You are here: HomeNewsLamka PostThe Lamka Post | May 31, 2018

The Lamka Post | May 31, 2018

Written by  Published inLamka Post Thursday, 31 May 2018 19:40
The Lamka Post | May 31, 2018

2-Day Bank Strike kipan; khaloh lakkhiak leh ATM Service-te buaisak

NEW DELHI, MAY 30: Bank staff-te khaloh 2% lel khansak ahih ziak a lungkimlouh lahna in bank-te leh employee union-te kal a kihouna tamveitak neih himahleh bangmah masawnna a omlouh ziakin public sec­tor bank a semtute’n tuni Nilaini a kipan a ‘two-day nationwide strike’ a pat ziak un, bank nasepna lam naktak in buaisak hi.

 

Bank protest hun leh kha bei hun a kituah ziak in, khaloh lakkh­iakna lam leng naktak in buaisak a, huai banah, ATM transaction leng buaisak hi. Tuate ban ah strike in bank branch-te a sum koihlutna, FD re­newal, government trea­sury operation, money market operation chihte leng buaisak kha ding hi. Online banking nasep­nate ahihleh sukbuai in om khalou hi.

 

All India Bank Em­ployees Association (AI­BEA) general secretary C H Venkatachalam in a gendan in, khaloh neu­chik khansak ding tah a om toh kisai, public sec­tor bank semtute sim­mohna khat ahi chi’n gen hi. Semtute’n ni nih sung kiphinna neih ding chi­hlouh ngal deihtelna dang neilou uh chi’n All India Bank Officers’’ Confederation (AIBOC) joint gen­eral secretary Ravinder Gupta in gen hi. Mudra, Jandhan leh demon­etization tel in govern­ment scheme tengteng lohchinna public sector banker-te himahleh a kipahman ding un khaloh 2% lel khansak hi a, gamsung tundingna ding a kulhkaltak a nas­emte tung a dikloutak a thukhenna huaisetawp ahi chi’n Gupta in gen hi.

 

Bank union makai Ashok Gupta in NDTV a theihsakna ah, bank union-te khaloh 14-15 % nuailam khansakna pompih ding in kimanlou uh chi’n gen hi. In­dian Banks’ Association inleng a thilngette uh genkhawm ding nawlkh­insak chi’n gen hi. Kum 2012 a khaloh khansakna nanungpen neih ahih hun in, semtute’n 15% a khang khaloh sang uh chi’n UFBU West Bengal convenor Sid­dhartha Khan in gen hi. Thilngette genkhawm ding nawlkhin a hih toh kiton in, bank union 9te kikhaikhawmna pawlpi United Forum of Bank­ing Unions (UFBU) in, 2% lel a Indian Banks’ Association in khaloh khansak a sawm dei­hlouhna in nationwide bank strike pankhe ding in thupuk hi.

 

National Organisa­tion of Bank Workers Vice-President Ashwani Rana in a gendan in, May 30-31, 2018 in India pumpi a bank a semtu lakh 10 velte’n 2% sang a tamzaw a khaloh khansak ding ngiatna a strike neih ding thu ana puanglawkta ua, ATM security guard-te’n leng bank strike zom ding uh chi’n gen hi.

 

United Forum of Banking Unions in a baihtheipen a, a ngetna uh hihfelsak a, khaloh khansak ding, service dangte dinmun puah­pha ding leh scale VII tan len officer tengteng a dia wage revision settlement bawl ding chihte phut in nei uhi. Chief Labour Commis­sioner in hiai thubuaite naktak in nungthuap a, Indian Banks’ Associa­tion kiang ah dawnna kipahhuai pe ding inleng theihsak hi. Officer leh semtute kiang a, sum pungte pansan hilou a, a kuhkalna ziak ua khaloh hoihzaw piak ding ahi chi’n gen hi. November 1, 2017 nung bank teng­teng a dia wage revision bawl ding leng khawlsak in omtou den hi.

 

State Bank of India (SBI), Punjab National Bank (PNB) leh Bank of Baroda (BoB) tel in bank tamzawte’n customer-te kiang ah, strike a om leh branch leh office nasep­nate nawngkai thei ding ahihdan toh kisai theisak khin uhi. Strike in public sector bank branch-te a sum koih leh lakkhiakna lam buaisak kha ding hi’n leng theihsak khin uhi. Himahleh bank strike in private bank khenkhat ICICI, HDFC, Axis leh Kotak Mahindra-te nas­epna sukhalou hi.

 

Bank strike sung a, sum kithotna ding a digital banking service khenkhat UPI, MahaMo­bile app, internet bank­ing facility-te zang ding in customer-te theihsak in om uhi. Gamsung pumpi a sumsinna 75% phial ding thuneihkhum public sector bank 21 vel om uhi.  

 

 

MPCC in Citinzenship (Amend­ment Bill), 2016 zukkik di’n ngen

IMPHAL, MAY 30: Manipur Pradesh Congress Committee (MPCC) in, Government of India leh NSCN-IM kal a Framework Agreement suaikaihna thubuai toh kisai in, a dinmun uh letkipna thak bawl uhi.

