You are here: HomeRSS FeedsLatest News

Angel's Vision News | November 25, 2016

Saturday, 26 November 2016 08:11

THUTHANG LAKTOMTE

@@ Election hun chiang in sepaih 7000 val zat hiding in SP/CCpur in gen

@ @ Imphal West Police Commando te'n UNC President leh Information Secretary man. Naga te tenna bial teng ah Total Shutdown puan in om

@@ Israel khopi Haifa ah gamkang nasatak om.... Israel PM in gamkang saktute dop hilou ding hin gen

 

 

 

TUALSUNG THUTHANG

 

SP/CCpur Rakesh Balwal, IPS in tuni sunnung dak 1:30 in ama office chamber ah Press/Media-te houlimpih in maban election om ding toh kisai a security lam a kisakkholna a neihte uh a pulak banah Zu leh khamtheih doudalna a patna ziak nouneltak in gen hi. SP/CCpur in a gendan in, kum nawn election pen January khasung a neih man a gintak thu gen in, lohchingtak a neih ahih theihna dia kisakkholna pat a omta hi'n gen hi. CCpur District ah Polling Station 318 om ding a, 60 percent val ah Mobile Network a omlouh ziak in Sattelite Phone 35 zat ahih ding banah Hengkot, Singngat leh Vangai ah kithuzak tuahna ding Repeter Station koih beh hiding in gen a, Tuibuang Peace Ground pen dedicated helipad dia zat ahih ding banah Jiribam, Senvon, Pherjol, Thanlon, Henglep, Kangrengdor, Lungchin, Parbung, Sinzawl, Leijangphai leh Mualhoihchiang ah Helepad bawl hiding a, Polling Station tuamtuam a duty ding in Women Police Company 1 tel in Central Armed Police Force Company 76 (personnel 7000) vel zat hiding hi'n gen a, State apan MR leh IRB apan Company 14 in kithuahpih ding uh hi'n gen hi. Tuaban ah, mun 9 Kangvai, S. Kholian, Sinzawl, Senvon, Sibapurikhal, Sangaikot, Sagang, Singngat leh Behiang ah Cehckpoint koih a om in, Checkpoint teng ah CCTV koihsuak vek hiding a, Sector Police Officer 30 om in, Sector Officer khat in Polling Station 10 zel enkai ding hi'n gen hi. Zu leh khamtheih doudalna toh kisai a genna ah, zu leh khamtheih ziak in thil hou chikchik ah buaina suak phutphut thei ahih ziak a hiai drive nasatak a paipih a om hi'n gen a, zu dawn bel kham hikei mahleh zu mun a zu dawn chihte kham bikbek hiding a, matkhiak a omte dan toh kituak a gawtna piak hizel ding hi'n gen hi. Tuaban ah, damdawi khamtheih toh kisai leng naktak a etkai hiding a, tu in CCpur District sung a khamtheih zuakte etkai hilel in, a hun a tun chiang a baihsamtak a matkhiak ding leng hunkhop omta hi'n gen a, matkhiak a omte baihsamtak a khahkhiak hilou ding uh hi'n gen hi. Hiai toh kisai in mipi lam in leng kithuahpihna pia a, damdawi zuakna dawr te'n leng Doctor lehkha tellou a damdawi bangmah ana pekhe lou dia ngetna a bawl banah zu leh khamtheih in tuailai tamtak suse thei ahihna ah kuapeuh in kithuahpihna pe ding in ngetna bawl hi.

 

 

Tribal Rights Vigil Manipur (TRVM) JHQ Lamka in zingchiang sunma dak 11:00 in Mini Auditorium, Dorcas Hall ah RTI Helpline a bawl uh honkhiakna nei ding uhi. Hiai hun zatna ahihleh DC/CCPur Lunminthang Haokip, IAS in Chief Guest hihna toh uap in hongkhe ding a, Rev. Lian Benson, Executive Director, EELC in Pathian kiang ah latkhiakna nei ding hi. Programme hunsung in mi tuamtuam apan thugen ngaihkhiakna om in, Thangbiaklian Hangzo, Chief Moderator in vaidawnna thu gen in S. Khaikhopau NGaihte, MCS in kipahthu gen in programme zou ding uhi.

