You are here: HomeNewsLamka PostThe Lamka Post | June 12, 2018

The Lamka Post | June 12, 2018

Written by  Published inLamka Post Tuesday, 12 June 2018 14:00
The Lamka Post | June 12, 2018

Hill Leaders’ Day leh Meeyamgi Numit zang

Complaint 400 thehlut ahih ban ah mimal 1500 vel in CM kimuhpih

IMPHAL JUNE 11: CM’s Secretariat ah tuni in Hill Leaders’ Day leh Meeyamgi Numit zat­khawm in om aq, huai hun in mi 100 vel a kihel ban uah a haksatnate uh tamtak Chief Minister N.Biren kiang ah tun uh hi’n thusuak in taklang hi.

 

Hiai toh kisai in zinglam dak 8:30 a pan in nitaklam 1:40 tan in mimal 1500 vel in CM a kimuhpih ban uah com­plaint 400 vel mu hi.

 

Chief Minister in media-te kiang a, a gen­dan in state government in Go to Village Mission pansan a nasepna tua­mtuam a neihte uh lohch­ing mahmah hi a theih ahi chi a, hiai tungtawn in mipi tamtak in buaina a neihte uh genkhiakna leh palaite a theihsaknate uh ziak in ma ban a huaite tungtawn a nasepna neih a, lemna leh muanna ban ah khat leh khat kal a kitheih siamlouhna omte tawm tuan mahmah ding a gintak ahi chi’n gen hi.

 

Huai ban ah mipi lam a pan haksatna don a omte she nih a kikhen ahi chi a, tu leh tu a hih theih thilte bel a kin theih bang pen a sukven ding a gel kholh ahi chi’n gen hi. A dangte ahihleh extra budget khel a thil bawl ngai om ahihna ah huaite leng hih louh ding chi­hna hilou in genkhawm leh ngaihtuah khawm hong poimoh masa ding ahi chi hi.

 

CM in a gendan in singtangmite a ding ban ah gamsung neitute ven­bitna ding in Bill khat As­sembly session neih a hih nawn hun ah bawlkhiak hiding chi’n gen hi. Huai hun chiang in Bill tung­tang ah nam tuamtuam a makaite sapkhawm a consultative meeting neih hiding chi’n gen behlap hi.

 

Biren in mipi pai­khawmte kiang a, a gen­dan in government ka­mte sang mah a, mahni khutsuak a sum zon kichi pen pibawl zawk ding ahi chi a, huchi hi leh gam­sung khantouhna lam a leng ma kisawn zaw ding ahi chi’n gen hi. Mani­pur state ichi gam hausa mahmah ahihna ah a gamneitute’n a zatkh­iak dingdan i theih louh ziak a zawnna kichi state sung ah om ahi chi’n gen hi. Huai ban ah Bank-te’n loubawlmite, en­trepreneurs leh skilled youth-te kiang a soft loan a piak ziak un leng kipahthugen hi.

 

Chief Minister in a gendan in tuni in nau­pang khat ka kiang ah honpai ahi chi a, huai in a thugen ahihleh sin­sakna toh kisai a omdan hoih leh discipline kichi koih tel ding a ngetna hong bawl ahi chi’n gen hi. Hiai bang thu ka zak in koi hiam khat ah sinsaktute’n naupangte kiang a sinsakna a piak hun ua zulhzautak a om uh ahihdan hon mu chi­ang sak mahmah ahi chi a, hichi bang a chindan i society sung a, a tam luat ziak a i gamsung a hoih ding bang a hoih theilou ahi chi’n gen hi.

 

Hiai bang a sug­gestion bawl a om pen a kisaipih thuneitute, huaituh education department-te kiang a tut hiding chi a, huai tungtawn in siamsinna kong ah omdan hoih leh chitakna toh naupangte sinsakna dingdan toh kisai a panlakna nei touh hiding chi’n gen hi. Hiai toh kisai a mipite’n pan nasatak a ilak kei ua leh I gamsung un hoih lam sang a siat lam manoh ding ahi chi’n gen hi. Pankhawmna tellou a lohchinna kichi om theilou ahihna ah thil hoihloute paih khe mengmeng a thil thak leh paidan thak patkh­iak poimohta ahi chi’n Biren in gen hi.

 

CM N.Biren in a genzelna ah inkuan khat sung a om mit li-te’n government lam a pan panpihna khat leng mukha nailou uh chih ka theih in kalungsim hon phawng mahmah ahi chi a, hiai toh kisai in CMHT card piak hiding a chih ban ah CMST pansan a kha teng a stipend Rs 1500/- a muh theihna ding ua panlak hiding chi’n gen hi. State gov­ernment welfare scheme tamtak a bawlkhiakte a thehzakna lam toh kisai a palaite chau mahmah uh ahi chi a, hiai toh kisai in mipite’n tamsem a ham­phatpih theihna ding ua awareness programme lam hahbawl ding inleng ngetna leh theihsakna bawl hi.

