You are here: HomeNewsLamka PostThe Lamka Post | June 08, 2018

The Lamka Post | June 08, 2018

Written by  Published inLamka Post Friday, 08 June 2018 14:38
The Lamka Post | June 08, 2018

CM Biren in Chandel district a kho makaite kimuhpih

IMPHAL, JUNE 7: Manipur Chief Minister N Biren Singh in, tuni Ningani in Chief Minister’s Secretariat, Imphal ah Chandel district a Khengjoi Sub-Division sung a kho tuamtuam 21 a village authority makaite leh khosung mite houlimpih hi.

 

Hiai interaction session ahihleh tulel a Kheng­joi Sub-Division huamsung a om 19 Assam Rifle-te a kipan a chituam deuh a ngetna om toh kisai in neih in om hi. Hiai hun in Assam Rifles officer-te’n CM Bi­ren kiang ah, huai area a avocado plantation nasatak patkhiakna apan hamphatna gah lak a om thei dingte toh kisai tomkim in theisak uhi. Kikawmtuahna ginat­louh ziak, tui supply leh electricity leh vanzat poimoh dangdangte omlouh ziak a khosung mite’n buaina a tuahte uh toh kisai leng theisak uhi. Village authority makaite’n leng kum tamtak paita akipan a maituah uh thil lemtanglou omte leng taklang uhi. Chief Minister in khosung mite buaina omte dohzoutak a, a ngaihkhiaksak nung in, kintak in phone tung­tawn in Manipur State Power Distribution Com­pany Ltd. (MSPDCL) thuneite houpih ngal a, a baihtheipen a Tuitong leh a kim a power sup­ply piakna ding a kalbi poimoh omte la ding in theisak hi. Chandel DC Krishna Kumar kiang ah leng, Sehlon akipan New Samtal tan a nullah kuak hoihtak nei lampi bawlna ding a project report khat bawlkhe ding in theisak hi. Centre in State kiang a Border Area Development Pro­gramme (BADP) nuai a fund tamsem piak ding pompih khin hidan a gen kawm a, Chief Minister in a gendan in, project toh kisai BADP a guan­lut ahihtheihna ding a Union Home Ministry kiang tun ding hidan inleng gen hi.

 

N. Biren in Assam Rifles officer-te kiang ah, khosung mite kiang a poppy chin sang a, lemongrass, avocado leh nahtang leh a dangdangte ching ding a hanthawn ding inleng theisak hi. Khengjoi Sub-Division sung a nahtang tamtak chin ding a lemtan theih ding leh, banana fibre extracting machine koih ding a Government mansa a om hidan inleng gen hi.

 

Hiai zoh in, Assam Rifles officer-te’n Chief Minister kiang ah Tu­itong khua a pak, ching leh gua zang thil kilawm taktak bawlna lam a siamna nei vualphalou numei naupang khat paipih uhi. N. Biren in a kisaipih officer-te kiang ah, a nekzonna ding a Manipur State Co-oper­ative Bank a kipan soft loan khat ngaihtuahsak ding in theisak hi.

 

Village authority makaite leh Assam Rifles officer-te’n Chief Minis­ter kiang ah kipahpihna leh zahna etsakna in, puanza khat leh avocado sing khat pekhia uhi. Hiai interaction session ahihleh 19 Assam Rifles a Col. A.S. Bajpai, Com­mandant panlakna toh sai in om hi.

 

 

Pranab Mukherjee in RSS event ah thugen

Sahkhua leh thuakzohlouhna pansan a India hilhchet sawm­na in, nam khat hihna dausak ding: Pranab Mukherjee

NEW DELHI, JUNE 7: President lui Pranab Mukherjee in, tuni Nin­gani in, Chief Guest hih­na toh thuah in Rashtriya Swayamsevak Sangh (RSS)-te program ah thu­gen hi.

 

President Pranab Mukherjee in a thugen­na ah, i gam uh, biakna, bial, kihuatna leh thuak theihlouhna chihte a genchet ding sawmna in, i gam hihna diktak uh sukdauna tun ding chi’n gen hi. Gam mi-le-sa hi­hna dogma leh mahni hi­hnate pansan ahihkeileh biakna, kihuatna leh thu­akzohlouhna khatpeuhte pansan a hilhchet i sawm uh leh, nam khat i hihna sukdauna len tunzaw ding chi’n gen hi. Kibatlouh­nate uh i lawm uh chi’n Mukherjee in gen hi.

