You are here: HomeNewsLamka PostThe Lamka Post | June 14, 2018

The Lamka Post | June 14, 2018

Written by  Published inLamka Post Thursday, 14 June 2018 13:19
The Lamka Post | June 14, 2018

CM leh WR Minister-te’n protection wall kisiate bawlhoihna enkhia

IMPHAL,JUNE 13: Chief Minister N. Biren Singh leh Water Resources Minister Letpao Haokip-te’n tuni Nilaini in, a tuamtuak in New Checkon, Imphal East District a Imphal River pang kisia bawlhoihna va en­kai uhi.

 

N. Biren in thuthaksaite kiang a, a gendan in, valley district sung mun tuamtuam a tuilet dalna kisia tengteng a baihtheilam a bawlhoihna ding in Govern­ment in panlak theihna chiteng a panla hi’n gen hi. Chief Minister in State leh Central forces personnel-te kiang ah zingtung a kipan nasem tualsung mite pan­pih ding in theisak hi. New Checkon area a protection wall kisia in, Imphal khopi sung veng tamtak ah tuil­ian tungsak chi’n gen hi. Zingtung a kipan in, a kisai­pih official-te leh lakthak a om police personnel-te’n tuilet dalna kisiatna mun bawlhoih sawm in panla ua, zohsiang ahih masiah khawllou in nasem ding uh chi’n CM Biren in gen hi.

 

N. Biren in a gendan in, tutung in tuilian hat mahmah a, valley district tamzawte buaisak vek a, a paisa ni 3 sung a State a vuah nasatak a zukziak in, menchim in NH-37 (Imphal-Jiribam road) leng khak­tan hi’n gen hi.

 

Chief Minister in a gendan in, National Highway leh Infra­structure Development Corporation Limited (NHIDCL) official-te thuzak khin a, a bai­htheipen a ngeina bang a gari a tai nawn theihna ding in, road diversions bawl ding in theisak hi. Ngeina a vangsiatna thil­tung thuak mipite kiang ah, thilnuamloutak omte thuak hamham ding in ngen a, tutan a mun 15 vel a relief camp hon a om hidan inleng thei­sak hi. Tutung in, nitak thum sung in, tuilian gintak khel in khang hat mahmah chi’n gen hi.

 

State Government in, tuilian in a sukkhakna bialte ah rescue person­nel leh huhna vante thonkhin a, tuilian thuakte hihtheihtawp suah in panpih hi ding uh chi’n chiam hi.

 

Water Resource Minister Letpao Haokip in a gendan in, tatsatlou a vuah a zuk ziak a tulel in tuilian in singtang gam a luite naktak in khangsak chi’n gen hi. Government in tuil­ian douna ding vanzat chituamtuam empty sand bags leh bamboo chattai leh a dangdangte koihkholsa tamtak a neih ziak in, mipite kiang ah pataulou ding in ngen hi.

 

 

Manipur Governor in “Girls in Aviation Day” hongkhia

IMPHAL, JUNE 13: Governor of Manipur, Dr. Najma Heptulla in a gendan in Professional chih thumal in numei leh pasal hihna a khenlouh ding ahi chi a, numei hiam ahihkeileh pasal hih ziak a nna khat peuhpeuh ah professional hih thei­hlouhna ding omlou ahi chi’n gen hi.

 

Hiai toh kisai ahihleh tuni a Classic Grande, Chingmeirong, Imphal East ah “Girls in Aviation Day” chih thupi pansan a programme neih ahih hun a Gover­nor in a gen ahi hi. Pro­gramme ahihleh Women in Aviation International (WAI) India Chapter leh Lockheed Martin-te makaihna nuai a sai a om ahi hi.

 

Aman a gendan in numeite leng field khat peuh peuh ah sinsak­na piak ding ahi chi a, amaute’n ahih theih uh bang hi hiam chih zonkh­iak a, pasalte toh dinmun kikim a siamsinna hi in nna khat peuhpeuh ah hi­taleh sinsakna piak ding ahi chi hi.

 

Governor in a gen­zelna ah kum 1970 nung lam in numeite a dia hih theihlouh thil om ahi chi a, huaite ahihleh flight simulation training, air traffic control leh flight attendant-te ahi chi’n gen hi. Himahleh 1970 zoh nung a pan in hiai bang a numeite a ding a gak­na kibawl pen khahkol a omta ahi chi’n gen hi.