 

Working journal­ist-te dotna toh kisai a gendan in journalist pension-te’n kha teng a Rs 4000 a pan 6000 a muh theihna ding panlak hiding chi’n gen hi. Huai ban ah hiai toh kisai Lo­bour Department-te toh leng kihoulimna nei ding hidan in gen behlap hi.

 

Tuni a Hill Leader’s Day leh Meeyamgi Nu­mit a kizatkhawm ziak ahihleh Manipur Chief Minister in a hong tung ding June 16, 2018 chi­ang a New Delhi a NITI Aayog a, a kihel ding ziak hi’n thusuak in taklang hi.

 

 

Climate Change Adaptation toh kisai in State Level Workshop nei

IMPHAL, JUNE 11: Manipur Chief Minister, N Bi­ren Singh in a gendan in Manipur state sung a kho hun kikhek lamdan thu leh kim leh kiang a sing leh lou ban ah gamsate toh kisai kepbitna state government in kingai poimoh mahmah ahi chi’n gen hi.

 

Hiai toh kisai ahihleh tuni a Hotel Classic Grande, Chingmeirong, Imphal East district a ni nih daih ding “State Level Workshop on Understanding Mountain People’s Approaches and Practices for Cli­mate Change Adaptation” chih thupi pansan a pro­gramme neih ahih hun a CM in a gen ahi hi.

 

Climate change toh kisai in state sung a ecologi­cal balance a om theihna ding a singnou tamtak suan poimoh ahi chi a, hiai toh kisai in state government in singnou lakh 10 vel state sung a suan ding a gelkhol­hsa a kinei ahi chi’n gen hi.

 

Forest Minister Th. Shyamkumar leng ni thum sung diah ding in Moreh a singnou suan a poimoh dan sinsakna nei ding a zinkhia ahi chi’n Biren in gen hi. Huai ban ah singtanggam lam ah Assam Rifles-te panpih­na toh khosung mipite’n singnou (lemon grass) ana suanzel uh ahi chi’n gen behlap hi.

 

Tulai a khang thakte’n kim leh kiang kepbitna, singsat, gam­mang kepbit kichite ngaih poimoh hun lota ahi chi a, hichi bang a khang a hong paitouzel a leh tunung sawtlou chik a gamsung a kial thupi­tak hon tung thei ding kia hilou in kholum hong uang mahmah ding ahi chi’n gen hi.

 

Huai ban ah tui siang dawn ding leng hong vang ding ahi chi a, tui lian menchim leh thil tuamtuam mihingte a ding a poi thei ding thil tamtak hong tung ding ahi chi’n Biren in gen hi.

 

Ni kum 2017 inleng Manipur state in chikmah a, a tuah ngeilouh tuilian (tui let) 5 vei mawngmawng ana tuak ahih lam kuaman I mangngilh louh uh poimoh ding ahi chi hi.

 

Nidanglai a ipi leh pute un a chindan un Jhum cultivation leng tawpsan hun lota ahi chi a, hiai bang a chiindan pen i neih pen un i gam uh a suksiat kia hilou in ei leh ei kigentheisak maimai ihi uh chi’n gen hi. Jhum cultivation lou a leng nek muhna ding tamtak omta ahi chi’n gen behlap hi.

 

Hiai hun zatna ah Directorate of Environ­ment Director Dr. Y. Nabachandra, Integrated Mountain Initiative president Sushil Ramola and Executive Director of Sustainable Develop­ment Forum, Nagaland, Amba Jamir leh mi poimoh tamtak kihel uhi.

 

Workshop ahihleh zingchiang June 12, 2018 tan neih hiding hi. Programme ahihleh Ma­nipur Forum for Sustain­able Mountain Develop­ment (MFSMD)-te’n State Chapter, Integrated Mountain Initiatives leh State Climate Change Cell, Directorate of Envi­ronment, Government of Manipur-te toh kithuah­khawm a, a sai uh hi’n thusuak in taklang hi.

 

 

UTLA (P) leh AR-te kikap­tuah, helpawl 1 si, 2 man

LAMKA, June 11: Zan, June 10 nitak sawtnung in Assam Rifle-te leh helpawlte kikaptuah ua, huai ah helpawl cadre 1 kaplum a om ban ah midang 1 mat a om hidan in thutut kingah hi. Hiai thiltung toh ki­sai Police team leh commando-te’n delhzui in kikap­tuahna mun ah thil omdan enchian uhi.

 

Thusuak in a taklatna ah, Assam Rifle leh helpawlte ahihleh zan, June 10 nitak dak 11:25 vel in Jiribam Police Station huamsung, Kuran Madrassa Ahmedabad kiang ah kikaptuah ua, minute 5-10 ki­kal kikaptuah uhi. Hiai hun ah UTLA (P) cadre hidia muanmoh mi khat kaplup ahihman in midang 2 mat in om a, midang 2 ahihleh khomial nuai a kihemmang uh hidan in thusuak in taklang hi. Hiai thiltung ah pis­tol leh M16 rifle khat security force-te’n matsak uhi.

