You are here: HomeRSS FeedsThe Lamka Post

The Lamka Post | April 01, 2018

Sunday, 01 April 2018 16:48

Manipur CM in 1st Alternative Disputes Resolution (ADR) Centre hongkhia

IMPHAL Mar 31: Chief Minister N. Biren Singh in tuni Judge of Supreme Court of India Justice Ranjan Gogoi theihpihna toh Lam­phelpat, Imphal West ah 1st Alternative Disputes Resolution (ADR) Centre of the State hongkhia hi’n thusuak in taklang hi.

 

Programme honkh­iak hun a Chief Guest hi­hna toh uap Chief Minister N.Biren Singh in a gendan in ‘Alternative Disputes Resolution’ (ADR) Centre tungtawn in civil mite lak a pan thubuai omte ngai­hkhiak ahih theihna ding mun a zat hiding chi hi. Huai ban ah buaina tua­mtuam omte ngaihthuah­khawm leh mipi van tang in thubuai a neihte uh a tun theihna ding uh ban ah hamphatna tuamtuam om theite kikhawp thei­hna mun ding a zat hiding chi’n gen hi.

 

Hiai ADR centre a hoihna a gendan in direct a court kitut ahih ma a ki­houlemna masa ding a zat theih, thubuai la buai omte a sousang ma a suk venthei leh state government tung a lungkimlouhna thutut neih ma a kihoulimna leh ngaihthuahkhawmna mun ding a zat theih ding ahi chi’n gen hi.

 

ADR centre ahihleh state government in Rs 5.50 crore vel ding bei a bawl ahi a chih kawm in mipite a ding khualna mah in state government in pan nasatak a la ahih­dan gen hi.

 

Aman a genzelna ah thu buai leh la buai a biktak in numei pawngsualna toh kisai a zat ding in April 2, 2018 chiang in Fast Track Special Court (ND&PS) honkhiak hiding chi hi.

 

Judge of Supreme Court, Justice Ranjan Gogoi in thugenna a neih hun in Manipur state in hichi a thukhenna toh kisai a panlakna neih a, a om kipak mahmah ahi­hdan gen hi. ADR centre dinsuah ahih toh kiton in judicial system lam toh kisai hatsak mahmah ding ahi chi a, court-te leng panpih mahmah ding ahi chi hi.

 

Huai ban ah Mani­pur state in hichi bang a thukhenna toh kisai a cen­tre hoih taktak a dinsuahte hoihtak leh diktattak in zat in om leh National level tanpha a vaihawmna lam toh kisai a minthang pha ban ding ahi chi’n a lam-et thugen hi.

 

Programme zat hun sung in Minister for Law and Legislative Affairs L. Jayantakumar Singh, Acting Chief Justice, High Court of Manipur N. Kotiswar Singh, Judge, High Court of Manipur Kh. Nobin Singh, Chief Secretary R.R Rashmi, Advocate General N. Ku­marjit leh mi poimoh tamtak kihel uh hi’n thu­suak in taklang hi.

 

 

Govt. in NIA kiang ah galvan mangte suizui di’n ngen

IMPHAL Mar 31: Chief Minister N. Biren Singh in tuni a, a gendan in State Government in National In­vestigation Agency (NIA)-te kiang ah Arms Kote (PHQ Pool) of 2nd Battalion Manipur Rifles –te auto 56, 9 mm 1A pistols ban ah magazines 58 guk mang a, a omna toh kisai suizui ding a ngetna bawl uh hidan in gen hi.

 

Hiai toh kisai ahihleh tu ni a CM Secretariat a press conference neih ahih hun a N.Biren in a gen ahi hi.

 

Chief Minister in a gendan in etchetna nei ahih dungzui in September 11, 2014 a PHQ a pan auto 570, 9 mm 1A pistol muh a omte lak a galvan 56 ban ah magazine 58 vel guk mang a om ahi chi’n gen hi.

 

Press Conference neih hun a kihel Deputy Chief Minister Y. Joykumar in a gendan in galvan guk mang a omte toh kisai genkhawmna neih ahih nung in NIA-te khut a piakkhiak ding a lemsakna kibawl ahi chi’n gen hi.

 

Aman a genzelna ah NIA in thubuai toh kisai hon su veng pah ding uh ahi chi’n a lam-et thugen hi.

