You are here: HomeRSS FeedsThe Lamka Post

The Lamka Post | September 12, 2017

Tuesday, 12 September 2017 08:00

INA museum ah lemlak phal hita:

Tulel a puaknat thilte phawk unla, tulel dinmun puahpha di’n nasem un: Ram Madhav

IMPHAL, SEP 11: Tuni Seppatni a INA Memorial Hall, Moirang, south Manipur a ‘Swami Chinmayananda Memorial Lecture’ program zatna hun a BJP National Secretary Ram Madhav in a thugenna ah, gamsung a nekgukna, ginna mitdel leh laitheihlouhnate kawk kawm in, mipite kiang ah, tulel a puaknatnate phawkphakpih ding leh tulel dinmun bawlhoihna ding a nasem ding in ngen hi.

 

India Foundation director leng hi Ram Madhav in a gendan in, i gam uh ‘New India’ a puahphatna ding a mipite a kisaikhakpihte a hih ding uh ahi chi’n gen hi. Hiai Memorial lecture program a hihleh Chinmaya Mission-te’n a sai uh ahi. Ram Madhav in a gendan in, government in kipuahthak ding toh kisai a gen kei a, himahleh kikhek siang vilvel na ding gen hi. New India i hih ut taktak uh leh, India siangthousak ding leh nekgukna omlouhna gam hiding a bawlkhiak ding, mipite mohpuak ahi chi’n gen hi. Mipite dikna ngentu lel a hihlouh ua, a kisaipihkhakte a hih ding uh ahi chi’n gen hi.

 

Maban kum 5 sung in, India kichi zawnna leh nekgukna omlouhna gam hong hiding a, kum 2022 tan in zawnna toh kuamah khosa nawnlou ding chi’n gen hi. Government in nekgukna leh hiamgamna tung ah zero tolerance nei ding chi’n gen hi. India mite ka hi uh chi a kisaktheihpihtak a, a i genkhiak theihna ding mun ding uh India in i bawlkhe ding uh chi’n Ram Madhav in gen hi. BJP makaih government thak tup-leh-ngim a hihleh State a kituahna leh dinmun ngeina tut ding ahi chi’n gen hi. State a kituahna koihkik ding leh gam leitang kipumkhatna humbit ding in government kipumpiak chi’n gen hi. Itna tellou theihna kichi theihna dik hingeilou ahi chi’n Ram Madhav in gen hi. Khotang leh gam hoihzawkna ding in, itna toh nasemkhe ding a, mimal chih i kipumpiak ding uh ahi chi’n gen hi. I khotang un thilsiate paihkhia leh thilhoihte a huailut poimoh chi’n gen hi.

 

Manipur Chief Minister N Biren Singh in a thugenna ah, gam khantouhna ding leh nopsakna ding bang ka semkhethei a chih mipite’n a ngaihtuah ding uh ahi chi’n gen hi.

 

N Biren Singh in a gendan in, tawndan leh ngeina a hauhsakna i neihte uh phoukhiak ding tu dakkal in a poimoh ahi a, State sung kia a diah detlouh ding ahi chi’n gen hi. Mipite dikna ngentute lel a hihlouh ua, gamsung a khua –leh-tui kuapeuh in gamdang a, zahna a ngahtheihna ding tan ua nna i sep uh poimoh ahi chi’n gen hi. Gamsung a, a hoihlam a kikhekna, nopsakna leh bukimtak a khantouhna a om theihna ding a, ngaihtuahna hoihloute i nutsiat ding uh ahi chi’n gen hi.

 

N Biren Singh in mipite kiang ah, mimal hamphatna ding a nasepna lungput omte tawpsan ding leh State a kuapeuh huamkhavek khantouhna tut a hihtheihna ding a nasemzaw ding in ngen hi. Huchibang thute genkhiakna ding in State ah lecture leh conference tamsem neih poimoh hi. Program zatna hun ah Chief Minister in, tuni apan INA Museum huangsung a lem kilak phal hita a hihdan puang hi.