 

Hiai bang a gakna bawl a om pen khahkol ahih zoh nung in pasalte sang mah in numeite’n pilot lam toh kisai a din­mun ngah tamzaw uh ahi chi’n Najma Heptulla in gen hi. Huai ban ah Ma­nipur mi mah Lt. S. Vi­jaya Devi ( Indian Navy) in tumalam inleng Nari Shakti Puraskar award ana sang kha ngeita ahi chi hi.

 

India Prime Minis­ter Narendra Modi inleng India gamsung a numeite dinmun dopsang ahih theihna ding lampi ngai­htuah in “Beti Ki Udaan, Desh Ka Swabhimaan”, kichi ana pankhia a, hiai tungtawn in sport, art and culture, hospital­ity leh sector tuamtuam a panpihna leh kithuah­pihna piak a om ding ahi chi’n Najma in gen hi.

 

Air Connectitivity lam toh kisai governor in a gendan in Imphal leh Delhi direct flight pat­khiak ahih toh kiton in maban ah Metro cities-te toh direct flight pansan a kikhawmtuahna a om theihna ding a pan­lak hiding chi’n gen hi. Hiai toh kisai in sin­lai naupangte’n metro cities-te a siamsinna sangzaw a neih ut chi­ang ua direct a, a hohna mun ding uh a tun thei­hna ding uh lampi kawk muhtu khat leng hiding hi’n taklang hi.

 

Programme zatna ah Mr. Phil Shaw, CEO, Lockheed Martin India; Members of Women in Aviation International (India Chapter) leh sinlai naupangte tamtak kihel uhi. Huai ban ah A short movie on WAI India Chapter kichi leng screen liantak ah khahkhiak a om hi’n thusuak in tak­lang hi.

 

 

 

Tuilian leh menchim in Manipur leh Mizoram nawk

Aizawl, June 13: Manipur leh Mizoram state sung a ni tamlou paita a kipan vuah khollou a, a zuk zom­zel ziak in mun tuamtuam ah tuilian leh menchim om hi’n thusuak in taklang hi.

 

A biktak in Manipur state khopi Imphal kholai a tuilet ziak in kikhawmtuahna lampite leng nawng­kai pha ban a, hiai bang a tui a let ziak in tuni inleng government office, educational institution leh sum­sinna inn tamtak khak in om hi. Himahleh Police De­partment, Fire Serivices, Water Resource, Health & Family Welfare Department and hospitals, Revenue, PWD, PHED, municipalities, deputy commissioners leh SDO-te bel ngeina dan in office a kai ban uah a amau sep ding chiat sem uh ahihdan taklat in om hi.

 

Huai ban ah Churachandpur district a Henglep lampi ah leng menchim thupitak khat a om a, Pher­zawl district sung a khua omte ah leng menchim thu zak ding tamtak om hi.

 

Mizoram state ah ahihleh Tiperabagh ah tenna inn 100 vel tui in a tup ban ah Serhuan khua ah leng tenna in 30 vel tui in tum ahihdan taklat in om hi. Hiai toh kisai in Mizoram state government in menchim leh tuilian a om ziak in Mizoram state sung pumpi ah ni nih sung holiday government in puang hi.

 

Tuilian toh kisai in Lunglei leh Aizawl district sung a pan in report zak tampen a, haichi, lampi leh electric tanpha subuai mahmah hi’n thusuak in taklang hi.

 

 

Police leh VDF-te’n naupang tuikia hunkhia

LAMKA, June 13: District Police leh VDF personnel bang­zahhiam in tuni, June 13, 2018 sun­ma dak 10 vel in naupang tuikia khat hunkhia uhi. Thutut kingah dan in, Lamka Police Station a an huanna a zat ding 407 TATA zang a S. Molhoi khua a singkhuah pua a kuan Police leh VDF personnel kigawm mi 5 in naupang khat ngakul a kia hunkhia uhi.

 

Police leh VDF-te ahihleh sing­khuah guang a omlai, vuahzuk ziak in mi verandah ah tawldam ua, huchih­lai in naupang 2 va tai in, a lawmpa uh ngakul a kia ahihdan va hilh uhi.

 

Hiai thu a zat phet un, Police leh VDF-te’n leng kintak in delh ua, silhlai teng uh toh ngakul sung ah kitawmlut ua, huai hun in naupang pen lusiip kia dawk hi. Ngakul ahihleh khabe tanvel a thuk hi a, naupang a lakkhiak hun ua khua phawk nawnlou in, Cardiopulmo­nary Resuscitation (CPR) bangtanhiam a piaknung ua tui hunkhop sekhia in kapthei hi.

