You are here: HomeRSS FeedsThe Lamka Post

The Lamka Post | December 15, 2017

Friday, 15 December 2017 10:26

Parliament winter session kipan ding

All-party meeting om; PM in party tengteng kiang ah kithuahpih chiat di’n ngen

NEW DELHI, Dec 14: Zingchiang Sintawpni (Dec.15) a Parliament winter session a kipat ding toh kiton in, tuni Ningani in Modi makaih government in Parlia­ment Library ah all-party meeting sam hi.

 

All-party meeting ah, Govt in Paliament Inpi nih a lamzangtak a vaihawmna a om thei­hna ding in, political party tengteng kiang ah kithuahpih chiat ding in ngen a, thubuai khatpeuh genkhawm ding a mansa a om uh hidan inleng tak­lang hi.

 

All-party meeting zoh a Parliamentary Af­fairs Minister Ananth Kumar in thuthaksaite kiang a, a gendan in, ses­sion gahsuang hiding a bawlna ding in PM Modi in kuapeuh kithuahpi­hna ngen chi’n gen hi. Mr Modi in tuni a gov­ernment in khantouhna ding a hun kiningching a ngahtheihna ding a, Par­liament leh state assem­bly poll-te neih ton ding thu toh kisai leng taklat in nei hi.

 

Congress makai Ghulam Nabi Azad in a gendan in, session hun suktomna thu toh kisai, Prime Minister lui Dr Manmohan Singh kalh a PM Modi kampaute leh a dangdang ban ah BJP makaite’n model of conduct bohsiatna a nei­hte uh opposition-te’n tangkoupih ding uh chi’n gen hi.

 

Tuni a all-party meeting ah Home Min­ister Rajnath Singh, Mu­layam Singh Yadav of Samajwadi Party, Mohd. Saleem of CPI(M) leh a dangdangte leng tel uhi. Parliament Inpi nih in lamzang a vaihawmna a neihtheihna ding a, po­litical party-te kithuahpi­hna ngen ding in, session kuan teng in all party meeting sap in om sek hi.

 

Lok Sabha Speaker Sumitra Mahajan inleng Inpi a vaihawmna lam­zangtak a neih dingdan toh kisai genkhawm ding in tuni mah in po­litical party tuamtuam a floor makaite meeting neihpih hi.

 

Hiai meeting ma in, opposition party-te’n leng thubuai tuamtuam a government nawk ding­dan toh kisai genkhawm ding in, a tuam in meet­ing nei uhi. Opposition-te meeting neihna hun ah Mallikarjun Kharge of Congress, Farooq Abdul­lah of National Confer­ence, Derek O’ Brien of TMC, D Raja of CPI leh Jai Prakash Narayan Ya­dav of RJD tel in makai dangdangte tel uhi.

 

Parliament winter session a hihleh Decem­ber 15 a kipan January 5, 2018 tan neih hi ding hi. Winter session sung in working days 14 om ding hi. Session sung in, December 25 leh 26 –te Christmas holidays hi ding uhi. Government in winter session sung a ngaihtuah leh pass ding in Bill 25 taklat in nei a, luikhiak, ngaihtuah leh pass ding in bill 14 koihtuam in om uhi. Bill khat zukkik ding inleng taklat in om hi. Nikum in, winter session No­vember 16 in kipan a, sitting 22 toh December 16 in beisiang hi.

 

 

NHPC Chairman in Manipur CM kimuhpih

Imphal Dec 14: Chairman and Managing Director (CMD) of NHPC Ltd. Balraj Joshi in CM’s Secretariat ah tuni’n Chief Minister N.Biren Singh toh houlimna nei uh hi’n thusuak in taklang hi.

 

Huai ban ah Renuka Kumar, Director, Ministry of Power leh Arun Kumar Misra, Executive Director (Planning)-te’n CM secretariat a kihoulimna neih hun in Joshi kithuahpihna pia in zui uhi.

 

Houlimna neih hun in Loktak Downstream Project leh Loktak Power Station-te tungtang genkhawm uh ahihdan thusuak in taklang hi. Joshi team-te’n CM a kimuhpih nung uh sawtlou in Chief Secretary R.R. Rashmi inleng CM kimuhpih ahihdan taklat in om hi.

 

 

JAC in Imphal-Dimapur highway ah indefinite bandh bawl sawm

Imphal, Dec 14: Apaisa November 21 a santro car khat in a phutlup hidia muanmoh Khuraijam Sachin sihna toh kisai a JAC kiphutkhia-te’n tuni’n Tendong­yang khua ah sit-in-protest nei uh hi’n thusuak in tak­lang hi.

