You are here: HomeRSS FeedsThe Lamka Post

The Lamka Post | February 05, 2018

Monday, 05 February 2018 08:06

Pathian in Naga mipite kigawm kikthak nawnna ding a hun lemchang honpia hiding ahi: CCNTHCO

DIMAPUR, Feb 4: Core Committee of the Nagaland Tribal Hohos and the Civil Organiza­tions (CCNTHCO) in a taklatdan in election neih ma a solution om ding deihna a suaikai political party-te chihtakna kilatna ding in party ticket hawmkhiat leh hawmkhiat louh thu ah hong kilang khe mai ding ahi chi’n taklang uhi. Hiai toh kisai in kuamah ticket pe khe lou ding in force in a ki­sawl kei ding a, himahleh amau khut ah / liangkou ah kinga ding ahi chi’n gen uhi. Hichi bang a ticket hawm­khia a mahni suaikaihna zahtakloute bel solution om ding deihlou mite ahi uhi chi’n gen behlap uhi.

 

CCNTHCO in nasatak in ‘ So­lution before Election chih thupi pansan in na kisem a, mi khenkhat ngaihdan in India constitution zahtaklou ahihkeileh India kivai­hawmna musit chih ahi mai thei, himahleh Nagaland state sung a khosa mite a ding a thil hoih ban ah general tak in India government a ding inleng thil hoih ahi chi’n central a vaihawmte’n a haih kei uh chi’n gen uhi. Solution ahihleh mipite a ding a lemna leh muanna om theihna ding thil ahih ban ah mahni gamsung a khamuangtak a khosak theihna ding thil ahihna ah Naga mipite kiang a gupnampe ding a kichial mah ahi chi’n CCNTHCO makaite’n gen uhi.

 

Huai ban ah Core Committee of the Nagaland Tribal Hohos and the Civil Organizations (CCNTHCO)- te hiai bang pan a lakna pen uh amau panlatu ding ahihkei uh a chi a om mai thei, himahleh kuamah force in gupna pe ding in mi ka chial kei uh, political party ahihkeileh candidate-te kinak sak leng ka sawm kei uh, himahleh solution pen Naga mi teng a ding a thil hoih leh Naga mite sung thu ahihna ah mi malmal inleng mohpuakna kinei chiat ahi chi’n gen uhi. Naga solution in Naga mite kua­mah a khentuam khalou ahih ziak a panla kihizaw ahi chi’n CCNTHCO-te’n gen uhi. A biktak in Naga makai leh Naga mipi ka gam ka iit a chih peuhmah in panlak poimoh ahih ban ah mi khut a kingak kichi pen thil bu kimlou kia hilou in mahni insung a thil niin om pen midangte hong hah­siang sak sang a ei mah in i hah siang a leh hoih zaw leh siang baih zaw ahih lam kuaman i mang ngilh louh ding uh ahi chi’n CCNTHCO thusuak in taklang hi.

 

Kum 70 paisa a kipan India gov­ernment hihna len kha peuhmahte’n Naga Political issue sukvenna ding pen government hon len nawn dingte (next government) khut a ana kikoih gige ahi chi’n gen behlap uhi.

 

Tuabangkal ah Naga in politi­cal talks kum 1960s a pan in round 6 bang neita mahleh thil kikhek leh lamdanna muh ding bangmah om­lou ahihna Naga mite kinepna thawn mun mahmah hi. Tu khang ah Naga makaite toh Central Gov­ernment in solution om theihna ding in ‘ Frame­work Agreement” August 13, 2015 in sign in ana om bawlta ua,

 

Kihoulemna om theihna ding in thu chi­am/ preamble leng Work­ing Committee of Naga National Political Groups (NNPGs)-te toh Novem­ber 17, 2017 a neih ana omta ahi chi’n gen uhi. Huai ban ah Government in kihouna nei ding a chih chiang in active tak in ki­hoh gige a, nialna leng kinei ngeilou ahihna ah political issue pen sukven leh mipite a ding a lemna leh muanna a om hun lo mahmahta ahi chi’n CCNTHCO-te’n gen uhi.

