You are here: HomeNewsLamka PostThe Lamka Post | June 09, 2018

The Lamka Post | June 09, 2018

Written by  Published inLamka Post Saturday, 09 June 2018 10:37
The Lamka Post | June 09, 2018

Seventh Pay Commission

JAC leh Government in tuni’n 7th Pay Commission zat ding in kilemna suaikai; JAC strike khawlsak in om ngal

IMPHAL, JUNE 8: Manipur government nuai a semtute’n 7th Pay Commission pansan a loh piak ding ngiatna a hun sawttak JAC makaih a kiphinna a neih nung un tuni’n Chief Minister N. Biren Singh makaihna 7th Pay Commission zat ding in Memorandum of Understanding (MoU) ah suaikai in kilemna bawlta uhi.

 

Tuni a JAC toh ki­houna ah Government palaite Chief minister in makaih a, JAC lam apan Manipur Secretar­iat Services Association (MSSA), Manipur Gov­ernment Services Federa­tion (MGSF) leh Manipur Statae Pensioner’s Union (MSPU) apan palaite tel uhi.

 

Hiai kilemnate ahihleh, JAC in State government kiang a, a nget uh 7th Pay Com­mission, state govern­ment nuai a semtute leh pensionte’n hamphatpih theita ding ua, hiai ham­phatna in 1st January 2016 apan huamkha ding a, himahleh 1st April 2019 apan a taktak a fitmen fac­tor 2.57 dan a sepsuahna kipan ding chih ahi.

 

Huai ban ah 7th Pay Commssion pansan a pre-revised neih a om al­lowances toh kisai in tuni tan a actual amount piak a om pen a GPF account chiat uah April 1, 2019 a pan March, 2020 sung a koihlut ding chih ahi.

 

Huai lou in revised allowances leh 7th Pay Commission benefit ahi­hleh April 1, 2020 a kipan a sumtang a piakkhiak ding leh government nuai a sem Work charged, Muster roll leh Casual Employees-te’n buaina a neihte uh government in a baih thei lampen a hih veng sak ding chih ahi.

 

Hiai ban ah JAC leh state government in 7th Pay Commission zat ding a MoU a sign toh kiton in Manipur Secretariat Services Association (MSSA), Manipur Gov­ernment Services Federa­tion (MGSF) leh Manipur State Pensioners’ Union (MSPU)-te’n kiphinna a neih pen uh tawpsan ngal uh hi’n thusuak in tak­lang hi.

 

 

Education Minister in Moreh College Computer Block & Toilet Complex hongkhia

IMPHAL, JUNE 8: Education Minister Thokchom Radheshyam in, tuni Sintawpni in Chief Guest hihna toh thuah in, Moreh College, Moreh ah Computer Block leh Toilet Complex hongkhia hi.

 

Education Minister in a gendan in, class room hoih, sanitation facility, common rooms leh canteen kichiantak neih chihte National Assessment and Ac­creditation Council (NAAC) Accreditation ngahna ding a thil poimoh pente ahi uh chi’n gen hi. College-te’n central government apan panpihna sum a ngahna ding un, National Assessment and Accreditation Council (NAAC) Accreditation ngah masak ding a loutheilou ahi chi’n gen hi.

 

Education minister in a genzelna ah, Moreh Col­lege masawnna ding leh khantouhna ding in, NAAC Accreditation ngah ding thil poimoh masapen ahi chi’n gen hi. HSLC exam leh Higher Secondary Exam zoukhia student-te’ n siamsinna maban a sutzopna ding un, Moreh College kichi amau a ding a hamphat­na thuchiam toh kibang ahi chi’n gen hi. Moreh mipite leh faculty-te’n Moreh College kichi fully fledged Gov­ernment College a khek ding thusun a bawl uh, ngetna diktak mah ahi chi’n gen hi. Hiai thusun buaipih a om khinta hidan a mipite chiam kawm a, Minister in a gendan in, Moreh College kichi full-fledged Govern­ment college a khekkhiak ahih hunhun in, faculty leh mipite tung ah hanthawnna nasatak tun ding a, qual­ity education piakkhiakna ding amau leh amau in pan­la ding uh chi’n gen hi. Moreh town leh a kim a khuate a ding in Moreh College kichi siamsinna munpi khat suak ding chi’n gen hi.

 

Education Minister in, tuni’n Block Institutes of Teachers Education (BITE) of Tengnoupal District leng enkhia hi. Teacher khat hihna ding in, techni­cal profession dangte bangin, teachers’ training neih ding aloutheilou ahi chi’n gen hi. Nam makai tengteng kiang ah leng a hoih lam a kikhekna tut ahihtheihna ding a nasazaw sem a panla lai ding in ngen hi.

 

 

GM High School in Class 10 pass-te kipahpihna hun zang

LAMKA, June 8: Gandhi Memorial High School, Mualnuam in tuni, June 8 sunma dak 11 in a school mun uah tu kum a BOSEM nuai a Class 10 pass-te kipahpi­hna hun zang uhi.

