You are here: HomeRSS FeedsThe Lamka Post

The Lamka Post | February 20, 2017

Monday, 20 February 2017 08:30

Nagaland CM TR Zeliang kitawpna Governor in pom­pih; NPF leh DAN urgent party meeting 2 om ding

New Delhi, Feb 19: Tuni Pathianni nitak dak 8.10 in Nagaland Chief Minister TR Zeliang in, Raj Bhavan a Governor PB Acharya khut ah, cabi­net minister khenkhatte kithuahpihna toh CM dinmun a kipan kitawpna lai hi. Governor inleng TR Zeliang kitawpna pom­pih ngal hi. Governor P B Acharya in TR Zeliang leh Council of Minister-te kiang ah, panthak lak ahi­hma teng, a mohpuakna maban chiat uh sunzom­tou lai ding in ngen hi.

 

Tuabangkal ah Chief Minister tutphah luahna ding in Naga People’s Front (NPF) president Dr Shurhozelie Liezi­etsu leh Lok Sabha MP Neiphiu Rio kal ah kikan­tuah paizomtou zel hi. MLA khenkhatte’n NPF party a kipan Neiphiu Rio tung a suspension order zukkik ding in ngen uhi. Himahleh zingchiang Seppatni zinglam dak 10 in NPF legislature party emergency meeting om ding a, hiai zoh zinglam dak 11 in DAN (Demo­cratic Alliance of Naga­land) meeting in zom ngal ding hi. Meeting po­imoh nihte zohsiang ahih lam chiang in, Nagaland Chief Minister thak lentu ding chiang pan ding hi.

 

TR Zeliang in nu­meite a ding a seat 33% toh civic bodies’ elec­tion sai ding a thupukna a lak ziak a, CM dinmun a kipan kitawp ding phut a Nagaland Tribal Ac­tion Committee(NTAC) in kiphinna a pat nung in, Nagaland state sung naktak in buai hi. Zeliang mun luah a, makai thak len ding in, chief min­ister lui leh Lok Sabha MP Neiphiu Rio tung ah gintakna liantak omtou denlai hi. Chief minis­ter’s office thusuak dung­zui in, maban khawlsan theihlouh ding a ahihna toh, chief Minister in resignation letter a gelh, zingchiang in legislature party ma ah luikhiak hid­ing a, hiai hun sung mah in makai thak ding telkh­iak hiding a, a nih tuak un Raj Bhawan ah pai ding ua, CM in a kitawpna lai pelut ding a, makai thak ding inleng majority ngah ahihdan leh government bawlkhezou ding ahihdan Governor a theihsak ngai ding hidan in taklang hi.

 

Zan Kiginni in, Na­galand state ah political buaina thak kipan hi. Hiai hun in, Chief Min­ister thak ding leh Chief Minister T R Zeliang mun luah ding a Chief Minister lui Neiphiu Rio deihbawl Assembly member 60 lak a Naga People’s Front (NPF) party MLA 49( Indepen­dent 8 tel in ), Nagaland state inkiangpih Assam a Kaziranga National Park a resort ah kisuan uhi.

 

Nagaland a urban lo­cal bodies(ULBs) election a numeite tung a 33% quota piak a om kalh a kiphinna etkaidan toh ki­sai in, Zeliang in mohsak­na chiteng tuak a, state ah hiamgamna leh hu­hamna tanpha piang hi. Nagaland Chief Minister ding a Zeliang nungthuap party MLA-te’n Zeliang a nutsiat zoh nung uh, da­kkal bangzah hiam nung a, ruling Naga People’s Front (NPF) supremo Shurhozelie Liezietsu in Kiginni a, a gendan in, party sung ah MLA-te hong kik nawn vek ding uh chi’n a kimuan thu gen hi. Liezietsu thugente’n poimohna liantak nei a, Nilaini nitak a Zeliang khengkhe ding a, amah nungthuap MLA tamzaw thamte’n Sintawpni ni­tak in, state a Lok Sabha member omsun Neiphiu Rio deih bawl uh hidan in kilang nawn hi.