 

Naga mipite kum tamtak sukbuai leh pei lung ap in om ua, namkal buaina leh kikhenzakna tanpha ana tung ahihna ah tu khang a hiai bang thilte a hong tun nawn ding pen khangthakte theih ding a thil zum­huaipi ahih ban ah Naga mipite solutiom om thei­hna ding a, a pankhawm pen uh a lou theilou leh ahi ding mah ahi chi’n gen uhi. Hiai thu ah Naga kichi peuhmahte suakta theilou ding leh kuaman gen leh sak nei theih nawnlou ding mah ahi­hna ua force in “No so­lution, No election” chih toh kisai ah gupna pe ding in kisawl kei le leng mi tamtak in gupna hon piak uh poimoh leh ahi ding him ahi chi’n tak­lang uhi.

 

Hiai toh kisai a Naga mi khat peuh in panlakna nei utlou leh solution omna ding thu a pangkhawm utlou a om ua leh chik mah chiang in zalenna muh ding kinep huai nawn lou kia hilou in, a thuak kha ding kua dang hilou in Naga mi-le-sate mah ahihdan kua peuhmah in theih thak poimoh ahi chi’n gen uhi.

 

Tu hun pen Path­ian in Naga mipite a ding a kigawm kik thak nawn theihna ding a hun lem chang hong piak hid­ing ahi chi’n gen ua, hiai toh kisai in i panmun / pansan ding uh hoihtak piak a ki-om ahih lam Naga mipite’n i theih uh poimoh mahmah ahi chi’n CCNTHCO thusuak in taklang hi. Nagaland Assembly election nei a, a om ngeingei leh Naga issue a venna ding (zalen­na) in kong kimok hawn nawnlou ding ahihna ah “No solution, No Elec­tion” chih pen kua peu­hmah in gupna i piak ua, kithutuaktak a Naga mite i pankhawm uh poimoh mahmah ahi chi’n tak­lang uhi.

 

 

Govt. skulte ah mipite’n muanna leh kinepna neita uh ahi: Radheshyam

Imphal, Feb 4: Educa­tion Minister Thokchom Radhesyam in a gendan in Government skulte ah student tamtak in minkhumna a bawl ban uah sinsaktute hoihtak a skul a kaitak ziak un Government skulte in hoihlam mah nohta ahi chi’n gen hi. Hiai bang a sinlai naupang tamtak in minkhumna a bawl ziak uh ahihleh government skulte ah mipte’n muan­na leh kinepna a neih ziak uh ahi chi’n gen hi.

 

Hiai toh kisai ahi­hleh Minister in Chief Guest hihna toh Govern­ment Primary School, Heirok - II Bazaar a kibawl honkhiatna a neih hun a, a gen ahi. Govern­ment Primary School, Heirok - II Bazaar ah tu academic session a ding in sinlai naupang mi 315-te’n minkhumlut uh ahihdan taklang hi. Th. Radheshyam in a gendan in local bodies, mipi leh sinsaktute skul hoihna ding in kithuahpihna pe zom touzel laiding in chialna bawl a, kim leh kiang a khua omte tan pha inleng a etlah tham ding ua skul hoih a hong suah theihna ding in pan nasatak lak poimoh mahmah ahi chi hi.

 

Skul hoih, skul et­lah tham leh skul quality neih hoihtak a suah thei­hna ding a mohpuakna liantak neite sinlai nau­pangte, nu-le-pate leh sinsaktute ahihdan kua­man i mangngilh louh ding uh ahi chi’n Minister in gen hi.