 

Kiphinna neih hun a JAC convenor Gouramani in a gen dan in Khuraijam Sachin phutlup ahih nung a gari neitu in a taisan ziak in police-te kiang ah Decem­ber 18 ma ngei a gari neitu leh driver mankhe ding in ngetna bawl uhi. Hiai toh kisai in hun chiam piak ahih sung a gari leh driver matkhiat ahihkei aleh December ni 19 a kipan NH-102, Imphal-Dimapur lampi ah in­definite bandh bawl ding uh ahihdan taklang hi.

 

 

DC/Ccpur in Behiang pha

LAMKA, Dec. 14: Manipur Chief Minister N Biren in December 19, 2017 chiang a Behiang a phakna ding toh kisai enkhia in tuni’n Shyam Lal Poonia, IAS, DC/ Ccpur in Behiang va pha hi. Chief Minister ahihleh, Zo Gal Centenary Commemoration zatna Dec 19 chiang a om ding a chief guest a pang ding hi a, hiai hun ah Behiang Police Station leng hongkhe ngal ding hi.

 

 

PCI(R) General Assembly-cum- PWF Conference 2017 nei

LAMKA, Dec 14: Presbyterian Women Fel­lowship PWF in ‘Pathian batpih siangthouna silh un’ chih thupi zang a, De­cember 13 a pan 17 sung Rayburn high School campus ah a 34veina General Assembly-cum- PWF Conference 2017 a neih uh tuni sun hun in kidemna nei uhi.

 

A 34 veina Gen­eral Assembly-cum-PWF Conference 2017 ahihleh zan December 13 nitak kikhop hun ah Elder Langkhanpau Guite, Gen­eral Assembly Moderator in hongkhia a, Zamkhan­niang, President PWFJCC in vaidawnna thugen in, Rev H Chinthiansong, Coordinator Ministries in Presbyterian Women Fellowship PWF Central Volume III hongkhia in Pathian min in laan in Pastor K Dongkhankhup hunkhak hi.

 

Khawmpi hunsung in Rev Khenpi Tombing, Chief Coordinator PCI R, Rev H Chinthian­song, Coordinator Min­istries leh Chiinhoihkim, M Div in thupi zang in thugen ding ua, Rev G Pau Muanthang, Princi­pal Reformed Bible Insti­tute, PCI(R) in devotion makaih ding hi.

 

Chingboi Tombing, Clinical Phychologist, Nemy Tombing, Clinic Phychologist, Mercy Ch­ingnunhoih Counseling Phychologist leh Rithan­glian Tombing, Director Agape Acts in seminar makaih ding uhi.

 

Tuni December 14 sunma hun Pathian thu leh la in kitaitehna nei ua, hiai hun ah solo, debate, trio, extempore speech leh recitation chihte in kidemna nei ua, nitak kikhopna hun ah Rev M Khamlianmang, Coordi­nator Institutions in se­nior citizen-te pahtawina leh thumsakna nei hi.

 

Singchiang Decem­ber 15 sun hun ah mono­logue, duet, quartet leh lapawlpi kitaitehna nei ding ua, sun dak 10 in Rayburn Church Audito­rium ah palaite’n General Assembly nei ding uhi.

 

December 17 nitak kikhop hun ah contest department in khawmpi hun sung a kitaitehna chituamtuam a kipah­mante kawmkhe ding ua, Elder Langkhanpau Guite, General Assembly Moderator in a 34veina General Assembly-cum- PWF Conference 2017 khak ding hi.

 

Presbyterian Church of India-Re­formed nuai ah India gamsung ah saptuam 55 om a, huailak ah North India ah Presbytery 10 om in, South India ah Presbytery 27 ban ah Presbytery dang 7 om a, Elder kigawm 250 om in, Deacon 157 om hi. Tu kum December 8, 2017 in Guwahati a Songpur Mis­sion Field thak honkhiak ahih toh kiton in tulel in missionary 30 om hi.

 

 

UNC in Manipur Commando-te kiang ah ngetna bawl

SENAPATI, DEC 14: Manipur police commando leh Para-military force / Army personnel-te’n Chandel leh Khoupum kim lak a tu Christmas kuan a mipite su pa­tau theih ding a gamtatna a neih ziak un United Naga Council (UNC) in mohpaih thu puang uh hi’n thusuak in taklang hi. UNC thusuak in a taklat zelna ah Chan­del leh Khoupum kim lak a lemna leh muanna om pen subuai uh ahi chi’n taklang uhi.

 

Manipur police commando-te’n Chandel kim lak a frisking leh mipite su patau theih ding thil tuamtuam a hihte un Naga gamsung leng hon deng kha ahi a chih ban uah sahkhua zahtak louhna chih khat ahi chi’n taklang uhi.