 

 

Asian Kung-fu Championship a Gold Medalist vaidawnna nei

LAMKA, June 11: Ccpur Meitei Leikai Youth Club (CMLYC) makaih in tuni, June 11 sunnung dak 3 in Koite Hanmual ah June 5 leh 6, 2018 sung Sky Restro, Banquet & Health Club, Kathmandu, Nepal a First South Asian Kung-fu Championship 2018- 2019 om a Gold Medal la, Kuber Mairembam vaid­awnna om hi.

 

Kuber Mairembam ahihleh Khumujamba Meitei Leikai, Lamka a pan hi a, hiai bang a In­ternational Level tanpha a Gold Medal sang ban, Lamka a Meitei Com­munity sung a pan a om kipahpihna leh pahtawi­na dia CMLYC in vaid­awnna thupitak a sai uh ahi. Kuber Mairembam ahihleh hiai kimawlna ah bantamweight (51 Kg) category ah kimawl a, hun paisa inleng Nation­al Level ah Gold Medal sangkhata hi. Vaidawnna hun ah sum note a kibawl khi ohsak a om in, pickup tung a dingsak in huai a pan a inn uh, Khumu­jamba Meitei Leikai tan gari tamtak in zui uhi.

 

 

Thyriod leh Liver Function Test om ding

LAMKA, June 11: Hongtung ding June 16 sunma dak 9 a pan in Dr Liangoumuan’ inn, Saikham Road, Vengnuam, New Lamka ah Thyriod leh Liver Function Test om ding hi. Hiai hun a test bawlnuamte’n Dr Li­angoumuan kiang ah minkhum theih ding hi.

 

 

Sh. Jogen Singh in DSO/Ccpur len ding

LAMKA, June 11: Ccpur & Pherzawl District a DSO (CAF/PD) lenlel Michael Ginzasuan, June 1, 2018 a pan a pension ziak in Sh. Jogen Singh in DSO (CAF&PD) incharge, Ccpur & Pherzawl District len ding in Ranjan Yumnam, Joint Secretary (CAF&PD) Govt of Manipur in June 7, 2018 in order suah hi.

 

 

Morgue a pan Fimsanglien luang lakhia; A vawtute Police in man

LAMKA, June 11: June 7, 2018 nitak dak 6-7 vel a Zote Veng, Rengkai a pasal nih in Fimsanglien (36) s/o Zolien of Muolvaiphei, a vuakliam uh Lamka Damdawi Inn tut ahi­hnung in doctor-te’n Imphal ah refer uhi. Imphal manoh a, a pai­lai un lamkal ah si a, hon pawkik in Lamka Dam­dawi Inn morgue ah koih uhi.

 

Fimsanglien vawtu mi nih - Rochanlun Son­gate (37) s/o Lalhuopvel Songate of Khawmawi leh John Lalremruat In­fimate (35) s/o Lallawm­vel Infimate of Zote Veng, Rengkai, Police-te’n zan in man ua, CJM Court a dinsak ahihnung un Court in June 14, 2018 tan Police Custody a om ding in phalsak hi.

 

Fimsanglien leng tuni zingkallam in Dis­trict Hospital morgue a pan a sungkuante lakhia in tuni mah in Muolvai­phei hanmual ah vui uhi. Hiai thu ah Police in FIR No. 51(6)2018 CCP-PS u/s 304/326/34 IPC chi­amteh uhi.

 

 

Singngat MLA in D Lhangkol a innkangte veh

LAMKA, June 11: June 8, 2018 zingkal­lam dak 3 vel a Sangai­kot block sung a om D. Lhangjol khua a innk­angte tulel a, a omna uh Khongsai Veng, Tui­bong ah tuni, June 11 in Singngat MLA, Gin­suanhau, Chairman, MANIREDA in veh hi. Hiai hun ah Singngat MLA in panpihna Rs. 10,000/- a piak ban ah Government a pan pan­pihna om thei bangbang ngaihtuahsak ding ahi­hdan chiam hi.

 

 

Diesel Auto driver kidnap a tel jail ah koih

LAMKA, June 6: February 6, 2018 sunma dak 9 vel a Kaprang Line Diesel Auto Association makai 2 Rs 3 lakh vel a tatkhiak dia pimangtute lak a tel KIA/ KIO member hidia muanmoh Parpa Chonthra Chothe (41) s/o Parpa Ibohai Chothe of Khongthang Village, Chandel District, June 4, 2018 in Thoubal Police-te’n mankhia uhi. Thoubal Police a pan Ccpur Police-te’n June 5, 2018 in formal arrest bawl ua, Ccpur Police-te’n CJM Court a, a dinsaknung un court in jail a koih di’n thutankhum hi. Huai toh kiton in Police-te’n tuni’n jail ah koih uhi. Hiai thu ah Police in FIR No. 11 (202018) CCP-PS u/s 400/364A/34 IPC bulh uhi.

 

 

Petrol diesel man kiam

NEW DELHI, JUNE 11: Petrol man litre ah 20 paise leh diesel man litre ah 15paise in sukkiam in om nawn hi. Ni 13 a kizom a thautui man sukkiam ahihna hita hi. International oil rate-te suk niam ahih nung in, company-te’n thautui mante kiamsak uhi.

