You are here: HomeNewsLamka PostThe Lamka Post | July 07, 2018

The Lamka Post | July 07, 2018

Written by  Published inLamka Post Saturday, 07 July 2018 08:39
The Lamka Post | July 07, 2018

MU buaina in dawnna mulou:

July 9 in MUTA in relay hunger strike pan ding; Biren i chih VC Pandey mai a sahang khoizual ahi: Professor

IMPHAL, JULY 6: Manipur University a nasep dinkhawlna ni 35 bang chingta mahleh Union HRD Ministry a kipan dawnna a omlouh toh, tu dinmun buaina sukvengna ding muhkhol a omlouh ziakin, University a teacher-te’n July 9, 2018 a kipan Manipur University Complex a kikhelhthoh a, anngawl kiphinna ( relay hunger strike) pan ding in kisakhol uhi.

 

University leh student-te humbitna ding in, kiphinna i sutzop zel uh poimoh a, University thubuai a kigolhna ding a, bang in Chief Minister bahsak hiam chih ka theisiam theikei chi’n min taklat ding utlou Professor khat in gen hi. Manipur CM N Biren Singh tu in, RSS mi VC Pandey mai ah vaihawm BJP-te khoizual sahang khat suakta chi’n professor dang khat in chiamnuih kawm in gen hi. A ban a genzelna ah, Chief Minister in Manipur University sungthu ah hih ding bangmah neilou a, himahleh hiai thubuai toh kisai, state studentte buaina ahih ziak in, HRD Ministry toh thubuai delhzui thei lawtel a, a daih didena ziak bangdang hilou in, Prof. AP Pandey mai a sahang khoizual toh kibang chi’n gen hi. Relay hunger strike neih dingdan bawlkhiak ahih toh kiton in, July 9, 2018 zinglam dak 11 a kipan in Manipur University Traffic point ah Mathematics leh statistic department facultyte’n relay hunger strike pan ding uh hidan in MUTA thusuak in taklang hi.

 

Department chih a faculty-te’n July 21, 2018 tan relay hunger strike sunzom ding uh chi’n MUTA general Secretary Prof. Sanjukumar Singh in press thusuah ah gen hi. Tuabangkal ah, tuni Sintawpni in Manipur Press Club, Imphal ah ‘Public discourse on Manipur University crisis’ thupi zang in, autocratic university ies authority kalh a panlakna, students rights nenniamna leh siamsinna mahni thuneihna nuai a koihna chihte toh kisai in discussion neih in om hi. Hi ai hun in, tulel a Imphal a om All India Students Federation (AISF) National General Secretary Vishwajit Kumar leng tel hi. Hiai hun in, AISF Manipur State Council in Manipur University Vice-Chancellor kitawp ding ngetna gum ding in thupuk uhi.

 

Manipur University a buaina toh kisai a, Union HRD Ministry a tel independent body in a piaklut report toh kisai a dawnna omlou hidan in thusuak in taklang hi. BJP member-te lak a khenkhat in,VC Prof. Adya Prasad Pandey khek ding leh kheklouh ding thu ah dawnna kintak a piak ding a kineppih ziak un, Manipur thubuai toh kisai a HRD Ministry lungput in kipahsak chilou hidan in muhtheih in om hi.

 

Thudang khat in a taklatna ah, MUTA, MUSU leh MUSA-te’n lakhe ding a nasatak a, a phut uh VC Prof. Pandey lam a pang ding a, BJP Makai khenkhatte a kipan Union HRD Ministry in vauna maituah hidan in taklang hi. Central makaite pompihna tellou a, thupukna bangmah a lak theihlouh ziak un, hiai thubuai toh kisai state Unit BJP makaite a ding in lunat huai mahmah suak hi.

 

State unit BJP a kipan thusuak in a taklatdan in, Manipur University a buaina kha bangzah hiam sung kisunzom zel lai maithei ding, student-te’n buaina huaisezaw sem maituah ding uh chi’n gen hi.

 

MU thubuai in, gamkang mah bang in mundang peh sawn lel a, Singjamei a kipan Kakwa tan a Meira Paibis leh local club-te’n MUSU, MUTA leh MUSA-te thilnget gupthu puang uhi.

