You are here: HomeRSS FeedsLatest News

Angels Vision News | March 14, 2017

Tuesday, 14 March 2017 16:14

Lamka khopi sung ah vuah tamlou hong zuk leh khopi sung a nullah leh luita teng niin bulom in hudim in hawktui in luanna ding mun nei nawnlou a, a diak in Lailam Lui pang a om te’n thuak nak mahmah in tuni in leng YVA Compound Veng Unit in Compound Veng leh Gouchinkhup Veng kikal a luang Lailam Lui JCB zang in hahsiang uhi. Tu Kiginni paita a vuah a chiin ziak in Lailam Lui khang a, lui sung a niin kipaih te’n tui luanna ding a dal ziak in Beulahlane ah innkuan 5 in buaina nasatak tuak in vengsung mipi’n social work nei in zan in JCB zang in lui sung a niin omte ana hahsiang uhi. Gouchinkhup Veng leh Compound Veng kikal a Lailam Lui pang a om te’n leng nasatak a thuak in, YVA Compound Veng Unit makaih in vengsung mipi’n social work nei in, JCB zang in lui sung a niin tamtak omte lakhia uhi.

Tu vuah zuk hun leng hinailou a hiang bang haksatna kituak ngal ahihleh tuuk a hong tun hun taktak chiang in mipite bangchi phet in i om di uam mo? chih ngaihtuahna liantak om in kingaihtuah tham ching mahmahta hi’n tamtak in gen uhi. Lui kichi mihing om ma tham a om in, tui lian leh tui tawm hun in amau lampi tawn in kuamah subuailou in a luan ngeingei in luang a, mihing te’n i va ngaih luat chiang in amau ngeina dan (nature) uh subuai kha ahihman in nawk theina lamlam a nawk uh ngai maimah hi. Nidang in Lailam Lui pen lian huntawk mahmah in, tui lian ziak a buaina tuak omlam theih hi ngeilou a, tu in ahihleh lui sung natan a inn va leng muh ding tamtak omta a, tua ziak mah a hichibang buaina kituak toutou in hichibang tawpsan ahih kei leh tua sang a nasazaw buaina tuak thei ding dinmun a ki-om gige ahih dan kuapeuh in a theih poimoh mahmah hi. Tuaban ah, lui pang a teng te’n leng hiai lui pen niin bulom leh deihlouh teng paihna mun dia zang in, lui sung ah tui sang in niin bulom muh ding tam zawta a, a neizou te’n lui sung a retaining wall bawl in, tui luanna ding mun leng omzou nawnlou khop in om hi. Hiai toh kisai in YVA Compound Veng Unit President in Luaithang in Lailam Lui sung ah kuaman niin paih nawnlou ding in ngetna bawl a, tuni a nasepna a kithuahpihna pia D. Phailian kho hausa Sholet tung ah kipahthu gen hi.


XXXXXXXXX


Lamka khopi tuinek supply tu Khuga Dam a tui lakna khawlpi tu Sintawpni paita a akisiat ziak in tuni tan khopisung ah tuisiang khahkhiak theihlou a om hi’n Khanlian, AE, Water Supply Department apan thutut kingah hi. Tuni tan in bawlhoihna nasep sepzomtouh zel himahleh baihlam chik a bawlzoh pah theih vual ahihlouh man in ni 2, ni 3 bang tuisiang kikhahkhe theilou ding hi’n gen a, mipi kuapeuh in theisiam ding in ngetna bawl hi. A baih theipen a bawlzoh ahih theihna ding in department in pan nasatak in la lel a, bawlzoh ahih phet chiang in Lamka khopi sung ah tuisiang kinungchiang tak a khah khiak hiding hi’n gen hi.