 

Tuni Nilaini a Congress Bhavan, BT road a protest meeting neihna hun ah Manipur gam leitang kipumkhatna humbitna ding a panla zomzel ding in thupuk ua, gam leitang, kivaihawmna, sumsaina, taw­ndan leh political leh a dangdang a kikhenzakna ding thilsawm khatpeuh pompih ngeilou ding uh hidan in­leng taklang uhi. Tuni a protest meeting a tel MPCC President TN Haokip, Leader of Opposition O Ibobi, MPCC President lui Gaikhangam-te’n leng, Manipur state lunggulh leh deihte kepbitsak ding a Central Government leh Political party makai tengteng a ngen ding inleng thupuk uhi.

 

Citizenship (Amendment Bill), 2016 thubuai toh kisai in, MPCC in Bill dal ding a, Citinzenship ( Amend­ment Bill), 2016 zukkikna ding a Joint Parliamentary Committee (JPC) kiang a memorandum pelut di’n leng thupuk uhi. A kintheipen a Bill zukkikna ding a, Prime Minister leh Union Home Minister-te kiang a leng memorandum khat pelut ding in MPCC in thupuk hi.

 

 

UFBU strike ziak in Lamka a Bank-te kikhak

LAMKA, May 30: United Forum of Bank Unions (UFBU) in government a ngetna a bawlte uh pichin ding phutna in tuni, May 30 zingkal dak 6 a pan da­kkal 48 sung Continuous Bank Strike pan uhi. Bank Strike in Public Sector Bank teng a huamtel ziak in Ccpur district sung a Public Sector Bank tuamtuam a Bank Branch omte SBI/Ccpur Branch ah sunma dak 10:30 a paikhawm in Sit-in-Protest nei uhi.

 

Public Sector Bank-te’n nuakna a neih ziak un Bank Branch leh ATM Booth-te khak in om a, strike in June 1, 2018 zingkal dak 6:00 tan daih ding hi. UFBU in ahihleh government in scheme tuamtuam a patkhiak thakte ah kigolhkhakna liantak nei mah­le uh a khaloh uh November 2017 a pan punsak ahi­hlouh ban ah government a demand tuamtuam a neihte uh pichin saklouh a omte pichin ding phutna a nuakna a neih uh ahi.

 

Strike in Lamka a Bank-te tel in Public Sector Bank a sem mun tuamtuam a pan semtu a lakh a sim huamtel hi. Khaloh punthu ah government in 2% a punsak ding in chiam mahleh, semtute lung­kimlou ua, sepna dungzui a khaloh punsak ding leh huai in semtu, Scale VII tan a huamtel ding chih ban ah demand tuamtuam a neihte uh kintak a pi­chinsak ding ngen uhi.

 

 

Felicitation Ceremony of Mer­itorious students of Catholic School programme nei

IMPHAL, MAY 30: Hinkhua a tup leh ngim i nei­hte pichinsak theihna ding in lungsim ngaihtuahna zat siam leh a hoih lam thil deihna ban ah society sung hoihna kipumpiakna chihte poimoh mahmah ahi chi’n CAF & PD, Revenue Minister Karam Shyam in gen hi. Huai ban ah hoih deih ziak a haksatna tuah leng poisa lou a self challenging neih kichi leng mihing khat a ding a thil poimoh mahmah khat ahi chi’n gen hi.

 

Hiai toh kisai ahihleh Canchipur a Felicitation Ceremony of Meritorious students of Catholic School ( Class I – X) programme zatna neih ahih hun a, Minis­ter Karam Shyam in a gen ahi hi.

 

Minister Karam Shyam ahihleh Chief Guest hi­hna toh Programme a kihel hi a, N. Mohilal Meitei, Prof. M.U., President PTA, CSC; M Lokendro Singh, retd. Chief Engineer leh Dominic Lumon, most Rev. D.D. Archbishop, Imphal-te’n leng Guests of Honour leh President hihna toh programme hun ah kihel uhi

 

Minister Karam Shyam in a gendan in amah constituency Langthabal sung a kipan in Catholic skul-te’n hih hoih mahmah ahi uh chi a, a biktak in Class X result suah hun in top 10 sung ah mi 3 om kha ua, top 25 sung ah mi 5 leh first division in mi 151 om uh ahi chi hi. Hiai toh kisai in sinlai naupangte’n siamsinna lam toh kisai a masawn mahmah uh ahi chih muh theih ahih lai­lai in exam hun chiang a mark tamtak muh pen a tawpna ding hilou ahi chi a, thil bangkim a siamna poimoh ahihna ah extra-curricular activitie-te a kihel tam leng poimoh ahi chi’n gen hi. Gam sung hoihna, masawnna leh khantouhna kichi­antak a om theihna ding in chihtak leh ginomna kuapeuh mah in a neih ding ahi chi hi.

 

Sum i chih hun sawtlou chik sung a kizang bei pah ahi chi a, himahleh siamna kichi pen i damsung a ding a zat theih leh kuamah hon guk sak theihlouh thil ahihna ah siamsinna ngai poimoh a, sum deihtak ziak a thil hoih lou chiin kichi pen tawpsan ding ahi chi’n gen behlap hi.

