You are here: HomeNewsLamka PostThe Lamka Post | November 28, 2015

The Lamka Post | November 28, 2015

Written by  Published inLamka Post Tuesday, 01 December 2015 00:57

PM Modi in Sonia Gandhi leh Dr. Singh singpi dawn pih
NEW DELHI, Nov 27: Government in tax reform lianpen a, a neih Goods and Services Tax Bill(GST) lampi honsakna ding a panlakna dan in tuni’n Prime Minister Narendra Modi in ama mun awntu Dr. Manmohan Singh leh Congress president Sonia Gandhi-te singpi dawnkawmpih in houlimpih hi. GST bill khen lamdangna ding a thilnget a aneihte utoh kisai kiptak a lenpaisuak Prime Miniser in opposition party lianpen toh haksatna omte suveng ding a kalbi a lak masakna pen hilai ding hi. Singpi dawnkawm a houlimna a neihna uah Congress No. 2 Rahul Gandhi chial in om khalou hi.

 

Congress vice-president Rahul Gandhi in a gendan in, mipite noh hatthu ziak lel in PM Modi in singpi dawnkhawm ding in Sonia Gandhi leh Prime Minister lui Manmohan Singh –te chial maimai chi’n gen hi.

 

Tuni a Parliament sitting neih a hihma deuh a Parliamentary Affairs Minister Venkaiah Naidu in thuthaksaite kiang a, a gendan in, PM Modi in singpi dawnkhawm ding in Sonia Gandhi leh Manmohan Singh-te chial a, meeting om ding in gahsuang ngei ding chi’n a lam et thu gen hi. India in zalenna a ngah a kipan gamsung a ding a sum dinmun puahphatna ding a panlakna golpen hi a kithei GST Bill paisuak theilou ding a government hentang den Congress-te a hi uh chi’n ngawh in omtou den uhi.

 

Government in member tamzaw a luahna mun Rajya Sabha ahihkeileh Inpi Sangzaw (Upper House) a hiai GST Bill a paisuak sakna ding in Congress-te a kipan in gupna a ngah poimoh hi. Tuaban ah Government in April 2016 a kipan in hiai Bill zatkhiak ding lunggulh a, tu Parliament winter session a passed zoh a hihkeileh zatkhiak hun ding bikhiah kipelkha zel suak ding hi. GST in state tuamtuam a tax kaihkhawm a omte a phiatmangsak toh kiton in India ah ‘single market’ khat bawlkhe ding a, hiai in India sum dinmun naktak in hatsak ding chih ahi.(PTI)

 

 


DoNER Secretary in Chief Minister kimuhpih
IMPHAL, Nov 27: Secretary DoNER Naveen Verma leh state planning department official-te’n tuni, Sintawpni in Chief Minister official chamber ah Manipur Chief Minister O Ibobi Singh kimuhpih uhi. Himahleh tuni a central official-te leh state planning department official-te’n meeting a neih hun ua bangthu genkhawm uh hiam chih bel hiai thugelh ahihtan in taklat hilou hi.

 

Huailou in, Imphal a Manipur Sangai tourism festival pailel uap a Manipur hongpha Chinese ambassador to India His excellency Le Yucheng in zingchiang, November 28 sunma dak 10:30 in hotel classic grande ah media-te kimuhpih ding hi.

 

Chinese ambassador to India in ahihleh tuni nitaklam in Mapal Kangjeibung ah international polo tournament match ah USA leh England Polo Team-te kimawlna hun uap hi. Aman November 25 leh November 27 a media-te kimuhpih ding chih himahleh thulh a om in zingchiang a dia suan in om hi.

 

 


Tuni’n BJP MLA Joykishan leh Biswajit kichiam
IMPHAL, Nov 27: November 21, 2015 a by-election a Thangmeiband leh Thongju assembly constituency a telching a om BJP candidate Khumukcham Joykishan leh Thongam Biswajit in tuni, Sintawpni in Manipur assembly ah MLA ding in kichiamna nei uhi.

 

Khumukcham Joykishan leh Thongam Biswajit ahihleh Manipur Legislative assembly speaker Th Lokeshwor Singh in kichiamsak a, hiai kichiamna hun ahihleh Assembly Deputy Speaker Preshaw Shimray leh Dy CM, Hill areas committee chairman Dr Charltonlien Amo leh senior congress MLA Y Irabaot banah mi poimoh tuamtuam in uap uhi.

 

Trinamool Congress MLA lui leh BJP candidate Kh Joykishan in November 21 a by-election ah vote 12,104 mu in a kikhinpih Indian National Congress(INC) candidate Jyotin Waikhom in vote 10,197 mu a, vote 1907 in Kh Joykishan in vualzohna ngah hi. BJP candidate mah Th Biswajit in vote 14,606 mu in a kikhinpih INC candidate Bijoy Koijam in vote 11,393 mu a, Th Biswajit in vote 3213 in vualzohna ngah hi.

 

Thangmeiband leh Thongju assembly constituency MLA Khumukcham Joykishan leh Thongam Biswajit ahihleh May 28, 2015 a Assembly Speaker’s Tribunal in ‘disqualified’ a bawl ziak a November 21 a by-election neih a om ahi hi.

 

Telching a om BJP MLA nihte’n ahihleh Manipur Assembly member 60 omna lak a opposition member poimohtak hiding uh ahihdan ana genta uhi.

 

 


Aamir Khan soiselnate thuaklah in nupi 1 si
Jabalpur, Nov-27: Madhya Pradesh state a Jabalpur khopi lianlou ah ni 1 paita in nupila kum 24 mi Sonam Pandey leh a pasal Mayank Pandey in Bollywood film star Aamir Khan tung a tulai a politician te’n soiselna nasatak a nei tungthu ah sousang tak in kisel uhi. Sonam Pandey ahihleh Aamir Khan ngaisang mahmah khat hi a, a pasal in intolerance toh kisai Aamir statement a chiamnuih bawl ziakin amau nupa naktak in kisel hi’n Mayank Pandey pianna pa R P Pandey in gen hi. Sonam ahihleh a gimsiat nung a hospital puaktung a om hi a, doctor in poison dawn ziak a si hi’n puang hi. Police in thil omdan suizui in a tenna inn a velchetna uah poison sample mukhia in la uh a, a pasal Mayank Pandey thudotna sunzom zel uhi. Sonam Pandey pianpih sanggam pasal in ahihleh mou vanken demand na ziak a tamveitak bawl gentheih a om ahihdan gen a, police in pilvang tak in angle tuamtuam a enkawm in thubuai saizui touzel hi’n Kotwali police station investigating officer OP Singh in gen hi. Bollywood film star Aamir Khan in ahihleh a thugenna ah, azi in a ta uh bitna ding a Pakistan a pai hoihlou ding hiam? chih dotna bawl ahihthu gendawk kha hi.

