You are here: HomeNewsLamka PostThe Lamka Post | June 13, 2018

The Lamka Post | June 13, 2018

Written by  Published inLamka Post Wednesday, 13 June 2018 14:39
The Lamka Post | June 13, 2018

Trump-Kim meeting ah Kim in nuclear hihbei ding lem­sa; Trump in North Korea bitna piak hiding in chiam

SINGAPORE, June 12: North Korea makai Kim Jong Un leh United States President Donald Trump in tuni, Sepnawnni in Singapore ah khangthu a chiamtehtham ching kihouna nei ua, huai ah Kim Jong-Un in Korean Peninsula a nuclear gal­van beisiangsak ding lemsa ahihdan thusuak in taklang hi. Huai ban ah, US President Donald Trump inleng Democrat­ic People’s Republic of Korea (DPRK) a dia se­curity guarantee piak chi­am hi. Hiai hun a US leh North Korea makaite’n North Korea a lemna leh muanna ban ah vai­hawmna detdoutak om theihna a pankhawmna ding in thuchiam bawl uhi.

 

US leh North Korea makaite’n tuni a, a khat­veina leh masapen ding in Singapore a Sentosa Island ah kihouna nei uhi. Gam nih makaite’n kihouna a neih zoh ua US President Donald Trump in a genna ah, North Ko­rea makai Kim Jong Un toh a kihouna uh kua­mah in a lam-etphaklouh ding tan a hoih leh amah leh Kim in “very special bond” bawlkhia uh hidan in gen hi. Huai ban ah North Korea makai toh ka kihouna un mipi lungsim leh ngaihtuahna a zou mahmah ding a, mipite leng kipak mahmah ding leh khovel a thil lauhuai leh buaihuaitak om pen hoihtak a etkol hita ding ahi chi’n Trump in gen hi. North Korea makai Kim inleng “Khovel in kikhek­na thupitak muta ding ahi” chi hi.

 

Gam nih makaite ahihleh tuni zingkal in khangthu a chiam­tehtham ching ding in kichibai ua, huainung sun an a nek zoh un a kihouna hotel huang­sung uah vakkhawm uhi. Makai nihte ahihleh Trump’ bullet-proof lim­ousine, “The Beast” kichi ah tuangkhawm ua, bul­let proof sung seat nung ah Trump in banghiam khat Kim ensak in, tua zoh in walk sunzom uhi. US leh North Ko­rea makaite kal a tuni a kihouna om ahihleh thil lamdangtak hi a, tu kum bullam tan in gam nihte kal ah nuclear galvan zang a kivautuahna om in kidouna tanpha pi­angthei ding a patauhna liantak om hi.

 

US leh North Korea makaite’n tuni a ‘comre­hensive document’ kichi kilemna suai a kaih un a thutuun khenkhat hiai bang ahi.

 

United States leh DPRK in gam nih a pan mipite deihna bang a gam nihkal a lemna leh muanna ban ah khan­touhna om theihna dia US-DPRK relations thak bawlkhiak ding.

 

United States leh DPRK in Korean Penin­sula a hun sawttak daih ding vaihawmna detd­outak bawlkhiakna ding a panlakkhawm ding.

 

April 27, 2018 a Panmunjom Declara­tion a thak a pomkip in, DPRK in Korean Penin­sula a nuclear galvan bei­siangsak ahihna a pan a lak ding chih thukim uhi.

 

United States leh DPRK in POW/MIA tungtang ah tulel a thei­hchet a omte tel a, a dan­gte zonkhiak a, amaute kiksaknawnna ding a panlakkhawm ding chih kilemna bawl uhi.

 

Donald Trump leh Kim Jong-un in “com­prehensive document” a suai a kaih dungzui un North Korean makai Kim Jong Un in Korean Pen­insula a nuclear galvan beisiangsak ding ahih­dan gen hi. Gam nihte’n US-DPRK kizopna thak bawlkhiakna dia kilemna a bawl ban uah North Korea a vaihawmna detdoutak omna dia pan­lakkhawm ding chih leng thukim uhi. US Presi­dent Trump in DPRK a dia security guarantees piak ding chiam hi. Gam nih makaite kilemna toh kisai maban a sepzui leh sepsuah pah ahihtheihna ding in US Secretary of State Mike Pompeo leh North Korean official-te’n kihouna sunzom ding uhi.

 

Donald Trump leh Kim Jong-Un in “com­prehensive document” a suai a kaih zoh un mang­pha khakna in kichibai uhi. Gam nih makaite’n ahihleh tuni mah in Sin­gapore nuse ding uhi.

 

US leh North Ko­rea in kilemna suai a kaihzoh ua North Korea makai Kim in a genna ah, “Hun paisa pen paisa a pom ding ka thupuk ua, tu in maban ah khovel in kikhekna thupitak a muta ding” chi hi.

 

US President Don­ald Trump in thuthak­saite kiang a, a genna ah, North Korea denucle­arisation process kintak a pat hiding hi’n gen hi. Huai ban ah tuni a thil­tung pen US leh North Korea makaite’n ka ki­saktheihpih ban uah ka kipahpih mahmah uh chi hi. North Korea leh Ko­rean Peninsula toh US kizopna hun paisa toh teh a kilamdang mahmahta ding hidan inleng gen hi. Huai ban ah US President Trump in White House veh ding a Kim Jong Un chial hidan inleng thu­suak in taklang hi.