 

Hiai toh kisai in Naga body-te’n Commando-te Chandel leh a sehvel a kipan kihemkhe ding in ngetna bawl uh a, ngetna ngaisak lou a gamtang leh a kihemkhiat ut kei ualeh Naga mite simmohna ahi chi’a kila ding ahih ban ah UNC kigolh ding ahi chi’n thusuah bawl uhi.

 

Huai ban ah UNC in Tousem khua (Tamen­glong district) a Kaimai Baptist Church com­pound sung a Assam Rifles ki-camp-te leng a omna ua kipan kihemkhe ding in ngetna bawl ngal uhi.

 

Hiai toh kisai in Kaimai kho hausa-te’n leng Assam Rifle-te ki­ang ah kihemkhe ding in ngetna ana bawl ngei­ta uhi. Kaimai Baptist Church compound sung a ki-camp-te ahihleh 13 and 23 Assam Rifles-te hi uhi.

 

Kaimai kho mite deihna bang a UNC in tuni’a Assam Rifles-te a omna mun ua kipan ki­hemkhe ding a ngetna a bawl uh hidan in thusuak in taklang hi.

 

 

Footballer Seiminlen Doungel in zi nei ding

LAMKA, Dec 14: amka khopi sung kia hilou in Ma­nipur leh India pumpi’n a ngaihsang mahmah uh foot­baller Seiminlen Doungel leh Miss Tingneilhing d/o Mrs & Mr. Seisat Chongloi, hongtung ding January 12, 2018 sunma dak 11 in Bunglung Baptist Church ah Rev. Bonney Kamkhosat Kilong, Executive Secy, CBCA in saptuam dan in kitengsak ding hi.

 

Seiminlen Doungel ahihleh Mr. Thangminlen Doungel leh Mrs. Neijahoi Doungel tapa hi a, JCT Academy Punjab U-19 I League 2011 ah pang a, West Bengal Club 2011-2014, Shillong Laijong, 2014-2015; Bengaluru FC 2015-2017; ISL ah North East United FC 2014; Delhi Dynamos 2015; 2014 in Indian Fooball Team represent; South Korea ah 2014 Asian Games ah India ai-oh in kimawl a, tulel in North East United FC ah om in kimawl lel hi.

 

A zi ding, Tingneil­hing Chongloi ahihleh Medziphema, Nagaland a om Seisat Chongloi leh Nemkhovei Chongloi tanu naupangpen hi a, North In­dia Institute of Post Gradu­ate Theological Sutdies (NIIPGTS) ah Master of Theology (M.Th) zou a, tu­lel in KCC, Nagaland nuai ah Evangelist and Christian Education Deptt Secretary dinmun lenlel hi.

 

 

Transfer & Posting of MCS

1. Ms. Lalthazam, MCS, AC to DC/CCpur & BDO/SDO Saikot as SDO/BDO Saikot

2. Shri Ksh Sidharth, MCS, AC to DC/Chandel & SDO/BDO Chandel as SDO/BDO Chandel

3. Shri Thangboi Gangte MCS, SDO/BDO/CCpur & SDO/BDO Vangai Range as SDO/BDO/CCpur

4. Shri N Leisan, MCS, SDO/BDO Willong & SDO/BDO Purul as SDO/BDO Purul

5. Shri N. Shokhongam Baite, MCS, SDO/BDO Khengjoy & SDO/BDO Khangbarrol as SDO/BDO Khengjoy

6. Md Asghar Arzad, MCS, SDO/BDO/Haochong & SDO/BDO Noney as SDO/BDO Haochong

7. Md Maulat Khan, MCS, SDO/Patsoi as SDO/Patsoi & BDO/ Imphal West-I

8. Shri K Rajendro Singh, MCS, BDO/Imphal West-I as AO/ Com & Industries

9. Hanjabam Bobby Sharma, MCS, On completion of training AC to DC/Kangpokpi

10. Loktomber Leander, MCS, On completion of training AC to DC/Chandel

11. Shenyai Leima Angom, MCVS, On completion of training AC to DC Imphal East

12. Khwairakpam Tompok Singh, MCS, On completion of train­ing as SDO/BDO Willong

13. Robert Longjam, MCS, On completion of training as SDO/ BDO Noney

14. Binita Ngangbam, MCS, On completion of training as AC to DC/Thoubal

15. Teresa Tangpua, MCS, On completion of training as SDO/ BDO T Waichong

16. Paotinsei Kipgen, MCS On completion of training as SDO/ BDO/Vangai range

17. Linda Ningombam, MCS On completion of training as AC to DC/Bishenpur

18. Lianminthangh Samte, MCS, On completion of training as SDO/BDO Suangdoh

19. Mohammed Gayasuddin Khan, MCS On completion of training as AC to DC/Senapati

20. T. Khaiminlal Haokip, MCS On completion of training as SDO/BDO Khangbarol

21. T. Josepth Lhungdim, MCS, On completion of training as AC to DC Ukhrul

 

 

Numei 1 in Diesel Auto service

LAMKA, Dec14: Lamka adia masapen ding in Mrs. Rohluopui of Muolvaiphei in Diesel Auto service hi. Aman Muolvaiphei apan Rengkai Road tan ah service a, tuni tan adia Lamka khua ah Numei Deasel Auto hek a Service masa pen hilai ding hi.