 

 


CCpur Dist ah Bank 7 in ATM Booth 24 nei
LAMKA, Nov 27: DC/Ccpur makaih in tuni sunma dak 11:00 in DC/ Ccpur Office a BRGF Hall ah District Consultaive Committee & District Level Committee meeting nei uhi. Hiai hun ah Lamka khopi sung a Bank branch tuamtuam a manager-te tel ua, June 2015 & September 2015 quarter tungtang genkhawm uhi.

 

Tuni a Bank consultative meeting ah a paisa May 23, 2015 a DCC/DLRC meeting proceeding-te enkhawm uhi. Bank toh kisai in September 31, 2015 tan a CD ratio ah Lamka a Bank tuamtuam 19 vel omlak ah Agriculture ah ICICI in 40% pia ua, MRB & PRB in 21% pia ua, UBI in 17% pia ua, SBI Loktak in 15% pia ua, ASCB in 7% pia ua, SBI/CCPur leh CBI in 2% tuak pia ua, SBI/Pearsonmun leh Tuibuang, Axis Bank leh Viyaya Bank in 1% chiat pia uhi.

 

Crop loan ah SBI Loktak in 30% pia in liam tam pe pen a, MRB & PRB in 21% tuak pia ua, SBI/Ccpur & ASCB in 5% tuak pia ua, SBI/Pearsonmun in 1% pia hi. Industries ah PRB in 69% pia in tam pe pen a, Axis Bank in 10% pia ua, SBI/Ccpur leh ASCB in 1% tuak pia uhi.

 

Education loan ah SBI/Ccpur in 3% pia in tam pe pen a, ASCB in 1% pia hi. Housing loan ah UCO in 120% pia in tam pe pen a, UBI in 60% pia a, SBI/Ccpur in 33% pia a, ASCB in 28% pia a, SBI/Loktak leh Vijaya Bank in 7% tuak pia uhi.

 

PMEGP 2014-2015 ah target 304 lak ah Bank 14 in application 328 mu uhi. Huai lak ah mi 115 pia ua, pending 126 lak ah mi 73 pia ua, mi 14 reject uhi.

 

KCC loan ah Bank 16 ah application 327 lak ah 4% lel pia uhi. Bank tuamtuam 16 in recovery toh kisai in priority sector advances ah Rs. 30% lakhs mu ua, Rs. 1871.54 lakhs vel ‘overdue’ om hi.

 

 

KCC loan ah Rs. 89% lakh mukhia ua, Rs. 7.84 lakhs val ‘overdue’ om hi. PMEGP loan September 30, 2015 tan ah recovery Rs. 7% lakhs mu ua, Rs. 191.15/- lakhs ‘overdue’ om uhi. SHG ah recovery in Rs. 3% lakhs mu ua, Rs. 57.61 lakhs ‘overdue’ in uhi. Kum 2015- 2016 sung in Bank in Camp 4 vei nei uhi. Churachandpur District ah Bank 7 ah ATM booths 24 omlel a, huaite ahihleh SBI/Ccpur in 17, UBI/CCPur in 2, Axis Bank in 1, Canara Bank in 1, HDFC in 1 leh UCO in 1 nei uhi.

 

 


Demand Generation Meeting’ nei
Lamka Nov 27: Tuni sunma dak 10:00 in ‘Solidarity and Action Against the HIV infection in India’ (SAATHII) nuai a ‘Manipur Network of Positive People’ (MNP-positive) saina in PTC Hall, Hiangtam Lamka ah ‘Demand Generation Meeting’ nei uhi. Hiai hun ah N. Pramo Devi, Executive Board Member in vaidawn thugen a, Randhoni Lairikyengbam, Senior Program Manager & PO, SVAVRITTI Project, SAATHII in SVAVRITTI Project toh kisai gen in, resource person-te a pan Government Department tuamtuam nuai a SVAVRITTI Project toh kituak a hamphatna omtheite toh kisai kisinsakna om hi.

 

Hiai hun ah resource person in Seiboi Mate, District Program Manager (DPM), NRHM Churachandpur, Gojendro, Program Officer, DRDA Churachandpur, Randhoni Lairikyengbam, Senior Program Manager & PO, SVAVRITTI Project, N. Pramo Devi, Executive Board Member, SVAVRITTI Project, MNP-positive leh Romi Thangjam, Project Coordinator, SVAVRITTI Project, MNP-positive pang ua, amau Department nuai a hamphatna tuamtuam omte pulak in Romi Thangjam in kipahthu gen hi.

 

 


Manoj Bhargava in ‘Electricity-Generating Bicycle’ hongkhia
NEW DELHI, Nov 27: Indian-American billionaire philanthropist Manoj Bhargava in tuni’n singtanggam a dia poimoh zah ‘electricity’ pekhe thei ding ‘stationary bicycle’ hongkhia hi. Mr Bhargava in hiai vanzat a honkhiakna hun ah ‘stationary bicycle’ in ‘power’ pekhe thei ding a, bicyle sikna a kipei in cycle a kithuah battery charging thei ding hidan in gen hi. Hiai cycle in Rs. 12,000-15,000 kikal man ding a, kum nawn March kha vel a kipan leitheihta ding hidan inleng gen hi.

 

Manoj Bhargava in a genzelna ah, dakkal khat sung cycle kipeisak in singtanggam a ding in electricity dakkal 24 sung daih ding pekhe thei ding a, huaite ahihleh ‘running lights’, ‘small fan’ leh cell phone charging na dia zattheih ding ahihdan leh thautui ngailou leh huihkhua ninsaklou a electricity ngahtheihna hiding hi’n gen hi. Mr Bhargava in hiai thilthak toh kisai Prime Minister Narendra Modi toh leng genkhawm khinta uh ahihdan leh government department khenkhat toh pangkhawm a hiai vanzat tamtak bawlkhiakna dia kihouna neilel uh ahihdan leng gen hi. Government department bang pen toh semkhawm ding uh hiam chih bel tunung kha 6 nung a kichiang pan ding hidan in gen hi.

 

Mr Bhargava in a genna ah, hiai vanzat ahihleh Uttarakhand ah zuakkhe masapen a, huainung in innsung a zat dia bawlthak ahihdan leh Uttarakhand ahihleh power lam ah tasam keimahleh innsung a electricity taksapna liantak om ziak a, huai toh kisai ngima deuh a bawlkhia ahihdan gen hi. Huai banah hiai vanzat ahihleh India gamsung kia hilou in gamdang US tanpha ah leng bawlkhiak hiding a, hiai vanzat pen khovel pumpi a mi 1.3 billion val in phattuampih ding uh hidan in gen hi.

 

Mr Bhargava ahihleh a gou neihteng $4 billion vel pha ding a tuat hi a, a hauhsakna 99 per cent pen khovel pumpi a mi tamzawte buaina hihvengna dia zang ding ahihdan gen hi. Huai banah aman India gamsung a ‘charitable organisations’ lian pen ‘The Hans Foundation’ kichi hi.