 

Siamsinna lampi a lohching leh gahsuah mi khat i suah theihna ding in fields of adminis­tration, executive office work, social work ban ah all round education neih poimoh mahmah ahi chi’n Minister Karam Shyam in gen hi.

 

Karam Shyam in private teacher-te pahtak huai a sak thu a gen kawm in amaute ziak a student laisiam taktak hong piangkhia uh ahi chi a, state government nase­mte sang a leng panla zaw leh amaute delh phaklou mite ahi uh chi hi.

 

Minister Karam Shyam in a genzelna ah amah pianna pa min tam a Memorial Foundation kichi patkhiak hiding chi a, hiai toh kisai in sinlai naupang rank sangtak mute kiang ah financial assistance leh prizes kilawmhun tawk kum teng a piak hiding chi’n gen hi.

 

Programme zat hun in Rabichandra Me­morial Award, Catholic skul HLSC topper 2018, Km Archana Hijam kiang ah kipahman piakkhiakna neih in om hi. Amah ahihleh Ma­nipur state pumpi a 4th position ahi hi.

 

Huai ban ah Naorem Feirojamba Meitei leh Ph Ashima-te’n leng 4th leh 10 position hihna ngah in kipahman piak in om hi.

 

Function hun ah Teachers, staff, students leh Catholic School guardian-te kihel uh hi’n thusuak in taklang hi.  

 

 

SSPP-RS in Class X exam a lohchingte kipahpihna hun zang

LAMKA, May 30: Siamsinpawlpi (SSPP) Residential School Man­aging Committee saina in tuni sunnung dak 3 in SSPP Residential School, Nghathal ah tu kum, 2018 a Board of Second­ary Education Manipur nuai a Class X examna a lohchinna ngah student-te kipahpihna leh amaute adia thumsakna om hi.

 

Hiai hun ah “There Are Far, Far Better Things Ahead Than Any We Leave Behind” chih thupi zang ua, School Managing Committee (SMC), SSPP GHQ a makaite ban ah student-te nu-le-pate tel ua, P Vaiphei, IAS, Principal Secretary, Textiles, Com­merce and Industry, Govt of Manipur in chief guest hihna toh uap hi.

 

Hun zatna N Gin­sianlal, Member, SMC in makaih a, Miss Thangn­gaihnem, School Coun­cilor, SSPP Residential School in thumna a hun pan in M Ginlalsiam, Secretary, SSPP-GHQ in vaidawnna thugen hi. Miss Kimbiaksang, Head­mistress, SSPP Residen­tial School in pulakna leh kipahpihna thilpiak piak­na hun makaih a, Rev Ginmalsawm, Director of Social Development, EBC in SSPP Residential School a pan Class X ex­amna a lohchinna ngah student-te ban ah teaching staff-te a ding vualzawlna ngen in thumsak hi.

 

Hun zatsung in Thanglalmuan Hauzel, President, SSPP-GHQ, N Khamsuanthang, Chair­man, SMC, Chief Guest P Vaiphei, IAS leh M Zam­chinthang, Ex-Chairman, Standing Committee SSPP a pan thugenna om in, hun tawp ah G Mang­khenpau, Member SMC in thumna in hunkhak hi.

 

SSPP Residential School in 2013 a pan Class X exam nei pan ua, 2016 in student 24 in class X exam maituah in student 30 lohching ua, pass percentage 75 tung hi. 2017 in student 41 in Class X exam maituah ua, student 28 lohching in pass percentage 68 tung hi. Tu kum 2018 in student 36 in class X exam maituah in 18 pass ua, pass percentage 83.33 tung hi. Tu kum in tudent 9 in first division in zou ua, student 20 in second ban ah student khat in third a zou in, student 2 in compart­ment mu ua, student 4 fail uhi.

 

Tu kum a Class X exam ah SSPP Residen­tial School a pan Mang Johnson in MIL leh Mathematics ah let­ter mark mu in school topper award sang a, Niangiitkim in MIL, English leh Home Sci­ence ah letter mark mu a, HN Khupminsang Simte in MIL leh home science ah letter mark mu hi. Tu kum a lohchinna ngaih student-te kiang ah Oxford Dictionary khat chiat piak ahih ban uah, letter mark muhna sub­ject teacher-te kiang ah leng kipahpihna thilpiak piak in om hi.  

 

 

Ginmalsawm Tonsing Award apply theih

LAMKA, May 30: Centre for Community Initiative (CCI) in kum 2016 a pan Ginmalsawm theihgigena dia vualbanloute kiang ah Ginmalsawm Tonsing Award a piak zel bang un, tu kum 2018 inleng piak sawm uhi.

 

Ginmalsawm Tonsing Award ahihleh Ccpur Dis­trict sung a School leh College tuamtuam a pan taksa bukimlouhna nei, tu kum a CBSE/BSEM/COHSEM nuai a Class X leh Class XII examna a lohchinna ngahte’n apply theih ding hi.

 

Award ahihleh kipahpihna lai leh Rs. 5,000 hid­ing a, Award ngahthei dingte’n kingetna, mark sheet, original mark sheet download leng pom hiding a, huai nei manloute’n Provisional Certificate, Disability Cer­tificate leh limlak passport size copy khat toh thuah in June 23 tan office kai hunsung in Centre for Commu­nity Initiative (CCI), Nehru Marg, Central Lamka ah piaklut theih ding hi.

