You are here: HomeRSS FeedsThe Lamka Post

The Lamka Post | February 19, 2018

Monday, 19 February 2018 09:03

 

Gamsung mi khat peuh in numeite hihna leh dinmun zahtak sak ding a mohpuak uh ahi: Najma Heptulla

Imphal, Feb 18: Manipur state sung ah gamdangte toh etkak in numei zahtakna leh numeite hihna kepbit sakna lam ah numeite’n dinmun liantak leh mun awng piak a ki-om ahi chi’n Dr. Najma Heptulla in gen hi. Gamsung mi khat peuh in hiai bang a numeite hihna leh dinmun zahtak sak ding poimoh mahmah ahi chi a, newspaper leh thutang tuamtuamte ah numei rape ahihkeileh gelgawt kichite a bei theih nang a kuapeuh in panlak poimoh ahi chi hi.

 

Hiai toh kisai ahihleh Manipur Governor Dr. Na­jma Heptulla in Raj Durbar Hall, Raj Bhavan, Imphal a Nationwide competition on Legal Rights of Women hun a kipahman sangte piakkhiatna a neih hun a, a gen ahi.

 

Nationwide competition on Legal Rights of Wom­en ahihleh National Commission for women-te’n a spon­sor uh ahih ban ah a paisa January 12, 2018 a Manipur State Commission for Women (MSCW)-te’n ana sai uh hi a, huai hun a college student tamtak kihel uhi

 

Function hun ah Education Minister, Th. Rad­heshyam Singh; Chairperson, Manipur State Commis­sion for Women (MSCW), Dr. K. Sobita Devi; MSCW’s Members, Dr. farida Shah leh Smt. Ranjita Golmei-te’n Special guest, president leh Guests of Honour hi­hna toh uap uh hi’n thusuak in taklang hi.

 

 

Tripura assembly election zoh hita:

Tripura state sung ah vote khe thei ding mi 2,536589 om lak 76% in vote khia

AGARTALA, Feb 18: Tripura Assembly elec­tion tuni Feb 18 Pathi­anni in bangmah buaina omlou a neih zoh in om a, huai hun ah nitaklam dak 3:00 tan in vote khia 65% tungzou a, dak 4:00 tan in bel 74% tungzou a zoh ahihtan in 76% tung hi’n official thusuak in taklang hi.

 

Tuni a vote khiat hun ah assembly seat 60 om lak ah 59 a ding in khiat in om a, huai lak ah candidate 292 om hi. Assembly seat 1 pen ahi­hleh CPI(M) candidate Ramendra Narayan Deb­babarma a sihziak a post­pone a om hi a, amah din­na constituency Charilam mun ah a hongtung ding March 12 in neih hiding hi. Vote simna ahihleh March ni 3 in neih hiding hi.

 

Tripura vote khiat­na toh kisai ahihleh zing chiang Seppatni a EVMs official strong room tung pan ding ahihna detail re­port kipe theilou ahihdan taklat in om hi.

 

Polloing ahihleh zinglam dak 7:00 in ki­pan a, zinglam in bel vote khe ding mi tawm mahmah hidan in ki­gen hi. Sunnung lam in bel mi tamtak pai­khawm in nitaklam dak 4 tan mi om zou ahih­dan thusuak in taklang hi. Polling neih hun a vote kikhiat tamna pen hiding a gintak thu ki­gen ahihleh BJP leh CPI(M)-te hi’n kigen hi.

 

Vote khiat hun ah polling booth 3,417 zat in om a, huai lak a poll­ing station 47-te numei sepaih pawlte’n enkai uhi. Huai ban ah polling booth munte enkai ding in para-military 50,000 bang sawllut in om a, he­licopter zang in air team lam leng koih a om ahih­dan taklat in om hi.

 

Tripura state sung ah vote khe thei ding mi 2,536589 om ua, amaute’n vote a khiatte uh March ni 3 zinglam dak 8:00 in Nagaland leh Meghalaya a vote kikhete toh simkhawm hiding hi. Mehalaya leh Nagaland-te’n ahihleh February ni 27 chiang in polling nei ding uhi.

 

Election hun a ding in BJP in candidate 51 nei ua, huai lak a Left Front partner Communist Party of India Forward Bloc leh Revolution­ary Socialist Party-te a ding in khat chiat koih uhi. Congress in ahihleh candidate 59 nei uhi. CPM in candidate 57 nei ua, Indigenous Peoples Front of Tripura (IPFT)- te a ding in seat kua pia uhi.Trinamool Congress (AITC)-te’n candidate 24 nei ding uhi.

