You are here: HomeNewsLamka PostThe Lamka Post | August 01, 2018

The Lamka Post | August 01, 2018

Written by  Published inLamka Post Wednesday, 01 August 2018 09:06
The Lamka Post | August 01, 2018

Parliament Monsoon Session:

Assam draft NRC list thu ah Govt leh Opp kinawk; RS dinkhawl nawn; Congress in ahih ngamlouh BJP in hihkhia: Amit Shah

NEW DELHI, JULY 31: Assam citizen draft thua parliament in buainaa tuah zoh ni khat a painung in, tuni Sepnawnniin Assam a citizen list thuziak mah in parliamentah Congress-ten’n adjournmentmotion khatpawlut uhi. Zan Seppatniin parliament monsoonsession pailel ni 8na ahAssam citizen draft listsuahkhiak thu ziakin tatsatlouin kiphinna omtouden a, thumvei mahmahInpi khawlsak in om hialhi.

 

Tuni Sepnawnni inleng, Parliament Monsoon session pailel ni 9na ding in, inpi nih ah tutkhawmna sutzop in nawn a, mipi lakh 40 val nutsiat a nei Assam citizens’ list final draft suahkhiak thu a kiphinna in Parliament naktak in sawiling hi. Inpi tomchik khawlsak ahih zoh a, thugenna nei ding a BJP chief Amit Shah a dinkhiak toh kiton in, Rajya Sabha ah kiphinna kipan zui ngal hi. BJP MP Amit Shah in Rajya Sabha a, a thugenna ah, Rajiv Gandhi in kum 1985 a Assam Accord suai a kaih leh zan Seppatni a Assam’s National Register of Citizens (NRC) final draft suahkhiak in poimohna kibang nei hi’n gen hi. Congresste’n NRC zang ngamlou ua, himahleh BJP in hangsantak a semkhia hidan a BJP President Amit Shah in a genzoh phet in Congress MP-te inpi sung ah kiphinzak ngal uhi. State government, centre leh thunei mahmah All Assam Students Unionte kal a 2005 tripartite agreement toh kituak in, 1951 NRC puahphat in om a, hiai kithukimna ahihleh 1985 Assam Accord toh kibang ahi chi’n Amit Shah in gen hi. Hiai zoh in NRC updating kipan zui ngal a, himahleh state sung mun tamtak a buaina a om nung in khawlsak in om pah hi.

 

Huai hun in, Congress-te’n hiai semkhe ding in hangsan zoulou uh chi’n Amit Shah in gen hi. House chairman Venkaiah Naidu, a tutna apan kintak a dingtou in, kiphinna nei member-te kiang ah dai ding in kikoukhum hi. Hiai mun Rajya Sabha ahi a, inpi upate tutkhawmna hi a, gamsung pumpi’n hon en gige uh ahi, democracy chiamnuih kei un chi’n Naidu in gen hi. Mr. Naidu in a gen bangmah a phattuam louh ziakin zingchiang Nilaini zinglam dak 11 tan daih ding in Rajya Sabha khawlsak hi.

 

Congress leh Mamata Banerjee makaih Trinamool Congress-te’n tuni a vaihawmna leh citizens’ list thu genkhawm ding cancel ding a notice a piak uh toh kiton in, Lok Sabha ah leng kiphinna muhtheih in om hi. Congress-te’n citizens’ list suahkhiak thu in mipi hinkhua kia hilou in, inveng gamte a biktak in Bangladesh toh ki-unauna naktak a sukha hidan a gen in, all-party meeting neih ding phut uhi.

 

Zan Seppatni a inpi sung a tutna kal awngte a vialdian a slogan sam a kiphinna makaih Trinamool Congress member-te’n tuni’n leng kiphinna kibang nei nawn uhi. Member dangte’n leng a zop uh toh kiton in, Rajya Sabha chairman Venkaiah Naidu in sun hun tan Inpi khawlsak nawn hi. Trinamool MP Sukhendu Roy in a gendan in kha 6 paita in, government data in mipi 2.4 lakhte doubtful voter dan in takng a, kuapeuh in Supreme Court thupiak dungzui a thil bangkim piangkhia hidan in gen ua, himahleh hiai thu a human rights a kigolh teitei ding ahi chi’n gen hi.