 

US leh North Korea makai tegel in minute 41 sung kihouna a neih zoh ua Donald Trump in a genna ah, Kim Jong Un toh kimaituah a kihouna a neih uh lohching leh hoih mahmah hidan a gen kawm in gam nihte kal a kizopna leh kilaw­mtakna hoihtak bawlkh­iak a om hidan in gen hi. Huai ban ah Kim Jong Un toh pangkhawm a buaina liantak om pen hihveng ding uh ahihdan genkawm in pangkhawm leh semkhawm a gam ni­hkal a kilemna omte en­kolkhawm ding uh hidan in gen hi.

 

North Korea’ makai Kim Jong-un leh US President Donald Trump in tuni, June 12 a Singa­pore, Sentosa Island sung Capella Hotel a kihouna a neih uh toh kisai a theih­tuak khenkhat hiai bang ahi.

 

US leh North Korea makaite kihouna mun ding ah US President Donald Trump sang in North Korea makai Kim Jong-un tung masa hi. Hiai toh kisai North Ko­rean media in a taklatna ah, North Korean taw­ndan ah, naupang zaw tun masak pen sang a upa zawte zahtak etsakna hidan in taklang hi. US President Donald Trump ahihleh summit kipatna ding second 60 in a sap­lai in kihouna mun ding tung hi.

 

US leh North Korea makaite ahihleh second 13 sung chibai in khut kilen ua, huai zoh in cam­eramen-te mah ah lim kila uhi.

 

Kim Jong Un in a thugen masak pen ahi­hleh “Nice to meet you, Mr President” chih hi a, Trump inleng huai dawn­na in, “Kizopna leh kilaw­mtakna thupitak nei ding i hi chih muanlahna ka neikei” chi hi. Tua zoh in Donald Trump in amau gel in kihouna a neihna ding mun uh library zuan in Kim paipih hi.

 

Kim in Trump ki­ang ah, hiai hun pen khovel pumpi’n en ding ahihman in science fic­tion movie bang a ngaih­tuah ding ua gingta ka hi chih Trump kiang ah gen hi. Huai ban ah kihouna tungtawn in kimuan­lahna leh gam nihkal a kitheihsiam louhna omte hihveng a om ban ah gam nihkal a lemna leh muan­na tunding a om ka lam-en chi’n Kim in Trump kiang ah gen hi.

 

US President Don­ald Trump ahihleh US Secretary of State Mike Pompeo, National Secu­rity Adviser John Bolton, John Kelly, White House Chief of Staff in kithu­ahpih ua, North Korea makai Kim Jong Un team-te lak ah military intelligence chief lui Kim Yong Chol, foreign minis­ter Ri Yong Ho leh Ri Su Yong, vice chairman of the ruling Workers’ Party chihte tel uhi.

 

US leh North Ko­rea makaite kal a tuni a kihouna om ahihleh kha bangzahhiam paisa et in hichibang thiltung om thei ding in lam-etna om­lou hi. Tuni a Trump leh Kim in kihouna a neih hun uah North Korea in­ternational relations, de­nuclearisation leh North Korea tung a internation­al sanctions bawl a om tungtang genkhawm uh hidan in thusuak in tak­lang hi.

 

 

Bungmual ah Niangzen Service Centre hongkhia

LAMKA, June 12: Thanlon MLA, Vungzagin Valte, Chairman, MTDC in a pianna nu phamta Niangzen theihgigena ding a Lamlian Veng, Bungmual, Tipaimukh Road a Niangzen Service Centre (NSC) a bawl uh district mipi phatuampih ding in tuni June 12 sun­ma dak 11 in honna leh Pathian min a latna om hi.

 

Hiai hun ah Pham­ta Pi Niangzen ngainatu tamtak paikhawm ua, Mahindra Company a pan official-te’n leng uap ua, Chinkhanmang Ngai­hte in hun zatna makaih hi. Rev S Vung Minthang, Gen Secy., EBC in Niang­zen Service Centre hon­gkhia in, Rev Dr Khen P Tombing, Chief Coordi­nator, PCI(R) in Pathian min in laan hi. Hiai hun zatna Ex- Minister Phun­gzathang Tonsing inleng uap hi.

 

Niangzen Service Centre hongkhiakna leh latna zoh in, Centre sung ah hunpi zatna om a, hiai hun ah Lalneihmawi w/o Vunza­gin in presentation hun la in, David Mangboi, Managing Director, NSC in Niangzen Service Centre a sem ding technician leh staff-te ban ah Mahindra Company a pan Kuldeep Baruah, Area Business Head, Mahindra First Choice, Guwahati leh Ramesh, Proprietor, Pranab Auto Mobile, Mahindra First Choice Any Car Service, Imphal-te mel­lahna nei in, company official-te a pan Kuldeep Baruah, Area Business Head, Mahindra First Choice, Guwahati in Mahindra company toh kisai gen a, hun tawp ah Pastor G Sanglian, EBCC Bungmual in thumna in hunkhak hi.

 

Hiai hun ah Lalneihmawi in Phamta Niangzen min mangmohna ding leh theihgigena dia service center bawl a om leh hiai centre ahihleh sum­met bawlna ding hilou a, district sung a sepna neiloute a dia sepna muhna, innkuan vakna a panpihtu ahih ding tupna toh patkhiak a om ahihdan gen hi.