 

Tripura election ahi­hleh kum masa lam 2013 election hun lai in vote khia 93.6% tungzou hi’n thusuak in taklang hi.

 

 

Tata Sumo in mi 5 phuliam

LAMKA, Feb 18: Tuni, February 18 sunma dak 10:40 vel in K. Salemphai ah Tata Sumo MN03P/2151 in Robert Gangte’ inn kong verandah bohkha in varan­dah a om carrom kimawlte phukha in huai ah numei naupang kum 2 tel in mi 5 liam uhi. Liamna tuakte kintak a Lamka Damdawi Inn puaktung hi ua, himahleh amaute lak ah Baby Geby Hatnun­thieng (2) d/o Seiminlal Haokip of K. Salemphai, a li­amna a serious ziak in doctor-te’n Imphal ah refer uhi.

 

Liamna tuak midangte ahihleh Robert Gangte (48) h/o Lhingkhohoi of K. Salemphai leh a zi Lhing­khohoi (38), Thongkholal Haokip (50) h/o Boinu @ Deikho of K. Salemphai leh Paokholet Haokip (64) h/o Nemjalhai of Mongkot hi uhi.

 

Thutut kingah dan in, Tata Sumo ahihleh tuni sunma a K. Salemphai khosung ah tailai hiai bang a omkha ahi.  

 

 

SSPP-JHQ Imphal in Class X & XII exam dingte thumsakna hun zang

LAMKA, Feb 18: Siamsinpawlpi Joint Headquarters, Imphal in tuni, February 18 sun­nung dak 1:30 in Lamphel YPA Hall ah SSSP Imphal Block nuai a tu kum a Class X leh XII exam ding student-te hasotna leh thumsakna hun zang uhi. Hiai hun zatna T. Chinlal, Joint Secy., Edu. Deptt. leh Mercy Muani, Joint Secy. Games and Sports Deptt in makaih ua, Pas­tor T. Vungkhansuan, Local Pastor, EBCC Lam­phel in thumna in hun pan hi.

 

Education Depart­ment in tu kum a Class X leh XII exam ding student-te pulak a, CBSE leh BSEM nuai a Class X exam ding student 34 om a, CBHSE leh CoHSEM nuai a Class XII exam ding 36 pha a, Class X leh XII exam ding student teng gawmkhawm in 70 pha hi.

 

Hiai hun ah M. Zamchinthang, Chair­man, Advisory Board, SSPP-JHQ, Imphal in exam ding student-te hasotna thugen a, Ste­phen Chinkhanson Guite, Consultant, SSPP JHQs, Imphal in, ‘Theihna, Tupna leh Muh Kichian’ nei a sinlai naupangte’n lai sin ding ahihdan gen hi. Huai ban ah Dr. N. Thangginmang, Mem­ber, Advisory Board; S. Thanglunmung, Consul­tant leh Zamthianniang, Consultant inleng deih­sakna toh hanthawnna thu manphatak gen uhi.

 

Tua zoh in Rev. K. Kamchinkhup, DS, EBC, Imphal in exam ding stu­dent-te thumsak a, Pastor H. Kamzachin, Local Pas­tor, EBCC Langol in thum­na in hunkhak hi. Hiai hun ah SSPP-JHQ Imphal in exam ding student-te ki­ang ah thilpiak pe chiat hi.

 

 

Education Minister in upper primary skul leh Junior High skul vehna nei

Imphal, Feb 18: Education Minister Thokchom Radheshyam in a gendan in primary school leh up­per primary school-te a biktak in singtang dawn lam a omte dinmun puahphat ahih theihna ding in infra­structure a hoih thei pen piak ding tup leh ngim a kinei ahi chi’n gen hi. Huai ban ah skul building hoihlou leh puah ngai a omte a poimoh dungzui a bawl zel ding hidan in gen hi. Hiai toh kisai in nasepna leng mun khenkhat ah pat a omte ahi chi’n gen hi.

 

Hiai toh kisai ahihleh Radheshyam in zan Kig­inni a Upper Primary School Khellakhong Khongjin, Wabagai, Uchiwa Nastad Upper Primary School leh Mayang Imphal Thana Leirensana Junior High School-te vehna a neih hun a, a gen ahi.

 

Minister in skul vehna a neih hun in Upper Pri­mary School Khellakhong Khongjin ah student ki-enrol kuamah omlou ua, hiai in lungsim suna mahmah ahi chi’n gen hi. Aman a genzelna ah sinlai naupang kua­mah a om louh ziak uh ahihleh skul infrastructure lam a hoihlou ziak ahi chi a. hiai toh kisai in a kin thei lam a skul dinmun phuahphat hiding chi’n gen behlap hi.

