You are here: HomeNewsLamka PostThe Lamka Post | June 26,2018

The Lamka Post | June 26,2018

Written by  Published inLamka Post Tuesday, 26 June 2018 14:56
The Lamka Post | June 26,2018

Manipur University buaina paizom zel

MUTA Emergency Meeting in, a kintheipen a Vice Chancellor, Prof A P Pandey kitawp ding ngetna namkip

IMPHAL, JUNE 25: Manipur University a teacher association-te’n leng University Vice Chancellor Prof Adya Prasad Pandey kitawp ding ngetna a zop uh toh kiton in, Manipur University a buaina pai zomzel hi.

 

Tuni Seppatni a Manipur University Teachers’ Association (MUTA)-te’n emergency meeting a neih zoh un, a kintheipen a Vice Chancellor, a dinmun a kipan kitawp ding in ngen uhi. Manipur University Teachers’ Association (MUTA) “Emergency Execu­tive Committee and Special Invitees meeting” neih a hih zoh in, meeting a telte’n June 19, 2018 a Executive Committee Meeting a, University a siamsinte deihna bang a, a kintheipen a Vice Chancellor, Prof A P Pan­dey, a dinmun a kipan kitawp ding a, kituaktak a thu­pukna a bawl uh namkip uhi. Himahleh MUTA in, hiai tungtang a thudik leh Vice Chancellor tung a ngohna omte toh kisai a siamtansakna independent ‘high level enquiry commission’ kia in thukhenna bawlthei ding hidan in thupuk hi. Tua toh kiton in, MUTA in, Vice Chancellor in dikloutak a sum-le-pai leh kivaihawmna paipih hidan a ngohna omte enkai ding a, a kintheipen a ‘high level enquiry commission khat bawlkhe ding in ngen hi. MUTA in, zingchiang Sepnawnni a Manipur University Gate a sit-in-protest om ding a kihel ding inleng thupuk hi. Student-te’n Uni­versity Vice Chancellor Prof Adya Prasad Pandey lakkhiak ding a phut ziak un, May 30, 2018 a kipan in, Manipur University ah buaina omtou den hi. MU a buaina a om toh kiton in, tukha bul akipan in siamsinna nasepnate leng naktak in buaisak hi. Tutan in, University dean 6 kitaw­pta uhi. Dean 6te kitaw­pna ziak bel theih hilou hi. MU a buaina pailelte ziak in, tukha a nipikal 3 sung in, hunbi tuamtuam in dean 6 kitawp uhi.

 

Manipur Univer­sity Vice Chancellor in dean 6te kitawpna ziak a gendan in, student-te noh hat ziak a, kitawp uh hidan in gen hi. Himahleh dean 2 in student-te deihna bang a, amau mimal a kitawp uh hidan in gen ua, dean 3 te’n nohna nasatakte ziak a a dinmun uh tawpsan uh hidan in gen uhi. Manipur University Students’ Union (MUSU) President in Mayang­langbam Dayaman in Vice Chancellor thugente naktak in nial a, student pawlpi in kuamah tung a kitawpna ding a nohna pelou hidan in gen hi.

 

June 23 in, Mani­pur University Proctor Prof. Sumitra Phanjao­bam leh Assistant Proc­tor Dr. N. Sanatomba-te’n leng a dinmun ua kipan in kitawpna lai pia uhi.

 

Manipur University Student Union (MUSU) makaihna nuai ah Vice Chancellor lakkhiak ding ngetna in kiphinna paitou zel hi. MUSU in a taklatna ah, tulel a Vice Chancellor etkaina nuai a thildiklou tamtak om hidan in gen uhi. Vice Chancellor in leave a lak mun luat ziak a, Uni­versity in kong tamtak a haksatna liantak tuak hidan inleng student-te’n ngoh uhi. Vice Chancel­lor enkai ding a tulel Vice Chancellor chinlou hidan inleng student-te’n ngoh uhi.

 

Student-te’n Uni­versity Administrative Block a khaksak ziak un, tu dinmun in University nna bangmah semkhet­heilou hi. June 22, 2018 in, Centre in Manipur University a buaina toh kisai dinmun toh kisai lakhawm ding in, kintak in state ah Human Resource Development (HRD) a kipan Joint Secretary khat sawl hi.

