You are here: HomeNewsLamka PostThe Lamka Post | June 07, 2018

The Lamka Post | June 07, 2018

Written by  Published inLamka Post Thursday, 07 June 2018 12:14
The Lamka Post | June 07, 2018
Karnataka Cabinet keklet in om:

Cong, JD(S), BSP apan minister thak 25 in kichiamna nei

BENGALURU, JUNE 6: Karnataka Chief Min­ister ding a H D Kuma­raswamy in kichiamna a neih nung nipikal 2 nung in, tuni Nilaini in cabinet kekletna masapen nei a, hiai hun in minister thak 25 laklut leh kichiamsak in omta uhi. Tuni a Raj Bhavan a program lian­lou khat zatna hun ah Governor Vajubhai Vala in minister thak 25te kichiamsak hi.

 

Minister dingte toh kisai a, nipikal tam­tak sung genkhawmna leh kidawptuahna a neih khit nung un, Congress leh JD(S) –te’n tuni’n kithukimna leh thupukna kichiantak bawlkhia uhi. Tuni a kichiam minister 25te lak a Congress aki­pan in minister 14, ruling coalition partner JD(S) apan minister 9 leh Ba­hujan Samaj Party (BSP) leh Karnataka Pragnya­vantha Janatha Party (KPJP)-te a kipan min­ister khat tuak tel uhi. BJP-te’n MLA-te leikhiak a sawm hun ua phengpi leh party in a buaipih mahmah Senior Con­gress makai D K Shiva­kumar in, tuni’n minister khat ding in kichiamna nei hi.

 

Chief minister Ku­maraswamy sanggampa H D Revanna in, min­ister ding in kichiamna nei masapen hi. Con­gress a kipan agriculture minister lui Krishna By­regowda leh minister for city development lui K J George –te’n leng minis­ter ding in kichiamna nei uhi. JD(S)’ akipan S R Srinivas leh D C Thaman­na-te’n leng first time minister ding in kichiam­na nei uhi.

 

Deputy speaker lui, Congress makai N H Shivashankar Reddy leh Ramesh Jharkiholi –te leng tuni’n Cabinet ah laklut in om uhi. Cha­mundeshwari seat a kip­an Chief Minister lui Sid­daramaiah zoukhia JD(S) akipan G T Devegowda inleng tuni’n kichiamna nei hi. JD(S) a kipan Ban­dappa Kashampur leh Congress MLA R V Desh­pande –te’n leng kichi­amna nei uhi.

 

Congress makai Mal­likarjun Kharge tapa Priyank Khargeleh food and civil supplies minister lui U T Abdul Khader –te’n leng min­ister ding in kichiamna nei uhi. Khader in state ah health minister leng len khin hi. JD(S) MLAs C S Puttaraju leh S R Mahesh –te’n leng min­ister ding in kichiamna nei uhi.

 

Chamarajpet a kipan Congress MLA B Z Zameer Ahmed Khan leng Cabinet ah minister di’n laklut in om hi. BSP MLA omsung N Mahesh leng laklut in om a, BSP in JD(S) toh pre-poll alliance bawlkhin hi. Shivanand Patil, Ven­kataramanappa, Ra­jshekar Basavaraj Patil leh C. Puttaranga Shetty –te’n leng kichiamna nei uhi. Congress MLC Jayamala ahihleh numei minister om sun ahi. Ranibennur a kipan In­dependent candidate leh Congress –te nungthuap R Shankar leng Cabinet ah laklut in om hi.

 

Power-sharing arrangement dungzui in, Congress-te’n a vek in minister 22 nei ding ua, JD(S) in chief minister tel in minister 12 nei ding hi. Tuni a Karna­taka Cabinet keklet ahih toh kiton in, ministry27 tan tungtou a, ministry dang 7 huk dim ding neilai uhi.  

 

 

CM Bungalow mai ah kip­hinna nei: DESAM leh State Government in MoU sign

IMPHAL, JUNE 6: Imphal West DESAM activists a za a simte’n tuni in Chief Minister Bungalow mai ah NSU complex a vansuksiat ziak a police-te’n court court arrest a , a matte uh khahkhe ding a ngetna bawl in kiphinna nei uh hi’n thusuak in taklang hi.

