You are here: HomeNewsLamka PostThe Lamka Post | May 15, 2018

The Lamka Post | May 15, 2018

Written by  Published inLamka Post Tuesday, 15 May 2018 08:20
The Lamka Post | May 15, 2018

Press Conference:

Aadhar service toh kisai a Common Service Centre tengteng lakkhiat vek hiding: N.Biren

IMPHAL, MAY 14: Manipur Chief Minis­ter N. Biren Singh in a gendan in Manipur state sung a Aadhar cards lem bawlte Manipur state po­lice panlakna nuai a mat­khiak a omzel ahi chi’n gen hi.

 

CM in media-te kiang a, a gendan in zan Pathianni in Tengnoupal Superintendent leh a team-te’n Moreh Police station kiang lak a check a bawl hun un gari nih a ki­pan in passenger 9, docu­ment kichiantak lah ding a neih lou ziak ua mat a om uh ahi chi hi. Amaute ahihleh Myanmar a ki­pan Manipur state sung a honglut hiding a gintak ahi uhi.

 

Matkhiak a omte lak ah India mi hidan a kigen khat kia om ahi chi a, amah ahihleh Mrs. Paritha Begum, w/o Mo­hammed Mohideen of Shree Ram Nagar, Edap­pallayam, Chennai, Tamil Nadu ahi a chih ban ah Ni Ni Sin, d/o Md. Yashmin of Tar Ka Ta, Nawy Aay, 3 Street, No. 255, Yangon State, Myanmar leh Phyu Phyu Win, w/o Khaza Mohideen of Tar Ka Ta, Nawy Aay, 3 Street, No. 255, Yangon State, Myan­mar-te ahi chi hi. Mi dang 6-te’n ahihleh document lah ding neilou uh ahi chi’n gen behlap hi.

 

Police in mun tua­mtuam a suizuina a neih hun un Md. Tomba alias Inaocha kichi a pan in laptop nih, Aadhar Card 4, printer machine khat, laminating film machine khat, Laminating plastic sheets, photo paper leh DVD 2 matkhiak a om ahi chi’n Biren in gen hi.

 

Biren Singh in a genzelna ah tumalam March 25, 2018 inleng Jiribam Police-te’n Babu­para Ward No. 5, Jiribam a khosa Nongthombam Argentina @ Pinky, d/o (L) N. Brajabihari Singh a kipan fake Aadhar Card bangzah hiam leh Aad­har enrolment forms 85, Laptop 1, Eye Iris CMIT machine leh camera khat, Biometric (Green) BIT, GPS, Mobile handset leh scanner-te leng matkhiak a om ahi chi’n gen hi.

 

Huai ban ah tulel in Md. Aziz Ahmed, s/o Md. Keramat Ali of Dibong Lamlong, Jiribam zong lel a om ahi chi hi. Hichi bang a Aadhar enrol­ment bawlna toh kisai a, a lem bawl a tam luat ziak in State sung pumpi ah Aadhaar services-na ding a Common Service Cen­tre tengteng lakkhiat vek hiding chi’n CM N.Biren in gen behlap hi.

 

Hiai bang a chin­dan omte state govern­ment in beisak ahih thei­hna ding a pan nasatak a la lel ahi chi a, hiai bang chindan hoihloute sukbei ahih kei a leh a thuaktu a gam neitute kihi ding ahih ban ah hun hong paitouzel ding ah ei leh ei kithangkam kisuak ding ahi chi’n gen hi.

 

Huai ban ah hiai bang a document lem bawl a gamdang mite i gamsung uah i lutsak touhzel lai ua leh kum 10-15 vel hong paitou lai ding et ngam huai nawn­lou ding ahi chi hi. Gam­dang a pan honglutte matkhiak ahih pahpah kei leh indigenous mite a ding a haksatna thupi­tak hon po luttu hiding ahi chih kuapeuh mah in i mangngilh louh ding uh leh hiai bang a fake document bawlte matkhiak ahih theihna ding a panlatute mipite’n kithuahpihna hoihtak a piak uh poimoh ding ahi chi’n gen hi.

 

Manipur Chief Minister N.Biren in a genzelna ah gamdang a pan Manipur state sung a honglut utte a ding a mun lemchangtak hidan theih ahihleh Imphal Airport ahi chi a, hiai toh kisai in zingchiang a kipan illegal immigra­tion detect, special police check post khat koih hita ding chi’n gen hi.

 

National High Way 37 Imphal-Jiri lampi toh kisai CM in a gendan in Bailey bridge, Nung Dolan kho kiang a om pen bawl zoh a omta ahi chi’n gen hi. Huai ban ah Manipur state sung a kipimang chihte tulai a kitang mahmah ahihna ah hichi bang a chin­dante gamsung leh kho tang khantouhna ding a nasepna tuamtuam omte a doudaltu a pangkha uh ahi chi hi.

 

Biren in a gen­zelna ah tulai a state government pansan a nasepna neih a om Go to Village Mission toh kisai a kho tuamtuam vehna neih ahihna toh kisai ah mipite’n govern­ment official-te hoihtak a ana kithuahpih ding leh haksatna leh buaina tuamtuamte ana tun ding in ngetna leh theihsakna bawl hi.