 

Imphal West SP Themthing Ngashangva in a gendan in galvang mang toh kisai suizuina neih ahih hun in muanmoh a om mi nih mat a om uh ahi chi a, amaute ahihleh 2nd MR a pan Damodaran NP (Hav. No. 60985) leh Narayan Chetry (Rfn. No. 0296004)- te ahi uh chi hi. SP in a genzelna ah kum paisa November 4, 2016 inleng 9 mm pistol khat leh magazine 3 ban ah 3 round guk mang in ana om kha ngeita chi hi. Hiai toh kisai in mi 4 mat in ana om ua, amaute ahihleh Paonam Shanti Kumar (48) s/o (L) P. Shamu of Kwakeithel Mayai Koibi Ningthou­jam Leikai, Lourembam Johnson Singh alias John (31) s/o L. Basanta of Kwakeithel Mayai Koibi, M. Hiranjoy Sharma alias Ngoubi (32) s/o M. Ha­ridas of Tera Sapam Lei­rak leh Rfn. No. 6070197 Laishram Anilkumar Singh (33) s/o L. Ibom­cha of Sangaiprou Ma­mang Leikai-te hi uhi.

 

Hiai toh kisai mah in suizuina neih a om touzel ah kum 2018 March 31 tuni inleng Hi­ranjoy leh Shanti Kumar-te leng kigolhkha hidan a genkhak a om ziak un mat in om uhi.

 

Press conference neih hun in Minister-te, MLA-te, DGP leh Ad­ditional Chief Secretary (Home) tamtak kihel uh hi’n thusuak in taklang hi.

 

 

News Suty Ding

LAMKA, Mar 31: MHJU-Ccpur Branch in March 30, 2018 a meeting a neih hun a thupukna dungzui in, zingchiang, April 1, 2018 “Easter Sunday” ziak in Lamka pansan media house-te (printed leh electronic media) suty ding hi. Huaiziak in Lamka Post office leng kikhak ding a, April 2 a kihong nawn ding ahihman in issue masa April 3 in hong suaknawn ding hi.

 

 

Zillai-GHQ in mi 2 pimang a omte khakhe dia ngetna in Total Shutdown bawl

LAMKA, Mar 31: Zillai (Vaiphei Students Assn) GHQ makaihna in district sung a sum dei­htakna ziak a kipimang­na, thagum a sum kinget chihte deihlouhna leh March 25 a pimang a om mi nihte damtak a khah­khiak ding ban ah hiai toh kisai a government in panla ding a phutna in tuni, March 31 zankim a pan dakkal 18 sung Cc­pur district sung ah ‘Total Shutdown’ bawl in om hi.

 

March 25, 2018 a Ccpur district sung Hen­glep Sub-Division a Nabil Khuman gam a Special Contractor M. Dama Vaiphei of Lingsiphai nasemtu, JCB Driver 2 - Nausawmlian (17) s/o Tinzagin of Lingsiphai leh Khuplal (20) s/o Pauneilal of Tuilileibul, galvantawite’n pimang in a tatkhiakna ding in Rs 20 lakh ngen uhi. Hiai toh kisai in Zillai in Zillai (Vaiphei Students Assn) in pimang a omte ni 5 sung a khahkhe ding in ngen ua, himaleh hun piaksung a khah­khiak ahihlouh ziak un March 31 zankim a pan dakkal 18 sung Ccpur district pumpi total shut­down bawl uhi.

 

Zillai-GHQ in tuni a Total Shutdown a bawl ahileh Young Paite Assn., GHQ; Sia­msinpawlpi GHQ; Khangtah Zuun Pawl, GHQ; Zou Sangnau­pang Pawlpi, GHQ; Mate Student Organisation, GHQ; Thangkhal Sin­lai Pawlpi, GHQ; Zomi Students’ Federation, GHQ; Thangting Area Chief Association Part- I; Joint Phillanthrophic Organisation; Hmar Stu­dents’ Assn., GHQ; Kuki Students’ Organisation, Ccpur leh Thadou Kuki StudentUnion, GHQ in mohpaih thu puang in pimang a omte damtak a khakhe ding in ngetna ana bawlta uhi.

 

Zillai-GHQ in tuni a Total Shutdown a bawl toh kisai in tuni sunma dak 10:20 in Zillai-GHQ office, Bethel Veng, New Lamka ah Ccpur Dis­trict Incharge Minister V Hangkhanlian makaih in Rakesh Balwal, IPS, SP/ Ccpur leh Lalramsang, MCS, Addl. DC/Ccpur in Zillai-GHQ makaite kimuhpih uhi.

 

Hiai hun ah Dis­trict Incharge Minister in poikhoihlou mi 2 pimang a om poisak thugen in, government in pimang a omte khahkhiak ahi­hna dia theihtawp suah a panla ding ahihdan gen in mipite khualna a bandh lakhe ding in ngen hi.