 

President lui in, In­dian society a kibatlouh­na tuamtuam omte leh khangthu a hauhsakna naktak in phat a, thunei­hna kihawmna a kipan in i gam in hatna ngah chi’n gen hi. Pawlpi leh nam tuamtuam om khawmna leh thuak zohna ah In­dia kha teng hi. Kum zabi tamtak paita a ngaih­dante tohphulna toh hiai sahkhua pawl tuamtuam omkhawmna(pluralism) hong om khia chi’n Presi­dent lui in gen hi.

 

Pawlpi lak a sah­khua zalenna (secular­ism) toh kisai a Presi­dent lui in a gendan in, gam khat i hihna uh, lu­ankhamna leh kitohphul­na process sautak paipih a hih nung in hong om khia a, tawndan leh gin­dan tuamtuam te’n eite chituambik leh thukzoutu hiding in ahon bawlkhia a, secularism kichi eite a ding a ginna thu khat ahi chi’n gen hi.

 

Kum 2012 a kipan 2017 tan India President len Mukherjee in a gen­dan in, lauhna leh hi­amgamna chiteng a kipan mipite lak a thugenna za­len i hihsak teitei uh po­imoh ahi chi’n gen hi.

 

Indian society sung a pawl, sahkhua leh mi­nam tamtak (pluralism) om ahihdan suklat sem­na ding a President lui in a gendan in, pluralism kichi ethnic group 3- system khat, flag khat leh Bahrtiya ihihna uh khat- a om leh sahkhua lian taktak 7 zui, pau (language) 122 leh haam (dialect) 1600 val zang mihing billion1.3-te a ding a Perennial Univer­salism ahi chi’n gen hi. India gam mi hihna pau khat kia, melma khat kia leh sahkhua khat kia ahikei chi’n President lui in gen hi. Gamsung suahtakna ding a, zawn­na, natna leh nuaisiahna chihte galpi khat bang a i dou ding uh poimoh ahi chi’n gen hi.

 

State nasepna kong bangkim a, a laita pen mipite ahi ua, mipite khenzakna ding anna bangmah i sepkh­iak hetlouh ding uh ahi chi’n President lui in gen hi. Zawnna, natna leh nuaisiahna chi­hte dou a panlak ding state-te tup-le-ngim a hih ding ahi chi’n gen hi. Huchi hileh, auto­matic in gam ngaihna leh itna mun gam khat i bawlkhe thei ding uh chi’n gen hi.

 

Mahatma Gandhi thugen a gensawnna ah, Gandhi ji in In­dian nationalism kichi telkhaklouh (exclusive) hilou, khutkha masa (aggressive) hilou leh poikhoihthei (destruc­tive) hilou chi’n gen hi.

 

 

SP Dr Ibomcha in guam a accident tuakte hunkhia

IMPHAL, JUNE 7: Tengnoupal district a Imphal- Moreh road dung a, tuni Ningani a guam khat a tuah­sia tuakte policer khat in va hunkhia hi.

 

Routine duty neilai, Moreh akipan hong kileh­kik District Police Superindent Dr Ibomcha in Lein­gantabi area a feet 150 a thu guam a accident tuak,mi khenkhat Maruti van sung a om lai tuak kha hi. What­sApp message a SP Dr Ibomcha in a gelhna ah, tuni zinglam dak 8:30 vel in, Moreh apan ka hong kik lai in, Imphal lam a hong kipan Silver colour Van bearing Regd. No.MN 01 K 6211 khat Leigantabi ah feet 150 a thuk guam khat a kia muhkhiak in om chi’n gelh hi.

 

Van sung ah driver Laishram Sanathoi Meitei (18) s/o L Nongyai of Yairipok Mathak Leikai leh 2nd driver Laishram Kennedy Meitei (32) s/o L Ibomcha of Yairipok Khoirom tuang uhi. Vang phat huaitak in van ah passenger omlou hi. 2nd driver Laishram Ken­nedy Meitei in liamna tuak zek a, van driver ahihleh vangphathuaitak in suakta hi.

 

 

Maternal Death Review meeting nei

LAMKA, June 7: Maternal Death Review and Surveillance Com­mittee in tuni, June 7 sun­nung dak 3 in CMO office chamber ah Review Meet­ing nei uhi. Dr. Kimn­gaiching Sime, CMO/ Chairman, Maternal Death Review and Sur­veillance Committee in meeting makaih in meet­ing neihna ziak gen a, Dr. Vunghoihching Simte, DNO/Member Secretary in kha paisa, May kha a nupi naunei sihna tuak toh kisai report in, report piak a om pansan in thu poimoh tuamtuam ki­kumkhawm uhi.