 

Democratic Students’ Alliance of Manipur (DESAM)-te’n ahihleh state government in NSU a sports journalism, sports management leh sports per­formance analysis course-te Lucknow a koih a sawm ziak ua, lungkimlouh latsakna a June 1, 2018 a kiphin­na ana neih uh hi a, hiai toh kisai in Khuman Lampak a om National Sports University (NSU) administrative Block sung a van omte va susia ua, huai hun in police in DESAM vice president W Birchandra, Imphal West unit vice president Abung leh member tamtak court arrest a ana mat uh ahi hi. Tuni a kiphinna neite police in khamdaih sawm in pan nasatak a la ua, CM Bungalow a pan in CC Higher Secondary School kong tan ah Sanh­enthong lampi subuai zou hial in police-te toh kinawktuahna om ahih­dan taklat in om hi.

 

Tuabangkal ah tuni mah in National Sport University thu ah state government lam a pan palai mi bangzahhiamte toh Democratic Student Alliance of Manipur (DESAM)-te’n meet­ing nei ua, huai hun in kilemna MoU sign uh hi’n thusuak in taklang hi.

 

DESAM-te’n ahi­hleh National Sport Uni­versity ahihleh Manipur state sung a, a minpu lel a om hi chi ua, walk-in-interview neih hun ding chiang a leng mun dang a pai ngai ahihna ah huchi bang a chinndante pen Manipur state sung mah ah pankhe ding a state government kiang ah ngetna a bawl uh ahi hi.

 

Memorandum of Understanding (MoU) ahihleh Chief Minister office ah bawl a om hi a, huai ah Lucknow a walk-interview neih a om ding kichi pen khawlsak in om hi.

 

Huai ban ah NSU toh kisai a nasepna leh panlakna tuamtuam omte leng state sung mah a bawl ahih theihna ding a state government in panla ding hidan in MoU a taklat hi a, mat a om DESAM makaite leng zingchiang June 7, 2018 zingkal lam a thu nung thu om lou a khahkhiak hiding in hi;n thusuak in taklang hi.  

 

 

Mata Mualtam a Floating Fish Cage enkhia

LAMKA, June 6: NERCORMP Ccpur Proj­ect nasepte toh kisai zan in Naveen Verma, Secre­tary M/o DoNER, Govt of India in Ujung Makhong leh Bunglon khua ah enkhia uhi.

 

Huai ban ah, tuni, June 6 sunma dak 10 in GK Chin, IP & TAFS, Fi­nancial Adviser & Core Committee Members, NERCORMP in ST Chul­louphai Natural Resource Management Group (NaRM-G)-te kiang a NERCORMP Ccpur in Floating Fish Cage a piak uh Mata Mualtam, Khuga Dam ah enkhia hi.

 

Floating Fish Cage etkhiakna hun D. Khuala Vaiphei, District Project Director, NERCORMP Ccpur in makaih a, staff-te toh hun zangkhawm uhi. GK Chin ahihleh Admin­istrative Officer, Planning Dept inleng hon zui hi.

 

 

Auto driver-te kidnap-te lak a tel Police in man

LAMKA, June 6: Police a pan kizadan in February 6, 2018 sunma dak 9 vel a Kaprang Line Diesel Auto Association makai nih Rs. 3 lakh vel a tatkhiak dia pimangtute (kidnap) lak a tel KIA/KIO member hidia muanmoh Parpa Chonthra Chothe (41) s/o Parpa Ibo­hai Chothe of Khongthang Village, Chandel District, zan zek in Thoubal Police-te’n mankhia uhi. Amah ahihleh Lamka Police-te’n formal arrest bawl in zan in va la ua, tu’n Lamka Police custody ah thudot ding in kem uhi. Hiai thu ah Police in FIR No. 11(202018 CCP-PS u/s 400/364A/34 IPC bulh uhi.

 

 

Hunbi neitak a singnou suan ding ahi: Nemcha Kipgen

IMPHAL, JUNE 6: Social Welfare and Cooperation Minister Nemcha Kipgen in a gendan in kuapeuh in singnou suanna toh kisai a nasepna nei thei uh ahi­hna ah a hun leh a mun dungzui ban ah hunbi neitak in singnou suanna nei lehang kim leh kiang siangth­ouna tun ding ahih ban ah mihingte a ding a damthei­hna tuntu khat hiding ahi chi’n gen hi. Kim leh kiang a hong sianthou chiang in khantouhna chi khat hong suak ahi chi hi.

 

Hiai toh kisai ahihleh Lamphelpat Office com­pound a Cooperative Department-te makaihna nuai a World Environment Day zat ahih hun a Nemcha Kip­gen in a gen ahi hi.

 

Programme zat hun sung in Principal Secretary Cooperation J.C. Ramthanga leh Minister Nemcha-te’n singnou suanna nei ua, Department sung a ding a khangthu a chiamteh tham bawlkhia uh ahihdan tak­lat in om hi.