 

Mr Naidu in member-te kiang ah, Home Minister Rajnath Singh in Lok Sabha a, ahih ding poimohte a zoh chiang a, inpi a hong pai a, thu sousang leh ngaih poimoh thute toh kisai in dawnna pe ding chi’n theisak hi. NRC issue kichi buaina ngaih poimoh huaitak ahihziakin pilvangtak in sai tuak a, India khua-le-tui hihna diktak neite kiang a dikloutak a thukhenna bawlkhum hetlouh ding ahi chi’n senior congress makai Mallikarjun Kharge in gen hi.

 

Tuni a inpi a vaihawmna pat ahihma in, opposition party-te’n parliament pawlam ah NRC a kipan bangziak a India mite nutsiat a om? chih thu a tuanna placard-te tawi in kiphinna nei uhi. Government in Assam a Musilim mite tupna a Bangladeshi migrant-te suanlam a nei hidan in Congress leh Mamata Banerjee-te’n ngoh uhi. Bangladesh apan dan toh kikalh a hong pemlutte theihchetna ding in kum 1951 nung a khatveina ding in Assam ah National Register of Citizens bawlphat in om hi.

 

MoS for Finance Radhakrishnan in tuni Sepnawnni in Lok Sabha ah Supplementary Demands for Grants 2018-19 batch masapen luikhia hi. Huai ah grant 65 leh appropriation nih telkha in a vekpi a Rs.11,698 crore senbeh ding phasakpihna ding in Parliament pompihna nget in om hi.

 

 

Tangmai Festival a ding in zoudawn a pan Tangmai puaktung in omta

LAMKA, July 31: A khatveina Tangmai Festival zatna ding toh kisai in Organizing Sub Committee in kalsuantou zel in tuni, July 31 in zoudawn lam a pan Tangmai hongtung panta hi. Kisakkholhna in tuni’n Organizing Sub Committee makaih in Paite Numei Pawl (PNP) in Tangmai Festival hun a Tangmai nekna ding, chiangkang sui ua, huai kawm in zoudawn lam a pan Tangmai puaktung a omte Organizing Sub Committee in leisak in PNP-te’n kemhoih zel uhi. Tuni sunma dak 11 in YPA-GHQ Office, Hiangtam Lamka ah PNP-GHQ makiah in tanmun hawmna om a, huai hun Ningmuanching, Secretary in makaih a, Persident, PNP Tangnuam Unit in thumna a hun pan in Vungzahoih, President, PNP-GHQ in Tangmai Festival zatna ding toh kisai in Unit-te tanmun ding hawm hi.

 

Hiai hun ah PNP Unit 13 a pan member-te paikhawm ua, Ningmuanching, Secretary, PNP-GHQ in thumna in hunkhak hi. V Vungzapau, Chairman, Organizing Sub Committee in a genna ah, Festival ding toh kisai a Songtal leh K. Tuili a pan Tangmai 300 val puaktung a omta ahihdan gen a, Tangmai Festival a dia Tangmai 4,000 bang kaihkhawm hiding hi’n gen hi. Maban ah Tangmai tamsem hongtun behlai ding ahihdan gen hi.

 

 

I-Day 2018 zatna ding toh kisai in final review meeting nei

LAMKA, July 31: Hongtung ding August 15chiang a Peace Ground,Tuibong a 72nd IndiaIndependence Day 2018zatna ding toh kisai intuni, July 31 sunma dak11:30 in BRGF ResourceCentre, DC Office ahDistrict Level IndependenceDay Celebrationding toh kisai in final reviewmeeting om a, huaiah government departmenttuamtuamte lak ahmohpuakna hawm uhi.

