You are here: HomeNewsLamka PostThe Lamka Post | July 05, 2018

The Lamka Post | July 05, 2018

Written by  Published inLamka Post Thursday, 05 July 2018 08:35
The Lamka Post | July 05, 2018

SC in Kejriwal vs LG thu ah thukhenna bawl:

Kejriwal makaih Govt kichi Delhi a thuneihna tawp tawitu ahi; LG in independent power neilou: SC

NEW DELHI, JULY 4: Supreme Court in, tuniNilaini in Arvind Kejriwalmakaih AAP governmentleh Delhi LieutenantGovernor Anil Baijal kal athuneih kituhna thubuaitoh kisai in thukhennabawl hi.SC in a thukhennaah, Arvind Kejriwalmakaih government kichiDelhi a thuneihna tawptawitu ahi a, thupuknalakna ding in LieutenantGovernor Anil Baijalin independent powerneilou a, elected governmentthuhilhnahuamsung a om hidan intaklang hi.

 

SC in tuni a taklatna ah, elected government kichi Delhi a dia boss pen ahi a, elected government daltu khatdan a Lieutenant Governor in nasem theilou hidan in taklang hi. Elected government sung ah single ruler (absolutism) leh dan bei a kivaipuakna (anarchism)-te a dia mun omlou hidan inleng SC in taklang hi. Gam leitang, police leh public order toh kisai thil khatpeuh chihlouh siah ah, Lt Governor in constitution pansan in thupukna lak theihna zalenna bangmah neilou hidan in SC in chiangtak in thukhenna bawlsak hi. Thukhenna simkhe kawm a, Chief Justice of India Dipak Misra in a gendan in, Lt Governor in Delhi government toh kituaktak a nna a sepkhawm ding poimoh ahi chi’n gen hi.

 

Delhi a Aam Aadmi Party (AAP) chief minister Arvind Kejriwal in a gendan in, SC thukhenna toh kisai, Delhi mipite a ding a vualzohna thupitak ahi a, democracy vualzohna ahi chi’n gen hi. Delhi deputy chief minister Manish Sisodia inleng, Delhi mipite sik-le-tang in, lungsim tengteng toh Supreme Court tung ah kipahthu gen hi. Mipite telching government in tu in, Delhi mipite a ding in thupukna latheita ding chi’n gen hi.

 

Delhi a Congress chief minister lui Sheila Dixit in a gendan in, SC thukhenna chiang huntawk chi’n gen a, Article 239 (AA) of the Constitution dungzui in, Delhi i chih state ahi kei a, Union Territory (UT) ahi chi’n gen hi. Delhi government leh lieutenant governor (LG) in nna a sepkhawm kei leh Delhi in buaina maituah ding chi’n gen hi. Kum 15 sung Congress in Delhi a vaihawmna a let sung in, buaina bangmah omlou chi’n gen hi. CPM general secretary Sitaram Yechury in a gendan in, LG leh Governor –te panmun leh thuneihna a zatkhelhte uh tuni’n thukhenna ah hiamtak in mitsuan in om chi’n gen hi. LGs/ Governor-te’n elected state government thuneihna thagum in laksak theilou chi’n gen hi.

 

Delhi BJP president Manoj Tiwari in a gendan in, Arvind Kejriwal ji, tu in dan zuilou a kivaipuakna thehdalh kenla, Constitution kichi thuneihna sangtawi pen ahi a,constitution zui a Delhi mite hoihzawkna ding in na hon sem in chi’n gen hi.

 

 

MoS Water Resources (WR), Imphal hong tung:

Arjun Ram Meghwal in tuilian in a sukkhakna bialte veh in tuilian thuakte kimuhpih

IMPHAL, JULY 4: Tunai zek a Manipur a vuah nasatak a zuk ziak a, tuilian in a sukkhakna bialte leh Dam lian deuhte enkhe ding in, tuni Nilaini in, ni nih sung state veh ding in Arjun Ram Meghwal, MoS, Water Resources (WR), Imphal hongtung hi. Imphal a hongtun nung sawtlou in, Arjun Ram Meghwal in, tuilian in a sukkhakna bialte vaveh a, hiai hun in, Letpao Haokip, State WR Commissioner, H Deleep, Chief Engineer, Pritam leh department a top official dangte’n state hong veh MoS kithuahpih uhi.