 

 

Art & culture, games & sports in state sung ah pupa tawndan etlawmna kembit: Th. Radheshyam

Imphal, Sep 11: Education Minister Shri Thokchom Radheshyam Singh in a genna ah Art & Culture, Games & Sports leh siamsinna in mi bawl hoih thei ahi chi hi. Aman a genna ah tulai khovel hun haksatak leh tatlekna komkal a Manipur tawndan lungluttak a zuun ahihtheihna ding in art & culture leh games & sports in mun poimohtak a luah chi hi.

 

Tuni a Social Development Organisation (SODO), Konthoujam vaisaina nuai a Ibudhou Korouhanba Laibung, Moidangpok a 4th Annual Prize Distribution & Felicitation Function 2016- 17 for contribution and achievements in the field of Education, Games & Sports, Art and Culture hun zatna ah Minister in chief guest hihna toh thugen hi.

 

Th. Radheshyam in a genna ah hiai bang a lam tuamtuam a kitaitehna sai a omte’n khangthakte ngaihtuahna khangsak sem ding ahi chi hi. Tuailai leh upa lamte a ding in kitheihsiam tuahna leh kizahtak tuah dan sinkhiak poimoh mahmah chi hi. Hiai hoihtak a theihsiam a hih hun chiang in thuhoihlou leng vengvungte leh buainate society sung gentaklouh khovel pumpi a ding a, a beina hong hita ding chi hi.

 

Minister in a gen zelna ah mihoih i chihte lungsim hoihtak pu a mi lamdik a pi ding a panpih nuamte ahi uh chi hi. I vek a society a dia mihoih pa/nu i hihtheina ding a kihanthawnna a hiai prize distribution and felicitations sai a om ahi chi hi.

 

MLA Konthoujam A. C. Dr. Sapam Ranjan Singh in a genna ah state sung a siamsin naupangte Civil Services Examination pethei ding khop a hanthawnna i piak poimoh ahi chi hi. Nu leh pa hi in sinsaktute hita leh i naupangte maban ding khualna a hoihtak a i etkaitouh zel ding uh ahi chi hi.

 

Tuni a hun zatna ah Dr. Kh. Shamungou, Chairman, State Environment Impact Assessment Authority, Manipur in a gelh laibu honkhiakna leng neih in om hi. Laibu gelhtu in a genna ah hiai laibu ahihleh Manipur tanggam a pan naupangte hinkhua toh kisai a tangthu saulou lou omte koihkhawmna ahi chi hi. Hiai laibu in a sinsak/hilhchet nop ahihleh mihingte leh thilsiamte kizopna toh kisai ahi chi hi.

 

Hun zatna ah mithupite, laisiamte, sinsaktute leh naupangte kihel uhi.

 

 

Khuga Battalion in khua 3 ah meivak pia

LAMKA, Sep 11: Khuga Battalion-te’n Self Observed & Initiated Little (SOIL) projects nuai ah “Mission Ujala” tungtawn in India leh Myanmar gamgi zul singtang khuate ah panpihna pia in khantouhna nasep tuamtuam semkhia uhi.

 

“Mission Ujala” ahihleh singtang khua electric tunlouhna munte a meivak piak ding ngimna a patkhiak hi a, huai tungtawn in Khuga Battalion in India leh Myanmar gamgi zul a kho 3 - Zoukhunou, Hiangtam Khunou leh C Lanchah ah generator tungtawn in electric pia uhi.

 

“Mission Ujala” tungtawn a meivek a neih ziak un khosung mipite kipak mahmah ua, electric in vakna a piak kia hilou in meivak hoihtak nuai ah nitak chiang inleng innsung nna tuamtuam semtheita uhi.