 

Manipur Chief Minister N Biren Singh in Union Minister for HRD Prakash Javed­kar kiang a Manipur University dinmun toh kisai a theihsak nung in, Ministry of Human Resource Development (HRD) Joint Secretary leh Higher Education in-charge Girish Hosur in Imphal hongpha hi. Himahleh Girish Hosur in hihtheih bangmah nei tuanlou hi.  

 

 

Go to Village Misssion pansan in review meeting nei

IMPHAL, JUNE 25: Manipur Chief Minister N. Biren Singh in a gen­dan in state mipite kiang a thuchiam a bawl bang in kuhkalna leh chihtak­na ziak in tulel a Manipur state government din­mun len BJP government in mipite kipahna ding nasep tuamtuam ana patkhiaktak mah bang in lohchinna thupitak ngah ahihdan muh a om ahi chi’n gen hi.

 

Hiai toh kisai ahi­hleh tuni a Chief Minis­ter’s Secretariat cabinet Hall a maban a Go to Vil­lage mission neihna ding toh kisai a review meet­ing neih ahih hun a CM N.Biren in a gen ahi hi.

 

Chief Minister in programme zat hun a official-te kiang a, a gen­dan in Go to Village Mis­sion ahihleh State mipite kia in kipahpih hilou ahi chi a, National level tan­pha a leng kipahpih thu honkhak om ahi chi’n gen hi.

 

Aman a genzelna ah hiai bang a lohchinna thupitak state in a ngah ziak ahihleh kua dang ziak hilou department tu­amtuam a pan official-te hahpanna ziak ahi chi’n gen hi.

 

Huai ban ah hiai bang Mission pro­gramme tungtawn a mipite haksatnate suk­kiam sak ding chih hi a, state government a pan scheme tuamtuam omte a hamphatpih dingte mah in hamphatna a tan theihna ding uh ngimna a leng hiai bang Mission patkhiak a om ahi chi’n Biren in gen hi.

 

GVT nasepna toh kisai a official-te’n hak­satna a tuahte uh toh kisai CM in a gendan in department tuamtuam a pan official-te’n haksatna tamtak tuak ding na hi uh chi a, himahleh haksatna natuahte uh thawnlou ding ahi a chi kawm in kuhkalna leh chihtakna suah ding leh gam leh lei­tang khantouhna ding a panlakkhawm chiat ding ahi chi’n gen hi.

 

Chief Minister in a gendan in tumalam a pending case 1,04,000 omte hoihtak a etkai ahih zoh nung in tu in pending case 52,000 lel omta ahi chi’n gen hi. Hiai toh kisai in official-te kiang ah pend­ing case omte a baih thei lam a sukven ahih theihna ding in pan nak zaw sem a la ding in chialna bawl hi

 

Tuabangkal ah wa­ter supply, construction of drainage chih leh a dangdangte bel tu leh tu a kibawl khin thei nailou ahi chi a, a ziak ahihleh sum tamtak kigolhna ding ahihna ah hun lut zek lai ding ahi chi hi.

 

Go to Village mis­sion neih ahih hun a meithaite a ding a pan­pihna kipe ding kichi pen leng tu nung zek chiang in scheme thak khat din­suah hiding chi hi. Huai ban ah Planning Depart­ment in tu in Fishery Department-te a ding in Rs 1.5 crore honpe khe khinta uh ahi chi’n gen behlap hi. Hiai bang hamphatna pen a tang ding mite kiang ah piak ahih hun chiang in state sung a khosa mipite ki­ang ah nga kining ching a piak theih ding leng lam-et ahi chi hi.

 

Review meeting neih ahih hun in CM in official paikhawmte kiang ah Go To Village mission patkhiak ahihna toh kisai a, maban a panlak ding­dan leh tuasang mah a lo­hching zaw a kal a kisuan theihna ding in suggestion (thukup/ ngaihdan) pe ding inleng ngetna leh chialna bawl hi.

 

Phase li-na tan neih zoh a om GVT camp pansan in buaina tuamtuam 2,52,595 chiamteh in om a, huai lak a pan in 1,90,666 case-te buaipih khit ahih ban ah 52,938 case-te zoh hi nailou hi.