 

 

Chura-Sugnu Road ‘one lane’ hiding

LAMKA, Dec 14: T Jangkhongam Haokip, Executive Engineer, Cc­pur Division in tuni a press release a suahna ah Lamka-Sugnu Road, Lamka Police station a pan Sugnu lei tan puahna pailel ahihman in nasep hattak a, a pai theihna ding in Lamka-Sugnu Road zohsiang ahihma teng ‘one lane’ hiding a, hiai ziak a lemchan­louhna tuamtuam omte mipite’n ana theisiam ding in ngen hi.

 

Thusuak in a tak­latna ah, hiai lampi ahi­hleh December 2019 tan a zohsiang ding chih hi a, hiai hun sung a zohsiang ahih theih ngeina ding in a totkhak kho mipite, hausa tuamtuamte leh NGO tuamtuamte’n kith­uahpihna ana pe ding in leng ngen hi.

 

Tuabangkal ah, Lamka Police Station zero point a pan Lamka- Sugnu Road bawlna ahihleh bi­altu MLA Ginsuanhau, Chairman, MANIREDA in a honkhiak toh kiton a nasep pat a om hi a, tuni­tan in nasemtute’n zero point Lamka Police Sta­tion a pan in Muolvaiphei leh Saikot kikal a Children Home tan balu single sung in levelling bawlta uhi.

 

 

Kholmun Youth Club in Golden Jubilee lawm

LAMKA, Dec 14: Kholmun Youth Club (KYC) kiphuhkhiaknung a kum 50 chinna tuni, December 14, 2017 in Kholmun khua ah zat in om hi. Hiai hun zatna TN Haokip, MLA 59 Saikot Assembly Constituency leh President, MPCC in chief guest hihna toh uap a, Khaipao Haokip, Chairman, ADCC in functional present hihna toh uap in, DK Thangboi Haokip, CEO Kangpok­pi, Letkhokam Haokip, Chief of Kholmun, Seik­hojang Kipgen, Founder Member leh Paokholun Haokip, Founder Mem­ber in Chief Host hihna toh uap uhi.

 

Functional Presi­dent Khaipao Haokip in hiai hun ah, hundang in SDO office om ziak a Chiengkon leh Head­quarter Veng-te sepna mu tam chi a kigen pen, tua Kholmun a SDO of­fice khat omta ahihna ah, kimawlna kia hilou a, sepna muhna lam a leng Kholmun khomite lam-etna liantak nei ahihdan gen a, ADC fund zang a Kholmun a Rs 30 lakh zang a a Hall khat bawl­sak ding ahihdan gen hi. Huai ban ah mipi kikhop­na khatpeuh a zattheih ding, Government sawk­lou a mipi pangkhawm a Jubilee min manglouhna dia Salbung a kibawl bangbang Gallery khat bawlkhiak ding proposal bawl in huai dia amah leng Rs. 2 lakh a pang ding ahihdan gen hi.

 

Chief Guest TN Haokip in hiai hun ah KYC mohpuak siamsin­na dopsang a, khosung siangthouna etkai ding leh khangthakte thudik a makaih ding ahi chi hi. Silver Jubilee a pan Gold­en Jubilee zangthei leh huai a pan Diamond Ju­bilee tanpha a khangthak, lam tuamtuam a sepna muthakte chiamteh a pahtawina piak poimoh ahihdan gen hi. KYC in Golden Jubilee mul­muthei ahihtak toh kiton a tuasang a khantouhna toh kisai naksem a panla dia hasuan in, tuni chiang a panlaknate uh kipahpih mahmah ahihdan gen hi.

 

Hunpi zatna kipat­ma in Chief Guest in Jubilee suangphuh hongkhia a, pengkul mutna leh Jubilee dakpi khetna om ban ah pu-pa la in Jubilee lasakna leh laamna om hi. Pastor (Retd.) Kamkhosei in Ju­bilee Suang siansuah hi.

 

Chief Host, Letkho­kam, Chief of Kholmun in Jubilee Ballon khah­khia in hunpi zatna kipan hi. Hiai hun Nehminlal, Joint Secretary, KYC leh Hoineivah, Secretary, Women Wing, KYC in makaih ua, Upa Letkho­jam in thumna a hun pan in, Nehkhohao Haokip, President, KYC a pan vaidawn thugenna om hi.