 

Hiai hun ah special guest in H Doungel, Co­ordinator, NYK/Ccpur pang a, Minister in Pas­tor Thenkhojang Haokip pang hi.

 

Hiai hun ah Sir Nanggoulian in tu kum, 2018 a Gandhi Memorial High School a pan Class 10 pass-te pulak in kipah­pihna thilpiak pia hi.

 

Tua zoh in H. Khaithanlian, Headmas­ter in kipahpihna thu­gen in, special guest, H Doungel in hanthawnna thugen a, Pastor Thenk­hojang Haokip in lohchinna ngah student-te a di’n thum­sak hi.

 

Tu kum in Gandhi Memorial High School a pan student 59 in HSLC exam maituah ua, huai lak ah student 8 in 1st division in pass ua, student 33 in 2nd division a pass in mi 7 in compartment mu ua, pass percentage 69.5 tung hi. Huai ban ah MIL Thadou-Kuki, English leh Home Science chihte ah leng letter mark mu bangzahhiam om uhi.

 

Gandhi Memorial High School ahihleh Ccpur district sung a govern­ment school-te lak a hoihpen pawl hi a, kumteng in HSLC result inleng hoih lam nawttou zel hi’n thutut kingah hi.

 

 

Mi 6 in damlou mi 3 a ding sisan unit 6 pia

LAMKA, June 8: Phatuamngai pasal 6 in damlou sisan poimoh mi 3 a ding in a thawn in sisan pia uhi. Damlou sisan poimoh mi 3-te ahihleh Mualkoi a om Chiinbiakmawi (31) w/o Mindanglou hi a, amah ahi­hleh sipai ziak a Lamka Damdawi Inn maternity ward bed number 4 a admit a om, sipai tamluat ziak a sisan tasam ahi. Sisan poimoh dangkhat ahihleh Singngat a om Biakching (38) hi a, amah ahihleh nausiat ziak a, sisan poimoh ahi. Midang khat pen ahihleh Vengnuam, New Lamka a om Sing­khanmuan (44) hi a, accident ziak a sisan poimoh ahi.

 

Damlou sisan poimoh mi 3-te’n sisan petu ding mi a muh zohlouh ziak un, CT Lian Guite, MDC thuzak ua, CT Lian Guite inleng panpih theihna ding zong in, mi phatuam ngai tuamtuam contact in, pasal nih in sisan pe thei ding uh ahihdan a gen uh toh kiton in tuni sunma dak 10:30 in damlou mi 3-te a ding in phatuam ngai pasal 6 in damlou khat a ding a unit 2 zel Blood Bank, District Hospital tungtawn in pia uhi. CT Lian Guite in awlmohna liantak toh a buaipihna ziak a phatuamngai pasal 6 in sisan a piakna tung uah damloute’n kipah thugen uhi.  


 

 

Hill Model H/S Singngat in Class 10 pass-te kipahpihna hun zang

LAMKA, June 8: Singngat a om Hill Model Aided High School in a school ua pan tu kum, 2018 a BOSEM nuai a HSLC Examniation a lo­hchingte kipahpihna leh Pathian tung a kipahthu genna hun zang uhi.

 

School Hall ah pro­gramme zang ua, Than­glunchung, Principal in tu kum a Class 10 zou student-te pahtawina pakkhi pia in marksheet pekhia hi. Principal in a genna ah, 1971 a kiphuh­khia Hill Model Aided High School, Singngat a pan tunitan in HSLC zou mi 1000 valta hi’n gen a, hiai tan school pitu Pathian ahi chih phawk chiat a, Pathian tung a kipah thugen chiat ding in ngen hi.

 

School hoihsemna dia maban ah pan naktak a laktouh sawm a om ahihdan leh kum 2020 chiang a School in Golden Jubilee mel muta ding Julibee lopna ding toh kisai a kisakkholna leng pailel hi’n gen hi.

 

Hun zatsung in Rev. G. Kamzamuan, DS/EBC Singngat Divi­sion in exhortation leh intercession hun zang a, naupangte’n tup kichian­tak nei a, hangsantak leh kuhkaltak a siamsin ding a hasuan in, amaute a ding in thumsak hi.

 

Tuni a kipahpihna hun zatna ah student-te nu leh pate’n school a semtute leh school en­koltute tung ah kipahthu gen ua, K Zoutawn, Chairman Managing Board in Award leh kip­ahman hawmkhia hi.

 

Hun zatsung in student-te a pan special items tuamtuam om a, Vice Principal Suanmung Thomte in kipahthu leh farewel message gen a, Managing Board member T. Khuplam in thumna in hunkhak hi.

 

Hill Model Aided High School, Singngat a pan tu kum 2018 in student 45 in HSLC 2018 exam maituah ua, huai lak ah student 34 passed in, student 5 in com­partment mu in, pass percentage 75.5 tung hi.