 

Shyam Lal Poonia, IAS, DC/Ccpur in meeting makaih a, Lunkhomang Khongsai, MPS, Addl SP (L&O); T Lunzamung, MPS, Addl SP (Ops); Kammuanlal Simte, MCS, CEO, ADC Ccpur leh Medical Department leh government department chih a District Level Officer-te tel uhi. 72nd Independence Day 2018 lopna ahihleh District Administration inntekna nuai ah Peace Ground, Tuibong ah om ding a, hiai ding toh kisai in kisakkhawlna tuamtuam leh a poimoh bangkim government department-te’n semsuah ding uhi.

 

District Level Independence Day 2018 zatna hun ah government leh private schoolte a pan Junior leh Senior a kikhen in march past om ding a, march past ah Johny Sharma, SDPO Ccpur in parade commander hihna la ding a, program zatzoh chiang in kipolhlimna in District Level Officer team leh Civil Society Organization Team-te football match kimawl ding uhi. Independence Day lopna ding toh kisai in hongtung ding August 13, 2018 sunma dak 8 in Peace Ground, Tuibong ah march past rehearsal om ding hi.

 

 

Imphal a Paite Inn bawl ding tungtang genkhawm

LAMKA, July 31: Imphal a Paite Inn bawlkhiak dingdan toh kisai in tuni, July 31 sunnungdak 2 in YPA-GHQ Office, HiangtamLamka ah YPA-GHQ leh PTC-GHQ apan makaite’n genkhawm uhi. N. Vialzathang,Treasurer, PTC-GHQ in thumnain hun pan a, T Khailianthang, President, YPA-GHQmakaih in agenda toh kisaigenkhawmna om hi.

 

S. Chin Ngaih Pau, Chairman, CEC, YPAGHQ in hiai thu hong piankhiak dan leh Paite mipi a dia poimoh ahihdan gen a, PTC-GHQ President leh General Secretary kiang ah ngaihdan genna hun piak in om hi.

 

Paite Inn bawl ding toh kisai ahihleh a March 2, 2018 a YPA-GHQ Hall, Hiangtam Lamka a YPAGHQ makaih a Advisers, Joint Headquarter, Block leh Unit makaite’n joint meeting a neih hun ua thupukna lak a omte lak a khat ahih dungzui in nampi vai a kalsuankhawm ding deihna a tuni a genkhawmna masa neih a om ahi.

 

Hiai thu bangtanhiam genkhawmna a neihnung un Lianmuanthang Valte, General Secy., YPA-GHQ in Paite Inn bawl ding toh kisai a YPA-GHQ in pan ana laknasate pulak a, genkhawmna tungtawn a maban paidan ding thupukna lak a om simkhia in thumna in hunkhak hi. Paite Inn bawlna ding toh kisai in mun-lemual etkaina leh zonna YPA Imphal Block khut a mohpuakna piak ahih toh kiton a leikhiak theih ding gam om chih thu YPA-GHQ zaksak ahih toh kiton a hun kibichilhtak kal a tuni a hiai thu genkhawmna om ahi. PTC GHQ in hun lemtang masapen ah hiai thu genkhawm ding ua, YPA-GHQ a thu a zaksak dungzui un maban a kalsuantouh ding in thupuk uhi.

 

 

Peace Ground ah Army Recruitment om ding

LAMKA, July 31: October 15-23, 2018 sung Lamka a Army Recruitment om ding toh kisai in Head Quarters 27 Sector, Assam Rifles in District Administration, Ccpur kiang ah Army Recruitment Rally neihna mun ding pe ding in ngetna pia hi. Huai dungzui in District Administration in Peace Ground, Tuibong a neih ding in phalna pia a, himahleh recruitment rally toh kisai a thil hihsiat leh lakkhiak om leh Assam Riflete mohpuakna hiding hi’n Sub-Deputy Collector, DC/ Ccpur Office in Asst Commandant, 27 Sector Assam Rifle theisak hi.