 

Jubilee Choir-te’n Jubilee Anthem sa ua, Doujapao Haokip, Sec­retary, KYC a pan report a om ban ah makai masa muallian sate sunna hun makaih in, Chief Host, Letkhokam Haokip, Chief of Kholmun a pan thugenna om hi.

 

Functional Presi­dent, Khaipao Haokip in Jubilee Souvenir hongkh­ia in thugen a, Chief Host, Seijang Kipgen, Founder Member a pan thugenna om in, Chief Host, Paok­holun Haokip, Founder Member leh DK Thangboi Haokip a pan thugenna omnawn hi. Tua zoh in Khupjangam, Executive Member, KYC in kipahthu gen in, Upa Paokhojang in thumna in hunkhak hi.

 

Kholmun Youth Club ahihleh December 14, 1967 a phuhkhiak a om hi a, 1985 kum in de­funct mahleh (L) Thang­sei leh Letkhokam Ha­okip, Chief of Kholmun in dinthak ua, December 14, 1992 a Silver Jubilee lop a om in, March 16, 1997 a KKL Unit phuhkhiak ahih toh kiton in khotang ah panpih ngaite panpih in, khosung siangthouna chihte enkai uhi.

 

KYC in siamsinte hanthawnna dia kum­teng a Freshers’ Felici­tation hun a zatpih ban uah, 2008 kum a pan An­nual Sports, SK Tourna­ment kichi neitou zel uhi. Diamond Jubilee lopna dia Hausapu’n Bawngtal liantak a thoh paikhawm mipi’n nekhawm uhi.

 

 

Comedian Hunt 2017 Grand Finale om ding

LAMKA, Dec 14: Lamka Core saina a Comedian Hunt 2017 (Chapter 1) neih a om paitou zel in Decem­ber 16m 2017 nitak dak 5:30 in YPA-GHQ Hall, Hi­angtam Lamka ah ‘Grand Finale’ om ding hi.

 

 

Suangdoh ah free Aadhar Enrolment camp om

LAMKA, Dec14: SDO/Suangdoh area ah khua tamtak in Aadhar Card a neihlouh ziak un Government apan ham­phatna tuamtuam omte ngah theilou dia a om ziak un Dec. 12, 2017 apan in Aadhar Enrolment team kuantou in Suangdoh khua ah ki-camp uhi.

 

Huai ah SDO/ Singngat staff Jamkhan­pau, Head Lambu leh Manorjit, Peon makaih in Aadhar Enrolment Agents Salam Sadhikanta Singh, (EA Supervisor), Keior Singh-te kuan in Dec 13 apan Aadhar lak­na pan ua, hiai ni in mi 150 lazou uhi.

 

Aadhar lakna zang­khai zawk semna ding in routine bawl ua, tuni’n Enpum, Lungthul E la ua, Dec. 15, 2017 ni’n Lungchin la ding ua, Dec. 16, 2017 ni’n Tuikuimual­lum, Ngaljang, Pakmual, Hangsum leh Tuima­jang la ding uhi. Dec. 17, 2017 ni’n Lungthul T, G. Bualjang, Tuilakjang, Si­albu la ding ua, Dec. 18, ni’n Chiangpi, Doupau, C. Tuiveljang, Mong­ken, Maukot leh Mualjin khuate la ding uhi.

 

Tutung in SDO/ Suangdoh nuai a khua 19 te ah Aadhar Card a ding lem kila ua, Mani­pur Cabinet in kum 2016 a bawlkhiak SDO Suang­doh ah staff kiningching a koih hun mahmah chih thutut leng kingah hi.

 

 

EBCC Vengnuam Biakinn thak hongkhia

LAMKA, Dec 14: Evangelical Baptist Con­vention Church, Veng­nuam, New Lamka in biakinn thak a bawl uh luahtheih dia zohsiang ahihtoh tuni suma dak 11 in honna leh latna om hi. Hiai hun Pastor T Song­khanthang, Local Pas­tor EBCC Vengnuam in makaih a, Rev S Ginzam in thumna a hun pan in Rev S Vung Minthang, General Secretary, EBC in biakinn hong a, bia­kinn sung ah thu kidawng simna om a, Rev S Vung Minthang, General Sec­retary, EBC in biakinn chabi Tualsung Upa Committee khut ah pe­khia in honkhiak thak a om EBCC Vengnuam bia­kinn thak Pathian min in laan hi.