 

Naupang tuikia ahihleh Heng­unsang (7) s/o Songkhohao hi a, amah ahihleh a lawmte mi 3 toh kizui hi uhi. Naupang tuikia hunkhia Police leh VDF personnel-te ahihleh Head Constable Nengkhenkham, Head Constable Chin­biaklal leh Driver Suanchinmang ban ah VDF personnel Pausonlian leh Pau Mission hi uhi.

 

 

June 23 in PNP leh PZP official launching om ding

LAMKA, June 13: Young Paite Assn (YPA) General Headquarter makaih in tuni, June 13 sunnung dak 2 in YPA-GHQ Office, Hiangtam Lamka ah Paite Numei Pawl leh Paite Zai-awi Pawl in joint meeting nei uhi. Hiai hun ah Paite Numei Pawl leh Paite Zai-awi Pawl official a honkhiakna neih ding toh kisai genkhawm ua, hiai hun ah Paite Numei Pawl leh Paite Zai-awi Pawl a pan report leng om hi.

 

PNP leh PZP official a honkhiak ding tungtang a genna uah, hongtung ding June 23, 2018 sunma dak 11 a pan YPA-GHQ Hall, Hiangtam Lamka a official launching program zat ding in thupuk ua, huai hun ahihleh zaila a kithuahkhawmna hun a zat hiding hi’n thutut kingah hi.

 

 

Hr Sec School a GM H/S dopsang hi di’n Edu Minister in chiam

LAMKA, June 13: Thokchom Radheshyam Singh, Minister (Education, Labor & Employment) Govern­ment of Manipur in tuni, June 13 in Lamka khopi sung a Government School kumlui mahmah nih enkhia hi. School nihte ahihleh Joint Student Body in ngetna a bawl dungzui ua Education Minister in a etkhiak hi a, a masa in Vimala Rina Govt High School enkhia a, hiai hun ah Joint Student Body a makaite, Vungzagin Valte, Chairman, MTDC, Shyam Lal Poonia, IAS, DC/ Ccpur, Rakesh Balwal, IPS, SP/Ccpur leh Chingkhei Singh, MES, ZEO/Ccpur in zui uhi. Education Minister in hiai hun ah Vimala Rina Govt High School in vanzat poimoh mahmah uh ahihdan mukhia in panpihna omthei bang­bang ngaihtuahsak ding leh school thuneitu lam in ngetna a bawl dungzui ua School Building leh Fencing bawlsak ding in chiam hi.

 

Huai zoh in DC Bungalow ah tawl­dam in Molnom a om Gandhi Memorial High School enkhe nawn ua, Gandhi Memorial High School building a etkhiak hun ah Head­master leh staff-te toh kithuah khawmna hun saulou zang ua, hiai hun a school thuneitute a pan ngetna om dungzui in Gandhi Memorial High School pen Higher Secondary dia dopsang hiding hi’n Education Minister in chiam hi.  

 

 

Tuilian toh kisai DC/Ccpur in theihsakna bawl

LAMKA, June 13: Shyam Lal Poonia, IAS, DC/Ccpur leh Chairman, District Disaster Man­agement Authority in tu­lai vuahzuk ziak a luitui khang leh menchim ziak a mihing hinna tanpha mansuah theih ahih toh kiton in theihsakna thu­suah bawl in vuahzuk ziak a sihna leh manna a om­louhna dia kuamah luid­ung a vaklou ding ding in theihsakna bawl hi.

 

Vuahzuk ziak a tu­ilian leh menchim chihte om hun a kintak a District Disaster Management Authority, Ccpur theisak dia ngetna bawl in, huch­bang thiltung om hun a contact number 03874- 233239, 8132-077-797 leh 8730-025-501 a thu­zak theih ding ahihdan taklang hi. Huai ban ah SDO/SDM leh a kisaipih OC-te kithuzak a, District Disaster Response Force-te hunteng a kigingsa a om ding inleng theihsak­na bawl hi.

 

 

ABVP in VC apan dan kalh a dona­tion sum mu hidan a ngohna nial

IMPHAL, JUNE 13: Akhi Bharatitya Vidharti Pari­shad (ABVP) Manipur in, tuni Nilaini in, University account a kipan donation khatmah ngahlou hidan in hilhchian hi.