 

Huai ban ah tulai a Driver’s Associations of Diesel auto rickshaws, Tata Magic vans leh Winger van-te’n kip­hinna neih pen uh state government in bangmah theihpihlou ahi chi a, kuamah kiang ah leng gari service lou ding a theihsakna bawl khalou himhim ahi chi hi. Hiai bang a gari taituahte kiang a gari service nawnlou ding a official order leh issue himhim leng genkhak ahih louh ban ah hichi bang a mi nautangte a ding a buaina tuntute matkhiak a, a kituahpih bang uh gawtna piak hiding chi’n gen hi.

 

Chief Minister in medi-te dotna a dawn­dan in State Govern­ment in indigenous mite venbitna ding in tu kum sung ngei a bill khat As­sembly session neih ahih hun chiang a bawlkhiak hiding chi a, hiai ding toh kisai in committee khat leng dinsuah hiding chi’n gen hi.

 

Press conference neih hun in Aadhar lem leh Voter ID card lem matkhiak a omte media person-te mai a lahkhiak in om hi.

 

PWD, RD & PR Minister Th. Biswajit Singh, Chief Secretary Dr. J. Suresh Babu, DGP L.M. Khaute, ADGP Pramod Asthana, IGP L. Kailun, IGP Clay Khong­sai, SPs of Imphal East, Imphal West, Tengnoup­al leh Police officer mi bangzah hiamte kihel uh hi’n thusuak in taklang hi.  

 

 

Imphal ah 48hr Diesel Auto Strike pailel; mehzuakte leh student tamtak buai

IMPHAL, MAY 14: Diesel gari tone 9 tan a gik, a bik in passenger Diesel lehTata Magic-te Imphal khopi sung a tai lut ding uh khaam ding a, State Government in thupukna a lak zukkik ding ngetna in, zan Pathianni nitak zankim a kipan in mini transporter body-te’n dak­kal 48 sung daih ding cease work strike nei uhi.

 

Imphal khopi sung a lampi poimohte a diesel Auto thawmging zak ding a tawm mahmah ziak in, a bik in Khwairambam Keithel area lak siangthou leh kilawmsak tuan mahmah a, himahleh anteh zuak a ni­teng a nektawm zong a kivak mipi nautangte’n a vante uh zuak ding a, Khwairambam Keithel mun a naih theihlouh ziak un, a nitha uh a thawn in mangsak uhi. Gari hoihtak neizoulou mipi nautangte’n bazar kaina ding a diesel Auto leh Tata Magic passenger service garite kia a zat ziak un, kiviallehna ding a buaina ne­ilou lamkiang a mehzuak a kipei licence khenkhat meh zuak in tu mahle uh nidang toh teh in meh zuak a tu tawm mahmah uhi. Himahleh mini transporter pawl­pite cease work strike in market ahihkeileh agency munpi omna Paona Keithel leh Thanga Keithel lak buaisak khalou hi. Himahleh diesel auto service-te kiphinna in mehzuakte naktak in sukha hi. Manipur University,Canchipur ah leng nidang toh teh in MU attendance niam mahmah hi. Kiviallehna ding a, die­sel auto zang student 80% te’n tuni’n class la theilou uhi. University a ding in bus khenkhat om mahleh hiai bus-te’n amau taina ding lampite kia tawn in tai uhi. Hosteler-te ban ah University kiang nai a inluah a khosa student-te kia in class la uhi. College leh higher secondary school tamzawte ah leng nidang toh teh in student attendance record niam mahmah hi.

 

Diesel auto leh Tata Magic-te ceasework strike neih hun lemtang a, a la in, lamlian petrol zang a tai auto khenkhat in gari tuanman mi khat tung ah ngeina zah Rs. 10 sang a tamzaw in Rs. 20 la uhi.

 

 

AR Camp ah Hotel Manage­ment Awareness Campaign nei

LAMKA, May 14: Manipur State Rural Livelihood Mission nuai ah Assam Rifle leh Gyan Jyoti Foundation kithuah in tuni, May 14, 2018 sun­nung dak 3 in 25 Assam Rifle Camp, Headquarter Veng ah Hotel Manage­ment toh kisai Awareness Campaign om hi.

 

Gyan Jyoti Foun­dation in ahihleh Mant­ripukhri ah leng hiai toh kibang Awareness Cam­paign ana nei ngeita ua, campaign hun ah tuailai sepna neilou kum 18 leh 32 kikal, Class 10 zousa leh Aad­har Card leh BPL/AAY Card neite telthei uhi.

 

Tuni a Awareness Campaign hun ah Don Bosco Higher Second­ary School a pan student leh tuailai sepna zong, Lamka leh a sehvel a pan mi tamtak paikhawm ua, Premjit Kana Singh, Cen­tre Manager leh Sohail, Mobilizer in sinsak uhi.