 

 

CM vaidawnna hun a nampuan silhchiat di’n ngen

LAMKA, Sep 11: Zingchiang, September 12, 2017 sunma dak 10 a pan in Lamka Public Ground, Hiangtam Lamka ah Manipur Chief Minister N Biren Singh vaidawnna om ding hi. Hiai hun a tel ding district mipi kuapeuh in mahni nampuan chiat silh ding in CM Reception Programme Organising Committee in ngen uhi.

 

Huailou in, zingchiang a Chief Minister in Lamka hong phak ding ziak in traffic heilamdang in om hi. Huai dungzui in VIP-te omsung teng Tipaimukh Road zero point, Police Station a pan IB Road tan khaktan ding a, IB Road leng Tedim Road a pan Ccpur College kongtan khaktan hiding hi. VIP garite Lamka Community kong ah kikoih ding a, private garite ahihleh Ccpur College huangsung ah park hiding hi. Tuibong bazaar apan Tedim Road ah gari park leh gari taivel phal hilou ding.

 

Chief Minister vaidawnna hun a tel ding Kangvai leh Saikot area ate bus in va pi ding a, amaute Centre Road ah drop hiding ua, Singngat leh Tipaimukh road line a kipante ahihleh Nazareth Nursing Home kong ah drop hiding uhi.

 

 

Meitei Mayek text book omlouh ziak in student-te’n sit-in-protest nei

Imphal, Sept 11: Tuni Seppatni in GP Women College student-te’n tuni a dia class a neihteng uh cancel in B.A First Semester-te zat ding Meitei Mayek text book omsak ding phutna in sit-in-protest nei uhi.

 

Kiphintute lak a pan B.A First Semester student Babyrose Loitongbam in thuthaksaite kiang ah semester bei kuan hita mahleh tuni tan in Meitei Mayek text book muh ding omlou lai chi’n a lungkimlouhthu tun hi.

 

A kisaipih thuneitute’n www.dlpi.manipur.gov.in official website a soft copy bek a text book omsak ding chi’n thuchiam nei mahle uh tuni tan in tua website ah koihkhiak in omtuanlou chi hi.

 

“A kisaipih thuneitute’n a sinnuam student-te sintheih ding a, a koihkhiak theihlouh lai ua tualsuak laimalte khansak ding kichi bang tupna ahi,” chi’n Babyrose in gen hi.

 

Kiphinna nei student-te’n a kisaipih department leh state government kiang ah state sung a college tuamtuam a pan student 500 val kiphinna neite mel a muh tungtawn a, a kinlam a text book omsak ding in ngetna bawl uhi.

 

 

Mehzuak pawl in DC ah ngetna pia

LAMKA, Sep 11: Red Cross Road leh Thangjam Road kikal Sa Lane khang lampang a mehzuak pawl in tuni, September 11, 2017 in DC/Ccpur khut ah ngetna pia uhi. Mehzuak pawlte’n ahihleh District Council in a mehzuakna mun uh September 15, 2017 tan a awngsak dia thupiak a bawl ziak in lampi dang ngaihtuahsak ding in Shyam Lal Poonia, DC/Ccpur khut a ngetna pia uhi. Hiai hun ah Red Cross Road leh Thangjam Road kikal, Sa Lane khanglam pang a mehzuak mi 60 vel om lak ah mi 52 paikhawm in, amau lak a pan mi 4 kisepkhia in DC kiang ah ngetna pia uhi.

 

Hiai hun ah DC/ Ccpur in ADC lam toh kithuzak a lampi ngaihtuahsak ding ahihdan theisak a, mehzuakte lak a District Council a pan license nei nailoute’n leng ngaihtuah ding in theisak hi. Mehzuak pawlte’n Bazaar a pan DC Bungalow ah DC kimuhpih sawm mahleh uh Imphal a DC a hoh ziak in a office kaihun ding suam a office ah kimuhpih ua, hiai hun ah mehzuakte’n ADCC in a dohkan uh nuse dia theihsakna om toh kisai lamdangsa leh, DC lui Jacintha Lazarus hunlai a, kampau zang a phalna piak a om leh, a mehzuak uh tungtawn a innkuan vak uh ahihdan ngetna ah taklang uhi. A mehzuakna mun uh nuse dia theihsak a om toh kisai a haksatna a tuah uh theihsiampih a, lampi dang ngaihtuahsak ding in ngen uhi.