 

Niangzen Service Centre hongkh­iakna zoh in, Phamta Niangzen theihgi­gena hun zat in om hi. David Mangboi, Managing Director, NSC in gari lam toh kisai a buaina neite’n Imphal naih ngailou a, Lamka khopi sung mah a bawltheihta ding ahihdan gen a, hiai centre ah Company chituamtuam 12, Toyota, Maruti Suzuki, Honda, Hyun­dai, Mahindra, Mitsubishi, GM (General Motors), Daewoo, Volkswagen, Ford, Fiat leh Skoda kikhaikhawm hi’n gen hi. Hiai centre in Mahindra leh Maruti kia hilou gari dangdang leng bawl ding a, machine leh vanzat chituamtuam tuahzoh ahih hunhun a service pat hid­ing ahihdan gen hi.

 

Kuldeep Baruah, Area Business Head, Mahindra First Choice, Guwa­hati in Mahindra Company in India gamsung mun tamtak ah service centre hongkheta a, tulel in India gamsung ah gari toh kisai in Mahindra in thumna luah a, maban ah nihna tan tungthei­hna dia Mahindra Company in panla lel ahihdan gen hi.

 

Tuni zingkal dak 8 in YPA Han­mual, New Lamka ah Pi Niangzen thei­hgigena hansuang honna om a, huai hun ah Pastor D Kamchinmang, Local Pastor, EBCC Dorcas Veng in hansuang hong in laan hi.  

 

 

KIC in Neihsial Veng a Vai­phei biakinn a khaksak tungtang ah VPC lungkimlou

LAMKA, June 12: Kuki Inpi Ccpur (KIC) in Neihsial Veng a Vaiphei biakinn (church) khat a khaksak uh toh kisai Vaiphei People’s Council (VPC) Lamka Block in hun bangtanhiam a etkhiaknung in hiai bang in thu­suah bawl uhi.

 

KIC in letter vide No. 16/GJB/KIC/2018 tung­tawn a Neihsial Veng a Vaiphei community-te biakna mun a khaksak uh thildik hilou leh pomtheih hilou hi’n taklang hi. Pawlpi khat peuh in biakna toh kisai a kihihbuai pen a khengval a gamtatna ahihban ah Indian Constitution a Fundamental Rights (Right to Freedom of Religion) bohsiatna hi­dan inleng VPC Lamka Block in taklang hi.

 

KIC in hiai toh kisai a June 7, 2018 a VPC Lamka Block primary member S.L. Hena of Neih­sial Veng sapna bawl a, June 14, 2018 tan a, a kilat keileh a khonunggu thuakthei hidan a vauna bawl uh pomtheih thil hilou hi’n taklang hi. Sahkhua leh gindan toh kisai a KIC hiai bang a, a kigolh pen VPC Lamka Block in ngaikhawk mahmah hidan inleng taklang hi.

 

S.L. Hena in hiai toh kisai FIR a bawl dungzui a District Administration leh dan enkoltute’n S.L. Hena bitna ding a, a bai­htheipen a panla ding in ngen uhi. Huai ban ah hiai toh kisai a thil deihhuailou tung a om leh KIC mohna hiding hi’n leng taklang uhi.

 

Hiai thu mipi lak a taklat ahihnung a thiltung deihhuailou a om leh VPC Lamka Block dai maimailou ding hidan inleng tak­lang hi.  

 

 

NRI tamtak in Manipur state pan­pih nuam ahi: Manipur Governor

IMPHAL, JUNE 12: United States of America a vazin Manipur Governor Dr Najma Heptulla in tuni a, a gendan in Non-Resident Indian (NRI) tamtak in Ma­nipur state khantouhna ding toh kisai a kithuahpihna leh panpihna pe nuam uh ahi chi’n gen hi. Manipur Governor ahihleh May kha a pan Manipur state nusia a United States of America a zin ahi hi. Hiai toh kisai ahihleh tuni a press conference neih ahih hun a Mani­pur Governor Dr Najma Heptulla in a gen ahi hi.

 

Governor in a gendan in America a phak sung in NRS mi tamtak toh kihouna vaneikha ka hi chi a, huai hun in Manipur gam hoih dan leh tourist spot ding a leng sit huailou ahihna ah hoihtak a puahphat a, gam­dangte a ding a etnop thil omte phoulak ding a lungulh thugen hi. Hiai ding a leng panpihna pe nuam mi tam­tak om uh ahi chi’n gen behlap hi.

 

Aman a genzelna ah Mumbai a pan business community khat in Manipur state sung hongpha nuam uh ahihdan gen a, amaute’n tunung sawtlou chik a state sung hongphak ngei uh lam-et ahi chi hi.

 

Huai ban ah tumalam a Rashtrapati Bhavan, New Delhi a Governor conference neih ahih hun a leng Manipur state sung a eduction, agriculture leh a dangdangte a, panlakna state government in a neihte ka genna ah, Manipur state ahihleh a biktak in agricul­ture lam toh kisai ah amah leh mah a kitoudelh zou leh muantham ahihdante hon genpih uh ahi chi’n gen hi.

 

Education lam toh kisai a gendan in tu-le-tu in Manipur state in university thum nei a, huaite phuah­phat ngai ahihna ah fund in daihlou ahihdan ka gen ka chi a, phualpi solkar panpihna a om thei bangbang pe ding a leng ngetna bawl ahihdan taklang hi.