 

Upa S Lalngail­ian, Chairman Tualsung Baptist Saptuam Upa Committee in vaidawn­na thu gen a, Tualsung Building Committee a pan biakinn bawlna toh kisai report tomkim om hi. Rev Paukhanmang Guite, Director of Min­istries in Pathian thutak gen a, Upa G Kamkhan­zam, Vice Chairman TB­SUC in kipahthu gen in, Rev V Nenglian, DS/EBC Lamka South Divisoin in hunkhak hi.

 

EBCC Vengnuam ahihleh EBC Lamka South Division nuai a saptuam khat hiding in March 24, 1996 in biakinn bawlna ding in Rev Dr G Hatlang in suangphum phum in, August 11, 1996 in Rev S Ginjam, DS Lamka South Division EBC in hong­khia a, biakinn thak bawl nawnna ding in, February 13, 2012 in Retired Rev S Ginjam in suangphum phum nawn hi. Tuni De­cember 14, 2017 in Rev S Vung minthang, General Secretary EBC in biakinn thak hong in Pathian min in laan hi.

 

Tuni a honkhiak a om Vengnuam EBCC biakinn thak ahihleh Rs 1,26,74,539 bei a bawl a om hidan in thutut kingah hi.

 

 

ZYA Unit-te’n social work nei ding

LAMKA, Dec 14: December 16, 2017 (Kiginni) chi­ang in Zomi Youth Association Lungthul-D, Lungthul- L, Lungthul-T, Bualjang, Tuilak, Sialbu leh Tuima in Suangdoh a pan in electric gui paina hahsiang in joint social work nei ding uhi. Hiai social work ahihleh electric hoihtak a, a paitheihna ding deihna ahihziak in ZYA unit chih in ngai poimoh ding in ZYA block makaite’n ngetna leh theihsakna bawl uhi.

 

 

Panpihna ankuang lui ding

LAMKA, Dec 14: EBCC/Mission Compound in hon­gtung ding December 18, 2017 sunnung dak 2-5 kikal in Mission CES Compound, Mission Compound ah panpi­hna ankuang lui ding uhi. Hiai panpihna ankuang ahi­hleh January 10-13, 2018 sung Makai Camp a neihna ding uh project hi a, kho tawmchik ahihna uah kuapeuh in hiai ankuan va-umpih ding in ngen uhi.

 

 

Awllen Goulsiek, 2017 Football final match nei

LAMKA, Dec 14: Awllen Guolnuom Or­ganizing Committee 2017, YMA Chiengkawn branch siana in D Phail­ian Ground ah a 15-veina Awllen Goulsiek, 2017 Football match kimawlna tuni December 14 sunma dak 10:30 in final match om hi.

 

Hiai hun H Timmy Gangte, Chief Manager, State Bank of india, SBI in chief guest hihna toh uap a, Doutong Haokip, Principal, St John School, D Phailien in guest of honour leh Dongkholal K Gangte, President, MPC Chiengkawn Unit in functional president hi­hna toh uap hi.

 

Hiai hun zatna P Mangkholien, Member, Awllen Organizing Com­mittee in makaih a, Upa Henkhosoi, Chairman, ESC Ebenezer Chapel in hun hong in, Khaikinlal, President, YMA Chiang­kongpang Branch in vaid­awnna thugen in, Sports incharge in Guolsiek nei­hna toh kisai gen hi.

 

Hun zatsung in khualliante a pan thu­genna om a, Ngamlien­sang, Secretary, Awllen Organizing committee in kipahthugen in, kimawl­na kipan hi. Hiai hun ah Chiengkawn Veteran leh L Phainuom Veteran in exhibition match nei ua, final match ah Colony FC leh Gangte Geng Branch-te kimawl uhi.

 

YMA Chiengkawn branch in ahihleh kip­ollimna ding in Awllen Goulsiek kichi kum 15 paisa a pan zangtou ua, football match ahihleh a nihna ding in tu kum October 28, 2017 in pan ua, hiai hun ah football team, club 16 kihel ua, De­cember 12 in team 12 in semi final nei ua, tuni a, a 15-veina Awllen Goulsiek, 2017 hunkhakna leh final match kimawlna hun ah Colony FC leh Gangte Geng Branch-te kimawl uhi.

 

A 15-veina Awllen Goulsiek, 2017 hunpi zat­na ahihleh December 28 a pan Don Bosco Higher Secondary School, Salem Veng ah nei ding ua, ni­tak hun ahihleh Chieng­khawn Community hall ah kitaitehna chituamtu­am zang ding uhi.

 

 

Lungkuai Café hongkhiak in om

LAMKA, Dec 14: Nungak leh tangvalte a ding a cold drink leh nektheih chituamtuam omna Lungkuai Café kichi Tedim Road a pan Nghathal road pialsukna bul ah zan, December 13 zinglam dak 7:30 in Upa Pumza­hang in hongkhia hi. Hiai café ah Lamka khopi sung a nektheih om ngeilou limchi taktak momo chituamtu­am a kibawl, chow chituamtuam ban ah drinks lam ah oranges, grapes chihte leh a dangdang muhtheih ding in om hi.