 

Huai dungzui in, Zillai-GHQ in tuni sun­nung dak 1:30 in a office uah thuthaksaite kimuh­pih ua, hiai hun ah Dis­trict Incharge Minister in ngetna a bawl dungzui a government in a thuchi­am subuching dia Zillai- GHQ in muangngam ahihdan gen ua, huai toh kiton in tuni sunnung dak 1 a pan ‘Total Shut­down’ lakhia uh hi’n gen uhi. Tuni a Total Shut­down kithuahpih pawlpi tuamtuam leh mipite tung ah Zillai-GHQ min in kipahthu gen uhi.

 

Total Shutdown sung in dawr leh bazar teng kikhakvek a, pass neilou kuamah gari a tai muh ding omlou hi. Bandh volunteer-te’n khopi sung mun tua­mtuam ah gari tyre hal ua, tuni sun dak 12 vel in Kholmun a pan Don Bosco hr Sec School a exam ding student 3 uni­form silh in Diesel Auto MNO2A/3582 in hong pai ua, amaute Lamka Lamka Community Hall khang Tipaimukh Road bul ah bandh volunteer-te’n khamkhawl in Auto mai khensia ua, Driver leng khoihkha zek uhi. Huai mun mah ah Activa MNO1A/C4860 a tai pasal khat leng kham in a hektu vuak ahih ban ah Activa mai khensia uhi. Huai nung in Police-te’n gari va la in Police Sta­tion ah kem uhi.

 

 

YPA Elim Veng Unit in khamtheih ttoh mi 3 mankhia

LAMKA, Mar 31: Young Paite Assn (YPA) Elim Veng Unit in vengsung sianthouna leh khamtheih-guihtheih douna a neih uh sunzomtou zel in, zan, Good Friday ni in leng a vengsung ua khamtheih zuaksawn leh kipe­sawn omkha hiam chih a vengsung uh mun tuamtuam a dapkualna uah, No. 4 piece 1 leh WY tang mankhia ua, huaite media-te ma ah haltum uhi.

 

YPA Elim Veng Unit President Chongliansang in a gendan in, YPA Elim Veng Unit makaite’n vengsung a khamtheih toh kisai doudalna a neih uh khauhtak in enkai ua, Good Friday zingkal in CBA Office kiang, Tedim Road ah WY tang lei leh zuaktu mi nih mankhia uh hi’n gen hi.

 

Mat a omte ahihleh Ginsonding (31) s/o Upa T Chinkhothang of Kho­minthang, New Lamka leh Kammuansang (29) s/o (L) Khamzathang of Veng­nuam, New lamka hi uhi.

 

Mat a omte a pan Pulsar (Black color) Registration No. MN 02 2661 leh WY tang 3, WY halna dia a zat uh cigaratte bawm, No. 4 kikapna ding Syringe 2 leh Rs 1,390 mankha uhi. Amaute thil omdan dot ahihlai un, No. 4 hih dia kisa, No. 4 piece 1 a khut a tawikawm a lampi a pai Lianlalmuan (32) s/o (L) Tunzachin of Thingkang­phai leng man ua, amah a pan No. 4 piece 1, syringe 1 leh WY tepna dia kizang bottle khat mankhia uhi.

 

Mat a omteng YPA Elim veng Unit in thuhilh in tu ban Elim Veng huamsung ah a paikhak hun ua leng khamtheih toh hihlou ding a theisak in, khah ua, khamtheih kipiak tuahna leh thilchi­in hoihlou himhim hihna dia a zat nawn uh leh YPA in a tung ua action a lak bangbang khase theilou ding in YPA Elim Veng Unit in kichiamsak uhi.

 

 

Sinlai naupang pua van khat suang in kideng

IMPHAL, Mar 31: Manipur Muslim Welfare Or­ganisation (MMWO)-te’n Manipur state Government kiang a demand a bawlte uh subuching ding a ngetna a bawl uh toh kisai in dakkal 42 sung March 30 nitak zankim a pan in bandh bawl uhi. Hiai toh kisai in tuni zinglam dak 6:30 lak vel in school van khat sung a sin­lai naupang bangzah hiamte tuanna bandh supporter mi 20 lak vel in Hatta Minuthong kim lak ah suang a ana deng uh hi’n thusuak in taklang hi.

 

Student-te ahihleh New Checkon a, Brighter Academy a kai hi ua, Pre-Nursery a pan Class V sinlai naupang pua hi uhi.

 

Thil tung toh kisai van driver Soubam Superman in journalist-te kiang a, a gendan in kiphinna neite’n sinlai naupangte om uh ahi chih theih mah le uh sinlai naupangte lauh theih ding dandan a om uh ahi chi hi.