 

Tu kum 2018 a HSLC Exam ah Hill Model Aided High School Singngat a pan student 7 in first division in zou ua, student 27 in second division a zou in huai lak ah Thangsianlal Samte in Zou MIL leh Home Science ah letter mark mu in, School Top­per hihna la hi.  


 

 

Thangso Baite in Empowered Committee Meeting makaih

IMPHAL, JUNE 8: Kangpokpi district sung Saitu- Gamphazol sub-division nuai a Motbung khua a CC Hall ah tuni Sintawpni a Village Development Plan (VDP) sukfelna ding a Empowered Committee Meet­ing neihna hun a Lok Sabha MP Thangso Baite in a gen­dan in, department tuamtuam –te’n a mohpuaknate uh a pompih ua, kipezoutak a, nna a sepkhiak ding uh leh, Model village geldan lohchingthei pan ding chi’n gen hi.

 

MP Thangso Baite in, Prime Minister Narendra Modi panlakna Sansad Adarsh Gram Yojana (SAGY)nuai ah Mot­bung khua kichi ‘model village’ khat hi ding in la hi. Thangso Baite in a gendan in, Motbung khua kichi a inkiangpih khuate etton tak (model) khat hi ding a hih ziak in, khosung mite lungsim lam a kisakholsa leh a smart mahmah uh ngai ding chi’n gen hi. Kho­sung mite, ngaihtuahna, siamsinna, gamtat-kho­hei leh nasep khatpeuh a changkan ding uh ahi chi’n gen hi.

 

Deputy Com­missioner, ADC/ADM, SDOs, BDOs leh DLO-te kiang ah leng a chang a tukhawm zel ding leh kintak a kalbi poimoh lak dingte la zel ding in theisak hi. Khosung mite’n damtheihna hoihtak a neihna ding ua, damtheihna lam toh kisai thubuai neu chikchikte aawarness nei zel ding leh district vaihawmtute kiang ah khosung mite kithuahpih ding inleng ngen hi.

 

Hiai meeting ah, Saitu Assembly constitu­ency MLA Ngamthang Haokip, Sadar Hills Au­tonomous District Coun­cil Chairman Haokhalal Hangshing, Deputy Com­missioner Kangpoki Dr. Rangitabali Waikhom, ADC/ADM Kangpokpi Hmangte Lerte Kom, SDO Saitu Gamphazol N. Johnson Meetei, Mot­bung village chief Kaik­hosei Lhouvum, SDCs leh Kangpokpi a District level officer-te tel uhi

 

SAGY nuai a, Mot­bung kichi model village khat ahihna toh, sector tuamtuam 8- human resource, van poimoh masa leh service-te, social security, economic development, personal, social, environment development leh good governance –te a khan­touhna ding mitsuan in nei ding hi. Model village in a mitsuan pipente ahihleh kua­peuh a ding siamsinna, kuapeuh a ding a ki-etkolna, kuapeuh a ding kikawmtuahna, kuapeuh a ding meivak, kuapeuh a ding natna dalna leh kuapeuh a ding banking tup-le-ngimte tangtun­sak ding chih ahi.

 

 

June 12 in Niangzen Ser­vice Centre honna om ding

LAMKA, June 8: Hongtung ding June 12, 2018 in Thanlon MLA, Vungzagin Valte, Chairman, MTDC in a pianna nu, Niangzen theihgigena hansuang honna leh Niangzen Service Centre honna nei ding hi.

 

June 12 zingkal dak 8 in New Lamka YPA Han­mual ah Niangzen theihgigena hansuang honna om ding a, huai hun ah Pastor D Kamchinmang, Local Pastor, EBCC Dorcas Veng in Niangzen theihgigena hansuang hong in, laan ding hi.

 

Sunma dak 11 in Lamlian Veng, Bungmual ah Niangzen Service Centre honna om ding a, huai hun ah Rev S Vung Minthang, General Secretary, EBC in Niang­zen Service Centre hong in, Rev Dr. Khen P Tombing, Chief Coordinator, PCI (R) in laan ding hi. Hun zatsung in company official-te ban ah David Mangboi, MD, NSC a pan thugenna om ding hi. Sunnung dak 1 in Niangzen Khualbuk, Dorcas Road, New Lamka ah Niangzen thei­hgigena hunpi zatna om ding hi.

 

 

(L) Thangzalang Memorial Award piakkhiakna nei

LAMKA, June 8: Singngat MLA, Ginsua­nhau, Chairman, MANI­REDA in a pianna’ pa theihgigena dia a bawl (L) Thangzalang Memo­rial Award piakkhiakna leh Facilitation Program tuni, June 8, 2018 sunma dak 11 in (L) Thangza­lang’ Inn, Lailam Veng, Central Lamka ah zang uhi.