 

 

Tribal student pawlpite bandh in Imphal –Moreh route ah hindan ngeina buaisak

IMPHAL,JULY 6: Manipur a Higher Secondary School-te a tribal Language (MIL) teacher lak ding ngetna a, tuni Sintawpni zinglam dak 6 a kipan tribal student pawlpi 3te’n indefinite statewide bandh a pat ziak un Hill district mun tamtak ah hindan ngeina naktak in buaisak uhi.

 

Higher Secondary School-te a tribal Language (MIL) teacher lak ding ngetna a bandh puan a om tribal student pawlpi dang hunkhop inleng nungthuap uhi. Himahleh bandh in state a valley district subuai khalou hi.

 

Tuni zingtung a kipan in, Thadou Students Association (TSA), Chandel/Tengnoupal Branch volunteer-te’n Imphal -Moreh Road dung a lamlian lai ah gari peite hal ua, NH 102 tawn a tai gari tengteng khaktan uhi. Bandh pailel in Indo-Myanmar border trade leng naktak in buaisak hi. Thadou Students Association, Chandel/ Tengnoupal Branch, General Secretary Lelen Haokip in thuthaksaite kiang a, a gendan in, tribal student-te thilngette ngaihsaklouhna in, thilnget toh kisai ngetna diktak ahihna toh bandh puan a om gum ding in studentte phutluih ahi uh chi’n gen hi. Thilnget tangtun sak ahihma teng bandh sutzop zel hi ding chi’n gen hi.

 

State a Higher Secondary Schoolte a Tribal Language (MIL) Lecturer lak ding state government a ngaihsaklouh ziak in, tuni Sintawpni a kipan in Thadou Students’ Association, General Headquarters (TSA-GHQ), Rongmei Naga Syudents’ Organisation, North East Idia (RSO-NEI) leh Liangmei Naga Katimai Ruangdi (LNKR-AMN)-te’n indefinite state wide bandh pan uhi. Tribal student-te’n state a Higher Secondary School-te MIL tribal language lecturer guang ding in ngen uhi.

 

June 26, 2018 in Joint Student pawlpite’n press communiqué tungtawn in state govermment kiang ah thutawp bawlkhum ua, June 30, 2018 ma ngei a MIL teacher lakna ding notification suah a, a kintheipen a panla ding in Chief Minister leh Education minister kiang ah ngen uhi. Indefinite statewide bandh in medical, media, Water Supply, Electricity, biakna vai leh airport chihte huamlou hi.

 

 

Ministerial Committee in Kwatha Khunou a gamgi suangphuhte enkhia

IMPHAL, JULY 06: Tunai zek a Subsidiary Border Pillars phuh a omte a kiphuhna mun uh dik taktak hihiam chih a mun mahmah a va-enkhe ding in, tuni Sintawpni in Revenue Minister Karam Shyam makaih ministerial team-te’n Kwatha Khunou (Moreh Sector) a Indo-Myanmar Border dung a om gamgi suangphuh (pillar) omna munte va veh uhi.

 

Revenue Minister makaih team member-te ahihleh Water Resources & YAS Minister Letpao Haokip leh TA& Hills Minister N.Kayisii hi uhi. Inspection hun in, Assembly Deputy Speaker K Robindro, MLA Th Satyabrata Singh, K.Leishiyo, Heikham Dingo Singh & D Korungthang ban ah Special Secretary Home, Kh. Raghumani Singh; Revenue Secretary T Ranjit Singh leh Deputy Secretary Y Rajen; Tengnoupal DC A. Tombikanta leh SP Dr. S Ibomcha leh a kisaipih official dangte’n inspection team-te kithuahpih uhi.

 

Thuneihna sangtak tawi Ministerial Committee Chairman Minister Karam Shyam in a gendan in, Manipur gamsung kilometre 2-3 a thuk gamgi suang phuhna thu awlmoh kha tengteng leh CSO leh voluntary organization tuamtuamte ngohna toh kisai a, tunai zek a gamgi thubuai toh kisai, tulel a Government in awlmoh petmah ahi chi’n gen hi. Hiai thubuai toh kisai a thupukna lak ahihtheihna ding leh mipite deihna bang a nasep ahihtheihna ding in, Government kiang ah factfinding report piak hi ding chi’n gen hi. Kwatha Khunou a lampite gari tottheih ding a bawl ahihtheihna ding in, SP Ibomcha kiang ah panpihna sum Rs. 1 lakh piak hi ding chi’n Minister Karam Shyam in chiam hi.