 

 

TCP in Traffic toh kisai enkhia; Helmet Drive pan ding

LAMKA, July 31: Lamka khopi sung a diakin Tedim Road dung ahgari taituah a tam deuhdeuhziak in, TedimRoad, New Bazar kimlakah traffic jam om gige a,huai toh kisai tuni July31 sunnung in Lianthansang,SI, OC Traffic Policemakaih in Traffic Policeteam khat in TedimRoad dung, lamsak lehlamkhang a gari kikoihteenchetna nei uhi.

 

Hiai hun ah Traffic Police in lampi dung a gari park louhna ding mun a gari koihte leh lamlian laizang nehlua leh dongkholhtak a ki-park bangzahhiam man in challan cut uhi. Hiai hun ah Traffic Police in New Bazar Bus Stand mun a Diesel Auto Pick Up Point leng enkhia ua, hiai mun pen parking mun hilou a, Pick Up point himahleh Diesel Auto tamtak line saupi a kivual dim ban ah double a Auto park a om ahihdan musuah in, traffic rule bohsiat ziak un Traffic Police-te’n challan cut-sak uhi. New Bazar a Bus Stand mun ahihleh Diesel Auto-te a dia Pick Up point ahihdungzui in Diesel Auto-te hiai mun a hun sawtlou khawl a, a taikhiak zel ding uh chih himahleh tamtak in hiai dan zuilou in, Diesel Auto 10 tanpha bang Tedim Road ah a kivolh ziak un, traffic buaisak pha hi’n thutut kingah hi.

 

Lamka Traffic Police in district sung a traffic toh kisai hoihtak in enkaitou zel ding ua, zingchiang August 1, 2018 a pan in khopi sung a mun tuamtuam ah gari neu a taite kivengbitna dia helmet khuloute check bawl ding uh ahihna ah maban ah kuapeuh gari neu hekte’n a deih huailou tuahsiatna a tuahkhak hun a mahni hinna humbitna dia helmet khu chiat ding in Traffic Police in theihsakna bawl uhi. Helmet drive hun a matkhiak a omte Traffic dan toh kituak a liausak hiding uh hi’n leng thutut kingah hi.

 

 

O Joy in BJP a pawtkhiak san nung in MU buaina toh kisai a kiphinna neite zom

IMPHAL JULY 31: Veteran Politician O. Joy Singh in BJP apan kitawp hidan a, a puankhia zoh nung ni khat paipan in tuni in Manipur University buaina toh kisai in kim leh kiang a omte zawnkhawm in University main gate mai a ann ngawl a kiphinna neite omna mun tan lampi zuihna nei uh hi’n thusuak in taklang hi.

 

Huai hun ah veteran politician mah tumalam zek a BJP party ana pawtsan N.Mangi leng kihel a, MU V.Chancellor Prof. AP Pandey a dinmun a pan paihkhiak ahih theihna di’n kiphinna nei uhi. Kakwa kim lak a pan leh MU kim leh kiang a VC deihlou pawl mi tamtak kipunkhawm in veteran politician nihte makaihna nuai ah sunnung dak 12 in Kakwa Community Hall apan in lampi zuihna nei ua, Manipur University main gate tan a khawl uhi. Okram Joy in a gendan in MU VC deih louh latsakna in veteran politician tamtak inleng amah gum ding hidan in gen a, huai ban ah MU community-te amah hih theihna tan a kithuahpih ding leh saffron party-te apan University hondam ding hidan in gen hi.

 

Hunger relay ahihleh a paisa July 9, 2018 apan pat a ana omta hi a, Manipur University Teacher Association (MUTA)-te’n University Chancellor in sinsaktute tung a, a gamtatdan leh sum dinmun ban ah vaihawmna toh kisai a dinmun len zoulou leh paw zoulou hidan ngohna bawl a om in Manipur University Student union-te’n houylimna neih ding a sapna a bawl pen uh a nial ziak a hiai bang kiphinna patkhiak a om ahihdan taklat in om hi.