 

Minister in a gen­zelna ah State Govern­ment in siamna lam khantouhna ding toh kisai a panpih ngai a om leh kithuahpihna pe ding a man sa gige ahihdan gen a, hiai toh kisai in sinsaktute’n leng amau a bang a bawl a sinlai nau­pangte kiang ah sinsakna hoihtak pe ding in ngetna bawl hi.

 

Programme hun ah Nagar Panchayat, Zilla Pari­shad member-te ban ah Headmaster, sinsaktu, sinlai naupangte leh local mi tamtak kihel uh hi’n thusuak in taklang hi.

 

 

UKNA min a ADCC a Rs 50 lakh ngetna petu police in mankhia

LAMKA, Feb 4: United Kuki National Army (UKNA) min a CEO, Autonomous Dis­trict Council (ADC) Cc­pur kiang a sum ngetna (Demand letter) pia khat District Police in zan ni­tak in mankhia uhi.

 

Thutut kingah dan in, ni nih paisa in CEO, ADCC in UKNA min a Rs 50 lakh ngetna a muh dungzui in Police ah report bawl in, po­lice in huai toh kisai in FIR number 6(2)2018 gelhlut ua, demand let­ter kipatna theih hikei mahleh suizuina pan uhi.

 

Huai dungzui in zan, February 3, 2017 zansawtnung in Nguljalen Haokip (37) s/o Tonglam of S. Mol­dung mankhia in, amah a pan demand letter copy a muhkhiak ban uah, amah mah in de­mand letter bawl a print in, post office tungtawn a khak hidan in kipuang a, thudotna neihzom hiding hi’n police a pan thutut kingah hi.

 

District sung a muanna leh bitna hih­buaithei ban ah thagum a sum kinget chihte kuama’n chinglou ding in Rakesh Balwal, IPS, SP Ccpur in ngetna bawl a, huai bang mite koih maimai hilou ding hi’n leng gen hi.

 

 

Feb 22 in YVA-GHQ election om ding

LAMKA, Feb 4: Young Vaiphei Association (YVA) General Headquarters in hongtung ding February 22, 2018 in 2018 a pan 2021 sung vaipaw ding kitelna, General Election 2018 nei ding uhi.

 

General Election ah President leh Vice-Presi­dent tel ding ua, huai ding in February 12, 2018 nitak­lam dak 5 tan in nomination form piaklut theih ding a, February 17, 2018 in scrutiny om ding hi.

 

Nomination fee ahihleh President a ding in Rs. 1,000 leh Vice-President a ding in Rs. 700 hiding a, nomination form ahihleh Th. Joel Phaltual, Red Cross Road kiang ah ngahtheih ding hi.

 

General Election ah YVA GHQ, CEC in Electoral Roll approved a bawl dungzui un voter-te’n vote khet­hei ding ua, vote khe ding peuhmah in government in a issue, ID Card khat a tawi uh ngai ding hi.

 

 

Khuga Battalion in World Cancer Day zatna in Tele Medication Seminar nei

LAMKA, Feb 4: Sixth Sikh Light Infantry (Khuga Battalion) in tuni, February 4, 2018 in Indo- Myanmar International Border a om, Hiang­tam Khunou biakinn ah World Cancer Day zatna in Tele Medication Semi­nar nei uhi.

 

Hiai hun ah Live Streaming tungtawn in mundang a om, cancer leh natna tuamtuam toh kisai a siamna nei doctor-te toh khosung mipite kithuzak tuahsak ua, mipi tamtak in navak huaisa mahmah uh hi’n thutut kingah hi.

 

Hiai hun ah Profes­sor Dr. KL Gupta, MD (Radiotherapy), HoD, Radiotherapy, Sri Aurobindo Medical Collage & PG Institute, Indore, MP leh Dr. Richa Chaudhary, MBBS, MD, KGMU, Lucknow, UP in damtheihna toh kisai in khosung mipite’ hak­saknate hilhchian ua, hiai hun ah kum upa, numei leh naupang, Oncology, Pediatrics, Cardiology leh Gynecology toh kisai buaina a tuahte uh dong tangpi uhi.