 

New Testament Baptist Churches Association (NTBCA) saina in Garlow Memorial Chapel, NTBCA Campus, Bible Hill, Rengkai ah November 27, 2016 tan daih ding Annual cum Missions Conference a 67veina tuni'n kipan a, tusun hun ah Rev. Dr. Ginnei Thang Ngaihte leh a zi Mrs. Ningkhan Ching Ngaihte makaih in Seminar om hi. Seminal ahihleh tuni zinglam dak 10:30 in Rev. K. Hangnung, Executive secretary, NTBCA in hongkhia in Rev. Dr. Ginnei Thang Ngaihte, Director of Asian Cross-Cultural Training Institute, Singapore in "Trends in the World of Missions" chih leh "God's Equipment for Mission" chih thupi zang in sinsakna nei a, Mrs. Ningkhan Ching Ngaihte in "A Healthy Missionary Family" chih thupi zang in sinsak hi. Annual Conference ahihleh tunitak in kipan ding a, Rev. Dr. HC Stephen in hongkhia in, khawmpi hunsung teng in Rev. dr. Ginnei Thang Ngaihte in thugenna hun zang ding a, NTBCA nuai a Missionary Field tuamtuam a sem Missionary te'n Mission Field Report pia in, November 27 nitak in Rev. B. Chinlal in khawmpi khak ding hi. Tuabangkal ah, November 29 leh 30, 2016 in NTBCA Simveng ah Business Session om ding a, hiai hun ah Budget leh Yearplan toh kisai genkhawm ahih ding banah kho tuamtuam in agenda a puaklutte uh kikum ding ua, Delegate 70 val kihel ding uh hi'n thutut kingah hi.

 

Maniging Director, MSPDCL Manipur thupiak dungzui in Churachandpur Division huamsung a om Manipur Government nuai a sepna nei te'n Dy. Manager (IT), MSPDCL CCpur Division kimuhpih a, One Time No Due Certificate bawl dik ngai omte'n prescribed format zang a bawl dik ding in theihsakna bawl hi. One Time No Due Certificate ahihleh kum nawn 2017 apan in hard copy issue hi nawnlou in, online tungtawn ngen a bawl hita ding a, Post Paid Consumer dan a ki-upload Prepaid Consumer te'n www.powernodue.com ah Prepaid ID leh Meter Number upload theih ding a, invalid data omte reject a hih ding banah a khaloh uh hentangsak hiding ua, MSPDCL in hiai toh kisai mohpolou ding uh hi'n taklang hi.

 

Bungmual Veteran Football Association (BVFA) saina in hongtung ding December 9, 2016 apan December 20, 2016 sung in Lalpuithluii Foundation School, Bungmual ah school naupangte a ding in Winter Meet cum Football Talent-Search Tournament om ding hi. Hiai tournament ahihleh naupang football kimawlna lam a siamna hoih taktak neite zonsuahna ding tupna ahih banah naupang Kg 50 sang a gikzawloute a ding bik a sai hiding hi'n kigen hi. Lamka leh a sehvel a om naupang lunglutna nei te'n thuchian kimzaw leh application form Siam's Xerox leh Mawii's Dawr, JC Park, Bungmual ah ngah theih ding a, application form la khempeuh in December 8, 2016 tan in entry fee Rs. 500 pia in tua kitaklang munte ah piaklut ngai ding hi. Champion Team in kipahman in Rs. 5,000 sang in, Runner's Up in Rs. 2,000 a sang ding banah Semi-Final a vuallel team te'n Rs. 1,000 tuak dang in Man of the Tournament kiang ah kipahman in Rs. 1,000 piak hiding hi'n leng thutut kingah hi.

