You are here: HomeNewsLamka PostThe Lamka Post | August 10, 2018

The Lamka Post | August 10, 2018

Written by  Published inLamka Post Friday, 10 August 2018 10:15
The Lamka Post | August 10, 2018

Manipur Chief Minister in ‘Apparel and Garment Making Centre’ enkhia

IMPHAL AUG 9: Chief Minister N. Biren Singh in tuni in ‘Apparel and Garment Making Centre’ Lamboikhong- nangkhon, Imphal West District a om enkhia hi. Hiai toh kisai a government in Building leh ma- chinery Unit 1 a bawlte ahihleh private company Big Concepts Foundation Pvt. Ltd. in product tamsem bawlkhiak ahih theihna ding ngimna a enkol ahi hi. Chief Minister ahihleh Konthoujam AC MLA ban ah Manipur Tourism Development Corporation Chairman Dr. Sapam Ranjan, Sekmai AC MLA H. Dingo, Yaiskul AC MLA Th. Satyabrata leh Principal Secretary to CM Vumlunmang Vualnam-te’n zui in private company etkolna nuai a nasemte’ thil bawlte enkhia uhi.

 

CM N. Biren in media-te mai a, a gendan in state government BJP in Manipur state sung a vaihawmna a let apan in state sung a entrepreneurs lam leh skill development toh kisai uang bawl mahmah kawm a government kam delh seselou a, amau leh mau nek a kizon theihna ding uh ngaihtuahna a pan kila ahi chi’n gen hi. Hiai ding toh kisai in khau (fabric) a hoih penpente Guangzhou, China apan inleng tamtak puaklut a omta ahi chi’n gen hi.

 

Hiai khaute ahihleh Mumbai base company in puan tamtak a bawlkh- iak uh gam tuamtuam a, a zuakkhiakte uh bawlna ding a kizang khaute mah Manipur inleng zangta ahihna ah maban ah siamgat, puankhui leh silh-leh-teen bawlna ah tuasang a thupizaw patkhiak ahih hun chiang a, a product mi dang a toh kikhe tuanlou dia gintak ahi chi hi.

 

Chief Minister in a genzelna ah China apan khau laklut a omte Mum- bai a tunna ding in ni 40 vel lut a, himahleh Manipur state a tunna ding a ni 12 (Moreh lampi tawn in) lel lut ahi chi’n gen hi. Hiai bang a van puaklutna ding a hun tawmchik lut ahihna ah Manipur in hiai bang plan a neih pen a hong pichin chiang in Mumbai based company-te sang mah a mantawm zaw a zuakkhiak theih dia lam-et ahihna ah gamtuamtu- am a, a zuakkhiakna ah advantage liantak Manipur in nei ahi chi hi.

 

 

Mipite damtheihna ding in state government in mohpuakna liantak nei: L. Jayantakumar

IMPHAL AUG. 9: Health and Family Welfare Min- ister L. Jayantakumar in tuni in Churachand Higher Secondary School, Sanjenthong ah National Deworming Day leh Mop-up Day hongkhia hi.

 

Minister in a gendan in state sung chidamna ding a dinmun poimoh tak len ahihleh government ahi chi hi. Huai ban ah National Deworming Day ahihleh government in India gamsung pumpi a naupangte lak ah hut ziak a natna leh buaina tuamtuam a om louhna ding leh beisak ahih theihna ding ngimna a hiai bang programme / Day zat a om ahi chi hi.

 

State Nodal Officer Child Health Dr. A. Sylvia in a gendan in deworming day main programme ahihleh a hong tung ding August 10 chiang in district chih ah neih hiding chi a, Mop-Up Day ahihleh August 17, 2018 chiang in zat hiding chi’n gen hi.

 

Programme ahihleh State Health Society, National Health Mission leh Directorate of Health Services, Manipur-te’n pangkhawm a, a sai uh ahi hi.

 

 

Youth Congress Day toh kisai a peace rally neih sawm Congress worker-te tear gas kapkhum in om

IMPHAL, AUG 9: BJP makaih Manipur govern- ment in, tuni Ningani a Youth Congress Day zatna a peace rally neih a om government in a kham ziakin Congress party thangpai mahmah hi.

 

Tuni a thiltung thak muhtheih a om ahihleh police-te’n rally kipatna mun ding BT road a Congress Bhavan gate a paikhawm Congress worker-te hawldalhna ding in tear gas shell kapkhum uhi. Congress party-te’n tuni’n Imphal a kongzingte tawn a peace rally nei ding leh Congress Bhavan a zotkik ma ua, BT road a Mahatma Gandhi statue a zahna pak piak sawm hi uhi. Himahleh thiltung toh kisai mipi kivaihawmna ahikei a, mi khat thuneihna nuai a kivaihawmna hidan in Ibobi in gen hi. BJP government gamtatna bang- dang hilou in, democracy thah ding sawmna lel ahi chi’n genbeh hi.