 

Hiai hun ah Unit Medical Officer in leng damtheihna toh kisai vantang theih dia poimoh omte Awareness Cam­paign nei a, hiai bang a Khuga Battalion in kho­sung mite’ damtheihna awlmoh a, vai a saina tung ua kipak mahmah uh ahi­hdan gen uhi. Hiangtam Khunou ahihleh Singngat a pan lampi mumal om­lou, Indo-Myanmar In­ternational Border a om hi a, damtheihna leh sia­msinna toh kisai a niam mahmah leh electric tun­louhna khua leng ahi.

 

 

World Cancer Day 2018 zang ding

LAMKA, Feb 4: District Health Society, Ccpur saina in zingchiang, February 5 zingkal dak 8 a pan in World Cancer Day 2018 zatna om ding hi. Hiai toh kisai in zingchiang zingkal dak 8 in Tuibong Forest Gate a pan in Lamka Damdawi Inn tan mara­thon race om ding a, District Hospital OPD Conference Hall ah World Cancer Day 2018 zatna om ding hi.

 

World Cancer Day marathon race ahihleh zingkal dak 8:15 in Tuibong Forest Gate ah Ms. Deepa Balwal in flagged ding a, sunma 9:30 in District Hospital OPD Con­ference Hall ah programme kipan ding hi.

 

Hiai hun ah Dr. Th. Nirpendra, DNO, NCD/Ccpur in vaidawnna thu­gen ding a, Dr. Kimngaihching Simte, CMO/Ccpur in welcome address gen in Ms. Deepa Balwal makaih in ‘Interac­tion with cancer survivors’ om ding hi. Huai ban ah, Shyam Lal Poonia, IAS, DC/Ccpur in thugen ding a, huai zoh in Dr. VC Pau Tonsing, Medical Superin­tendent, District Hospital in kipahthu gen in programme zou ding uhi.

 

 

A/R-te’n Free medical leh dental camp nei

Imphal Feb 4: IGAR (South) nuai a om, 39 Assam Rifles of 28 Sector Assam Rifles-te’n tuni’n Kakching khua ah free medical camp leh dental camp nei uh hi’n thusuak in taklang hi.

 

Hiai hun ah A / R a pan in medical team-te’n sin­sakna nei ua, khosung mi numei 120 leh naupang 21 a kigawm in 210 a kihel uhi.

 

Programme zat hun sung in HIV/AIDS, Malaria leh tui nek sianglou a pan nat om theihte a pan kiven dingdan sinsak uhi.

 

Free medical camp programme zat zoh nung in mipi paikhawmte kiang ah damdoi a thawn in hawm­khiat in om hi.

 

 

MFC, Chennai a selection a kuan dingte khakhia

LAMKA, Feb 4: Mohagany Football Club (MFC), Chennai a dia I-League kimawl ding, Un­der-13 leh Under-15 dia selection bawlna a lohch­ingte final selection mai­tuah ding in tuni, Febru­ary 4, 2018 zingkal dak 7:30 in KSO Administra­tive Office, KIC Complex, Tuibong ah khakkhiak in om uhi.

 

Selection ahihleh KSO Ccpur kithuahpi­hna toh a January 24-25, 2018 in Peace Ground, Tuibong ah om a, Second Round selection tan ah Ccpur a pan Under-13 ah mi 19 leh Under-15 ah mi 18 lohching ua, selection bawl ding in MFC a pan James Singson, Coach hong pai in, KSO Ccpur kithuahpihna toh selec­tion nei uhi.

 

Chennai, Tamil Nadu a Third Round-cum-Final Selection dia kuan dingte Daniel Gangte, President, Kuki Inpi Ccpur (KIC) in dei­hsakna toh khakhia hi. Third Round-cum-Final Selection a kuan mi 37- te makaih ding in KSO Ccpur in mi 4 sawl ua, amaute bel, Letminlen Haokip, Ngamtinkai Khongsai, Jangkhohao leh T. Thangminlen hi uhi.