 

Huai ban ah hiai skul bawlna ding toh kisai in kho­sung mipite’n leng kithuahpihna pe ding uh ahihdan a gen ziak un mipite tung ah Minister in kipahthugen hi.

 

Skul vehna hun ah Education department a pan in official tamtak in Minister kithuahpihna in zui uhi.

 

 

SSC CHSL 2016 Final Result suak

LAMKA, Feb 18: Staff Selection Commission nuai a Combined Higher Secondary Level (10+2) level ex­amination, 2016 final result suak a, huai ah Lamka, Imphal leh Shillong exam centre a pan lohching sing­tangmi theihphak hiai bang ahi. Suahkimlouh a om­khak leh suahthak zel ahi ding.

 

SSC Lamka Exam Centre a pan lohchingte ahi­hleh Cathy Chingmuanniang, LDC in CGA; D. Chong­boi, LDC in CGDA; Pausuanlian Langel, LDC in CGA; Pauminlian, LDC in MHWF (CGHS); Khambiakthang Naulak, LDC in CGA; Josiah L. Ruolngul, LDC in CGDA; Tunthianlal Hauzel, PA/SA; KL Rawnngaich­ing, LDC in CGDA; Rorellien Hmar, LDC in MES (Army HQ); Samuel P Khammuonlien, PA/SA; Thang Gou Lien Simte, LDC in MES (Army HQ) ahi. Imphal Centre a pan lohchingte Nemneithem Lhou­vum, LDC in MES (Army HQ); Pau Sawm Mang Vai­phei, LDC in MHFW (CGHS); Kaikhongam Haokip, LDC in MES (Army HQ); T Mangtinlen Haokip, PA/ SA; Songthu Singboi Aimol, PA/SA; Thangminlen Tu­boi, PA/SA; Jangkholal Touthang, PA/SA; Chinkhan­jang Zou, LDC in CSD; Thangchon Haokip, PA/SA; Paoginsei Simte, LDC in CGDA; Paominchon Singson, PA/SA; Kaipu Sitlhou, LDC in Ministry of Defence; Lamsat Singsit, LDC in CGDA ahi.

 

Shillong Centre a pan lohchingte ahihleh Hatk­holam Haokip, PA/SA; Gracy Hatneu Vaiphei, DEO in CAG leh Mawi Hatlang Paite, LDC in Telecommunica­tion hi uhi.

 

 

KZP-GHQ in Class X & XII exam dingte thumsak

LAMKA, Feb 18: Khangthah Zuun Pawl (KZP) General Head­quarters saina in tuni, February 18, 2018 sunnung dak 1:30 in Simte Inn, Simveng ah Khangthah Class X leh XII exam dingte hasotna leh thumsakna om hi.

 

Hiai hun zatna HG Simte in makaih a, Pastor Frank H. Joute in thum­na a pan in P. Thonglian­mang, President, KZP-GHQ in vaidawnna thugen hi. T. Thangli­ansiam, MSS, Under Secretary (Works), Govt of Manipur; Ginlianlal Buhril, Senior Professor, Director Corporate Gov­ernance, Universal Busi­ness School, Raigad, Ma­harastra; L. Kamchinhau, Asst Professor (Econom­ics); Dr. Esther Lalrem­kim, Asst Professor (An­thropology) leh S. Thongchinthang Ngaihte, Junior First Officer, Indigo Airline in student-te hasotna thugen uhi.

 

Hiai hun ah Evan. Lunminthang Simte in exam dingte hasotna thugen in, amaute’ a di’n thumsak a, Joseph Thangsing, Speaker, KZP-GHQ in hun tawp a kipahthu gen in Pastor Mang Johnson in thumna in hunkhak hi.

 

Hun zatsung in Fiona Nemmuanching, Esther Thangsing, Sonkim leh lasiam tuamtuam in lasa ua, hiai hun Th. Jamchinthang, MDC Thanlon leh Simte nam sung a mi poimoh tuamtuam ban ah exam ding Khangthah leh a nu-le-pate uh tamtak in uap uhi.

 

 

EOC (ECCI) in Annual Council 2017-2018 zousiang

LAMKA, Feb 18: Evangelical Organization Church (EOC), ECCI in EOC Liangsiphai biakinn a, a 66veina Annual Council 2017-2018 a neih uh tuni, February 18, 2018 in zousiang uhi.