 

 

Breaking News

NH-37 ah menchim ziak in metre 50 val lamlian tuang tolhkhia

LAMKA, June 12: Tuni, June 12 nitak daklam 6 vel in Sinam kho kiang Imphal-Jiribam Road, NH-37 ah metre 50 val a sau lamlian menchim ziak in tolhkhia hi. Hiai menchim ziak in NH-37 ah gari a kikawm­tuahna teng khawl hi. Menchim ziak a lamlian tolhkhia pen bawlthak ahihna ding in a tompen inleng ni 2/3 lut ding hi. Zan a pan vuahzu ziak in Manipur state sung mun tuamtuam ah menchim leh leitolh ziak in kikawmtuahna lamlian khenkhat khaktan in om hi.

 

 

Police-te’n zu mankhia

LAMKA, June 12: Ccpur District Police in khamtheih guihtheih dou­dalna paipih zomzel in tuni, June 12 in Lamka khopi sung a dawr tuamtuam a dapkualna uah, zu hunkhop mankhia in, media-te mai ah susia/bua uhi.

 

Tuni sunnung dak 4 lak vel in, AJ Khongsai, MPS, SDPO/Thanlon, Ng A Suresh, OC Police Sta­tion leh Inspector Chiin­neilam, Women Police makaih team khat in Zenhang Bazar a dawr tuamtuam a dapkualna uah zu hunkhop mankhia uhi. Matkhiak a omte ahihleh DIC Liquor Liter 50, Canned Beer/Bottle 7, IMFL/Rum half bottle, OC Blue half bottle leh Grape Wine bottle 2 hi a, matkhiak a om zute mun thoveng ah thuthaksaite muh in bua uhi.

 

 

PLS in Press Conference nei; July 5 & 6 sung Paite Literary Festival om ding

LAMKA, June 12: Paite Laipau Saipawl / Paite Literature Society (PLS) in tuni, June 12 sunnung dak 1:45 in a of­fice uh, Hiangtam Lamka ah press conference nei in MIL (Paite) toh kisai hil­hchetna leh dawnna ban ah Paite Literary Festival 2018 ding toh kisai pu­lakna nei uhi.

 

Dr. Tualchin Nei­hsial, Chairman, PLS in hiai hun ah MIL (Paite) a mark piak dan toh ki­sai social media a gen-le-sak om vengvung toh kisai hilhchian hi. Board of Secondary Education Manipur nuai ah Modern Indian Languages (MIL) khat dia 1988 kum a Class IX a tawitheih dia Paite subject phalna pia hi’n gen hi. Huai toh kiton in 1990 kum in Tawngzang Chongloi (Thadou/Kuki) in MIL (Paite) ah top­per hihna la a, 1991 in K. Thiausuanlian, 1992 in Robert T. Siamlian, 1993 in Khamkhansuan, 1994 in Samuel Nunthuk, 1995 in Thiangbiaksang leh a naipen 2018 in Juliana Lamhauching (Simte) topper a pang hi’n gen hi.

 

Hiai toh kisai board a examiner pen confiden­tial ahih dungzui a PLS in kuan bangchibang a mark pia hiam chih thei­hpihlou ahihdan gen hi. Paite hilou midang in MIL (Paite) hon lakpih uh kipahpih luat ding hinapi a, namdangte lak a leng om ngeilou, Paite pau zang mi khenkhat lak a phunchiakna hong om in, abul-abal omloupi leh dikloutak a PLS suk­minsiat kia hilou a, mipi lampi diklou a piisawm a om ziak in hiaibang thu social media a taklangte PLS in mohpaihna sangpen a mohpaih uh ahihdan gen hi.

 

Paite MIL a kitawi tung in Thadou-Kuki, Vaiphei, Zou, Simte, Gangte, Kom leh a dangdang in hon koppih/tawipih uh ahihman in Paite MIL tawi 1000 lak vel himahleh Thadou-Kuki, Vaiphei, Zou, Simte, Gangte leh Kom in amau pau a MIL hon neih ciang un Paite MIL tawitu hong kiam ban ah St. Paul’s Institute leh Rayburn High School in New Delhi a Central Board a hon zop ua kipan Paite MIL latu naupang a a za a sim a kiam hi’n gen hi. Huaite behlap in, Paite MIL lak sang in Alternative English lak zawk ding chi bang leng om a, himahleh BSEM nuai ah Paite MIL exam a nuai a bang in kitatsatlou a omtou den hi’n gen hi. Huaite ahihleh 2010 in 643; 2011 in 658; 2012 in 621; 2013 in 688; 2014 in 634; 2015 in 616; 2016 in 654; 2017 in 634 leh 2018 in 624 om hi’n gen hi.

 

Rev. H. Nengzachin in “Paite leh Tedim mite’n laigelh dan kibang neih ding ahi” chih thupi zang a thusun a bawl a genna leh a gelhna ah, “Hiaite ngaihtuahna ziak in Japan Gaal in Haugo kiang ah lai khat ka na khak a, aman tunai in a hon dawng panlel hi” a chih toh kisai October 2 leh 30, 1982 leh November 1, 1982 a PNC in Paite nam uap, pawl tuamtuam YPA, SSPP, PLS, Saptuam heutulian leh namsung a laisiam leh dottham chingte samkhawm a Hiangtam Lamka a YPA-GHQ Hall a ni 3 sung kikup khawmna om hi’n gen hi. Huai hun a paikhawm heutute’n thupukna dungzui in “Paite pau zang, India a omte leh Burma a unau Zomite toh laigelh dan kibang neih ahih theihna dia common alphabet ding tungtang toh kisai PLS in Chin Hills a om, Zomite toh kithuah a thukimna bangbang hon bawlkhiak dia lemsakna bawl uh hi’n gen hi.