 

MU VC in, dan toh kikalh a ABVP kiang a sum thoh hidan ngoh a, MUSU in laidal neu khat a thehzak thuk­kikna a, ABVP National Executive Council (NEC) mem­ber Sharatchandra Haobijam in a gendan in, February 2018 a state conference neihna toh kisai a, July 9, 2018 a honkhiak ding Souvenir a koih ding, MU a ding adver­tisement toh kisai in bel transaction bawl in om mah chi’n gen hi. VC lui HNK Sarma hun lai inleng, ABVP in hichibang advertisement ngah khin a, hichibang transac­tion-te kibawl leng thil ngeina hidan in gen hi.

 

Manipur University a kiphinna pailel toh ki­sai, ABVP in a taklatdan in, kiphinna in University a nasepnate a bik in, department tuamtuam a semester exam pailel lohsam sak dimdem hidan in taklang hi. Zan Sepnawni in ABVP palaite’n Manipur Governor Dr Najma Heptulla kimuhpih ua, MU buaina toh ki­sai a panlakpih ding in ngen uhi. MUSU kiang ah leng VC toh kihoulou ding a dinmun khauhtak a neihte uh ngaihtuah thak ding in ngen uhi.

 

 

Joint Students’ Body saina in Ccpur District Toppers Award 2018 hawmkhia

LAMKA, June 13: Ccpur District a Joint Students’ Body - Kuki Students Organization (KSO) Ccpur, Mizo Zir­lai Pawl (MZP) Manipur, Hmar Students Assn (HSA) leh Zomi Stu­dents’ Federation (ZSF) GHQ saina in tuni, June 13 sunma dak 11 a pan in Synod Hall, IB Road, Lamka ah Ccpur district a masapen ding in Ccpur District Toppers Award 2018 hawmkhiakna om hi.

 

Hiai hun ah district sung a pawl tuamtuam ban ah award sang ding student-te leh nu-le-pate tel ua, hiai hun ah chief guest, guests of honour, chief host leh special guest in Radheshyam, Minister Education La­bour and Employment; Ginsuanhau Zou, MLA & Chairman, MANIREDA; Vungzagin Valte, MLA & Chairman, MTDC; Khaipao Haokip, Chair­man, ADC Ccpur; Shyam Lal Poonia, IAS, DC/Cc­pur; Rakesh Balwal, IPS, SP/Ccpur leh Executive Member ADC Ccpur leh District Level Officer-te pang uhi.

 

Hiai hun Boimang Haokip leh L Mary in makaih ua, Rev JF Lalro­puia, Pastor, Tuithaphai Presbytery in thumna a hong in TL Haopu Ha­okip, President, KSO Ccpur in district sung a Joint Students’ Body in Ccpur District Toppers Award 2018 hawmkh­iakna a neih toh kisai gen hi. NJ Haoneo Baite, Sec­retary, District Topper Award DTA Committee in District Topper Award 2018 hawmkhiakna hun makaih in, Rev Khen P Tombing, Chief Coordi­nator PCI(R) in award sang student-te a ding in thumsak hi.

 

Hun zatsung in khualliante a pan thugenna om a, huntawp ah K Vanlallian Vaiphei, Convenor, District Top­per Award Committee in kipahthu gen in, Rev. Stephen Chinzathang, Se­nior Executive Secretary, Zou Synod in thumna in hunkhak hi. Tuni a Ccpur District Topper Award 2018 hawmkhiakna hun ah district sung a lasiam tuamtuam Anggu Singnit, Ramdinthari leh Ning­muanching in a vangkim in la sa uhi.

 

Ccpur District Topper Award 2018 sangte ahihleh Board of Secondary Education Manipur (BOSEM) nuai a Class X ah Salt Brook School a pan 90.17 % mu Thanglenlal Haokip s/o Manglun Haokip in District Topper Award la a, kipahman in Momemto leh Rs 8,000/- sang a, Central Board of Second­ary Education (CBSE) nuai a Class X ah JNV Tuinom a pan 90.6% mu Lhingneithem Kipgen s/o Upa Henkholen Kipgen in Topper Award la in, kipahman in Momemto leh Rs 8,000/- sang hi.

 

Council of Hr Sec Education Manipur (COHSEM) nuai a Class XII ah Sielmat Christian College a pan 81.2% mu, Ruby Hatneihoi Touthang d/o Ngamlen Touthang in Science stream ah topper award la a, kipahman in mo­mento leh Rs 8,000/- sang a, COHSEM nuai a Class XII ah Young Pillar a pan 79% mu, Mary Hatneikim d/o Seikhosat in Arts stream ah topper a ward la in, kipahman in momento leh Rs 8,000/- sang hi.