 

Hiai toh kisai in All Manipur School Student’s Transporter Association general secretary Jimmy Tongbram in bandh supporter-te a mohpaih thu puang ngal hi.

 

Bandh ahihleh.Muslim-te omna lak Lilong Bazar,Thoubal Moijing Mina Bazar, Yairipok leh Ma­yang Imphal Bengoon munte a khauh diak ahihdan taklat in om a, tuni inleng police-te toh kinawktuahna piang in police-te’n tear gas leh mock bomb zang in kiphinna neite hawlkhia uhi. Thil tung toh kisai in si leh liam a om lam zak hilou hi. Bandh supporter-te ziak in Hatta Minuthong, Kshet­rigao leh Keirao Makting kimlak ah traffic subuai zou mahmah ahihdan taklat in om hi.

 

MMWO-te’n ahihleh separate directorate set up ding leh 2010 a pan 2017 sung a MOBC Department nuai a enquiry report pe ding a ngetna bawl ahi uhi. Huai ban ah NFSA nuai ah PDS vante ngah ahih theihna ding in­leng ngetna bawl uh hi’n thusuak in taklang hi.

 

 

Huihpi’n singkung mutpuk; Huihpi nunlai in meikang om

LAMKA, Mar 31: Zan, March 31 nitak a hui­hpi hattak in Lamka leh a sehvel a nawkna ah Veng­nuam South huamsung a om St. Peter School gei a singkung khat kipuk in innkhat delhkha hi.

 

Singkung ahihleh Mr Singthang’ gate bul a om hi a, singkung in Singthang’ innkong a (L) Upa G. Thi­ankhangin’ inn delhkha in, inntung mun 3 vang hi. Singkung ahihleh lian huntawk a, himahleh sing­kung dang in a dalkhak ziak in vangphat huaitak in kuamah liam omlou in inn leng kisenak lawmlawmlou hi. Sing­kung kipuk pen tuni zingkal in inn neite leh mi phatuam ngaite’n lakhia in, singkung in a delhsiat langva pek 2, Mr Singthang in leisak in kihoulem uhi.

 

Tuabangkal ah zan nitak a huihpi nun hun dak 6:30 vel in Bung­mual a Hausa Veng a bungkung geilak ah gamkang om in a kiang nai a inn omte pehthei ding dinmun a om toh kiton in huai kiim a om veng sung mipi a theikha phot in beihpi suah in huihpi hattak nuai ah tui toh pang in phelmit zou uhi. Mei­kuang ahihleh a kipatna theih chet hilou hi’n thutut kingah hi.

 

 

NFSA antang hawm ding

LAMKA, Mar 31: District Supply Officer, Ccpur in tuni’n NFSA Rationing Agent-te antang lak hun ding taklang hi. Huai dungzui in, Saikot AC sung a Ration­ing Agent-te’n April 3 in Realese Order laktheih ding a, April 4, 5 & 6 in antang lathei ding uhi. Thanlon AC sung a agent-te’n April 6 in RO laktheih ding a, April 7 in antang la ding ua, Tipaimukh leh Sangaikot AC sung a agent-te’n April 7 in RO la ding ua, April 9 in antang la ding uhi. Singngat AC sung a agent-te’n April 9 in RO la ding ua, April 10 in antang la ding uhi. Hen­glep AC sung a agent-te’n April 10 in RO la ding ua, April 11 & 12 in antang la ding uhi. Ccpur AC sung a agent-te’n April 12 in RO la ding ua, April 13 & 14 in antang la ding uhi.

 

 

Dr. J. Suresh Babu, IAS in CS charge len ding

LAMKA, Mar 31: Ph. Bhavananda Sharma, Un­der Secretary to Govt of Manipur in tuni a Governor min a order a suahna ah zingchiang 1st April 2018 apan thuthak om masaiah Dr. J. Suresh Babu, IAS (MN:1986), Addl. Chief Secretary in Chief Secre­tary, Govt of Manipur a ding in charge len ding hi.

 

 

2018-2021 sung a ZC Chairman di’n John K Ngaihte telching in om

LAMKA, Mar 31: Zomi Council Complex, ZC Veng, New Lamka ah tuni sunma dak 11 a pan in Zomi Council Gen­eral 2018 om a, hiai hun ah Zomi Council nuai a Frontal Organiza­tion tuamtuam a vote khia thei dia telkhiat a om delegate-te tel uhi.