 

Awareness Cam­paign ahihleh Imphal pansan, “Team Lease” kichi NGO toh pang­khawm a neih a om hi a, tuailai sepna neilou, innkuan khosak haksa, BPL innkuan ban ah numeite dopsangna ding tupna toh neih a om hi a, hiai hun ah Tourism, Information Technol­ogy ban ah company tuamtuam a sepna omte khawkmuh in om uhi. Hiai campaign ahihleh Assam Rifle in Operation Sadbhavana tungtawn a inntekna a lak uh hi a, maban ah leng neizom zel ding uh hidan in thutut kingah hi.  

 

 

Mat a om UTLA cadre 3-te May 22 tan Police Custody ah om ding

LAMKA, May 14: 27 Sector Assam Rifle nuai a om 33 Assam Rifle-te’n May 11, 2018 zingkal lam dak 8 in Pherzawl District sung Khongjang khua ah United Tribal Liberation Army (UTLA) cadre 3 toh galvan hoih taktak mankhia ua, amaute May 13, 2018 in Po­lice ah pekhia uhi. UTLA cadre 3 mat a omte ahihleh Soilenmon @ Sgt Major Marcus (29) s/o Henkhom of Khongjang village; Lalthlamong (32) s/o Thlarongth­ang of Khongjang village leh Paojavum @ Papao s/o Lamkhosei of D. Phailien uhi.

 

Amaute mat ahih­nung in Khongjang khua a inn nuai khat a galvan chituamtuam a selgukte uh leng Assam Rifle-te’n mankhia uhi. Galvan matkhiak a omte ahihleh 5.51 Rifles (MA-3MK-I) nih; 314/315 Rifles (Bolt Action) khat; 5.51 Rifle khat; 7.62 mm leh AK 47 Rifle Magazine nih; 5.56mm (plastic) maga­zine guk; 5.51 Rifle Mag­azine khat; 9 mm pistol Magazine khat; Thautang 5.56mm Rifle tang 832; 7.56 mm CTN tang 93; 9mm pistol tang 20; 303 Rifles tang khat; Radio Set (Thailand made) khat leh Radio set (Singapore made) khat ban ah Elec­tric Detonator 3 ahi.

 

UTLA cadre 3-te court a dinsak ahihnung un court in May 22 tan Police Custody a om ding in phalsak hi. Hiai thu ah Police in FIR No. 42(5)2018 CCP- PS, u/s 400/302/34-IPC & 25(I-B)A. Act chiamteh uhi.  

 

 

KSO-GHQ in ILP movement ah gupna pia

IMPHAL, MAY 14: Kuki Student Organisation, General Headquarters (KSO-GHQ)-te’n tuni a thusuah a bawldan un Joint Committee on Inner Line Permit Sys­tem (JCILPS)-te makaihna nuai a Manipur state sung a Inner Line system patkhiak ahih theihna ding toh kisai a ongoing Inner Line Permit System (ILPS) movement neih a om lel pen gupna pe ding hidan in taklang uhi.

 

Hiai toh kisai in tuni in KSO-GHQ leh Student Wing of JCILPS-te’n Imphal ah consultation meeting nei uhi.

 

Meeting neih ahih zoh nung a KSO-GHQ presi­dent Paotinthang Lupheng in a gendan in Kuki Inpi leh Kuki mipite’n leng hun sawtpek a kipan ILP po­imoh dan ana tangkoupih kha ngeita uh ahi chi’n gen hi. Huai ban ah kum 2011 inleng Kuki Inpi in Central Government kiang ah ‘The Bengal Eastern Frontier Regulation Act, 1873’ pen zangthak nawn ding a nget­na bawl in memorandum ana kithehlut kha ngeita ahi chi a, hiai bang a ILP ngetna pen Kuki Inpi a ding a thil thak hi nawnlou ahi chi’n gen behlap hi.

 

Tuni a meeting neih ahih hun in student orga­nization-te’n Manipur state sung a indigenous mite a ding a ILP kichi poimoh mahmah ahihdan taklang uhi.

 

Manjit Sarangthem, convenor of Student Wing of JCILPS, in a gendan in tulel a Manipur state in Na­tional Highway nih a bawllelna ah gamdangmi nasem tamtak hong kihel uh ahi chi a, amaute leng etkai po­imoh mahmah ding ahi chi’n gen hi.

 

Manjit in a genzelna ah ILP movement neih ahi­hna toh kisai in tribal student organization tamtakte kiang ah leng kihel ding a chialna ana kibawl kha ngei­ta ahi chi’n gen hi.

 

 

Hathoikim Chongloi in Silver Medal sang

LAMKA, May 14: Governor’s Taekwondo Cup 2018 kichi Indoor Stadium, Khuman Lampak ah May 10-13, 2018 sung Indoor Stadium, Khuman Lampak a Gover­nor’s Taekwondo Cup 2018 om ah Hathoikim Chon­gloi in Silver Medal sang hi.

 

Hathoikim Chongloi ahihleh Professional Tae­kwondo Fighter hi a, hundang a kimawlna ah Gold Meldal 10 val ana lak ban ah Silver leh Bronze leng ana sangkhata hi. Tutung a final kimawlna ah a senior khat toh a kibeihkhak ziak un vuallel a, maban limchi­tak nei hidan in thutut kingah hi. Hathoikim Chongloi ahihleh Haijang Vangkho, Sadar Hills a pan ahi.