 

CBSE nuai a Class XII ah St. Paul Institute a pan 96% percent mu, L Lianmuansang s/o Upa L Venson in Arts stream ah topper award la in, kipah­man in momento leh Rs 8,000/- sang a, CBSE nuai a Class XII ah JNV Tuinom a pan 86.8% mu, Mercy Kimngaihching s/o (Late) T Thangkhosoi in Science stream ah topper award la in, kipahman in momento leh Rs 8,000/- sang sang hi.

 

BOSEM nuai a Class-X a Major Indian Language (MIL) a topper-te ahihleh Saviors’ Public School a pan Thiemsangi d/o Hentinpao Gangte in Gangte MIL ah 99% mu in kipahman in, momen­to leh Rs 3,000/- sang a, Sunshine English school a pan Ngamminlun Ha­okip s/o Pastor Lal Daniel Haokip in Thadou-Kuki MIL ah 96% mu in kipah­man in, momento leh Rs 3,000/- sang a, Assem­blies of God High School a pan Juliana Lamhauch­ing Simte d/o T Gou­suanthang P Simte in Paite MIL ah 93% mu in kipahman in, momento leh Rs 3,000/- sang a, Young Learners School a pan Moses Ginminthang s/o (Late) T Pumzapau Zou in Zou MIL ah 98% mu in kipahman in, momento leh Rs 3,000/- sang a, Partnership Mission Society School a pan John Lalhmangai s/o Lalthangsang Hmar in Hmar MIL ah 94% mu in kipahman in, momento leh Rs 3,000/- sang a, NKT High School a pan Ruthi Lalnunpuii Fanai d/o Zainuntluanga in Mizo MIL ah 81% mu in kipahman in, momento leh Rs 3,000/- sang hi. Don Bosco Hr Sec School a pan Khupmuansang s/o Lamthianmang Simte leh Linda Chingmalsawmkim d/o Lallungmuan Simte in Simte MIL ah 97% mu in, kipahman in momen­to leh Rs 3,000/- sang ua, NKT High School a pan Dalthianmuang s/o Dalzanang Vaiphei in Vaiphei MIL ah 96% mu in, kipahman in momen­to leh Rs 3,000/- sang hi.

 

COHSEM nuai a Class-XII a MIL topper-te ahihleh VK Tawna College a pan Mangmin­len Taithul s/o (Late) Tongngam in Zou MIL ah 91% mu in kipah­man in momento leh Rs 3,000/- sang a, VK Tawna College a pan Tingnun Fel d/o Ginthi­anbel in Vaiphei MIL ah 87% mu in kipahman in momento leh Rs 3,000/- sang a, Rayburn College a pan Nemthianniang d/o B Khamginlian in Paite MIL ah 93% mu in kipahman in momento leh Rs 3,000/- sang a, Don Bosco Hr Sec School a pan Selina Vanlalremi d/o Lalnuntluanga in Mizo MIL ah 82% mu in kipahman in momento leh Rs 3,000/- sang hi.

 

Chief Host Khaipao in district sung a student pawl tuamtuam kigawm a hiai bang a siamsinte lak a tungtuangte pahtawina a bawl uh kipahpihthu gen a, maban a leng sutzop touh zel a deihthu gen in, Joint Student Body-te’n a awlmoh bang ua siamsinte’n leng lai­simna poimoh ngaih ding in hasuan hi.

 

Guest of Honor Vungzagin in district a dia masapen dia Class X leh XII a lohchingte kipahpihna thilpiak a piak uh student-te’n leng kitaitehna a la ding in hasuan hi. District top­per award hawmna dia Student Body makaite’n ngaihtuahna leh tha-le-zung tamtak seng ding uh ahihdan gen a, student-te’n maban a hahpan zawkna a zang ding in ngen hi.

 

Huai ban ah siamsinna inn poimohte Imphal mun kia a om ahihman in government in district tuamtuam a, a suankhiak khen hunta hi’n gen a, district sung a chibing-nambing a kideidanna omte tuni a pan lakkhiak khen a deih thugen hi.

 

Guest of Honor Ginsuanhau in Stu­dent Body-te panlakna kipahpih thugen a, tu kum a Class-X examna a Manipur a dia second town chih a om, Lamka leh Ccpur district rank 8na a tun pen pawna ahihdan gen in maban a naksem a siamsinte hong pang a, UPSC, MPSC leh a dangdang tungtawn a IAS, IPS, MCS leh a dangdang a district sung mi a tam theipen lohch­ing dinbg a panla ding in ngen hi. Huai ban ah lohchinna ding a Pathian a masapen a koih ding leh nu-le-pa thumangte mi lohching hi uh ahihdan gen in, amah leng lehkha siam hikei mahleh IAS-te tung a thunei dia Pathian in koih ahihdan gen hi.