 

Tuni zingkal dak 6:30 in Pastor Lelkap in devo­tion makaih a, sunma biakna kikhopna hun ah ordina­tion leh Thangsuahte thilpiak piakna nei ua, Rev. Lam­khogin Khaute, Moderator in Pathian thutak gen hi.

 

Hiai hun zatna Pastor Kamthiangin in makaih a, Upa Luttinthang in thumna a pan in Rev. Lamkhogin Khaute, Moderator in ordination hun makaih a, Rev. Harry Muanlal, Executive Director in Thangsuah mi khat kiang ah thilpiak pia in, Memorial Gift tuamtuam pete ki­ang ah kipahpihna thilpiak pia uhi.

 

Ordination hun a Saptuam Upa dia ordained a omte ahihleh Pauzagen of Suangpha, Paokholun of Suangpha leh Pauthianlal of K. Tonglon hi uhi. Saptuam Upa. Pathian’ nasepna a etton thamching Upa Luttinthang of Peng­jang leh a zi kiang ah Rev. Harry Muan­lal, Executive Director in puansilhsak in kipahpihna thilpiak pia a, Rev. Lam­khogin Khaute, Moderator in amaute a ding in thumsak hi.

 

Sunnung in Rev. Dr. S. Lalpi Vaiphei makaih in EOC in Kumpuan a neih sepsuahna dia panlak ding dan genkhawmna om a, nitak biakna kik­hop hun Pastor Lamneihpau in makaih in Rev. Dr. Kh. Khaizakham in Path­ian’ thutak gen hi. Rev. Harry Muanlal, Executive Director in kipahthu gen in, Rev. Lamkhogin Khaute, Moderator in khawmpi khak hi.

 

Khawmpi ahihleh February 16, 2018 nitak in Rev. Dr. S. Lalpi Vaiphei, Executive Chairman in hongkhia a, khawmpi hunsung in Council Member-te’n vaihawmna nei in thupukna tua­mtuam namdet uhi.

 

EOC, ECCI ahihleh Pastor Bial 5 in kikhen a, K. Tonglon Pastor Bial, Imphal Pastor Bial, Lamka Nuai Pas­tor Bial, Lamka Chung Pastor Bial leh Jiribam Pastor Bial a kikhen in, sap­tuam milip panlakna ziak a Saptuam kitoudelh zou zel hi’n thutut kingah hi.

 

 

Organising Committee in meeting nei

Lamka Public Ground ah Zomi Nam Ni 70 veina zat hiding

LAMKA, Feb 18:“Convergence” chih thu­pi zang in February 20, 2018 chiang in Lamka Public Ground, Hiang­tam Lamka ah a 70veina Zomi Nam Ni 2018 zatna om ding hi.

 

Hiai ding toh kisai in Zomi Nam Ni Organiz­ing Committee makaih in tuni, February 18, 2018 sunnung dak 2 in PTC-GHQ Conference Hall, Hiangtam Lamka ah meeting om hi. Hiai hun Khatkhotong Baite, Chairman, Organizing Committee in makaih a, Organizing Committee in Sub-Committee tuamtu­am a guante ban ah Zomi Council nuai a kikhai­khawm tribe tuamtuam a pan President leh Secre­tary chihte leng tel uhi.

 

Zomi Nam Ni lo­hchingtak a zat ahi­htheihna ding toh kisai a genkhawmnung un Zomi Council Chairman, Vice Chairman leh Zomi Nam Ni Organizing Committee Chairman in thuthaksaite kiang ah meeting toh ki­sai pulak uhi.

 

B Dongzalian Simte, Chairman, Zomi Council in a genna ah, Organizing Committee a Chairman dia Khatkho­tong Baite seh ahih dung­zui a aman a sepkhawm­pih ding bawl a panla in, Zomi Nam Ni Football Tournament tanpha Sub-Committee a bawlte tungtawn a lohchingtak a zoh ahihtakna tung ah kipahthu gen a, hiai tourna­ment lohchinna dia uaptu mipite tung ah leng kipahthu gen in, maban a Zomi Nam Ni zatna leng uapkhawmtou ding in ngetna bawl hi.

 

Khatkhotong Baite, Chairman, Organizing Committee in Zomi Nam Ni zatna Pathian’ min thupina dia ua­pchiat dia ngen kawm in fund omsa hikei mahleh mi kiphalte’n a thoh­khawm uh zang a Zomi Nam Ni zatna tribe chih a frontal organization teng in uap dia ngen in, Organizing Committee a, a sepkhawmpih leh Sub-Committee a member-te’ kipiak zohna tung ah kip­ahthu gen a, kuapeuh thanuamtak a ki­hel chiat ding in ngen hi.