 

 

TCP-te’n tinted glass/film thuah garite drive bawl

LAMKA, May 14: Traffic Control Po­lice (TCP), Civil Police (Male), Women Police leh VDF personnel-te’n tuni, May 14 in Tedim Road, Sielmat Lei ah gari a tinted glass/film kithu­ahte drive nei uhi. Drive ahihleh gamsung a dan leh thupiak dinmun hih­sia, bomb puak, rape leh dankalh a gamtatna tua­mtuam omte suizuina leh hiai toh kisai doudalna a panlakna a lohchin zawk ding deih hi a, drive neih hunsung in gari, a diak in four-wheeler a glass/film thuah, tamtak lakkhiak­sak uhi.

 

Gari glass, mailam leh nunglam ban ah a pangtuak a window/ windshield a tinted film thuah toh kisai in Supreme Court of India in April 27, 2012 in order suah a, gari a tinted film khatpeuh thuah kichi khamna bawl in huai order palsatte gawtna piaktheih ban ah suangkultan theih ahih­dan taklang hi.

 

Himahleh tulai in gari suakthak khenkhat, company a pan percent tamlou/chiiklou toh hong pai, glass mial khenkhat a om ziak in drive neih hun ah local adjustment bawl a om in, a chiiklua hiloute bel ngaihdam hi ua, drive neih hunsung in gari tamtuam tinted film thuah 20 val lakkhiaksak leh tinted film-te hihsiat­sak in om hi.

 

Hiai bang a gari a tinted glass/film thuah ding a lou theiloute’n bel Superintendent of Police tungtawn in Home Department, Govern­ment of Manipur kiang ah ngetna piaktheih ding a, phalna neiloute bel Home Department thusuak dungzui a lakkh­iaksak hiding uhi. Drive neih hunsung in District Police Control Room a pan W/T Message hong pai dungzui in Honda Activa rong San, Number Plate omlou leng drive neihkhawm in om hi.

 

Huailou in, Lalcha s/o Shemlhun of Tui­bong in a zatlai, Activa San, (Registration Num­ber MN01A C 8460), himahleh Number Plate a bulh nailouh, SBI Tuibong Branch kiang a, a koih mangsak a, Police a thu a tut dungzui in drive neih in om a, Activa kibatpih teng hentang a om hi’n thutut kingah hi.

 

Hiai hun ah Active mang toh kibatna nei, Registration bawllou hunkhop kaihkhawm hi a, lehkha poimoh teng neite bel paisak himahle uh Registration bawllou a gari bangtanhiam zang­tate bel Challan tungtawn a liausak hi uhi. Drive ahihleh AJ Khongsai, MPS, SDPO Thanlon in makaih a, hiai hun ah OC Traffic Police ban ah Dis­trict Police a pan person­nel tamtak kihel uhi.

 

 

Mun 11 ah ‘Go to Village’ camp om ding

LAMKA, May 14: Ccpur District Admin­istration saina in zing­chiang, May 15 in kho tuamtuam 11 ah ‘Go to Village’ camp om ding hi.

 

Lamka TD Block sung 12-Lanva area a ding in Lanva ah ‘Go to Village’ om ding a, huai ah Tangnuam, Pang­zawl, Nghathal, Lanva leh Kawnpui kho mite tel ding uhi.

 

Tuibong TD Block sung 13-Kholmun area a ding in ST Chullouphai khua ah om ding a, huai ah ST Chullouphai, Kaprang, S. Buoljang, Saihenjang, L. Molvom, S. Phaipijang, Zohar, Leisang, Monglenphai, Tollen, Vajing, Silak, Kholunphai, Hiljang, Zolzam, K. Salemphai leh Lhongchin khuate tel ding uhi.

 

Samulamlan TD Block sung 20-Sagang area a ding in Tuiring Phaisen khua ah camp om ding a, huai ah Tuir­ing Phaisen, D. Kangjam, D. Moljang, Dampi, Hao­lenjang, K. Bungsang, Khonomphai, Lhang­nomphai, Lukhumbi, M. Kananphai, Maojang, N. Dampi, Sijang leh Thampilen khuate tel ding uhi.

 

Saikot TD Block sung 22-Haopi Range area a ding in Mishao Lhahvom khua ah camp om ding a, huai ah Bohlui, M. Lhahvom, M. Shimuol, Saipum, Veng­nomphai, Toljangkuki, Sehken leh M. Saljang khuate tel ding uhi.

 

Singngat TD Block sung 23-Muallum area a ding in Muallum khua ah camp om ding a, huai ah Sumchinvum, V. Munpi, Haijang, T. Monglham, New Laijang, S. Belpuan, Muallum, M. Goshem leh T. Khajang khuate tel ding uhi.