 

Third Round-cum- Final Selection ahihleh hongtung ding Febru­ary 10 leh 11, 2018 sung Chennai ah nei ding ua, selection a paisuakte Mohagany Football Club toh contract sign in, Mo­hagany Football Club in a siamsinna maban uh a sutzopsak ding ban ah, Football Coaching leng pia in, November 2018 a I-League kimawlna a dia training piak hiding uhi. Selection ah ahihleh Un­der-13 ah mi 164 kihel ua, Under-15 ah mi 132 kihel uhi.

 

 

HPC(D) leh Mizoram state government-te’n Feb. kha sung in peace talk nei ding

AIZAWL, Feb 4: Mizoram State Home department a pan senior official khat in a gendan in, tu kha sung in H. Zo­sangbera makaihna nuai ah Mizoram Government toh Hmar People’s Con­vention (Democratic)- te’n peace talk nei ding uh ahi chi’n tuni’n gen hi.

 

Mizoram Home minister R. Lalzirliana in a gendan in Home department leh concern department-te toh zing chiang Seppatni in Chief Minister makaih in ki­houlimna nei ding uh ahi a chih ban ah peace talk neih hun ding a ni leh a dak genkhawmna nei ding uh ahi chi’n gen hi. Peace talk pen ahihleh ni kum 2017 christmas man a neih ding chi a geel kholh in ana om mahleh buaina khenkhat a om ziak a, a hun ding suan in ana om hi. Peace talk ahihleh political level a kihouna hiding ahi chi’n gen behlap hi.

 

Talk masa ahihleh a paisa August kha 2016 in Aizawl khopi ah Mizoram government leh Zosang­bera makaih HPC(D)- te’n houlimna ana nei ua, ni kum 2017, September kha inleng talk na nung pen nei nawn uhi. Peace talk na nung pen ah kilemna hoihtak toh hun zou uh ahihdan leng tak­lat in om hi.

 

HPC (D)-te’n ahi­hleh Sinlung Hills Devel­opment Council (SHDC) pen Sinlung Hills Council (SHC) a khek ding a state government kiang a nget­na a bawl uh hi a, hiai toh kisai in ni kum 2017 in Memorandum of Settle­ment (MoS) leh Sinlung Hills Council Bill draft bawl a omte palai nihte’n kituak tak in maban sawn theihna ding in phasakna suai ana kai tuak uhi.

 

Kum 1994 in state government in HPC-te toh peace accord ana bawl ua. Himahleh peac accord bawl a om toh kisai lungkimlou pawl khenkhat a om ziak in SHDC, HPC(D) fic­tion hong piangkhia hi. Hiai toh kisai ahihleh Mizoram state a pan separate autonomus dis­trict council ngetna toh kisai hi a, Manipur state toh kigamgitna lam pang teng hidiak hi’n thusuak in taklang hi.

 

 

“ No solution, No Election” chih toh kisai ah NSCN-IM in a tawp tan pha a gupna pe ding ahihdan taklang

DIMAPUR, Feb 4: Naga mipite leh gamsung iitna ziak in election ne­ilou ding, election neih ma a solution om ding chih thu ah, a tawp tan pha a gupna pe ding ka hi uh chi’n NSC-IM-te’n tuni’n thusuah bawl uhi.

 

Hiai toh kisai ahi­hleh “The National So­cialist Council of Nagalim (NSCN)-te’n tuni taklam a, Naga mipite theih ding a thusuah a bawlkhiat uh ahi hi. Press statement a, a taklatdan un, Core Committee(CCNTHCO), saptuam makai, tribal bodies , apex Naga orga­nizations, Naga Hoho, Naga Council Dimapur, Naga Mothers, the Naga Students Federation (NSF), ENPO leh Naga mipite’n “NO solution, No election” chih thupi pansan a pilsiamtak a vai a honhawmna uh pah­huai a sak thu taklang uhi.