 

L. Pumlianpau, President, PTC-GHQ in Organizing Committee-te kip­iakzohna tung ah kipahthu gen a, mipi kuapeuh in hiai hun poimoh zatna uap chiat ding in ngen hi.

 

S. Jamkhanpau, President, TCU-GHQ in khovel pumpi a Zomite omna teng a February 20, 2018 a Zomi Nam Ni zat hiding hi’n gen a, huai toh kiton in Lamka ah leng Organizing Commit­tee panlakna a Lamka Public Ground a zat hiding ahihman in lohching tak a zat ahih a, minam tawisangna dia mi a tam theipen kihel ding in chial hi.

 

T. Thuama, President, ZAA in a 70veina Zomi Nam Ni zatna dia Orga­nizing Committee in ZAA khut a la lam toh kisai a mohpuahna a piak dungzui ua, Joint Artist Association (JAA) kichi dinkhiak a omsa tungtawn a panlak a om hi’n gen a, JAA in kipumkhatna mah paipih a, pau-le-ham, beh-le-phung kuamah kideidan omlou a, Main Event hun a Unau khat i hihna, late sa dia Art­ist-te kimansa a omta uh ahihdan gen in, sound system leng a hoih theipen zat dia mansa a omta hi’n gen hi.

 

A 70-veina Zomi Nam Ni, Lamka a kizatna ding ah “Convergence” chih thupi zat hiding a, kisakkholhna leng 95% mansiangta hi’n Organizing Com­mittee makaite’n gen uhi.

 

Lamka Public Ground a Zomi Nam Ni zatna ahihleh sunma dak 10 in kipan ding a, huai hun K William Carey leh Chinglalnem Tombing in makaih ding ua, hunpi zatna kipatma in, Joint Artistes for the 70th Zomi Nam Ni 2018 makaih in musical convergence hun masa zatna om ding hi.

 

Sunma dak 11 in Zomi Nam Ni hunpi zatna kipan ding a, Rev Dr Sut Khan Thang, Exe. Secy., CBA in thumna in hun pan ding a, Thanglianpau, Presi­dent, ZRO in Zomi Puanlap khaikang in, H Pauzalal, Secretary, ZNNOC in “Convergence” balloon khahkhe ding hi.

 

Hiai hun ah Thanglianpau, Presi­dent, ZRO in Zomi Nam Ni message gen ding a, Khatkhotong Baite, Chairman ZNNOC a pan thugenna om in, Hmar, Kom, Tedim Chin, Simte leh Thangkhal tribe a pan namlaam lahna om ding hi.

 

ZHRF Headquarters makaih in “The indigenous Zomi, Truth and Free­dom” kichi laibu honkhiakna om ding a, Mizo, Vaiphei, Paite, Mate, Zou leh Gangte tribe a pan namlaam lahna om ding hi.

 

V Hangkhanlian, Minister (Agri. Vety & AH); Thangso Baite, MP; Vung­zagin Valte, MLA & Chairman, MTDC; Ginsuanhau Zou, MLA & Chairman, MANIREDA leh Dr Chaltonlen Amo, MLA a pan thugenna om ding hi.

 

Rev Dr Kh Khaizakham in Zomi Nampi a di’n thumna nei ding a, EBC Chentral Choir a pan ‘Halleluiah Chorus’ sakna om in, huntawp ah B Dongzalian Simte, Chairman, Zomi Council in kip­ahthu gen in, Rev Stephen Chinzathang, Senior Executive member, ZPCS in thumna in hunkhak ding hi.

 

Zomi Nam Ni hunpi zatna ah Hmar Inpui, Mizo Peoples Convention, Kuki Inpi Ccpur, Thadou Inpi, Young Mizo Assn. Manipur, Kuki Khanglai Lompi, Hmar Youth Assn., Mizo Zirlai Pawl, Kuki Students Organization leh Hmar Students Assn in special invitee hihna toh uap ding ua, Zomi Nam Ni hunpi zatzoh chiang in Joint Artistes for the 70th Zomi Nam Ni 2018 makaih in musical convergence zatna om ding hi.