 

A hong tung ding June 27, 2018 chiang a Go to Village mission camp neih ahih nawn chiang in khua 272 uap a neih hiding hi. Hiai toh kisai in Churachanpur district sung a khua 105 uap in neih hiding a, Kangpokpi khua 40, Kamjong kho 19, Pher­zawl khua 16, Imphal West khua 12, Senapati khua11, Imphal East khua 11, Chandel kho 11, Ukhrul leh Tamen­glong ah khua 10, Bishnupur ah khua 5, Thoubal ah khua 4, Jiribam khua 3 leh Kakching ah khuao 2 uap in neih hiding hi’n thusuak in taklang hi.  


 

 

Education Minister in Talui leh Somdal a school-te enkhia

IMPHAL, JUNE 25: Education Minister Thokchom Radheshyam in, tuni Seppatni in Talui/Tolloi Higher Secondary School leh Somdal NK Higher Secondary School Somdal, Ukhrul District-te enkhia a, hiai hun in school a faculty-te leh student-te houlimpih hi.

 

Education Minister in a gendan in, a zin sung a education sector lam masawnna ding a khosung mipite kipiakzohnate a muh in kipaksak mahmah ahihdan gen hi. Meeting hun in, Minister kiang ah school a tasam van poimohte toh kisai theisak uhi. Subject khenkhat a teacher taksapna toh kisai a, Minister in a gendan in, contract basis a teacher ding lakna ding a pan­lakna pailel ahi chi’n gen hi. Recruitment process zohsiang ahih hunhun in, teacher taksapna thubuai omte zangkhai tuan mahmah ding chi’n gen hi. Khosung mite kiang ah, school kichi mun siangthou khat bang a zahtak ding leh school vante bitna ding a, hihtheih tawp a kithu­ahna pe ding in ngen hi. School kichi naupang maban hoihzawkna ding leh khotang chidam zawk semna ding a kikepna mun siangthou ahi chi’n gen hi.

 

Talui khua a ‘Unleash the Potential’ thupi zang a 79th Talui Katamnao Long General Conference neih a om uap ding in, tuni’n Th. Radheshyam in Ukhrul District va pha hi. Talui khosung mite’n thupitak in Minister vaidawn uhi.

 

Chief Guest hihna thuah a, a thugenna ah, teacher-te kiang ah school naupangte amau tate bang a ngaihtuah ding in ngen hi. Mipi pai­khawmte kiang ah leng, kampau hoihloute toh naupangte lauthawngsak lou himhim ding leh a tup-le-ngimte tangtun­theilou ding a khamtang­sak mailou ding inleng ngen hi. Naupangte a hoih penpente a hong hihtheihna ding ua, a hihtheihnate ua kimuan­na piakna ding in, itna, lainatna leh hanthawnna chihte naupangte kiang a lahkhiak ding thil poimoh pente ahi uh chi’n gen hi. School kichi naupangte kizentak leh feltak a, niteng a class la ding a, a pai utna mun uh hi ding in bawl tuak mahmah chi’n gen hi.Student-te ngaihnat school bawlkhiakna ding in, teacher-te kiang ah naupangte toh kizopna damtheih huaitak omte kembit ding in ngen a, huchi hileh naupang te’n a poimoh hun un, zalen­tak in teacher-te naihthei zel ding uh chi’n gen hi.  

 

 

Malaria Team-te Lamka hongtung kikta

LAMKA, June 25: June 19, 2018 a Lianlunching (14) d/o Khansong of Tallian, Malaria ziak a si ahih­dan theihkhiak ahihnung in District Medical Team-te Thanlon PHC toh kithuzak in June 22, 2018 zingkal dak 6 in Lamka a pan Tallian va pha uhi. Malaria toh kisai a septheih omteng semzou in June 23, 2018 in Lamka hongtung kiknawnta uhi.

 

Tallian ahihleh Thanlon PHC nuai a Sainoujang PHSC in a huamkhak hi a, Medical Team-te Tallian a omsung un, Lianlunching’ pa, Khansong leng Ma­laria PF vei a om a etkol ban uah, khosung mi 87-te sisan leng etchet ding in la uhi. Huai ban ah khosung ah thousilen 80 val damdawi diahsak in Anti-Malaria damdawi leng hawm uhi.