 

Minister Nemcha in a gendan in kim leh kiang a niin omte midang hih ding a koih mailou ding leh mahni a leng hiai bang panlakna pen kihih theih ding ahihna ah mipi kuapeuh in panlak poimoh ding ahi chi’n gen hi.

 

Huai ban ah khang hong om touzel laite a ding khualna a hiai bang panlakna neih poimoh petmah ahi chi a, kuapeuh inleng maban a thil hoihlou taktak hong tung theite a pan kiven theihna ding lampi ngai­htuah ding in ngetna bawl hi.

 

World Environment Day ahihleh India gamsung pumpi ah zan in zat a om a, a thupi di’n “Beat Plastic Pollution” chih zat om om hi.

 

 

July 6-7 in Paite Liter­ary Festival om ding

LAMKA, June 6: Paite Literature Society (PLS) saina in July 6-7, 2018 sung in Lalpuithluaii Founda­tion School, Bungmual ah Paite Literary Festival 2018 om ding hi. Hiai hun ah Paite lai toh kisai gelhthoh (written) leh kam-a-kisang (oral) tel in item chitua­mtuam om ding hi.

 

Hiai toh kisai a PLS Board of Directors in thupuk­na a bawlnung in Organising Committee kibawlkhia a, hiai hun a item tuamtuam dingte genkhawm khinta uhi. Hiai hun ah Paite laipau tup kisinsakna, laipau bulsutna (etymology), folk songs, conversation with editors/adminirators, conversation with writers, Paite Riddles, Poetry Slam, Tangthu genna, music fusion, creative writing, leh a tuamtuam ban ah books leh art exhibition leng om ding hi.

 

 

Bakery siangthou pen a chiamteh a om Goshen Bakery outlet hongkhia

LAMKA, June 6: Lamka khopi sung a Bakery omte lak a sian­gthoupen a Food Safety and Standards Author­ity of India (FSSAI) in a chiamteh Goshen Bakery in tuni, June 6 sunnung dak 1 in Lighthouse Lane, Lamka ah retail outlet hongkhia a, Pastor Lalh­mangai in Pathian min in laan hi.

 

Goshen Bakery a head baker, B. Zairem­mawi ahihleh Bangalore a pan Hotel & Hospital­ity Management Institute a graduate hi a, Cook and Bake Institute, Delhi ah diploma zou in Five Star Hotel, Radission Blu, Dwarka, Delhi a pan in Cake and Pastry Department ah intern­ship zou hi. Huai ban ah IHM, Shillong ah kum 1 sung sem in huainung in Goshen Bakery ah Head Baker in sem hi.

 

Goshen Bakery in ahihleh Laisiangthou a Nasepte 20:34 pansan in government leh saptuam a sepna kidaih nawnlou ahihman in tuailaite mahni sepkhiaksa a kitoudelh ding chih tup-le-ngim in nei hi.

 

Retail Outlet honkhiak ahih toh kiton in inaugural offer in tu­kal sung hiai mun a pan nektheih lei peuhmah 10% sang a tamzaw dis­count a piak hiding hi’n thutut kingah hi.  

 

 

JCAD in khamtheih leh a zuaktu tamtak mankhia

LAMKA, June 6: Kuki Inpi Ccpur (KIC) nuai a pawl tuamtuam in gamsung a khamtheih chituamtuam doudalna a paipih uh lohchingtou zel hi. Tulai in khangthakte lak ah “World is Yours” kichi “WY” kithang mahmah hidan a gen hi a, huai khamtheihte ahihleh Indo-Myanmar gamgi a pan hong kipan hi’n thutut kingah hi.

 

WY ahihleh tuailaite lak leh school naupang lak tanpha a zongsang tamtak om hi­dan a gen hi a, Lamka ah ahihleh WY kichi 1997 vel a pan honglut hidan in kigen hi. KIC nuai a pawl tuamtuam kigawm in a bawlkhiak uh Joint Com­mittee on Anti-Drugs (JCAD) in khamtheih khamna toh kisai enkai in, sun-le-zan in panla ua, huai dungzui in tunitan in khamtheih hih zong­sang, khamtheih zuak a kipei leh agent tamtak mankheta uhi.

 

Tu kum a pan JCAD in khamtheih doudalna naktak in paipih a, May 2018 in khamtheih zuak a kipei mi 65 mankhia ua, amaute a pan WY tang 16,000, Heroin No. 4 gram 50, SP tang 455, Ni­trosun strip 4 leh Nganja hunkhop mankhia in, ahih zongsang leng hiai hun ah mi 72 mankhia ua, JCAD in thuhilhna hoihtak nei in police khut ah pekhia uh hi’n Letza­mang Haokip, Chairman, Joint Committee on Anti- Drugs in gen hi.