 

 

Police in khamtheih zuak 1 leh a panpihtu mi 3 mankhia

LAMKA, Feb 18: Dis­trict Police nuai a Night Duty Officer (NDO) nih leh a team-te’n thuguk muan­huaitak a ngah dungzui un zan nitak in Zou Veng ah khamtheih zuak a kipei khat leh a panpihtu mi 3 mankhia uhi. NDO team-te ahihleh SI T. Seikholal leh SI Hauginlian Tons­ing in makaih ua, thuguk a ngah dungzui un Zou Veng a inn khat a pan Thanglenmang (24) s/o Kampu of Hmar Veng leh a kithuahpih mi 3 mankhia in, amau a pan khamtheih Spasmo Prox­ivon (SP) tang 81 leh The World is Yours (WY), Sa­kol Damdawi kichi tang 249 mankhia uhi.

 

Police Team-te’n khamtheih zuaktu Than­glenmang leh a kithuah­pih, WY hih zongsang mi 3 leh khamtheih a mat teng uh Police Station ah kemlel uhi.

 

 

SSPP Lamphel Branch makai dingte’n kichiamna nei

LAMKA, Feb 18: Siamsinpawlpi Lamphel Branch 2018-2020 makai dia telching a omte’n February 16, 2018 nitak dak 6:30 in SSPP JHQ Imphal makaih in kichiamna nei uhi.

 

SSPP Lamphel Branch makai dia telching a omte ahihleh President : G. Paulalmuan s/o (L) G. Tuankholian; Secy: Henlalson c/o Khamthianlal; Fin. Secy: Chingthiankim d/o N. Vanlalsiam leh Treasurer: Vungpallun d/o T. Khamzagou hi uhi.

 

Makai thakte N. Khamsuanthang, Secretary, Advisory Board SSPP JHQ, Imphal in kichiamsak in thumsak hi.

 

 

Bangalore ah Zomi Nam Ni zang ding

LAMKA, Feb 18: February 20, 2018 chiang in Compus Crusade, Ben­galuru ah “Convergence” chih thupi zang in Zomi Nam Ni zatna om ding hi. Hiai hun zatna ahi­hleh Ginsuanhau, MLA Singngat AC & Chair­man, MANIREDA in chief guest hihna toh uap ding a, huai ban ah T.S. Haokip, Social Worker inleng uap ding hi.

 

Hiai hun zatna ahi­hleh sunma dak 11 in ki­pan ding a, Pauthiansiam leh Elizabeth Samte in hun zatna makaih ding uhi. Pastor Chinmuan­lal, Local Pastor, NTBC Bengaluru in thumna in hun pan ding a, G Liana Vaiphei, President, ZYA Bengaluru in vaidawn thugen in mellahna nei ding hi.

 

Rev. Dr. Pumzathang Tombing makaih in Salphate sun­na leh gam leh nam a dia thumna om ding a, tua zoh in Alex Mawi Ngaihte, Sport Secy., ZYA Benga­luru makaih in Zomi Nam Ni tournament a kipah­mante hawmna om ding a, Pastor Dr.Thangminlun Mangte, Local Pastor, EBCC Bengaluru in thum­na in hunkhak ding hi

 

Hiai hun ah Paite cultural troupe, Tedim Chin cultural troupe, Zou cultural troupe leh Kom cultural troupe a pan nam laam lahna om ding a, lasiam tuamtuam Vungneithem, Lamching, Alex Haupu leh Nini in lasa ding uhi.

 

 

Songtal ah Zomi Nam Ni zang ding

LAMKA, Feb 18: Hongtung ding February 20, 2018 chiang in Guite Kual a om Songtal khua ah Zomi Nam Ni zatna om ding hi. Huai hun ah chief guest, functional president, guest of honour leh chief host in Lalhrillien, Ex-EM/ADCC; G.Suanchinpau MDC; T. Khaikhomang, MDC leh Th. Jamchinthang, MDC pang ding uhi.

 

Hiai hun ah Commanding Officer, Mt. Sinai makaih in phamsa salphate sunna om ding a, mi tua­mtuam a pan thugenna om leh lasiam tuamtuam a pan lasakna leng om ding hi.

 

 

Raising Day ding toh kisai in YPA New Lamka block in meeting nei

LAMKA, Feb 18: Young Paite Assn (YPA) General Headquarters phuhkhiaknung kum 65 chinna (Raising Day) zat­na hongtung ding March 3, 2018 sunma dak 10:30 a pan in YPA-GHQ Hall, Hiangtam Lamak ah om ding hi. Huai hun ah YPA puanlap kaihpal­hna, sunna hun, hasotna leh thumsakna, Honor­ary Patron member-te certificate piakna ban ah unit leh block tuamtuam a pan special number om ding hi.