 

All tribal Women Union (ATWU) in tuni sunnung dak 3:00 in District Hospital Morgue ah Lamka pansan Press/Media-te kimuhpih in 6th Schedule toh kisai a New Delhi a kal ava suanna utoh kisai mipi theih ding in report pia uhi. Thutut kingah dan in, apaisa November 12, 2016 in Nu Nianglian, President, ATWU leh Nu Kimzaching, Asst. secretary te'n New Delhi ah Central Government toh kimu ding in Lamka nusia in zinkha ua, India President Pranab Mukherjee tel in MP tuamtuam a kimuhpih nung in November 23, 2016 in Lamka damtak in hong tungkik uhi. ATWU palai te'n Delhi a ava taam sung un Rajya Sabha MP 5 - P. Chidambram, Chairman of House Committee, Biswajit Diamary, Conrad Sangma, D. Raja leh Majeed Memon a kimuhpih banuah Lok Sabha MP 4 - Dr. (Prof) Kirit Premjibhai Solanki, Chairperson, Parliamentary Standing Committee on Welfare of Schedule Caste & Schedule Tribe, Choudhary Mehbood Ali Kaisar, , Pu Neiphiu Rio leh Pu. Dr. A Sampath banah India President Pranab Mukherjee, Kiren Rijiju, MOS (Home) toh leng houlimna hun sau kuamtak nei in Satender Garh, Joint Secretary, North East toh leng kihouna va nei ua, amau te'n Parliament session hun ah Manipur singtangmite constitutional rights leh demand toh kisai a special mention/short duration discuss dia puaklutsak ding in ngetna vabawl uhi. ATWU palai te'n Solanki, MP deihsakna ziak in Prime Mnister Narendra Modi toh kimuhna ding appointment piak himahle uh Lok Sabha sung lut theihna dia pass a ngaihtuah sung un PM in buaina a neih thut ziak in kimuhpih theilou uhi. ATWU te'n Dr. D. Raja, MP makaihna in President of India Pranab Mukerjee kimuhpih in Memorandum a piak banuah President in Union Home Minister kiang ah leng pe dia a sawl ban ah Cabinet Secretary-te sam khawm a, i tungtang uh gen khawm ding uh ahih dan theisak hi. Tuaban ah, President deihsakna ziak in Presidential Palace etna (tour) aneih ban uah, a paina ding uh gari leh bangkim leng President in arrangement teng bawlsak vek a, hichibang a ei singtangmite hon deihsak a, ma hon lakpih M.P. te, Minister te teng teng tung ah ATWU in kipahna sangtak chiamteh uhi. ATWU in lunglel lou a mipite i pankhawmnate uh ziak in tunung zek chiang in i lunggulh leh i lungtup te uh i muh ngei leng lamet huai a sakthu uh gen uhi. Press Conference neihna news zoh chiang in suahkhiak hiding hi.

 

 

 

GAMSUNG THUTHANG

 

Manipur state sung a Economic Blockade pailel toh kisai in, state sung a niteng poimoh thilte ban ah thautui haksatna thupitak om ziak in, tuni in Manipur Police Commando pawlkhat in Imphal West district sung ah United Naga Council President Gaidon Kamei leh UNC information Secretary man uhi. Police thusuak in a gendan in, mat a om UNC president ahihleh kum 52 a upa Gaidon Kamei S/o (L) Landou Kamei of Noney Part 1 hi a, tulel in Namdulong ah teeng hidan a gen himahleh Pheidinga mun a mat a om hin Police thusuak in gen hi. Police thusuak in a taklat zelna ah mat a om hun in, Thomas Liangmei S/o Chairman Leimakhong, Khunkhu village tenna inn a omlai a mat a om ahihban ah, ni 2 ni 3 paita a tua Thomas tenna inn a kibu hin Police te'n gen uhi. Gaidon Kamei mat a om toh kiton in, Bolero hektu dia a zat ban ah UNC Information Secretary hihna lenlel Sankhui Stephen (36) s/o (L) sankhui Thamnok of Komsen Village, Chandel district leng mat in om hi. Tuabang a Police commando te'n UNC President leh Information secretary a mat ziak un, tuni nitaklam dak 4 apan Manipur state sung ah Nagate tenna bial teng total shutdown puan in om ngal a, himahleh hiai thu kaihkhawm ahihtan in total shutdown ziak a thiltung thupilua omlak zak hitadih lou hi.