 

 


NSCN-IM in KTU member matthu mohpaih
DIMAPUR, Nov 27: NSCN-IM in thusuah a bawlna ah, November 26 a Senapati a, a tenna inn a kipan 35 Assam Rifle-te’n KTU Senapati unit NSCN/ GPRN a incharge leh “Tatar” (Member of Parliament) Thangboy Khongsai a matthu uah mohpaihthu taklang uhi.

 

Hiai thiltung toh kisai NSCN-IM in thusuah a bawlna ah, hiai bang a 35 Assam Rifle-te gamtatna in ‘ceasefire ground rules’ a bohsiat banah kilemna ding a kihouna neilel pawl nihte kal a kimuantuahna omsa hihse thei ahihdan taklang hi. Hiai banah hiai bang a 35 Assam Rifle-te gamtatna naktak a mohpaih kawm in kilemna suaikai pawlte tung a hiai bang a gamtang nawnlou ding leh mat a om pen thunung-thuma omlou a 35 Assam Rifle-te’n khahkhe ding leh ‘cease fire ground rules’ a thu lel a zahtak hilou a, a taktak a zui ding in ngen hi.

 

 


YVA-GHQ President leh Vice President ding tel
LAMKA, Nov 27: Tuni sunma dak 11:00 in Vaiphei Community Centre, Bethel Veng ah Young Vaiphei Association YVA-GHQ a president leh vice President ding telna om hi. Hiai hun ah YVA-GHQ Block leh unit tuamtuam a pan palai 140 val in vote khia uhi. Tuni a election ah YVA-GHQ 2015-2017 sung President ding in Vungminthang telching ua, vice president ding in H. Sangpi un-contest in ching hi.

 

 


Lamka khopi sung uap in Prepaid System pan ding
LAMKA, Nov 27: Electric Deptt in tu kum bul a pan in New Lamka area ah prepaid system bulh pan ua, tu’n a tamzaw zouta uhi. Huai toh kiton in, Lamka khopi sung uap in Prepaid System bulhna pan ding ua, huai ding toh kisai in electric post bangzahhiam leng phutkhinta uhi. Huai banah prepaid gui (AB Cables) tamtak Tuibuang a Electric office ah koihkhinta uhi.

 

 


LADC seat 25 ah election zoh hita, zingchiang in vote sim hiding
Aizawl; Nov 27: Lai Autonomous District Council in a 10 veina ding in zan in hun thovengtak nuai ah election nei ua, huai ah 84.66% vote khiak in om hi.

 

LADC-a MDC bial 25 a Polling Station 103 ah mipite’n vote khia ua, vote khiak hoihna pen ahihleh Paithar bial hia a, huai ah voter 2023 om lak ah vote 1953 khiak a om in 96.54% tungzou hi. Vote khiak hoihlouhna pen ahihleh Lawngtlai-III hi a, huai ah 2042 om lak ah vote 1527 khiak a om in 74.78% tungzou hi. LADC-ah ahihleh MDC constituency 25 om in mipite’n a telkhiak uh MDC 25 banah, nominated seat 3 om hi. LADC kitelna ahihleh zingchiang November 28, 2015 zinglam dak 10 in vote sim kipan ding hi.

 


7 Sector AR-te’n Ex-servicemen-te an nekkhawmpih
Lamka Nov 27: Tuni sunma dak 10:00 in 27 Sector Assam Rifle nuai a 7 sector Assam Rifle-te’n amau camp Hqtrs Veng ah Colonel Aditya Verma, CO, 7th A/R makaihna in Ex-Servicemen-te an (lunch) nekkhawmpih uhi. Hiai hun ah Ex-Servicemen member 80 vel paikhawm ua, paikhawm member-te’n hichibang a Colonel Aditya Verma, Commanding Officer, 7th A/R in a vaisaina tung ah kipahthu a gen ban uah, tulai buhlak hun ahihna ah member deih bang a paikhawm theilou uh ahihdan gen uhi. Huai banah a poimoh leh haksatna tuamtuam a neihte uh kikumkhawm ua, hichibang hun hoih zangthei zel di’n makai lamte’n hun lem gel zelle uh chih a deihthu uh paikhawmte’n gen uhi.

 

Tuni a mimaltak a Colonel Aditya Verma, Commanding Officer, 7th A/R houpihna ah, amah mimal mahmah in Ex-Servicemen office, Nehru Marg, Churachandpur ah chialna va bawl a, chialna a bawl bang a member-te’n hun a va uap ziak un leng Aditya Verma in kipak petmah ahihdan gen hi. Huailou in, hongtung ding January 12, 2016 chiang a Mantripukhri ah hiai bang programme neihnawn hiding leh hiai hun ah District tuamtuam a ex-servivemen member leh officer tuamtuam banah chief guest dia Manipur chief minister Okram Ibobi Singh chial hiding hi’n Colonel Aditya Verma, Commanding Officer, 7th A/R in gen hi.

 


Jangmol khua ah naupang 2 mei in kanglum
KANGPOKPI, Nov. 27: Sadar Hill sung a om Jangmol khua ah zan nitak dak 8:30 in inn khat mei kang a, huai ah naupang bangmah thei nailou 2 kanglum hi. Hiai a naupang kanglumte ahihleh Hoineilam (8) leh Satminlun Kipgen (5) hi ua, Lhunkhomang tate tuak hi uhi. Lhunkhomang leh a zi in hih ding poimohtak mai a neih ziak un inn ah a tate uh ihmu lai nusia in va pawtkhia ua, huai kal in a inn uh mei in ana kang hi a, inn sung van bangmah lakkhiak man nei lou uh hi’n leng thutut kingah hi.

 

Jangmol khua ahihleh Koubru apan tumlam Km 1 vel a gamla a om hi a, Tujang constituency sung a Kukite khua ahi. (Huihchim)

 


Mayang Imphal ah ‘Eye Camp’ nei
IMPHAL, Nov 27: Shija Eye Care Foundation leh Ward Development Committee - Ward 12 pangkhawm in tuni, Sintawpni in Mayang Imphal Girl High School ah ‘comprehensive eye camp’ nei uh hi’n Shija hospitals a pan thusuak in taklang hi.

 

Hiai hun ah mitlam toh kisai a buaina nei mi 82 ki-ensak ua, huai lak ah cataracts 18 leh pterygiums 12 hi uhi. Tuni a eye camp om ahihleh SEVA Foundation and Focusing Philanthropy sponsored-na nuai a neih a om ahi hi.