 

Huai ban ah Naga mite khangthu a mang ngei nawnlou ding thil thupitak bawlkhiat sawm ihihna uah, NSCN-IM leh Central Government in a paisa August, 3, 2015 a Framwork Agreement a suai a kiahna uh toh kisai ah Pathian leh Naga mip­ite khem a omlou ding ahihdan uh leh NSCN-IM inleng kuamah khemlou ding ahi chi’n taklang uhi.

 

Naga solution om ma a election nei ding kichi Naga mite a ding a thil hi thei hilou ahihdan kitheih chiang mahmah ahihna ah i pankhawm nak ua leh zohlah ding omlou ahi chi’n gen uhi.

 

Huai ban ah NSCN-IM sung a cadre-te’n hiai bang thupukna om pen kalh a gamtang a om ua leh a tung uah action khauhtak lak hiding chi’n NSCN-IM thusuak in tak­lang hi.

 

 

ZNN toh kisai in Joint Artistes Assn makaih in Motivational Road Show om ding

LAMKA, Feb 4: February 20 chiang a, a 70veina Zomi Nam Ni lopna hun Joint Artists Association in nuangth­uap ding uhi. Thutut kingah dan in, February 20, 2018 a Lamka Public Ground, Hangtam Lam­ka a, a 70veina, Zomi Nam Ni lopna ding ah Zomi Nam Ni Celebra­tion, Commitee in Zo­gam Artistes Association (ZAA) khut ah sound, music, video leh la ban ah artistes toh kisai peu­hmah mohpuakna pia hi.

 

Huai toh kiton in, Zomi Nam Ni Celebration Comittee deihna bang in, Manipur a dia sound hoih penpen zat hiding in thupuk ua, huai hun ah gam ngaihla leh u leh nau ki-itna late ban ah nam tuamtuam a pan late kai­khawm in mipite toh la a kithuah khawmna thupi­tak om ding hi.

 

Hiai toh kisai in ZAA makaih in Lamka khopi sung leh a sehvel ah Hmar Artistes Asso­ciation (HAA), Kuki Ar­tistes Progressive Union (KAPU), Mizo Zaimi Inzawm (MZI), Vaiphei Artistes Association (VAA) leh Zou Artistes Union (ZAU) in Unity Campaign neilel uhi.

 

Hiai unity cam­paign ahihleh nam leh pawl a kizoltuah hilou a, hihna kibangchiat kithei­siam leh kizahtuahsiam a, khua-le-tui khat a teng­khawm unau laizomte, pi leh pu suangtu khat i hihdan khangthakte lak a pholhkhiak thak a, ki-itna thukzaw sem a zung a kaih ding deihna hidan in thutut kingah hi.

 

Huai ban ah Joint Artistes Association in maban ah Lamka khopi sung leh a kimvel ah Mo­tivational Road Show thupitak neihsawm in panla lel ua, hiai toh kisai in hongtung ding Febru­ary 10, 2018 in Kangvai, Tuibong , Rengkai leh Hiangtam Lamka ah Motivational Road Show nei ding ua, February 14, 2018 in Mata, Pearson­mun/Bungmual, New Lamka leh Salem Veng, Central Lamka ah nein­awn in, February 13-17 sung YPA-GHQ Hall, Hiangtam Lamka ah Artistes-te leh Musician-te’n practice session nei ding uhi.

 

Hiai ding toh kisai a YPA-GHQ in YPA-GHQ Hall zat dia a phalsak ziak in Joint Artistes Associa­tion in kipahthu gen ua, Motivational Road Show hun a kuapeuh in kithu­ahpih ding in ngen uhi.