 

MoS makaih inspection team-te’n Langthabal AC nuai a tuilian in a sukkhakna munte etkhiak masakpen in nei uhi. Hiai zoh in Lilong Chajing Thongkhong, Chajing Mairenkhong leh Chajing Karam munte enkhia ua, hiai hun in Langthabal MLA leh CAF PD Minister Shri Karam Shyam-te leng tel uhi. Tuilian in a sukkhakna mun khat a, Arjun Ram Meghwal in thuthaksaite kiang a, a gendan in, a hun bangzel a NE state-te veh kual ding leh dinmun omdan lakhawm leh tuilian in nasatak a, a sukkhakna munte, a mun mahmah a vasik a, centre a official-te kiang a thil omdan zasak ding a, Prime Minister thupiak khauhtak nuai a state hong veh hidan in kigen hi. Ministry in hiai thu poimoh ngaih in enzui ding a, dinmun a hoihtheipen tan a ngeina tunding ahih nawnna ding in, a kul-le-poimoh fund leng pekhe ding chi’n MoS in chiam hi.

 

A ban a genzelna ah, tulel a central government in, hun tomchik sung daih ding panlakna maimai chihte gintak a, a neihlouh ziak in, maban a state a tuilian dalna ding long term policy leh arrangement om theite enkhe ding a state hong veh hidan in gen hi. Longterm vision toh tuilian buaina sukveng ahihkeileh, buaina huaise sem ding a, buaina kikholkawmte ziak in state in haksatna thuak zihzeh ding chi’n gen hi. Gamsung a state dangte toh teh a NE bial a tuantual lai ziakin, khantouhna tun ding in government kipekhe khin chi’n Arjun in gen hi.

 

State WR Minister Letpao Haokip in a gendan in, centre kiang a, state in a ngah himahleh tutan a hentang a om fund tengteng khahkhe ding a ngen ding ahihdan gen hi. Tulel in, Thoubal Dam in fund pending Rs 111 crore neilai a, Dolaithabi Project in fund pending Rs 25 crore neilai a, a nih un FMP nuai ah om uhi. Minister in a gendan in, MoS in state a hong veh hun lemtang a la a, tunai zek a tuilian toh kisai a special fund package bawlsak ding a ngen ding ahihdan gen a, dawnna kipahhuai a hong om ngei leng lamn hidan in gen hi. Hiai special package toh tui in tupna bialte leh mun niamna te hoihtak in dopsang in om thei ding uh chi’n gen hi. Letpao in mipite kiang ah, khantouhna nasepna khatpeuh paipih ahihlai a, government toh semkhawm ding leh nasepna pailel zekaisak lel ding kisukbuaina chihte hihlou ding inleng ngen hi. MoS Arjun Ram in, tuilian ziak a inn-le-lou taan, haksatak a khosa tuilian thuakte leng kimuhpih hi.

 

Amaute haksatna thuakpih mahmah a, panpihna kiningchingtak piak hi ding uh chi’n chiam hi. Hiai zoh in, team-te’n Imphal lui a kipan tuiletna mun New Checkon, Imphal East a Namthanpung area leng veh ua, zingchiang Ningani in, Arjun in New Delhi zuan a Imphal a pawtsan ma in, Dolaithabi Barrage Project leh Thoubal Multipurpose Project –te enkhe ding hi.

 

 

July 9 tan daih ding in GST Survey-cum-Spot Registration kipan

LAMKA, July 4: Good Service Tax (GST)toh kisai in Departmentof Taxes, Govt of Manipurleh Cental GST Bhavan,Imphal in tuni, July 4 apan July 9 tan daih dingin tuni’n Lamka khopisung a dawr tuamtuamah Survey-cum-Spot Registration& Return Fillingof GST Tax Payers panuhi.

 

Tuni sunma a kipan Zenhang Lamka area ah Department of Taxes, Govt of Manipur a pan Thari Sitkil, IRS, Addl Commissioner of Taxes leh Zamkhothang, Supt., Central GST Ccpur makaih in Women Police kithuahpihna toh Taxes Department staff-ten dawr/dukan leh business establishment-te ah GST toh kisai survey bawl uhi.

 

Survey hun ah dawr/dukan leh establishment khenkhat in GST nuai a registration bawl mahleh uh GST returns file bawllou tamtak om ahihdan a muhsuah ban uah, dawr/dukan lianpipi tel in dawrkai tamtak in GST registration bawl nailou ahihdan musuah uhi.

 

Survey hun ah dawrkai GST registration bawl nailoute’n July 4-9, 2018 sung in lai poimoh tuamtuam, PAN Card, Lease Deed/Patta, Passport 2, Aadhaar Card, Bank Statement, Emial ID ban ah Phone number tawi in office kai hunsung sunma dak 9 a pan nitaklam dak 5 kikal CGST Range Officer, Zenhang Lamka ah registration bawltheih ding hi.

