You are here: HomeNewsLamka PostThe Lamka Post | August 13, 2018

The Lamka Post | August 13, 2018

Written by  Published inLamka Post Monday, 13 August 2018 08:30
The Lamka Post | August 13, 2018

Home minister in Kerala ah tuilian dinmun enkhia

Kerala a tuilian dinmun huaise mahmah, Centre apan panpihna om thei tengteng chiam: Rajnath Singh

KOCHI, AUG 12: Union home minister Rajnath Singh in tuniPathianni in vuahzu in siatgawpna huaisetak a tutna Kerala a district nihte lenna zang in aerial survey bawl a, Kerala a tuilian dinmun huaisemahmah chi’n gen hi. Rajnath Singh in state government kiang ah, hundang ate toh kibanglou tuilian ziak a chouna tamtak omte maituahna ding in, Centre a kipan panpihna om thei teng- teng piak ding chiam hi.

 

Home Minister in Idukki leh Ernakulam district a aerial survey a neihzoh a Kochi a thuthaksaite kiang ah hiai thu gen hi. Hun tomchik sung vuahzu a khawl nung in, tuni Pathianni zingkal a kipan in Kerala mun tamtak ah vuah nasatak zu a, hiai in tuilian leh menchim in a sukkhakna bial a nase agency-te huhna leh panpihna nasepte naktak in buaisak hi. Himahleh Idukki leh Idamalayar reservoir-te a tuite’n kiamlam nawt ua, hiai in puakgik nasatak omte naktak in dawnzangkhai a, thuneite’n tuiluangte ziak a mipite patauhna ding bangmah omlou hidan in gen uhi.

 

Zan Kiginni a kipan in menchim leh vuahzu ziak a sihna leh manna tuak thak a om lam theih hilou ua, August 8 a kipan tukvuah zulel huhamtak a, vuahzu toh kisai a thiltungte ah tutan in misi 37 pha uhi.

 

Mihing 14,000 valte omna Wayand mun tel in, mun tuamtuam a phuhkhiak relief camp-te ah mipi 60,000 val om lel uhi. Army column 10, Madras Regiment unit khat ban ah Navy, Air Force leh NDRF a kipan personnel-te Kozhikode, Idukki, Malappuram, Kannur leh Wayanad tel in tuilian huaisetak in a nawkkhakna district-te ah panpihna leh hutkhiak nasepnate a kizang uh hidan in Defence thusuak in taklang hi.

 

Tuilian kheltak in, kikawmtuahna lamlian leh inn tamtak a tuahkhiak ziak in tangdawn Wayanad district a Mananthavady leh Vythiri-te ah mundangte toh kikawmtuahna tatvek uhi. Asia a arch dam lianpen Idukki dam a floodgate 5te, kum 26 nung a hon a hih uh toh kiton in, dam a tuite tu zing dak 10 tan in 2,403 feet a kipan 2399.16 ft tan in kiam uhi.

 

 

 

Popular Front National General Assembly nei

IMPHAL, AUG 12: Kerala a Malabar House, Puthanathani ah zan Kiginni in Popular Front of India National General Assembly kipan hi.Chairman E. Abu Backer

in pawlpi tricolor flag kaipalh in Assembly pat in om hi.Programme hongkhe kawm a, E Abubacker in a thugenna ah, BJP vaihawmna nuai ah, gamsung a mipite thuneihna zang a kivaihawmna paiziate election neihnate ah mekgawm in om ua, democracy kha leh chindante government nasepnate ah nawlkhin in om uh chi’n gen hi. E. Abu Backer in a genzelna ah, Ruling party in a uangbawl mahmah fascist agenda-te a lampial,mipite kiang a, a mohpuaknate uh mangngilh khin mainstream opposition party-te tam deuhdeuh uhi.

 

Economic policy dikloute ziak in BJP vaihawmna nuai a nautang mipite’n naktak in thuak uhi. State chih a kipan palai paikhawmte kiang ah Popular Front kichi lam etna leh nasepte nungthuap ding a kalsuan ahihdan theitel ding in theisak thak hi. Gamsung kilchih a panlakna thuchahte a hun tak a puangkhia leh mipite lam etna tangtunsakna ding a nasem ding in chial hi.

 

General Secretary M. Muhammed Ali Jinnah in national level a nasepna omte toh kisai in mid-term report pia hi. State tuamtuam a kipan palai 200 velte’n programme uap uhi. Tuni Pathianni in program zousiang uhi.

 

 

Nurse teng in INC ah min khumlut ngai

LAMKA, Aug 12: Government Institution leh Private Institution a nurses training zoute ban ah tua semlelte Govt of India in 2017 a, a patkhiak National Health Policy nuai a Indian Nursing Council ah kikhumlut (enroll) vek ngai ding hi’n Dr. K. Rajo Singh, Director of Health Services, Manipur in theihsakna bawl hi.