 

Chief Guest Rad­heshyam in Joint Student Body in hiai thilthak a patkhiak un pankhawm­na langsak ahihna ah hun zatna nuam leh manpha­sa ahihdan gen hi. Michih in hihtheih dan tuamchiat kinei ahihna ah, Mother Teresa, Nelson Mandela, Charlie Chaplin chihte’n midangte’ a dia a nasep tungtawn ua siamna sangtak nei hikei mahle uh mite’ ngaihsang tung uh ahihdan gen in khawtang a khan­touhna leh kikhekna a om theihna dia khuam poimoh khat a pang ding in paikhawmte ngen hi. Huai ban ah, hinkhua ah lohsapna kichi omlou in, sinlai lakna hi’n gen a, teacher kuamah student hikhalou leh nu-le-pa kuamah naupang khalou omlou ahihna ah, student leh naupang hih hunsung a lam-et i neihte teacher leh nu-le-pa’n theisiam a naupang etkol ding ahihdan gen in, district sung a siamsinna toh kisai a khantouhna a om theihna dia panla ding ahihdan gen hi.

 

 

KAYA leh KACA in June 16 tan hun pia

LAMKA, June 13: Koite Lui Area Youth Assn (KAYA) leh Koite Lui Area Chief Assn (KACA) in mel heihlouh pawlkhat in mi a vuak uh toh kisai a mi vaw­tute matkhiak hiam ahi­hkeileh a kipuankhiakna ding ua hun a piak uh a bei toh kiton in tuni, June 13, 2018 sunnung dak 2 in a office uh, ST Chul­louphai ah press confer­ence nei uhi.

 

Hiai hun ah Thangngam Haokip, Sec­retary, KAYA in a genna ah, June 9, 2018 a Let­khogin Lhanghal s/o Thongkhohem Lhanghal of K. Patlen, pasal 10 vel in hehpihna bei a, a vuak uh toh kisai a khutkhat­ute mankhe dia nohna piak ahih dungzui a dis­trict administration leh police in mi vawte suizui­na a neih uh 50 per cent bang zoh hita leh matkh­iak nailouh a omlel ahi­hdan a theihsak dungzui ua, hongtung ding Kig­inni, June 16, 2018 tan hungaih hiding ahihdan gen hi.

 

Huai piaktan a matkhiak ahihkei uh leh June 18, 2018 a pan kip­hinna pat hiding leh mipi kuapeuh in hiai bang thil hoihlou ngai poimoh a, kithuapih chiat ding in ngen hi.

 

Thangboi Baite, Chairman, KACA in June 11 a Press Conference neih hun ah huntawp piak a om beita mahleh district administration leh police in hungaih dia ngetna a bawl dungzui a June 16, 2018 tan hun piak a om hi’n gen a, huai hun tan a mi vawtute matkhiak ahihkeileh, KAYA in thu­pukna a laksa dungzui a kiphinna pan ding uh ahi­hdan gen uhi.

 

 

 

Ninevi Revival Crusade Minis­tries in anngawl thumna nei

LAMKA, June 13: Lamka khopi sung a thumpawl tuamtuam kigawmna Ninevi Re­vival Crusade Ministries makaih in thumpawlte’n khateng a khopi sung biakinn tuamtuam a anngawl thumna a neih uh tu June kha a dia a nihveina leh a 40veina ding in EBCC Emmanuel Headquarter Church, Headquarter Veng ah anngawl thumkhawmna uhi.

 

Thumna ahihleh tuni zingkal dak 7 in ki­pan a, zingkal dak 7 -8 kikal thumkhawmna Upa Velson in makaih a, dak 8-9 kikal thumkhawmna Miss Debora in makaih in, sunma dak 9-10 ki­kal sharing hun in zang ua, Pastor H Laithang, Local Pastor EBCC Em­manuel Headquarter Church, Headquarter Veng in anngawl thum­na a paikhawmte’n a tawikhawmte uh laan hi.

 

Sunma dak 10-11 kikal Evangelist Pauzaru­al a pan Revival Message genna om a, sunma dak 11-12 kikal Rev. Thang­zalun thumna makaih a, sun dak 12 a pan sun­nung dak 1 kikal sung Upa Dr Langkham in hun zatna makaih in Upa V Jamkhanmang, Local Chairman in thumna in hunkhak hi.