 

Tuni a eye camp ah consultant Ophthalmologist Dr Sachindra Laishram of Shija Eye Care Foundation leh Shija Eye Care Foundation staff-te’n damloute en uhi. Mitlam toh kisai a buaina neite lak ah cataract 14 leh pterygium 6 tuni mah in Shija Eye Care Foundation, Langol ah ‘corrective surgery’ bawl ding a sawl in om ngal uhi.(Manipur Update News)

 

 


International polo final ah India in USA maituah ding
IMPHAL, Nov 27: Mapal Kangjeibung Polo ground a 9th Manipur Polo International, 2015 pailel ah, India polo team-te ai-oh Manipuri Polo Team in November 29 chiang a final kimawlna ah USA polo team-te maituah ding uhi.

 

International polo kimawlna pailel ah, India ai-oh Manipur Polo team in a kimawlpihte uh tunitan in zousuak lai ua, goal 49 khum in ‘flat points’ 12 mu ua, USA team ahihleh goal 32 khum in point 7 mu ua, final ah kisutuah ding uhi.

 

Tuni a first league round match ah India team in Australia polo team-te 13-7 goals in zou ua, USA leh England polo team-te ahihleh 5-5 goals in ki-draw uhi. Tuni a International polo tourney league round matches nanung pen ahihleh Chinese Ambassador to India His excellency Le Yucheng leh mi poimoh tuamtuam inleng uap uhi.

 

Kimawlna paisa ah USA in Thailand 8-3 in zou a, Australia leng 9-7 goals in zou hi. Huai banah India team in USA, England leh Thailand team-te ana zouta hi. (Manipur Update News)

 

 


MADC Session zou; Bill 2 pass
Aizawl; Mara Autonomous District Council (MADC) winter session a neih uh tuni’n zou siangta uhi. Hiai hun ah official bill 2 pass in om a, huaite ahihleh ‘The Mara Autonomous District Council (Money Lending) Bill 2015, leh The Mara Autonomous District Council (Health & Sanitation Amendment) Rules 2015’ te ahi. Hiai ma in Bill 2 – ‘The Mara Autonomous District Council (Agriculture Land Settlement) (Amendment) Bill, 2015 leh ‘Introduction of the Mara Autonomous District Council (Non-Agricultural Land Settlement) Bill 2015’ passed khit in omta hi.

 

 


Speaker in MLA di’n Lal Thanzara kichiam sak
Aizawl, Nov-27: Mizoram state sung Aizawl North-III assembly seat a apaisa Nov 21 a by-election a telching a om Congress candidate Lal Thanzara tuni’n Aizawl a Assembly Annexe Conference Hall ah Assembly Speaker Hiphei in MLA ding in kichiamna neisak hi.

 

MLA ding a Lal Thanzara kichiamna hun ah CM leh Minister tuamtuam banah MLA tamtak in uap uhi. Lal Thanzara ahihleh CM Lal Thanhawla naupa hi a, aman a kikhinpih MNF candidate K. Vanlalvena leh NDA candidate Laduhoma in a vote muh uh kigawm sang in tam muzaw hi. Lal Thanzara ahihleh MLA din telching a omna masapen ding in 2008 in telching in om a, huai nung in kum 2013 in telching in om nawn hi. Office of profit thu a thubuai a neih ziakin a dinmun apan August 2015 in kitawp a, huai nung a by-election ah telching a om ahi hi.

 

 

 

NEWS LAKTOM

CCC in ngetna bawl
Churachandpur Consumers’ Club (CCC) in tuni’n DC/Ccpur kiang ah Lamka khopi sung a Gas Agency-te’n zingkal dak 7 a kipan gas hawmkhiak pan a sunma dak 9/9:30 a, a khak un consumer tamtak a dia buaina leh nawngkaina tun ahihman in hiai toh kisai enthak ding in ngen uhi.

 


Sangai Festival ziak in Ccpur ah electric ginalou
Imphal a Sangai Festival pailel a electric zatna a tam ziak in Ccpur district in electric ngah ginalou hidan in Electric Department a pan thutut kingah hi. Ccpur District sung mun tamzaw phial ah pre-paid system zat hita mahleh meivak mumallouh ziak in power zang a nasemte a di’n nawngkaina liantak tun hi.

 


Delhi Police a ding Admit card laktheih
Delhi Police lakna ding ah CCPur District a pan apply-te’ a ding in Tuibuang a SP/Ccpur office ah Admit Card kihawm lel hi. Ccpur District a pan form la tamtak om lak ah mi 140 vel in submit uhi.

 


SBI/Ccpur branch ah Chabi lom nusia om
Tuni’n SBI/Ccpur Branch ah chabi lom gari chabi leh inn chabi dia gintak nusia om a, a neitu diktak in SBI/CCPur branch a Chief Manager kiang ah office hunsung in November 30, 2015 tan in laktheih ding hi. SBI/CCpur branch ahihleh zingchiang, Nov 28 pen 4th Saturday ahihziak in suty ding ua, a zingnawn Pathianni ahihkhak ziak in, ni 2 suty kizom in suty ding uhi.

 


BSEM office ah Class-X exam form laktheih
Kum nawn 2016 a Class- X (HSLC) exam ding Board of Secondary Education Manipur nuai ate’n Exam form Imphal ah laktheih lel hi’n thutut kingah hi. Hiai toh kisai in a kisaipih Headmaster-te’n amau School a ding chiat a kilak uh ngai ding hi.

 


SUNNA
Hoihkhovung (90) m/o G. Kaizachin of Dorcas’ Veng, New Lamka, kalna ziak in tuni sunma dak 11:30 in si a, tuni mah in New Lamka YPA hanmual ah kivui hi.

 

 


REGIONAL | NATIONAL | INTERNATIONAL

Nagaland a pan RS member omsun Khekiho Zhimomi sunna nei
DIMAPUR, Nov 27: Agri Expo site Dimapur ah tuni’n Nagaland a kipan Rajya Sabha MP omsun Khekiho Zhimomi sunna thupitak om a, amah zahtakna in 1st Nagaland Armed Police (NAP) Chumukedima in ‘guard of honour’ pia uhi.

 

Chief Minister Nagaland, T.R Zeliang in state government sik-le-tang a sunthu puangkhawm in Lt. Khekiho Zhimomi ahihleh makai hangsan leh mukholhna sautak nei ahihban ah amah (Zeliang) inleng Zhimomi a kipan thil tamtak zilkhia ahihdan gen hi. Huai banah Khekiho Zhimomi ahihleh Nagate ai-oh MP khat ahihdungzui a, Naga Political Issue leh Article 371(A) tangkoupih a Nagate buaina hihvengna dia theihtawp suah a pangte lak a khat ahihdan leng gen hi.