 

Kum khat sung hiai thupukna diah ahihsung PNC Headquarter a General Secretary, D. Valte in PLS President kiang a November 22, 1982 a thupukna lak a omsa semkhe dia PLS khut a mohpuakna leh inntekna pekhia ahihdan gen hi. Huai dungzui in Octo­ber 14 leh 15, 1983 a YPA Hall, Hiang­tam Lamka a Joint Meeting neih a om ahihdan gen in thupuknate simkhia hi.

 

March 27, 1984 a Moreh a ZCLS leh PLS in Joint Meeting nei a Paite nam thupuknate leh sawl a om bang ua thupukna 3 bawl a om in, “Moreh Resolution” chih a om hi’n gen hi. Huai in laimal zatdan a Roman Alphabet 26 zat a, a lamdan Vowel teng eilam ging dan leh zat dan a lam ding leh conso­nant “C” pen “Cha” leh “G” pen “Ga” hihsak a, Vowel a “O” tulai a i zat dan “O” leh “OU” kal a ginsak hileh chih thukim a om ahihdan gen hi.

 

School/College textbook i chihte utut kitawi leh kizang thei hi mawklou in, Central ah NCERT, State ah SCERT in kum bangzahhiam dan in curricu­lum leh syllabus ding hon bawlkhiakte uh toh kituak a kigelh thak leh kibawl thak zel in approval kibawl zel hi’n gen hi. Nidanglai hunlai in (Laisiangthou leh Labu ettheihna ding ngiimna) in ki­zang in phatuam mahmah a, himahleh tulai a i laigelh dan leh laimalte pen High School/College subject leh a dangdang gelh/bawlna dia kizang ahih­man in nidanglai ate pen tulai a school/ college-te a kizang theinawnlou hi’n gen hi. Laisiangthou in a gen Pathian’ thute kikhek theilou, kibehlap theilou leh kilakhen theilou leh dik gige chih­dan toh pau leh laigelh dan pen kibang theilou hi’n leng gen hi.

 

Lalthanglhun Guite, Vice Chair­man in hiai hun ah Paite Literary Fes­tival/Paite Laipau Sawngpi 2018 zatna ding toh kisai gen hi. Aman a genna ah, July 5 leh 6, 2018 sung Lalpuith­luaii Foundation School, Bungmual ah Paite Literary Festival zat hiding a, huai a Convener dia Pauzagin Tonsing seh ahihban ah mohpuakna tuamtuam guankhit a omta hi’n gen hi.

 

Hiai hun ah lai gelh dan kia hilou in, tualsuak thilte lahkhiak ahih ding ban ah Workshop, Tangthu genna, Po­etry Slam Competition leh a dangdang neih hiding a, eipau a kibawl Classic Paite Movies leng lahkhiak hiding hi’n gen gen hi.

 

Convener, Pauzagin Tonsing in Paite Literary Fest hun ah Book Exhibi­tion, Traditional Musical Instrument lahna, Costume Display, Food Stalls, Art Exhibition, Pole Climbing, Weaving and Handloom, Naangphan, Mauten leh a dangdang lahkhiak hiding hi’n gen a, nitak hun leng om in, nitak masapen Traditional Dress a kizem chiat ding leh a nitak nihna pen bel Modified traditional dress hiding a, hiai kicheidan et a kilawmpen kiang a kipahman piak hiding hi’n gen hi.

 

 

‘1st Nurses Confluence 2018’ zang

LAMKA, June 12: Ccpur District sung a om, District Hos­pital leh Private Institution tuamtuam toh Delhi leh Shillong pansan Nursing Officer in tuni, June 12 sunma dak 11:30 in “Be a Blessing to Others” chih thupi zang in GNM School of Nursing Audi­torium ah a khatveina “Nurses Conflu­ence 2018” kichi zang uhi.

 

Rev. Letlal Haokip, TJC in thum­na in hun pan a, Lamka pansan Nursing Officer-te’n sepna toh kisai a haksatna a tuah uh leh a nasepna tungtawn ua a kipahna uh toh kisai genna om in, Delhi leh Shillong pansan Nursing Officer-te a pan thugenna om hi.

 

Paukhankhup Guite, Tunnu School of Nursing makaih in Open Dis­cussion om a, Elder V. Nunlian in phat­khawmna hun makaih in, Goihzachin, Principal, GNM School of Nursing in Vision Sharing hun makaih hi. Rev. V. Nenglian, DS/EBC Lamka South Divi­sion in Nursing Officer-te a di’n han­thawnna thugen a, Rev. S. Kaikhan­mang in amaute’ a di’n thumsak hi.

 

Dr. Vumchinpau Tonsing, MS, District Hospital, Ccpur in Nursing Of­ficer-te a dia vaikhakna thugen a, Elder H. Kam Suanthang, New Delhi in kip­ahthu gen in hunkhak hi.

 

Hiai hun ahihleh mun tuamtu­am a sem, Nursing Officer-te kia hilou in, saptuam makaite toh leng kithuah khawmna hun a zat hi a, Tunnu School of Nursing leh District Hospital, Ccpur kithuahpihna toh awlmohna nei mi bangzahhiam in damlou kepna toh kisai a Nursing Officer-te’n Pathian’ nasepna bang a kipumpiak a, hoihsem leh khat-le-khat kihanthawntuahna ding ngimna a, a sai uh ahi.