 

Nu-le-pa tamtak in a tate’ uh siamsin ding in Lamka ah omsak ua, hiai bang a mundang a pan sia­msin a Lamka a omte lak ah mi tamtak khamtheih zongsang mat a omte lak a tel uh hidan in Hahao Haokip, Secretary, JCAD in gen hi. Khamtheih dou­dalna toh kisai in JCAD in Young Paite Assn (YPA) toh leng genkhawmna nei in, pan lakhawm dia thu­kim uh hi’n gen hi.

 

Tua bangkal ah, Civil Society Organiza­tion tuamtuam leh Dis­trict Police in khamtheih doudalna toh kisai a pan­lak ua kipan khamtheih hih zongsang khenkhat in mun gamla leh mun kawmlak ah hih ching ua, amau a ki-itna leng kiamdeuh leh khelhna tawpkhawk hih bang a kingaihna om hi a kilang in overdose a om hun ah hutkhiak manlouh chih om theizel hi’n Over­dose Management a pan thutut kingah hi.

 

 

Plantation drive neih in om

IMPHAL, JUNE 6: HQ IGAR (South) nuai a om Kakching Battalion of 28 Sector Assam Rifles-te’n zan Sepnawnni in Battalion Headquarter, Company Oper­ating Bases ah kim leh kiang a khua omte toh World Environment Day zatna toh kituak in plantation drive nei uh hi’n thusuak in taklang hi.

 

PRO of IGAR (S) in tuni a, a gendan in i gam­sung ua sing leh lou satpukna a tamluat ziak in kim leh kiang a kholum uang mahmah ahi chi a, hiai bang chindante pen tawpsan a singnou suanna lam pibawl poimoh ahi chi’n gen hi.

 

 

Huai ban ah huih niin a tamluat ziak in ozone layer pen kiam hiai hiai ahi chi a, huai in kho hun omdan hon khek lamdang ban ah mihing dam kum sutom zou ahi chi’n gen behlap hi.

 

Kakching Batal­lion Commandant in a gendan in kim leh kiang suniintute lak a khat ahihleh plastic ahi chi a, hiai bang a plastic hah zatluatna pen in lei hoihna a suk bei ban ah muat theilou ahih ziak in mihingte a ding a natna lauh huaitak tun thei ahi chi a, tunnung zek chiang inleng plastic water bottles, bags chihte kham a hong om ding ahi chi’n gen hi.

 

 

Thangkhal Tribe Council in CEC Meeting nei

LAMKA, June 6: Thangkhal Tribe Coun­cil (TTC) in tuni, June 6 in TTC Office, Hangza­sial Road, Gouchinkhup Veng, New Lamka ah Central Executive Com­mittee meeting nei in agenda tuamtuam genkhawm uhi.

 

Central Executive Committee meeting ahi­hleh session tuamtuam in khenkhat ua, session masa ah T. Khaikhanhau, President in TTC Unit Executive Committee member-te kichiamsak hi. Unit election zohsa tuni a kichiamna neite ahihleh S. Geltui unit; S. Munhoih unit; M. Tan­glian unit; Lamzang unit; Ngoiphai unit; T. Kot­lian unit; Gangpimual, Lanva, Tangnuam unit; New Mission Veng unit; Tuibuang unit leh Kam­hang unit hi uhi. Maban ah TTC unit vehna leh election neih nailouhna munte ah election leng neitou ding uhi.

 

Session nihna ah, Vaal Veng, Nghathal a Thangkhal Commu­nity Hall bawlna ding inn mun (plot) tung­tang genkhawm ua, ses­sion 3na ah, TTC GHQs Finance-cum-Treasurer T. Chinlunthang in CEC member-te ma ah TTC Budget 2018 luikhia a, Elder Thangkhanmang, Chief of Kamhang Village in thumna in meeting khak hi.

 

 

Neiphiu Rio government in a thuchiamte nungkikpih: NPF

DIMAPUR, JUNE 6: Neiphiu Rio government in a thuchiamte nung­kikpih hidan in Naga People’s Front (NPF) in ngoh hi. VIP culture om nawnlou ding hidan a PDA government-te chi­amnuih suakta hidan in NPF in taklang hi.