 

Award ahihleh Malsawm Ability Resource Cen­tre (MARC), Pearsonmun ah hongtung ding June 26, 2018 a Unau Meet 2018 zat hun ah piakkhiak hiding hi. Ginmalsawm Tonsing Award ahihleh Pauzagin Tonsing-te nupa in April 23, 2016 a mualliam, a tapa uh Ginmalsawm Tonsing theihgigena ding leh vual­banloute laisimna lam a hanthawntu ahih ding deihna a June 2016 a pan a patkhiak uh ahi.

 

 

DC/Pherzawl in temporary office luahta

LAMKA, May 30: Mannuamching, IAS, DC/ Pherzawl in temporary office dia a zat, District Training Centre a District Agriculture Department in Paddy Laboratory dia a bawl ah tuni, May 30, 2018 a pan office kai pan­ta hi. Mannuamching, IAS ahihleh a May 16, 2018 a Dr. J. Suresh Babu, Chief Secretary (DP) in Manipur Governor min a order a suah dungzui in Joint Di­rector, MOBC & SC a pan Deputy Commissioner, Pherzawl District a suan in om hi. Temporary of­fice ah public toilet room ding ban ah office room dia zattheih ding room 4 om a, Thianlaljoy Gangte, MCS, Addl DC/Pherzawl leh Lalpharakpam Thom­son, MCS, SDC/Pherzawl in luah ding uhi.

 

 

Birthday zatna in sisan pia

LAMKA, May 30: Tuni, May 30 sunnung dak 1:50 vel in Siam Phaipi, Proprietor, PB Store, Lailam Veng, Central Lamka in a Birthday zatna in Lamka Damdawi Inn Blood Bank ah damlou sisan poimohte a ding in a sisan unit 1 pia hi.

 

 

DEO saina in Booth Level Officer-te’n training nei

LAMKA, May 30: District Election Offi­cer (DEO) Ccpur saina in tuni’n DTC Hall ah ni nih sung Cascaded Train­ing Related to the Prepa­ration of Electoral Roll kichi Ccpur leh Pherzawl district a Assembly Con­stituency a Booth Level Officer-te’n nei uhi.

 

Tuni sunma dak 11 a pan sunnung dak 3 kikal in training nei ua, hiai hun ah Ccpur leh Pherzawl district sung a assembly constituency 6 a pan constituency 3 - 56-Thanlon, 60-Singngt leh 58-Ccpur a BLO Su­pervisor leh BLO-te tel ua, electoral roll SSR 2019 toh kisai training uhi. Tuni a training hun ah Thienlaljoy Gangte, Addl DC/Pherzaw/ERO in training toh kisai pu­lak a, Lamminlal Simte, ADO, AERO/Thanlon, James Sehlal Hangshing, SDO, AERO/Singngat, Thangboi Gangte, SDO, ERO/Ccpur leh Minlen Lupho, SDC, AERO/Cc­pur in sinsak uhi.

 

Hiai hun ah Elec­toral Roll SSR 2019 toh kisai a BLO Supervisor leh BLO-te’n election nei­hna mun ding election booth-te lut leh pawtna ding kichian, ramp, tui, electric supply, vanzat ding furniture tuamtu­am, zun leh ek thakna ding kichiantak ban ah election duty-te gaihna ding a hoih hun tawk hiam chih-te etkhiak ding dan sinsak uhi. Huai ban ah BLO Register a mobile number, voter hihna ki­chian, veng/khua ah teen kumzah, tu kum a vote khe thei ding leh vote khe thei dia kum ching om zah chihte gelhlut ding dan sinsak uhi. Elector Roll SSP 2019 neihna ding toh kisai a BLO Supervisor leh BLO-te mohpuakna poimoh dan, BLO Super­visor leh BLO-te mahni mohpuakna National Duty bang a ngai a semsuah ding in ngen uhi.

 

BLO Supervisor leh BLO-te’n a duty uh a ngeingaihlouh ziak ua, ERO, AERO ban ah District dministration in buaina tamtak tuak ban uh ahihdan hiai hun ah sinsak uhi. BLO Supervisor leh BLO-te’n a mohpuakna uh kha khat sung a zousiang a, ERO/AERO-te kiang a BLO Register book a piaklut uh ngai ding hi.

 

Training ahihleh zingchi­ang May 31 in leng sutzop hiding a, huai hun ah Assembly Constituency 3 - 55-Tipaimukh, 57-Henglep, leh 59-Saikot a BLO Supervisor leh BLO-te training ding ua, huai ah Derick Khobung, SDO AERO/Vangai, T Joshep Lhungdim, SDO AERO/Hen­glep, James Douzapao Haokip, SDO ERO/Tuibong leh Lalsuong Gangte, SDC AERO/Tuibong in sinsak ding uhi.