 

Manipur a BJP makaih government leh Centre in mipite aw nenniam sawm a, kumpi khat thuneihna nuai a kivaihawmkhum ding sawmna thil hithei vual hilou chi’n Ibobi in gen hi. Police-te’n tear gas shell kapkhum a mipi paikhawmte a hawldalh hun un, senior Congress party makai leh Congress Working Committee (CWC) member ding a telching a om Gaikhangam, MPCC President TN Haokip leh MLA dang tamtak tel uhi. Tear gas shell kapkhum ahihma in, Congress Bhavan gate ah kinawktuahna nasatak leng om hi.

 

Police-te’n a gendan un, district administration in Imphal West sung a CrPC 144 nuai a khamna a koih ziak a, hichibang rally neih ding phallou uh hidan in gen uhi.

 

 

IE District Administration office a semtu numei khat in OBC certificate lakna di’n Rs. 300 ngen  

IMPHAL, AUG 9: 7th Pay commission zat ding ngen Imphal East District DC office a establishment section a semtu khat in Imphal Times sub-editor kiang a, OBC certificate piakna ding a Rs. 300 a nget ziak in, Prime Minister Narendra Modi in nekgukna zungkalh ding a, a kipiaknate leh Chief Minister N. Biren Singh in corruption free state thuchiam a bawlte tu in chiamnuih suak hi.

 

Semtu numei khat in, OBC certificate piakna ding a Rs. 300/- a nget laitak mobile phone zang in hoihtak in record in om hi. OBC certificate ngahna ding a sum a ngetna ziak uh dot ahih hun a, numei staff in a dawnna ah, paidan leh hiai sumte SDC leh district administrator-te tel in thuneihna sangzawte kiang a piak ding ahi chi’n gen hi. Table khat a  kipan table dang khat a file a kisuanna ding a sum poimoh hidan inleng gen hi. Hiai hun in, room kibang a tu staff dang khat in kithuahpih lai hi. Hiai numei staff in sub-editor kiang ah, a ut bangbang thil suahkhe ding leh social networking site tanpha a, sum a nget lai lemte phoukhiak ding leng poisalou

ahihdan gen hi.

 

Imphal Times sub-editor inleng Additional District Magistrate, Imphal East Shamim Ahmad Shah thuzak ngal a, OBC certificate lakna ding a sum poimohlou ahihdan theihsak in om hi. ADM inleng lady staff sam a, himahleh action toh kisai thuchian theih hilou hi.

 

 

ZHRF saina in ZC, HI leh MPC in World Indigenous Day zang

LAMKA, Aug 9: Tuni, August 9, Interna- tional Day for The Rights of Indigenous Peoples ahih toh kiton in Ccpur District ah Zomi Hu- man Right Foundation (ZHRF) GHQ inntekna nuai ah “Indigenous Peoples : Right to Land” chih thupi zang in Synod Hall, IB Road, Lamka ah World Indigenous Day zatna om hi.

 

Hiai hun ah District sung a tribe tuamtuam a pan makaite ban ah in- tellectual hunkhop tel ua, Rev Th Mangthianlal in thumna a hun pan in, Siamzading Valte, Chariman, ZHRF-GHQ in vaidawnna thugen hi. Hun zatsung in tribe tuamtuam a pan makaite’n World Indigenous Day zatna in lamp lighting nei ua, Thangbiaklian Hangzo in World Indigenous Day thupi “Indigenous Peoples : Right to Land” chih toh kisai hilhchetna leh thugenna nei hi.

 

John K Ngaihte, Chairman, Zomi Council; Joseph Lalrothang, President, Hmar Inpui leh Vanlalrinliana, President, Mizo People Convention Manipur in World Indigenous Day toh kisai ban ah tribe-te’n tunitan a, a panlaknate genna nei ua, Dr R Sanga in “Right to Land” chih toh kisai gen hi.

 

Suanmoi Guite, General Secretary, ZHRF-GHQ in ‘Post Card Signature Campaign Against Oil Exploration’ hun makaih a, hun tawp ah Lallianthang in kipahthu gen in, Upa K Vungzamawi in thumna in World Indig- enous Day khak hi.

 

Zomi Human Right Foundation (ZHRF) GHQ makaih a tuni a World Indigenous Day zat hunsung in Zogam Artist Assn (ZAA) a pan lasiam tuamtuam in gam

ngaihla sa uhi.

 

 

EBC Recording Studio honna leh latna nei

LAMKA, Aug 9: Evangelical Baptist Convention in Pathian gam nasepna ding a vanzat khat hiding in Dorcas Hall, Ground Floor, New Lamka ah La Khumna [EBC Recording Studio] a bawl uh zattheih dia zohsiang ahih toh kiton in tuni, August 9, 2018 sunma dak 10 in Pathian min a honna leh latna nei uhi.

 

Hiai hun ah Dorcas Hall a sem staff-te ban ah EBC HQ a makaite tel ua, Rev S Vung Minthang, General Secretary, EBC in Pathian gam nasepna a vanzat khat hiding in EBC Recording Studio hongkhia in, Pathian min in laan hi. Hiai recording studio a zat ding recording vanzat chituamtuamte ahihleh Delhi a pan Rs 5 lakh vel a lak a om hi a, tulai khovel toh kituak a vanzat zangkhai leh baihsam mahmah Presonus Digital Recording zat hi a, hiai Presonus Digital Recording ahihleh Lamka khopi a dia masapen pawl hilai hi. Recording Studio bawlna ah Rs 5 lakh val lut hi’n thutut kingah hi.