 

Sangaikot TD Block sung 21-Sangaikot area a ding in Dongjang ah camp om ding a, huai ah M. Mollum, M. Bongmol, M. Teijang, M. Tampak, M. Phainom, MB Saichang, Pantha, Makhao, Lungngil, M. Saheiphai, Lailoiphai, MN Tatjang, Moljol, Dongjang, L. Khonomphai, Hengken, M. Phaimol leh Damjol khuate tel ding uhi.

 

Henglep TD Block sung 3-Henglep area a ding Tuilaphai ah camp om ding a, huai ah Lhan­jang, Khenglenkot, L. Khongbung, T. Sehjang, T. Gangpijang, N. Pha­isat, Phiran, P. Molcham, Chongkhozou, Tuilaphai, P. Sejol, Hengkom, Phai­hel, Vungbuk, Thenjol leh Tuikot khuate tel ding uhi.

 

Mualnuam TD Block sung 10-Tuivai area a ding Sinzawl ah camp om ding a, huai ah Sinzawl leh Khuanggin khuate tel ding uhi.

 

Saikot TD Block sung 22-Haopi Range area a ding in Mishao Lhahvom khua ah camp om ding a, huai ah Sum­tukphai, Mualsan, Mual­pi leh Muolkot khuate tel ding uhi.

 

Mualnuam TD Block sung 10-Tuivai area a ding Mualnuam khua ah camp om ding a, huai ah Mualnuam, Thu­angtam, Songtal leh Kai­hlam khuate tel ding uhi.

 

 

Winger driver in Kangpokpi ah passenger 14 bungkhia

KANGPOKPI, MAY 14: Tuni Seppatni zinglam dak 8:30 vel in Dimapur leh Imphal kikal a tai winger khat in Kangpokpi bazar ah highway kiang a TL. Plaza, Kangpokpi Ward No.1 kong maitak ah, a puaklai passenger 14te a van puak teng uh toh bung­khia hi.

 

Hiai passenger-te ahihleh Bihari mi ngen hi uhi. Passenger-te winger a kipan kumsak ahihna ziak uh lam­dangsa kawm a, tual­sung mite’n thiltung toh kisai a suizuina uah, passenger pua winger driver Vicky of Nagaland in, JCILPS volunteer-te a lauh ziak a, passenger-te kum­khesak ahihdan theikh­ia uhi. Tualsung mi khat in, suizui ding in passenger-te ticket khat laksak a, hiai passenger pua winger Super Fast Travels-te a hidan in theikhia hi. North AOC, Imphal ah Head Office nei ua, Dimapur leh Gu­wahati ah leng branch office nei uhi.

 

Passenger-te’n Dimapur akipan Imphal tan a di’n ticket la uhi. Winger Registration No. ahihleh MN01-2155 ahi. Passenger-te’n tualsungmite kiang a, a gendan un, Ragailong, Imphal a kipan ahi­hdan uhleh Aadhaar Card diktak leh docu­ment dangdangte leng neivek uh hidan in gen ua, winger driver gamtatdan lamdangsa mahmah uh hidan leng gen uhi.

 

Hiai nung sawt­lou in, butkhiak a om passenger khenkhat in Kangpokpi-Imphal passenger bus man ua, khenkhatte ahihleh Ragailong a kipan a tanaute un vapi uhi.

 

 

D.El.Ed training-te Field Visit in kuan

LAMKA, May 14: Vimala Raina High School Study Centre a National Indira Gandhi Open School (NIOS) nuai a Diploma in Elementary Education (D.El.Ed) nuai a training-te’n a zoh uh toh kiton in tuni, May 14 in Field Visit ding in kuankhia uhi. Field Visit ding toh kisai in Than­glianlal, Headmaster, Vi­mala Raina Government High School in media briefing saulou nei a, bus nih zang in kuankhia uhi.

 

Field Visit ahihleh D.El.Ed. training hun a syllabus a telkha ahih dungzui a Manipur a om­sun, Sangai omna, Keibul Lamjao National Park en dia kuan hi uhi. D.El. Ed. ahihleh kum 2 course hi a, government thu­suak dungzui in teacher ding peuhmah in D.El. Ed. course a zoh ua cer­tificate a neih ding uh chih hi a, district sung ah study centre tuamtuam ah hiai course sinna neih in om hi.

 

 

May 19 in RGG Football Memoriam kipan ding

LAMKA, May 14: Ropiang Foundation Trust in tuni, May 14 in Raja Goukhothang Guite Football Memoriam 2018 neihna mun ding Lamka Public Ground, Hiangtam Lamka ah ki­sakkholna in JCB zang in hawktui luankhiakna ding nulla bawl uhi.

 

Raja Goukhothang Guite Football Memoriam 2018 ahihleh May 19, 2018 in kipan ding a, opening ceremony hun ah chief guest, guest of honour, functional president leh chief host in Justice Tinlianthang Vaiphei, Chairman, Assam Hu­man Right Commis­sion; P Doungel, IPS, ADGP (Prison/Training); Shyam Lal Poonia, IAS, DM & DC/Ccpur leh Dr Thangchinkhup Guite, Chairman, Ropiang Foundation pang ding uhi.