 

Hiai hun G Chinkhan­muan, Deputy Speaker, Zomi Council in makaih a, Pastor Th Paukhochinjam, NTBC Bible Hill in thumna in hun pan a, B Dongzalian Simte, Chairman Zomi Council in Chairman ad­dress gen in, Election Commis­sion vaisaina nuai ah 2018-2021 sung a Zomi Council Chairman ding telna om hi.

 

Kitelna ahihleh Gouk­homang Simte, Chief Election Commission leh D Khuala Vai­phei, Presiding Officer leh K Vungzamawi, Polling Officer saina nuai ah nei ua, hiai hun ah Goukhomang Simte, Chief Elec­tion Commission in election pai ding dan gen in, K Vungzamawi, Polling Officer in vote khiak ding dan gen hi.

 

Tua zoh in Elder Lang­khanpau Guite in candidate John K Ngaihte leh G Vungsu­anthang a dia thumsak in elec­tion kipan hi. Zomi Council Chairman ding kitelna ahihleh siangthou mahmah in, election commission in vote khe ding del­egate-te in etchetna a neihzoh in vote khesak pan uhi.

 

Zomi Council Chairman telna a vote khe thei dia telkhiak a om delegate-te ahihleh Zomi Council Cabinet committee a pan mi 16, Zomi Court a pan member 9, ex-Chairman 4, ex- General Secretary 4, Zomi sung a elected member MP, MLA leh MDC kigawm mi 18, Frontal organization ZYA, ZSF, ZMA, ZHRF, ZEPEDA, ZOLLS, ZAA, ZFC, leh ZCA a pan President/ Chairman leh General Secretary kigawm mi 20, Zomi a kikhai­khawm tribe tuamtuam - Gang­te Tribe Council; Kom Union Manipur; Mate Tribe Council; Paite Tribe Council; Simte Tribe Council; Tedim Chin Union; Thangkhal Tribe Council; United Zou Organiza­tion leh Vaiphei People Council a pan member 45 hi a, a vek a kigawm in delegate 116 lak ah tuni a chairman telna ah del­egate 110 in vote khia in, delegate 6 omlou uhi.

 

Vote khiak zoh in Election Commission in Zomi Council a Chair­man dia candidate John K Ngaihte, G Vungsu­anthang leh candidate nungthuap G Chinkhan­muan, H Pauzalal ban ah delegate-te ma ah vote sim ua, vote simna ahihleh round thum in kikhen a, simzoh ahihtoh kiton in Goukhomang Simte, Chief Election Commission in Election Result puangkhia hi.

 

Vote simna round masa ah vote 30 sim masa ua, huai ah John K Ngaihte in vote 19 mu a, G Vungsuanthang in vote 11 mu hi. Round ni­hna ah leng vote 30 mah sim in om nawn a, huai ah John K Ngaihte in vote 19 mu in, G Vung­suanthang in vote 11 mu in round thumna ah vote 50 sim ua, huai ah John K Ngaihte in vote 29 mu in, G Vungsuanthang in vote 21 mu a, vote simna round thum teng kigawn in John K Ngaihte in vote 67 mu in, G Vung­suangthang in vote 43 mu a, John K Ngaihte in vote 24 a tamzaw a muh ziak in, 2018-2021 sung a Zomi Council chair­man ding in telching in om hi.

 

Chairman dia John K Ngaihte telching ahi­htoh kiton in KG Tung­nung, Speaker, Zomi Council in kichiamsak in, Rev Khen P Tombing, Chief Coordinator, PCI (R) in chairman dia telch­ing thak John K Ngaihte a ding in thumsak hi. Election toh kisai bang­kim zohsiang ahihtoh kiton in Chinlunthang, Vice Chairman, Organi­zation, Zomi Council in kipahthu gen in, Pastor N Vumsong, Khomin­thang EBCC in thumna in hunkhak hi.

 

 

Transfer & Posting of IAS

1. Dr. J. Suresh Babu, IAS, Additional Chief Secy (Home/Hort. & SC/TA & Hills), Ex-officio CEO MIDA, Member Secretary EBADA & BRDVB as Additional Chief Secy (Home/Hort.&SC/Forest & Env.), member Secretary & BRDVB.

2. Shri M. Lakshimikumara Singh, IAS, Commission­er (Transport/Arts & Culture) as Commissioner (Transport/Arts & Culture/Power).