 

CMO/Ccpur in hun dang in Maternal Death toh kisai review neih hisek mahleh tulai pro­gram tuamtuam ziak a member tamzaw in buai­na a neih ziak ua Review Meeting neihlouh a bang­tanhiam omta hi’n gen a, May kha a naunei sihna tuak a om toh kisai a state government a pan nohna om ziak a meeting sap a om ahihdan gen hi.

 

Meeting hun ah Dr. V. Jamthianlal, DFWO/ DIO, Zenngaihlun, DPM/ NHM leh Nursing Su­perintendent, District Hospital ban ah Mater­nal Death Review and Surveillance Committee a member leh a kisaipih medical officer-te tel uhi.

 

 

Workshop on German, Korean & Other Foreign Languages om ding

LAMKA, June 7: Siamsinpawlpi (SSPP) Joint Head­quarters, Lamka leh Geothe Institute/Max Mueller Bhawan, Kolkata saina in hongtung ding June 20, 2018 sunma dak 10 a pan in YPA-GHQ Hall, Hiang­tam Lamka ah ‘One Day Workshop on German, Ko­rean & Other Foreign Languages’ kichi om ding hi.

 

Hiai hun ah Anita Mitra, Education Corporation Officer, Geothe Institute / Max Mueller Bhawan, Kol­katta; Mercy Vungthianmuang Guite, Asst Professor, Centre of German Studies, School of Language, Liter­atire & Cultural Studies, Jawaharal University, Delhi leh Vungsuanlal Kullai, Instructor (Asst Professor), Department of Foreign Language (Korean), Manipur University in sinsak ding uhi.

 

Hiai hun ah school/college tuamtuam a pan stu­dent-te ban ah sinsaktute tel ding ua, tu kum a Class X leh XII pass-te leng hiai hun a telchiat ding in SSPP-JHQ, Lamka in chialna bawl hi.

 

 

AR/Ccpur Doctor in sisan pia

LAMKA, June 7: Tuni, June 7 sunnung dak 2:30 vel in Mrs Lalnei w/o Gogou of Tuinom village, Lamka Damdawi Inn a neunei, excessive bleeding ziak a gim­sia sisan poimohtak in om hi. A sisan pen AB+ve ahih­man in sisan vang mahmah a, blood bank a le omlou ahihman in buai mahmah uhi.

 

Hiai thu Ccpur Battalion, Assam Rifle-te theihsak ahihnung in Assam Rifles doctor Captain Mahadev in poimoh ngaih mahmah in Lamka Damdawi Inn delh ngal a, amah sisan toh a kituak ziak in sisan unit 3 pia hi. Captain Mahadev in tuni a sisan a piak ahihleh Lam­ka a hong omnung a sisan thumvei a piakna hita hi.

 

 

Parbung rape case ah Police in mi 2 mankhia

LAMKA, June 7: June 1, 2018 nitak dak 9 vel in Parbung khua ah Lalringvar Hrangchal (23) s/o Tlangkhumvel Hrangchal of Lungthu­lien leh Simeon Barjon (37) s/o Kolla of Lungthu­lien in numei kum 16 mi Borelo a pikhia (kidnap) uh hi’n pikhiak a om nu­mei naupang pianna’ nu’n zan, June 6, 2018 in Par­bung Police ah report hi.

 

Hiai toh kisai in zan nitaklam dak 5:30 vel in SDPO/Thanlon makaih Police team in Parbung hausapa inn kiang a pan in numei naupang pi­mangtu mi 2-te mankh­ia uh hi’n police a pan thutut kingah hi.

 

Police a pan thutut kingah dan in, Lalringvar Hrangchal leh Simeon Barjon in Lungthulien Vompalung Reserved Forest ah numei naupang a pikhiak uh sualluih uh a, Lungthulien khomite’n pikhiak a om numei a zon­nung un June 2, 2018 ni­tak dak 7:30 leh dak 8:00 kikal a Lungthulien khua a Lalringvar Hrangchal’ tenna innsung a pan sual­luih a om numei naupang mukhia uhi.

 

Numei naupang sualtute tuni’n police in court ah dingsak ua, court in June 14, 2018 tan Police Custody a om ding in phalsak hi. Hiai thu ah Police in FIR No. 3(6)2018 WPS–CCP, u/s 364/366/366 (A) /368/34–IPC & 4 of POCSO Act 2012 chiam­teh uhi.

