You are here: HomeRSS FeedsLatest Articles

~ By : Jamin H Vualnam

 

 

Amasa in leitung mihingte lakah (Strife) kisiatna/kituahlouhna kichi chiibang a kitheh in munteng gamteng ah pou in zaamsuak ta hi.I innsung ah,eimah mimal ah,isepna uah,i society uah,vaihawmna saptuam ah leh biakna ah honpum tuam in,tua in nang-le-kei,khat le khat kitanau nate (relationship) hon nehem vekta hi.Kuapeuh mah hiai cancer bang a natna lauhuai leh hoihlou in hon hetkhak louh ki-om lou a poi mahmah hi.Ahihleh hiai (strife) kisiatna/kituahlouh na icih bang ahi dia le? huai tuh; kikhentuamna,(chi-le-kuang,beh-le-phung,neih-le-lam,pau-le-ham,khua-le-tui leh adangdang)kinakna,muhdahna,huatna,lungsim siatna,kiselna,mahni thu kia chih tentun na,kimelmakna, mimal leh mahni angsung khualna ziak a pawl tuamtuam a kikhennate leh adangdang te tuh (strife) kisiatna, kituahlouhna ichi thei hi.I innsung uh enle hang,hiai kisiatna/kituahlouhna tuh zalentak in khosa ta hi.I nupakal ah,nu-le-pa leh tate kal ah,sanggam laigui zawm te kal ah naktak in jungkha tahi.Insung a naupangte ikimawlna(toys) ziak bang,a khente lah sum-le-pai,gou-le-gam ziak bang in ikina in ikisia uhi.Tuakia leng hilou in,isepna uah,office ah,nektak zonna ah khatle khat  kihazatuah kituam et veuvau chih ten munteng aluah dimta hi.Alungkham huai kholdiak tuh,kisiatna leh kituahlouhna in I Saptuam-le-Biakna te ah le’ng awlsam tak in dinmun honluah ta hi.I biak uh Pathian lah kibang hinapi’n,ei abetute ikisiat ua ikituahlouh ua ikituam et deudau sese uh.I Biakin sungte uah lahHalleluiahchia laam a thumdaidai,khami lua hi awmtak leh limlua ibatlai in,apolam ah sami lua ihih khak ding kiven kul petmah hi.Adahhuai nawn khat tuh, Pathian nasem  kahi kichi tata bang khamit sang a sami zawsop,deihsak in vahilh lelah zanuam hetlou,hilhlouh dialah a hinkhua uh,agamtat uh,apaukam uleh omdante’n lah ahihna uh anengthem le zuikha vetlou uh,a poikhop mai.

 

Ahihleh bangpen tak in tuabang a kisiatna leh kituahlouhna (strife) te piangsak a khangsak hiam ichih leh, tua te tuh:

 

1.Huatna/Muhdahna(Hatred): Huatna in kinakna a tokthou a,himahleh iitna in khelhna tengteng atuam mang hi (Paunakte 10:12).Tua ahih man in huatna muhdahna tuh,kisiatna leh kituahlouhna tuntu ahipah mai hi.I muhdah naziak leh asan,i huatdan leh a ziak bel kibang khollou ding uhi.Himahleh imimal hinna ah kip in phungching mahmah ahih man in koimun ah sem in omleng le huatna leh muhdah na in honnuse ngeilou ding hi.Huaiziak in tuate iitna toh en in khoipiching lehang kisiatna leh kituahlouh na’ngte khempeuh tuahmang ding hi.

 

2.Hehna/Thangpaihna/Lungtomna(Anger/Fierytemper): Mikhempeuh hehthei leh thangpai theilou ki-omlou a,himahleh tua pen a hun leh mun theih a,hehna taak le taaklou a hehdan bang leh adik leh hoih a hehtheih poimoh ding hi.Ahoih a heh a thangpaiten bel phattuamna leh manphatna nei veve hi.Thil neuchik leh houchik khong a heh a thangpai a i lungtom a,phattuam naang omloupi a iphun phun laisiah kisiatna leh kituahlouh na itokthou semsem dia,atopna ah khat le khat kitanau nate hon teptan ding hi.Mi lungtom in kinak na a tokthou a,milungduai inbel kinak na a dai sak hi.(Paunakte 15:18  29:22)