 

People’s Demo­cratic Alliance (PDA) government bawlkhiak tung in, 13th Nagaland Legislative Assembly (NLA) makai ahihna toh Mr Rio in, PDA makaih NDPP/BJP government in VIP culture beisak ding leh PDA Government in Chief Guest culture ki­saipih kha nawnlou ding hidan in thupuan liantak bawlkhia hi. Rio gov­ernment in Naga mipite kiang ah thuchiamte pe­khe ding a, a chiam ziak in mipite khatvei laiteng kipak leh dipkuatna a kipan in dawn zangkhai a om uh hidan in NPF in taklang hi. June 5, 2018 a Legacy Complex, Kohima a Livestock Pro­gram honkhiakna hun a chief guest a pang CM Rio, chief guest culture’ om nawnlou ding chia thuchiam om bohse mas­apen a pang hidan in NPF in ngoh hi. PDA govern­ment in govt undertaking tuamtuam a dinmun po­imohte luah ding a party worker-te, a tanaute kia uh guang hidan inleng NPF in ngoh hi. Mipite kiang a thuchiam tu­tan pekhelou hiai govern­ment a bang kinepna om lai hiam chia mipite lam­dangsa tak a om lel uh hi­dan in NPF in taklang hi.

 

Tunai zek a Naga National Political Groups (NNPGs) 6te’n kihouna dohkan a kipan kizukkik ding a vauna a bawl un, Naga political solution issue naktak in khen a, pawl dangte leng huailut a ‘final Naga solution tan tunpihna ding a Govern­ment in chihtakna toh pan a lak keileh Naga mipite’n buaina hun manohtou zel ding uh hidan in NPF in pilvang ding in theisak hi.

 

 

DTO Office renovation bawl ding

LAMKA, June 6: District Transport Office building kise gawp puahthak sawm in Transport Department, Ccpur in panla lel hi. District Transport Office ahihleh MSRTC leh railway ticket counter toh kithuah hi a, building a kisiat gawp ban ah a baangte a cement plas­ter-te mun tamtak tolhkhia hi.

 

Huailou in, intenet hoihlouh ziak in gari regis­tration bawlte leh driving licence bawlte smart card a piak ding chih himahleh network hoihlouh ziak a nasem theilousek uh hi’n thutut kingah hi.

 

 

Tuilaphai ah SSA & RMSA Joint Venture nei

LAMKA, June 6: SSA/Ccpur saina in Tu­ilaphai KGBV School ah zan a pan 1st Joint Ven­ture of SSA & RMSA a neih uh tuni’n zou uhi. Zan in football, volley ball, kabadi, kho-kho leh tug-of-war chihte nei uhi. Tuni’n ahihleh Science Exhibition leh spelling bee chihte ban ah kimawlna chitua­mtuam nei ua, kilawmna tuamtuam a kipahmante hawmkhia uhi. Hiai hun zatna ahihleh Shyam Lal Poonia, IAS, DC/Ccpur; SP/Ccpur leh ZEO/Cc­pur leh staff-te’n leng uap uhi.

 

 

Ninevi Revival Crusade Min­istries in thumkhawmna nei

LAMKA, June 6: Lamka khopi sung a thumpawl tuamtuam kigawmna Ninevi Re­vival Crusade Ministries makaih in tuni, June 6, 2018 zingkal dak 7 a pan Thangkhal Baptist Cen­tre Church, Tuibong ah anngawl thumkhawmna om hi.

 

Zingkal dak 7-8 ki­kal thumkhawmna Upa Sawnzapum in makaih a, dak 8-9 kikal thum­khawmna Gouzavung in makaih in, sunma dak 9-10 kikal thumkhawm­na Upa Dr. Langkham in makaih hi. Evange­list Pauzarual a pan Re­vival Message genna om a, Pastor Chinminlien, Local Pastor, Thangkhal Baptist Centre Church in thumna a paikhawmte’n a neksik uh a tawikhaw­mte uh leh thohlawm laan a, sunma dak 11-12 sharing hun in zang uhi.

 

Sun dak 12 a pan sunnung dak 1 kikal sung Evangelist P. Thonkhan­suan in hun zatna makaih in Upa Amkhan­thang, Local Chairman in thumna in hunkhak hi.

 

Ninevi Revival Cru­sade Ministries in Ccpur District sung leh Lamka khopi sung a Saptuam leh minam khentuam om­lou a Tanchinhoih tung­tawn a Revival tunsak ding leh thumkhawmna tungtawn a Saptuam leh Minam tengteng Toupa ma a puklutkhawm a, Kha Siangthou hihhalhna tankhawm ding tupna toh Anngawl thumkhawmna a neihzel uh ahi.