 

Ninevi Revival Crusade Ministries in ahihleh Ccpur District sung leh Lamka khopi sung a Saptuam leh mi­nam khentuam omlou a Tanchinhoih tungtawn a Revival tunsak ding leh thumkhawmna tung­tawn a Saptuam leh mi­nam tengteng Toupa ma a puklutkhawm a, Kha Siangthou hihhalhna tankhawm ding tupna toh Anngawl thum­khawmna a neih uh ahi. Tu June kha a dia msasa pen ding in June 6 in Thangkhal Baptist Cen­tre Church, Tuibuang ah nei ua, hongtung ding June 20 in ZCBC Church, Kamdou Veng ah nei in, June 27, 28 leh June 29, 2018 in EBCC Moriah, Pearsonmun ah nei ding uhi.

 

 

Biaklun Shoute Lamka hong zin

Lamka, June 13: Biaklun Shoute, Manager, Cor­porate Affairs, Hindustan Unilever Limited, Delhi leh a inkuante zingchiang June 14, 2018 ni’n a pa (L) Siamkung suangphuh ding leh hih ding tuamtuam a neih ziakin Lamka hong zin ding a, poimohna neite’n kimuhpih theih ding hi.

 

 

Real Time Monitoring Training zousiang

LAMKA, June 13: SHALOM Ccpur nuai a Project Sunrise, Fhi360 saina in zan a pan Mini Auditorium, Dorcas Jubilee Guest House, Dorcas Hall, New Lam­ka ah Real Time Monitoring Training a neih uh tuni, June 13 in zousiang uhi. Training hunsung in Lamka Rehabilitation Research Centre (LRRC), Shalom leh Progressive People Organization (PPO) a pan Peer Educator leh Outreach Workers (ORWs) tel uhi.

 

Tuni a training hun ah DURE Technology, Delhi a pan resource person tuamtuam - Sahyasachi, Wil­liam leh Shajan in thupi tuamtuam pansan in sinsak uhi. Kisinsakna hun ah LRRC, Shalom leh PPO a pan Peer Educator leh ORWs-te’n field visit a neih hun ua, paper work ngailou a, mobile phone signal omna munpeuh ah Project Sunrise Apps zang a report piak dingdan sin uhi.

 

Hiai hun a Project Sunrise, Fhi360 in LRRC, Shalom leh PPO kiang ah smart phone handset pia uhi. Real Time Monitoring ahihleh May 22, 2018 a Shyam Lal Poonia, IAS, DC/Ccpur in a honkhiak ahi. Tuni a training ahihleh SHALOM Ccpur nuai a Proj­ect Sunrise, Fhi360 in Delhi pansan Dure Technology kithuahpihna toh a sai uh ahi.

 

 

YPA-IB makai thakte’n mohpuakna la

LAMKA, June 13: Young Paite Assn (YPA) Imphal Block in 2018- 2021 sung makai ding kitelna a zoh uh toh kiton in June 10, 2018 sun­nung dak 1 in YPA-IB Hall, Paite Colony, Laim­anai, Imphal ah makai thakte’n kichiamna leh incharge kipiakkhiakna nei uhi. 2018-2021 sung YPA Imphal Block makai dingte ahihleh Presi­dent: L Thangkhanlal; Vice President: Kam­lianthang Guite; Secy: S Thiauchinpau; Asst Secy: Mangsuanthang Guite; Finance Secy: B Kamzalam leh Treasur­er: G Thangzalian hi ua, Executive member ah T Ginkhanlian, S Nangkho­zam, N Tuankhanzam, G Thangsuankhup, T Dong­zathang, T Ginkhanchin, G Thangchinlian, T Tlu­anga leh T Thongkawl hi uhi.

 

 

MD/MSPDCL in Helpline No. taklang

LAMKA, June 13: L. Priyokumar Singh, Managing Director, MSPDCL in thusuah a bawlna ah, electric toh kisai a buaina neite’n MSPDCL Helpline Number 1912 tungtawn a thuzaktheih ding hidan in taklang hi. Khohun hoihlouh toh kiton a Electric Helpline Num­ber leng behlap a om in complain bawlnuamte’n con­tact number 7640-081-232, 7640-081-235 leh 7640- 081-238 a leng thuzaktheih ding hidan in taklang hi.