 

Ccpur leh Perzawl district ah assembly constituency 6 om a, 55-Tipaimukh ah BLO Supervisor 5 leh BLO 38, 56-Thanlon ah BLO Supervi­sor 5 leh BLO 18, 57-Tipaimukh ah BLO Supervisor 6 leh BLO 58, 58-Cc­pur ah BLO Supervisor 9 leh BLO 73, 59-Saikot ah BLO Supervisor 10 leh BLO 71 ban ah 60-Singngat ah BLO Supervisor 6 leh BLO 49 om hi.

 

 

Mualnuam khomi Class X & 12 examna a lohchingte kipahpihna nei ding

LAMKA, May 30: Socio-Economic and Ed­ucational Trust-M(SEET-M) in hongtung ding June 9, 2018 in Angel’s Place, Bungmual ah tu kum 2018 a Board tua­mtuam nuai a Class X & XII examination a lo­hchinna ngah Mualnu­am khosuakte lopna leh kipahpihna programme zang ding uhi. Hiai hun a lohchingte thumsakna Pastor H. Laithang in nei ding a, tu kum a lo­hchinna ngah Mualnuam khosuakte’n SEET(M) committee a nuai a min kitaklang khat peuh ki­ang ah June 6 tan in marksheet piaktheih ding hi.

 

Huaite ahihleh M Thangzalian, Dorcas Road, Opposite, New Lamka YPA Cemetery; Upa. L Tualzalian, Chi­imtung / Dorcas Veng; Songkhenthang Dousel, Zion Veng, New Lamka; Mangmuanlal Guite, Convention Road, New Lamka; H Zamsuan­mang, Church Road, COC Campus, New Lamka leh Jamginmuan Guite, D Phailian. Hiai hun zatna lohchinna ngah student-te leh a nu-le-pate’n uap chiat ding in SEET-M makaite chialna bawl uhi.

 

 

Lamka ah LATSEA tungtawn in biode­gradable carry bag piakkhiak hiding

LAMKA, May 30: Ccpur district sung a polythene/plastic bag (carry bag) kham ahih toh kiton a huai tang a zat ding, biodegradable carry bag supply dia Memoran­dum of Understanding (MoU) suaikaihpih a om M/S MK Plastic, Dima­pur a pan leh Distribu­tor ding, Lamka Traders & Self Employed Asso­ciation (LATSEA) in mipi theihsiam ding in press leh media-te ma ah hiai toh kisai tuni’n gen uhi.

 

CT Lian Guite, Con­vener, LATSEA in hiai hun ah a muat theilou plas­tic kizatziak a mihing leh khovel a dia hoihlouhna tuamtuam omte gen a, khekkhiak ahih theihna dia district administration in pan a lakna tung ah kip­ahthu gen in, hiai panlakna ei a dia hoih ahihdan thei a michih in nungthuap a zuihchiat poimoh ahihdan gen hi. Huai ban ah a muat theilou plastic teng Moreh a pan laklut a om hi’n gen a, huaite a muatna ding in kum 80 a pan kum 500 lut a, zatsate paihthang ahih chiang a huih in mutleng in tuilak leh leilak tuzel ahihdan gen hi.

 

Plastic muat thei­lou tuilak a tuk chiang a suang leh sing/loupa a kibat in tui pen luanghoih theilou hi’n gen a, leilak a tukhate hunsawt in lei­kawm ah tumsuk in huai in leikawm a tui hiip­mang ahihdan gen hi. A muat theilou plastic pen damdawi (chemical) zang a kibawl ahih ziak in thil tunna dia zat ahih chiang in a rong kia in nek ding lak ah baangthei a, huai in cancer tanpha tuntheih hi’n gen hi. Huai ban ah hal ahih chiang in a khu zamtou in huai in vuahtui niinsak a, vuahtui a pan natna chi tuamtuam om theinawn ahihdan gen hi.

 

Mihing damthei­hna awlmohna toh Su­preme Court order omsa pansan a district admin­istration in a muattheilou polythene khamna a bawl kipahpih ahihdan gen in, a muatthei (biodegrad­able) plastic zat dingte subsidized rate a leitheih dia pan hon lak uh a deih thugenhi. Hiai pan­lakna michih in eimah a dia hoih ahihdan thei a, kithuahpih chiat ding leh a lei nuamte’n chilaipeuh a Hatzel Aw Dawr (Oppo­site Dorcas Hall), Hebron Veng, New Lamka a deih bangbang size muhtheih ding ahihdan gen hi.

 

Gracy Haokip, Managing Director (Sales), MK Plastic in Manipur pumpi a biode­gradable plastic supply dia mohpua uh ahihdan gen a, maban ah Moreh leng hiding a, mi tamtak in a theih siamlouh, plas­tic khenkhat a kigelh, “51 Micron” kichi pen “bio­degradable” chihna hilou a, plastic sahdan (thick­ness) hizaw hi’n gen hi. Huai ban ah, biodegrad­able plastic theihtupna dia “Recyclable” symbol om ding hi’n gen a, Ma­nipur ah ahihleh M/S MK Plastic khutsuak kigelh ding a, Lamka ah LATSEA tungtawn a hawmkhiakna toh kisai mohpuakna piak a om ahihdan gen hi.