 

PM narendra Modi in sum note sihsak a omna toh kisai ni 3 hal teng a etkik a om ahihdan a puankhiak nung in, zan nitak in Cabinet meeting makaih in huai ah tuni apan Bank tuamtuam a counter te ah sum note luite 500 leh 1000 note khek theih hi nawnlou ding chi uhi. Tuabang a sum note 500 leh 1000 note Bank Counter a a thakte toh khektuah phal hinawnlou ding chih himahleh, December tan deposit theihlai ding a, Bank account neilou te'n account hongthak a 500 leh 1000 note te deposit ngaiding hin kigen hi. Kal khat sung a sum draw khiak theihzah dia limit bawl a om 24,000 leng khek a om tuanlou in, a hibang bang in omlai a, ATM ah ATM card zang in nikhat in dangka 2400 tan draw khiak theihding a, gamsung pumpi a ATM lakh bangzah hiam omte lak ah ATM koihna mun Lakh nih val ah ATM in 2000 note thak a sim theihna ding in, bawlthak in omta hi.  Sum note lui 500 leh 1000 note te Bank counter ah tuni apan khek theih nawnlouh ding chih himahleh, Oil pump leh damdawi inn tuamtuam in khanawn December 15 tan sum note luite la theilai ding uh a, Tui fee leh Electric fee leng sum note luite zang in December 15 tan piak theih laiding hi. Reserve Bank of India in Paytm chihte a E-wallet tungtawn in digital transactions a khep in pungsak a, kha khat in E wallet ah dangka 20,000 tan koihtheih ding hi. Tu in Income Tax official leh Bank official te'n Tax a kipiak ngeilouhna mun North east state tuamtuam ah Bank deposit bawl a omte ginlelh huai omkha hiam chih naktak in suizui lel uh hin kigen hi. Income Tax thusuak in a gendan in,singtangmi Tribal mite tenna mun a diak in, Meghalaya, Nagaland, Mizoram, Manipur, Arunachal Pradesh, Tripura leh Assam a teeng singtangmite Income Tax under Section 10 (26) of the Income Tax Act, 1921 pansan in Tax lak in omlou uh a, tua Dan pansan in, tua mun bikhiah scheduled area sung a singtangmi khatpeuh in a lohkhiakte ua pan Tax lak in omkei mahle uh, sales, excise leh service ah tax a piak uh ngaiding hin gen a, tutung buaina toh kisai in, dangka Lakh 2.5 tunglam deposit te a ding in, singtangmi hile uh leng a summuhna uh leh a neihzah uh Account of cash diktak a piaklut uh ngaiding hin gen a, tua ziak in Bank peuhmah in huchibang sum thakhat thu a tamtak deposit omkha om hiam chih Mu lukolh bangmai a hak kilkel kawm a enzui lel uh hin kigen hi. Tuabang a sum leh pai tamtak thakhat thu a deposit te muhkhiak a om ngeingei leh Bank te'n National Securities Depository Limited (NSDL) ah hilhtou ding uh a, NSDL in Income Tax department thuzak in huai apan suizuina kipan ding hin kigen hi. Tuabang a dangka Lakh 2.5 val deposit tu matkhiak a om peuhmah singtangmi hita leh leng a sum muhna diktak a piakkhiak theihkei leh midangte bang in 200 percent tax a piak ngaiding hin kigen hi. Tulel in Schedule Tribe te Black Money zang a sumdawngtu, helpawl leh thautawi pawlte'n a sum neihte uh ST te zang a deposit sawm om uh hiam chih suina leng pailel hin kigen hi.