 

 

Childline toh kisai meeting om ding

LAMKA, Feb 4: Hongtung ding February 6, 2018 sunma dak 10:30 in DC Office Chamber ah Childline toh kisai meeting om ding hi. Hiai hun ah district sung a pan a kisai khakpihte tel dia theihsak hi ua, hiai hun ah Childline 1098 Toll Free Service, District sung a bawlkhiak dingdan toh kisai genkhawm ding uhi.

 

 

Class 10 exam dingte NAS exam

LAMKA, Feb 4: Tu kum a Board of Secondary Edu­cation Manipur nuai a Class 10 exam ding student-te tuni, February 4, 2018 sunma dak 10 a pan in exam centre tuamtuam ah National Achievement Survey (NAS) exam uhi. NAS exam toh kisai in Ccpur district ah school 67 om a, huai ah Class 10 exam ding student 3479 om a, amaute enkaitu (field investigator) ding mi 147 guan in om hi. Pherzawl district ah NAS exam ding school 6 a pan Class 10 exam ding student 135-te Phungkhothang Govt High School ah exam ua, Field Investigator 3 in enkai uhi.

 

 

J&K a Rajouri a LoC dung a Pak-te thau khahna ah sepaih 4 thah in om

NEW DELHI, Feb 4: Jammu and Kashmir’s Rajouri district sung Line of Control (LoC) dung a, tuni Pathi­anni zinglam dak 11 vel a kipan Pakistan-te thaukhahna ah Army personnel 4 thah in om ua, midang 1 naktak in liam hi.

 

Pakistan sepaihte’n Rajouri district sung Bhimber Gali sector a hiamkham bohsia in, In­dia sepaihte panmunte ah thau nasatak khah­khum ua, hiai hiam­kham bohsiatna ah offi­cer khat, Captain Kapil Kundu leh sepaih dang 3 - Rifleman Ramavatar, Rifleman Subham Singh leh Havaldar Roshan Lal –te’n a hinna uh taan uhi. Army-te’n khauhtak in thukkik ua, tutan a ki­kaptuah lai uh hidan in senior army official in gen hi.

 

Tuni zingtung lam a, Pakistan army-te’n Poonch leh Rajouri district a forward post leh khotate tum a, thau a khahna uah sepaih khat leng nautang 2 in liamna tuak uhi. Liamna tuak nautang 2te ahihleh Shahnaz Bano (15) leh Yasin Arif (14), r/o Is­lamabad khua hidan in police official in gen hi. Tu in a nih un hospital ah etkol in om uhi.

 

Defence thu­puangtu in a gendan in, Pakistan Army-te’n thauneu, automatics leh bomb kapnate zang in thagum in thau khah masa ua, hiai nung sawt­lou in Indian Army-te’n a kituahpih bang khauhtak in kapthuk uh chi’n gen hi. Tukum sung in, Jam­mu region a LoC leh In­ternational Border dung a, thau kikhahkhumna a neihna uah, tuni a sihna tuakte toh sim in, secu­rity personnel 9 te in mi 17 thah hita uhi.

 

 

Niangkhanngai khakna nei ding

LAMKA, Feb 4: Saptuam dan siangthou a Mr T Khamkhansiam s/o (L) T Thangdong & Zamngaih­niang, Jamsuan Road, Zion Veng, New Lamka toh kiteng ding Miss M Niangkhanngai Guite d/o M Thangchinkham Guite & Nianzavung of Sahei Road, New Lamka, khakna hongtung ding February 9, 2018 sunnung dak 1 in Simte Inn, Simveng ah nei ding uhi.

 

 

Ropiang Foundation in branded jacket hawm ding

LAMKA, Jan 29: Ropiang Foundation Trust in mipi nasepna sunzom tou zel in, Clothes Box Foundation toh pan­gkhawm in Royal Enfield jacket 80 a thawn in Lam­ka ah hawm ding uhi.