 

 

GNM Training School ah Teachers’ Day zang

LAMKA, Sep 11: GNM Training School, Lamka a GNM First Year leh Second Year student-te saina in tuni sunma dak 11 a pan in Multi Purpose Hall, GNM Training School ah Teachers’ Day zatna om hi. Hiai hun ah GMN Training School Principal V Goihzachiin tel in tutor leh staff-te ban ah chialtuam school deihsaktute tel ua, Sister Karaila leh Sister Zensiankim in hun zatna makaih in, Thangzakap in thumna in hun pan hi.

 

Hun zatsung in Sister Baby Julia in vaidawn thugen a, Sister Lynda in Teachers Day kizatna ziak gen hi. Tua zoh in GMN Training School Principal leh Tutor-te a pan thugenna om a, Sister Margret in kipahthu gen in, Elder Totluanga in thumna in hunkhak hi.

 

Teachers’ Day zatsung in GNM Training School a GNM First Year leh Second Year studentte’n kipolh limna in Solo Duet, Trio chihte ban ah special item tuamtuam lak uhi. Hiai hun ah Elder Rotluanga in a genna ah, damloute kem ding a student-te kipum piakna thupi mahmah a, nasepna kong bangkim ah salam ah missionary hihlam kimangngilhlou a, nurse zilzoh chiang a duty na mun ah midangte a dia damna petu ahihna uh mangngilhlou ding in hasuan hi. Huai ban ah damlou kepna toh kisai a damlou toh kal ah kitheihsiam thuahna om theihna dia panlatu missionary nurse ahih ding in deihsak thu leng gen hi.

 

 

DC/Ccpur makaih in DLCC Meeting nei

LAMKA, Sep 11: DC Office, Tuibong a BRGF Resource Centre ah tuni sunma dak 11 a pan in Shyam Lal Poonia, DC/ Ccpur makaih in District Level Coordination Committee-cum-District Level Officers’ Meeting om hi.

 

Hiai hun ah SP/ Ccpur ban ah district sung a SDO/BDO, Govt Dept tuamtuam a pan Officer leh Bank Manager-te tel ua, zingchiang, September 12 a Manipur Chief Minister N Biren Singh vaidawnna ding toh kisai a kisakkholhna tuamtuamte leh maban a sep dingte genkhawm uhi. Huai ban ah India Prime Minister for Excellence in Public Administration, 2018 leh Swachh Mission sepsuahna toh kisai ban ah thu poimoh tuamtuam genkhawm uhi.

 

DLCC Meeting ahihleh zanhal, September 9, 2017 a Kangvai ah neih ding chih himahleh CM in Lamka hongphakna ding toh kisai a Imphal a meeting a DC/Ccpur a tel ziak in a hun suan in om hi. Tuni a Meeting hun ah district sung a Digital Payment toh kisai Bank Branch-te tungtawn a gahsuahtak a sepkhiak ding dan leh 2018 a Prime Minister’s Award for Administration 2018 a District Administration kihel ding toh kisai genkhawm ua, hiai hun ah District Level Officer teng in District sung khantouhna dia mahni mohpuak sem buching chiat ding in theihsakna bawl uhi.

 

 

BSF leh KV School in Anti-drug Rally nei

LAMKA, Sep 11: G Mualkoi a om STC/BSF leh Kendriya Vidyalaya Ccpur in tuni, September 11 in Lamka khopi sung ah Anti-Drug Motorcycle Rally nei uhi. Rally ahihleh zingkal dak 7 a pan Kendriya Vidyalaya School campus a kipan a, SR Ojha, IPS, IGP, STC/ BSF in rally a tel BSF personnel leh student-te kiang ah khamtheih/ guihtheih doudal a panla ding a hasuan in, rally kipatkhiakna ding in amah tel in rank officer-te’n anti-drug motorcycle rally flag-off uhi.