 

 

MU a buaina ni 8 chingta, VC dai dide lai:

Student-te’n department-te hongkh­ia; A leh E-block khakna sunzom zel

IMPHAL, JUNE 7: Manipur University a buaina pailel ni 8 bang chingta mahleh University Vice-Chan­cellor Prof. AP Pandey in, a tung a ngohna omte toh kisai in, tutan in student-te kiang ah ngetna kam khat leng bawllou in dai dide lai a, ngohna omte toh kisai inleng hilhchetna bangmah pekhelou hi

 

Manipur University Student Union (MUSU)-te’n Administrative Block leh Examnination Block-te khak­sak in, a kiphinna uh sunzom zel ua, himahleh depart­ment-te hongkhe ding in thupuk uhi. Tuni a exam om dingte leng hun dang a di’n suan gamlat in om hi.

 

Muanhuaitak apan thusuak in taklatdan in, tuni Ningani in state Education Minister Th Radheshyam in tulel a Manipur University a buaina toh kisai in VC houpih hi. Buaina toh kisai a kihouna nei ding in, MUSU makaite kiang ah leng palai khat sawl a om ahi­hdan leng theihkhiak in om hi. MUSU thusuak in, Ed­ucation Minister in palai sawl ahihleh ahihlouh bang­mah taklanglou a, himahleh palai bel sawl uh hidan in taklang hi. MUSU in Vice-Chancellor lakkhiak ding ngetna nungtolhpihlouh ding hidan inleng thusuak in taklang hi. Hunchiam omlou a A-block khak ahih ziak in higher studies course zousiang student tuamtuam te’n University thuneite’n a hawmkhiak ding a lai po­imohte ngahna ding in haksatna liantak tuak uhi.

 

 

Khaisianmung Tonsing in YPA Ambulance ding pekhia

LAMKA, June 7: Tuni, June 7 nitak dak 7 in Vunglallian Tons­ing’ inn, Pearsonmun ah Young Paite Assn (YPA) Ambulance ding piakkh­iakna om hi. Hiai hun Lianmuanthang Valte, General Secy., YPA-GHQ in makaih a, K Thangk­hogin in thumna in hun pan hi.

 

Tua zoh in YPA Ambulance ding petu Khaisianmung Tonsing leh a innkuante a pan thugenna om a, huai ban ah YPA-GHQ makaite a pan thugenna om in Pas­tor Kammuanlian, Lo­cal Pastor, EBCC Moria, Pearsonmun in Pathian min in YPA Ambulance laan hi.

 

Hiai hun a Vunglal­lian Tonsing in a genna ah, YPA Ambulance ding a amau innkuan in Ma­hindra Xylo a piak uh toh kisai amah piak hidan a gen in om mahleh amah hilou in a sanggampa Khaisianmung Tonsing in a piak ahihdan leh gari leng amah min a om hi­dan in gen hi. Huai ban ah i namsung a YPA po­imohna leh nasep leh thilhoih hihte kipahpi­hna leh YPA phungvuhna ding ban ah damloute’n phatuamtak a, a zat ding uh deihna a piak a om ahihdan leng gen hi. Tua zoh in Khaisianmung Tonsing in YPA-GHQ President khut ah gari chabi pekhia hi.

 

YPA-GHQ Presi­dent Khailianthang Tons­ing in a genna ah, YPA Ambulance ding petu Khaisianmung ahihleh a neu a pan poihlong hilou a, Sainik School a, a kailai in boxing lunglut mahmah a, boxing kimawlna a, a ki­hihkhelh khak ziak a hiai bang dinmun a om hi’n gen hi.

 

 

Huai ban ah, tunaizek in damlouhna ziak in YPA Ambulance zangkha ua, huai hun in Ambulance pen neu leh kochiksa in hiai sang a lianzaw deuh YPA in a neih ding deihna lungsim nei in, huai dia amah leh a innkuanpihte pangkhawm a tuni a YPA Ambulance ding a piak uh hidan in gen hi.

 

Khaisianmung Tonsing leh a innkuante ahihleh YPA ngaina mahmah mi ahih dung­zui in YPA Pearonmun unit a ding in a pianna pa, (Late) TC Tiankham, IAS theihgigena ding in YPA Pearsonmun Hanmual ah Cemetry/ Waiting Shed leng ana bawlsakta uh hi’n YPA-GHQ President in gen hi.

 

Tuni a Khaisian­mung Tonsing leh a innkuante’n YPA Ambu­lance ding a piakkhiak hun uh ahihleh YPA-GHQ, New Lamka Block, Lanva Block leh Lamka Block a makaite’n uap ua, YPA a dia thil thupi leh manphak a piakna tung uah YPA min in Khaisianmung, Paite Puandup silhsak uhi.

 

 

EBCC Khominthang in Sunday School leh biakinn bawlna sumzom zel

LAMKA, June 7: EBCC Khominthang, New Lamka in saptu­am mipi tha a biakinn leh naupang Sunday School Hall ding a bawl uh paizom zel in tuni’n saptuam mipi’n mass social work nei in Sun­day School building tung sung uhi.