 

MUTA’s relay hunger strike ah MUSU leh MUSA-te leng kihel ua, hiai bang thupuan bawl ahih hun a July 21, 2018 tan neih ding chih himahleh kikhekna bangmah a om louh ziak a tuni tanpha a sutzom a om ahi hi. Tuabangkal ah AP Pandey leh Union Ministry of Human Resourcete’n MUTA, MUSU leh MUTA-te ngetna adiklou hidan a gen in, ngetna bawl a omte a ngaihsak louh ziak un Deans, head of departments leh Directors tamtak in buaina tuak in a dinmun ua pan piahkhiak a om pawl leng om uh ahihsan taklat in om hi.

 

Kiphinna in venlam a mamoh ngeilouh ziak in University complex sung a kiphinna neite’n higher studies academic activities leh colleges affiliated to Manipur University-te dinmun buaisak ban ding a, a om ziak in pawkkhiak san uhi.

 

Okram Joy in media-te mai a, a gendan in Manipur state sung a mipi tengteng Manipur University Community lam a, a pan lai un bang ziak a State BJP government leh Central Government pangkhawm a VC AP Pandey a humbit sawm teitei uh hiam chi’n thangpai khawmtak in gen hi.

 

Aman a genzelna ah government in MU issue a hentang ziak uh ahihleh Pandey in a dinmun mah a let tou theih laina di’n Manipur mi-le-sa tengteng kangtum / kisualzak vek uh hen a chihna uh toh kibang ahi chi hi. Hiai toh kisai in State government thil tup a tangtun louhna ding a theihtawp suah a sinlai naupangte panpih ding ka hi chi’n Joy in gen behlap hi.

 

 

Serou Leingoi Assn in member hilou leingoi pua man

LAMKA, July 31: Serou Leingoi Truck Owners Assn in member a telloute’n Serou leingoi pawtheilou ding chih thupukna a bawl uh pansan in member hilou truck 5 vel in Serou leingoi pua chih thu a zak dungzui un zan nitak dak 8 vel in Rengkai Leipi kiang ah ana tang ua, huai ah truck tai masapen a mai glass dengsia uhi. Tua ziak in buaina nasatak piang a, Lamka Police team-te a huntak a, tunman ziak in buaina sousing ding bengdai thei ua, Truck 5-te Lamka Police Station ah tailutpih uhi.

 

Hiai toh kisai in tuni’n OC/Ccpur Police Sation makaih in kihouna nei mahle uh kihou lem theilou ua, zingchiang, in Police Station mah ah kihouna sunzom ding uh hi’n Police a pan thutut kingah hi.

 

 

MUSU ngohnate MU VC in nial

IMPHAL, July 31: Manipur University Students Union (MUSU) in Manipur University Vice-Chancellor, Prof. Adya Prasad Pandey tung a ngohna chituamtuam point 15 a bawlte uh toh kisai VC in nial ahihdan press note suah hi.

 

MUSU in December 13, 2016 a Vice-Chancellor mohpuakna la hidan in gen mahleh October 26, 2018 a Vice-Chancellor charge la ahihdan Prof. Adya Prasad Pandey in taklang hi. Manipur paw lam a zinkhe gige chih thu a ngohna om toh kisai in University toh kisai a state pawlam a zinkhia leh a zinkhiak hunchiang a Professor-te lak a senior pen khut a mohpuakna pe zel ahihdan Vice-Chancellor in taklang hi. Court meeting neih pen MU Act 2005 toh kikalhlou leh court meeting hun a sum tamtak zang hidan a MUSU in ngohna a bawl bulbal neilou leh court meeting ding July kha a neih dia gel a om hidan in taklang hi. MUSU in ABVP a dia sum pia hidan in ngohna bawl mahleh a khonung in ‘several politically motivated organisation’ huhna pia chi a ngohna a bawl khekthak hidan in VC in taklang hi. MUSU in ngohna tuamtuam a bawlte toh kisai VC in nial leh diklou ahihdan a taklatna thusuah a bawl pek 2na a kikoih hi.

 

 

 

 

…more detail : here

 

 

 

 

RELATED

The Lamka Post | July 29, 2018

The Lamka Post | July 30, 2018

The Lamka Post | July 31, 2018

Read 248 times
Login to post comments