 

Tukal Sepnawnni a Dimapur Airport a sum tamtak pua lenna khat mattang ahihnung in, tua sum tamtak mat a omte muhna diktak piaklut theihlouh ziak in Police in tua sum pawtu man uh hin kigen hi. Police thusuak in a gendan in, thil omdan diktak ahihleh tukal sepnawnni in Nagaland CM lui Neiphiu rio makpa in Charttered Jet khat hire in Dimapur Airport tung a, huai ah Income Tax department in muanmoh huai sa in, lenna sung hoihtak a a et uh leh sum hul Dangka Crore 3.5 toh kicheina van man tam taktak a sum a tuat in dangka Crore 7 val manding mukhia uhi. Mat a om Neiphiu Rio makapa Anato Zhimomi hoihtak a thudotyna neih ahihnung in, Anato in Delhi pansan sum dawngmi hausatak khat apan sum tamtak la in, Dimapur a amah bank account zang a deposit sawm ahihdan gen a, a sum muhdan diktak gen thei hileh Tax a piak leng ngailou ding chih himahleh a gen theihlouh ziak in mat in om hi. Income Tax Department in hiai toh kisai a gendan un, sum neitu Business Men leh Anato in text message leh Whatsapp tungtawn a message a kikhakte uapan in, Anato in dangka Crore 6.7 velding amah accopunt ah transferred bawl ahihdan leng mukhia uh chi hi.

 

Manipur in a zintun 10th Manipur polo International Tournament kichi Imphal khopi sung a Mapal Kangjeibung a Polo ground a neih a omlel ah, England in Indian A team zou uhi. Match masa ah England leh India-A team kimawl uh a, huai ah England in 6-2 in vualzohna tang uhi. Gam nihte kimawl hun ah England apan Phil Seller in chukker khatna leh a nanung ah nihvei khum a,  England apan Kaveh Atrak in 1st leh 3rd chukker ah khum tuak in, George Selon leh Ali Benrab in 1st leh 2nd chukker ah khat tuak khum uh a, India apan Mahesh in chukker tawpna pen ah nihvei khumzou hamham hin kigen hi. Match nihna ah Australia in Kenya kimawl pih ua, huai ah Australia in 5-0 in nuamtak in vualzohna tang hi.  Australia leh Kenya kimawl hun ah, Australia apan Beau Blundell in minute 1.52 in Australia a ding in Chukker masa ah khat khum ngal a, minute 4.34 a chukker 3na om hun ah Blundell mah in khat khum nawn in, minute 3.22 ah Adam Tolhurst in Australia a ding in khat khum a,  Alex Barnet in 1st leh 3rd chukker ah nihvei khum in, hunbei tan in 5-0 in vualzohna tang uhi.

 

 

 

GAMDANG THUTHANG

 

Israel gamsung a vuah a zuklouhnung kha nih a phaktak toh kiton a khua a keu mahmah hunlai tak in, meltheihlouh pawlkhat in Israel gamsung mallam pang a om khopi Haifa kichi kiang a gamlak a haal ziak un, meikuang thupitak om in, tuni tan in phelhmit zoh hi nailou hi. Tuabang a Haifa khopi nawl a meikuang thupitak omlel in khopi sung tanpha pehding dinmun a om ziak in, Israel solkal in Haifa khopi sung a teeng mipi 10,000 valte mun bitzaw zuan in hepkhiak kipan a, helicopter tanpha zang a gamkang phelhmit sawm himahleh phelhmit ahih nailouh ziak in, Israel Prime Minister Benjamin Netanyahu in meikuang omsak tute helpawl nasep toh kibang a ngaih hiding ahihdan gen in, thaghum a khauhlua omlou a zatkhum hiding chi hi. Haifa gamkang ahihleh khua a keuluat ziak ban ah, huih a nung ziak in, meikuang kipeh sawn kin mahmah hin gen ua, gam liantak kangse sak theiding a om ziak in, meiphelh gari leh lenna tanpha zang in sun leh zan chih omlou in meikuang phelhna neilel uhi. Gamkang toh kisai in Israel PM in thautang zang a mi kaplum tute toh meikang om saktute thilhih kibang hin gen a, gamkang piang saktute tung ah full force zat hiding a, thagum a neep lua chih a omkei ding chi hi.  Gamkang ziak a meikhu tamtak om te'n Haifa khopi sung zelsuak ding dinmuna om ziak in, Israelsolkal in mipi 80,000 vel Haifa khopi sung a teengte kiang ah mun bitzaw zuan a kihem khe ding in theisak a, tenna inn bangzah kangseta hihiam chih theih hi naikei mahleh tenna inn bangzah hiam bawlthak theih nawnlouh ding khop a kangsia uh hin gen uhi. Gamkang phelhna ah Turkey solkal tel in gam bangzah hiam in gamkang phelhmit na ding a kithuah pihna peding uh hin gen ua, ni hong tungzel dingte ah huih hatsem nung ding hidan a genlawk a hihziak in gamkang phelhmit zoh pah ahihding gintak huailou hi.