 

Lungkuai Café neitu Mr Thangkhanmung in a gendan in, Lamka khopi sung leh pua a home deliver leng pe thei ding uh ahihdan gen hi. Huai ban ah nek­theih chituamtuam Chinese-te bawl dan leh tumlam gamte bawl dan a kibawlte muhtheih ding hi.

 

 

Pathian tung a kipahthu genna hun zang ding

LAMKA, Dec 14: Evangelical Baptist Con­vention nuai a Directorate of Social Development & Secy. CSSC saina in zing­chiang, December 15, 2017 sunnung dak 12:30 in EBC Gospel Centenary Hall, New Lamka ah ‘Thanks­giving Programme’ zang ding uhi.

Hiai hun ah Rev. Gin Malsawm, Director (SD) in report pia in Thanksgiv­ing hun zang ding a, Upa Dr. N. Lalzagou, Chair­man, CSSC in thugen in EBC Central Choir-te’n phatna la nihvei sa ding ua Mr. Siamnunlian Valte, Member CSSC in kipahthu gen in Rev. Paukhanmang Guite, Director (Mins) in hunkhak ding hi.

 

 

AR-te’n phuhkhiaknung kum 33 chinna zang

LAMKA, Dec 14: As­sam Rifle a kum 33 chin­na tuni, December 14, 2017 in Silver Battalion Camp, Headquarter Veng ah Bara Khana nei in hun zang uhi. Hiai hun ah Battalion a Subedar Ma­jor ban ah Rank tuamtu­am nei officer leh Jawan hunkhop tel ua, Lamka khopi sung a Cilvil Soci­ety tuamtuam a makai leh Ex-Servicemen leh sepaih gal a site zi, Veer Nari 35 in uap uhi.

 

Hiai hun zatsung in Mizo Cultural Troupe leh Thadou-Kuki Cultur­al Troupe-te’n Bamboo Dance leh namlaam lak uhi. Hiai hun ah kisuk­limna ding in lucky draw leng nei uhi.

 

Assam Rifle ahi­hleh 1985 kum a Jaira­pur, Arunachal Pradesh a phuhkhiak a om ahi­hdan Major Pankaj in gen a, mipite poimoh chiklaipeuh a panpihna pe dia mansa a om uh ahihdan gen in, tunitan a kithuapihna mipi lam a pan a ngahte ziak in kip­ahthu gen hi.

 

 

ZMA-GHQ makaih Only Grace Home ah kithuahkhawmna nei

LAMKA, Dec 14: Zomi Mothers Asso­ciation (ZMA) General headquarter in tuni zing­kal dak 7:30 in Veng­nuam, New Lamka a om Only Grace Home veh in paupangte toh kithu­ahkhawmna leh ZMA dinkhiaknung a kum 20 chinna ban ah ZMA Town Area unit-te toh kithuah­khawmna masa nei uhi.

 

Hiai hun ah ZMA-GHQ a pan makaite ban ah ZMA town area a pan unit 24 a pan makaite tel ua, hun zatna Lamneikim in makaih hi. H Khawlch­ing, Ex-officio member in thumna in hun pan a, Kim Mary, Vice-President in vaidawnna thugen in, Ngaiphal, Secretary in ZMA kiphutkhiakna ziak ban ah kivaipuakdan leh panlaknate report tom­kim piahi.

 

Joycee, Board Chair in Only Grace Home toh kisai gen a, ZMA Founder President, K Chinnu leh Dimzangai a pan thugen­na om in, Vungmuanch­ing, President, ZMA GHQ in kipahthu gen in hun zang zou uhi.

 

ZMA Town Area nuai ah Unit 24 om a, tuni a hun zatna ah unit 24 a pan makai-te paikhawm in maban panlak ding dan genkhawmna a neih ban uah Only Grace Home a om nuapangte Path­ian ompihna tung ah kip­ahthu genn hun zang uhi.

 

ZMA in ahi­hleh khosakna haksa innkuante ban ah numei naupang tagah liangvaite amau hihtheihna tan a huhna leh panpihna a piak ban uah ZMA nuai a project khat hiding in Vengnuam, New Lamka ah tagah kepna leh et­kolna ding in June 2006 in Only Grace dinkhia in, 2010 tan Partnership Sponsored-na nuai ah naupang enkoltou uhi.