 

EBCC Khomin­thang in ahihleh a bia­kinn huangsung uah Sunday School Hall ding February 5, 2018 a pan in bawl pan ua, mistry chih tuam omlou in, saptuam mipi’n hun a neih bang­bang un, zingkal teng in Sunday School bawlna ding in a tha uh thoh uhi. Sunday School building ahihleh sawng kha a sang ding hi a, a sawng nuai leh sawng tung ah room 9, a kigawm in room 18 om ding hi.

 

Sunday School Hall bawltung Febru­ary 5, 2018 a pan tuni, June 7, 2018 tan in sap­tuam mipi’n tha 6000 val thohta ua, sum leng Rs 10 lakh val sengta uhi. Hiai toh kiton in biakinn uh leng sunzomtou zel in tuni chiang in 50 per cent bang zouta uhi. Biakinn building bawlna ding in EBCC Khominthang in 2016 kum bul a pan in biakkinn lui phelkhe tuanlou in, building bawlkhum ua, a sung ah biakna nei zel uhi.

 

EBCC Khomin­thang in biakinn leh Sunday school bawlna ding a sum leh pai neihsa omlou, year plan a leng a guan uh hikei mahleh saptuam mipi leh mimal kiphal tuamtuam in a thohkhawm in, sum-le-pai, tha-le-zung ban ah saptuam sung a mistry-te makaihna nuai ah sap­tuam mipi’n zingkal teng a, biakinn leh Sunday school hall a bawl uh ahi. Hiai ding a deihsakna pia EBC HQ, Division ban ah biakinn leh Sunday school hall bawlna ding a saptuam in panpihna tuamtuam a neih hun ua, mi kiphal tuamtuam in a thohkhawm uh sum zang a nasepna paitou zel ahihna ah EBC Khomin­thang in panlatute teng­teng tung ah kipahthu gen uhi.

 

 

Manipur:

Indefinite MU shut-down strike ziak in exam khawlsak in om

IMPHAL JUNE 7: Manipur University Stu­dents’ Union (MUSU)- te’n zan Nilaini a Ma­nipur University (MU) indefinite shut-down strike a neihna uh toh ki­sai in tuni in university se­mester examination neih ding a gelkholh sa a om pen khawlsak a om hi’n thusuak in taklang hi.

 

Hiai toh kisai ahi­hleh vice-chancellor, Aditya Prasad Pandey in academic atmosphere a suksiat luat ziak a Uni­versity potsan ding a ngetna neih ahih ziak a strike neih a om hi hi.

 

Manipur Univer­sity Teachers Associa­tion (MUTA) president, I. Tomba in a gendan in hiai bang a vice-chan­cellor, Aditya Prasad Pandey paihkhiak ding a student organization-te’n ngetna a bawl pen uh thil dik mah leh ahi ding mah ahi chi’n gen hi.

 

Aman a genzelna ah MUTA in hiai bang a buaina om pen vensak sawm a pan nasatak a kila ahi chi a, university sung a lemna leh muanna a om theihna ding a panlakna leng kinei touzel lai ding ahi chi’n gen hi.

 

Tomba in a gen­dan in vice-chancellor, Aditya Prasad Pandey in student-te mohsakna pen ngaihdam ngen ahi chi a, himahleh a thil hih pen public theih ding a puankhe utlou ahi chi’n gen hi.

 

Tu leh tu a vice-chancellor, Aditya Prasad Pandey paihkhiak ding kichi pen thil hi theilou ahi chi a, himahleh stu­dent-te ngetna leh moh­sakna pen bel thil dik mah himahleh lemna leh muanna ban ah univer­sity sung a buai louhna ding a student-te’n vice-chancellor, Aditya Prasad Pandey kiang ah charter demand bawl leng uh thil hoih hong piangkhe thei ding ahi chi’n leng a gin­tak thugen hi.

 

Tuabangkal ah MU­SU-te’n vice-chancellor, Aditya Prasad Pandey in a dinmun a nosiat mahsiah kiphinna pen nei tou den ding hidan in taklang uhi.

 

 

Gangte Literature Society in hilhchetna bawl

LAMKA, June 7: Gangte Literature Society (GLS) in Gangte Literary Award-2018 a bawlkhiak thu a YMA/MZP branch khenkhat apan mipi lungbuai sak thei ding thusuak khenkhat omte toh kisai in hilhchetna bawl hi.