 

Zan Kiginni nitak a, Liezietsu in a tenna inn a, Central Office Bearer-te ban ah Division Pres­ident-te NPF Central Executive Council emer­gency meeting neihna hun a, a gendan in, trump card a kiletkip tinten ziak in, party (NPF) organisa­tion kikekzaklou in kichi­mat den a, dikloutak a bangmah pailou ding ahi chi’n gen hi. Kiphinna nei pawlpite leh govern­ment kal a buaina omte sukvengna ding in, a paisa Nilaini nitak in, MLA 49 lak a 42te’n leg­islature party makai thak ding in, kithutuaktak in NPF supremo Liezietsu nungthuap uhi.  


 

 

BJP in Manipur gam leitang kembit ding; Framework Agree­ment in Manipur siatna ding bangmah tunkhalou: Rajnath

IMPHAL, Feb 19: Government of India leh NSCN-IM in ‘Frame­work Agreement’ a bawl a Manipur toh kisai bang­mah thu telkhalou leh Manipur gam leitang kip­umkhatna hihsiat hilou ding hi’n Union Home Minister Rajnath Singh in tuni’n Imphal leh Bish­nupur district a BJP elec­tion rally ah gen hi.

 

Union Home Min­ister ahihleh tuni, Pathi­anni nitaklam in Imphal hongtung a, Manipur a vaihawmna len Congress in ‘Framework Agree­ment’ tungtawn a politics a hamphatna ngahsawm hidan in ngoh hi. Centre a BJP makaih NDA govern­ment in Manipur, Assam leh Arunachal Pradesh gam leitang kekzaksakna dia bangmah hihlou ding ahihdan leng Rajnath in gen hi.

 

Huai ban ah BJP in a thuchiamte a tak a semsuah gige ahihman in mipite’n Manipur gam leitang kipumkhatna kekzak ding a muang­mohlou ding leh state dangte’n leng NSCN-IM ziak a thilhoihlou tung ding a muangmohlou ding in ngen hi. Hiai thu ahihleh All Manipur Stu­dents’ Union (AMSU) makaih a mipi’n August 3, 2015 a Govt of India leh NSCN-IM in ‘Frame­work Agreement’ a bawl un a thutunte puangkhe ding a nohna a kiphinna a neihnung ua Union Home Minister in a gen ahi.

 

Imphal a Palace Compound sung a Union Home Minister in ma­ban a Manipur assembly election ding toh kisai a ‘BJP Vision Document’ a honkhiak hun inleng AMSU makaih in mipi’n kiphinna nei uhi.

 

Manipur Congress in ahihleh BJP in thuneihna a lakkhak ding venna in ‘Framework Agreement’ pen political agenda’ a nei in BJP in hiai kilemna toh kisai a selguk nei hidan in ngoh uhi.

 

Union Home Minis­ter in kha 3 val UNC in national highway a eco­nomic blockade a bawl toh kisai in Ibobi gov­ernment naktak in dem hi. Centre in economic blockade bawl a om pen lakkhiak ahihna dia thei­htawp suah ahihdan gen a, himahleh tuni­tan blockade lakkhiak a omlouh pen ‘political conspiracy’ om hiding hi’n gen hi. Huai ban ah Union Home Ministry in UNC leh state gov­ernment kihouna ding lampi a bawlsak ban ah national highway honna ding a state government kithuahpih dia central paramilitary forces tam­tak pia ahihdan gen hi. Himahleh kihouna toh kisai a state government a lunglutlouh ban ah na­tional highway honna dia central forces piak a omte a state government in a zatlouh ziak a economic blockade lakkhiakna dia Union Home Ministry panlakna teng vuaksuak hidan in Rajnath in gen hi.

 

Union Home Minis­ter in a genzelna ah, state khat sung a ‘law & order’ toh kisai a constitution dungzui a zuih ding om ahihman in BJP makaih NDA government in state subject-te a Centre kigolh sawmlou leh utlou ahi­hdan leng gen hi. Dan leh thupiak enkolna pen state subject himahleh a poimoh bang a state gov­ernment panpih dia Cen­tre government kimansa a om gige ahihdan leng gen hi.