 

Hiai hun Shyam Lal Poonia, IAS, DC/Ccpur; Rakesh Balwal, IPS, SP/ Ccpur; SDO, Singngat, Sangaikot leh Suangdoh ban ah Deputy Inspec­tor of School, Singngat in special invitee hihna toh uap uhi.

 

Hiai hun John Mangcha Haokip in makaih a, Rev. Thang­mang in thumna a hun pan in TL Seipu Haokip, Advisor, KSO Singngat Block in vaidawnna thu­gen in, guest-te mellahna a neih ban ah Award sang dingte pulak hi.

 

SP/Ccpur in a gen­na ah, High School tan ah laisiam hilou leh vantang toh kibang a pawl suan­tou zel ahihdan gen in, Railway a sepna a muh lungkimlou leh UPSC maituah dia kisakkhol­hna a neih tungtawn a IPS tung ahihdan gen a, Award sangthei dia telkh­iak a omte’n maban a hi­htheihna liantak nei uh ahihdan gen in sangtak tun ding tupna a laisin ding in hasuan hi.

 

DC/Ccpur in a genna ah, siamsinte han­thawnna dia Singngat MLA panlakna a kum 6 paisa a pan patkhiak a om (L) Thangzalang Memo­rial Award pen siamsinte khualna ahihdan gen hi. Innkuan khosakna hak­satak a pan khangkhia Singngat MLA pen mich­ih toh kihouthei ahihman in a bialsung mipi a dia hamphatna ahihdan gen in, hiai award hawmkh­iak a om pen Singngat bi­alsung kia hilou a, district sung pumpi a dia siam­sinte hasuantu honghih a deihthu gen hi.

 

Inntekpa, Ginsua­nhau, MLA/Chairman, MANIREDA in Award pekhia a, Rev. Zamlian­pau in Award sangte leh Award Sponsor-te a dia thumsak in, Kamthang in kipahthu gen in Upa Chinsuanthang in thum­na in hunkhak hi.

 

A 6veina (L) Thang­zalang Memorial Award 2018 sangte ahihleh Class X, CBSE ah khatna JNV Tuinom a pan 89.16 percent mu Letkhohao Haokip s/o Doujathang Haokip leh Tinkhoneng Haokip of MB Saichang leh nihna JNV Tuinom a pan mah 85.4 percent mu Boinu Hoinei Neng d/o James Chongthu leh Neikhohoi of Mongbung hi uhi.

 

Class X, BOSEM ah khatna Don Bosco Higher Secondary School a pan 82.16 percent mu, nihna T. Khupkhanlun s/o T. Liankhanmang leh Deikhanching of Behi­ang leh nihna Elohim High School a pan 81.16 percent mu Jangkholun s/o Seithang Haokip leh Lhing Kho Neng of G. Khonom hi uhi.

 

Class XII, CBSE ah khatna JNV Tuinom a pan 86.6 percent mu Ngamkhohao Haokip s/o Jangkholun Haokip leh Halhing Haokip of MB Saiching hi a, nihna ah JNV Tuinom a pan 82.4 percent mu Houminlal Baite s/o Semjang Baite leh Tinkhochin of Lungil, Singngat hi uhi.

 

Class XII COHSEM nuai ah khatna Don Bosco Higher Secondary School a pan 76.6 per­cent mu Hoineivah Baite d/o (L) Jangkholun Baite leh Nengkhongah Baite of Moljol, Sangai­kot leh nihna ah Ray­burn College a pan 70.8 percent mu, Lisa Nauch­ing d/o Thongkhanlam leh Paungainiang of Muallum hi uhi. Award ahihleh khatnate’n Rs. 10,000 leh memento ban ah nihnate’n Rs. 5,000 leh memento sang uhi.

 

Singngat MLA in a genna ah, election hun a pan chikim candidate ahihdan a gen dungzui in tuni tanpha a huai paipih hi’n gen a, beh-le-phung min zang a kipahpihna hun zat kichi deihlou ahihdan gen a, Award piak a om, sumte nu-le-pate a dia admission fee, textbook leh a dangdang dawnzangtu ahih ding deihna toh piak a om ahih dan gen hi. Huai ban ah Committee in po­imoh a sak dan dungzui a sum pen punsak hiding ahihdan leng gen hi.

 

August 30, 1998 a mualliamsan, a pianna pa’n lehkha siam a, milian-milal khat hid­ing in deihsak mahleh Pathian in MLA dia deih hidia gingta ahihdan gen hi. Huai ban ah Pathian phawkkawm a nu-le-pa leh upa zawte zahdan siam a siamsin ding in award sangte hasuan a, lohchinna kichi Pathian in michih tung ah pethei himahleh kuhkalte lak a pemasa ahihdan gen a, siamsin lohchingte’n nu-le-pa tawisang ahi­hlam kiphawk ding in hasuan hi. Hiai hun ah Ginsuanhau in tutung a lohching zouloute’n leng maban a naksem a panla a, kumnawn a tuni a Award piakkhiak a om bangbang sangthei dia kisathak chiat ding in ngen hi.  