 

GLS in hilhchetna a bawl in a taklatna ah, Gangte Literary Award 2018 kichi GLS in a paita February 28, 2018 ni a, GLS president Lienk­hopao Thangjom inn, Chiengkawnpang a Ex­ecutive Meeting Resolu­tion No. 4 na dungzui a bawlkhiak ahihman in Gangte Nampi phasakna leh phalna a kibawlkhia ahihdan hilhchian hi.

 

Huai banah, GLS kichi Gangte Nam pum­pi a, ahi gige a, Gangte a kiminvohte a dia Lit­erature a body lianpen ahi gige chi hi. Gangte Literature Award 2018 Committee (GLAC) in kuamah khentuam a nei kei a, huai dungzui in BOSEM nuai a Class X exam-na a Gangte MIL la teng leh mark mu tung­tuante Gangte, Vaiphei, Kom, Paite, Mizo leh a dangdangte khentuam omlou ahi chi hi.

 

Hiai hilchetna in a tawpna ding a, a taklatna ah, Nam min kiselna a nei, Gangte kichi nam a hong khantouhna ding leh a dinkhiakna ding lauthawng gige kawm a tactics tuamtuam zang a mipi lungsim tokbuai a thuzuau thehthangte ziak a Gangte tate kuamah lung kelou ding in chialna bawl uhi.

 

 

Fishery a dia beneficary-te kiang ah sum piak hilou

LAMKA, June 7: Ccpur District New Pond Con­struction Selected Beneficiaries Association a Presi­dent Khaimuanthang leh Secretary, Chungthang Haokip in 2017-2018 a ding North Eastern Council (NEC) Scheme nuai a Direct Benefit Transfer tung­tawn a fund a muh ding uh tunitan bangmah muh a neihlouh uh toh kisai in thusuah bawl uhi.

 

Huai dungzui in H. Biramani Singh, Director of Fisheries, Manipur in District Fishery Officer, Kh Ebetombi kiang ah order leng suahta mahleh fund muh hituanlou a, fund muhtheihna dia District Fish­ery Officer leh Director of Fishery toh beneficiary-te’n kihouna a neih hun ua Direct Benefit Transfer hihthei­hna dia society a om ngai hidan a genkhawm ahih ziak a pawl kibawlkhia uh hidan in taklang uhi.

 

June 2, 2018 leh June 4, 2018 a Director of Fishery in District Fishery Officer kiang ah sum sanc­tion di’n order bawl mahleh District Fishery Officer in tunitan sanction bawllou a, tunglam a thuneitute’n sanction bawllou dia hentang uh a chih Association in lamdangsa ahihdan taklang uhi.

 

 

MSO election neih in om

IMPHAL, JUNE 7: Mate Tribe Union (MTU), General Headquarters nuai a om Mate Students Organisations (MSO), General Headquarters-te’n tuni in Langol, Kuki Community Hall, Imphal ah election nei uh hi’n thusuak in taklang hi.

 

Hiai hun zatna ahi­hleh MTU GHQ general secretary Benjamin in makaih a, student 120 val leng kihel uhi. Mate Students Organisation ahihleh kum 1954 a ana kiphutkhia ahi hi.

 

Elelction neih ahih ma in hun paisa a makai ana mualliam sate sun­na in minute nih sung daide in hun zang uhi. Eelection neih ahih hun a term 2018-2021 tan a vaipaw a ding ching a omte ahihleh:President - Thangjalet Mate, Vice President - Ngulkhohou Mate, General Secretary - Michael Mate, Finance Secretary - Letjalun Mate, leh Information & Publicity Secretary- Mo­ses Jamlalgin Mate-te hi uhi.

 

 

Assam:

Citizenship amendment bill pen kikhenzakna hilou in kigawmkikna thu ahi: Bill supporter

Guwahati June 7: Assam Barak Valley huam sung a om Citi­zenship Amendment Bill 2016 deih pawlte’n tuni a, a gendan un hiai bang bill pen sahkhua vai a mun tuamtuam omte toh kigawmkhawm theihna ding lampi ngai­htuahna a patkhiak a om ahi chi ua, kikhenzakna lam hilou in a biktak in minority religion Ban­gladesh, Pakistan leh Af­ghanistan a pan Hindus, Sikhs, Buddhists, Chris­tians, Jains leh Parsis sahkhua zui mite India gamsung a, a hong kik theih nawnna ding uh leh kigawmkikna ding lam thugen kha ahihna ah hiai bang bill pen a pai suak ding ahi chi’n taklang uhi.

 

Barak Valley histo­ry researcher and writer Samjib Deb Laskar in a gendan in India constitu­tion toh kituak a sahkho zalenna pansan a kibawl bill ahi chi a, mipite khenkhat in theisiamlou uh ahihna ah sahkhua vai a kikhenzak khate gawm­kikna chi leng dik zaw mai thei ding ahi chi’n gen hi.

