You are here: HomeNewsLamka PostThe Lamka Post | July 13, 2018

The Lamka Post | July 13, 2018

Written by  Published inLamka Post Friday, 13 July 2018 08:29
The Lamka Post | July 13, 2018

Gamgi leh MU thubuai toh kisai in press conference nei

Official record dungzui in BP 81 ah kikheng lamdang bangmah omlou: CM Biren

IMPHAL, JULY 12: Indo-Myanmar boundaryleh Manipur Universitythubuaite toh kisai atuni Ningani a Chief Minister’sSecretariat a pressconference a Chief MinisterN. Biren Singh in agendan in, mipi lungsimbuaina sukvengna dinga, a kisaikhakpih tengtengtel a, Indo-Myanmarboundary dung a mainBorder Pillar No. 80 -82kikal a subsidiary pillarteomna munte toh kisaivelchian ding a Governmentof India surveyteam khat sawl ding aState Government inCentre kiang a laikhak hiding in gen hi.

 

Press conference ah N. Biren Singh in, Manipur state lam a main Border Pillar No. 81 suan a om hidan a ngohna om naktak in nial hi. India- Myanmar Boundary Agreement, 1967 dungzui a BP 81, a kitunna mun ngei mah a om den lai hidan a genkawm a, Chief Minister in a gendan in, pawl khenkhat in mipite kiang a thudiklou a theihsakte uh awlmoh mahmah a hihdan gen a, Manipur state lam a BP 81 suan a hihleh leng tulel a State Government term pailel sung a suan hilou ding chi’n gen hi. Hiai thubuai in mipite lungsim buaisak leh a dahsak mahmah ziak in, State Government in, State mipite deihdan leh mipite lungtunna bang a, thubuai genvengna ding a hihtheihtawp suah in panla hidan in gen hi.

 

N. Biren in a gendan in, June 26, 2018 a local newspaper khat in,Manipur gamleitang liantak Myanmar kiang a piakkhiak a om hidan a, a taklat toh kiton in, State Government in June 27, 2018 in Government of India kiang ah laikhak a, hiai thubuai sukveng a hihma survey work pailel khawlsak ding a Joint Survey Team kiang a theihsakna bawl ding in ngen hi. June 29, 2018 in State Government in Union Ministry of Home Affairs a kipan in laithon khat a mu in, hiai segment (BP 80 to 82) toh kisai hun sawtpek a kipan sukveng a om khin leh gamgi thu toh kisai a thu buaihuai bangmah omlou ahihdan taklat in om hidan a genkawm a, Chief Minister in a gendan in,Manipur State Government a awlmoh, buaipih a om lel nasep om sun ahihleh subsidiary pillar koihna ding a joint survey leh leitang laksak a om kha hiam chih ahi chi’n gen hi.

 

Ministry in State Government kiang ah, verification neih ding ahihkeileh a mun a va phak ding a lunggulh leh, huai ding a, a kisaipih officialte Manipur a sawl a hihtheihna ding ua, Government of India theisak ding a ngen hidan in N. Biren in genbeh hi. March 5, 2018 a, Chief Minister in a gendan in, Government of India in Chief Secretary, Government of Manipur kiang ah laikhak in main BP 80 – 82 kikal a Subsidiary Pillar bawl leh survey neihna ding a gam nih Joint Survey Work bawl ding a 12.03.2018 a Survey of India team-te Manipur tung ding uh hidan in theisak in chi’n gen hi.

 

BP 80 – 82 kikal a Subsidiary Pillars bawlna ding in Joint Survey Team-te’n survey bawl ua, himahleh official record dungzui in main BP 81 khoihkhalou uhi. March 12, 2018 a kipan June 12, 2018 tan a joint survey neih a hih sung in, Survey team ahihkeileh a kisaipih thuneite’n main BP 81 omna mun toh kisai a gelhthoh ahihkeileh kam a complaint bangmah bawl neilou uh hidan in N. Biren in gen hi.

 

Chief Minister in a genzelna ah, subsidiary pillars survey bawlna toh kisai khosung mite theisak ding in, December 1, 2017 in DC leh SP Tengnoupal-te’n Kwatha vapha uhi. Tutan a BP 81 omna mun kisuanlou a hihdan chiansak semna ding in, N. Biren in thuthaksaite kiang ah, kum 1913 leh 1957 a Manipur leh Myanmar boundary map luite leng lak hi. International boundary vis-a-vis traditional boundary thubuai tangkoupih a om awlmoh kawm in, State Government in United Committee Manipur (UCM) tel in a kisaipih tengteng toh consultation meeting leng nekhin chi’n Biren in gen hi.