 

Medical Team-te’n kivenna ding in Tallian, Lei­jangphai, Tuipiphai, Tuikumuallum, Phaikholum leh Sainoujang a ASHA-te kiang ah Malaria a pan kivenna damdawi hawm ding nutsiat in, si-in lenkhawmna mun ah leng campaign hoihtak nei uhi.

 

Lianlunching’ pa, Khansong leng Malaria PF mah ahihziak in chau man mahmah a, Medical Team-te’n theihtawp suah in treatment pia ua, hon paisan ding tan ua a dinmun hoih tuan mahmah hi’n gen uhi. District Malaria Department a pan Team-te ahihleh S. Thang­thianmuan, DPO; Samte Chin, Male Health Supervisor; Daiginmang, Male Health Worker; G. Kamkhansiam, Male Health Worker leh Ramlhun, Driver hi uhi.

 

 

IDADAIT toh kisai in Spot Painting Competition nei

LAMKA, June 25: District Social Welfare Office (DSWO) Ccpur in Lam-Etnamun (LRRC), Mangaal IRCA, New Life IRCA leh Samaria IRCA kithuahpihna toh tuni, June 25 sunnung dak 1 in Spot Painting Competi­tion sai uhi.

 

Kidemna ahihleh “Listen First-Listening to Children and Youth is the First Step to Help Them Grow Healthy and Safe” chih thupi zang a neih hi a, International Day Against Drugs Abuse and Illicit Trafficking 2018 neihna ding toh kituak a kidemna sai a om hi’n thutut kingah hi.

 

Kidemna ahihleh category nih in kikhen a, Category-A ah Class I-VI kikal leh Category-B ah Class VII-X kikalte’n thupi kipia pansan in lemgelh kidemna nei uhi. Category-A ah stu­dent 78 leh Category-B ah student 50 kihel ua, a kigawm in student 128 tel uhi.

 

Kidemna zoh in re­sult puanna om ngal a, hiai hun Lalramsang In­fimate, Addl DC/Ccpur in chief guest hihna toh uap a, N. Binod, DSWO Ccpur in keynote address gen hi.

 

Chief Guest in khamtheih a kibuallouh ding leh hinkhua a lampi zuih ding chihte Sunday School a sinsak a omte kuapeuh in zuichiat ding in hasuan hi. Student-te khamtheih a kibuallou a hinkhua nuamtak a zangchiat ding in a deih­sak thukhak hi.

 

Kidemna Category- A (Class I-VI) ah Lian­muanmang, Class IV of Hidden Valley School in khatna la a, Puisangkim, Class V of Savior’s Public School in nihna la in, Abi­gail Zarzomawi, Class IV of Dawn School in thumna la hi.

 

Category B (Class VII-X) ah Thangkhankhup, Class VII of Lalpuitluaii Foundation School in khatna la a, Kham­muanlian Guite, Class VII of Don Bosco Higher Secondary School in nihna la in, Lianmuansang, Class X of SSPP Residen­tial School in thumna la hi.

 

Kidemna ah khatna in Rs. 5,000, nihna Rs. 3,000 leh thumna Rs. 2,000 sang ding ua, kipahmante ahihleh zingchiang, June 26, 2018 a State Level International Day Against Drugs Abuse and Illicit Trafficking 2018 zatna, Tribal Research Institute (TRI), Chingmeirong (Near Adimjati Hostel Complex) ah Manipur Chief Minister, N. Biren Singh in pekhe ding hi.  


 

 

NPO in total shutdown bawlsawm

SENAPATI JUNE 25: Naga People Organ­isation (NPO) leh District Frontal Organisation kithuahkhawmte’n a hong tung ding June 27 zing lam dak 6 a pan June 28 zinglam dak 6 tan Senapati dis­trict sung ah total shutdown bawl sawm uh hi’n thu­suak in taklang hi.

 

NPO makaite’n a gendan un Manipur state gov­ernment in Governemnt employee-te transfer leh post­ing a bawl mun luat ziak ua hiai bang a total shutdown kibawlsawm ahi chi’n gen uhi. Huai ban ah state gov­ernment in DC, SP, HOD chih leh a dangdangte su­ankual mun law mahmah uh ahi chi’n gen ua, a biktak in Senapatni SP M Pradip Singh IPS in kha 4 sung lel khong a dinmun a luah zoh nung a suankhiak a, a om mawk pen lungkimlou mahmah uh hidan in taklang hi.