 

3.Kigensiatna(Gossiping/Backbiting): Eii-lawi hihsiam mahmah tuh mi’kuahiamkhat gensiat,huaite le banglam hiam a iphakzohlouh ziak khong hi zomah lai.Apahtakhuai, a fellua chih naksang a,ahuchina a huaipa huainu zaw chi thouthou te ihi uhi.Gamle nam vai a politician te le chi zozen khang,Saptuam Upa,Pastor,Dawrka,Tuailai makai leh heutu bang hi vialvual,hotel khong,dawrkhong leh koihiam khong a migensia a nithapai thei,asak akhang kom tuah zualzual te ihi uhi.Thulaktak lou leh phatuamlou diing gen a dangnar in ne’m ta nguingui lai,gendi itheihkeileh genlouh dingbeek theile maw.Mi diklou isak a ideihsak leh amau kiangmah ah gen in hilh zole,singpi,kuva,laizial khaini honkhilai ding beituan keileh kilom.Huchibang a mi igen igen in khat le khat kisiatna, kituahlouh na chii(seed) tuhtuh ihi chih phok ni.I chiituh hongpou chiang in nang le kei kitanauna te(relationship) iimvual louh a hong gahkhe dia,aju khum khollou ding hi,tua ahihman in igen isak ah pilvang chiat ni hang.Mihoih lou in kinakna a tuh a,thusimgen haatmi in lawmhoihte a khenjak hi.(Paunakte.26:20.  16:28)

 

4.Kiselhaat/Kinakhaat: Paunakte 26:21 Suangmeihol tuh suangkuang thei tohkuang na,sing tuh mei tohkuang na ahih bang in,kiselhaatmi in kinakna a piangsak hi.Mi kuahiam khat midang gen-le-sak,sep-le-bawl gense ut a soisel ut leh ahilou lam a kiselpih a langpan chitchiat teitei ilakah tam mahmah hi.Tuabang miten,miitongheh in hatang thaksak ua,huchih hun in amau,atot te saang mah un ana hehzo uhi.Huchibang a kiselna in kinakna tohkuang a huai in buaina tuamtuam tun pahpah hi.Aziak ahihleh akhat zopen diklouleh hoihlou hizolou in,a tong tong tu’pen ah banghiam adiklou om hizo hi chih thei lehang maw.

 

5.Kisaktheihna(Pride): Lungtang kisathei mi in kinakna a tokthou a,himahleh Toupa a muanna ngami bel a lamzang ding(Paunakte 28:25).Kisaktheihna kideihkhopna in initeng hinkhua,ivaihawmna,isepna leh office ah zung khakip mahmah ta hi.Kei kua kaa,kei,kei kichi phanphan,a diktak alah bangmah hituanlou,zumnadan theilou te,thupil in’belhawm agin angaih’anachih danchet kihi lelhi.I nasepna,office ah,vaihawmna ah,committee,meeting, conference leh adang dang ah alianpen,chairman,president etc nahimai thei,siamna pilna aleng a siampen,pilpen,college,university hoihpen a graduate a degree sangtak nei le nahi maithei uhi.Himahleh dinmun aniamzaw,tanmun nuainungzo leh degree niamzo te bang inle idea leh ngaihdan  nangsang a hoihzo leh felzo neithei uh ahi chih imang ngilhlouh a deihhuai.Mihing imel-le-puam atuam dungjui a,i uut,ideih,ingaih dan kibangkimlou ahi chih phok a,kei hihna kia tanggup louh achidam huai mahmah ding hi.Niamchik a nakoih te bang leng nangsang mah a chinzaw leh lungpi geltheizaw hithei uhi.Nang maimai in kei seple bawlding maw nonhilh vial kichih na in kisiatna leh kituahlouh nate piangsak haat mahmah hi.Tua ahihman in kisak theihna tetawh kinaknak saang in,i lamzan a ilawhchin theih nang inToupa a muanna koih in kingainiam chiat lehang a damdawi hoihpen hong himai ding hi.