 

Manipur University thubuai toh kisai a, Chief Minister in a gendan in, amah makaih State Government team-te’n University a buaina omlel toh kisai theisak ding a, zingchiang Sintawpni a Union Human Resources Development Minister Shri Prakash Javadekar kimuhpih ding uh hidan in gen hi. Chief Minister in a gendan in, MU a buaina omlel poimoh ngaih mahmah hidan in gen a, State Government in MUTA leh MUSU palaite toh meeting neih ding tel in, panlak theihna chiteng a panla a, Union Human Resources Development Minister kiang a Manipur University community –te dinsan thute leng hoihtak a theisak uh hidan in gen hi. State Government in hiai thubuai poimoh ngaih mahmah a, hiai thu genkhawm ding in State Cabinet in meeting hunkhop leng nei khin chi’n gen hi. Manipur University i chih Central Government institution khat a hih ziak in, State Government kigolhlut taktak theilou chi’n gen hi. Himahleh State a student career kisegawp thei ding poimoh ngaih kawm in, State Government in thubuai sukvengna ding in hihtheih tawp suah in panla chi’n gen hi. N. Biren in a gendan in, ngetna a bawl dungzui a, Union HRD Minister in MU dinmun toh kisai enkhe ding a Joint Secretary khat hon sawl hidan in gen hi. VC tung a ngohna omte toh kisai a suizuina zohsiang a hihma teng, tulel VC a dinmun akipan khawlsak ding a Union HRD Minister kiang a ngetna khat bawl ding lunggulh mahmah a hihdan MUTA palaite theisak khin hidan inleng Biren in gen hi. Tulel a VC tung a ngohna omte dik a hihdan mukhiak a hihleh gawtna piak ahihkeileh a dinmun a kipan tawpsak theih ding chi’n Biren in gen hi.

 

 

Chief Minister in ‘Go To Village’ Mission enkik

IMPHAL,JULY 12: Chief Minister’s Secretariat Cabinet Hall a tuni Ningani a high level meeting neihna hun ah Chief Minister N. Biren Singh in ‘Go to Village’ mission enkik thak hi. Meeting hun in, overall in-charge of the mission leh Additional Chief Secretary (Works, Forest and Environment) Shri Suhel Akhtar in mission masawnna toh kisai in, PowerPoint presentation pia hi.

 

Hoihtak a GTV mission zatkhiakna leh mipite kiang a hamphatna leh service-te piakna toh kisai a Nodal Officer-te, DC-te leh official dangte a kipan buaina leh ngaihdan piak a omte Chief Minister in hoihtak in ngaikhia hi. N. Biren Singh official-te kiang ah, zohsianglouh thubuai omte kiamsak ding in thupia hi. Government in a poimoh ngaih masakpen fish production hidan a gen kawm in Chief Minister in Fishery Department official-te kiang ah, Central Government fund-te ngak selou a, State Government’s scheme-te a kipan mipite ngetna sukvengsakna ding lampi zong ding in thupia hi. Fish farming a ding a tuikhuk bawlna ding toh kisai in, Chief Minister in Department officialte kiang ah, khosung mite ngetna santak ahihkeileh santaklou chih enkhe ding a field survey team-te sawl ding in theisak hi.

 

N. Biren in a gendan in, GTV camp saina ding in, DC-te kiang ah fund tamsem piakkhiak hi ding chi’n gen hi. July 10, 2018 tan a camp neih sung in, beneficiary 2,45,975 khumlut in om ua, huailak ah mipi 1,78,334-te kiang ah services/benefit piak in om ua, ngetna 58,688-te sukfellouh in om uhi. Ngetna 8851 nawlkhinsak in om hi. Meeting hun in, Chief Secretary Dr. J. Suresh Babu, Administrative Secretaries, district tuamtuam a Nodal Officer-te, DC leh Heads of Departmentte ban ah State Government a high ranking official-te tel uhi.

 

 

Minister Kayisii in menchim in a sukkhak Thonglang khua veh

IMPHAL, JULY 12: Tribal Affairs & Hills and Fisheries Minister N. Kayisii in, tuni Ningani in, nipikal masa a menchim huaisetak a tunna Thonglang, Kangpokpi district va veh hi. Thonglang khua a tun toh kiton in, Minister in menchim in a hihsiat thilte a mun mahmah ah va-enkhia hi. Khosung mite kiang ah singkung tamsem suan ding leh ecological balance kembit ding in hanthawn hi. Menchim in a sukkhak inkuante kiang a CGI sheet piak ding chiam kawm in, panpihna thil khenkhat leng pekhia hi.