3. Shri Sumant Singh, IAS, Secy. (IT/Vety & AH/ Health & FW) as Secy. (IT/Vety & AH/Health & FW/Agri)

4. Ms. Nidhi Kesarwani, IAS, Secretary (PHED/ Science & Tech) as Secretary (PHED/Science & Tech/TA & Hills)

5. Shri N. Ashok Kumar, IAS, Secretary to Chief Min­ister (Manipur) Secretary (GAD/Cabinet & Confi­dential) & Director Vigilance in addition as Secre­taray to Chief Minister (Manipur) Secretary (GAD/ Cabinet & Confidential/DP) & Director Vigilance in addition

 

 

Elim Veng VA in Agri. Minister kipahpihna hun zang

LAMKA, Mar 31: Elim Veng Village Authiri­ty in tuni sunnung dak 3 in VA office ah V Hang­khanlian, Minister (Agri. Vety & AH) vaitunna leh kipahpihna hun zang uhi.

 

Hiai hun S Chinzalam in makah a, Upa N Vialkhanthang, Local Chairman, EBCC NLBC in thumna a hun pan in N Thangzagin, Chairman, Elim Veng VA in vaidawnna thugen a, Minister a pan thugenn a zoh in Pastor G San­glian, Local Pastor, EBCC /NLBC in thumna in hunkhak hi.

 

Hiai hun Khai­pau Haokip, Chairman, ADC Ccpur leh Thangboi Gangte, SDO Ccpur in­leng uap uhi.

 

Hiai hun a Minis­ter in a genna ah, Lamka khopi sung a lamlian tua­mtuam bawlna pailel a, bangzahhiam zoh a om in tulel in College Road bawl hilel a, lampi bawl a omte fund omsa hikei mahleh veng tuamtuam kikawm­tuahna lamlian poimohte ahihman in Special Con­tractor H Thangzamuan etkaina nuai a bawl a om hi’n gen hi.

 

Huai ban ah kho­sung khantouhna ding mah in government ah ngetna bawl a om in tunitan in solar street light 100 muh in omta a, huaite veng tuamtuam ah hawm hi a, a mang thei thil ahihna ah hiai solar street light thuah a omte vengsung makaite’n en­kai ding in ngen hi.

 

New Lamka kho­sung a Village Develop­ment Committee (VDC) nuai a kivaipuak veng 5-te SDO Ccpur in Village Au­thority nuai a kivaipuak dia order suah ahihdan gen in, vengsung/kho­sung hoihna ding a pawl tuamtuamte kipumkhat a kalsuan poimoh ahihdan gen hi.

 

Minister in a gen­zelna ah, kum 15 nung a MLA telching ahih­nung in District, Sub- Division leh TD Block bangzahhiam kibehlap a, huaite a deih leh dei­hlou kal ah panlak haksa in, hong communal thei dinmun ahih ziak a mipi sou hungaih kawm a pai ngai ahihdan gen in, kithutuahna mah paipih ding in ngen hi.

 

 

Lamka Barber Assn Office Bearer ding tel

LAMKA, Mar 31: Zan, March 30 sunnung dak 2 in Lamka Barber Association in 2018-2021 sung a Office Bearer ding telna Tangnuam ah nei uhi. Huai hun ah Presi­dent ding in B. Muanpau of Bungmual; Vice Presi­dent: D. Suanhau of New Lamka; Secretary: Nang­pu Tunglut of Hiangtam Lamka; Asst. Secy: T. Sut­thang of New Lamka; Fi­nance Secy: T. Langkham of New Lamka; Treasurer: N. Minlal of New Lamka, C-in-C: N. Lalboi leh Dy C-in-C ding Sutthang Tonsing guang uhi.

 

Hiai hun ah Lamka khopi sung a sammetna nei peuhmah Association a tel ding chih gen ua, Asso­ciation a telloute’n buaina a tuah uh leh theihpih hilou ding hi’n gen uhi. Lamka Barbar Association ahihleh Co-operative Office ah Reg. No. Act no. 106, 1990 No. 8 of 2015 tungtawn a regis­tered hi a, tunitan in mem­ber 65 val omta uhi.

 

 

Manipur Ex CM si

LAMKA, Mar 31: Manipur Chief Minister lui RK Dorendro zan in JNIMS Hospital, Imphal ah damlouhna ziakin si hi. Amah sihna toh kisai in Manipur Government in tuni a kipan in ni 3 sung state of Mourning puang hi.

 

 

Salvation Army in Sunrise Service nei ding

LAMKA, Mar 31: Salvation Army in zingchiang, April 1 zingkal dak 3 a pan in Lamka khopi sung mun tuamtuam ah Jesu Khrist thohnawnna lopna in khopi sung mun tuamtuam ah Sunrise Service nei ding uhi.