 

 

MPFC in trail nei ding

LAMKA, May 14: Minerva Punjab Football Club in hongtung ding June 13-15, 2018 sung in Manipur State sung mun tuamtuam ah trail nei ding uhi. Foot­ball Trail ahihleh naupang kum 13-15 nuailamte a ding hi a, June 13 in Ccpur district ah trail hong nei ding uhi. Football trial ahihleh June 13 sunma dak 8 a pan in Peace Ground, Tuibong ah om ding a, lunglutna neite’n ngaihven theih ding hi.

 

 

SK Oil permit laktheih

LAMKA, May 14: Ccpur leh Pherzawl District sung a FPS Centre tuamtuam a SK Oil Sub-Dealerte’n Agent I-Card tawi in DSO/FCS Tuibong ah SK Oil permit laktheih ding a, huai ban ah government rate in SK Oil litre khat Rs. 27 in leitheih ding hi.

 

Agent-te’n SK Oil a lakna ding munte ahihleh 55-Parbung leh 56-Thanlon AC sung a agent-te’n M/S Pudaite Traders ah la ding ua, 57-Henglep AC sung a Agent-te’n M/S B.B. & Co; 58-Ccpur AC sung a agent-te’n M/S S. Paite; 59-Saikot AC sung a agent-te’n M/S Z.T & Co leh 60-Singngat AC sung a agent-te’n M/S JHK Agency ah la ding uhi.

 

 

Mothers Day lopna in Diabetes Free test

LAMKA, May 14: Jerusalem Clinic in zan, May 13, 2018 a Mothers Day zat ahih toh kiton in Nute’ itna latsakna in tuni, May 14 in IB Road ah diabetes vei dia kimuangmohte a thawn in test bawlsak uhi. Hiai hun ah mi 100 in test bawl ua, hiai hun a test bawlte’n Je­rusalem Clinic tung ah kipahthu gen uhi.

 

 

ASHA-te a di’n training neih himahleh tamtak tellou

LAMKA, May 14: Special IMI toh kisai in tuni, May 14 sunma dak 11 a pan CMO Mini Con­ference Hall, CMO Office Complex ah Dr Jamthi­anlal, District Family Wel­fare Officer (DFWO) Cc­pur makaih in ASHA-te’n training nei uhi. Training ahihleh naupang damthei­hna toh kisai a Special IMI neihna ding a ASHA-te kisinsakna neih ding chih hi a, himahleh hiai hun ah ASHA-te tam a tellouh ziak un, training ahi ding bangtak in nei theilou uhi.

 

Hiai training a ASHA-te a tellouh ziak uh ahihleh tuma lam a pan Manipur Govern­ment nuai a ASHA work­er-te’n fund a muh ding bang uh a muhlouh ziak ua lungkimlouh taklatna tellou hiding ua gintak ahihdan thutut kingah hi. Huai ban ah ASHA-ten damtheihna lam toh kisai a mohpuakna liantak nei ahihman un a buaina uh toh kisai a kisaipihte’n awlmoh a hihvengsak kin poimoh ahihdan leng thutut kingah hi.

 

 

Liangmai Inpi in Zeliangrong Baudi President social boycott puankhum

IMPHAL, MAY 14: Liangmai Naga Council, Manipur (LNC-M) thu­suak dungzui in, pawlpi in Liangmai mipite deih­dan kalh a gamtang Ze­liangrong Baudi, Assam, Manipur and Nagaland (ZB-AMN) President Athuan Abonmai social boycott puankhum hidan in taklang hi.

 

LNC-M thusuak in a taklatdan in, May 11, 2018 a LNC-M Annual General Meeting a reso­lution No. 7-Action-III pansan in, Liangmai Inpi in Liangmai mipite deih­dan kalh a gamtatna ziak in Mr. Athuan Abonmai toh kizopna tatsak leh social boycott puankhum hidan in taklang hi. LNC-M in, a poimoh leh hiai thubuai toh kisai chiang­zaw sem a leng suahkhe lai ding hidan in taklang hi. Athuan Abonmai in adinmun humbit ding a lunggulh lai leh, hiai thu­suah bawl ahih ni a kipan ni 10 sung ngei a, a taksa mahmah a LNC-M office ma a, a va kilat ngai ding hidan in leng LNC-M thusuak in taklang hi.

 

May 12, 2018 a Zeliangrong Baudi(ZB) in press thusuah a bawl toh kisai, Liangmai Naga Council-Manipur(LNC-M) in a dawnna ah, Ze­liangrong Baudi (ZB) constituent unit hikha­lou uh hidan in taklang uhi. Athuan Abonmai mahmah in suai a kaihna ‘Liangmai People Con­vention-2015’ thupuan dungzui a, Manipur a kipan Liangmai mipite’n Zeliangrong organiza­tion khatpeuh a kipan kizopna omte tatsak khin uh hidan in leng taklang uhi. Tua toh kiton in, ZB ahihkeileh Zelian­grong organization dang khatpeuh in, Manipur a Liangmai mipite ai-oh khalou uh hidan inleng taklang uhi. Zeliangrong organization-te’n a pawl­minte ua ‘liang’ chih thumal lakhe ding in vaulauna thusuah bawl khin mahle uh tutan in zangzomtou denlai ua, gamtatdan bohsiatna huaisetak hidan inleng taklang uhi.