 

 

KSO Henglep Block makaih in Henglep bialsung veh

LAMKA, June 12: John Thanglal, Presi­dent, KSO Henglep Block leh a cabinet khenkhat makaih in reporter bang­zahhiam in Henglep Sub- Division sung etkhiakna nei uhi. Henglep ah kho­sung a government a pan fund tuamtuam zang a kibawlte enkhia ua, NEC fund a mini-stadium bawl a om, mohori/caretaker in Henglep khosung a kibawl lak a quality hoih­pen hidan in gen mahleh sub-standard mahmah leh lungtun huailou hi’n mukhia ua, leingoi kizang sawp ahihlouh ziak in khoihmai in leng plaster kibawlte ke khia hi.

 

A gei a om Govt High School ah kuamah school kai omkei mahleh teacher guai a sepna mun a omlou semtu a tam ziak a school a kai, naupang 300 vel dingte hilhtu ding teacher tasam mahmah uh ahihdan khosung mite’n gen uhi.

 

Huai ban ah Heng­lep Police Station build­ing luahlouh a om ahih­dan mukhia a, luah ahih hun a Police constable khat leh VDF 3 om uh hi’n khosung mite’n gen ua, khenkhat in bel po­lice-te’n sep ding a nei­hlouh ziak ua rotation a om uh hi’n gen uhi.

 

Henglep PHC a etkhiak hun uah build­ing luahlouh a om in huangvulh-ganta in omna a zang uh ahihdan mukhia ua, building a room tamzaw innsung van koihna a zat in om a, room khat bel damdawi koihna a kizang muh ding om hi.

 

Damdawi koih a omte KSO-te’n a ette lak ua, damdawi a tamzaw hun beisa himahleh hiai dinmun ah bel kuamah hiai damdawite nek­sak ahih ding uh gintak huailou hi.

 

KSO makaih media team in Henglep bial a etkhiak uh a diklou zong­khe ding chihna hilou a, bawldik theih om ding hiam chihna hizaw hi’n KSO makaite’n gen uhi.

 

Lamlian ahihleh Zero Point, S. Kolhen a pan Henglep kikal ki­lometer 32, Thingkeu- Henglep Road chih a om hi a, hiai lampi ahihleh a tawnte’n luangphal zen a, a tot uh ngai hi.

 

KSO team-te’n a muhkhiak uh ahihleh Rs. 7 lakh bei a N. Saikot a kibawl, waiting shed hi a, feet 10 a sau, feet 5 a lian, a tung langva leh khuam 4 nei hi a, KSO in chihlouh khosungmi kuamah diktak a bawl dia pau omlou in, hiai in sub-division tuantual dan langsak hi. Lamlian thak kibawl, passenger pua bus lut dia gintak­na omlouh ziak hiding hiam chihtheih khop a ken a bawl hi a, Moldak leh Kolhen kikal bawlna pailel ah blacktopping teng vuahtui in khoh­khia in lei dawkta hi.

 

Hiai toh kisai KSO in thuneite’ kiang ah lamlian bawlna khawl­san a, lamlian lui pen puahthak ding in ngen ua, huai hileh sub-di­vision sung a teng mi 30,000 val in hamphat­pih zaw ding uh hi’n gen uhi. Khosung mi Kham­lianmang in KSO in me­dia team-te tonpih a, government paidan toh kisai thil paidan etkh­iakna a neih uh kipahpih ahihdan gen a, Henglep a om 25 Assam Rifle chihlouh bubit a mahni office luah a omlouh ziak a mipi’n haksatna a tuah hun ua Assam Rifle chihlouh panpihtu ding neilou uh ahihdan KSO team-te theisak hi.

 

 

CDPSA in District Topper & School Toppers Award Distribution nei

LAMKA, June 12: Ccpur District Private Schools’ Assn (CDPSA) in tuni, June 12 sunnung dak 2 in Synod Hall, IB Road, Lamka ah Dis­trict Topper & School Toppers Award Distribution 2018 nei uhi. Hiai hun ah CDPSA member-te ban ah award sang ding student leh nu-le-pate paikhawm ua, Miss Jenice Tombing, Headmistress, Dainty Daffadils in hun zatna makaih a, Vanlallen Haokip, Principal, Salt Brook School in thumna in hun pan hi.

 

Doutong Haokip, President, CDP­SA in vaidawnna thugen a, Kimbiaksang, Headmistress, SSPP Residential School makaih in District Topper & School Top­pers Award Distribution 2018 hawmkh­iakna ban ah CDPSA member teng kiang ah Membership Certificate piakkhiakna om hi. Father Kholi Emmanuel, Princi­pal, Don Bosco Hr Sec School in award sang student-te a ding in thumsak a, huntawp ah Robin S Pukhram, Secre­tary, CDPSA in report tomkim pia in, T Chinsuanthang, Principal, Savior’s Pub­lic School in thumna in hunkhak hi.

 

CDPSA in tuni a District Topper & School Toppers Award Distribution 2018 a hawmkhiakna hun ah 60 per­cent tunglam mu Board of Secondary Education Manipur nuai a Class X ah student 33, Central Board of Secondary Education CBSE nuai a Class X ah stu­dent 2, Class XII ah 2 ban ah Council of Higher Secondary Education Manipur nuai ah Class XII Arts ah student 5 leh Science ah student 3 hi uhi.