 

Zat theih dia Recording Studio honkhiak ahih toh kiton in mimal leh pawl tuamtuam in Pathian phatna ding in hiai mun ah recording bawltheihta ding hi. EBC HQ in ahihleh hiai Recording Studio tungtawn a Pathian hoihna leh thupinate puanzak ding leh Media Ministry hatsak semna ding ban ah tanchinhoih thehzaktu khat hihsak ding chih tupna toh Recording Studio hongkhiak a om hi in thutut kingah hi.

 

 

SO leh HSA in ATS dh gum ding

LAMKA, Aug 9: Hmar Students’ Assn (HSA) General Headquarter in thusuah a bawlna ah, Manipur University buaina ziak a University nasepna dinkhawl a om pen ngeina bang a paithei pah ding dinmun a omlouh HSA-GHQ in ngaikhawk mahmah hi’n taklang hi. HSA GHQ in University dinmun awlmohna toh ATSUM in University a kai student-te awlmoh a August 9, 2018 zankim a pan August 11, 2018 zankim tan daih ding General Strike a puan uh gupthu puang in, Manipur a HSA Functional Area teng a General Strike hunsung kuama’n siamsinna leh sumsinna innte honglou ding leh kuapeuh in dakkal 48 sung General Strike gum a nungthuap chiat ding in ngetna bawl uhi. Kuki Students’ Organization (KSO) Ccpur inleng ATSUM in dakkal 48 sung General Strike a puan, KSO-GHQ in a gup toh kiton a KSO Ccpur inleng gum ding ahihdan taklang hi. Lalkhohao Haokip, President, KSO Ccpur in ATSUM in General Strike a puansung a kuamah pusuaklou dia ngetna bawl in, damlouhna ziak a kipuaktuah ngaite leh press/media kia khahkol hiding leh KSO Ccpur in ‘Pass’ bangmah issue bawllou ahihdan gen hi.

 

Manipur University a sinlai naupang tamtak maban ding khualna a kuapeuh in General Strike gupna pe ding in ngetna bawl a, General Strike neih a om kuama’n subuailou ding leh damlou gari a kipawtuah dingte’n Medical Prescription tawi ding in theisak hi.

 

 

2nd State Level Swachata Award 2018 a di’n Ccpur District enkhia

LAMKA, Aug 9: Manipur State sung a dis- trict siangthou pen telkhiakna “Second State Level Swachata Award 2018” a ding in tuni, August 9, 2018 in official sehkhiak a omte’n Churachandpur District ah mun tuamtuam hong enkhia uhi.

 

Official hong paite ahihleh; Y. Kulla Singh, EE Thoubal Municipal Council; Ch. Khelen Singh, AE, Mayang Imphal Municipal Council leh Salam Jugeshwor Singh, AE, Kakching Municipal Council hi ua, amaute District Administration lam a pan S. Khai- khopau Ngaihte, MCS, Assistant Commissioner leh T. Kammuanlal, MCS, CEO, ADCC in kithuahpih in makaih uhi.

 

Manipur a District siangthou pen etkhiak ahih theihna ding in M. Joy Singh, Secretary, MAHUD, Govt of Manipur in district teng a Deputy Commissioner teng kiang a theihsakna bawl a, huai dungzui in Shyam Lal Poonia, IAS, DC/Ccpur in August 7, 2018 in Ccpur District sung a Government Office 20, School/College 19, Biakinn mun 16 leh Bazaar 5 pia hi.

 

Huai lak ah Ccpur District siangthouna enkhe dia mohpuakna piak a omte’n DC Office, ADC Office, ZEO Office, District Hospital, Public Toilet, New Bazaar, Vimala Raina Govt High School, ICI Church, Rengkai leh GBA Central Church, Chiengkonpang ban ah Market Place ah Tuibong Bazaar leh Zenhang Bazar enkhia uhi. Etkhiakna ahihleh zingchiang tan hiding a, etkhiakna hun ah kim-le-kiang ban ah toilet chihte enkhia uhi.

 

1st State Level Swachata Award 2017 hun ah Ccpur District in khatna la a, huai kepbitna ding leh a 72nd Indian Independence Day zatna ban ah Swachh Bharat Mission sepsuahna in District Administration in district sung siangthouna ding deihna in phase thum a khen in district sung ah Cleanliness Drive nei a, phase thumna in zan in district sung a government department tuamtuam leh Village Authority kithuah in khopi sung hahsiang uhi.

 

 

..more detail : here

 

 

 

 

RELATED

The Lamka Post | August 02, 2018

The Lamka Post | August 03, 2018

The Lamka Post | August 04, 2018

The Lamka Post | August 05, 2018

The Lamka Post | August 06, 2018

The Lamka Post | August 07, 2018

The Lamka Post | August 08, 2018

Read 137 times
Login to post comments