 

M.P Lok Sabha, Neiphiu Rio in theihkhawllouh a Khekiho Zhimomi in sihna a tuahna tung ah poisakthu gen in pianken a makai hihna dia chinna nei a piang leh thudik gum a hangsaktak a pang ngam leh Indian Parliament a, a seppih in sihna a tuahna tung ah sun petmah ahihdan gen hi. Huai banah gam it mahmah mi ahihziak in amah omlouh in mun liantak awngsak ahihdan leh a sepkhiaksate leh a thilhihte khangsawn dong a mang ngeilou ding ahihdan gen hi.

 

Khekiho Zhimomi’ zi Khezheli Assumi in AIIMS Delhi a, a pasal a kepdan gen in amah leh a tate’n a pasal sulnung zui a gam a dia theihtawp suah a pang ding uh ahihdan gen hi. Hiai hun ah Himato Zhimomi (IFS) leh Y.Kikheto Sema (IAS) in Sumi Officers Union Nagaland sik-le-tang in thugen ua, Minister R&B, Y. Vikheho Sumi leh MLA G.Kaito Aye in Sumi legislator-te sik in thugen uhi.

 

Governor of Nagaland P.B Acharya, President NPF, Speaker Nagaland, Chief Secretary Nagaland, former Governor of Nagaland Shyamal Dutta, Naga Hoho, Nagaland Civil Services Association, Dimapur District Citizens Forum, Indian Red Cross Society, NITC leh pawlpi tuamtuam in hiai hun ah sunna thu gen ua, a innkuanpihte leh ngainatute’n zahna pak pia ua, Rev. Dr. Shiwoto in vui hi.

 

Lt. Khekiho Zhimomi ahihleh kum 69 a upa hi a November 26, 2015 nitak dak 9:20 in AIIMS Delhi ah si a, aman a zi Khezheli Zhimomi leh tapa 2 banah tanu 6 nusia hi.

 

 


Parliament Winter Session Day 2:
Parliament special sittings ah LS leh RS in India Constitution toh kisai genkhawm
New Delhi,Nov 27: Tuni Sintawpni in Parliament Winter Session ni nihna leh Constitution Day chiamtehna a 2-day special sittings pailel ni nihna ding in Inpi nih ah tutkhawmna om nawn hi. Session kipatma deuh in Government in tu season bek ah pass khiak hileh chi a, a lunggulh det GST Bill toh kisai genkhawm ding in PM Modi in singpi dawn ding in Sonia Gandhi leh PM lui Manmohan Singh-te chial hi.

 

 

Tuni Sintawpni zinglam dak 11 in Inpi sangzaw Rajya Sabha ah special sittings kipan a, Finance minister Arun Jaitley in Contitution toh kisai kiseltuah ding in hun honna patna in thugenna neizui ngal hi. Hiai hun in Finance Minister in zan a Sonia Gandhi in independence zoh kum 6 nung a piang Arun Jaitley in Constitution bawlna ah panla khalou chia kampau a neihte toh kisai in Sonia naktak in dem a, gam tamtak ah democracy suankhiak in om a, himahleh India a hichibang thiltung omlou ahi chi’n Jaitley in gen hi.

 

Federalism kichi eite’n I theihpih ding uh ahi a, Article 356 zatkhelhna uang tak om chi’n Jaitley in gen hi. Parliament a ngaihdan dang hoihzaw genkhiakna leng Constitution kibulhphuhna toh kisaikha ahihman in, kibulpuhna khat kia paipih leng hoihkim tuanlou ahi chi’n gen hi. Article 21 in mahni sahkhua hatsak leh zuih theihna thuneihna sangtak pekhia chi’n gen hi. Tuni’n Dr Ambedkar in uniform civil code genkha Article 44 thusun bawl hileh Inpi in bangchi’n a dawng diam? chi’n Jaitley in dotna bawl hi.

 

Hiai hun zatna ah Sachin Tendulkar leng tel hi. Hiaizoh in Rajya Sabha Inpi nitaklam dak 2.30 tan khawlsak in om hi. Inpi niamzaw Lok Sabha a Congress makai Ghulam Nabi Azad in a gendan in, Inpi makaite’n Constitution toh kisai hah gen mahmah ua, himahleh Pandit Nehru ‘objectives resolution’ genkhak neilou ua, hiai tak ahi thuaktheihlouhna (intolerance) in dinmun sangpen a luahna chi’n gen hi.BJP in Ambedkar zang in Congress nawk a, BJP in India ah divide and rule paipih sawm den chi’n gen hi. Congress in lainatna leh itna bawlkhe den a, kihuatna chi tuh ngeilou ahi chi’n gen hi. Lok Sabha a Indian Constitution kikupkhawmna hun a tel Parliamentary Affairs minister M Venkaiah Naidu in a gendan in, tuni’n Constitution dengdelsak thei thil bangmah a om kei a, Emergency chih leng a om kei a, political makaite matkhiak leh judge-te nelhsiah a gamtatna muh ding leng a om kei chi’n gen hi. Constitution hatsemna ding a pangkhawm a nna i sep ding uh ahi chi’n gen i. Hiaizoh in Lok Sabha Inpi leng nitaklam dak 2.10 tan khawlsak in om hi. (PTI)

 

 


Union Minister 1 in Ram temple bawl ding phu
New Delhi, Nov-27: Union Minister Thawar Chand Gehlot in tuni’n Lok Sabha innpi ah Ayodhya mun a Ram temple lamthaknawn ding thu phutna nei a, Jammu & Kashmir a special status piak a omna Article 370 hihbei ding leh gamsung pumpi a civil code kibang (uniform civil cord) zat ding tangkoupih hi.

 

Lok Sabha innpi a hiaithu a genna ah Union Minister Thawar Chand Gehlot in nidang lai pek apan Ayodhya mun a Ram temple a na om ahi a, huaimun mah ah temple lamthaknawn ding ahihdan gen hi. Aman a genna ah Article 370 pen Indian constitution a temporary provision lel hizaw a, hiaipen phiat a gamsung pumpi in civil code kibang neih poimoh ahihdan naktak in gen hi. A genzelna ah, gam khatpeuh in civil code kibang zui chiat uh a, bang ziak a India in community tuamtuamte a dia dan tuam nei sawnsawn hiam? chi’n leng dotna bawl hi.

 

 


Punjab Cong Chief di’n Capt Amarinder guang
Chandigarh, Nov-27: Punjab Pradesh Congress Committee (PPCC) President thak ding in Congress President Sonia Gandhi in tuni’n Punjab Chief Minister-lui Captain Amrinder Singh guang a, amah ahihleh tulel a Lok Sabha MP ahi hi. Lok Sabha MP ding a Amritsar Parliamentary seat apan telching a hihma in Capt Amarinder Singh in Punjab Chief Minister a let ngei banah Punjab PCC a President 3vei a letkhakna hita ding hi. Capt Amarinder Singh in tulel in Lok Sabha ah Deputy leader of Congress hihna len hi.