 

 

Lhangjol ah inn khat mei in kang

LAMKA, June 8: Lamka khopi apan gamla lou D. Lhangjol, Churachandpur District ah tuni zinglam dak 3:30 vel ding in Inn khat mei in kang a, hiai hun ah mi 3 kangliam uh hi’n thusuak in taklang hi.

 

Hiai inn neitu ahihleh (L) Lhunkhomang Khong­sai hi a, a sung a giak pasal khat leh numei khat banah a tate uh khat kangliam hi. Pasal pen leh a tate khat a nakkat luat ziakin Imphal ah refer in om uhi.

 

 

 

Beti Bachao-Beti Padhao toh kisai in competition om ding

LAMKA, June 8: Ccpur District sung a Central Scheme - Beti Bachao-Beti Padhao (Save Girl Child, Educate Girl Child) kichi zat dia telkhiak ahih toh kiton in tunung sawtlou a honkhiak hiding a, huai ding toh kisai a mipi kihel theihna ding in District Administra­tion in kidemna tuamtuam sai ding hi. Kidemna ahi­hleh Slogan leh Anthem in kikhen a, hiai kidemna ah Best Slogan in Rs. 3,000 leh Best Anthem in Rs. 3,000 sang ding ua, kidemna a tel mi 4 tuak kiang ah con­solation prize Rs. 500 chiat piak hiding uhi. Kidemna ahihleh English leh tualsung pau khatpeuh hithei ding a, kidemna a tel dingte’n min, veng min leh contact number kichiantak toh June 30, 2018 tan in DC/Cc­pur kiang ah piaklut theih ding hi.

 

 

Manipur:

Imphal-Jiribam section NH-37 ah menchim om ziak in gari tamtak tang

IMPHAL JUNE 8: Imphal-Jiribam section of NH-37 in a totkhak Tamenglong district huamsung a om Kotlen khau ah menchim a om ziak in hiai lampi tawn a gari taituahtute’n haksat­na tuak uh hi’n thusuak in taklang hi.

 

Hiai toh ksiai in zan in Jiribam lam leh Imphal lam a gari a zaa a simte pai theilou in om ua, passenger kipawlte’n menchim hahsiang sawm mah le uh mihing tha a zohvual ding ahih louh ziak in a kisaipih thuneitute’n menchipna mun delh in hahsiangna nasep panta uhi.

 

Hiai thusut ahih tan in menchim hahsiang zoh hi nailou a, himahleh tuni a zoh ding a lam-et hi’n thusuak in taklang hi.

 

 

VDF Assn in Rs 1 lakh in gal

LAMKA, June 8: Ccpur District Village Defence Force Welfare Assn (CDVDFWA) in a member pih uh sihna tuak khat tuni, June 8 sunnung dak 3:30 in a innkuanpihte kiang ah galna sum pekhia uhi.

 

Hiai hun ah Laltin­gen Vaiphei, President, CDVDFWA in a member-pih uh K. Siamlianpau s/o K. Kapzathang of Vengnuam, New Lamka in March 5, 2018 a dam­louhna ziak a sihna a tuah thuakpih mahmah uh ahi­hdan gen hi. Huai ban ah pawlpi’n thupukna a bawl dungzui a member sihna tuakte Rs. 1 lakh a kigal ding chih ahih dungzui in K. Siamlianpau’ pianna pa khut ah Rs. 1 lakh, Rakesh Balwal, IPS, SP/Ccpur theihpihna toh cheque in pekhia hi.

 

K. Siamlianpau’ sanggamnu Donngaihch­ing in hiai hun ah a naupa galna dia a lawmte’n gov­ernment a pan fund hilou a, amau kithohkhawm a galna sum a piakna tung uah kipahthu gen hi.

 

 

Ccpur College Science Block building bawlthak ding

LAMKA, June 8: Ccpur Govt College, Science Block a building khat bawlthakna nasep kipan hi. Thutut kingah dan in, kum paisa a Uchchatar Shiksha Ab­hiyan (RUSA) nuai a Principal Room Construction ding toh kisai proposal piaklut a om om tungtawn a bawlthak a om ahi. Proposal piaklut ahihnung in Edu­cation Department a pan Director, Joint Director ban ah Secretary leh Joint Secretary in hong enkhia ua, huai dungzui in Department of Physics in Classroom leh Laboratory dia a zat uh building lui leng khengkhia dia assessment bawl dia theihsak ahih dungzui in Col­lage Administration in proposal a piaklut thak pansan ua bawl a om ahi.

 

Nasepna ahihleh Jamkhanmang in enkai a, building lui phelkhiakna nasep tuni’n kipan hi. Build­ing a thak a bawl ding chih ahih dungzui in building lui pen phelkhiak in om a, himahleh lungme a tam luat ziak in nasemte’n ceiling halsiang thoh uhi.