 

6.Angsungtheihna/Angmasialna: Jesu leh anungjuite’n Toupa nitakankuang nanung a umlai un,Amah(Jesu) matsak a awmdia khrost a kilhden ding ahih thu agen khit in a nungjui te lak ah kiselbuai na hongom hi.Huaituh angsung theihna leh angmasial tak a,’kua hiding hiam heutu hidia athupipen a ngaihding Jesu zoh in’ chih leh amau lak ah huchibang a mansak ding kua hiding a diam aw chih aki dongtuah kheukhou uhi.Hiaibang kiselbuaina ten kisiatna leh kituahlouhna piangsak hi.Huchih lai in Jesun akiang uah;’Zentelte’kumpipate a mite uh tung ah alal mahmah ua,a tung ua thunei tute tuh hamphatna petu aki chi hial uhi.Himahleh noulak ah zaw huchibang ahih louh ding ahi;nalak ua alianpen tuh naupang pen bang a a-om a,huan heutu pentuh sila bang ahih diing ahi. Kua ahia thupizaw, ankuang umpa hia,an nekding bawlsakpa?Ankuang umpa pen hilou hia maw?Himahleh keizaw na lak uah an nekding bawlsak pa bang in ka om zaw hi.Tua ahihman in mahni angsung kia khualkawm leh mite theih a heutu, Pathian theih alah nungjui dia le taak lou maw?ahih keileh ginna a siangthou leh muanhuai,mite theih a nungjui maimai,himahleh Pathian theih a pomtaak heutu hih itel zawk ding?(Luka  22:20-27)

 

7.Kitheihsiamlouhna: Huaihun lai a,nungjuite aki behlap touhjel lai un,a niteng nekletak thil hawm ua a meithaite uh limsak a-a om louh ziak un Greek Judate,Hebru mite tung ah aphun uhi.(Nasepte 6:1) Hiai awmdan tak tuh Jerusalem a Saptuam te sung ah leng kisiatna leh kituahlouhna atung chih chiangtak in amuh theih hi.Greek pauzang Judate leh Hebru pauzang Judate ki gensiatna,khat le khat atan bang bang ua lungkimlou a kitheih siamlouh na ahi. Huchibang mah in eite lak ah leng,beh-le-phung,pau-le-ham,neih-le-lam leh nektak zonna te ziak bang in khat le khat kitheisiamlou in iki gensia ua, iki phunsan in iki hekhek naak uh hilou mo?Tuate jiak khong mah in kisiatna leh kituahlouhna te’n,i-innsung ah,khosung ah,saptuam ah,office leh i-nektak zonna te uah hon kailut zungzung ta hi.

 

8.Pawltuamphuhna(Faction/Clique): I Korinth 3:3-5 Sami nahihlai ziakun,nalak ua,kihazaatna,kinakna leh kikhenna a-om sungteng,mihing lel bang a gamta in, sami nahi laikei ua hia,Mikhat in ‘kei zaw Paul, pawl kahi’,midang in ‘kei zaw Apollo pawl ka hi’, na chih sungteng un,sami bang a gamtalai lel nahi kei ua hia.Chi’a Paul in ana gen mahbang in,eii te pen a thukia a khami mahmah, a taktak a lah sami mahmahte ihikei ua hia maw.Thildang mundang genta’klouh i saptuam sung natawm ale akhami zou mahmah loute,kei huaite pawl, amah huaite pawl chia kikhen lailai te ihi tel ve ua.Huaikia hileh phave,department neu chikchik sung(local.dawrka,tuailai etc) lel ale koupawl,noupawl iki chih guigui lai tel uh,theizou ta khang!!!

 

Ahihleh Paul kua ahia? Apollo leng kua ahia? Nasemmi gingtu hidia noute hon makaihtu lel eive ua le, chih i phawk gige uh kisam hi.Ajiaktuh, heutu leh makai tuamtuam te bia ihih louhman in, ibiak Pathian lah ahiing leh siangthou,aki lamdang ngeilou leh eite hon hondamtu ahingal a.Huaiziak in samitnate nusia in khamitna mah mitsuan a,makai leh heutu te biakna in kisiatna, kituahlouhna lel ahi chih itheih thakthak uh deih huai mahmah hi.Khami mahmah iki saklaitak a samitna in hon pumvalh khin dimdem hihtheihna khovel ahihman in kivelthak chiat ni.