 

Rally ahihleh Kendriya Vidyalaya School Campus ah kipankhia a, STC/BSF gate a pan Pearsonmun ah taitou in, huai a pan Tipaimukh Road man in Bungmual, Hill Town, Hiangtam Lamka tawn in, Police Station Traffic point a pan Tedim Road zuitou in, Central Lamka, New Lamka ah tai ua, Lanva a pan Gangpimual ah tai in, STC BSF ah zou uhi.

 

Hiai hun ah Bike leh Scooty 30 kihel ua, gari khat ah BSF personnel leh student khat chiat tuang in, lampi a totkhakna munte uah paungaihna zang in khamtheih/guihtheih hoihlouh dan leh lauhuai ahihdan kuapeuh in thei a, khamtheih/guihtheih a pan kikem siangthou ding in ngen ua, student-te’n khamtheih/guihtheih hoihlou dan kigelhna lai mipi’ lak ah hawm uhi.

 

 

Lamka Mega Trade Fair zousiang

LAMKA, Sep 11: Team CT Lian leh Kevi Society, Kohima kithuah a YMA Hall, Hmuia Veng, Lamka Mega Trade Fair leh Talent Show-cum-Dance Competition 2017 neih a om zan nitak in zousiang uhi. Mega Trade Fair ahihleh Vasti Headmistress, Songtal Govt High School in August 23, 2017 in Chief Guest hihna toh hongkhia a, Trade Fair hunsung in innsung leh nek-le-takvanzat tuamtuam ban ah van chituamtuam zuak uhi.

 

Talent Show-cum- Dance Competition ahihleh September 1, 2017 tan Audition Round in zang ua, September 2, 2017 a pan Kidemna Round tuamtuam paitou in, hiai hun ah nitak teng in mi poimoh tuamtuam in chief guest hihna toh uap uhi.

 

Closing hun ahihleh Khaipao Haokip, Chairman, ADC/Ccpur in chief guest hihna toh uap in, ticket la teng Lucky Draw a kibawl hongkhia a, hamphatna ngahtu, Vanlallian of Chimtung Veng kiang ah kipahman pekhia hi. Tua zoh in kidemna sunzom ua, hiai hun ah Top 10 tan ah Chingthiankim, Baby Lalchhandami, Zirsanglian, Ngaipi, Minlun, Ruthi, Lianmung leh Third Position ah Kevin, Second Position ah LEO leh Champion The Obvious hi uhi.

 

 

Congress Political Conference om ding

LAMKA, Sep 11: District Congress Committee, Ccpur in tuni’n B. Vengnom a District Congress Office ah thuthaksaite kimuhpih ua, huai ah hongtung ding September 14, 2017 chiang a Peace Ground, Tuibong ah ‘One Day District Level Political Conference’ om ding toh kisai gen uhi.

 

Hiai hun ah Seiboi, Secretary, District Congress Committee in district a dia a khatveina dia hongtung ding September 14, 2017 chiang a Peace Ground, Tuibong a ‘One Day District Level Political Conference’ om ding hi’n gen hi. Hiai hun ah chief guest, functional president leh guest of honour in O Ibobi Singh, Ex-Chief Minister, TN Haokip, President, MPCC leh Gaikhanngam, Ex-Deputy CM pang ding uhi.

 

Hiai hun zatna Dr. Chinkholal Thangsing, Thanlon PCC member in makaih ding a, Vidyapati Senjam, Gen. Secy. Political Conference in vaidawn thugen in Thangso Baite, MP (Lok Sabha) leh Dr. Chaltonlien Amo inleng thugen in Mangcha Thangjom, Ccpur PCC delegate in kipahthu gen ding hi. Hiai hun District sung a party top official-te’n uap ding ua, block tuamtuam a Congress party makai leh ngainatu kuapeuh in uap chiat ding in ngen uhi.