 

Hiai toh kisai in suankhiak a om pen a kin thei lam a revoke thak ahih kei a leh tuasang mah a nasa zaw a kiphinna patkhiak hiding chi’n NPO makaite’n gen uhi.

 

Total Shutsown ahihleh Educational Institution, Electricty department, Water Supply, Medical, Media leh Paramilitary-te huamkhalou ding hi’n thusuak in taklang hi.

 

 

Biaklun Shoute in SSPP-RS veh

LAMKA, June 25: Biaklun Shoute, Manager, Cor­porate Affairs, Hindustan Unilever Limited, Delhi in tuni, June 25 sunnung dak 2:30 vel in SSPP Resi­dential School veh a, huai hun ah School Managing Committee (SMC) leh School a semtute toh kithuah khawmna leh singnou suanna nei uhi.

 

Hiai hun ah Khamsuanthang, Chairman, SMC in Biaklun Shoute’ khut ah naupangte’ khutsuak thilpiak pia a, SMC in ngetna a bawl dungzui a Kham Suan­mung Tawmbing, DFO Ccpur in singnou a piak, SMC in Forest Beat Office, Tuibong ah va la in hiai hun ah suan uhi.

 

Hiai hun ah School Management Committee a member-te ban ah Kimbiaksang, Headmistress leh school a semtute kihel uhi.

 

 

CCI in 7th Unau Day 2018 zang ding

LAMKA, June 25: Centre for Community Initiative (CCI) in zing­chiang, June 26, 2018 sunma dak 11 in Mal­sawm Ability Resource Centre (MARC) Pear­sonmun ah a 7veina “Unau Day” zang ding uhi.

 

Huai hun Paul Rozarlien, Advocacy Coordinator leh Parnei Vaiphei, Special Educa­tor in makaih ding ua, L Thangsuanlian, Pro­gram Manager in “Unau Day” kizatna ziak gen in, Niangngaihmang, Man­ager, Human Resource and Administrator in Ginmalsawm Tonsing Award hawmkhiakna makaih ding hi.

 

“Unau Day” zat sung in The Malsawm Initiative (TMI) student-te a pan special items ban ah Ginmalsawm Tonsing Award sangte a pan thugenna om ding a, sunnung in naupangte’n kimawlna chituamtu­am water race, build­ing pyramid, blowing ball, blind snake, ban ah items chituamtuam ah kitaitehna nei in, kipah­man hawmkhe ding uhi.

 

 

CM in nungak Hoihthem kiang ah loan sum Rs. 50,000 pekhia

IMPHAL, JUNE 25: Chief Minister N. Biren Singh in, tuni Seppatni in Chief Minister’s Secretariat ah Chandel district sung a Toitung khua a teng kum 21 a upa vualbanlou nungak Km. Hoineithem Haokip ki­ang ah Manipur State Co-operative Bank (MSCB) Ltd nuai a loan Rs. 50,000 pekhia hi.

 

Nungak Km. Hoineithem Haokip, poihlong himahleh khut a bawl pak etlawm taktak leh gua zang a vanzat chituamtuam bawlna lam ah siamna sangtak nei hi. June 7, 2018 Chief Minister’s Secretariat, Imphal a Chief Minister leh Khengjoi Sub-Division a Village Authority makaite’n houlimna a neihna hun uah, 19 As­sam Rifle officer-te’n Chief Minister kiang ah nungak Hoineithem Haokip pulak uhi.

 

Polio infection ziak in, a neu a kipan in, a khe lang nih tuak zeng mahleh, Nungak Hoin­eithem in a gendan in, Imphal a kipan kilometre 165 vel a gamla a khua ua, small scale arts leh crafts enterprise kichi dawr khat enkol hidan in gen hi. N. Biren Singh in, MSCBL official-te kiang ah Hoineithem a ding a soft loan khat saisak ding in theisak hi.

 

Tuni a Chief Min­ister in Hoihthem kiang a loan sum a piakkhiakna hun ah MSCBL Managing Director A. Subhash Singh, 19 Assam Rifle officer-te leh Nungak Hoineithem inkuanpihte tel uhi.  