 

Hiai toh kisai in Ccpur leh Pherzawl District a nurses semlelte ban ah Private/NGO a sem-te’n Indian Nursing Council a enrolment a bawl uh ngai ding a, huai ding in empanelled agency M/S FINO Pay Tech Pvt Ltd ah hihsak theih ding hi. Hiai toh kisai in Lamka Damdawi Inn Administrative Block ah August 16, 17 & 18, 2018 zingkal dak 10 a pan in saitheih ding hi. Enrollment bawl dingte’n Class XII (10+2) certificate, marksheet, nursing certficate leh marksheet, SNRC registration certificate leh Aadhar Card tawi ngai ding hi.

 

 

TKSU in DC/Ccpur tung a boycott a puan zukkiklou ding

LAMKA, Aug 12: Thadou-Kuki Students’ Union, General Headquarters in tuni a thusuah a bawlna ah, Mr. Shyam Lal Poonia, DC/ Ccpur tung a boycott a puan uh lenkiplai leh a kisaipih thuneitute’n a suankhiakma uh boycott puan a om zukkiklou ding uh hidan in taklang uhi.

 

TKSU in Mr. Shyam Lal Poonia tung a boycott a puan pen Independence Day boycott hilou leh British vaihawmna nuai a zalenna ngahna ni lopna TKSU in gum leh kithuahpih ding ahihdan taklang a, himahleh Independence Day lopna a Mr. Shyam Lal Poonia a tel ding pen ‘boycott’ uh hidan in taklang uhi.

 

A kisaipih thuneitute’n a kintheilam a DC/Ccpur suankhe ding a ngen kawm in suankhiak ahihkeileh Kuki CSO tuamtuam toh kithuzak a kiphinna chituamtuam pankhe ding uh hidan in taklang hi. Huai ban ah Ccpur district mipite leh ngaihdan kibatpih pawlpi dangte’n leng Ccpur district a pan Mr. Shyam Lal Poonia suankhiak ahihna dia kithuahpih ding in ngen uhi.

 

 

World CWC, 2018 silver medallist kipahpihna hun zang

IMPHAL AUG. 12: Education, Labour & Employment Minister Thokchom Radheshyam in a gendan in kimawlna leh siamsinna kichi tuailaite lungsim a a lunglutna a neih theihna ding ua panlak ding ahi chi hi. Kimawlna leh siamsinna in khanthouna a hongtun ngei lam-et ahih ban ah hiaite mah tulai khovel adia mite kinepna leh ngaihsan pen suakta ahihdan gen hi.

 

Hiai toh kisai ahihleh World Cadet Wrestling Championship, 2018, Croatia a silver medal la Laishram Sayon Meitei kipahpihna Ngarouthel Community Hall, Heirok mun a neih ahih hun a Minister in a gen ahi hi. Hiai Wrestling kimawlna ahihleh July 2-8, 2018 sung a neih a om hi a, Young Brilliant Club-te’n a sai uh ahi.

 

Minister in Laishram Sayon Meitei kipahpih mahmah ahihdan a gen kawm in Manipur leh Heirok mipite min hoihsak leh kisaktheihpih tham thil bawlkhia ahihdan gen hi. Huai ban ah India gam tanpha min hoihsak ahi chi a, mi kuapeuh in tup kichian nei a, huai mah ngaihtuah a theih tawpsuah a pan a honlak chiang ua zohlah ding thil omlou ahi chi’n gen hi. Tua teng ban ah nna khat peuh ah lohching a i ngaih theihna ding a, a poimoh masa pen ahihleh siamsinna ahi chi hi.

 

Aman a genzelna ah hinkhua lohching ban ah kipahna a om theihna di’n damtheihna poimoh a, huai ding mah in games and sports kichi damtheihna a ding a hoih mahmah kia hilou in a neu pen apan a lian pen a ding taksa hoihna dia poimoh mahmah thil ahi chi hi.

 

Laishram Sayon Meitei ahihleh kum 2001 a piang hi a, a neu apan SAI Imphal adia Nasik Army Boys nuai a select a om hi a, international championship leh Asian Championship 2018 chihte ah leng ana kihel kha ngei hi.

 

Programme zat ahih hun in Upadhyaksa T. Nungshi Singh, khosungmite leh mi poimoh tamtak kihel uh hi’n thusuak in taklang hi.

 

 

 

..more detail : here

 

 

 

 

 

RELATED

The Lamka Post | August 12, 2018

Read 437 times
Login to post comments