 

2010 a pan in ZMA in sponsor neilou in, amau hihtheih dan in lo­cal level in enkol ua, mi­mal, pawlpi, saptuam ban ah mi kiphal tuamtuam in a thohkhawmte uh ban ah kum teng a innlusi a ZMA Annual Fund Rs. 100 donkhawmte ban ah Pearsonmun leh Buallian khua a lampi gei a pan­pihna (donation box) a koihte ua kipan a muhte uh zang in tunitan Only Grace enkoltou uhi.

 

Tulel in Only Grace ah naupang 13, pasal 3 leh numei 10 om ua, panpihtu leh home en­kol staff 4, Care Manag­er-cum-Tuitor, Senior Warden, Junior War­den leh Cook khat om in, naupangte ahihleh Cambridge School, Sa­hei Road, New Lamka ah kaisak uhi. Tagah kepna Only Grace Home a ding mimal, pawlpi, saptuam ban ah huhna leh panpi­hna pe utte’n chiklaipeuh in Only Grace mun ah piaktheih gige hi.

 

 

Minthang Guite leh Jennie kiteng ding

LAMKA, Dec 14: Mr. G. Luansiam & Mrs. Theizach­ing tapa ban ah singer Hlunminthang @ Minthang leh Jennie Vungthianmuang d/o Mr. & Mrs. Upa S Dong­zathang, hong tung ding Dec 21. 2017 sunnung dak 12:30 in EBCC/Vengnuam, New Lamka ah saptuam dan in kiteng ding uhi. Kiten zoh sunnung dak 2 in Chinkhothang road a pa Luansiam inn ah moulopna om ding hi.

 

 

Lamka Got Talent 2017 Audition Round sunzom ding

LAMKA, Dec 14: Team CT Lian saina a Lamka Got Talent 2017 neih a om tuni, December 14, 2017 sunnung dak 1 in JJ Plaza, Rengkai Road ah Audition Round sut­zop in om hi. Hiai hun ah talent tuamtuam nei, mi 33 in a talent-te uh lakkh­ia in Audition Round ah kidem ua, Mang Taithul in kidemna makaih in, judge in S. Pauginmuan, Kim Dingdi leh John L. Varte pang uhi.

 

Tuni’n Niangngai­hlun, Guest Judge a pang in kidemna endiktu in pang hi. Audition Round ahihleh a December 9, 2017 in Covenant Chil­dren Home, Mualkoi ah round masa kipan a, zingchiang, December 15, 2017 sunnung dak 1 in JJ Plaza mah ah sutzop hid­ing hi.

 

December 16 leh 17, 2017 in Aron and Sa­sha Complex, Damkam Bazaar ah om nawn ding a, Audition Round teng zohsiang hiding hi. Audi­tion Round zoh ahih toh kiton in Rayburn High School, New Lamka ah December 17, 2017 a pan December 31, 2017 sung Elimination Round kidemna leh Trade Fair om ding hi.

 

Trade Fair ahihleh tualsuak van chitua­mtuam Sathu, Bekan­thu leh khusiam-silbawl ban ah secondhand van zuaknuam, dawr van zuaknuam chihte a ding bik a sai ahi. Lamka Got Talent kidemna ah kip­ahman in van tuamtuam Rs. 1 lakh dinghu piak hiding hi. Kidemna a telnuamte’n kidemna pat ahihma in min piak­lut theihzel a, min pelut masa mi 30 tan ni khat a kidemna ah telsak hi uhi.

 

 

BA 3rd Semester exam kipan ding

LAMKA, Dec 14: Manipur University saina in zingchiang apan in College tuamtuam ah BA/BSc/B. Com/B.Sw/BTT/BFT 3rd semester examination 2017 kipan ding hi. Churachandpur Govt College kia ah leng 3rd semester exam students 1500 val exam ding uhi. Amau zingchiang apan exam ding ua, Dec. 22, 2017 tan exam ding ua Jan.4, 2018 in sunzom nawn in Jan. 11, 2017 in zou ding uhi.

 

 

CCI in Annual Thangksgiving zang ding

LAMKA, Dec 14: entre for Community Initiative, Pearsonmun in hongtung ding December 16, 2017 sunma dak 11 in MARC, Pearsonmun, Lamka ah An­nual Thanksgiving Inclusive Advent Christmas & IVC Culmination Day zang ding uhi.

 

 

‘Arise and Shine’ gospel album hong ding

LAMKA, Dec 14: Hongtung ding Decem­ber 16, 2017 sun dak 12 in Kuki Baptist Con­vention (KBC) Church, S Kannan Veng, Tui­bong ah Gospel music video album “Arise and Shine” kichi honkhiakna om ding hi. “Arise and Shine” gospel album ah pau chituamtuam 29 a kisa Arise and Shine chih la om a, Dr Hawln­gam Haokip. President KBC India in hongkhia in Pathian min in laan ding hi.

 

 

 

…for more detail : here