 

Punjab Assembly member Lal Singh pen Punjab Congress a senior vice president ding a guan in om a, Parliament member Ambika Soni ahihleh Punjab assembly election -2017 a campaign committee Chairperson dia guan in om hi. Campaign committee a vice chairman ding in MLA Sadhu Singh Dharmsot guan ahih banah campaign committee convener thak ding in M.P Ravneet Singh guan in om hi.

 

Punjab Assembly election ahihleh kum 2017 a neih a om ding hi a, huai ding in Congress Vice President Rahul Gandhi in state sung a party makai tuamtuam toh hun sawttak apan consultation nei touzel hi. Punjab Congress President Paratap Singh Bajwa leh state Congress Legislative Party leader Sunil Jakhar in zan in Sonia Gandhi kiang ah a dinmun tuak apan kitawpna a piaklut uh pomsak ahihnung a tuni a party sung kilepthakna om hi’n party thusuak in taklang hi.

 

 


Sheena Bora Case:
Peter Mukerjea tung ah ‘Lie Detector Test’ neih hiding
NEW DELHI, Nov 27: A tanu (step-daughter) Sheena Bora thahna toh kisai a mat a om media executive lui Peter Mukerjea mat ahihnung a CBI custody a koih a om Seppatni chiang pawtta ding ahihman in tuban ni tamlounung a ‘lie detector test’ neih hiding hi’n thusuak in taklang hi. CBI in ahihleh Seppatni chiang in Mumbai a sepcial court ah Peter Mukerjea pi ding hi.

 

CBI thusuak in a taklatdan in, Mr Mukerjea ahihleh tuni’n Delhi ah dakkal 6 sung phial thudotna neih hi a, huai ah media house a patkhiak tungtawn a, a muhkhiak sumte uh a zi Indrani Mukerjea toh a tanu in gamdang a bank account a honna a koih uh hiam chih tungtang dong uh hi’n taklang hi. Hiai hun ah Peter Mukerjea in Income Tax a siah sun ding pumpelhna dia India leh gamdang a investment tamtak bawl uh ahihdan CBI thusuak in taklang hi. Himahleh Sheena Bora sihna toh kisai ahihleh thutuamtuam a tam ziak a kua moh ding hiam chih theihchet hinailou hi’n leng taklang hi.

 

Indrani’ tanu Sheena Bora ahihleh a nu Indrani Mukerjea, a pasal lui Sanjeev Khanna leh a driver lui Shyamvar Rai in April 2012 a, a thah uh hiding a gintak ahi hi. CBI in zan a, a taklatdan in, Sheena min a Indrani Mukerjea in Hong Kong leh Singapore a bank account hong himaithei hidan in taklang hi. Huai banah 9X Media Pvt Ltd in March 2009 a ‘internal audit’ a bawlna uah company 9 toh ‘shareholder’ nei Peter leh Indrani Mukerjea in fund tuamtuam thelthangsak uh hidan a muhkhiak a om hi’n taklang hi. (PTI)

 

 


India in tuni’n Agni I missile kapkhe nawn
Chandipur, Nov-27: India in tuni zinglam dak 10.02 in Odisha state tuipiau Dr Abdul Kalam Wheeler tuikulhgam apan in leitual apan leitual mah kap theihna bomb mitnei ‘surface-to-surface missile’ chih a minvoh a om “Agni- I” etkhiakna dan in lohchingtak in kapkhenawn hi.

 

Surface-to-surface ballistic missile Agni-I ahihleh kilometres 700 tan kap theihna bomb mitnei hi a, India Agni series a ding masapen second khat sung a 2.5 km a hat ahi hi. Indian army a Strategic Force Command (SFC) te makaihna nuai a etkhiakna a kikapkhia ahih banah etkhiakna hun ah Indian army a senior official bangzahhiam leh Tessy Thomas, Director of Agni Project leng tel uhi. India in Agni missile kichi a masapen ding in apaisa January 25, 2002 in kapkhe ta a, road leh rail mobile launcher apan kapkhiak theih tuaktuak ahi. Hiai missile ahihleh 12 tonnes vel a gik in nuclear payload 1000 kg vel toh kithuah thei hi’n official thusuak in taklang hi. India in zan sunnung inleng Chandipur a Integrated Test Range a mobile launcher lak a launch complex-3 apan Prithvi-II missile etkhiakna dan in kapkhia hi.

 

 


Justice T S Thakur in Chief Justice of India thak len ding
NEW DELHI, Nov 27: A paisa Nilaini a kipan Chief Justice H L Dattu in amah thakhengtu ding leh ama mun luah ding a senior most judge Justice T S Thakur guang ding a government kiang a lemsakpihna a piak toh kiton in Chief Justice of India thak guanna ding nasepna kipanzui ngal hi. December 2 in CJI dinmun a kipan in Justice Dattu pension ding a, hiaini mah in Justice Thakur in President Pranab Mukherjee khut akipan in CJI thak ding in kichiamna nei ding hi. Tulel CJI len HL Dattu in CJI thak guanna ding a senior judge pen khat guang ding a lemsakna laithon pekhin mahleh, hiaipen CJI thak guanna ding panlakna nasepna masapen hilai ding hi.(TNN)

 

 


Naveen in Rajya Sabha By-Poll a di’n BJD Candidate puang
BHUBANESHWAR, Nov 27: Biju Janata Dal (BJD) president leh Odisha chief minister Naveen Patnaik in tuni’n December 14 a Rajya Sabha by-poll om ding a party candidate ding in BJD general secretary Narendra Kumar puangkhia hi. Mr Swain in party candidate ding a telkhiakna san toh kisai a gendan in, party chief in thupukna lading a mohpuakna a piak kipahpih a hihdan gen a, gin om tak a party a ding a nasemtou zel ding in thupuk hi.

 

Zan Ningani in Odisha Assembly in Rajya Sabha by-poll a ding notification khat suahkhia hi. July 25, 2015 a BJD member Kalpataru Das in sihna a tuah ziak in Odisha a kipan Rajya Sabha seat khat luahlouh in awng den hi. Hiai seat luahtu Mr Das term ahihleh April 2, 2020 in bei pan ding hi. Zan in hiai by poll a ding in nomination file kipan ngal a, December 3 tan sunzomtou ding uhi. December 4 in nomination paper-te etchetna om ding a, December 7 tan in nomination paper pia candidate-te kizukkik theilai ding uhi.(PTI)

 

 


Puducherry CM in PM Modi kiang ah Rs.182.45 Crore ngen
Puducherry, Nov 27: Monsoon vuahzu nasatak ziak a tuilet khawktakin thil a suksiatte tundingna ding a emergency relief dan a union territory PUDUCHERRY kiang a Rs. 182.45 crore pe ding in Puducherry Chief Minister N Rangasamy in Prime Minister Narendra Modi leh Union Home Minister Rajnath Singh-te kiang ah ngen hi.