 

Tuni a Thangkhal Baptist Centre Church, Tuibong a thumkhawm­na ahihleh a 39veina hita hi. Maban ah a 40na ding in June 13 in EBCC Immanuel Headquarter Church ah nei ding ua, June 20 in ZCBC Church, Kamdou Veng ah nei in, June 27 leh 29 in EBCC Moriah, Pearsonmun ah nei ding uhi.

 

 

PWD in Imphal khopi sung ah footbridge 3 bawl ding, traffic island-te suneu ding

IMPHAL, JUNE 6: Imphal khopi a foot­bridge 3 bawlna ding in Ministry of road trans­port in lemsakpihna pia chi’n Addl. Chief Engi­neer T Robindro in tuni Nilaini in gen hi.

 

Footbridge 3te ahi­hleh LIC office mailam, BT road (fly over) leh Keshampatah bawl hi ding uhi.Ministry in footbridge bawlna ding in dangka Rs. 18.36 crore leng pekhinta hi.

 

Tua toh kiton in, Khongnang Anikarak, Chingmeirong a traf­fic island, Governor gate opposite leh Kan­gla gate maitak traffic island-te leng bawlthak hi ding ua, ama a sang a neuzaw in bawl hi ding chi’n PWD Addl. Chief engineer-III in gen hi. Footbridge dang nihte ahihleh Imphal collge mai leh Governor gate mai ah bawl hi ding uhi. Footbridge bawl leh traf­fic island-te sukneuna in, khopi sung a gari kine­htakte kiamsak ding chi’n PWD Addl. CE in gen hi.

 

 

KSO Sangaikot Block in kipahpihna nei ding

LAMKA, June 6: Kuki Students Organization (KSO), Sangaikot Block in hongtung ding June 9, 2019 sunma dak 10 a pan in SDO Conference Hall, Sangaikot ah Sangaikot Sub-Division sung a tu kum 2018 a BSEM/ COHSEM/CBSE nuai a class X leh Class XII examna a lohching student-te kipahpihna nei ding uhi.

 

Huai hun ah chief guest, guest of honour leh functional president in Singngat MLA, Ginsuanhau Zou, Chairman, MANIREDA; Jangngam Haokip, EE/ PWD leh Zosanglur Joute, MCS, SDO Sangaikot Sub- Division leh KS Baite, Special Contractor pang ding uhi.

 

Hiai hun ah Miss Nengnunhoi Haokip d/o Thang­minlen Haokip of Mongbung Village in All India Maths & Science Talent Examination (2017-18) ah khatna a lak kipahpihna in KSO Sangaikot block in Outstanding Achievement Prestigious Awards pe ding uhi.

 

 

Forest toh kisai in conference om ding

LAMKA, June 6: Nodal Officer for Na­ture Learning Centre in National Mission on Himalayan Studies nuai ah October-December 2018 sung in ‘One Day Conference of All Village Pradhans/Chiefs from All Valley/Hill Districts of Manipur’ neihsawm uhi. Hiai conference ahi­hleh Manipur singtang leh phaizang bial a forest, wildlife leh environment toh kisai ban ah khosung mite toh kizopna hoihzaw bawl ding ngimna a neih­sawm a om hi’n thutut kingah hi. Hiai toh kisai a lunglutna nei Ccpur district sung a pan Prad­hans/Chief-te’n June 25, 2018 tan a Divisional Forest Officer, Ccpur Forest Division kiang a ngetna piaktheih ding hi­dan in Kham Suanmung Tawmbing, DFO/Ccpur in theihsakna bawl hi.

 

 

Solar lamp hawmkhia

IMPHAL JUNE 6: Senapati Brigade of Red Shield Division nuai a om Jwalamukhi-te’n Thingbungjang (Kang­pokpi district) kho mite kiang ah solar lamp 19 hawmkhia uh hi’n thu­suak in taklang hi.

 

Hiai bang a nas­epna Battalion in a neih pen uh a khat veina hi nawnlou a, khosungmite toh kinaih zawk semna ding leh khat leh khat kal a kitheihsiam tuahna a om ding deihna a hiai bang programme a neih zel uh hidan in Battalion makaite’n gen uhi.

 

Huai ban ah mip­ite buaina leh haksat­nate panpih kichi Bat­talion-te lungulh leh ut lam ahihna ah maban ah leng hiai bang a nasepna neih touh zel lai ding hi’n media tungtawn in Battalion-te’n taklang uhi.