 

Hiai toh kisai in in Aizawl a pan Salvation Army Chaltlang Band-te hong kuan ua, amau makaihna in Tuibong Traffic point, Nehru Marg junction, Lanva Lei, Kawnpi Auto parking, Rengkai Bazar leh Saikot Field ah hun zang ding ua, huai hun ah lunglutna nei kuapeuh teltheih ding hi’n Major Lalramliana Hnamte, Divisional Commander, Eastern Division Manipur, The Salvation Army in chialna bawl hi.

 

 

April 4 tan in entry form piaklut theih

LAMKA, Mar 31: Organizing Board, Men’s Open Volleyball Tournament, FC Zion in theihsakna a bawl­na ah, tournament a dia entry form piaklut hun ding April 4, 2018 tan a dia hihsau a om hi’n taklang hi. Huai ahih toh kiton a Managers’ Meeting leng hong­tung ding April 5, 2018 a neih hiding hi’n taklang hi.

 

 

SSPP-RS Managing Commitee in meeting nei

LAMKA, Mar 31: Siamsinpawlpi (SSPP) GHQ etkaina nuai a om SSPP Residential School, Ngahthal a School Man­aging Committee (SMC) vaipaw ding guan zoh ahi­htoh kiton in tuni zingkal dak 7:30 in SSPP Resi­dential School ah SMC Outgoing leh incoming-te’n joint meeting nei uhi. Hiai hun Thangchinkhup Guite, Vice Chairman, SMC in makaih a, N Gin­sianlal, SMC Member in thumna in hun pan a, Khamminthang, Ex-Sec­retary, SMC leh Englian, SMC member in SMC a makai thakte mellahna nei uhi.

 

Hun zatsung in Kim­biaksang, Headmistress leh Warden Suanmang in SSPP Residential School toh kisai gen ua, N Kham­suanthang, Chairman, SMC leh Thanglalmuan Hauzel, President, SSPP GHQ inleng thugen ua, huntawp ah Kungbiak­lian, Finance Secretary in thumna a hunkhak hi. Joint meeting zoh in meet­ing hun a paikhawm mem­ber-ten SSPP Residential School enkhia uhi.

 

 

YPA Pearsonmun in inn 3 bawl­sak; Anti-Plastic Campaign nei

LAMKA, Mar 31: YPA Pearsonmun Unit makaih in vengsung hah­siangna leh zan nitak a huihpi hattak in a mut­siat, Pearsonmun khua a inn 3 tuni, March 31 in YPA Pearsonmun Unit in bawlsak uhi.

 

YPA Pearsonmun Unit in ‘Anti-Plastic Campaign’ in khosung a niin omte tomkhawm in hahsiang ua, hiai hun ah inn chih a pan kuan in paikhawmte numei leh pasal group 8 tuak a kikhen in khosung a hahsiang ban uah, huihpi’n a mutsiat inn bawlsak uhi.

 

Huihpi’n a mutsiat inn 3-te ahihleh Liankho­thang, Sangi leh S. Kam­minthang inn hi a, YPA Pearsonmun Unit a pan nungak-tangval leh kho­sung mipi phatuamngaite paikhawm in inn mutsiat a omte mi kiphalte’n a thohkhawm uh van chi­tuamtuam zang in social work in bawlsak uhi.

 

YPA Pearsonmun Unit in hongtung ding April 27 a Raising Day a zat ding ban uah, April 2 a Pearsonmun Day zat a sawm uh toh kiton a hiai bang a khosung siangth­ouna ngai poimoh a, a hahsiang uh ahi.

 

 

Seminar Fellowship program nei ding

LAMKA, Mar 31: Hongtung ding April 12 in Pear­sonmun EBCC biakin ah seminar fellowship pro­gramme om ding hi. Hiai seminar fellowship ahihleh EBC Lamka North Division Baptist Dorcas Fellowship Committee in Year Plan a neih uh sepsuahna ding ahi. Seminar Fellowship ahihleh EBCC Dorcas Co-ordi­nator in makaih ding hi. Hiai seminar fellowship hun a Lamka North Division nuai a Baptist Dorca pawlte kimtak a kihel ding in ngen uhi.

 

 

Happy Feet Football Academy in End of Season leh Award hawmna zang

LAMKA, Mar 31: Happy Feet Football Academy (HFFA) in tuni, March 31 sunnung dak 2 in Mini Auditorium, Dorcas Hall, New Lamka ah ‘End of Season 2017- 2018’ leh ‘Award Distri­bution’ zang uhi.

 

Hiai hun ah chief guest leh guest of honour in Stephen Chinkhanson Guite, Manager, LPG, Indian Oil Corporation, North East leh Th. Jam­chinthang, MDC Thanlon pang uhi. Mang Taithul in hun zatna makaih a, Siam Ngaihte in thumna a hun pan in Vunglam Ngaihte in vaidawn thugen hi.