 

Hiai jacket tangthei ding in family income Rs 50,000 nuai ahih ngai ding a, jacket sang theih­na ding in tagah (prphan), nu leh pa taihsan, zou­dawn singtangpa, physi­cally handicapped leh niteng nektawm zongte hiding a, jacket ahihleh 80 hawmkhiak masak hiding hi.

 

Hiai toh kisai a lunglutna neite’n Ropi­ang Foundation Office, 226-Mission Road ah February 8, 2018 tan in form la in piaklut theih ding hi. Ropiang Foun­dation a pan thutut kingahdan in, jacket-te quality hoih mahmah a, mineizoute lei dia le mantam mahmah pawl hi a, Ropiang Foundation in mizawng-leh-poimohte kiang ah a piak ding uh ahihdan gen uhi.

 

Lunglutna neite’n email rftchairman@ya­hoo.com tungtawn inleng dottheih ding a, form leng submit theih ding a, thu­chian zaw theinuamte’n Lalgoumang Guite, Sec­retary, Ropiang Foun­dation, contact number 883-728-6507 ahihkeileh Zammuanlal Guite, As­sistant Secretary, Ropi­ang Foundation, contact number 879-402-5196 ah kanchet theih ding hi.

 

 

7 Days Crafts Exhibition om ding

LAMKA, Feb 4: Manipur Handlooms & Handicraft Development Corporation (MHHDC) saina in hong­tung ding March 13-19, 2018 sung Urban Haat, Nila­kuthi, Imphal East ah ‘7 Dayd Crafts Exhibition of Border Villages of Manipur’ kichi om ding hi. Ccpur district a pan handloom toh kisai a lunglutna neite’n Project Manager (Handloom), District Handloom & Textiles, Ccpur kiang ah February 20, 2018 tan in kin­getna piaktheih ding hi. Hiai hun a telte ahihleh gov­ernment in free stall pe ding a, TA leh tunna ban ah nek-le-tak sensak ding hi.

 

 

Dalai Lama in Sikkim khopi a veh­na ding toh kisai cancel in om

Gangtok Feb 4: Tibetan spiritual leader, Dalai Lama’s in Sikkim khopi a vehna ding toh kisai in doctor-te thupiak dungzui in cancel thak hi’n thusuak in taklang hi.

 

Dalaima ahihleh a hong tung ding March 20 a pan 29 tan Sikkim khopi phak sawm hi a, a damtheihna a hoih louh ziak in doctor-te’n mun vot gam a hoh theihlou ding a, a gen ziak un taw­pkik ding a thupukna la ahi hi.

 

Hiai toh kisai ahi­hleh Dalai Lama secre­tary Tenzin Taklha in mail tungtawn a Sikkim’s Ecclesiastical Affairs Sec­retary Samten Dolma kiang a, a khak ahihdan thusuak in taklang hi.

 

Gujarat Panchayat Polls ah vote khia 73% val, Sepnawnni in Results puan hi ding

AHMEDABAD, Feb 4: Gujarat state pumpi a village panchayat 1. 145 vel ah tuni Pathianni in thovengtak in vote khiak in om a, Sepnawnni chiang in result puan hi ding hi.

 

Nitaklam dak 4 tan in vote khe zah 73% vel tungzou a, percent bang­zah hiam in khangtou lai ding chi’n State Election Commission official in gen hi. Gujarat Panchay­at Polls ah vote khethei ding voter 22. 5 lakh val pha hi. Khua khenkhat in kithutuak a sarpanch leh ward member ding a tel khit nung un, village Pan­chayat 218te “Samras” in puan in om uhi.

 

Chhota Udepur dis­trict a khua khat a can­didate-te’n EVM a kipan election symbol-te mang hidan a complaint abawl nung un, booth khat a vote khiak ding suspend in om hi. SEC official in a gendan in, hiai booth ah zingchi­ang Seppatni in repoll neih hi ding chi’n gen hi.

 

 

 

 

 

 

…for more detail : here