 

Zan Ningani in Puducherry CM in a tuam tuak in PM leh Home Minister-te kiang ah laithon khak a, vuahzu in hindan ngeina buaisak, haichi poulelte leh tenna inn leh building tamtak susia hi’n theisak hi. CM in a genzelna ah, ama government in pan nasatak in la mahleh vuah tamtak zu in tenna inn tamtak suse khin chi’n gen hi. Mipite vanzat leh gou khenkhat lampi, culverts, buildings, power lines leh gentheitak a khosa loubawlte haichi poute suksiat in om hi. Tua toh kiton in, Puducherry CM in vuah tamtak a zuk ziak a, thil suksiat a omte tunding thaknawnna leh huhna ding in Rs. 182.45 crores panpihna peding in ngen hi.

 

 


2017 Assembly Polls mitsuan in Punjab Congress sung ah kisuankualna kipan
CHANDIGARH, Nov 27: 2017 Assembly Polls mitsuan kawm a Chandigarh a Congress party unit president Partap Singh Bajwa leh legislature party makai Sunil Jakhar-te’n kitawpna lai a piak utoh kiton in, tuni’n Punjab Congress sung ah kikhekkualna ding panlakna nawngkaisak thilte sukfel in omta hi.

 

Congress president Sonia Gandhi inleng Congress makai nihte kitawpna thu pompih a, tunung sawtlou in party Chief thak min ding puankhiak hipata ding chi’n state unit in-charge Shakeel Ahmed in thuthaksaite theisak hi. Thusuak dungzui in, Amritsar a kipan Congress MLA ban ah Lok Sabha apan deputy makai Captain Amarinder Singh in state Congress party chief thak luah ding in lam en uhi. CLP makai thak ding Dalit makai khat hithei ding in kilang a, hiai dinmun luah ding a tallangte lak ah Chamkaur Sahib legislator Charanjit Singh Channi leh Nabha apan MLA Sadhu Singh Dharamsot-te min leng tuangkha hi. Chandigarh a 2017 Assembly polls mitsuan kawm in dinmun suankualna ding nasepna leng pai hat mahmah hi.

 

Hiai elections a kisakholna hoihpen bangchi patkhiak ding hiam chih thu genkhawm ding in kha tamlou paita in Congress Vice President Rahul Gandhi in meeting tuamtuam neikhinta hi. Assembly polls nanungpen ah state Congress in Chief Ministerial candidate ding in Amarinder Singh vawksang ua, himahleh hiai elections ah Congress lohsam hi.(PTI)

 

 


Shimla leh Manali ah vuksah ; khovotdan minus 0.7 degree chiamteh in om
SHIMLA, Nov 27 : Himachal Pradesh state a tourist-te phakna munpi nih Shimla leh Manali a tuni a vuah nasatak a zuk ziak in khovotdan naktak a kesuk in phalbi khovot uangsak sem ding in kilang hi. Met official khat in a gendan in, tuzingkal a kipan in Shimla leh a kiang nai mun khenkhat Kufri leh Narkanda-te ah vuah nasatak in zu hi. Manali ah leng tuni’n vuahzu hi’n official inthusuak om hi. Zan Ningani nitak a kipan in taang sanna mun khenkhat Lahaul leh Spiti, Chamba, Kullu, Kinnaur leh Shimla district-te ah leng vukkia hi. Lahaul leh Spiti headquarters Keylong ah leng centimeter 1 a sah in vukkia om a, Kinnaur district sung Kalpa ah centimeter 2 a sah in vukkia hi. Shimla ah khovotdan 4.3 degrees Celsius a niam chiamteh in om a, Keylong ah minus 0.7 degree tung a, Kalpa ah 0.0 degree, Manali ah 0.2 degrees Celsius chiamteh in om a, vuahtamdan leng 16 mm tungzou hi’n hi’n chiamteh in om hi.

 

Met department-te’n a puankholsa bang un, tuni Kiginni tan daih ding central Asia a Caspian Sea a hong kipan huihpi nung in Afghanistan-Pakistan biallak nawk ding hi’n taklang hi.(IANS)

 

 


Pope in terrorist-te sang in thoukang lauzaw
Nairobi, Nov-27: Africa gambup sung a gam 3 kawmtuah a zin lel Roman Catholic heutulianpen Pope Francis kiang ah journalist khenkhat in leitung mun tuamtuam a terrorist gamtatna om vingveng lak ah lauhuai salou na hiam chih dotna dong om uhi. Huai dotna a zakma inleng a munvehna lakte security thil a kisakhawl leh buai mahmah a muh in nui hiauhiau hi’n kigen uhi. Kenya a Nairobi khopi ah Pope Francis in terrorist hiam migiloute sang in thoukang lauzaw ahihdan taklang hi.

 

Pope leh a team in Africa gambup sung a gam 3 a vehna ding in Central African Republic (CAR) phading a, huai mun ahihleh security thil a mi tamtak in lunghimohhuai a sakna mun leh UN peacekeeping force inleng a awlmoh mahmah na mun hi’n kigen hi. Roman Catholic pope teng lak a Pope Francis ahihleh huai mun pha masapen hiding in kigen hi. CAR ah Luslim helte kal ah kitheihsiamlouhna khenkhat a om ziakin a kha a sim kibeihtuahna omta a, siluang leng tamtak kikhung khinta hi. Thusuak dan in Pope in a khopi lianpen Banqui ah Muslim mogue leng vapha ding a, Muslim sahkhua makaite toh kihou in Christian-muslim kal kitheihsiamna ding in kihouna neihpih ding hi.

 

Pope Francis in tuni a Nairobi khopi a mizawngte tenkhawmna ‘slum area’ a vehna ah mipi tamtak in na vaidawn in zawnthoh zezen uhi. Huai area ahihleh mihing 100,000 vel tenkhawmna hi a, huaite lak ah Roman catholic saptuam member 20,000 vel om uhi. Kangemi’s Catholic church a Pope in hun zatna a neih zoh in tumazek a US President Barack Obama in a thugenna mun Kasarani national stadium ah tuailai tamtak toh hunzang nawn ding hi.

 

Tutung a Africa gambup sung a gam 3 a vehna tungtawn in Christian leh Muslim kal bangtanhiam kitheihsiam zawkna piang ding in leitung gam makai tuamtuam in lamen uh ahihdan gen-le-sak tam petmah hi.

 

 


China in US & Japan ki-show off loudin ngen
Beijing, Nov-27: US Pacific Command chief Admiral Harry Harris leh Japan’s Defence Minister General Nakatani in South China tuipi lak a US military leh Japan Maritime Self-Defence Force in joint drill tawpsan lou a sutzop ding thukimna a neih toh kisai in China in tuipi tung a a thahatna uh China muh dia kiphoukhia(show-off) selou ding in ngen ahihdan Xinhua news thuak in taklang hi.