 

 

Kangpokpi ah Imphal lui a khan ziak in hindan ngeina nawngkai

KANGPOKPI, JUNE 13: Manipur state sung ah ni tamlou paita a pan vuah a zuk ziak in Kang­pokpi district sung ah Imphal lui tui khang in district sung a om mun tumtuam tui in tum a, huai in hindan ngeina a nawngkai sak kia hilou in tuilian dinmun in siat lam manoh thei ding din­mun a om hi’n thusuak in taklang hi. Hiai toh kisai in Saikul khua ah tuilian in masawn zel in kikaw­mtuahna lei bawl a om khenkhatte ah leng gari tai ding phal hilou hi.

 

Tuabangkal ah Deputy Commisioner Kangpokpi Dr. Rangitabli Waikhom in district chih a SDO-te , police, army leh kho sung maikaite kiang ah vuahzuk ziak a buaina tuak a om leh a kin thei bang pen a report peding leh tulel dinmun report pe ding in ngetna leh theihsakna bawl ahi­hdan taklat in om hi.

 

Huai ban ah District Level Officer-te kiang ah tuilian ziak a thil hoihlou a tun ding etkai ding leh mihing hinna tui in a lak louhna ding a pan nasa­tak a la ding in ngetna leh theihsakna bawl hi.

 

Tuilian toh kisai in district administration-te’n panlakna tuamtuam hon nei ding uh ahihna ah mipite’n kithuahpihna hoihtak ana pe ding in­leng mipite kiang ah DC in ngetna bawl hi.

 

 

OD hidia muanmoh siluang Police in la

LAMKA, June 13: Zan, June 12 sunnung dak 1:30 vel in Tuithapi khua ah overdose hidia muanmoh Khamsuanmung Ngaihte (25) s/o (L) Thangzalian of Khominthang, New Lamka, luang Police-te’n va la in Lamka Damdawi Inn morgue ah koih ua, tuni’n doctor leh police in postmortem bawl uhi. Hiai thu ahihleh T. Dalsong (72) s/o (L) Ginzaneng in ekbuk sung a OD hidia muanmoh siluang om ahihdan police a report a bawl dungzui a police-te’n siluang a va lak uh ahi. Hiai toh kisai in Police in UD Case No. 6/CCP-PS/2018 u/s 174 Cr PC chiamteh uhi.

 

 

Contract Work delhna dia sum piak thu ah Police in FIR bawl

LAMKA, June 13: Lalparmawi (45) w/o Zamlun­mung of Vengnuam, New Lamka in contract work delhna ding in July 6, 2015 in Gyamchand Luwang of Thyam Leikai, Keishampat leh Nemting w/o (L) Letthang of Family Lane, Bijang kiang ah Rs. 10 lakh pia a, himahleh nasep ding piak ahihlouh ban ah sum leng lehkik ahihlouh ziak in June 12, 2018 in hiai thu Police ah report hi. Hiai thu ah Police in FIR No. 54(6)2018 CCP-PS u/s 406/420/34 IPC bulh in suizui lel uhi.

 

 

 

 

NEWS TOMKIM

 

Delhi University ah topper in pang

Lamka, June 13: Delhi University nuai a result suak ah Miss Vungneihchoi in MSc forensic subject ah topper a pang hi’n thutut kingah hi. Amah ahihleh Lamphel a om Nangthiankham tanu ahi hi.

 

 

Voluntary Blood Donation camp nei ding

LAMKA, June 13: Zingchiang, June 14 ‘World Blood Donation Day’ ahih toh kiton in District Health Society, Ccpur in Goodwill Missions Service toh pangkhawm in zingchiang, June 14 sunma dak 11 a pan Rayburn College Auditorium, New Lamka ah ‘Be There for Someone Else. Give Blood, Share Life’ chih thupi zang in ‘One Day Voluntary Blood Donation Outreach Camp’ nei ding uhi. Hiai hun ah mi phatuam ngai midangte damna ding a sisan pe nuam kum 18 tunglamte’n sinsan piaktheih ding hi.

 

 

Sunna:

Hemjang Touthang, chief of Denglen Village, Kangpokpi, tuni zinglam dak 12:30 in si a, tuni mah in vuiliam in om hi. Amah ahihleh, Kuki singer Glenna pianna pa leng ahi. RIP.

Kimjemhoi d/o Thathang & Vahneilhing, Chahmol Village, Bungpi area, tuni school kai tawp inn lam pai tui ah kia in si hi. RIP.

Jamkhothong Tuboi, damlouhna ziakin tuni sunnung dak 3:30 in si a, zingchiang in kivui ding hi. RIP.

 

 

 

 

…more detail : here

Read 503 times
Login to post comments