You are here: HomeRSS FeedsLatest Articles

Gam leh Nam Vai

Tuesday, 21 November 2017 01:25

Gelhtu : Luna Guite

 

Whatsapp Group khat ah Churachandpur DC Office Building sung ah Sub-Divisional Officer, Singngat  Office a om thu kigelh hi.

 

Kei theihna tan hon genta’ leng: nidang in Singngat ah, Sub-Division Officer(SDO) Office building  leh atenna Quarter hoihtak in om hi. Huanah, anuai a Officer - SDC leh staff te’n Quarter nei in Medical lamah ah Doctor leh a staff te awm ua; mipite adi’n lungmuan huai mahmah hi. Hiai kia hilou in, singtang dawn ah zilna inn: Primary School akipan High School  bang hoih taktak bangzah hiam awm a; tua i senior officerte lak a bangzah hiamte, singtang skul apan lehkhasiam hi uhi. Huaiban in, singtang khua khenkhat ah, Damdawi Inn or Dispensary, Compounder etkolna nuai ah om a; a vangkim in abial leh viltu Doctor in vaveh zel hi. Singtang a tengte’n ki-phattuampih  mahmah hi. Tu-ni chiang a, Civil Sub-Division a Administrator leh Magistraite omlouh chihmawk thilpoi mahmah ahi hi. Huan ah, singtang lam a, nidanglai a zilna inn leh Govt. malaknate bei hiaihiai(beivekta) a bang hi.

 

Red Indiante lalpa/kumpipa, Chief Seattle in “Mi’n leitung a ahih peuhmah ama tung a hih ahi a; hiai leitung chil a siatkhum a leh, amah leh amah chil kisiatkhum a hi”, chi hi. Eite a di’n hiaithu, diklaw mahmah kholdiak abang hi. I gam ah khangkhatlian bang suikik  lehang, masawnna muh ding tam hetlou a; huai gentaklouh in, masawnna omsate le pamtul hiai hiai abang hi. I masawn theihlouh ziak ahihleh, kuate hiam i gam a hong lut a, i gam masawnna ding uh a hong dal ziak ua masawnlou kihilou in, ei -asung a tengte’n i gam a dia i lungsim piak dan in masawnna ana vaidawn khawllouh ziak hih tuak hi. Solkar in a gam mipite  a dia Policy hoih taktak bang nei hi le uh leng, agam mipite’n kithei phaban lou, a vasuizuitu ding le ki-omlou, ngaihsaklou kihihtuak hi.

 

State solkar in kum teng in State Budget bawl in Pass hi. Hiai Budget i chih mipite aa hi a; Development Fund i chih le MLA te a hilou in, mipite sum ahi hi. Solkar sum i chih mipite Tax piak khawm hi a; aneitute mipite akihi hi. Huaiziak in, azatna leh azatdan, a Fund I muh dan, aziak  dik a akizat leh zatlouh i etkai uh ngai a; Official te leh MLA te kia theih dia i koih mawk un Corruption olsam tak a apiansak ban ah, mipite Moral piangsual sak thei hi.(Kua hiam in Private sum a Stadium bawl mawklou di hi ve aw, maw?).

 

Churachandpur Dist. ah laisiam leh mipil tamtak om hi. Social Media - Facebook leh WhatsApp Group ah thu hoih leh gam mipite adia thumanpha taktak muh di tampi tak om hi. Huaiziak in, theihna leh siamna ah asung a tengte tuantuallou hial uh ahi, chih kithei hi. Himahleh, pankhawm hatna ahi i chih sek uh atak a zat ahihlouh ziak in, i hat ding bang a hatlou, I masawn ding bang a ma kisawn theilou a; belam hon a vengtu leh chingtu ding neilou a vaak dalh i bang uhi. Ahihleh, bang chi pankhawm a, bangchi hat ding I hi hiam? Hon huikhawmtu leh hon khuikhawmtu ding ban ah, hon sinsaktu ding a om ngai hilou hiam?