 

Imphal a MDFC audi­torium a BJP Manipur Pradesh in a bawl ‘Vi­sion Document’ a honkh­iak zoh a Union Home Minister in a genna ah, BJP in election hun a thuchiam a bawl peu­hmah sepsuahlouh a koih neilou ahihdan gen hi. ‘Vision Document’ a tak­lat a omte peuhmah BJP in vaihawmna a let leh a tak a sepsuah hiding hi’n leng gen hi.

 

Congress in Manipur a vaihawmna hiai tan a let ziak a state sung tu­antual leh khangtoulou a om ahihdan gen in BJP in Centre a vaihawmna a let hun a kipan North East khantouhna ding toh kisai a Ministry tu­amkhat bawlkhiak a om hi’n gen hi. Huai ahihleh Atal Bihari Vajpayee vai­hawmna nuai a Ministry of Development of North Eastern Region (DoNER) bawlkhiak a om leh huai Ministry tungtawn a chi­amtehtham khantouhna om ahihdan gen hi.

 

BJP ‘vision docu­ment’ honna uap Arunachal Pradesh chief minister Prema Khandu in a genna ah, Centre in India malsuahbial a state tuamtuam a bik in Mani­pur, Arunachal Pradesh leh Assam map gelhthak ahihkeileh state gamgi bawl lamdang a om ding phallou ding ahihdan gen hi. Huai ban ah Congress vaihawmna nuai ah khan­touhna om ngeilou ding a khantouhna tunthei om­sun BJP ahi chi hi.  


 

 

Election official-te zat ding thautui kiningching om

LAMKA, Feb 19: 11th Manipur Legislative Assembly election ding toh kisai a R. Sudhan, IAS, DC/DEO, Ccpur in Ccpur district sung ah election official-te zat ding thautui kiningching koihsak (alloca­tion) ding in Feb 6, 2017 in Dy Manager-cum-SLC, IOC Ltd (MD) Manipur, Imphal kiang ah ngetna pia hi. Huai dungzui in tu’n Ccpur a Oil Pump-te ah election official-te zat ding bik in thautui kiningching koih hita hi’n thutut kingah hi. Huaite ahihleh petrol 26.2KL, die­sel 81.5KL leh M/Oil 310 li­tre hi a, Lamka a Oil Pump-te a thautui omdan ahihleh M/S Suakhnun & Sons ah petrol 12KL, diesel 20KL leh M/Oil 50 litres; M/S Lamka Filling Station ah petrol 12KL, diesel 20KL leh M/ Oil 50 litres; M/S Niangchi­in Service Station ah diesel 20KL leh M/Oil 50 litres, M/S Tuibong Service Sta­tion ah petrol 2.2KL, diesel 21.5KL leh M/Oil 160 litres koih (stock) a omta hidan in thutut kingah hi.

 

 

Polling Station 318 lak ah normal 18 lel om

LAMKA, Feb 19: March 14, 2017 chiang a 11th Manipur assembly election first phase ding toh kisai in Ccpur district sung a assembly constitu­ency 6 a polling station 318 om lak ah normal polling station 18 lel om a, critical polling station 53 leh vulnerable polling station 247 om hi.

 

Huaite ahihleh 55-Tipaimukh AC a poll­ing station 38 lak ah nor­mal polling station omlou a, critical polling station 37 leh vulnerable polling station 1 om hi.

 

56-Thanlon AC a polling station 38 lak ah normal polling station omlou a, critical polling station 4 leh vulnerable pollong station 34 om hi.

 

57-Henglep AC a polling station 56 lak ah normal polling station omlou a, critical polling station 5 leh vulnerable polling station 51 om hi.

 

58-Ccpur AC a poll­ing station 70 lak ah nor­mal polling station 13 om a, critical polling station 10 leh vulnerable polling station 47 om hi. 59-Saikot AC a polling station 67 lak ah normal polling station 5 om a, critical polling station 5 leh vulnerable polling station 57 om hi.

 

60-Singngat AC a polling station 49 lak ah normal polling station omlou a, critical polling station 28 leh vulnerable polling station 21 om hi.

 

Manipur asembly election ding toh kisai in nidang “sensitive” kichi pen “vulnerables” in kheng ua, “hyper sense­tive” kichi leng “critical” in kheng uhi.