 

State-owned oil company-te price notification dungzui in, Delhi ah tu in petrol man litre ah Rs. 76. 58 tung a, diesel man leng litre ah Rs. 67 .95 tung hi.

 

 

Innkang leh mi 1 vuakliam thu ah Police in case 2 chiamteh

LAMKA June 11: June 10, 2018 sun dak 12:30 vel a Paominlal Khongsai (27) s/o Ngamkhosei Khongsai of D. Lhangjol Village, Sangaikot block in Police a report a bawlna ah, June 8, 2018 zinglam dak 3 vel a melt­heihlouh pawlkhat in Thangneilam Khongsai (35) s/o (L) Lunmang Khongsai’ inn, sing a kibawl a hal ziak ua innsung a omteng kangliam vek uh hidan in report hi. Hiai thiltung ah mi 7 kangliam ua, huai lak ah mi 2 a dinmun uh 2 seroius mahmah hi. Innkang a kan­gliamte ahihleh Thenneilam Khongsai (35), Seiminlen Khongsai (15), Seigouthang Khongsai (12), Seikhohao Khongsai (9), Lamneiching Khongsai (5), Lamnei­vah Khongsai (3) leh LhunkhongamKhongsai hi uhi. Hiai thu ah Police in FIR No. 53(6)2018 CCP-PS, u/s 436/427/326/34 IPC bulh uhi.

 

Huailou in, Thanglienlal Gangte (31) s/o Cholun Gangte of Patlen in June 9, 2018 nitak dak 5:40 vel a Police a report a bawlna ah, June 9, 2018 sunnung dak 1:30 vel a Hiang Lamka a Lamka Public Ground kiang a meltheihlouh mi 10 val in Letkhogin Hanghal (35) s/o H. Thangkhohen of K. Patlen vua ua, a mai leh mit ban ah a muk liam in sisan tamtak pawt a, Zion Clinic, Tuibong a etkol a om lel hidan in report hi. Hiai thu ah Police in case FIR No. 52(6)2018 CCP-PS, u/s 352/325/34 IPC bulh in suizui lel uhi.

 

 

KSO Singngat Block in Felicitation leh Career Guidance nei

LAMKA, June 11: Kuki Student Organisa­tion (KSO), Singngat Block in Education Policy tuamtuam a paipih toh kiton in tuni, June 11 sunma dak 10:30 a pan in KSO Singngat Block Of­fice, Haijang Community ah tu kum 2018 a Class X leh Class XII examna a lohchingte kipahpihna in “The 16th KSO, Singngat Block Felicitation Pro­gram 2018” zang uhi.

 

Hiai hun ah KSO Singngat Block nuai a Class X leh XII exam a lo­hching student 68 kiang ah Kakai Khongsai, Edu­cation Secy in kipahpihna thilpiak pia hi. Jangpu Haokip, President KSO Singngat Block in a thu­genna ah, KSO in siam­sinna lam puahphatna dia panla ahihdan gen a, Felicitation leh Career Guidance neihna ding a sum-le-pai a kithuahpi­hna pete tung ah kipah thugen hi.

 

Special Guest hihna toh hiai hun uap, Henk­hopao Haokip, Congress President, Singngat Ken­dra in a genna ah, Singn­gat bialsung a om nu leh pate’n haksatak a Lamka khosung leh mun tuamtu­am a tate School a kaisak uh poisa ahihdan gen a, KSO Singngat Block in bialtu MLA leh MDC toh pangkhawm a Singngat a Class XII tan sintheihna ding Higher Secondary School omsakna ding dan ngaihtuah poimohsa ahi­hdan gen hi. D. Ngullun Haokip, President, SAKCA in a genna ah, KSO Singn­gat Block in hiai bang a kipahpihna leh maban a siamsinte maban ding khualna a programme a sai uh kipahpih ahihdan gen a, maban a leng hiai sang a thupi zaw pro­gramme saitou zel ding in hasuan hi.

 

NJ Haoneo Baite, Gen. Secy., KSO Ccpur in a genna ah, KSO Singn­gat Block in haksatna tuamtuam a tuahte thei­hpih ahihdan genkawm in gamsung a siam­sinna lam puahphatna ding a naktak a panlak himahleh siamsinte om­dan hoihlou leh ginalou a om uh leh society a ding in phattuamna bei hiding ahihdan gen hi.

 

Jameson Hangs­ing, MCS, SDO/Singngat in Career Councelling nei in siamsinte maban a hong lohchintouh zel uh a deihsak thugen hi. Huai ban ah Civil Service leh government nuai a sepna zon dingdan toh kisai gen hi.

 

Tua zoh in Rev. Kamkholun Singson, Singngat Pastorate Area, ECA tukum a Class X & XII exam a pass-te a di’n thumsak hi.

 

 

SK Oil Sub Dealer-te’n permit laktheih

LAMKA, June 11: Sh. Jogen Singh, DSO (CAF/PD), Ccpur & Pher­zawl in tuni a thusuah a bawlna ah, Ccpur leh Pherzawl District sung a SK Oil Sub Dealer-te’n SDO/Ccpur office a pan June 2018 quota SK Oil permit laktheih ding hi’n taklang hi.