 

 

Kapvanghao Singson in gari gute a pan gari lakkiksak

LAMKA, July 6: Kabib K., IPS, SP/Ccpurin tuni, July 6 in a officeah two wheeler gari gu minih a pan thagum a laksakmi khat kiang ah kipahpihnalai leh thilpiakpia hi.

 

Thutut kingah dan in, Kapvanghao Singson (36) s/o Gintinthang of Leijang khopi, tuni zingkal dak 6 ginma deuh a Tuitha Luidung a hoh, lamgei ah Yamaha Cygnus Alpha, Registration Number MN02G 3386 mu a, luidung ah Pangal pasal nih in lehkha a paihlai uh mu hi. Huai hun in awlmohkei mahleh a thilhih uh a muh a pan muanmohna neithak in, a nunglam ua kipan awl a pai in khatpa pummat a, huchihlai in Pangal pasal nih lak a khat pen in, Kapvanghao, a nunglam a pan tuanpuk a, tua zoh in a nih un Tuitha Luidung zui in taisia uhi.

 

Mi nihte a taikawm un tui lak ah lehkha khat paikhe malam ua, Kapvanghao in huai lehkhe tawm in a velchet leh lamgei a kikoih two wheeler a lai poimoh ahihdan theikhia in, a kiim a tengte’ kiang ah kan mahleh a neitu a omlouhtak un gari Registration Certificate (RC) a pan gari neitu zongkhia hi.

 

Gari neitu ahihleh Thangkhohao Haokip (38) s/o Zamkhai Haokip of L. Semol hi a, mi nihte’n thil omdan police a report a bawl ua kipan SP/Ccpur in a thilhih uh ettonhuai sakziak in Kapvanghao kipahpihna lai a piak ban ah a puanak ding leisak in kipahman pia hi.

 

Hiai toh kisai SP/Ccpur in a genna ah, khosung-vengsung bitna dia Public Policing poimoh leh michih in huai mohpuakna la a pilvangtak a police toh kithuah a siatna tungtheng dingte a pan kivenbitna omthei hi’n gen hi. Huai ban ah Kapvanghao Singson in a huntak a hangsanna suah a, hiai bang a lauhuai dinmun a pan gukmang a om two-wheeler lakkikna dia pan a lakna kuapeuh a dia etton thamching leh district in amah ziak a kisaktheihhuai khop mi hangsan nei ahi chih theihpihna leh kipahpihna a pahtawina piak a om ahihdan gen hi. Tua ban ah tunung a hun lemtang masa a ‘Go to Village Mission’ hun khat a Public Policing kichi guideline honkhiak leh Lamka khopi sung a patkhiak hiding hi’n gen hi.

 

SP/Ccpur in a genzelna ah, khopi sung ah hun tamzaw a mun poimoh teng a police personnel om ding leh Patrolling Party-te’n muanmohhuai munte etkhiakna neizel ding uh ahihna uah, guta-lata kichi khopi sung sang a khopi pua a uang diak ahihziak in kuapeuh pilvang ding in theisak hi. Gari gukmang a om ahihleh June 20, 2018 a Registration kibawl hi a, registration bawl ahihnung ni 16 lel paipan hi. Gari gute Tuitha Luidung zui a taisuk uh ahihdan theih ahihnung in Police Team khat in Saidan tan delh mahle uh melmuh ding omlou hi’n Police-te’n gen uhi.

 

Gukmang a om gari ahihleh a neitu’n inn varandah a, a koih ahihban ah a chabi lakhe mangngilh a, tua ziak in baihlamtak a gukkhiak a omthei ahi. Gari gutute’n a chabi lakhelou a, a kikoih ziak un Kapvanghao in SP leh Police Officer-te theihpihna toh a neitu Thangkhohao Haokip khut ah pekhia hi. Kapvanghao leh gari gute a kisualna lam uah Kapvanghao puan-ak kek in, huai ban ah a liangnuai nuamlou a sak ziak in X-ray lak himahleh bangmah chilou hi.

 

 

Dynamo zang a nga mante kipekhe di’n theisak

LAMKA, July 6: Khuga Dam Development Authority (KDDA) in tunaizek a Jangkhomang of S. Phaiza leh Pausuanmang of Kullian in Khuga Dam ah a guk a Dynamo zang a nga man uh ahihdan theikhia uhi. Huai toh kiton in mi nihte July 10, 2018 ma ngei a KDDA-te kiang ah kipekhe ding in theisak ua, hiai theihsakna a ngeingaihkei ua leh Police ah FIR bawl ding uh hidan in taklang uhi.