 

Khosung a lampi dinmun, mobile leh power connectivity setak omte awlmoh kawm in, Minister in khantouhna tut ahihna ding a thubuai om tengteng sukvengsak ding in chiam hi. Maban a tualsung mite kinaih semna ding a panla ding ahihdan leng chiam hi. Nipikal masa a, menchim huaisetak in biakin leh Thonglang Youth Club office building tel in tenna inn 5 hihsia hi. Himahleh hiai menchim ah tuahsia tuak omlou uhi. Minister ahihleh Thonglang Village Council Chairman leh Ex-Chairman, District Council member, saptuam makaite leh khosung mite’n kithuahpih uhi.

 

 

Horticulture Minister in Angtha ah Pineapple Aggregation Unit hongkhia

IMPHAL, JULY 12: Horticulture and Soil Conservation Minister Thounaojam Shyamkumar in, tuni Ningani in Angtha khua, Andro constituency ah Mission Organic Chain Development for North East Region (MOCD-NER), Ministry of Agriculture nuai a Rs 11.25 lakh vel bei kibawl Lengthei koihna ding in aggregation unit hongkhia hi. Chief Guest Minister Th. Shyamkumar in a gendan in, aggregation unit in lengthei huan bawlte kiang ah lengthei koihna ding a buaina omte sukvengna ding naktak in panpih ding a, kho-omdan a otluat hun inlengn kibuk theihna ding inn pekhe ding chi’n gen hi.Lengthei huan a kuhkaltak a nasem numei –te’n hiai unit hamphatpih mahmah ding uh chi’n gen hi.

 

Manipur kichi organic state suahsak ding mission toh taima mahmah department official-te’n leng kuhkaltak in nasem uhi. Manipur Organic Mission Agency (MOMA) nuai a sem official-te tel in Horticulture Department pakta mahmah kawm a, Minister in a gendan in, district pumpi a lou nasemte toh kizopna hoihtak bawl in, department official-te’n kuhkaltak in nasem uhi.

 

District tengteng ah deihsak tuam omlou in developmental works paipih hi ding chi’n Horticulture leh Soil Conservation Minister in chiam hi. Minister in kuapeuh kiang ah, State masawnna ding dal, nasep khatpeuh zohsianglouh a koihlou ding in theisak hi. Mipi paikhawmte kiang a, K. Debadutta Sharma, Project Director, MOMA in a gendan in, scheme phase masapen pailel in Thayong, Angtha, Andro leh Thoubal mun khenkhat nuai a lengthei huan bawl mi 400 huap hi. Phase 2na in, State a huanbawl 7,500te huap ding a, huai a ding in Ministry in pompihna leng pekhin chi’n gen hi. Thayong, Angtha, Andro leh Thoubal mun khenkhat nuai ah lengthei huanbawl mi 250 huapbeh ding hi. Scheme a phase 2na in lengthei huanbawltu mi 650 huap ding chi’n gen hi.

 

 

Guite Road kekletna toh kisai in tunitan compensation mu omlou

LAMKA, July 12: Singngat-Sinzawl-Tuivaitawn National Highway102B, Guite Road kekletnaleh bawlhoihna tohkisai a Guite Kual a khua13 a pan gam lak heek aomte’n tunitan compensationa muhlouh uh tohkisai tuni, July 12 sunmadak 11 in Zogal Hall, ZouVeng ah genkhawmna neiuhi.

 

Hiai hun zatna C. Thathang, Chairman in makaih a, Ginzamuan in thil omdan gen in Vungsangmuan, Secretary in mohpuakna piak a omte kalsuanna toh kisai pulak hi. Hiai hun ah kho hausa leh gam lak heek a omte a pan ngaihdan genna om a, Hoihthianvak, Vice Chairman in huntawp a kipahthu gen in, T. Khamzachin in thumna in hunkhak hi. Singngat-Sinzawl-Tuivai lamlian, National Highway 102-B kekletna ding in 2012 vel a survey bawl a om, a kisaipih teng kiang ah leng report piak in om mahleh nasep zohsiang ahihnung ban ah tunitan in compensation piak bangmah omlou hi.