 

 

6th edition of the EDUOP­TION hongkhiak in om

Aizawl May 14: Mizoram Eduction Min­ister H Rohluna in a gen­dan in state sung mun tuamtuam a sinsaktu omte’n sinlai naupangte kiang a sinsakna a piak hun chiang ua sinsakna hoih zaw leh tulai hun toh kituak sinsakna a piakkhiak theihna ding ua lehkhabu chi tuamtu­am a sim tam uh poimoh ahi chi’n gen hi. Hiai ding mah a kisa khol ding in­leng ngetna leh theihsak­na bawl ngal hi.

 

Hiai toh kisai ahi­hleh Minister in tuni a Assembly House Annexe, Aizawl a 6th edition of the EDUOPTION hong­khiakna a neih hun a, a gen ahi hi.

 

Rohluna in a gen­dan in sinsaktu a bik­tak in government sinsaktute’n a khuak uh leh ngaihtuahnate uh updrade bawl zel uh poimoh ahi chi a, tulai khovel ichih competitive sang lo mahmahta ahi­hna ah sinsaktute’n laibu tuamtuam a simtam kei ualeh a sinlai naupangte uh a ding a buai huai mahmah ding leh a ma­ban uh limchi lou ding ahi chi’n gen hi.

 

 

VENUS saina in Ccpur AC a candidate-te’n kithuahkhawmna nei ding

LAMKA, May 14: Vengnuam United Sport­ing (VENUS) in Febru­ary 28m 2017 a YPA Hall, Vengnuam South a ‘Live Discussion-cum- Debate with candidates of 58 Churachandpur A/C’ kichi a sai hun ua a ching penpen sponsor a kithuahkhawmna hun zat ding chih ahih dung­zui in, telching a om, V. Hangkhanlian, Minister (Agri., Vety & AH) kith­uahpihna in hongtung ding May 19, 2018 sun­ma dak 11:30 in St. Peter School, Vengnuam South ah kithuahkhawmna om ding hi.

 

Hiai hun zatna Samuel Soson, Media & Publicity, VENUS in makaih ding a, Pastor K. Pumsuanthang, Lo­cal Pastor, EBCC Pethuel in thumna a hun pan in Lamginlian Tombing, Vice President, VENUS in vaidawnna thugen ding hi.

 

Lalmuanlian Phai­pi, President, VENUS a pan thugen zoh in Upa Dr. DK Mang, CT Lian Guite, Thangbiaklian Hangzo, K. Paukhansu­an, Haukhanthang Zou, Phungzathang Tonsing leh V. Hangkhanlian a pan thugenna om ding a, gennop neite’ a di’n thugenna hun om ding a, Upa G. Kamkhanzam, Advisor, VENUS in kip­ahthu gen in Pastor T. Songkhanthang, Local Pastor, EBCC Vengnuam in thumna in hunkhak ding hi.

 

 

Noney Battalion-te’n Friendly Football Match sai

NONEY, MAY 14: Red Shield Division nuai Noney Battalion-te’n tuni Seppatni in Charoi Patongba -II leh Tupul a kipan Assam Rifle Com­pany team nihte kal ah friendly football match nei uhi.

 

Hiai match a kimawltuah team-te’n itna, kithalawpna leh kimawlna kha diktak lak in, kidemtuahna na­satak mai nei uhi. Cha­roi Patongba-II a ki­pan teamte’n vualzohna a ngah ua, mipite’n leng kipahpih in kikoukhum uhi.Match zoh in kipah­man hawmna in zui a, vualzou team leh promis­ing player of the match-te kiang ah kipahman piak in om uhi. Hiai zoh in, ball pek en tuailaite kiang ah, sports quota tungtawn a Indian Army/ Security Force zop theih ahihdan theihsak in om ua, huai ding a taksa hoi­htak neih poimoh ahih­dan sinsak leh hanthawn in uhi. Khosung mite’n sepaihte panlakna kipah­pih mahmah uhi.

 

 

Art Exhibition closing function neih in om

IMPHAL May 14: Art & Culture Minister L. Jayantakumar Singh in a gendan in state gov­ernment panlakna nuai ah Manipur state in Art College khat a neih pen tunung zek chiang a up­drade bawl ahih theihna ding a panlak hiding chi’n gen hi.

 

Hiai toh kisai ahi­hleh Minsiter in Imphal Art College, Dewlaland a Art Exhibition clos­ing function neih ahih hun a, a gen ahi hi. Art College staff-te toh hou­limna a neih hun inleng college puahphat ahih theihna ding a state gov­ernment kiang a pro­posal pe lut ding hidan in gen hi.

 

Hiai hun zatna ah Minister in classroom, pratical studio leh main building-te etkhiakna nei a, exhibition neih ahih hun a kidemna a lai kigelhte leh laigelh chi tuamtuam omte leng et­khiakna nei hi’n thusuak in taklang hi.