 

9.Ngaihdandiklou: Khovel pilna,siamna,theihna leh thil dangteng sang a Pathianthu mah toh kibulphuh a,huaimah pomkip a mitsuan tontung in khovel thilte tuamkoih lehang kisiatna kituahlouhna te a wm sese kei ding hi.(Timothi 6:3-10) ah bang genhiam ichih leh,’kuapeuh in thuhilhna dang ahilh a,I Toupa Jesu Khrist thutak leh Pathian limsakna lam kihilhna hoih asak keileh; amah mi kisathei, bangmah theilou ahi a,thute ah kiseel leh kinak utna hoihlou a neizaw a,huai in ennate,kinaknate,kikousiatna te,muanmohna giloute,thutak neilou leh lungsim sia nei a, Pathian limsak tuh punna diing a ngaihtuahte lakah kinaknate a piangsak hi.Lungkimna toh kithuah Pathian limsak na tuh punna thupitak ahi’.Huaiziak in saptuamte,makaite,mipiten salam pilna leh theihna te suang nonlou a, khovel mit a hak nonlou ding in iki chial hi.Khovel a ihinsung in salam thilte; sum-le-pai,neih-le-lam,nek-le-tak apoimoh kei ichi zenzen kei,himahleh tua bangte amasapen leh apipen a koihkhak theih ahi. Amah Toupa lungtuak photpeuhmah le hang a man tuh huaite tengteng a honpiak behlap diing hi.Amah lah bangkim tung a thunei leh vaihawmpa, apethei pa leh lakik theipa ahih ziak in.

 

10.Dawhzawh louhna: (2 Timothi 2:23-25) Kiselna haihuai leh mumallou khawng ah pang nuam ken; kinakna a awmsak nak chih na thei hi.Toupa sila tuh kinakhaat ahih louh ding ahi;mi tengteng tung a migi,thuhilh siam,thuak-haat,amah doute nunneem tak a bawldik mi ahi zaw diing ahi. Hiai i Bible a imuh bang un,kingaihniamna,thuakzohna leh migitna tuh ei Khrist nungjuite hih diing him ahi.Huchi hilou a tungnun kituh a,thulimlou leh thil haihuai phattuamnang loupi khong a ki tauhtauh na in kisiatna leh kituahlouna hon tunphet hi.’Dawnna neem in thangpaihna ahei mang’ chih mahbang in dohzoutak leh kingainiam kom a neemtak in;innsung,mimal,khosung,saptuam ah leh sepna khatpeuh ah om in,i awmdante,igen le sak niteng hunteng ah hinpih chiat lehang achidam kihimai ding hi.Kinakhaat phunhat,nuakhaat soisel haat hilou a,gensiam a seplouh saang in,gengen paupau selou a sepsiam hih kizil in zuih sawmle hang kituah louh chih omlou diing hi.Hitamahleh  hucibang khovel a om ihih laiman in,tuabangte idou a izawh theih naang in i Bible chaang tel zuichiat in eimah  a hihtheihna tuamtuam te suang lou in ahon thusinsak bang in zuichiat lehang,imi,isa,inam,igam,ikhua le tui,isaptuam chidam in kisiatna kituahlouhna ten hong taisan thei phet diing hi.

 

Huchi ahih leh hiai (strife) kisiatna, kituahlouhna ichih te, bang chi bang a dou a,ihinkhua a pan a koihkhia a paaikhe thei ding,kituak diamdiam a ihin a,lam tuamtuam a khangtou tak a ikhosak theih naang in tuh:-

 

a).Kinakna/kisiatna nawlkhin in mun peken.(Paunakte 17:14) Kinakna kipatna tuh tuichin khahkhiat bang ahi a,huaijiak in kinaksiatna om ma in tawpsan in.