 

Government in GST toh kisai ngai poimoh mahmah ahihna ah, GST Registration bawl a, Return File bawlloute’n sum tamtak liau loh thei ahihna ah GST registration bawlsate’n a loutheilou a Return file bawl chiat ding in Department of Taxes, Govt of Manipur leh Cental GST Bhavan, Imphal in theihsakna bawl ua, GST toh kisai thuchian theinuamte’n CGST Range Officer, Zenhang Lamka ah kantheih ding ban ah website www.gst.gov. in ah leng ettheih ding hi.

 

Survey-cum-Spot Registration & Return Filling of GST Tax Payers neihsung in GST toh kisai theihnop nei, Registration bawl nailou, Registration bawlta himahleh mahni a Return File thon theiloute leh a dangdang haksatna neite a thawn in panpih ding ua, hiai lam toh kisai khakna nei peuhmah in hiai hun phattuampih chiat ding in ngen uhi.

 

GST Registration ahihleh mi kua hiam sum dawng/sum loh a guaih, kum khat a sum veikual zah Rs. 10 lakhs leh a tunglam hiphate’n GST registration a bawl ngeingei ding uh chih hi a, Registration bawlkhit chiang in a vangkim in Return File thot ngai a, tuate mimal in mahni a kibawl zel ding hi a, tu lel dinmun in hiai Registration bawl ding dan leh, Return file ding dan toh kisai in haksatna tuak hunkhop om a, hiaite panpihna ding leh maban a amau kia a leng ahihtheihna ding ua Survey Cum Spot Registration & Return Filling of GST Taxpayers sai a om hi’n thutut kingah hi.

 

 

Hospital OT ah Anathesia Machine puakzak, OT kikhak

LAMKA, July 4: Lamka Damdawi Inn a Operation Threatre (OT) a major operation chiang a zat a om Anathesia Machine, tuni sunnung dak 1 vel in puakzak a, tua ziak in operation sutzop theihlouh a om in OT kikhak hi.

 

Tuni ahihleh Surgery Dept-te a dia Operation Day hi a, damlou bangzahhiam operation bawl man mahle uh bangzahhiam bawl manlouh in om hi. Hiai Anathesia Machine ahihleh District Hospital a OT honkhiak ahihtung a kipan kizang hi a, machine thak lei himaleh zattheihlouh a om ziak in a lui mah tunitan zat a om hi’n thutut kingah hi.

 

Anathesia Machine ahihleh Rs 1 lakh vel man hi a, hospital a dia vanzat poimoh mahmahte lak a khat ahihna ah a kisaipih thuneitute’n a baihtheipen a, a thak lei poimoh hi’n mi tamtak a pan thutut kingah hi.

 

 

Paite Literary Festival 2018 kipan ding

LAMKA, July 4: Lalpuithluaii Foundation School ah ni nih sung daih ding in zingchiang, July 5 sunma 10 a kipan in Paite Literary Festival 2018 kipan ding hi. Paite Literary Festival 2018 ahihleh Paite Literature Society/Paite Laipau Saipawl (PLS) in Paite Tribe Council (PTC) GHQ; Siamsinpawlpi (SSPP) GHQ; Young Paite Assn (YPA) GHQ leh Paite Culture Society (PCS) toh pangkhawm a, a sai uh ahi. Zigchiang, July 5 sunma dak 10 in Paite Literary Festival 2018 hongkhiakna om ding a, hiai hun ah ‘Workshop on Paite Writing System, Poetry Slam, Conversation with Writers chihte om ding a, nitak in Tangthu Genna, Paite Classic Movies Screening ban ah events chituamtuam folks songs, fusion music, Paite riddles & idioms, pop quiz chihte om ding hi.

 

July 6 in Conversation with Cables Networks and Online Newssite Admins, Paite Laipau Bulsuutna, Lapau tips in Paite-Conversation with Songwriter, Conversation with Editors (Printed Periodicals) chihte om ding a, nitak hun in Tangthu Genna, kipahman hawmna leh Paite Literary Festival 2018 khakna ban ah mipi’n zangta laamkhawmna om dig hi.

 

Festival hunsung in food staffs ban ah book exhibition, costume display ban ah art exhibition om ding hi. Paite Literary Festival 2018 hun kuapeuh in uap chiat ding in PLS in chialna bawl uhi.