 

Thangsangkham, Secretary, Information & Publicity, LATSEA in a genna ah, patkhiak a om biodegradable plastic zat ding toh kisai mipi a dia thilhoih ahih toh kiton a government in “Go to Vil­lage” mission tungtawn in singtang dawn ah leng awareness a om theihna dia pan hon lak a deihthu gen hi. Huai ban ah plas­tic kizang lel khekkhiak­na dia thilthak ahih toh kiton a aman leng sub­sidized rate a piaktheih hileh chih a deihthu gen in etkaina toh kisai leng hoihtak a sepsuah hileh chih a deihthu gen hi.

 

Polythene/Plastic Bag (Carry Bag) muat­theilou khamna ahihleh District Administration, Ccpur in May 27, 2018 a pan zatpat dia order a bawl hi a, hiai toh kisai mun tuamtuam a check bawl ahih theihna di’n leng order suahkhin a, himahleh bazaar ah nak­tak a zat in omlai hi. Hiai order suah a omte a lo­hchinna dia etkai poimoh mahmah hi’n kilang hi.

 

 

Intensified Diarrhoea Control Fortninght launching om ding

LAMKA, May 30: District Health Society, Ccpur saina in zingchi­ang, May 31 sunma dak 9:30 a pan sunma dak 11:30 sung in DTC Hall ah “Intensified Diar­rhoea Control Forth­night (IDCF) honkh­iakna om ding hi. Huai hun ah chief guest, guest of honour leh function­al president in Shyam Lal Poonia, IAS, DC/ Ccpur; Mannuamch­ing, IAS, DC/Pherzawl; Rakesh Balwal, IPS, SP/ Ccpur; Dr. Kimngaihch­ing Simte, CMO/Ccpur leh Kh. Maipakpi Devi, DPO, ICDS pang ding uhi. Huai hun in Ccpur Doctors’ Assn (CDA) makaih in World No Tobacco Day 2018 & Dissemination of Gate II 2016-2017 for Mani­pur One Day Free Oral Health Check Up leng om ding hi.

 

 

One-day fertility camp and farmers orientation programme nei

IMPHAL, MAY 30: Manipur state sung a hill district area munte a kipan gankhoina lam toh kisai a product tam­sem a piankhiak theihna ding ngimna in tuni in Longmai (Noney) Part 5 community hall, Non­ey district ah expert-te makaihna nuai ah one-day fertility camp and farmers orientation pro­gramme neih in om hi.

 

Programme ahi­hleh “Artificial Insemi­nation and Its Impor­tance and Scope of Animal Husbandry in the Hill Areas (Dairy Pig­gery, Poultry)” chih thu­pi pansan a neih a om hi a, All Tribal Rights’ Pro­tection Forum Manipur (ATRPFM)-te’n Manipur Livestock Development Board, Sanjenthong, Imphal-te sponsor-na nuai a, a sai uh ahi hi.

 

Hiai hun ah H Vi­kram Singh, Managing Director, HVS Construc­tion Pvt Ltd,in project toh kisai a thil poimoh tuamtuam omte ban ah a panlak dan toh kisai genkhiakna nei hi.

 

Huai ban ah activist Romeo Bungdon, Dr H Chaoba Singh, Director, Veterinary and Animal Husbandry Services leh Dr Kh Shantibala Devi, Project Officer, ICDP,

 

 

Porompat-te’n thugenna hun zang uh hi’n thusuak in taklang hi

LAMKA, May 30: Tuni, May 30 sunnung dak 3:30 in United Zou Organisation (UZO) GHQ makaite’n Mannuamching, IAS, DC/Pherzawl, a tenna inn, Zomi Colony ah kipahpihna hun zang in ankuang umpih uhi.

 

 

‘Julie, Aw Julie’ kichi laibu hongkhe ding

LAMKA, May 30: Hongtung ding June 2 sunnung dak 1 in Conference Hall, PCI Head Office Building, New Lamka ah Valte Ginkhenpau in a gelh “Julie, Aw Julie” kichilaibu honna om ding hi. Hiai hun zatna hunpi nih in kikhen ding a, hunpi masa ah laibu gel­htu Valte Ginkhenpau a pan laibu toh kisai pulakna om ding a, zinpipa H Mangchinkhup, Ex-EM, ADC Ccpur in laibu hongkhia in, thugenna nei ding a, hun zatsung in Pauzagin Tonsing a pan laibu etkikna om ding hi. Hiai hun ah Zomi Council (ZC), Zomi Youth Assn (ZYA), Paite Tribe Council (PTC), Paite Laipau Saipawl (PLS), Paite Cultural Society (PCS), Young Paite Assn (YPA), Siamsinpawlpi (SSPP) leh heutu tuamtuamte a pan thugenna leng om ding hi.

 

Hun nihna ahihleh laibu toh kisai in houlimna, dotna leh dawnna hun in zang ding uhi. Laibu gelhtu Valte Ginkhenpau in ahihleh laibu chi tuamtuam 2001 kum in “Chiamnuih leh Thutak” leh “Ka Hinna Nang Di’n Ka Pia” chih leh 2002 kum in Greek Sintung Bu, 2015 in Hoihnu-Zalmang Lianu leh 2016 in Nang Kia Na Hi chih laibu bawl a, tu kum 2018 a laibu hong­khiak dia zohsiang ‘Julie, Aw Julie’ leh ‘LAPD’ nei a, nang kia na hi kichi laibu deihte’n Convention Book Room, Dorcas Road junction, New Lamka ah 250 pia in muhtheih ding hi.