 

 

KVK/Ccpur in World Environment Day zang

LAMKA, June 6: Zan, June 5 in Krishi Vig­yan Kendra Ccpur Office ah Joint Director, ICAR-RC for NEH Region Ma­nipur Centre lemsak­pihna leh Programme Coordinator, KVK/Ccpur huaihotna nuai ah “Beat Plastic Pollution” chih thupi zang in World En­vironment Day 2018 zat­na om hi.

 

Hiai hun ah school naupang 40 vel leh farm­er tamlou tel uhi. Pro­gramme kipattung in, Ms. Manngaihkim, Tech­nical Officer (Agri. Extn.) KVK Ccpur in Environ­ment Day zatna toh kisai pulak a, mi tengteng leh a bik in khangthakte’n kim-le-kiang kepna toh kisai a poimohna liantak nei uh ahihdan gen hi.

 

Hiai hun zatna V. Ginchinpau, Headmas­ter, Thangkhai Govt. High School, Pearson­mun in chief guest hihna toh uap in Environment Day thupi “Beat Plastic Pollution” chih toh ksai hilhchian in, kim-le-kiang kep siangthouna ding a muatthei thilte zang a, a muattheilou thil himhim, a bik in plas­tic zang nawnlou a, zat ahihlouhna ding a panla chiat ding in chialna bawl hi. Huai ban ah kum 500 tan a leng muatlou plastic in kim-le-kiang a suknit dan leh mihing a ding a thil deihhuailou ahihdan gen hi.

 

Dr. W. Rajen, Asst Chief Technical Officer inleng environment po­imohna gen in, kipahthu gen a, inaugural session zoh in, singnou suan uhi.

 

 

Mata gam thubuai toh kisai hilhchian

LAMKA, June 6: Mrs. Nemkhoman w/o (L) Dr. Kaichinkhup of Gouchinkhup Veng, New Lamka in tuni sunnung dak 3:40 in a tenna inn ah thuthaksaite kimuh­pih in zan a Lianchinkh­up, Chief of Mata Mual­tam in Mata Mualtam gam thubuai toh kisai a gen diklou ahihdan gen in hiai thubuai toh kisai hilhchian hi.

 

Aman a genna ah, August 21, 1961 in SDO/ Ccpur in a pu, N. Douchin­thang leh N Douchin­thang’ sanggampa, a pu N. Ginkhanpau min in Mata Mualtam gam thu ah order suah hi’n gen hi. Amau gel in hun sawttak Mata Mualtam gam na enkolkhawm ua, kum 15 paisa in a pu, N. Ginkhan­pau, taksa hatnawnlou leh gam enkai zou nawn­lou a om ziak in amah tan tuam gam pen a tunu Mrs. Nemkhoman kiang a pia hi’n gen hi.

 

A pu, N. Ginkhan­pau in amah tantuam gam a piakna ah farm bawl in theikung chitua­mtuam leh taksing tam­tak suan a, huai munteng daikai in farm ah nasem mi 40/50 bang kuan zel uh hi’n gen hi. Kum 9/10 nung in farm pich­ing in huai ah Cham­para gah hoihtak omlai in Lianchinkhup, Chief of Mata Mualtam makaih in farm umna daite susia ua, theikung phuksia uh hi’n gen hi.

 

Huai ban ah, 2015 in farm a haichi suksiat a om tungtang Police ah report bawl a, Police-te’n Lianchinkhup gam lai tungtang a suizuina uah gamlai bawltawm piak­lut ahi chih thei in huai a kigolhkha Lalsuong Gangte, SDC suai ahih ziak in aman leng Janu­ary 5, 2018 in diklou ahi chia withdraw hi’n gen hi.

 

Kum 2016 in Ma­chet in kho thak khat Nangsuanpau min in bawlsawm mahleh aman objection a bawl ziak a paisuaklou hi’n gen a, a tawp in a lohngaihna the­ilou in a pu, N. Ginkhen­pau in a piak gamte tehkhia (demarcation) bawlsak ding a SDO/Cc­pur leh DC/Ccpur a nget­na bawl hi’n gen hi.

 

Jan 19, 2018 in SDO/Ccpur ah a farm area letdan tehsak ding in ngen a, huai dungzui in SDO/Ccpur in summon bawl in March 19, 2018 in SDO Court ah docum­nent kimtak pelut hi’n gen hi. Huai nung June 5, 2018 in DC/Ccpur in order a suah pansan in Nemkhoman gam leh Lianchinkhup gam teh­khiak ding chih theisak a om tuak hi’n gen hi.