 

 

Manipur BJP in ‘Vision Document’ hongkhia

IMPHAL, Feb 19: Manipur BJP in tuni’n ‘Vision Document’ kichi hongkhia a, huai ah 1950 a kipan dankalh a Mani­pur state sung a pemlutte toh kisai a dan bawl ding a phutna om gige toh kisai tel in state sung a tualsuakmite humbitna ding a dan bawlkhiak ding chih thu ban ah thu poimoh tamtak tuang hi.

 

Union Home Minis­ter Rajnath Singh in tuni a, a honkhiak Manipur BJP ‘Vision Document’ ah Moreh, Mao, Jiribam leh gamgi zul mun tua­mtuam a dankalh a state sung a hong pemlutte dalna dia police posts/ stations bawlkhiak ding chih ahi.

 

BJP Manipur in 10 action points a bawlte lak ah Manipur gam leitang kepbit ding leh Manipur a blockade a om nawn­louhna dia highway pro­tection force bawlkhiak ding chihte leng tel hi.

 

Huai ban ah innkuan khat a mi khat kiang a sepna piak chiat ding, BPL innkuante kiang a health insurance bawlsak ding, innchih a tuidawn ding piak ding, inn ne­iloute a ding inn bawlsak ding, hunteng a district teng kikawmtuah thei­hna dia lampi hoihtak bawl ding, numeite kiang a graduation tan a thawn a siamsinna piak ding chihte tel hi.

 

Tua ban ah ‘fake encounter’ leh ‘corruption cases’ suina zohsianglouh a omte zohsiang a mohna neite gawtna piak ding leh India a ‘eco tourism capital’ dia Manipur bawl ding chihte leng tel hi.

 

BJP Manipur Pradesh in Govt a bawl leh mipite deihna bang a government bawlkhiak hiding leh state sung a hindan ngeina omsak nawnna ding leng chiam hi. State sung khantouh­na dia dan leh thupiak poimoh ahihman in dan leh thupiak hoihtak a kepbit hiding inleng taklang hi.

 

Bandh leh blockade free state ahihna state sung a niteng poimoh puaklut ding khamna leh dalna pen dankalh a gam­tatna ahihtheihna dia dan khauhtak bawlkhiak a, a bohsete gawtna piak ding chih leng BJP in chiam hi. Nekgukna leh fake encounter cases zohsian­glouh om tengteng kha khat sung a zohsiang a mohna neite dan dungzui a gawtna piak hiding in leng BJP in thuchiam bawl hi.

 

Helpawl tuamtua­mte toh kihouna (bi­lateral dialogue) om theihna dia panlak ding leh human rights bohsiatna thiltung om­louhna dia human rights commission nasem thei dia bawl ding chih leng vi­sion document ah taklat in om hi.

 

Huai ban ah police recruitment policy hoi­htak bawl ding, police academy bawl ding, dis­trict teng a model police stations leh women police stations bawl ding, intel­ligence network puahphat ding leh state sung a dan leh thupiak kepbitna dia police lam naktak a puah­phat ding chihte leng BJP ‘vision document’ ah tak­lat in om hi.  

 

 

CEO in thusuah bawl

IMPHAL, Feb 19: CEO Manipur in tuni a thusuah a bawlna ah, Ma­nipur assembly election first phase a ding toh ki­sai a zan a candidate list suahkhiakna a khat suah­khaklouh a om hidan in taklang hi. Huaite ahihleh 1-Khundrapam a Sl. No. 4 Leirenlakpam Lala Singh, NPP hidan in taklang hi.

 

Huailou in, Director General, ECI in Manipur hongpha lel leh ECI full team inleng Feb 21 leh 22 a Mani­pur hongpha ding leh elec­tion toh kisai a kisakkholhna dinmun hong enkhe ding uh hidan in taklang hi.

 

 

41-Chandel AC NPP candidate in election campaign pankhia

KANGPOKPI, Feb.19: Zan Kiginni in Sugnu Tribal ah 41-Chandel AC a ding in NPP candidate flag hoist­ing program zat in om a, hiai hun in NPP candidate Letpao Haokip a ding in election campaign pat in om hi. Hiai hun sung mah in, constituency mun 5 a campaign makai leh en­kaitu ding subcommittee phutkhia uhi.