 

YPA-GHQ kum 65 chinna Raising Day zatna ding toh kisai a kisakkholhna pailel toh kisai in tuni, February 18 sunnung dak 1 in YPA Hall, Hebron Veng, New Lamka ah YPA New Lam­ka block makaih in block sung a YPA unit execu­tive member teng in joint meeting nei ua, hiai hun a YPA-GHQ a pan makai bangzahhiam leng tel uhi.

 

Huai ban ah YPA block tuamtuam inleng unit tuamtuamte toh joint meeting nei in panla lel uhi.

 

 

A/R-te saina in Volley ball friendly match om

Imphal Feb 18: IGAR (South) nuai a om 6 Assam Rifles of 9 Sector Assam Rifles-te’n Andro khomite leh Laupauchum khomite toh kinaih zawk semna ding ban ah Mani­pur state sung a sport lam toh kisai tawisangna ding tupna in tuni’n volley ball friendly match nei uhi.

 

Hiai hun ah An­dro Club, Laupauchum Club leh Andro Company Operating Base team-te’n kimawlna nei uhi. Kimawlna neih hun a khosung mipi tamtak in­leng uap uh ahihdan tak­lat in om hi. Volley bawl match hun a Andro Club-te’n vualzohna ngah uhi.

 

 

PCI (Miz Synod) KKP General Conference om ding

LAMKA, Feb 18: Presbyterian Church of India, Mizoram Synod: Manipur Area nuai a Khristian Khanglai Pawl in kha nawn, March 9-11, 2018 sung Kangvai biakinn ah “Khawitak ah um la hem?” [Thilsiam Thu 3:9] chih thupi zang in General Conference 10veina nei ding uhi.

 

Khawmpi sung in “Khawitak ah um la hem” chih thupi pansan in Rev. C. Zorammawia, Rev. R. Lalawmpuia, Rev. Kam­khotinthang Neihsial leh Rev. Jerry Zoliansanga in thugen ding uhi.

 

Huai ban ah Chin­lianhat in, “Tulai Thi­amzilna leh KKP” chih leh Dr. Asem in, “Damthei­hna – Nek-le-tak leh First Aids” chih thupi zang in seminar makaih ding uhi. Huai ban ah Upa Liank­hothang in, “Kouchuam paukam zatdan’ chih leh Rev. Malakia Lalnunfela in, “Siangthouna - Youth, Sex & Marriage’ chih ban ah Rev. Khupneithang in, “Masawnna” chih leh Rev. Khaisonthang in, “Pathian bel hinkhua poimohna” chih thupi zang in seminar makaih ding uhi.

 

 

ZSF Pune Cell saina in 70th Zomi Nam Ni lawm

Lamka, Feb 18: Zomi Students’ Federa­tion (ZSF) Pune Cell-te saina toh zan Kiginni sun dak 12 in UBS, Bivewadi, Pune ah a 70 veina Zomi Nam Ni lawm uhi.

 

Progam zatna ahihleh Mrs Nem Hat­langh leh Mr Lunthang Samte-te’n makaih uhi. Pa James Tuang in hun honna thumna a neih zoh in lasakkhawmna nei uhi. Hiai zoh in Mr Sianpiah Mantuang, President ZSF Pune, Pastor Siam Sing­son Chaplain ZCF Pune leh Pa Song Hauzel-te’n thugenna nei uhi. Pro­gram zatna hun ah la siam hunkhop in zaila awi ua, kisuklimna leh Ann nekkhawmna nei program zousiang uhi. Pune a om Zomi te’n amau a dia hun lemtang ding gelna in, February 17 in 70 veina Zomi Nam Ni ana lawm uhi.

 

 

ZPM tuailai pawl te’n ILP check post enkai ding in ngen

Aizawl Feb 18: ZMP Chairman Lalmuanpuia Punte in hun bang tan hiam a pan state sorkal ki­ang a Bairabi rel station a ILP toh kisai check ding in ngetna ana bawlta mahleh tuni tan bangmah kikhek lamdang om nailou ahihdan gen hi.

 

Hiai toh kisai ahihleh zan Kiginni a Aizawl Press Club mun a ZMP chairman Lalmuanpuia in media-te mai a, a gen ahi hi.

 

Kum 2016 in ZNP leh MPC-te’n Bairabi rel station mun a va phak hun un Mizoram solkar kiang ah ILP check bawl khiat ding a poimoh ahihdan gen ua, hiai tungtawn in Kolasib DC in rel station ah ILP chek-na mun ding coun­ter hongkhe mahleh tunai zek a counter mun et chetna a va neih nung un coun­ter a zangtu kuamah omlou hidan in va muhsuah uh ahihdan taklat in om hi.