 

S. Liankhosiam, Proprietor, HFFA makaih in November 29 a sihna tuak, Happy Feet Foot­ball Academy innkuan a pan (L) Mangsuanlal sunna om a, Mercy Hoi­hte in Season Report pia in, Happy Feet Football Academy a dia Season 2017-2018 a Jersey Spon­sor-tu, The Corridor a pan Nembiaklian in thu­gen hi.

 

Team Captain Gin­goupau leh Thangthian­muan Tombing a pan thugenna om a, guest-te apan thugenna zoh in Special Guest hihna toh uap, deihsaktu tuamtu­am a pan thugenna om in, Award hawmna om hi.

 

Pastor Letzathang Guite, Local Pastor, EBCC Central Lamka in hanthawnna thugen in Happy Feet Football Academy a ding in thum­sak hi. Hun zatsung in Gogou leh Lalboi, Lallun­sang leh Hoihte in a van­gkim in lasa uhi.

 

Guest of Honor in a genna ah, Happy Feet Football Academy a sea­son thak ah, a poimoh bangbang kithuahpihna pe ding ahihdan gen in Happy Feet Football Academy nuai a sinsak a omte’n Pathian lau a, nu-le-pa, school leh Acade­my a sinsakte zahtak ding in hasuan hi.

 

Chief Guest in a genna ah, kimawlna lak ah football kipibawl ahi­hman in miteng phial lunglut ahihdan gen in, thil khatpeuh a lohchinna dia daltu omteng tup­guhna toh palsuak ngai ahihdan gen hi. Huai ban ah, lohchingtak a kimawl ahihtheihna dia tup kich­ian nei a, tupguhna leh dohzoutak a kimawl ding ahi chi hi. Tua ban ah lohchinna dia discipline hoihtak nuai a mahni kithuzoh poimoh ahih­dan gen hi.

 

Tuni a Award tua­mtuam piakkhiak a omte leh a sangtute ahihleh Golden Booth Award - Thangmuanlal Tunglut; Most Valuable Player - Gingoupau Samte; Most Talented Player - Mung­khanlian; Emerging Play­er of the Season - Craig Mangkhanlian; Best Role Model - Muanliankhum Langel; Attendance - Sangpu leh Grassroots’ Player of the Season - Niangthiankim hi uhi.

 

October 5, 2016 a phuhkhiak a om Happy Feet Football Academy ahihleh Manipur Gov­ernment theihpih a Trust nuai a registered ahih ban ah CDSA nuai a Af­filiated Club khat hi a, District sung a club tua­mtuam a player a neih ban uah, Academy in National Level a kimawl ding player tamtak leng sekkheta uhi. Amaute ahihleh Jarkhand FC ah Ginsanglian, G. Thang James leh Thangsuan­lal hi ua, North-East SAI ah Aimar Ginlienmang, DSK Liverpool Academy, Pune ah Jamlunmang leh Boirousang, Sudeva Moonlight FC ah Than­gever leh Delhi United ah Ginlalmuan hi ua, tulel in Academy in naupang reg­istration bawl 126 lak ah regular in 85 neilel hi.

 

 

Bungmual ah Trans­former 1 zatlouh in om

LAMKA, Mar 31: Bungmual Newlane a BRTF-te camp khang ah electric transformer khat zatlouh a koihdap in om hi. Hiai transformer ahihleh kum nih val paita a kipan zat nawnlouh a om in a department-te’n leng a gui om teng ban ah connection bawlnate phelkhia in zatlouh in om hi.

 

Hiai transformer ahihleh zat ahihlai in Newlane ah inn 50/60 vel in a zat uh hi a, tulel in Newlane ah Newlane EBCC biakin gei Tipaimukh Road zul a om transformer khat inn 100 val in zangkhawm uhi.

 

 

Tonglon-K ah School 1 tel in inn 10 huihpi’n mutsia

LAMKA, Mar 31: Singngat Sub-Division sung a om Tonglon(K) khua ah zan, March 30 nitak in huihpi hattak nung in school khat tel in tenna inn 10 mutsia hi. Huihpi’n a mutsiat inn neite ahihleh Lalli­anthang s/o (L) Senpu; Khuppi s/o (L) Khaitin­pau; Zoulian s/o (L) Douthang; Piaklian s/o Kamcha; Siakminlun s/o Zuanthang; Neklunmang s/o Zuanthang; Lalmin s/o (L) Damkap; Lalneu s/o Thangbel; Lamboi s/o (L) Thangzuankham leh Mamang’ inn ahi.

 

 

 

 

…more detail : here