 

 

Lal Thanhawla in Citizenship (Amendment) Bill 2016 soisel

AIZAWL, JUNE 8: Mizoram chief minister, Lal Thanhawla in tuni Sintawpni in Citizenship (Amendment) Bill 2016 naktak in soisel a, hiai bill toh kisai, gamsung pawlam akipan sahkhua minam khat tung a khua-le-tui hihna piak ding sawmna ahi chi’n gen hi.

 

Lal Thanhawla in, Congress Bhawan, Aiza­wl a political session a, a gendan in, BJP makaih Central government in Muslim leh Christian migrant-te tung a khua-le-tui hihna piak ding tup a nei taktaklou chi’n gen hi. Citizenship bill in, India a hong pemlut leh gamsung a kum 6 sung om khinta Afghanistan, Bangladesh leh Pakistan a hong kipan nam niam a bik in dan kalh Hindu migrant-te tung khua-le-tui hihna piak ding sawm a nei hizaw chi’n gen hi. Central government in Muslim leh Christian minority-te huamsak ding saawm in nei taktak­lou chi’n Hawla in gen hi.Mizoram state govern­ment in a bultung a kipan in hiai bill naktak in ana daltou den chi’n genbeh hi.

 

Mizoram Law and Judicial minister Lal­sawta makaihna toh zan Ningani in Aizawl ah Mizo National Front (MNF) chihlouh political party tengteng, Mizoram a saptuam pawlpi li­ante kikhaikhawmna Mizoram Kohhran Hruaitute Committee (MKHC) leh civil socity organisation tengteng in Citizenship (Amend­ment) Bill 2016 toh ki­sai in meeting khat nei uhi. Meeting hun in state government kiang ah citi­zenship bill toh kisai in, a dinmun uh chiangtak a puangkhe ding in ngen uhi. Northeastern state a state government teng­teng in hiai bill deihlou vek uh hidan leng taklang ua, Mizoram government kiang ah leng bill toh ki­sai gum ahihkeileh dal uh hiam chi’n dong uhi.

 

Mizoram stu­dent pawlpi thuneipen Mizo Zirlai Pawl (MZP) president L. Ramdin­liana Renthlei in a gen­dan in, bill pass ahihleh Mizoram a dan kalh hong pemlut tamtak khosa uh ahih ziak in, Mizote gam leitang naktak a sukha ding hidan in gen hi. Centre in Mizoram a nelhsiah zomzel leh, kum 1966 a galvantawi a kiphinna om bangbang pankhe ding a mansa a om hidan inleng Renth­lei in gen khin hi.

 

 

Singngat ah Self Help Group Leaders Training nei

LAMKA, June 8: Singngat Community Hall, Singngat ah tuni, June 8 in Self Help Group (SHG) Leaders Training om hi. Training hun ah Singngat khua leh kimnai a om khua tuamtu­am a pan Self Help Group-te tel ua, programme coor­dinator in Thangchinkhup Guite, DDM NABARD pang a, resource persons in Moi Valte, Branch Man­ager, Central Bank of India, Singngat Branch; Hau Phi­amphu, MSW leh MD NE­DAR Foundation; P Lamza­muan, Secretary, RDS leh Th Hausuanpau, MA (Envi­ronment) pang uhi.

 

Hiai hun ah, Self Help Group poimohna leh phattuamna, SHG khantouhna ding leh etkai ding dan ban ah SHG toh kisai in kisin­sak uhi. Training hun ah Singngat, Haijang, Aknijolneng, Muvanlai, Ebenezer SHG, Singngat a pan Pipi SHG leh Khup­ching SHG, Tangpijol a pan Heisa SHG, Maukot a pan Lengtong SHG leh Lancha a pan Moltinchan SHG tel ua, training ah Self Help Group makai 32 kihel uhi.

 

 

RBI saina in bank toh kisai meeting om ding

LAMKA, June 8: Hongtung ding June 15, 2018 sunma dak 11 a pan in Reserve Bank of India (RBI) saina in Synod Hall, IB Road, Lamka ah meeting om ding hi. Hiai hun ah bank account neite a ding in bank toh in kisai thu poimoh tuamtuam genkhawm ding ua, hiai hun a telte kiang ah TA/DA piak hiding uhi. Hiai ding toh kisai in lunglutna neite’n Lamka Trader and Self Employed Assn (LATSEA) member-te ban ah member hikha nailou dawr bawlnuam leh bawlsa bus­siness loan la nuamte’n June 14 tan in contact number 8974-225-922 ah register bawlthei ding uh ahihdan LATSEA a pan thutut kingah hi.

 

 

NSCN-IM leh India government palaite’n close door meeting nei

DIMAPUR, JUNE 8: Dimapur ah tuni In­dia Government palai mi bangzah hiamte toh NSCN-IM in cease fire ground rule thu ah hou­limna (close door meet­ing) nei uh hi’n NSCN-IM thusuak in taklang hi.