 

 

(Late) H Lalzagin Memorial Open Football Tournament om ding

LAMKA, May 30: Ginthansang Hauzel leh Piang Valte saina in hongtung ding June 9, 2018 a pan in Nghathal playground ah a nih­veina (Late) H Lalzagin Memorial Open Football Tournament om ding hi.

 

Hiai tournament ah champion in Rs 10,000/- certificate leh trophy sang ding ua, runner up in Rs 5,000, certifi­cate leh trophy sang in best player, best keeper leh top soccer kiang ah kipah­man piak hiding uhi. Tournament a tel­nuam football club/team-te’n Rayburn High School kiang a Student Book Store ah Rs 60 pia in entry form muhtheih ding a, June 7, 2018 tan in entry form, entry fee 1500 leh security 300 toh piakluttheih ding hi.

 

 

Legal Awareness Programme nei

KANGPOKPI MAY 30: Numei-te’n ahihna uh leh dan toh kituak a thil hih theihna tuamtuam a nei­hte uh sinsakna, ni nih daih ding in D.C. Hall, Kangpokpi ah Two Days Legal Awareness Pro­gramme, Social Welfare Minister Nemcha Kipgen in tuni in hongkhia hi.

 

Programme ahi­hleh Manipur State Commission for Women (MSCW)-te’n National Commission For Wom­en (NCW)-te toh pang­khawm a, a sai uh ahi hi.

 

Hiai hun zatna Chief Guest hihna toh programme uap Minis­ter Nemcha Kipgen in a gendan in hiai bang awareness programme neih a om pen numeite kiang a, a min maimai a sinsakna kipia hilou ahi chi a, numeite’n amau hi­hna kichiantak a theihna ding uh leh pratical tak a numeite a ding a dan tua­mtuam kibawl omte sin­sakna ahi chi hi. Numei kua hiam khat in buaina a tuah zenzen a leh bang chi bang a police-te kiang ah a thu theihsak ding chihte ban ah executive leh judiciary-te pansan a bang chi bang a panlak ding chihte theih poimoh ahih ziak a hiai bang a programme neih a om ahi chi’n Nemcha in gen hi.

 

Tuni chiang in Ma­nipur State Commission for Women, District Le­gal Service Authority, Free Legal Aid, Women Help Line “181” man­phatak a zat theih ding a omta ahihdan leng taklat in om hi.

 

Minister Nemcha in a genzelna ah numeite’n Indian Penal Code, 1860; The Dowry Prohibition Act, 1961; The Preven­tion of Domestic Violence to Women Act, 2005; The Sexual Harassment of Women at Workplace (Prevention, Prohibition and Redressal) Act, 2013 etc. leh the medical ter­mination of pregnancy act, 1971 (34 of 1971)-te kichiantak a theih uh po­imoh ahi chi’n gen hi.

 

Hiai hun zatna ah Chairperson, MSCW, Dr. K. Sobita Devi in presidential speech a neih ban ah, Deputy Commissioner, Kang­pokpi District, Dr. Rangitabali Waikhom, Members, MSCW, Soi­bam (O) Neelima Devi, Ranjita Golmei leh Dr. Farida Shah-te’n Guests of Honor hihna toh pro­gramme uap uh hi’n thusuak in taklang hi.

 

 

Lungchin khomi lohchinna ngahte kipahpihna nei ding

LAMKA, May 30: Lungchin Welfare Committee saina in hongtung ding June 3 (Pathianni) in Lungchin khomi tu kum, 2018 a Board tuamtuam a Class X & XII exam a lohchingte kipahpihna leh lohchinna ngah zounailoute siatvatna, Lungchin Welfare Committee Office, L Zamzathang’ inn, College Veng, New Lamka ah sunnung dak 1 in om ding hi.

 

Hiai hun ah lohchinna ngahte kipahpihna in memento pe ding ahihna uah lohchinna ngah student-te’n a zekaipen a June 1, 2018 (Sintawpni) tan in mark­sheet, pa min, contact number, passport size limlak khat leh per cent muhzah kimtak, Thangkhankham, Pick & Smile Computer, College Veng, New Lamka leh CEEDEE Stationary, Opposite Rayburn College a pelut chiat dia theihsak hi uhi. Hunchiam tan a pelutloute’n a khonung a bangmah gentheilou ding uh hidan inleng Information & Education Department, Lungchin Welfare Committee in theihsakna bawl uhi.

 

 

YPA-GHQ makaih in vaidawnna nei

LAMKA, May 30: Young Paite Assn (YPA) General Head­quarters makaih in tuni, May 30, 2018 sunnung dak 2 in YPA-GHQ Office, Hiangtam Lamka ah mun tuamtuam a Block leh Unit election vaisai leh ob­server dia kuante hong tunkimtak uh toh kiton in vaidawnna leh amaute a pan report piakna hun zang uhi.