 

Hiai toh kisai in 55-Tipaimukh leh 56-Thanlon AC sung a Sub Dealer-te’n M/S Pu­daite Traders ah lathei ding ua, 57-Henglep AC ate’n M/S BB & Co ah lathei ding ua, 58-Cc­pur AC sung ate’n M/S Paite ah lathei ding ua, 59-Saikot AC ate’n M/S Z.T. & Co ah lathei ding ua, 60-Singngat AC ate’n M/S JHK Agency ah lathei ding uhi. Sub Deal­er-te’n mahni I-Card tawi chiat ding leh kha paisa a SK Oil lakna list a tawi uh ngai ding hi.

 

 

SSPP Ccpur Govt College Branch in election nei

LAMKA, June 11: Siamsinpawlpi (SSPP) Ccpur Govt College Branch in tuni, June 11 sunnung dak 12 a pan in SPP Complex, Siloam Veng, Bungmual ah Elec­tion-cum-Farewell pro­gram zang uhi.

 

Hiai hun hunpi nih in zang ua, hunpi masa sun dak 12 a pan sun­nung dak 1 kikal in SSPP-JHQ vaisaina nuai ah SSPP Ccpur Govt College Branch a 2018-2019 sung a makai thak ding kitelna nei uhi. Sunnung dak 1 in Farewell program zang ua, hiai hun Thiauzakh­up, IRS (Retired) in spe­cial guest hihna toh uap hi.

 

Hun zatna G Thangmuanlal, Infor­mation Secy in makaih a, Dr Lalzagou Neih­sial, Senior Adviser in thumna in hun pan hi. Jambiaksang, Treasurer in vaidawnna thugen a, Esther Niangbiak­lun, Secretary in report tomkim pia in, Zamgin­thang Naulak, president in presidential address gen hi. Hun zatsung in Thanglalmuan Hauzel, President, SSPP-GHQ, Tuanzakhup, President, SSPP-JHQ Lamka, Dr Lalzagou Neihsial, Ad­viser ban ah committee member-te a pan thu­genna om a, Pausonlian Ngaihte in finance report pia in, SSPP JHQ in elec­tion result puangkhia in telching a omte kichiam­sak uhi.

 

Telching a om ex­ecutive member-te a pan thugenna om in, Pas­tor Ginkhochin, Local Pastor, EBCC Bethany in makai thakte a ding in thumsak hi. Tua zoh in Zamginthang Nau­lak makaih in makai lui leh thakte’n mohpuakna kipiakkhiakna nei ua, S Phungminthang, Secre­tary Social and Culture in kipahthu gen in, Ricky Vanlallawm Guite, Chief Adviser in thumna in hunkhak hi.

 

2018-2019 sung SSPP Ccpur Govt Col­lege Branch vaipaw dia telching a omte ahihleh President: L Khamin­lian; Secretary: Esther Niangbiaklun; Treasur­er: Chingnunmawi leh Finance Secretary: Sia­mlianmang hi uhi.

 

SSPP JHQ Lamka nuai ah SSPP Branch 6 - VK Tawna Col­lege Branch, Don Bos­co Higher Secondary School Branch, Ebenezer Academy Branch, Ray­burn Higher Secondary School Branch, Rayburn Degree Section Branch leh Ccpur Govt College branch om hi.

 

Special Guest Thi­auzakhup, IRS (Retired) in a genna ah, siamsin hihsung a, tup kichian­tak nei a Pathian lau leh dawng khawm a kalsu­an ding ahihdan gen a, gamsung siatna in hon pumtuam gawpta ahihna ah sualdouna toh kisai ah kim leh kiang a pawl tuamtuam leh namdan­gte toh pankhawm dan i siam keileh maban ah siatna sangzaw mai tuahtou ding i hihman un gamsung bawlhoi­hna ding leh siamsinna lam ah masawnna om theihna dia kuapeuh pankhawm a kalsuan po­imoh ahihdan gen hi.

 

President, SSPP-GHQ in Bills 3 hong kip­at a pan in gam leh nam itna liantak hong piang­khe in, tulai a electronic vanzat Facebook, What­sapp ah kidem leh kigen tuahna tam mahmah a, siamsinte huai bang thilte a kibuallou a, gam leh nam a dia siamsin hihlai a, ‘Back to Educa­tion’ chih paipih a, siam­sin ding ahihdan gen hi. Huai ban ah, namsung ah government officer tamtak piangkhe mahleh tu hun chiang in offi­cer taksapna liantak om ahihna ah siamsinte’n makai masa officer-te nungzui a, tunung a gamsung leh nam sung vaihawmtu khat suahna ding a, pan nasatak a la thak ding in hasuan hi.

 

 

Weightlifter Sanjita Chanu tung a ban kalh in kiphinna nei

IMPHA, JUNE 11: Weightlifter Sanjita Chanu nungthuap uh a hihdan leh a tung a ban puankhum a om deihlouh lahna in, numei pawlpi a kipan palaite leh Sports Authority of India (SAI), Manipur a student-te’n pangkhawm in kiphinna nei ua, dope test thubuai ziak a Sanjita Chanu tung a ban puankhumna toh kisai in, International Weightlifting Federation (IWF) a kipan hilhchetna pekhe ding ding ngen uhi.