 

Mipi nautangte lak a  gam-le-nam itna hon sinsak a, hon khuikhawmtu leh, makaihtu ding Regional Political Party i phuhkhiak uh ngai hilou hiam? Political Party phuhkhiak a kulnate, kimlou tak in, tawmkha taklang zual lehang: Political Party i chihte’n mi tengteng huap ahi, achihsek hang un, mi tengteng Party khat ah omkhawm vek tuanlou uhi. A ut om ua, a utloute  omlou uhi. A omte’n ahih leh, Political Training, Political Awareness leh Political Compaign nei sek ua; huaite eite’n I kiphatmoh mahmahte uh ahi hi. Gamsung Education, Social leh Administration enkaitu leh, Solkar a Pressure akul a leh, mohpotu hithei uhi. Solkar pai dikloh bawldikna leh Corruption douna thil ah mipite taang in ding thei uhi. Gamsung puah leh etkolna ah, Party dangte toh Competition chidam omsak thei hi.

 

Political Party i neihlouh ziak un, Politics ah kituantual mahmah a; gam-le-nam a dia i malakna uh gendi le omlou a; om ahi, chitute’n le mipite theih dia puanzak di nei tuanlou uhi. Mul-leh-mal kineilou a, i nam min bang uh khek khek ngai a, tuni tan in Political Issue solkar bil (Ear) tung phaban thu mulmal kineilou in Rumour ah mipite kibuai lailai hih tuak hi. New Delhi ah i mi leh sate’n 6th Schedule Demand a ni tamtak hun azat lai un, ei a Demand Area a tengte’n kigal-et mai mah hi.

 

I kim i kiang a i unaute’n tuhun in Phualpi solkar leh State solkar ah eite sang in masawnna neizo uhi. I kim i kiang a unau a i neihtheihte sang in, i theihchiang louhte ah lametna kinei zaw abang hi. Burma Zomite i khamuanpih mahmahte’n le saupi hontunlou ding bang hi. Ei sang a Politics leh Economy a gam tuantual zaw hi ua (Chin State I chih, Burma sung ale State tuantual pen bang le hilai maithei uhi), ei lamet bang hilou thei uhi. Nam-le-Gam thu ah thupukna i bawl ding chiang in, zirchiang masak leh theihchiang masak hileh, deih huai hi. MLA Election dek chiang in Social Media khawng ah i gen souhsouh ua; Election zoh chiah, gam-le-nam it leh, gam-le-nam thu gen le ki-om nawnlou, vuah mualliam agen uh toh kibang hi hang. I gen zom theihna ding Political Party i neihlouh ziak bang le hithei thou maw..?

 

Political Party i neihlouh ziak un, i MLA leh MDC te’n Principle detdou neilou ua; mipite vote a deih lai un “ka mi leh sate a ding in theihtawp ka suah di” chi le uh leng, Pharo tanu, tapa aa minloh hih utna ziak in, Govt. Form lamlam ah hon kikhinsan nainai maimah ua; mipite lam-et tung zoulou sek uhi.

 

Political Party i neihlouh ziak in ei hon suangtu i pi-le-pu te sulnung bangzah hiam kikhahsuah hi. Etsakna’n: Guite Road bang Official in Guite Road hi zenzenlou hi. Lamka bang le a mintak Churachandpur hi maimah! Mata Dam i sak a leh, Khuga Dam ana hi mawk! A lui min a Project bawl ahih ua leh, agam a tengte’n a luimin agen dan bek uh hithei leh maw. Chikmah a a gam mite’n Khuga kichi ngeilou hi. Chikni chiang hiam in, amin hiloupi a i sapsap uh haihuai hun omthei khong ding hi. Huaiziak in, ahun lai a buaipih leh ngaihven ngai a; tua Project hong pai dingte bangle “i bawlkhit chiah, i ut ut dan in a min i khek ke”, chih bang tuh Paite khawnung pilna di khat hizel hi.

 

Hun paisa a thiltungte’n hiaitan hontun ua; kilungkim zoulou ahih chiang in, gam-le-nam a di’n a hoihzaw leh detdou zaw i neihtheihna ding leh, i mipil leh mi siamte’n asiamna uh leh apilna uh ataktak a gam-le-nam a dia ahon zat-theih ua; a aw uh mipite’n I zaktheihna ding un, a Platform ding, a Pulpit ding Political Party i phuhkhiak mah uh, ken zaw lunglut huai kasa lailai hi.