 

 

Joint Committee On Anti-Drugs makaih in Rally om ding

LAMKA, June 25: Zingchiang, June 26, In­ternational Day Against Drug Abuse and illicit Trafficking (IDADAIT) ahih toh kiton in Ccpur district ah Joint Commit­tee On Anti-Drugs Ccpur inntekna nuai ah Interna­tional Day Against Drug Abuse and Illicit Traffick­ing zatna om ding hi.

 

Joint Committee On Anti-Drugs Ccpur in ahihleh District sung a khamtheih-guihtheih doudalna leh beisak ding tupna toh International Day Against Drug Abuse and illicit Trafficking IDADAIT zatna in rally ban ah khamtheih mat­khiak a omte halna hun in zang ding uhi. Khamtheih doudalna a Rally a tel dingte sunma dak 10 in Peace Ground, Tuibong ah kingakkhawm ding ua, huai hun ah Rally pai ding dan toh kisai kizak­sakna om ding hi.

 

Huai hun Mang­neilal Singson in makaih ding a, Rev. LB Angam, Executive Director, ECA in rally pai dingte thum­sak ding a, Kamthang Haokip, President, KKL leh Lianzalal, President ZYA a pan thugenna om ding hi. Tua zoh in T. Khailianthang, Convenor in rally flag-off ding a, Peace Ground a pan Te­dim Road zui in, Thang­zam Road ah lut ding ua, huai a pan Tipaimukh Road man in, Lamka Public Ground, Hiang­tam Lamka ah rally zou in, huai mun ah hun sau­lou zang ding uhi.

 

Huai hun Upa Laldawnlien Varte, Sec­retary in makaih ding a, Rev. Lallarmawia, Ex­ecutive Secretary, MPS in thumna a hun pan in T. Khailianthang, Conve­nor in International Day Against Drug Abuse and illicit Trafficking (IDA­DAIT) zatna a rally ki­neihna ziak gen in, C.V Duhawma, President GYMA, Manipur, Letza­mang Haokip, Co-Con­venor a pan thugenna om ding hi.

 

Hiai hun ah Cc­pur district sung a Phil­anthropic Organization chih a pan President-te’n khamtheih doudalna toh kisai a khamtheih chi­tuamtuam a matkhiakte uh haltum ding ua, T. Khailianthang, Convenor in District sung a phil­anthropic organization tuamtuamte’n khamtheih doudalna toh kisai a pan­la a, kalsuankhawm ding uh ahihdan puangkhia in Pastor S Thangchinlun, EBCC Hiangtam Lamka in thumna in hunkhak ding hi.

 

Zingchiang a khamtheih doudalna toh kisai a rally neih hun ah district mipi a tam thei­lam tel a, khamtheih dou­dalna ah panla chiat ding in Joint Committee On Anti-Drugs Ccpur in chi­alna a bawl ban uah, rally a tel dingte sunma dak 10 ma ngei a Peace Ground, Tuibong tungkim chiat ding in leng theihsakna bawl uhi. Rally hun a tel dingte’n mahni tuidawn ding leh niliap kiken chiat ngai ding hi.

 

 

KVK/Ccpur ah ‘6 Days Skill Training on Value Addition of Jackfruit’ kipan

LAMKA, June 25: KVK/Ccpur ah tuni, June 25 in 6 sung daih ding in ‘Skill Training on Value Addition of Jack­fruit’ kipan hi. Hiai hun ah Yaiphakol, Nghathal, Zoveng leh Bethlehem D. Phailian a Self Help Group 4 a pan mi 30 vel paikhawm uhi.

 

Hiai hun ah Dr. Niranjan Lal, Senior Sci­entist and Head, KVK/ Ccpur in thei manpha lawloute a helpih tamlou zang a manphatak suah­saktheih ahihdan expert-te sinsakna tungtawn a hamphatpih chiat ding in hiai hun a telte a deihsak thugen hi.

 

Ms. Manngaihkim, T.O (Agri. Extn.) in “Self Help Group and Income Generation” chih thupi zang in lamkhuang gah a pan a nektheih chi­tuamtuam bawl a Self Help Group in sumsinna phatuamtak bawltheih ahihdan houlimna hun makaih hi.