 

Nasepna ahihleh Border Road Task Force (BRTF) nuai a 80 Road Construction Company (80 RCC) in a etkai hi a, lamlian kekletna leh bawlhoihna ahihleh 2013-2014 sung a neih a om in, June 8, 2016 in National Highway 102-B pen M/S Bhartia Infra Project Limited khut ah piakkhiak in om mahle Land Acquisition toh kisai bangmah piakkhiak omlou hi’n thutut kingah hi.

 

Hiai toh kisai in Guite Kual a khua 13 a kho hausate’n Shyam Lal Poonia, IAS, DC/Ccpur khut ah July 15, 2017 “People’s Day” in ngetna pia ua, DC/Ccpur inleng

July 25, 2017 in hiai thu genkhawm ding in meeting sam mahleh 80 RCC a Commanding Officer kihellou hi. Huai hunlai toh kituak mah in Singngat-Behiang, Tedim Road leh Tipaimukh Road bawlna 84 RCC etkaina nuai ah pai in, Survey leh Land Acquisition bangkim report paikhawm mahleh National Highway 102-B, Guite Road in a totkhak khuate’n tunitan compensation bangmah muh neilou ua, tu’n National Highway 102-B keklet a Two-Lane a bawl ding thu gingnawnta hi.

 

Hiai toh kisai a gam lak heek a omte’n genkhawmna hunsawt kuamtak a neihnung un pawlmin bawlkhiak a, registration bawl ding leh lamlian kekletna in a nawkkhak teng kiang a Aadhaar Card Xerox copy kaihkhawm a, a kisaipih thuneitute toh genkhawm dia panlak ding in thukim uhi.

 

 

Pre-Recruitment Rally ah tuailai 200 vel tel

LAMKA, July 12: 25 Sector, Assam Riflenuai a Ccpur Battalion inLamka a Army RecruitmentRally ding toh kisaia Pre-Recruitment Rallya neih uh tuni, July 12 inPeace Ground, Tuibongah Written Test neisakuhi. Pre-RecruitmentRally ahihleh July 10 inkipan a, huai ni in documentetchetna nei in zan,July 11, 2018 in medicaltest leh physical efficiencytest neisak ua, tuni a writtentest tan ah districtsung a pan tuailai 200 velkihel uh hi’n Assam Rifle apan thusuak in taklang hi.

 

Assam Rifle in a taklatna ah, October 15-23, 2018 sung Lamka a Army Recruitment a om hun ah Lamka a pan tuailai a tam theipen a luttheihna ding uh deihna a Pre-Recruitment Rally a neih uh hi’n taklang uhi. Pre-Recruitment Rally hun ah Sector etkaina nuai a siamna tuamtuam neite’n Physical Efficiency Test leh Written Exam maituah dingdan toh kisai sinsak ahih ding ban ah Pre-Recruitment Rally a kihel teng a damtheihna uh toh kisai leng etkai hiding uh hi’n taklang hi.

 

Pre-Recruitment Rally tungtawn a tuailaite’n kisakkholhna hoihtak a neih theihna ding uh leh, hundang a leng amau-leh-amau a kisak kholhna a neih theihna ding tan ua sinsakna piak hiding ban ah, tuailai tamsem in Pre-Recruitment Rally a hamphatpih theihna ding ua, maban ah leng District sung mun tuamtuam a neihtouh hiding hi’n taklang hi. Army Recruitment hun ah India Army nuai a post tuamtuam Tradesman, General Duty (GD), Clerk, Storekeeper, Technical, Nursing Assistant leh Inventory Management a ding lak hiding hi.

 

 

SAFA saina in I-Day Tournament om ding

LAMKA, July 12: Singngat Area Football Association (SAFA) in Nehru Yuva Kendra (NYK), Ccpur kithuahpihna toh a 13-veina SAFA Independence Day Shield Football Tournament kichi Singngat Public Ground ah July 23, 2018 a pan neih sawm uhi. Tournament ah champion in Rs. 40,000 leh running trophy sang ding ua, nihna in Rs. 20,000 leh running trophy sang in, top scorer, best player, best save hand leh man of the tournament chihte kipahman piak hiding uhi.

 

Lunglutna nei team/club-te’n TD Medico, Singngat Bazaar ah Rs. 150 pia in Entry Form tuni, July 12 a pan ngahtheih ding ua, Entry Fee Rs. 2,500 leh security deposit Rs. 500 toh July 19 nitaklam dak 5:30 tan in Entry Form piaklut theih ding a, July 21 in SAFA Office ah Managers’ Meeting om ding hi. Tournament a kihel dingte’n player teng limlak, passport size leh thumb size khattuak piaktel ngai ding a, Player’s I-Card neiloute kimawlna a tel theilou ding uh hi’n SAFA in theihsakna bawl hi.