 

Tuni a hiai bang meeting neih a, a om ziak ahihleh NSCN-IM-te’n tumalam zek a Assam Rilfes-te gamtatna toh kisai a, a lungkim louh uh latsakna a Indo Naga peace process a houlimna pailel pen tawpsan ding hidan a thupuan a bawl ziak uh ahi hi.

 

Tuni a meeting neih ahih hun in Indian Government lam a pan in Rina Mitra, Special Secretary (Internal Secu­rity), Ministry of Home Affairs (MHA) in palaite makaih a, NSCN-IM lam a pan in General (Retd) VS Atem in NSCN-IM-te makaih hi. Hiai hun ah ground environment toh kisai a lemna leh muanna om pen kuaman sub­uailou ding in kihouna nei ua, August 3, 2015 a Framework agreement toh kisai leng genkhawm kha uh ahihdan taklat in om hi.

 

India government lam a pan official pai­khawmte ahihleh Rina Mitra, Special Secre­tary (Internal Security), Satyendra Garg, Joint Secretary, (NE), MHA, R.R. Verma, Joint Direc­tor, MHA, D.k. Pathak, Chairman, Ceasefire Monitoring Group (CFMG), Maj. Gen. San­jay Gupta, IGAR (North) Assam Rifles, Dilip Singh Bhaduri, Director, Cabi­net Secretariat, R. Rama Krishna, Home Com­missioner, Nagaland, Col. D.S. Rathore, MO 2, Lt. Col. G.S. Vidyartti, DGMI, T. Mere, Staff Of­ficer, GSMV leh Sreema­thi Gosh, Section officer, MHA-te hi ua, NSCN-IM lam a pan in Gen (retd.) V.S. Atem, Member Col­lective Leadership, Tong­meth Wangnao, Member Collective Leadership Member, Kraibo Chawa­ng, Convener, Ceasefire Monitoring Cell (CFMC), Makritsii, Steering Ex­ecutive Member, Vikiye Sumi, Steering Execu­tive Member, A Makun­ga, Steering Executive Member, Gen (Retd.) Phungthing, Steering Ex­ecutive Member, Arep Jamir, Kilonser, David Mero, MIP Kilonser, O. Mozamo, MIS Kilonser, Brig. Honreishang, Col. Khannganing PRO, leh DJ Rudolph,Secretary, CFMC-te close door meeting neih hun in kihel uhi.

 

 

ICDS Project, Henglep nuai a An­ganwadi Worker-te’n training nei

LAMKA, June 8: Integrated Child Devel­opment Service (ICDS) Project, Henglep saina in tuni, June 8 sunma dak 11 a pan in PTC-GHQ Conference Hall, Hiang­tam Lamka ah Angan­wadi Worker-te a ding in Refreshers Training Course om hi. Training hun ah Integrated Child Development Service (ICDS) Project, Henglep nuai a sector 3 - Henglep Sector, Kolhen Sector leh Mouphai Tampak Sector a pan Aganwadi worker-te tel uhi.

 

Training hun ah resource person in V Sumati Devi leh L Suni­tabala Devi pang ua, An­ganwadi Worker-te a dia ICDS Family Detail reg­ister book hongtung thak toh kisai in, register book thak a family detail gel­hlut ding dan sinsak uhi.

 

Tuni a ICDS Proj­ect, Henglep saina nuai a Refreshers Training Course hun ah ICDS Project, Henglep nuai a sector 3 a pan Anganwadi Worker 83 tel uhi.

 

 

Police Staton kong tan black-top zou

LAMKA, June 8: Lamka-Sugnu Road blacktop pailel ah contractor in a masa in Rengkai Leipi a pan Lamka Police Station manoh in black-top bawl a, tuni­tan in Rengkai leipi leh Police Station kikal blacktop zousuakta uhi. Lamlian bawlna ahihleh gari taituah a tam ziak in nasemtute’n haksatna liantak tuak uhi.

 

 

OD hidia gintak hospital ah admit

LAMKA, June 8: Tuni sunma dak 11:30 vel in New Bazar ah Pasal khat OD hiidia muanmoh khophawk­lou a om pasal khat om a, pawl khat in Lamka dam­dawi Inn Casualty a va koih in kihepmangsan uhi. Doctor leh nurse-ten kuamah a kemtu ding omkei mahleh Medicine ward ah admit in oxygen bulh uhi. Huai pasal ahihleh kum 40/50 vel mi hidia gintak ahi.

 

 

Thangkhal Road mualsung puahthak

LAMKA, June 8: Buangmun leh Khuangkhai kikal kikawmtuahna lampi, Thangkhal Road kichi puahthak in om hi. Thangkhal Road mualsuang ahihleh Buang­mun a teng (L) Thanggoukhup in a damlai a, a gelh ahi.