 

Dr. N. Johnson Singh, SMS (PP) in “In­sect, Pest and Diseases Management in Jack­fruit” chih thupi pansan in lamkhuang chipha­lou, lungvei leh gah hoi­hloute kep dingdan gen a, Mr. Chandramani Singh, SMS (Hort) in “Scientific Cultivation of Jackfruit” chih pansan in lamkhuang kiak suan ding dan leh a pichin tan a etkai ding dan gen hi.

 

Huai zoh in Dr. S. Roma Devi, ACTO (H.Sc.) in “Value Ad­dition of Jackfruit” chih thupi pansan in lamkhuang hoihna leh phattuamnate gen a, lamkhuang gah a pan nektheih chituamtuam 10 val bawltheihte pu­lak hi. Huai ban ah lam­khuang gah ngek a char a bawl ding dan (practical demonstration on jack­fruit pickle) gen in hiai hun zangzou uhi.

 

 

PTC-GHQ Raising Day zatna in Nampi Thumkhawmna om ding

LAMKA, June 25: Paite Tribe Council (PTC) General Headquarters makaih in June 27, 2018 sunma dak 10 a pan in YPA-GHQ Hall, Hiang­tam Lamka ah PTC-GHQ 69th Raising Day lopna leh Nam Kipumkhatna ding a Nampi Thum­khawmna om ding hi.

 

Hiai hun ah K. Su­anthang, President, PTC-GHQ in nampuan kaipalh in hun zatna kipan ding a, Thangzamuan Tomb­ing, General Secretary, PTC-GHQ in hun zatna makaih in, Pastor MT Khanlal Guite in thumna in hun hong ding hi.

 

G. Vungsuanthang, Vice Chairman, CWC, PTC-GHQ in hun zatna toh kisai pulak in heutu mualliamsate sunna hun makaih ding a, Rev. S. Vung Minthang, Gen­eral Secretary, EBC a pan “Nam Kipumkhat” chih thupi zang a thugenna om in, Rev. K. Kamchinkhup makaih in ‘Nam Thupha Tawina’ toh kisai in nam a dia thumkhawmna om ding hi.

 

Khailianthang Tonsing, President, YPA-GHQ; Thanglalmuan Hauzel, President, SSPP-GHQ; John K. Ngaihte, Chairman, Zomi Coun­cil leh V. Vungzathang, Chairman, CWC, PTC-GHQ a pan thugenna a kizom in om ding a, EBC Central Choir a pan phat­na la om ding hi.

 

Tua zoh in K. Su­anthang, President, PTC-GHQ leh Paite sung a pan MDC teng ban ah PTC-GHQ a Ex-President leh Ex- General Secretary-te a pan thugenna om ding hi.

 

Tua zoh in H. Pau­thianmuang in ‘Nam Kipahthu Genna’ thum­khawmna makaih ding a, PCI Choir a pan phatna la om in, Phungzathang Tonsing, Ex-Minister; Vungzagin Valte, MLA & Chairman, MTDC leh V. Hangkhanlian, Minister (Agri., Vety & AH) a pan thugenna om ding hi.

 

Rev. Dr. Khen P. Tombing, Chief Coordi­nator, PCI (R) in ‘Nam a Dia Ka Lunggulh’ chih pansan in thugen ding a, Evan G. Pauzarual in ‘Nam a Dia Ngetna’ thumkhawmna makaih ding hi. Tua zoh in Dr. DK Mang, Vice Presi­dent, PTC-GHQ in kip­ahthu gen in Upa N. Vi­alkhanthang, Secretary (Finance), PTC-GHQ in thumna in hunkhak ding hi.

 

Hiai hun ah Nampi Thumkhawmna nei a, Pathian kiang a thupha­tawina, Kipahthu genna leh Nam a dia ngetna thumna om ding ahiman in Paite namsung a pawl tuamtuam a heutute, saptuam heutute leh nam makaisa, heutute teng in Pathian’ kiang a damna ngen in thumna om ding hi. Lamka mun a telkha theiloute’n leng PTC Unit leh Local Saptuam makaih a Biakinn mun­chiat a thumna hun zang ding ahihman in hiai hun toh kituak a program dang kuama’n bawllou a, nampi thumkhawmna hun a zang chiat ding in PTC-GHQ in ngetna bawl uhi.