 

 

Ropiang Foundation Trust in mitbulh pekhe ding

LAMKA, July 12: Ropiang Foundation Trust in hun paisa a district sung a Government School tuamtuam 10 vel a Eye Screening-cum-Optical Camp a neih hun ua, Spectacle (Tarmit/Mitbulh) poimoh student telkhiak a omte kiang ah hongtung ding July 14, 2018 sunnung dak 3 in Ropiang Foundation Trust Office, Mission Road, Hiangtam Lamka ah mitbulh piakkhiakna nei ding hi.

 

Optical Camp neih hunsung in student 2,700 vel a etna lak uah pasal 74 leh numei 132 kigawm student 206 in mitbulh poimoh ahihdan musuah ua, amaute’n July 14, 2018 sunnung dak 3 tan in Ropiang Foundation Trust Head Office ahihkeileh www.ropiangfoundation.org ah confirmation bawlthei ding uh ahihdan Lalgoumang Guite, Secretary, Ropiang Foundation Trust in news tungtawn in theihsakna bawl hi. Ropiang Foundation Trust in school 10 a Eye Screening-cum-Optical Camp a neih hun ua hamphatna ngah ding a telkhiak a omzah hiai bang ahi. Phungkhothang Govt High School a pan student 8; Ccpur Govt Govt High School a pan student 8; Vimala Raina Govt High School a pan student 54; GM High School a pan student 12; New Lamka Upper Primary School a pan student 13; Lanva Model High School a pan student 10; Thangkhai Govt High School a pan student 10; SSPP Residential School a pan student 53; Vungzagen High School a pan student 10 leh SSA Residential School, New Lamka a pan student 10 hi uhi.

 

 

Chief Engineer team in Lamka-Sugnu Road enkhia

LAMKA, July 12: Centre fund SIDF nuaia Lamka-Sugnu Road,zero point Lamka PoliceStation a pan Sugnutan, km 26 a sau bawlnapailel tuni sunma dak 9in Imphal a pan in ChiefEngineer team in hongenkhia uhi. Th. TembaSingh, Chief Engineer/PWD Manipur makaihin Mani Singh, SuperintendingEngineer/PWDManipur leh PlanningDept a pan Sarat ChandraSingh, Research Officerin lamlian bawlna hongenkhia ua, Lamka a panin Jangngam Haokip,EE/PWD, Zamzalam,AE/PWD leh Section Officer-te’n zui uhi.

 

Tuni a Lamka-Sugnu Road etkhiakna ahihleh Lamka Police Station kong ah kipan ua, huai a pan a banban in lamlian tuang kibawlte enkhia in culvert leh minor bridge kibawlte leng en ua, road side a nulla kibawlte leng enkhia uhi.

 

Lamka-Sugnu Road bawlna ah tunitan in km 25.536 a sau pavement (GSB) zouta ua, km 25.536 a sau pavement (WBM-II) zou in, pavement (WBM-III) km 25.536 a sau bawl ding lak ah km 18.310 zouta uhi. Huai banah km 25.536 a sau Dense Bituminous Macadam bawl ding lak ah km 1.200 zouta uhi. Km 25.536 a sau Sime Dense Carpet ding ahihleh nasep kipan nailou hi. 1m span RCC slab culvert 45 bawl ding teng ahihleh zoh hita a, 2m span RCC slab culvert 2 leng zouta ua, huai ban ah RR Breast Wall 250m leng zouta uhi. RR retaining wall 60m leng zouta ua, km 20.75 a sau CC lined drain bawl ding ahihleh vuahzuk ziak in km 19.800 zouta uhi.

 

Chief Engineer leh a teamte’n tuni a Lamka-Sugnu Road bawlna a etkhiak hun uah lungtunhuaisa mahmah uh ahihdan gen ua, himahleh mun khenkhat a nulla kibawlte ahihleh a hoihlouhna om ziak in bawlthak ding in theisak uhi. Chief Engineer leh teamte’n Sugnu a pan Moirang Sendra zuan ua, huai ah sun-an ne in nitaklam in Imphal ah kiknawn uhi.

 

 

 

 

 

 

…akim zaw in : hiai ah

 

 

 

 

 

 

 

RELATED

The Lamka Post | July 08, 2018

The Lamka Post | July 09, 2018

The Lamka Post | July 10, 2018

The Lamka Post | July 11, 2018

The Lamka Post | July 12, 2018

Read 321 times
Login to post comments