 

ILP counter mun zat ahih louh ziak in niteng in Mizoram state sung ah gam­dang mi 100 val honglut gige uh hidan in ZMP thusuak in taklang hi. Mizoram state solkar in gam leh nam it a chih ngal ua leh bang ziak a hiai bang gamdang mite hon­glutna munte ah check bawllou uh hiam chi’n dotna bawl ua, Mizoram state solkar tung ah leng thangpaih mahmah uh ahih­dan taklang ngal uhi.

 

Huai ban ah gamdang a pan haichi tuamtuam laklut a omte leng mihingte hinna a ding a damtheih huai lou leh a chingtute a ding tan pha a leng lauhhuai ahi chi’n ZMP tuailai pawlte’n gen uhi. Hi chibang hai chi puaklut a om zelte a damtheih huai hia? Ahihkeileh mihingte nek ding a lauhhuai hia? Chih toh kisai a, a enkaitu ding state government in kua­mah moh puakna a piaklouh ban uah pan a lak louh ziak un vangsiat huai mahmah ahi chi’n Lalmuanpuia in gen hi.

 

 

NHRC-te’n Mizoram CM vengtu police-te tungtang ngaihtuah ding

Aizawl Feb 18: Chief Minister Lalthanhawla veng­tu police-te’n Lalbiakzuala a soisakna tungtang ah National Human Rights Commission (NHRC)-te ki­ang a PRISM-te’n complaint a thehlutna uh toh kisai in NHRC-te’n pomsak in a bohzuina dan in laigelhlut uh hi’n thusuak in taklang hi.

 

PRISM thusuak in a taklatdan in, Lalbiakzuala soisakna tungtang ah Chief Minister in bangmah a gen lou ahi chi’n taklang uhi. Hiai toh kisai in Home Min­ister in thudik mah ahi chi’n gen hi.Huai ban ah Police department lam a pan inleng thudik mah hidan a, a tak­lat kawmkawm un PRISIM-te’n hiai bang a gamtangte a kituahpih bang uh gawtna piak ahihkeileh hichi bang thil hong tung theizel ding ahi chi’n taklang uhi.

 

 

Lilong ah mass anti-drug rally nei

IMPHAL, Feb 18: IGAR9South) nuai om 5 JAK RIF of 9 Sector As­sam Rifles-te makaihna nuai ah tuni’n Lilong kho­sung a om organistion tuamtuamte toh kithuah in anti-drug rally neih in om hi.

 

Rally hun a kihel anti-drug organization-te ahihleh ALADA (All Lilong Anti Drug As­sociation), Anjuman, ASPO(Anti Social Pre­ventive Organization) leh ICRO (Islamic Cultural Research Organization)- te hi ua, ‘UNITED WE STAND TO FIGHT AGAINST DRUGS FOR A DRUG FREE MANI­PUR’, chih thupi pansan a rally nei uh hi’n IGAR thusuak in taklang hi.

 

Rally ahihleh ki­lometer 7 a sau ding vel pai ua, student tamtak leng a kihel ban ua rally hun a mipi pai tengteng a vek ua gawmkhawm in mi 600 ALADA Office mun a pan in zinglam dak 11:00 in rally neite kipan ua, sunnung dak 12:15 in Lilong Mayai Lekai Idgah ground ah zou uhi.

 

Programme hun ah 9 Sector Commander Brig Amit Kabhtiyal, Com­mandingly Officer 5 JAK RIF Col Amit Bedi, SP Thoubal Gautam Singh, SP NAB Watham Basu, Superintendent NCB Vikas Kumar, Nominee Zila Parishad’s Faizal, Chairperson of ALADA, Mr Qatei Quayamuddin, Anjuman, Mr Habibulla, ICRO, Moulana Saifud­din leh ASPO, Mrs. Aha­mdi-te kihel uh hi’n thu­suak in taklang hi.

 

 

 

February 20, 2018 Sepnawnni chiang a Zomi Nam Ni zat ding toh kisai in ZAA makaih in JAA in YPA/GHQ hall, Hiangtam Lamka ah lazirna nei ua, hiai hun ah CCpur District sung a lasiam teng telkim phial uhi.

 

 

 

 

 

…for more detail : here

 

 

 

 

 

RELATED

The Lamka Post | February 18, 2018