 

 

Mun tuamtuam ah a 44-na Mizo Hmeichhe Insuihkhawm Pawl Ni (Day) zat in om

Aizawl July 6: Mizoram state sung muntuamtuam ah tuni in MizoHmeichhe InsuihkhawmPawl Ni (MHIP DAY) a44-na zat a om hi’n thusuakin taklang hi.Hiai toh kisai inMizoram branch tuamtuamah MHIP generalheadquater makaite’nday zatna neipih ua, statea pan makai khenkhat inlenghiai Day programmehun ah kihel in programmeuap uhi.

 

MHIP Day ahihleh branch tuamtuam a zat ahih dungzui in zat dan chi tuamtuam in zat in om a, mun khenkhat a kidemna tuamtuam sai in om a, kisuklimna chihte ban ah migentheite panpihna hun a zang pawl leng om uh ahihdan taklat in om hi.

 

MHIP Day zat ahihna toh kisai in MHIP President Saipuii in thuchah bawl in MHIP Day ahihleh Mizo numeite a ding a ni poimoh mahmah hi a, Mizoram solkar inleng khawlni hiding a ana puan hial ahi chi hi.

 

Aman a genzelna ah MHIP ahihleh tagahte enkoltu hi a, hiai toh kisai in mun tuamtuam a pan panpihna petute, pawl tuamtuam leh mi malmalte tung ah kipak mahmah ahihdan gen hi. Huai ban ah MHIP thupi leh dinsan ding in Numeite leh naupangte dinmun dopkang ding chih leh panpih ngaite panpih ding chih hi a, hiai ahih dungzui in MHIP Genreal headquater inleng pan nasatak a kila touzel in tuni tan in lohchinna thupitak kingah khinta ahi chi’n gen hi.

 

Tulai khovel ah numeite leh naupangte’n bitna mu nawnlou ua, hiai toh kisai a panlatu poimoh mahmah ahihna ah MHIP in hiai bang a pan a lakna pen pawl tuamtuam leh state government mahmah inleng kithuahpihna a piakzel bang a petou ding leh tuasang mah a leng phungvuh zaw ding in ngetna bawl hi. Huai ban ah MHIP member-te kiang ah leng naupang kep ngai leh don ngai ban ah panpih ngaite panpihtu muanhuai hiding in chialna bawl a, member-te’n mahni hihna chiat thei a kuh kalna leh ginomna suah a nna khat peuh a chitaktak a sep ding ahi chi’n theihsakna bawl hi.

 

MHIP Day ahihleh tun in ITI Synod Conference Centre ah leng zat in om a, huai hun ah bialtu MLA Lt.Col.ZS Zualan in chief guest hihna toh uap in, numeite poimohna leh nute poimohna thugen hi’n thusuak in taklang hi.

 

 

VDF Assn in MGEL toh kisai genkhawm

LAMKA, July 6: Ccpur District VDF Welfare Assn (CDVDFWA)in tuni, July 6 in Tuibong CommunityHall ah meeting poimohtak neiua, huai ah MGEL/CPIS/SIN toh kisaigenkhawm in, hiai toh kisai a buaina lehhaksatna neite dinmun genkhawm uhi.Hiai hun ah Laltingen Vaiphei,President, CDVDFWA in Manipur governmentin VDF teng MGEL/CPIS/SINa huamtel dia theihsakna a bawl dungzuia VDF personnel-te lak a hiai toh kisaia buaina leh haksatna neite tungtanggenkhawm a om hi’n gen a, Secretariat,Imphal a MGEL/CPIS/SIN toh kisailehkha pelut nailoute’n a kinthei pen azingchiang, July 7, 2018 sunma dak 10tan a Min leh VDF Number, ReservedLine a VDF heutute’ kiang a pelut chiatding in theisak hi.

 

 

Paite Literary Festival 2018 zousiang

LAMKA, July 6: Paite Literature Society / Paite Laipau Saipawl (PLS) saina a July 5 a pan Lalpuithluaii Foundation School a Paite Literary Festival 2018 neih a om tuni nitak in zousiang uhi.