 

Huai pansan in physical demarcation bawl ding in SDO/Ccpur leh a team-te ban ah OC/ Ccpur PS leh a team-te ban ah Women Police team-te kuan ua, zan zingkal dak 8 vel in Mata Mualtam khua tung uhi. Huai hun in Lianchinkh­up leh a team-te’n De­marcation teamte sing­khuah leh tem zang in sat sawm ua, patau dak tan­pha khen mahle uh dal­zou in a gam tehkhiaksak uh chi’n gen hi.

 

Hiai hun a SDO tung thagum suah leh Po­lice-te tung a kilawmlout­ak a gamtang Lianchinkh­up leh a team-te tung ah Police in dan dungzui a action la ding in ngen hi. Huai ban ah Mata Mual­tam ah farm a bawl tung­lai in Lianchinkhup tel in sum loh in mi nna semsak a, huai hunlai a thubuai bangmah omlou himahleh a khonung a thubuai om pen a fuihtu om hiding a gingta ahihdan leng gen in tua bang a om leh tawpsan ding in ngen hi.

 

(Hiai thu a langnih tuak ua pan suah ahita a, tuban News item in kisuah nawnlou ding hi.)

 

 

VK Tawna High in Pathian thu kisinsakna zou

LAMKA, June 6: College Road, Vengnu­am, New Lamka a om VK Tawna High in amau school auditorium ah ‘Take Hold of Your Eter­nal Life’ chih thupi zang a ni 3 sung Pathian thu leh la kisinsakna a neih tuni’n zousiang ihi. Hiai kisinsakna ahihleh June 4, 2018 in kipan a, Evan­gelist Lianding Guite in Pathian thutak gen in Lamsuanthang Tomb­ing in ‘The golden Era of Life’ chih leh Kham­khual in ‘The World of Teenagers’ chih thupi zang in seminar nei ua, tuni sunnung in Sir Sia­mnunlian Valte, Execu­tive Director, VK Tawna High in kipahthu gen in kisinsakna zousiang uhi.

 

Hiai hun ah VK Tawna High a kai Class 7 a pan Class X student-te tel ua, tuni a, a zoh uh toh kiton in Class X leh teacher-te’n kithuah khawmna in, football exhibition match nei uhi.

 

Huailou in, VK Tawna High in school a semtu ding chemistry teacher khat leh physics teacher khat tuak lak­sawm ua, June 11, 2018 sunma dak 10 in school mun ah interview nei ding ua, lunglutna neite hiai hun ah kingetna tawi in teltheih ding hi.

 

 

Singngat Battalion-te’n Mass Plantation Drive nei

LAMKA, JUNE 6: Singngat Battalion Assam Rifle-te’n zan Sepnawnni in, World Environment Day hun in amau thuneihna huamsung Singngat Sub-Division nuai a mun tua­mtuam ah mass plantation drive nei uhi.

 

Drive sung in, school thuneite leh volunteer-te kithuahpihna toh Bat­talion a officer leh sepaihte’n singnou chituamtuam 300 vel suan uhi. School tuamtuamte kiang ah leng singnou suan ding hawmkhia uhi. Tualsung mipite’n leng Assam Rifles leh Manipur Forest Department-te panlakna kithuahpih uhi.

 

 

 

NEWS TOMKIM

 

May khasung in gari thak 608 in kibehlap

LAMKA, June 6: Ccpur district headquarters, Lamka khopi ah niteng phial in gari thak kibehap a, huai dungzui in kha paisa, May 2018 sung in gari thak chituamtuam 608 in kibehlap hi. Huaite ahihleh Truck 6, Medium Truck 20, Mini Truck 4, DI-Tata 43, Bus 2, Mini-Bus 1, Sumo/Winger 10, Auto (Patrol) 3, Deasel Auto 44, Van 7, Car 154, Jeep/Gypsy/ Bolero/Scorpio 14, Tractor 1 leh Bike/Activa 292 ahi. Tunitan in Ccpur District Transport Office ah gari tuamtuam 28,289 val in registration bawl ua, May 2018 sung DTO/Ccpur in revenue in Rs. 21,01,424/- mukhia uhi.

 

 

Admission form laktheihta

LAMKA, June 6: Bethany Christian College of Teacher Education a ding in admission form leh prospectus laktheihta hi’n thutut kingah hi.

 

 

YPA Ambulance ding gari pia

LAMKA, June 6: Vunglallian Tonsing @ Vunga s/o (L) TC Tiankham leh Principal, Lalpuithluaii Foundation School, Bungmual, Lamka in Young Paite Assn (YPA) General Headquarters in Ambulance dia a zat ding un Mahindra Xylo, a thawn in pia hi.

 

 

 

 

…more detail : here

Read 249 times
Login to post comments