 

 

IMI toh kisai Block 3 in workshop nei

LAMKA, Sep 11: Intensified Mission Indradhanush (IMI) zatna ding toh kisai a workshop neih a om paitou zel in, tuni, September 11, 2017 sunma dak 10:30 in CMO Conference Hall, ah District sung a Block 3 a pan PHC leh CHC a Staff Nurse/ANM-te’n workshop nei uhi. Hiai hun ah Dr. VC Pau Tonsing, DIO/Ccpur; Dr Vanlalkungi, Saikot PHC M/O Incharge; Panthoi, CA, DFWO leh Nalini Devi, DPHNO in sinsak uhi.

 

Workshop ahihleh Intensified Mission Indradhanush toh kisai district sung a lohchingtak a sepsuah ahih ding deihna a Centre Govt thupiak dungzui a neih a om hi a, hiai toh kisai sepsuahna ding in Block tuamtuam a ASHA Worker-te kithuah pihna toh PHC/CHC tungtawn a numei naupaai leh naungek piangtung a pan kum 3 nuailamte zonkhiak a, Routine Immunization hoihtak neihsak ding chih ahi.

 

Tuni a workshop hun a tel Block 3, Samulamlan PHC Block, Saikot PHC Block leh Sagang PHC Block a pan Staff nurse/ ANM mi 50 val tel uhi. Zingchiang, September 12 a Manipur Chief Minister N Biren Singh in Lamka hong phak ding ziak in workshop omlou ding a, zinghal, September 13 in Tipaimukh Block-te’n nei ding ua, September 14 in Intensified Mission Indradhanush toh kisai Vaccine leh Cold Chain Handler-te’n neinawn ding uhi.

 

 

IFCD Minister in high level meeting makaih

IMPHAL, Sept 11: Tuni Seppatni in Irrigation and Flood Control Minister Letpao Haokip in Old Secretariat Conference Hall ah Thoubal Multipurpose Project Heirok Branch Canal bawlna toh kisai genkhawm ding in high level meeting makaih hi.

 

Meeting hun in, Revenue Minister Karam Shyam, Education Minister leh Heirok A/C MLA Th. Radheshyam, Revenue Commissioner Th. Chitaranjan Singh, Secretary of IFCD Gopen Meitei, Thoubal DC L. Nabakishore Singh, Chief Engineer of IFCD G. Robindro Sharma, Director of Manipur Remote Sensing Application Centre (MARSAC) Dr. N. Randhir Singh, Director of Settlement Shri Salam Somorjit Singh leh IFCD high ranking official dangte tel uhi.

 

Hun bangtan hiam a houlim nung un, member-te’n a kisaipih tengteng toh pangkhawm a, a baihtheipen a Heirok Branch Canal work la ding in thupuk uhi. Heirok Branch Canal ahihleh Thoubal Multipurpose Project kahiang khat ahi.

 

 

GST toh kisai kisinsakna nei

LAMKA, Sep 11: Taxation Department, Ccpur saina in tuni, September 11, 2017 sunma dak 11 a pan DCT Hall, Tuibong ah Goods and Service Tax (GST) toh kisai Awareness Campaign-cum-Training on Filing of GST Return in GSTR-3B/GSTR-1/ GSTR-2/GSTR-3/GSTR- 4 kichi om hi. Hiai hun ah Nawaid Iqbal, PWC Consultant, Guwahati leh Chinlianhat Vaiphei, Supt of Taxes, Ccpur in GST toh kisai sinsak ua, Workshop ah District sung a van tuamtuam zuaktu, dealer tamtak kihel uhi.

 

Goods and Service Tax zat ahih a pan Taxation Department, Ccpur a Supt of Taxes etkaina nuai ah GST Facilitation Centre kichi DC Office Building ah Deputy Commissioner in hongkhia a, hiai mun ah GST toh kisai Registration leh Tax Filing bawltheih gige hi. GST ahihleh India in sumsinna tungtawn a kitundingna vanzat dia “One Nation One Tax” chih paipih a, a patkhiak ahi.