 

Amaute kiang ah CDPSA in kip­ahpihna in Oxford Advanced Learners Dictionary leh certificate pia ua, Than­glenlal Haokip, Class X of Salt Brook School in percent 90.17 mu in, District Topper Award in Oxford Advanced Learners Dictionary, Certificate leh Rs. 10,000 sang hi. Tulel in CDPSA nuai ah School/Member 60 val om a, Zone 4, North Zone, Central Zone, South Zone leh East Zone in kikhen uhi.

 

 

Pherzawl Forest Divion in singnou hawm ding

LAMKA, June 12: Pherzawl Divisional For­est Officer T. Thangchin­lian in zan a thusuah a bawlna ah hong tung ding VANAMAHOT­SAVA zatna toh kiton in Pherzawl Forest Deptt in singnou hawm ding hi. Hiai singnou ahihleh mi­mal, organizations, Govt office, bank, schools & institutions, churches, security personnel leh a dangdangte’n ngetna kibawl form pansan in nget theih ding hi.

 

Singnou omna mun dingte ahihleh, Than­lon Range Office, Than­lon ah, Parbung Range office, Pherzawl ah leh Tipaimukh Beat office, Tipaimukh khua ah 6th July 2018 apan singnoute a bei masiah lak theih ding hi’n thusuak in taklang hi.

 

 

RCH register toh kisai training nei

LAMKA, June 12: Reproductive Child Health (RCH) reg­ister toh kisai in tuni, June 12 sunma dak 10 a pan in CMO Mini Conference Hall, CMO Complex ah training om hi. Hiai hun ah Town Area a pan ASHA Worker-te kihel ua, Seiboi Mate, DDM/ NHM leh Vung Mary, DCM/NHM in naupang kapna toh kisai a Routine Im­munization toh kisai in sinsak uhi.

 

Seiboi in report form gelhlut ding dan toh kisai sinsak a, Mary in ASHA-te mohpuak toh kisai sinsak in, nu khenkhat in kikap ding lauhthawng ziak a naupang a hunhun a kapsaklou tamtak om a, huaite zongkhia a, amau area a nurse-te hong pai hun ua kap­sak ding leh District Immunization Office (DIO) a chiklaipeuh a, office kai hunsung a kapsaktheih ahihdan thei­hsak ding ASHA-te mohpuak ahihdan sinsak hi.

 

 

Workshop on German, Korean & Other Foreign Languages om ding

LAMKA, June 12: Siamsinpawlpi (SSPP) Joint Headquarters, Lamka leh Geothe Insti­tute/Max Mueller Bha­wan, Kolkata saina in hongtung ding June 20, 2018 sunma dak 10 a pan in Rayburn College Audi­torium, New Lamka ah ‘One Day Workshop on German, Korean & Other Foreign Languages’ kichi om ding hi.

 

Hiai hun ah Anita Mitra, Education Cor­poration Officer, Geothe Institute / Max Mueller Bhawan, Kolkatta; Mercy Vungthianmuang Guite, Asst Professor, Centre of German Studies, School of Language, Literatire & Cultural Studies, Jawa­haral University, Delhi leh Vungsuanlal Kullai, Instructor (Asst Profes­sor), Department of For­eign Language (Korean), Manipur University in sinsak ding uhi.

 

Hiai hun ah school/ college tuamtuam a pan student-te ban ah sinsak­tute tel ding ua, tu kum a Class X leh XII pass-te leng hiai hun a telchiat ding in SSPP-JHQ, Lam­ka in chialna bawl hi.

 

 

ATWU in zan khovak thumna nei

LAMKA, June 12: All Tribal Women Union (ATWU) General Head­quarter in Christmas ma a dia a tawpna ding in zan, June 11 nitak in Jehovah Jire Home, Beulahlane ah zan khovak in thum­khawmna nei uhi. ATWU in ahihleh gamsung a muanna, bitna, sualgal douna ban ah Pathian in gamsung a vai a hawm ding deihna a zan khovak a thumkhawmna a neih uh ahi. Hiai hun ah leng­khawm in gennop neite’n a pan thugenna om ban ah a vangkim in Pathian buan in thumkhawmna nei uhi.

 

ATWU ahihleh Bill 3 ziak a singtangmi 9 in sihna a tuah ua kipan dinkhiak a om hi a, Feb­ruary 8, 2016 a pan Lam­ka Damdawi Inn Morgue gei ah thumkhawmna neipan ua, Salphate’ lu­ang vui ding thu a kigen toh kiton in May 17, 2017 in District Morgue a pan Jehovah Jire Home, Beu­lahlane ah kisuan uhi.

 

 

CM Biren makaih Committee in Start-Up project applicant-te enchian

IMPHAL, JUNE 12: Start-Up scheme nuai a hamphatna ngah dingte telkhiakna ding toh kisai in, tuni Sepnawnni in Chief Minister N. Biren Singh makaih high level com­mittee in Chief Minister’s Secretariat ah siangthoutak in, shortlist applicants/ entrepreneur-te’n a piak uh project pro­posal-te enchian uhi.

 

Committee member CAF & PD and Revenue Minister Karam Shyam, Ma­nipur Legislative Assembly Deputy Speaker K. Robindro, Manipur Infra­structure Development Agency (MIDA) Vice-Chairman leh MLA O. Lukhoi, MLA H. Dingo, L. Susindro, Th. Saty­abrata leh L. Rameshwor, Administra­tive Secretaries leh a kisaipih Heads of Department-te ma a, Power Point pre­sentation tungtawn a, a proposal-te uh gen leh lahkhiakna ding in, shortist a om applicants/entrepreneur chihte ki­ang ah minute 3 sung zel hun piak in om uhi.