 

Chinese Foreign Ministry thupuangtu Hong Lei Xinhua news palai toh a kihouna hun ah Chinese gamsung tuipi tung a longte tailut sak nawnlou ding a China in US leh Japan thuneitute theisak ahihdan taklang a, China in a gam humbitna ding a security leh maritimes rights a hihtheihtawp a suah ding hi’n gen hi. US in ahihleh hun bangtanhiam paisa in China tuipi a Zhubi Reef kichihna kimkiang nai ah freedom of navigation operation chih paulam in kidouna longpi ‘USS Lassen’ tailut sak in lenna toh kizuisak ngeita hi. US leh Japan in hiai tuipi ah China in a khengval in thuneihna laksawm chi’n South east Asia gamte a tosawn banah naktak in China gamtatna soizel uhi.

 

China tuipi suahlam a tuikulhgamte toh kigamla lou a om Japan simlam a tuikulhgam ‘Ishigaki’ kichihna mun a Japan Vice Defence Minister Kenji Wakamiya in zan in mayor va kimuhpih hi. Huai hun ah phalna bei a tuikulhgam lut dingte dal ding leh China tuipi a tuikulhgamte apan missile leh galvan dangdang zang a beihna om theite veng ding in sepaih 500 vel tunung deuh a koih hiding a plan om ahihthu genpih hi. Huai tuikulhgamte a sepaih koih a om dingte ahihleh emergency response team dan a zat hiding in taklang a, Ishigaki tuikulhgam apan Japan in Senkaku leh Diaoyu tuikulhgamte leng khauhzaw sem a etkai ding poimoh ahihdan gen hi. Senkaku leh Diaoyu tuikulhgamte ahihleh China in amah thuneihna tuam dan a koih sawm in avangkim in operation bawl hi’n Minister leh Mayor in a kihouna ah taklang hi.

 

 


Russia kiang ah Turkey in ngaihdam ngenlou ding
Ankara, Nov-27: Turkey in a gamgizul lak a huihkhua gamgi kantan chih ziak a Russia kidouna lenna 1 a kapkhiak toh kisai in Russia kiang ah ngaihdam ngetsawm lou ahihdan Turkish President Recep Tayyip Erdogan in zan in gen hi. Huihkhua gamgi bohsiate kiang ah ngaihdam ngetna ding thu omlou in taklang chi’n Xinhua news toh interview a neihna ah taklang hi.

 

Turkey President in Xinhua news toh interview a neihma deuh in Russia President Vladimir Putin in Russia kidouna lenna ‘Su-24 warplane’ kichi Syria gamgi zul a Turkish F-16 in a kapkhiak thu ah Tukey thuneitute apan ngaihdam ngetna omlouh poi a sakthu gen a, Turkey in a thilhih khelh bawldikna ding in offer bangmah Russia in bawl neilou ahihdan leng taklang hi. Putin in a genzom zelna ah Turkey gamtatna in Russia- Turkey kitanauna naktak a hihsia ahihdan gen a, gam 2 kizopna a naksiat luat ziakin a nunggu leng huaise petmah ding hi’n gen hi.

 

Tuhun tan in ahihleh Turkey in a gamtatna ziak a diktak a taklat ding hu-ngaih a om hilel zaw in gen a, huai in thiltung ding khek lamdang tuanlou ding hi’n leng Kremlin thupuangtu Dmitry Peskov in gen hi. Turkey in Russia kidouna lenna ‘Sukhoi jet fighters’ 1 a kapkhiak nung in gam 2 kal kitheihsiam louhna ziak in NATO force-te’n Russia kidouna lenna a kapkhiak nawn ding venna kawm in Russia in Air-Defence Missile bangzahhiam Syria a koih hiding chi’n President Vladimir Putin in zan in puangkhia hi.

 

 


Africa ah kumchinglou a pasal nei tampen ding
Geneva, Nov-27: Africa gambup sung gam tuamtuam ah a kigawm in kumchinglou a pasal nei-numei naupang tam deuhdeuh a, tudan bangzel a battouh leh hongtungding kum 2050 chiang in kumchinglou pasal 125-310 million vel tungzou ding hi’n UNICEF thusuak in taklang hi. Huai thusuak dan in, leitung pumpi ah tulel in numei kumchinglou pasal nei 700 million om a, huaite lak a 17 per cent Africa gamte apan hi un taklang hi. Birth day 18na lawm manlou a pasal nei Africa naupang 125 million vel lak a sehthumsuah-seh-khat in kum 15 a chinma un pasal neikhin uh hi’n leng huai thusuak in taklang hi.

 

UNICSF thusuak in a taklat zelna ah, Africa a kum 18 phalou a pasal nei numei lak ah urban area sang in rural area ah naktak in tamzaw a, huaite lak ah mizawng inkuante tamzaw semlai in taklang hi. Africa gamte chihlouh leitung mundangte ah ahihleh kumchinglou a pasal nei in kiamlawm nawt in kumteng in tawm hiaihiai mahleh Africa ah ahihleh khanghat lam nawttou hi.Kumchinglou a pasal nei a per cent dan a et in khang hehu kei leh leng population a khanhat luat ziakin kiam lam sang in punlam manoh thei dinmun leng hi’n huai thusuak in taklang hi. Africa ah tualgal leh hiamgamna nasatak ziakin a thuaktu pen numei kumchinglou a pasalnaite hi uh a, HIV natna hik paikha leh AIDS natna ziak a sih ding ngak leng maupawl a tampen hiding in suikhia uhi.

 

 


Whilte House fencing a kaltou mi 1 mat in om
Washington, Nov-27: Washington khopi a US President tenna innpi ‘White House’ umna (fencing) a kaltou a White House campus a lut pasal 1 zan sunnung dak 2.45 vel in White House vengtute’n mankhia uh a, a tung ah criminal case bulhkhum in tu’n police custody ah om lel hi’n Secret Service thupuangtu Robert Hoback in taklang hi.

 

Matkhiak a om Joseph Caputo in huai fencing a kalhtouh lai in American flag silhkawm zawmah a, White House apan mallam fencing a kahtou a lut hi’n thusuak in taklang hi. White House veh a hoh Virginia a teng Vanessa Pena in fencing a kaltoupa’n a T-shirt suahkhia in American flag a pum ah silh hi’n gen hi. Police in a matkhiak tan toh kikal in minutes 5 sung vel lut man a, huai thiltun hunlaitak in US President Barrack Obama leh a inkuante’n Thanksgiving hun zang lel uh hi’n leng thusuak in taklang hi. Fencing a kal a tawmlut pa’n campus a lut phet in a khutte tunglam ah zantou in White House naih gulgul hi’n leng mit a mute’n gen uh a, hiai mi hihna leh thuchian kimzaw ahihleh official puankhiak hilou hi.

Read 1335 times
Login to post comments