 

 

May 15 in Go to Village Mis­sion programme zat hiding

BISHNUPUR, May 14: Bishnupur district ad­ministration-te makaih­na nuai a zingchiang May 15, 2018 in sub-division 3 sung Irengbam, Khoi­juman leh Ikhai Mayai Leikai-te ah ‘Khungang Chetse – Go to Village’ mission programme zat a om ding hi’n thusuak in taklang hi.

 

Huai hun ah Line Department leh banking institution-te’n district sung mun tuamtuam ah zinglam dak 9 a kipan in nitaklam dak 4:30 tan stall hong ding uhi.

 

Hiai toh kisai in Bishnupur DC Pawan Yadav in district level officer-te kiang ah action taken report-te submit vek ding in tuni a con­ference hall, DC office a meeting neih ahih hun in theihsakna leh ngetna bawl hi.

 

Complaint form hawmkhiak a om teng­teng ahihleh a vek gawm­khawm in 10897 hi a, tu kha sung a mun 9 a camp neih ahih hun in com­plaint 6556 piaklut a om hi’n leng thusuak in tak­lang hi.

 

 

Jiribam ah Youth Leadership Camp nei

JIRIBAM, MAY 14: Ideal Youth Society, Lairembi Leikai,Jiribam leh CADA Jiribam dis­trict-te saina toh tuni Seppatni in Jiribam Lairembi Leikai, Leirem­bi Phampak ah ni khat sung daih ding Youth Leadership Camp neih in om hi.

 

Hiai hun ah L Nao­ton Singh S.O. MSPDCL leh N Chingleng Singh-te Chief Guest leh Guest of Honour in pang tuak uhi. Camp ah volunteer 32 ki­hel uhi. Camp neihna kim ah singnou suanna leng nei uhi. Thugentute’n khotang a damdawi khamtheih zatkhelhna in a sukkhak thilte toh kisai gen uhi.

 

 

CISCE in ICSE class 10 leh ISC class 12 result puang:

Pass Percentage 98.51% tung, Swayam Das in 99.40% toh topper la

NEW DELHI, MAY 14: Council for Indian School Certificate Examination (CISCE) in, tuni Seppatni in ICSE class 10 leh ISC class 12 result puang hi.

 

ICSE Result 2018 a ding in pass percentage 98.51% tung a, ISC Re­sult 2018 a ding in pass percentage 96.21 % tung hi. ISC class 12 exam a ding in candidate 7 in 1st position luah uhi. ICSE class 10 ah St Mary’s Navi Mumbai a kipan Swayam Das, marks 99.40% toh topper in pang hi.

 

February 26-March 28 kikal in ICSE Exam, 2018 neih in om a, February 7, 2018 leh April 2, 2018 kikal in ISC Class 12 exam, 2018 neih in om hi. Council for Indian School Certificate Examination(CISCE) saina nuai ah ICSE leh ISC exam neih in om hi.

 

Tukum in student 1.84 lakh in Class 10 board exam pia ua, ICSE a pass na ding in pass marks 35% hilou in 33% tan bikhiah in om hi.

 

 

 

NEWS TOMKIM

 

Zamlal Vaiphei Memorial Service om ding

LAMKA, May 14: Zingchiang, May 15 zingkal dak 7 in VPC Hall, Bethel Veng, New Lamka ah Rev Zamlal Vaiphei Memorial Service om ding hi.

 

Singngat ah Alto Car a pan No. 4 mankhia

LAMKA, May 14: Police a pan kizadan in, May 12, 2018 nitak in Lamka a pan Singngat zuan Alto Car, Registration Number ML05F/6579, muanmoh ziak a police-te’n a check-na uah car sung a kikoih Khaini buk 4 dim a kithun Heroine No. 4 mukhia uhi. Car sung a No. 4 matkhiak ahih toh kiton in car a tuang Ching Mary (40) d/o Thomkai of Simveng, Singngat leh Chinkholian (30) s/o (L) Tuankhankhup of Mission Veng, Singngat man in amau a pan in sumtang Rs. 51,750/- leh mobile handset mankhia uhi. Mat a omte zan in police in court ah dingsak ua, court in May 18, 2018 tan Police Custody a om ding in phalsak hi. Hiai thu ah Police in FIR No. 4(5)2018 SNGT – PS, u/s 21(a)ND & PS Act chiamteh uhi.

 

SUNNA

Ginzadaou Khaute s/o (L) Luahkhogin Khaute, tuni zinglam in si a, tuni mah in kivui ngal hi. RIP.

Talitha Lalrinlien (22) d/o Moinu, RPC Campus, Bible Hills, Rengkai, tuni zinglam dak 3 vel in lungtangna in Mother’s Care, Imphal ah si hi. RIP.

Upa Kamkhanpao Zou, P Salem, Ex president, UZO Kanan Block, damlouhna ziakin tuni nitak in si a, zingchiang in kivui ding hi. RIP.

Thangboi s/o Thangkhomang, Tangpizol, damlouhna ziakin tunitak in si a, zingchiang in kivui ding hi. RIP.

 

 

 

…more detail : Here

Read 447 times
Login to post comments