 

 

Sadar Hills a pan mi 2 mat a omte’n mihing sa ne

LAMKA, July 4: Kangpokpi district sungSadar Hills a pan naupangpimang sawm hidiamuanmoh ziak a mipi’n amatkhiak uh mi 2-te testtuamtuam bawl ahihnaua kipan mihing sane uhahihdan muhsuah in omhi.

 

Thutut kingah dan in, muangmoh ziak a matkhiak a om mi 2-te RIIMS Hospital, Imphal a Medical Examination bawl ahihna ua kipan mihing sane ahihdan uh theihkhiak hi a, amaute kipuanna a pan Assam a khua khat a kipan leh Sadar Hills district sung Saikul Sub-Division sung a om T. Champhai leh Ichaigojang khua a om hi uhi.

 

Mat a om mi nihte a pau uh theihsiamlouh om ziak in ahihna diktak uh theihchet hinailou a,himahleh amau pawl in naupang 6 pimangta leh a sa uh a nek ban uah hiamhei tawi a mi 6 kithuah uh hi’n kipuang ua, midang 4 ahihleh mipi’n a theihkhiakma un kihemkhe man uhi. Sadar Hills sung Saikul Sub-Division a Champhai khua ah zanhal nitak in meltheihlou khat naupang pimang sawm hidia muanmoh ziak in mipi’n man in thudotna nei ua, thudotna a pan Saikul Sub-Division sung mah a om, Ichaigojang khua ah a kithuahpih midang khat mankhe nawn uhi.

 

 

NH 102-B, Guite Road keklet ding tungtang genkhawm

LAMKA, July 4: Shyam Lal Poonia, IAS, DC/Ccpur makaih in tuni, July 4 sun dak 12 in amah office chamber ah National High 102-B, Guite Road keklet tungtang meeting om hi. Hiai hun ah DC/Ccpur; K Kabib, IPS, SP/Ccpur; Ginmuan Ngaihte, MCS, AC to DC; Hiron Kashyap, Engineer, NHIDCL; MK Elizabeth, EO, Agriculture, Dahyan Khelowary, Asst R & RD; Bhamhar Jans, Site Manager; John Thanglienmang, AE/PHED; Lianminthang, MCS, SDO Suangdoh; Uttam Basak, Project Manager, CET; Poonal Homdal, LA Expert; K Raishwar Singh, Manager, NHIDCL; M Jugindro, AE, Horticulture & SC; Zolian Guite, AE/ PWD; PL Hauzel, Head Clerk; LK Hatzaw, DGM/ MSPDCL; Jameson Sehlal Hangshing, MCS, SDO/ Singngat leh N Thuamkhansuan, MCS, SDO Mualnuam tel uhi.

 

Meeting hun ah National Highways and Infrastructure Development Corporation Limted (NHIDCL) in NH-102-B, Guite Road, Singngat-Tuivai kikal a bawlhoih thak uh, tulel a lamlian Lane-I pen Lane-2 a kekletna dia Draft Feasibility report a bawl uh toh kisai genkhawm uhi.

 

 

Phoenix Infant Radiant Warmer Machine hongtung

LAMKA, July 4: Lamka Damdawi Inn a Meternity Ward a zat ding machine thak, Phoenix Infant Radiant Warmer Machine kichi tuni, July 4 sunnung dak 2 vel in Imphal a pan Lamka puaktung in om hi. Infant Radiant Warmer Machine ahihleh Meternity Ward labour room a zat hiding a, nauneih zoh chiang a naungek suklumna ding ahi. Hiai machine ahihleh company a pan technician-te’n fit ding ua, zattheih pah hiding leh Rs. 98,000 vel man hidan in Dr Vumchinpau Tonsing, Medical Supt. in gen hi.

 

 

RICYDOM in CMRF ah Rs. 10,000 thoh

IMPHAL, JULY 4: Tuilian thuakte panpihna ding in, tutan in Chief Minister’s Relief Fund (CMRF) ah donation lut zel lai a, huai toh kiton in tuni, Nilaini inleng, RICYDOM (organisers of Yakairol ’18), Heingang Kendra tuailaite’n tunai zek a state sung mun tuamtuam a tuilian huaisetak thuakte panpihna ding in, CMRF ah Rs. 10,000 thoh uhi.

 

Chief Minister’s Secretariat a program lianlou khat zatna hun ah, RICYDOM palaite’n a sum thoh uh Chief Minister N. Biren Singh kiang ah pia uhi. N. Biren in tuilian thuak state mipite panpihna ding a phatuamngaitak a sum thoh tengteng kiang ah kipahthu gen hi.