 

Hiai mualsuang ahihleh Buangmun a pan in ki­lometres 13 vel a gamla a om hi a, Buangmun ahihleh Lamka a pan kilometres 31 vel a gamla Singngat Sub Division sung a om ahi.

 

Thangkhal Road Mualsuang puahpha ding in, mualsung gelhtu (L) Thanggoukhup tate Nengmuan­lal @ MG Thangkhal leh a sanggampa Khulpu in June 7 in Buangmun khua zuan uhi.

 

 

Electronic van zuakte a pan pilvan poimoh

LAMKA, June 8: Tulai in Lamka khopi sung ah non- Manipuri (vaite) khenkhat in electronic van chituamtuam a bik in TV, Camera, Gas Stove, Mobile Phone, DVD Player, Woofer, RO Water Purifier leh dang­dang van/car a pua in inn tuamtuam ah zuak uhi. A vanzuakte uh ahihleh mel et in hoihthei mahmah a, himahleh a deksiamte’n a dekchiang in 50% bang kiam in pethei uhi. Hiai bang a van zuak a omte kuaman ana leisaklou a, pilvang­tak a om ding leh a a van zuakte uh dupli­cate hidan in thutut kingah hi. Huai ban ah hiai bang van hong zuak om leh police a report hoih ahihdan thutut kingah hi.

 

 

MP Head constable leh a kithu­ahpih khamtheih toh mat in om

IMPHAL JUNE 8: Heirok Police Station a sem head constable Md. Akbar Khan (50) s/o (L) Chaoba of Thoubal Moi­jing Wangma leh a kithu­ahpih Khailun Lungdim (36) s/o (L) Thokholet of Gonpang Songgel, Saikot Sub-Division-te khamtheih leh sum Rs 2,02,000 toh Com­mando Unit of Thouba in mankhia hi’n thusuak in taklang hi.

 

Thusuak in a taklat­dan in mi nihte ahihleh WangjingAwangLeikai, Canteen Lampak mun a mat a om hi ua, huai hun in head constable in opi­um kg 3 leh ganja gram 50 Khailun Lungdim a pan leisawm hun laitak a mat a om ahi uhi.

 

Lungdim ahihleh khamtheih toh mat hi a, head constable ahihleh Rs 2,02,000 toh mat a om ahihdan taklat in om hi.

 

Mih nihte ahihleh FIR No. 88(6)2018 Thou­bal PS u/s 17(c)/ 20(b)(ii) (A) ND&PS Act pansan in thubuai bulhkhum in om uhi.

 

 

Pawngsual sawm NSCN-IM cadre khat tawpsak in om, kum 5 jail tang ding

IMPHAL JUNE 8: Nupi khat pawngsual sawm ziak in NSCN-IM helpawlte lak a kihel Ng. Wilson tuni in cadre hihna a pan tawpsak ahih ban ah kum 5 sung jail bang zut ding a mat a om hi’n thusuak in taklang hi.

 

Ng. Wilson in ahihleh ni bangzah hiam paisa in nupi khat pawngsual sawm ahihdan taklat hi a, himahleh numei nu pen vangphat huaitak a suakta thei in hiai thu social media ah thehzak in numei pawl-te’n man ding leh cadre ahihna a pan tawpsak ding a ngetna a bawl uh toh kizui a, a hihna a pan tawpsak a om ahi hi.

 

 

 

NEWS TOMKIM

 

Electric in manlun

LAMKA, June 8: Tuni, June 8 nitak dak 6:30 vel in N Ginkhothang of Zion Veng, New Lamka, a inn kiang ua tui-pump bawllai electric in man a, kintak a damdawi inn tut himahleh dam zoulou in si hi. A luang ahihleh tuzan district hospital morgue ah koih ua, zingchiang, June 9 in postmortem bawl hiding hi.

 

 

Tuitha Lui ah naupang 1 ke lum

LAMKA, June 8: Tuitha lui ah tuni’n naupang khat khe lum hi. Thutut kingah dan in, tuni sunma dak 9:30 vel in, Hoinunnem (6) d/o Thenkhogin Singson of Zion Veng, Tuibong, Tuitha lui a kisil dia kisa lai tangkhialkha in kia a, phatuam ngai pawl khat in hunkhia in kintak in Selmat Hospital pawtung mahle uh dam zoulou in si hi. Tu kum, 2018 sung in Tuitha lui ah naupang 3 ke lumta uh hi’n thutut kingah hi.

 

 

SUNNA:

Nemkhodim (65) w/o K. Ginkhanpau, Gangpimual, tuni zinglam dak 8:30 in damlouhna ziakin si a, tuni mah in vuiliam in om hi. RIP.

 

K. Songmuanlal (42) s/o (L) K. Liandawl, College Road, Hebron Veng, New Lamka, tuni zinglam in si a, tuni mah in vuiliam in om hi. RIP.

 

 

 

 

 

…more detail : here

 

 

FIFA World Cup Fixture 2018

Read 386 times
Login to post comments