 

North America leh South America teptuah a om Central America ah zan nitak in zinling hattak Magnitude 7.0 a liing om in, tenna inn khenkhat khaangsak mahleh si leh liam omlam theih hilou hi. Zinling kipatna ahihleh El Salvador tuipi zul apan Km 120 velding a gamla tuipi nuai hi a, zinling om hun in zinling a hatluat ziak in Nicaragua tanpha ah zinling kithei baan in, zinling in tuipi a tui omte nasatak a kihawt sak in, tui kifawn thupitak piangsak man mahleh Tsunami om theiding a patauhna dakkal khat sung koih ahihnung in, lakkhiak in om nawn hi. El Salvador gamsung ah ahihleh Chalatenango, San Salvador, Cabanas leh San Miguel ah zinling kithei baan hin kigen hi. Zinling kipatna mun El Salvador ahihleh khovel pumpi a zinling om gige na mun Pacific Ring of Fire in a huamkhak sung a om hi a, tangkang om gige ziak in, El Salvador gamsung km 40,000 sung ah tangkang 450 velding kumteng in om gige hi. Kalnih paita sung in leng Ring of fire sung mah a om Japan leh New Zealand ah zinling hattak tehna 7.0 magnitude a hat ana liing khinta hi. 

 

China gamsung a Jiangxi province sung a om Fengcheng ah Powerv station kilam thak khat ah cooling platform kibawl lel thakhat thu a a kichip ziak in, tua cooling platform kichim in nasemtu mi 67 delhlum hin kigen hi. China gamsung ah ahihleh thil bawlkhiakna munpi kichim ahihkeileh kisiat ziak a thiltung gending tam thei mahmah a, tutung a Fengcheng mun a Power station kibawllel khat a Cooling platform a kichip ziak in, mi 67 si in, midang tamtak liam uhi. Cooling platform ahihleh  cement, steel girders leh siik tamtak zang a kibawl hi a, a kichip phet in a nuai ah tua cooling platform tung teng kichim khesuk hin gen uhi. Tua Power plant ahihleh electric meitha 1,000-megawatt piansakna ding a kibawl hi a, 2018 kumbul lam a zohsiang ding chih himahleh tutung a cooling platform kichip ziak in hun bangtan hiam lutzek laiding hin kigen hi.

 

Iraq gamsung a khopi lianpen Baghdad khopi simlam pang a om Hilla kichihna mun a Petrol pump khat ah Shia muslim tamtak Pathian bekhin innlam zuan a paite'n thautui a thunlai tak un car a kikoih bomb hattak puakzak in, huai ah mi 100 velding in sihna tuak uhi. Thiltung toh kisai in ISIL in amau khutnung hidan in puang ua, Shia Muslim te tupna beilou ahihdan latsakna hin leng puang uhi. Sihna tuak Shia Muslim tamtakte ahihleh Muslim tem un siangthou Karbala mun a Pathian bekhin Baghdad khopi zuan a pailai hi ua, car a kikoih bomb hattak a puahzak nung in, tua Petrol pump leng kuangzak ngal in, Petrol pump kiim a om gas tanker leng puakzak in, restaurant khat leng kise dimdem hin gen uhi.  Baghdad khopi a om Joint Operations Command in ahihleh thiltung toh kisai in, car sung ah Ammonium Nitrate litre 500 velding koih a om hin gen ua, tua ziak a bomb puak pen huih a leng kuang thei hin gen uhi.