 

 

Van Mahotsav zatna in Ccpur District ah singnou 11,620 suan in om

LAMKA, July 4: District Forest Officer,Southern Forest Division,Ccpur makaih in tuni,July 4 in Lamka leh a sehvelah a 69veina, “VanMahotsav” zatna in singnousuanna om hi.

 

Tuni a “Van Mahotsav” zatna hun ah Shyam Lal Poonia, DC/Ccpur; K. Kabib, IPS, SP/Ccpur; Dr. DD Haokip, IFS, Addl Principal, Chief Conservation of Forest, Govt of Manipur leh Kham Suanmung Tawmbing, IFS, DFO, Ccpur in SP Office ah singnou suan ua, tua zoh in K. Kotlian khosak ah Zillai-GHQ in singnou a suanna mun un enkhia uhi. Zillai-GHQ in ahihleh K. Kotlian khosak ah gam acre 4 vel a lian ah singnou chituamtuam tamtak suan uhi. DC leh a team-te’n Horeb Prayer Mountain Construction Committee makaih a Sielchangbung, Teijang khua a singnou suanna mun pha uhi. Sielchangbung ah Mangkholal, Chairman, Horeb Prayer Mountain Construction Committee makaih in singnou tamtak suan uhi.

 

Hiai mun a pan Khuga Dam a Tribal Martyrs’ Park a singnou suanna mun enkhia uhi. Hiai hun ah JACAATB makaih in Tribe tuamtuam a pan makaite paikhawm in Tribal Martyrs’ Park ah singnou 1,200 suan ua, hiai hun ah Kham Suanmung Tawmbing, IFS, Dr. DD Haokip, IFS, David Athokpam, Deputy Ranger, H. Jamkhogin @ Gigin Hanghal, Ranger, Ccpur, Niangthianhoi, Asst Conservator of Forest, Ccpur leh Ngaimuankim, Deputy Ranger, incharge, Forest Beat Office, Bungmual ban ah Forest Department a pan staff-te’n singnou suanpih ua, Tribal Martyrs’ Park a singnou suan ding 800 piak himahleh 200 piakbeh uhi.

 

Tribal Martyrs’ Park a pan Sixth Sikh Light Infantry (Khuga Battalion) in Van Mathotsav a zatna uh pha in singnou suankhawm uhi. Hiai hun ah Khuga Battalion a pan Lance Niak Sandeep Singh in singnou suan a poimoh dan gen in, Dr. DD Haokip leh Kham Suanmung in leng thugen uhi.

 

Dr. Haokip in Van Mahotsav kichi festival poimohtak ahihdan gen a, singkung ziak a hinna nei khempeuh a dia poimoh huihsiang, Oxygen piangkhiak ban ah tuisiang om hi’n gen hi. Kham Suanmung in singkung in mihing a dia poimoh mahmah oxygen a piak toh kiton a mihingte’n huih i khahkhiakte leh industry tuamtuam a pan carbon dioxide pawtte singkung a dia poimoh hi’n gen a, mihing in oxygen bawlkhethei mahleh oxygen leh carbon dioxide khavei thu a pesuah thei khawl bawlkhiak om nailou ahihdan gen in, mihingte’ adia Oxygen a thawn a muhtheih a manphat dan gen hi.

 

Hiai mun a pan S. Molhoi khua a singnou suanna enkhia ua, huai hun ah khosung nungak-tangvalte’n lampi siktuak ah singnou 2,000 suan uhi. Van Mahotsav zatna toh kiton a tuni a Ccpur District sung a singnou suan a omteng ahihleh SP Office Campus ah singnou 120, K. Kotlian ah 2,000, Sialchangbung, Teijang ah 1,800, Tribal Martyrs’ Park ah 1,200, Khuga Battalion camp ah 2,000, S. Molhoi ah 2,000 leh G. Monglian ah 2,500 hi a, a gawmkhawm in singnou 11,620 suan in om hi.

 

Van Mahotsav ahihleh India gamsung pumpi a 1950 a pan singnou suanna dan a neih hi a, Ccpur district a dia target 10,000 piak a om lak ah target 1,620 val sepsuah ahihna tung ah kithuahpihna pia, District Administration ban ah phatuamngai pawl tuamtuamte tung ah Kham Suanmung Tawmbing, IFS, DFO Ccpur in kipahthu gen hi.

 

 

 

…a kimzaw deuh in : hiai mun ah

 

 

 

 

 

 

 

RELATED

The Lamka Post | July 01, 2018

The Lamka Post | July 02, 2018

The Lamka Post | July 03, 2018

The Lamka Post | July 04, 2018

 

Read 195 times
Login to post comments