 

b).Nanasep/Namohpuak kitheih in. (Paunakte 26:17) Mi lampai lai, amah panna omlou kinakna a, vakigolh tuh, Ui abil a man mi toh kibang ahi.

 

c).Nagamtat leh khohei enchian in. (Philipi 2:3) Mahni angsung khualna hiam, mahni ngaihdan kia hoih sakna hiam in, bangmah hih kei un; lungsim ki ngainiam in, michih in amah saang in midang hoih sazaw hen.

 

d).Nakampau vengsiam in.(Paunakte 18:6) Mihai mukten kinak na a-omsak ua,a kam in vuakna a sam hi.

 

e).Musitken. (Paunakte 22:10) Muhsithaat hawlkhia in, huchi in kinakna apai mang dia, ahi; kinak na leh kigensiat a bei ding.

 

f).Nalungsim thunun in. (Paunakte 16:32) Mihaat hihsang in hehhak hih ahoih zaw a,khopi latu hih saang in lungsim thunun hih ahoih zaw.

(Paunakte 25:8)   Mi heek ding in thukhen namun tung pah ken; na inveng in a hon zahlak sakleh, a tawp in bang na suak ta dia?

 

g).Gensiatnate limsakken. (Paunakte 12:16) Mihai hehna theih pah ahi a, himahleh mipil in enghouna damtak in apua hi.

I Peter 2:23  Enghou a a-omlai in, a enghou thuk kei a, a thuaklai in a vaukei a, diktak a vaihawmpa, Pathian tung ah lametna anga zaw hi.

 

h).Nunneem takin dawng in.(Paunakte 15:1) Dawnna neem in thangpaihna a hei mang a,paukhauh in bel hehna a tokthou hi.

 

i).Kiniamkhiak in.(Genesis 13:6-18) Abraham leh Lot a vanneih uh a thupi luat takziak in a tenna gam un a dawlzou ta kei a,tenkhawm hong haksata hi.Huchiin Abraham kiniamkhiat tak in Lot kiang ah,gam lah kidaih ahih man in, na ut nana tel inla i awmtuam tamai ding a; himahleh ikal a kinakna a awmlouh hial ding ahi,unau lah ihi ngal a achi hi.Huan ahong tengtuam ta ua huchiin Toupan Abraham tuh gam amuh chiangchiang amah leh asuante a din achiam a, asuante leng leitung a leivui zah a pungsak din achiam behlap lai hi.

 

j).Migiitna, haatlouhna ahikei chih thei in. (Sam 37:11) Thunuai lutten bel gam aluah diing ua, khamuang leh lamzang tak in a-om ding uhi.

 

k).Kilemna bawlpah in. (Mathai 5:9) Lemna bawlte a hampha uh, Pathian tate chih a om diing ahi ngal ua.

 Hebrute 12:14 Mi tengteng tawh kituahna leh siangthouna delh un, huai lou in kuaman Toupa amu kei ding uh.

 Romte 12:8 Ahih theih liaileh, na tung ua kinga tan ah mi tengteng toh kituak in om un.

 

l).Hehin thangpai denken (I Korinth 13:5) Huham tak in agam ta kei a, amah angsung kia akhual kei a, aheh baih kei a, mi diklouh na achiam teh kei.

(Paunakte 17:9) Mi tatlekna ngaidam mi in iitna a zong a, himahleh tatlekna gen thakthak mi in lawm hoihte a khen hi.

 

m).Zahngai takin ngaidam pah in. (Mathai 18:21-22) Huai nung in Peter a hongpai a, Jesu kiang ah,”Toupa ka unau in ka tung ah thil hihkhial leh, bang zahvei ahia ka ngaihdam diing? sagih veitan ahi diam? a chi a, Jesun a kiang ah,”sagih veitan in ka chi kei, sagih vei mun sawmsagih tan in ka chi zaw hi,”

 

n).Khemhaat in Kiliansak ken. (Ephesa 6:12) I doute zaw sa leh sisan ahi ngal lei ua, lalnate, thuneihnate, hiai khovel mialtung a vaihawm te leh van munkhong a kha gilou omte ahi zaw uh.