XXXXXXXXX


Tu February khasung in Lamka Damdawi Inn ah naungek 200 piang in, OPD a damlou ki-ensak 7,000 val a om banah tulel in Blood Bank ah sisan unit 38 om hi. Hiai toh kisai report kimu dan in, tu February khasung in natna tuamtuam nei OPD tungtawn a ki-ensak damlou mi 7,226 om in, naungek kum 1 nuailam (Neonate) ki-ensak 493 a om banah naupaai Anti Natal Check-up bawl mi 212 om a, tukum a dia naungek kum 1 nuailam ki-ensak a tam pen kum hilai hi. Maternity Ward ah naupaai mi 227 admit a om in, kha beitan in 213 in damdawi inn damtak in pawtsan ua, tu February khasung in naungek 200 (Pasal 105 leh numei 97) piang in, huaite lak ah normal a nau nei 157 a om banah aat-khiah thoh (ceaserian section) 43 om a, nau piang teng lak ah IUD (nu gilsung apan sisa a lakkhiak) 5 leh Still Birth 1 om in, nau-phiik 2 a om banah nau neih ziak a si mi 1 om a, naungek piangtung 194 te’n damtak in damdawi inn nusia uhi. Children Ward ah February khasung in natna tuamtuam nei naupang 242 admit a om in, kha bei tan in naupang 223 te’n damtak in damdawi inn nusia ua, naupang 1 si in, naupang 6 Imphal lam a etkol ding in refer in om hi. Neonate Ward ah naupang kum khat nuailam mi 45 admit a om in, kha bei tan in naungek 40 te’n damdawi inn damtak a apawtsan lai un, naungek 3 (pasal 2 leh numei 1) damzoulou in hiai Ward ah si a, Imphal lam a etkol ding in mi 3 refer in om uhi. Surgical Ward ah damlou mi 131 admit a om in, kha bei tan in damlou 97 te’n damdawi inn damtak a apawtsan lai un mi 10 Imphal lam a etkol ding in refer hi a, tu February khasung in hiai ward a si omlou hi. Ortho Ward ah guh lam natna nei mi 74 admit hi a, damlou 44 te’n damtak in damdawi inn pawtsanta in, Imphal lam a etkol dia refer a omlouh banah hiai ward ah si leng omlou hi. ENT Ward ah tu February khasung in damlou 17 admit a om in, kha bei tan in damlou 14 te’n damtak in damdawi inn pawtsan ua, Imphal lam a etkol dia refer 1 om in, natna thuak zoulou a si mi 1 om hi’n report in taklang hi. Medicine Ward ah tu February khasung in damlou 233 admit a om in, kha beitan in damlou 182 te’n damtak a damdawi inn a pawtsan lai un, damlou 33-te Imphal lam a etkol ding in refer in om ua, damlou 9 (pasal 9 leh numei 5) hiai Ward ah si uhi. Blood Bank in tu February khasung in replacement leh mi phatuamngai mimal tuamtuamte apan sisan Unit 134 mu in, damlou tuamtuamte kiang ah sisan unit 101 pekhia ua, mi tuamtuam apan sisan a muhte uh lak ah unit 8 zat theihlouh a om banah Unit 4 expire man hi. Tuaban ah, sisan unit 6 replacement lou in pekhia ua, damlou a sih ziak a ngaihdam unit 7 a om banah Donor Card tungtawn in unit 1 pekhia uhi. Tulel in Blood Bank ah A group Unit 3, B Group Unit 17, AB Group Unit 6 leh O Group Unit 12, a vek in sisan unit 38 omlel hi’n report in taklang hi. Thutut kingah dan in, CCPur District in kha teng in sisan Unit 120 apan 150 kikal poimoh gige a, tulel in Blood Bank ah sisan unit 38 lel om ahihna ah mi phatuamngai mimal leh pawl tuamtuam te’n kiphaltak a apiakte un daih zoulou ahihna ah replacement lou a sisan damloute kiang a piakkhiak kichi hithei taktak nailou hi.


XXXXXXXXX


Tu February kha sung in CCPur District ah Malaria Positive 2 muhkhiat in om a, Malaria PF bel omlou hi’n Malaria Depart in report a suahna uah taklang uhi. Report in a taklat dan in, Malaria Department in CCpur District sung a Health Centre leh Sub-Centre tuamtuam apan damlou 1,057-te blood slide la in, hoihtak a etchetna a neihna uah Malaria Positive 2 mukhia in, Malaria PF bel omlou hi’n taklang hi. Tuaban ah, tu January khasung in Blood Slide 840 lak a om in, huai a Malaria Positive 1 muhkhiak hi a, positive pen leng Malaria PF hi’n taklang a, Malaria natna ziak a sihna tuak a omlouh banah damdawi inn a etkol leng omlou hi’n report in taklang hi.


XXXXXXXXX


Centre for Community Initiative (CCI) in zingchiang in Malsawm Ability Resource Centre, Pearsonmun ah World Glaucoma Week leh Snapdeal Sunshine First Donors Meet nei ding uhi. Hun zatna ahihleh sunma dak 11:00 in kipan ding a, Pausuanlal Guite, School Administrator, TMI in World Glaucoma Week Message gen in, The Malsawm Initiative a kai naupang te’n special item lahna nei ding ua, Miss Niang Ngaih Mang, Dy. Director, CCI in Snapdeal Sunshine toh kisai pulak in, naupangte lak ah thilpiak piakkhiakna makaih ding a, Donors-te apan thugen ngaihkhiakna om in, Pastor T. Tunson, Local Pastor, Bethel Baptist Church, Lailam Veng in Donor-te a ding in thumsakna nei ding hi.


XXXXXXXXX


Bijang a om SBI-RSETI in tuailai kum 18 apan kum 45 kikal mite a dia Free Short Term Course training a neih uh paitoupih zel in, tu in Rural Entrepreneurship Development Programme (REDP) ah training nei lel uhi. Hiai training ah Lamka leh a sehvel apan sum sinna lam a lunglutna nei mi 15 (pasal 9 leh numei 6) kihel in, Mangboi Vaiphei, MBA in sinsakna pia a, tukal sung in zousiang ding uh hi’n kigen hi. Tukhasung mah in SBI-RSETI in Ak khoina lam toh kisai a lunglutna neite a ding in training neih sawm nawn ua, lunglutna neite a ding in ngaihven theih lai ding hi. Hiai a dia seat omzah ahihleh 25 hi a, ni 6 sung ak khoi dan training hoihtak piak hiding ua, sen-le-pan bangmah a omlouh in training hunsung teng in sun-ann piak hiding uh hi’n kigen hi. Lunglutna nei te’n SBI-RSETI Temporary Office, Bijang ah office kai hunsung in ngaihven theih ding a, form leh thil bangkim huai mun mah ah ngah theih ding hi.


XXXXXXXXX