 

 

LSC in Biaklun Shoute kimuhpih

LAMKA, June 25: Tuni, June 25 zinglam dak 8:30 in Lam­ka Sports Club (LSC) heutute’n Biaklun Shoute, Manager, Corporate Affairs, Hindustan Unilever Limited (HUL) kimuhpih ua, maban a LSC kalsuan dingdan toh kisai genkhawmpih uhi.

 

Biaklun Shoute ahihleh LSC hard­core supporter khat ahihna ah hun sawt­tak a pan LSC toh hiai bang a kithuah­khawmna neih a lunggulh gige pen tuni a neihtheih a om man in kipah thugen hi. Lamka Sports Club ahihleh Hiangtam Lamka pansan Club minthang, kumlui leh Ccpur district level kia hilou a Mani­pur state level tan a theihphak ahih ban ah, tulel a CDSA nuai a Affiliated Club om teng lak a, a upa pen pawl leng ahi.

 

 

Khuga Battalion in gari tang kaihkhiaksak

LAMKA, June 25: 27 Sector, Assam Rifle nuai a om Sixth Sikh Light Infantry (Khuga Battalion) in tuni, June 25 sunma dak 11 vel in DC/ Ccpur office zotna lampi ah gari tang khat kaikhia uhi. Khuga Battalion a pan personnel bangzahhiam Jaswant Singh, Subedar Major makaih a DC Office a hoh kiklam, convoy a kizuite’n khopi sung a tuipua a taituah, DI Tata Pickup Tanker toh kithuah khat lampi sik a tang tuakkha ua, pick-up driver in kaihkhiak­sak dia ngetna a bawl dungzui in kaih­khiaksak uhi. Hiai bang a buaina tuakte panpih dia mansa a om gige uh ahihdan Khuga Battalion a pan thutut kingah hi.

 

 

Khamtheih zuak mi 2 Jail ah koih

LAMKA, June 25: June 13, 2018 sunma dak 9 vel a Police Drug Cell-te’n Lanva a Nangkhanthang’ inn a pan in Nangkhanthang (49) s/o (L) Chindahpau of Lanva leh Dimlianniang (47) w/o (L) Dalkhankim of Lanva a pan in khamtheih SP tang 174 leh Nitrosun tang 58 mankhia uhi. Mat a om mi nihte Police in tuni, June 25 in District & Session Court ah dingsak ua, court in jail a koih dia phalsak in Police-te’n jail a koih uh hi’n police a pan thutut kingah hi.

 

 

YPA Zenhang Lamka unit kum 38 chinna zang ding

LAMKA, June 25: Young Paite Assn (YPA) Zenhang Lamka unit kum 38 chinna (Raising Day) lopna hong­tung ding June 29, 20l8 sunma dak 10:30 in VK Mon­tessori School Campus, Zenhang Lamka ah om ding hi.

 

Hiai hun ah chief guest, functional president, guest of honour leh chief host in V. Hangkhanlian, Minister (Agri. Vety & AH); Ginsuanhau, MLA & Chairman, MANIREDA; Khaipao Haokip, Chairman ADCC leh V. Khaikhanmung, Vice Chairman, ADCC pang ding uhi. Huai ban ah inntekpa Letkhochinthang Valte, Chief of Zenhang Lamka leh T Khailianthang, President, YPA-GHQ a pan thugenna om ding hi. Hiai hun ah Pastor MT Khanlal, EBCC Zenhang Lamka in hasotna thugen in YPA Zenhang Lamka a ding in thumsak ding hi.

 

 

June 27 in ‘Go to Vil­lage’ campaign om ding

LAMKA, June 25: Manipur Government in state sung khantouhna dia ‘Go to Village’ campaign a pat­khiak paitou zel in hongtung ding June 27, 2018 in om Ccpur district mun tuamtuam ah ‘Go to Village’ mis­sion sepsuahna om nawn ding hi. Huai ding in DC/ Ccpur Office leh SDO/BDO-te kisakhawl lel ua, hun paisa a ‘Go to Village’ campaign neihkhak nailouhna khuate ah nei ding uhi.

 

 

 

…a kim zaw in : hiai mun ah.!

Read 440 times Last modified on Tuesday, 26 June 2018 15:04
Login to post comments