 

Hiai hun zatna S. Chin Ngaih Pau, Chairman, CEC, YPA-GHQ in makaih a, Block leh Joint Headquasters hongkhia a kuante a pan report om hi. YPA-GHQ theihpih a block leh unit hongkhia a mun tuamtuam a kuante ahihleh Delhi ah T. Khailianthang, Pesident leh Li­anmuanthang Valte, Gen Secy., YPA-GHQ; Shillong leh Diphu ah Khanpau Ngaihte, Member, CEC, V. Vungzapau, Treasurer, YPA-GHQ leh Ginthianlal, Secretary, YPA Lanva Block, Imphal ah S. Chin Ngaih Pau, Chairman, CEC; V. Chinkhenmung, Finance Secy., YPA-GHQ, Khankhup Guite, Member, CEC, leh Thangkhangou, Member, CEC; New Lamka Block ah K. Thangkhogin, Joint Secy., YPA-GHQ, Thangkhochin, Mem­ber, CEC; S. Lalkhanlian, Joint Secy., YPA-GHQ, V. Chinkhenmung, Finance Secy., YPA-GHQ, T. Pumzamang, Sec­retary, YPA Lamka Block leh Pumkho­siam, Vice President, YPA Lamka Block leh Singngat ah M. Luahkhanchin, Vice President, YPA GHQ, Sumpi Hanghal, President, YPA Lamka Block leh T. Jamsongin, President, YPA Lanva Block hi uhi.

 

Hiai hun ah paikhawmte’n Paite Numei Pawl (PNP) maban a hatsem a kal hong suan theih ding dan uh leh thu po­imoh tuamtuam genkhawm ua, Khailian­thang, President, YPA-GHQ in lochingtak leh zalentak a election zohsiang ahihna tung ah kipahthu gen in, telching a omte’n chitak leh pawlpi a dia gin-om a kuhkal­tak a nasem ding in a hasotna thugen hi.

 

 

Janggouhao leh Lalneo luang puak tung in om

KPI, May 30: Zan a Noida a tuahsiat ziak a si Jang­gouhao Khongsai (23) leh Thangthenlal @ Lalneo Kip­gen te luang tuni sunma dak 10 in Imphal airport puak tung in om ua, huai apan in a tenna khua uh Kangpokpi District a ding in puakkhiak in om nawn uhi.

 

Thutut kingah dan in, amaute ahihleh zan zinglam a Noida mun a gari tuahsiat ziak a si hi ua, khatpen ahi­hleh a mun ah si ngal a, khat pen ahihleh Damdawi inn puaktun ahihnung a si ahi hi. Amaugel ban ah mi dang khat leng liam in damdawi inn ah etkol in om uhi.

 

 

TPO chih ding hizaw

LAMKA, May 30: Valveng, New Lamka ah Rev. Dr. Khen P. Tombing, Principal, Rayburn College in June 10, 2017 in Thangkhal Hall bawlna ding in TPO/TTC, GHQ khut a gam pekhia chih May 29 issue a hong kisuah pen TPO/TTC chih hilou in TPO chih ding hi zaw hi’n thutut kingah hi.

 

 

 

 

 

 

NEWS TOMKIM

 

Pick up gutute lak a khat matkhiak hita

LAMKA, May 30: Kanan Veng, New Lamka apan a paita May 26, 2018 zinglam dak 1-2 kikal a Pick up gutute lak a khat Jangkhogin Khongsai, tuni’n Imphal police in mankhia in Imphal police station custody ah koih lel uhi. Hiai toh kisai in police in case chiamteh in suizui zel uhi.

 

 

Nagaland University result suak ah eilam mi 3 lohching

DIMAPUR, MAY 30: Nagaland University nuai a BA result suak ah Lamka apan mi 3 in lohchinna ngah uhi. Amaute ahihleh Rosie Nempalching d/o (L) H. Ginzalam in English Honours ah CGPA 6.54, Mr. Son David Tonsing s/o Upa T. Khamzagou in English Honours CGPA 6.04 leh Liankhansiam in General CGPA 3.73 in lohching uh hi’n thutut kingah hi.

 

 

M. Ginzasuan, DSO/FCS pension ding

LAMKA, May 30: June 1, 2018 chiang in M. Ginzasuan, DSO/FCS, Ccpur a sepna a pan pension-ta ding hi. Amah ahihleh Ccpur a DSO/ FCS len sawtpen hi a, kum 20 val DSO/FCS hihna len hi.

 

 

SUNNA:

Lalthlamuan (19) s/o (L) Ngulkhochin of Aizawl, North Khatla in zan nitak in damlouhna ziakin si a, tuni’n kivui hi. RIP.

 

Soilianmang (2) s/o B Lianminthang, V. Munhoih, New Lamka, tulel a Gamhui khua a om in tuni nitak lam in Tuikul ah kia in si a, a luangdamsa a omna New Lamka ah puak hiding hi. RIP.

 

 

 

 

 

 

 

...more detail : here

 

 

 

 

 

 

RELATED

The Lamka Post | May 27, 2018

The Lamka Post | May 28, 2018

The Lamka Post | May 29, 2018

The Lamka Post | May 30, 2018

Read 566 times
Login to post comments