 

Flag hoisting program zatna hun ah NPP Presi­dent Thangminlen Kipgen in party worker dangte theihpihna toh party flag kaipalh hi. Hiai hun zatna ah Chandel district a nam tuamtuam akipan palaite, kho hausate, CSO makaite tel a mipi a sang a sim paikhawmte’n NPP can­didate nungthuap ding in thuchiam bawl uhi. NPP President Thangminlen Kipgen in Letpao Haokip telchingna in, hun sawttak nelhsiah a om mipite tung a lemna leh khantouhna tun ding ahi chi’n gen hi. Party manifesto-te ban ah Letpao Haokip in sepsuah ding agenda tuamtuam a neihte leng puangkhia hi.

 

 

Singtangmite buaina hihvenglou a kitelna neih pen thilhoihpen hilou thei: JAC-AATB

LAMKA, Feb 19: Manipur Deputy Chief Minis­ter Gaikhangam in pasal nau­pang kum 11 mi khat tel a Tribal Martyr 9-te helpawlte’n a goih (hired) uh hidan a, a gen toh ki­sai in Joint Action Committee Against Anti-Tribals Bills (JAC-AATB) in tuni, Feb 19 in hilh­chetna thusuah bawl hi. JAC-AATB in a taklatna ah, phaizang helpawlte kigawmna CorCom makaihna nuai a anti-tribal bills bawlkhiak a omte tulel a Mani­pur Govt in a passed hi a, Ibobi makaih Congress Govt in tulel a singtangmite buaina hihvengna ding ngaihsaklou hidan in tak­lang hi.

 

August 31, 2015 a Manipur Legislative Assembly in “Pro­tection of Manipur People Bill, 2015; the Manipur Land Rev­enue & Land Reforms (Seventh Amendment) Bill, 2015; and the Manipur Shops & Establish­ments (Second Amendment) Bill, 2015” a passed deihlou a singtangmite’n khutvuak a kiph­inna nasatak a neihlai a commu­nal Manipur Govt in thautang zang a kap leh anti-tribal bills deihlou a kiphinna pailel tuni chiang a ni 538 chingta hidan in JAC-AATB in taklang hi.

 

Manipur Govt in Tribal Martyr 9-te a thah mah uh ahi­hdan leh khutkhial ahihdan uh kiphawk in singtangmite tawn­dan leh ngeina dungzui in Nov 2, 2015 in “Hiamkhaam” hong bawl uhi. Huainung in Manipur Govt in chialna a bawl dungzui in JAC-AATB in Nov 9, 2015 in Manipur Govt ah ‘Charter of Demands’ pia a, huai ban ah Dec 29, 2015 in Manipur Govt kimuhpih nawn hi. Himahleh Ibobi makaih Manipur Govt in tunitan JAC in ‘Charter of De­mands’ a piakte ngaihsaklou hi. Huai ban ah Dec 29, 2015 a Chief Minister chamber a JAC-AATB makaite kiang a Ibobi Singh in Anti-Tribal Bills 3-te CorCom a pan phutna nasatak om ziak a passed a om ahihdan puangkhia hi’n JAC-AATB in taklang hi.

 

Singtangmite a dia pomtheih leh settak ding kilem­na bawlpih sawmlou a commu­nal Manipur Govt in singtang­mite lak a kikhenzakna ding a panlakna sumzom zel hi’n JAC-AATB in taklang hi. Khentuam nei Manipur Govt in a khutzat tuamtuamte lak a khenkhat zang a Dec 22, 2016 a Tribal Martyr 9-te lak a khat luang gukhia leh hiai toh kisai a, a nasepna lohch­ingna hiam chih huai ni mah a enkhia a Chief Minister Ibobi Singh in Bijang hong pha hidan inleng JAC-AATB in taklang hi.

 

Kum 15 sung a kizom a Chief Minister len Ibobi Singh in sing­tangmite ngaihsaklou leh mipi lak a, a thugenna teng a gam lei­tang pen Govt a hi a, tribe khat a hituamlou ahi a chih gige in singtangmite’n a pupa ua pan a luahna gam uh ahihnatak leh tribal land rights theibanlou ahi­hdan langsaktu ahihban ah anti-tribal lungsim nei ahihdan lang­sak hi’n JAC-AATB in taklang hi.