 

Amaute thugen leh thil lahkhiakte’n a thil sawm uh Start-Up project –te tup-le-ngim ahihkeileh ngaihdante, mun leh mual, sum poimoh zah ding, nasep dingdan, summuh dingdan, sepna bawlkhiak dingdan, annual income leh a dangdangte mitsuan pen in nei uhi.

 

N. Biren in a gendan in, self em­ployment leh entrepreneurship hat­sak semna ding a State a lasiam leh nasep kuhkal tuailaite kiang a pan­pihna sum piakna ding in, Start-Up scheme bawlkhiak in om chi’n gen hi. Hiai scheme a ding in Rs. 35 crore leng bikhiah a om khin hidan in gen hi. Ma­nipur in chitna hoihtak leh fel taktak mi tamtak nei a, himahleh hun lemtang leh nungthuap ding taksapna liantakte ziak in, mipil leh siamte khahsuah tawm­tawm chi’n gen hi.

 

Tuni a assessment session sung a ngaihdan thak tamtak a muhte lung­tunhuai a sakdan gen kawm a, Chief Minister in a gendan in, State kituahpih ding leh hamphatpih ding ban ah, sepna tamtheipen bawlkhethei ding propos­als/project-te deihsakna piak hi ding uh chi’n gen hi.

 

Start-Up scheme a ding in, online registration tungtawn a vek in ngetna 700 ngah in om chi’n Biren in gen hi. Tuni zinglam dak 9 a kipan nitaklam dak 4 tan a, assessment session neihna hun ah entrepreneur 30 valte’n Power­Point presentation bawl uh chi’n gen hi.

 

 

Mizoram cabinet in SHC Bill pompih; Citizenship Bill dalna sunzom zel ding

AIZAWL, JUNE 12: Mizoram cabinet in, tuni Sepnawnni in Sinlung Hills Council Bill pompih hi. Sin­lung Hills Council (SHC) bawlna ahihleh April 2, 2018 a Mizoram State government leh Hmar People’s Convention (Democrat­ic) kal a peace accord suaikaihna gah ahi.

 

Tuni a Chief Minister Lal Than­hawla makaih cabinet meeting in a taklatna ah, SHC Bill pass ahihtheihna ding in June 27 in special assembly ses­sion sap hi ding hi. Kihouna tuamtuam a neih khit nung un, Mizoram a Hmar political buaina a kuapeuh pompihtheih solution zonkhiakna ding in, April 2, 2018 in Mizoram Government leh HPC(D)-te’n kilemna suaikai uhi.

 

Kilemna dungzui in, Sinlung Hills Development Council (SHDC) omsa tung ah thuneihna tamzaw piak in om a, Council min leng Sinlung Hills Coun­cil chi’n khekkhiak in om hi. Thusawm Council in nominated member nih tel in member 14 nei ding a, Chief Executive Member (CEM) khat in makaih ding hi.

 

April 13, 2018 a Aizawl kiang a Ses­awng mun a “home coming ceremony” nei­hna hun ah, group chairman H. Zosangbera tel in HPC (D) cadre 102 leh makai (council member) 12 te’n Mizoram State Govern­ment ma ah, a galvante uh pekhia uhi.

 

Tuni a cabinet meeting in, Citizen­ship (Amendment) Bill 2016 dalna reso­lution khat leng pass in state assembly session nawn chiang a, Citizenship Bill dalna resolution pass ding inleng thu­puk uhi.

 

Chief minister Lal Thanhawla in a gendan in, State government in Citizenship Bill naktak in dal a, Union Home minister, Rajnath Singh kiang ah leng Mizoram gov­ernment in Bill deihlou ahihdan theisakna laithon leng khak khin chi’n gen hi.

 

State cabinet in police leh depart­ment dangte kiang ah, tulel a vuahzu nasatak ziak a state sung mun tuamtu­am a menchim leh tuilian omte bildoh ding inleng theisak hi.

 

 

Director in kiging khawlsa a om di’n theisak

LAMKA, June 12: Indian Meteorological Department, Government of India in tulai a vuahzu June 15 tan tamlam manoh zel ding ahihdan Manipur government a theihsak dungzui in Director, Relief & Disaster Management, Govt of Manipur in deputy commissioner teng kiang ah kiging khawlsa a om ding in tuni’n theihsak hi.

 

 

HPC-D in khamtheih zuaktu leh No. 4 mankhia

LAMKA, June 12: Anti Drugs Cell, HPC-D in June 9, 2018 in khamtheih zuaktu a pan khamtheih No. 4 hunkhop mankhia uhi. Thutut kingah dan in, HPC-D Anti Drugs Cell in Eden Thar, Rengkai ah khamtheih zuaklai Thangneilien s/o Lalremmawi mankhia in amah a pan Heroin No. 4 tuun 26 mankhia ua, khamtheih zuak tawpsan dia thuhilhna hoihtak a neih zoh un khahkhia uhi. Josh Hmar, Town Commander, HPC-D in khamtheih khamna toh kisai maban a leng khauhtak a etkaitouh hiding hi’n thusuah bawl hi.

 

 

 

 

 

 

 

…more detail : here

Read 400 times
Login to post comments