 

Sanjita Chanu omna veng a kiphinna ah, weightlifer Sanjita Chanu mahmah tel in, numei makaite leh deih­saktu tamtak tel uhi. IWF a kipan hilhchetna ngen ua, hun paisa a leng Ma­nipuri player-te tung a thiltung kibang om khin a, hichibang a hihkhel­hna omte daih dide san nawnlou dingleh thudik puankhiak a hihma teng, Sanjita nungthuap a kip­hinna sunzom zel ding uh hidan in numei pawlpi a makai M. Shanti in gen hi. Sanjita tung a sample test thubuai toh kisai suk­felna ding in, SAI weight lifter in,Indian Weight Lifting Federation (IWLF) leh IWF kiang ah pangkhawm a panla ding in ngen hi. Sample-te DNA test bawl ding in­leng ngen uhi.

 

 

KAYA leh KACA in June 12 a mi vawtute kipekhe di’n theisak

LAMKA, June 11: Koite Lui Area Youth Assn (KAYA) leh Koite Lui Area Chief Assn (KACA) in meltheihlouh pawlkhat in mi a vuak uh toh kisai in tuni, June 11 sunnung dak 2 in a office uh, ST Chullouphai ah press conference sam in hilhchetna nei uhi.

 

Hiai hun ah Khai­tinthang Haokip, Presi­dent, KAYA in a June 9, 2018 a Lamka Public Ground a SYMROPIA leh LSC kimawlna en a kuan, kimawl a bei toh kiton a meltheihlouh pasal 10 vel in Letkhogin Lhang­hal s/o Thongkhohem Lhanghal of K. Patlen kivuak huan in, Letkho­gin pen hospital a etkol ngai ding tanpha a heh­pihna bei a vuak ahihna toh kisai mohpaih ahih dan gen hi. Police a FIR bawl ahih dungzui a mi­vawte June 12, 2018 tan a Police a kipekhe dia thei­sak in, hun kipia sung a mi vawte matkhiak hiam ahihkeileh a kipiakkhiak kei uhleh Koite Lui Area Youth Association in nu­akna pan ding uh ahih­dan gen hi. Kuahiam mi vawte mit a mukha leh a hihna uh thei a om leh, thiltung deih huailou a om ding venna a police kiang hiam, ahihkeileh KAYA President, Contact No. 8974-710-739 a thu­zak ding in ngetna bawl a, thu pesawntu’ hihna kep­bit hiding hi’n gen hi.

 

Thangboi Baite, Chairman, KACA in a gen­na ah, June 9, 2018 a thil­tung a Letkhogin Lhang­hal vuakliam ahih toh kisai a Koite Lui Area Youth Association (KAYA), Gen­eral Headquarter in mi vawte June 12, 2018 tan a kipekhe dia theihsakna bawl uh Koite Lui Area Chiefs’ Association in leng gum ahihdan gen hi. Hiai toh kisai a hun kipia sung a matkhiak hiam, kipekh­ia a om keileh Koite Lui Area Youth Association deihna bang a June 13, 2018 a pan lungkimlouh latsakna a kiphinna pat hiding leh highway tan­pha khaktan hithei ahihna ah, thiltung deihhuailou a om ding venna a mit a mukha hiam a omleh KAYA toh kithuzak hiam, ahihkeileh police station thuzak di’n ngen hi. Huai ban ah hiai bang thiltung deihhuailou a om nawn­louhna dia mipi kuapeuh in kithuahpih chiat ding inleng ngen hi.

 

 

Vengnuam South a ding Solar Street Light pia

LAMKA, June 11: Vengnuam South huamsung a zat ding V. Hangkhanlian, Minister (Agri., Vety & AH) Manipur in Solar Street Light a piakna tung ah Vengnuam South Village Authority in kipahthu gen uhi. Vengnuam South huamsung a zat ding in June 7, 2018 in Minister (Agri., Vety & AH) in Solar Street Light set 3 pia a, huaite zan, June 10 in Village Author­ity office ah Pastor K. Puamsuanthang, Local Pastor, EBCC Pethuel in thumna in laan hi.

 

 

Thoubal DLO meeting neih in om

THOUBAL JUNE 11: Deputy Commissioner, Thoubal Haobam Rosita Devi makaihna nuai ah tuni in DC office, con­ference hall, Thoubal ah meeting neih a om hi’n thusuak in taklang hi.

 

Meeting neih hun in NIC/Thoubal –te’n a etkai uh district wedsite toh kisai genkhawm in om a, website ah English leh Manipur script a, a kigleh thute ban ah June 26, 2018 chiang a GVT programme honkhiak ding thute genkhawm in om hi.

 

Deputy Commis­sioner, Thoubal concern officer-te kiang ah state government in thupiak a bawl sungzui a pending case omte leng June 19, 2018 ma ngei a sufel ding in ngetna leh theihsakna bawl ahihdan taklat in om hi.