 

Khentuam nei Manipur Govt in kamsiamtak in singtangmite khemsek mahleh singtangmite buaina leh haksatna hihvengna dia bangmah panlakna neilou ahihman in singtangmite pilvan hunta hi’n taklang hi. Huai ban ah Manipur Govt in district thak 7 a bawlkhiak leng singtangmite khenzak tupna ban ah assembly election a seat tamtheipen ngah­sawmna lel hidan in taklang hi.

 

A huntak a Assembly Elec­tions neihtheih a om pen kip­ahhuai mahleh tulel a Manipur singtangmite deih pen ahihleh election hilou in constitution nuai a kihumbitna hizaw hi’n JAC-AATB in taklang hi. Com­munal Manipur Govt in sing­tangmite buaina toh kisai a pomtheih leh settheih ding kilemna a bawlpihlouh ban ah economic blockade pailel leh an­ti-tribals bill ziak a singtanggam buaina hihvengloupi a singtang­mite luahna bialsung a kitelna neihsawm pen hun hoihpen hi­lou khathei ahihdan leng JAC-AATB in taklang hi.

 

 

 

 

 

 

NEWS TOMKIM

 

Bangalore ah Zomi Nam Ni zang ding

LAMKA, Feb 19: Zingchiang, Feb 20 in mun tuamtuam ah Zomi Nam Ni zatna om ding hi. Hiai toh kisai in Bangalore a Zomi Namni zang ding in zan in Langkhanpau Guite, Chairman, ADCC in Lamka nusia in Bangalore zuan hi. Huailou in, Thanlon Sub- Division sung Leijangphai khua ah leng zingchiang in Zomi Nam Ni zatna om ding a, huai a tel ding khenkhat tuni’n kuankhia uhi.

 

 

Feb 28 in Nurse 5 pension ding

LAMKA, Feb. 19: Hongtung ding Feb. 28, 2017 chiang in Medical department nuai ah nurse 5 pension ding uhi. Amaute ahihleh Hatkho Chongloi, Staff Nurse; Vungkhoniang, Staff Nurse; Dimkhanching, Staff Nurse; Chiinneiching, PHNS; Vungzanem Valte, Joint Director (Nursing) leh Neihkim, Asst Nursing Supdt. hi ua, amaute khakna programme Ccpur District Nurses Assn (CDNA) in Feb. 27, 2017 sunnung dak 1:30 in Lamka Damdawi Inn OPD Hall ah nei ding uhi.

 

 

DEO/Ccpur in theihsakna bawl

LAMKA, Feb 19: DC/DEO, Ccpur in theihsakna a bawlna ah, candidate-te poster leh pamphlet print-na toh kisai a Election Commision of India in zuih dia a bawl dante Ccpur district sung a printing press-te’n zuichiat ding in theisak hi. Huaite ahihleh candidate-te poster leh panphlet print dingte’n printing press min leh print-khiak zah (copy) mun hoihtak a taklang a, poster leh pamphlet ki-print leng ni 3 sung ma ngei a final printing pelut di’n theisak hi.

 

 

News Suty Ding

LAMKA, Feb 19: MHJU Holiday dungzui in, February 20, Zomi Nam Ni ahihman in zingchiang, Feb 20, 2017 in news suty ding hi. Huaiziak in Lamka Post office leng kikhak ding a, Feb 21 a kihong nawn ding ahihman in issue masa Feb 22 in hong suaknawn ding hi.

 

 

SUNNA

Upa G. Paukhanmang (67) s/o (L) Kamzathang of Vengnuam, New Lamka cancer natna ziak in tuni sunnung in si a, zingchiang, Feb 20 in New Lamka YPA hanmual ah kivui ding hi. RIP.

Ms. Lalrovhang @ Nu Rou (67) sis/o (L) Lalchhawn, Hebron Vengm New Lamka zan Feb 18 nitak dak 11:15 vel in si a, tuni’n New Lamka YPA hanmual ah kivui hi. RIP.

 

 

 

 

 

…for more detail : here

 

 

 

 

 

 

 

RELATED

The Lamka Post | February 19, 2017