 

Tuni, July 6 sunma dak 10 a pan 10:30 kikal Moderator Golan Naulak makaih in ‘Conversation with Producers Cable Network and Online News-site Administrators’ nei ua, huai ah Cable Network a pan resource persons in Hornbill Cable Network, Tuilou Tv, Angels Vision leh Skynet pang ua, online news-site administrators a pan resource person in Zogam.com, Zogamonline leh Phualvatimes pang uhi. Sunma dak 10:30 a pan sun dak 12:30 kikal Moderator N Thangzamang makaih in Paite Laipau Bulsuutna om a, huai hun ah resource person M Nguldokhup in ‘Paite Syntax’, Rev Dr K Mangte in ‘Translation of Other Languages into Paite’, Khamkhokam Guite in ‘Paite Humuors and Creative Writing’ ban ah Dr Nianglianmoi Khuptong in ‘Paite Phonology’ toh kisai sinsak ua, sun dak 12:30 a pan sun dak 12:45 kikal Folks Songs hun in zang uhi. Sunnung dak 12:45 a pan sunning dak 1:45 kikal Moderator Dr Tualchin Neihsial makaih in Lapau Tips in Paite: Conversation with Songwriters om a, huai hun ah resource person in V Siampu, P Swant, T Pumkhothang leh V Nunlian pang uhi.

 

Sunnung dak 2 a pan dak 3 kikal Moderator Thangkhanlal Ngaihte makaih in Conversation with Editors Printed Periodicals om a, huai hun ah resource person in Editors Printed a pan Manipur Express, The Lamka Post, Tongluang, Kristian Thukizakna, Khris Palai, PCI Messenger leh Ruth Messenger pang uhi. Nitak dak 6 a pan dak 7:30 kikal in tangthu genna om a, nitak dak 7:30 a pan dak 7:45 in kipahman hawmna leh Paite Literary Festival 2018 khakna om in, nitak dak 7:45 a pan dak 8 kikal in mipi’n zangta laam khawmna nei uhi.

 

Paite Literary Festival 2018 sung in Lalpuithluaii Foundation School Campus ah food staffs ban ah book exhibition & sale, costume display, art exhibition & sale, weaving/handloom, traditional music instruments display, naangphan ban ah games chituamtuam om hi.

 

 

Laibu thak “LAPD” hongkhe ding

LAMKA, July 6: Zingchiang, July 7 sunnungdak 1 in RayburnCollege Auditorium, NewLamka ah V. Hangkhanlian,Minister (Agri., Vety.& AH), Govt of Manipurin Paite pau a kigelh,phuahtawm tangthubuthak “LAPD” kichihongkhe ding hi. Hiaitangthubu thak ahihleh“LAPD” kichi ahihlehValte Ginkhenpau in gelhhi a, aman gelh mah “Julie!Aw, Julie!” kichi laibuJune 2, 2018 in honkhiakin ana omta hi.

 

 

Laikunga Hmar mualliam

Aizawl July 6: Radio A-Grade Artist LaikungaHmar, zannitak ina tenna inn ah si a, tuni’nkivui hi. Amah ahihlehkum 86 a upa hi a, kum1952 in All India Radio,Shillong a la ana khumin kum 1994 in “Sensiari”kichi album bawl hi.

 

Aman kum 2000 in Lelte Award “Singer of the Century”leng ana lata a, album a bawl nanungpen ahihleh “Family Christma  Album” ahi.

 

 

BYF Imphal Division in sisan pia

LAMKA, July 6: Evangelical Baptist Convention in “Nang Vualzawlna Hi In” chih thupi a neih uh toh kiton in Pathian min a midangte a ding a vualzawlna hiding in panpihna nasep paizom zel a, tuni July 6 in EBC Imphal Division nuai a Division Baptist Youth Fellowship a pan pasal 3 in Shija Hospital, Langol, Imphal ah damlou sisan poimohte a ding in a thawn in sisan thoh uhi.

 

Hiai hun a sisan tuailai member 3 ahihleh H Donglianmang, T Ginsuanlal leh Mangboi Tunglut hi ua, amaute’n ahihleh EBC Imphal Division in project a patkhiak uh damlouhna ziak a Imphal naih ngai, pau leh ham ban ah damdawi inn theilou, panpihtu lemchang neiloute panpihna dia patkhiak a om Samaritan Project tungtawn a sisan a piak uh ahi.

 

 

 

 

 

...a kim zaw in : Hiai mun a

Read 428 times
Login to post comments