 

T. Sanatomba Singh, Additional DIO/ NIC, Thoubal in PPP pansan a NIC/Thou­bal in activities-te hilh­chetna a neih ban ah Kh. Muhindro Singh, P.O., DRDA, Thoubal in GVT programme toh kisai a thu poimoh taklat tuak omte genna leng nei hi.

 

Hiai hun ah GTV concern officer, DLO-te leh district bank officer-te kihel uh hi’n thusuak in taklang hi.

 

 

Left out student 43 admission bawlsak ding

LAMKA, June 11: Tuni, June 11 sun dak 12 in C. Chingkhei Singh, ZEO/Ccpur makaih in ZEO/Ccpur nuai a DI of School-te’n meeting nei uhi. Hiai hun ah ZEO/Ccpur nuai a school-te a left out a om Class IX & X student 43 vel Go to Village Mission tungtawn a muhkhiak a omte June 15, 2018 tan a, a utna School-te ua free admission bawlsak ding uh thukim uhi. Hiai toh kisai a kisaipih DI of School-te’n enkai ding inleng mohpuakna pia uhi.

 

 

ZSP Special Assembly-cum-Fe­licitation programme om ding

LAMKA, June 11: Zou Sangnaupang Pawlpi (ZSP) General Headquarter in hong tung ding June 22, 2018 chiang in Chandel district sung a om Singtom vang­khuo ah ZSP Sohdu Block leh Kana Block te zintun­na in ZSP Special Assembly-cum-Felicitation & ZSP Foundation Trust Award Distribution 2018 nei ding uhi. Award hawm dingte ahileh:

 

A. BSEM & COHSEM:

1. (L) Rev. Doupu Memorial Award: Highest mark in cl-X MIL (Zou).

Citation + Rs. 3000

2. (L) Thangkhanlal Meritorious Award: Overall Topper in Cl-X.

Citation + Rs. 3000

3. (L) Vungkhoching Meritorious Award: Top 10 rank in Cl-X.

Citation + Rs. 3000

4. (L) Tongzapau Memorial Award: Highest mark in Cl-X. Mathematics.

Citation + Rs. 3000

5. (L) Dr. Michael H. Taithul Memorial Award: Highest mark in Cl-X English.

Citation + Rs. 3000

6. (L) Dr. Tongkhokai Memorial Award: Highest mark in Cl-X. Science.

Citation + Rs. 3000

7. (L) Haupu & Lalpu Memorial Award: Highest Mark in Cl-X. Social Science.

Citation + Rs. 3000

8. (L) Kapu Saipu Memorial Award: Highest mark in Cl-XII MIL (Zou).

Citation + Rs. 3000

9. (L) Suohzahau Meritorious Award: Overall Topper in Cl-XII.

Citation + Rs. 3000

10. (L) Thangzalang Meritorious Award: Top 25 rank holder in Cl-X & Cl-XII.

Citation + Rs.10,000

 

COHSEM-(Stream Wise)

11. (L) David K. Samte Meritorious Award: Highest Marks in Arts Stream

12. (L) Thangkhenkhup Meritorious Award: Highest Marks in Science Stream CBSE & Other Boards

13. (L) Elder T. Gougin Brilliant Award: Highest Marks in Commerce Stream

14. (L) Jem Douzakham Tungnung VCO/JCO Meritorious Award: All over topper in Cl-X. Citation + Rs. 3000

15. (L) Chiinniang Meritorious Award: All over topper in Cl-XII. Citation + Rs. 3000

 

Hiai hun zatna ah kum dang a kihawm ngeilou award thak (L) Ginlianmang Tungdim & (L) Khupza­kim Tungdim Merit-cum-Means Scholarship leng hawm hiding hi.

 

 

Tamenglong district in Hill Area Development Programme nuai ah Rs. 90 crore ngah ding

IMPHAL, JUNE 11: Manipur Chief Minister Biren Singh in, Noney (pre revised district de­lineation) tel in Tamen­glong district in addi­tional fund dan a Hill Area Development Pro­gramme (HADP) normal budget sang a sangzaw Rs. 90 crore a ngahna ding a, Topographical Need Based Budgeting (TNBB) pompih DoNER Ministry phat hi.

 

Ministry of Devel­opment of North East­ern Region (DoNER) in a bawlkhiak Composite District Infrastructure Index 2009 ah Tamen­glong district in North Eastern Region district 80te lak ah 75na luah hi. Hiai inde in, singtang leh phaizang bial a kikhenna mun State khenkhat Ma­nipur, Assam & Tripura a hill district-te toh teh a valley bialte a infrastruc­ture phazah kibatlouhdan taklat in nei hi. Hiai pro­gramme ahihleh kum nih sung- 2018-19 leh 2019- 20 sung in, kibulpatna dan in zatkhiak hi ding hi. Hiai kibulpatna Scheme in hill district a, a pumpi leh thilteng huamkhavek khantouhna a om ding tup-le-ngim in nei hi.