 

Citizens’ Rights Preservation Committee Assam (CRPCA) secre­tary general Sadhan Pur­kyastha in bill toh kisai a poimohna leh sahkhua pansan a gammi hihna piak ding chih a ngetna a omna san hilh chetna pe ding in a kisaipih thu neitute kiang ah ngetna bawl hi.

 

 

Bolero Pick up gutu Police in jail ah koih

LAMKA, June 7: May 27, 2018 zinglam dak 2 vel a Khamchinthang (60) s/o (L) Khaikhochin of Kanaan Veng, New Lamka in a inn ua a koih, Bolero Pick up registration number MNO2B/5427, Siamlian s/o Ginzalian of Hebron Veng, New Lamka min a om, gutu hiding a muanmoh Jangkhogin Khongsai (25) s/o Thongkholun Khongsai of Kipgen Veng, Tuibong, A/P Mantripukhri, Imphal, Imphal Police-te’n a mat­nung un Ccpur Police-te’n case la sawn uhi.

 

Jangkhogin Khongsai ahihleh tuni’n police in court ah dingsak ua, court in jail a koih dia thutanna a bawl dungzui in police-te’n jail ah koih uhi. Hiai thu ah Police in FIR No. 49(6)2018 CCP-PS u/s 456/379 IPC bulh uhi.

 

 

Combing operation nei, patta tellou a kibawl inn tamtak mukhia

IMPHAL, JUNE 7: Additional SO (Ops) Imphal East, M Kumara­jit etkolna nuai a Imphal East district police team khat in, tuni Ningani in, Yairipok Changamdabi Sangollou area ah ‘mass combing operation’ nei uhi.

 

Imphal East Dis­trict SDPO Shankerjit leh OC, CDO Vaiphei-te makaih search operation ah numei 282 leh pasal 297 tel in mi 579 velchet in om uhi. Zinglam dak 4.50 in search operation pat in om a, zinglam dak 6.55 in zousiang uhi.

 

Tuabangkal ah, Yairipok Changamd­abi Sangollou area a inn kibawl 67 lak ah a tamzaw te’n gam patta neilou uh hidan inleng mukhia uhi.

 

 

Sikkim:

State CEO in voter I-card-te enkik thak di’n ngen

Gangok June 7: Sikkim’s Chief Electoral Officer (CEO) R Telang in Booth Level Officers (BLOs) teng­teng kiang ah state sung a inn chih a voter I-card checking bawl thak vek ding in ngetna leh theihsakna bawl hi’n thusuak in taklang hi.

 

Telang in a gendan in Divyang tel in voter nei tengteng min leh I-card-te uh BLO-te’n hoihtak a, a etkai ding uh ahi chi a, khat leng maih om hetlou a 100% a nasepna a neih ding uh ahi chi hi.

 

 

SAI player-te’n MSF office vante hihsiatsak; sit-in-protest nei

IMPHAL, JUNE 7: Sports Authority of In­dia (SAI) player-te’n tuni Ningani zinglam dak 9:30 in Top Leikai a om Manipuri Students Federation (MSF) office vante hihsiatsak uhi.

 

Thiltung toh kisai in video khat social me­dia ah koihkhiak in om a, SAI player 30 vel MSF office ah va dianglut ua, student pawlpi office a van om tengteng va hih­siatsak uhi. Hiai thil a tun hun a MSF volunteer-te khat leng a om louh ziak un, MSF volunteer-te leh SAI player-te kal ah kinawktuahna thiltung omlou hi. Bangziak a MSF volunteer-te ka coach-te uh a vuak uh hiam chi’n SAI player khenkhat ngaih taktak a kikou leng om uhi.

 

Thusuak dungzui in,player selection tung­tang ah MSF in SAI coach 3 thudot ding in sam ua, amaute lak a khat MSF volunteer-te’n naktak in vawliam uhi. Player-te’n MSF office a hihsiatsak nung un, Manipur Moun­taineering andTrekking Association complex ah sit-in-protest nei uhi.

 

 

Assam:

Khaloh thu ah Primary school teacher-te’n strike nei

Guwahati June 7: Assam primary school teacher-te’n pay­scale khanlouh thu a, a lungkim louh thu uh taklang in kiphinna nei ua, class room sung a badge vom chiat belh uhi.

 

Ratul Chandra Goswami in a gen­dan in sinsaktute kal a kideihdan leh kha loh thu a sum kipiak dan a lung­kimlou uh ahihdan taklang ua, middle English school, primary school leh Hr Secondary a semte khaloh kibang louh vek a, hiai bang a kha loh kibang piak khiak ahih theihna ding a panlak leng poimoh ahi chi hi.

