlakna uh naktak a sukha thei dinmun hi’n gen uhi. Thuneihna liantak tawi a kikoih Russia President leh Turkey president in kiphahniam a lemna ding a kihou lunggulh zawsam omlou ding ahihna ah maban patauhhuai mahmah hizaw chi’n observer khenkhat in gen leuleu uhi.

 

Russia President in Syria a Air defence missile koih hidia a gen pen Syria gamsung Latakia province a Hemeimeem air base ah koihsawm a, huai mun ahihleh Turkey gamgi apan 50 kilometres lel a gamla ahi hi. S-400 misslile kichi Syria a Russia in a koih dingte’n 400 kilometres kimkot sung deihna mun peuh kapzak thei ding khop a hat hiding in official thusuak in gen hi. Russian Defense Minister Sergei Shoigu in a genna ah, Russia kidouna lenna kap thei ding dinmun a omte hiai Air defence missile in kintak a kapzak ding hi’n zan in Russia military offiial te toh meeting a neihna ah gen hi. Syria a helte douna a panla kidouna lenna teng leng Fighter dang in combat mission dan in veng gige ding uh hi’n Minister in taklang hi.

 

 


Nepal leh Brazil ah huntuam tuak in zinling
Kathmandu, Nov-26: Nepal gamsung Kathmandu khopi apan suahlam 120 kilometres vel a gamla Sindhupalchowk district huamsung ah zan nitaklam dak 5.00 vel in zinling tehna 4.4.magnitude vel a hat om in huai in district sung leh mun dangdang sawiling a, a kipatna munpi ahihleh Nuwakot lak hi’n National Seismological Centre (NSC) thusuak in taklang hi. Huai nung nitaklam dak 6.09 vel in a hatdan kibang mah in zinling om nawn a, zinling nihveina ahihleh a kipatna munpi Gorkha lak hi’n thusuak in taklang hi.

 

Gamsung mi tamtak patau a inkong khawng a taikhia uhi. Nepal mipite lungmuan nawn panpan phet tuzinglam dak 12.42 in zinling in nawk nawn in huai ahihleh tehna 4.1 magnitude a hat hi’n official thusuak in taklang hi. Dakkal 12 sung a zinling 3vei a om zom ziakin gamsung mite pautau mahle uh a hatluat louh ziakin si-le-liam leh thil ahihsiat omlou hi. Nepal ah apaisa Aparil 25, 2015 in zinling hattak a om ziakin thil tamtak kisia in mi 9,000 val in sihloih ngeita a, huai nung in zinling nungzui tehna 4 magnitude vel a hat 414 vel Nepal ah zinling om ta hi’n official thusuak in taklang hi.

 

Brazil gamsung tumlam a Peru khopi Lima apan 438 kilometres vel a gamla munpi a nei in tuzing lam dak 12.45 vel in zinling om a, zinl;ing a hat sim mahmah ziakin Tarauaca khopi leh a kim-kiang nai a khua omte ah mipi naktak in patau uhi. US Geological Survey in zinling tehna 6.7 magnitude tungzou hi’n taklang hi. Zinling ziak a si-le-liam leh inn-le-lou kisia ahihleh tutan in report zak hilou chi’n official thusuak in gen hi.

 

 


Pakistan in Inmate Zeng 1 khailup ding khawlsak
Islamabad, Nov-26: Pakistan suahlam khopi chih a om Faisalabad khopi sung a suangkulh a kikkhum 1 khailup ding a thutankhumsa himahleh President apan order thak a om ziakin khailup ding 4vei kikhelsak in om a, tutung a khailup hunding kha 2 zekaisak ahihnung in thutanna dang a om keileh khailup hiding in official thusuak in taklang hi.

 

Chief of Prison Ahmad Nadeem in a gendan in, Abdul Basit (43) ahihleh tualthahna leh sualna tuamtuam ziak a mat a omnung a suangkulh a kikhum hi a, apaisa kum 2009 apan khailup ding a bil-atsa lak a tel himahleh kum 2010 apan meningitis natna a vei ziak in a kong apan a nuailam teng Zeng hi. Ahmad Nadeem pianna nu Nusrat Parveen in thuneitute kiang ah a tapa khahkhe ding in ngenzel mahleh thuneitute’n phalsak lou in, suangkulh mah ah koih in om hi. A damlouhna ziak in a kikhailupna ding pen humanitarian ground a khawlsak thak in omtou zel in zan in kikhelsak a om nawn toh kiton in 4vei khawlsak hita hi.

 

Ahmed Nadeem in ahihleh government in dan toh kituak hihdan dang government in ngaihtuah thei dinmun ahihdan gen hi. Amnesty International in ahihleh Pakistan in kum paita apan tutan kikal sung in siding a thutankhumsa mi 300 khailup hun ding mah in khailum hi’n ngoh hi.

 

 


Japan in tuikulhgamte ah sepaih 500 koih ding
Tokyo, Nov-26: Japan Vice Defence Minister Kenji Wakamiya in tuni’n China tuipi suahlam a tuikulhgamte toh kigamla lou a om Japan simlam a tuikulhgam ‘Ishigaki’ kichihna mun a mayor va kimuhpih hi. Huai hun ah Japan deputy Defence Minister in phalna bei a tuikulhgam lut dingte dal ding leh China tuipi a tuikulhgamte apan missile leh galvan dangdang zang a beihna om theite veng ding in sepaih 500 vel tunung deuh a koih hiding a plan om ahihthu genpih hi.

 

Huai tuikulhgamte a sepaih koih a om dingte ahihleh emergency response team dan a zat hiding in taklang a, Ishigaki tuikulhgam apan Japan in Senkaku leh Diaoyu tuikulhgamte leng khauhzaw sem a etkai ding poimoh ahihdan gen hi. Senkaku leh Diaoyu tuikulhgamte ahihleh China in amah thuneihna tuam dan a koih sawm in avangkim in operation bawl hi’n Minister leh Mayor in a kihouna ah taklang tuak uh a, China in hiai tuikulhgamte a defence lam hihhat sawm a panlakna chituamtuam a neih ziak a Japan in step thak neih ngai hi’n leng Minister in taklang hi.

 

 


West Bank ah Israel sepaihte’n Palestinian 1 kaplum
Jerusalem, Nov-26: Jerusalem khopi apan mal-tumlam deuh, West Bank huamsung ah tuni sunma lam in Israel sepaihte leh Palsetiniante tamtak kinawktuah uh a, huai hun ah Israel sepaihte’ thaukap in Palestinian tuailai Yahya Taha(21) of Qatanna a lu ah kapkha in kintak in hospital zotpih himahleh dam zoulou in si hi’n Palestinian Health Ministry thusuak in taklang hi.

 

US Secretary of State John Kerry in Nov 24, 2015 in Israel leh Palestinian makaite kimuhpih in lemna tungding dingthu genpih mahleh zan apan Israel leh Palestinian kal a sousang nawn ziak a tuni a Palestiniante’n kiphinna nei nawn ahi uhi. Israel sepaihte suang a deng in gari-te a khawl sak chiang un Palestiniante thangpai uh hi’n Israel military thusuak in gen hi. Hiai sihna toh kisai in Palestinian a Islamic group ‘Hamas’ pawlte’n November 27 pen ‘Day of anger’ puang uh a, Israel in security naktak in khauhsak behlap hi. October 2015 apan Israel leh Palestinian kal buaina ah Palestinian 95 si uh a, Israel 17 banah gamdang mi 2 leng si uhi.

Read 1772 times
Login to post comments