 

HADP in a tunkhak thilte ahihleh physical infrastructure khenkhat Multi- Purpose Com­munity Structures, water supply leh a dangdangte, scheme dang khatpeuh in a huamkhaklouhte, thil bawlkhiakna munpi lian taktakte toh kizopna ding lampi leh leite dopsang ding, sports ground-te dopsang ding, ngeina a sum nak khenkhat ching, gua, sekkhum, singtang­pa damdawite,malta leh a dangdang a hihtheihna omte pholhkhiakna ding a Tamenglong a Techno­logical Facilitation Cen­tres (TFC) khat phuhkh­iak ding leh eco-tourism hatsak sem ding ban ah a dangdangte leng tunkha hi.

 

 

Tedim Road nawltuak bawlhoih poimoh

LAMKA, June 11: Lamka khopi sung a lam­lian poimoh pen leh lun­pen Tedim Road nawl­tuak a tuilawng phumna ding tohsiat a omte bawl­hoihlouh a koih in omsek hi. Tua ziak in khophat chiang in lamlian nawl leh lamlian lai tanpha leivui in dim a, vuahzuk chiang in buannawi in dim zel hi. Huaiziak in Lamka khopi sung a lamlian tuamtuam bawl ahih toh kiton in, khopi sung a lamlian po­imoh pen Tedim Road leng lampi bawltuak nulla tan bawlsuak hithei leh chih deihthu mi tamtak a pan thutut kingah hi.

 

 

7th pay ngetna in cease work striken ni 81 chingta

IMPHAL, JUNE 11: 7th central pay scale zatkhiak ding ngetna a, AMTUC & AMGEO, Manipur ( Apex Body of Employees, Work­ers and Pensioners ) Joint Administrative Council makaih a state a semtute’n cease work strike aneih uh ni 81 lu­tpihta uhi.

 

Kiphinna sutzop­na in, tuni Seppatni in, Youth Affair and Sports & Forest Department a semtute’n Khuman Lam­pak Sports leh Sanjen­thong, Imphal East Dis­trict ah sit-in-protest nei uhi.

 

 

MUTA-te’n MU campus ah sit-in-protest nei

IMPHAL, JUNE 11: Manipur University Teachers’ Associa­tion (MUTA)-te’n administrative posts, regular registrar, examination control­ler, librarian lakna ding toh kisai ban ah Vice Chancellor Prof Aditya Prasad Pan­dey a dinmun a pan paihkhe ding a state government kiang ah ngetna a bawl uh pai zomzel in tuni in Manipur Unversity (MU) campus ah sit-in-protest nei uh hi’n thusuak in taklang hi.

 

Hiai bang kiphinna ahihleh a paisa May 31, 2018 a pat neih a ana omta hi a, hiai bang a kiphinna neih ahih ziak in BA stu­dent-te’n a laisimna uh sunzom theih nawn lou uh ahihna ah a kin theilam a ngaihtuah meng ding in ngetna leh theihsakna former MUTA president Ng Nimai in bawl hi.

 

 

NEWS TOMKIM

 

PLS in Press Conference nei ding

LAMKA, June 11: Paite Laipau Saipawl / Paite Literature Society (PLS) in zingchiang, June 12, 2018 sunung dak 1 in PLS Office, PTC-GHQ Office, Hiangtam Lamka ah Press Conference poimohtak nei ding uhi. Hiai hun ah maban a Paite Literary Festival 2018 ding toh kisai tel in thu poimoh tuamtuam gen ding uh hidan in Board of Directors, PLS a pan thutut kingah hi.

 

 

Panpihna ankuang lui ding

LAMKA, June 11: Pethuel Evangelical Baptist Convention Church, EBC Road, Vengnuam South in zingchiang June 12, 2018, sunnung dak 3 apan in Pethuel EBC Biakin ah Naupang Sunday School building project sepsuahna ding in Panpihna ankuang lui ding uhi. Hiai hun ah kuapeuh naupangte in awlmohna toh Panpihna Ankuang um sak chiat ding in chialna bawl uhi.

 

 

SUNNA:

Mangsuankhai Samte, Zoumunnuam, zan nitak in damlouhna ziakin si a, tuni mah in vuiliam in om hi. Amah ahihleh VDF a sem hi a, Tuining lam a hong kipan ahi. RIP.

Vanlalruaia(32) s/o Dam Za Gou, Champhai, tuni zinglam dak 5:30 in sungna in si a, tuni mah in vui in om hi. RIP.

Nekkhothang @ Palum (101) h/o Kangnu, B. Kalzang, tuni sunnung dak 12:30 vel ion si hi. RIP.

H. Nangkhanmuan @ Muana (46) s/o (L) H Phungtual, Jion Street, Central Lamka, tuni nitak lam in stroke ziakin si a, zingchiang in Lamka hanmual ah kivui ding hi. Amah ahihleh Pauchinlian @ PC nau ahi. RIP.

 

 

 

 

 

…more detail : here

 

 

 

 

RELATED

The Lamka Post | June 10, 2018

The Lamka Post | June 11, 2018

Read 488 times
Login to post comments