 

 

 

 

 

 

NEWS TOMKIM

 

Singngat MLA in Zou Hausa teng meeting neihpih

LAMKA, Sep 11: Tuni, Sept 11, 2017 sunma dak 11 in Singngat MLA Ginsuanhau, Chairman, MANIREDA in a tenna inn, Lailam Veng, Lamka ah Zou khua hausa (village chiefs) teng samkhawm in meeting neihpih hi. Hiai hun ah khantouhna nasep toh kisai leh nam vai ban ah thu poimoh tuamtuam genkhawm uhi.

 

 

IG, STC/BSF kisuan ding

LAMKA, Sep 11: S.R. Oja, IPS, IG, STC/BSF, Lamka in kha 7 vel IG, STC/BSF, Ccpur a letnung in Tripura ah kisuan ding a, zingchiang in Lamka nuse ding hi. Amah mun luah ding tutan in kuamah guan hinailou a, IG, STC/BSF thak ding hong paima Gentinlal, Dy. Commanding Officer, STC/BSF Ccpur in IG mohpuakna lenkhawm ding hi.

 

 

Police-te’n bawng gu mi 2 man

LAMKA, Sep 11: Police apan kizadan in zan nitak dak 8:30 vel in Mishao Lhahvom khua a Lalminthang Mishao(38) s/o Semkhomang of Mishao Lhahvom Bong asan(red) gu mi 2: Thehminlen@Lelen Lupheng(32) s/o Paolam of M. Lhavom leh Thangtinlen @ Lelen Mishao(25) s/o Kamkholal of M. Lhahvom mankhia uhi. Tuni’n CJM Court ah ding sak ua, Court in Police custody Dept. 14, 2017 tan om ding in theisak hi. Hiai thu ah Police in FIR No. 379/34 IPC bulh uhi.

 

 

Gardeners Skill Training hongkhia

LAMKA, Sep 11: Krishi Vigyan Kendra (KVK) Ccpur ICAR Research Complex for NEH Region, Pearsonmun ah tuni sunma dak 10:30 in 30-Days Gardeners Skill Training kipan hi. Training ahihleh N. Prakash, Joint Director, ICAR, NEH Region in hongkhia a, hiai hun ah Lamka area a pan huanbawl lunglut mi 20 val tel ua, tuni a pan in ni 30 sung training ding uhi.

 

 

SSPP Jt Hqtrs Delhi in Siamsin Award & Freshers’ nei ding

Delhi, Sept 11: SSPP Joint Headquarter, Delhi in hong tung ding 16th Sept 2017 sun dak 12 in Convention Centre,JNU, Delhi ah ‘Siamsin Award & Freshers’ Orientation 2017’ programme nei ding uhi. Hiai hun zatna ah Biaklun Shoute, Manager, Corporate Affairs Hindustan Uniliver Limited, Dr. Nemthianngai, Associate Professor, JNU, Delhi Mercy Vungthianmuang, Associate Professor, JNU, Delhi leh Haulianlal Guite, IAS & Author te ‘Key Speakers’ in pang ding uhi.

 

 

SUNNA :

 

Thuamkhanneng, (95) h/o Chingkhongai, UBI building nung, tuni zinglam dak 3 vel in si a, tuni mah in Lamka hanmual ah kivui hi. Aman ta 12 nei in, tu 111 nei a, a hatlai in gamsa chi tuamtuam 380 man hi. Amah ahihleh Nengkhansuan @ Khansuan Guite pianna nu leng ahi.RIP.

 

Lallianpuii (60) m/o Vanlalliana of Zenhang Lamka, zan, September 10 nitak in si a, tuni’n Lamka hanmual ah kivui hi. RIP

 

 

 

 

 

…for more detail : here