 

 

Sikkim:

Vice President M Venkaiah Naidu in June 15 chiang in Sikkim state pha ding

Gangtok June 7: India Vice President M Venkaiah Naidu in a hong tung ding June 15 – 16 chi­ang a Sikkim state a phak­na ding toh kisai in tuni in Sikkim chief secretary AK Shrivastava makai­hna nuai ah co-ordanation meeting neih a om hi’n thusuak in taklang hi.

 

Meeting neih ahih hun in Chief Secretary in minute bang zahzah hiam chiat zang in department-te houlimpih a, huai hun in department chihte ki­ang ah amau nasep ding­dan chiat hilh hi.

 

Vice President ahi­hleh Sikkim state ah ni nih sung tam ding hi a, huai hun in Convocation of ICFAI University, Sik­kim programme leh of­ficial programme zang ding hi. Programme ahi­hleh National Research Centre for Orchids, Pa­kyong, East Sikkim ah zat hiding a, Research Centre scientists –te tgoh leng houlimna neih ding ahih­dan taklat in om hi.

 

Chief Secretary in ahihleh head depart­ment teng ban ah offi­cial-te leng meeting neih ahih hun in houlimpih a, agency tuamtuam ban ah state sung a organistion tuamtuam-te leng kihel uh hi’n thusuak in tak­lang hi.

 

 

Nagaland:

Meltheihlouh khat sisa in kimukhia

Kohima June 7: Nagaland state sung a o Dimapur, Rali Bazaar area lak ah meltheihlouh pasal khat sisa a muhkhiak a om hi’n thusuak in taklang hi. Sisa a muhkh­iak a om ahihleh pasal hi a, non-Naga ahih ban ah gilkial hiam ahihkeileh damlouhna chi khat a neih ziak a si hid­ing hi’n gintak thu Dimapur police-te’n taklang uhi.

 

Siluang ahihleh Dimapur District Hospital morgue ah post mortem bawl ding in puaklut in om a, hiai toh sihna toh kisai in a inkuan leh a tanau naite a pan hiai thusut ahih tan in a kipuangkhia om nailou hi.

 

Thusuak in a taklatzelna ah misapa ahihleh kum tamtak paita a pan khut doh a Marwaripatti/Railway Bazar area, Dimapur a om hi a, sisa a muhkhiak ahih hun in half pant, brown t-shirt leh a nak (nose) kiang ah chi vom om hidan in taklat in om hi.

 

 

NEWS TOMKIM

 

Free Eye Camp om ding

LAMKA, June 7: Lions Club of Ccpur Greater, Moirang & Imphal saina in hongtung ding June 9, 2018 (Kiginni) in Ebenezer Clinic, Gouchinkhup Veng, New Lamka ah Free Eye Camp om ding hi’n Dr Thangkhanpiang Hatzaw, President, Lions Club of Ccpur Greater a pan thutut kingah hi.

 

 

Prepaid Recharge Counter ni 2 kikhak ding

LAMKA, June 7: Lamka a electric fee piakna Vending Station (Electric Prepaid Recharge Counter) omte hongtung ding June 9 leh 10 in kikhak ding hi. Huaite ahihleh June 9, Second Saturday hi a, a ni nawn, June 10 pen Pathianni ahih ziak in kikhak ding hi. June 9 leh 10 ahihleh Bank leh office tuamtuamte leng kikhak ding hi.

 

 

DGM/MSPDCL in theihsakna bawl

LAMKA, June 7: Deputy General Manager, MSPDCL in electric lam a buaina bangmah omlou a, mipite’n FIFA World Cup 2018 a ettheihna ding un, a kisaipih manager leh line staff-te theih ding in thusuah bawl hi. Thusuak in a taklatna ah, hongtung ding June 14, 2018 a kipan Russia in a zintun FIFA World Cup 2018 kipan ding ahihna ah mipi’n electric lam ah buaina a tuah louhna ding ua, a kisaipih manager leh line staff-te’n amau area sung a 11 KV line teng ban ah loose jumpering connection, DTRs, jungle cutting ban ah electric toh kisai a buaina bangmah omlouhna dia enkai ding in theihsak hi.

 

 

SUNNA:

Henkholun s/o Mangkholen Misao of Kanggui Ward No. 6, hun sawttak damlou a om tuni, June 7 zingkal in Imphal ah si hi. Amah ahihleh Gujarat state sung a Bank Manager semlel leng ahi. RIP

 

 

 

 

…more detail : here

Read 296 times
Login to post comments