You are here: HomeColumnsKC Lian TombingLianta Le'ng Le

Lianta Le'ng Le

Written by  Kham Chin Lian Tombing Published inKC Lian Tombing Friday, 03 August 2018 08:56
Lianta Le'ng Le

LIANTA LE'NG LE

 

~by: Kham Chin Lian Tombing, New Delhi

 

Ka let ci'ah..... ci in neulai in i letcia hihdi tamtak i sit hi.

12.07.2018. Zingkal dak kua leh akim a khanglou phut. Dak 10 ana pel man thouthou. Thouphang  sim thengthong kawm a pasalte van koihna lak a vante silh mengmeng in, kisa fitfit. Breakfast nek manlouh ni ni in khekol in hon gak na e, ci lungsim kawma kuan khia. Ei thawhhak man a khua ana vaklou thahahlou ahihcia ni bang ana sanglua, kihak feifuai zezen ei ngal ve. Zannitak a England in Croatia hon khawnung lelh nemnom ziak a ihmut haklawh tuh kihi himhim. Acik acik a mangkang gamkekte thilhihna peuh a thuaktu ki-hi zezen hiam cih lampangzaw i gensau dah dia. Hilele, Vaigam Zomi leh Kawlgam Zomi ana gawmkhawmlouh citciat uh penbel, ka hadong na tawh tehdi’n cu ha na pen a nep thou di.

 

Neulai, neu petmahlai like kum 2 kum 3 khawng i hihlai in i pate, i nute khedap khawng i bun daldal sek voi maw? Nou tuh na hucihlai un na theikholkei di ua. Ken ka hucihlai thei le cu hituanlou. I tate khawng a hucihlai uh i theihphak hamham ziak a i hon gen hi ei. Kum 8/9 khawng i hong phatouta a; i pawlzah bang Roman number a i hon gelhtouh theih ciang a bel khua kitheilua hita. Hilele i pate, i nute khedap i va buh ciang a akimkhat khawng valzek pan lailai hi v’aw. Nap haudeuhte khanghat deuh a ci ua, nap bang kinei se lou hi zel. Ki-bunhun ta mahmah leh aw, cih khawng ut a ki-ut mai. Numeite bang inle ka samsau ta henla, ka awmte hong bawk henla, ka din hong sang henla, ka khe lianta henla hileh huai a ka ute, ka nite, ka nuneute' khedap tulsang kibunhun taleng ka ci e, cithou di hive uh aw.

 

Ka neulai a kapa'n hiai jungle boot a cihte uh nei incin, butzawhkal bang kingaklah thei petmah. Ki-tesiksikna bang gimhuai thei phial di eive, huailai in gim-le-tawl cih khawng i phawkban dekkei a. Ka buhhun ma in a nunga a khaina di awmtak a savun kikhuibelh, khutpi mai ciah di khat tuh gawphel kuang di'n ka atkhegu tamai ve. Adang di om mahmahlou himai. Ei khawvel muhphakna siahsiah i zon nung a le omlou tatak eingal ve. Hucia i atkhiak hial cia bel buhtheihlaipi hilele buhdia kilawm nawnlou ahihcia ka pa’n a khedap pamtul ta. Huai a bel gawphel kuang di kihau lawta. I lawmte a deihdeih i hop cia le kihawmgai zou mahmah lou.

 

Ni khat vai ka tun a ka tanu in ka puan-ak ana a incin, ana om daldal hiveh aw. “Kei papa ciah pha dekta,” cia ana nui salsal. Ei neulai khawng tawh le kibangtou thou hive uh aw. I nu-le-pate omlouh kal ua a vante uh ana kiban silh. Akzawhkal kingaklah. Huai bel amauciah hihkal kingaklah cihna.

 

La khat ana om incin,

“Ka neulai in lian leng lungnuam diing kisa'ng,

Ka khanlet hang lungnopna neithei tuanlou.

Pitek putekte'n lungnopna nei diing sa'ng,

A dah leh lungzuan tawh sih diing ma-nawh hi"

 

cih hitel eivoi.

 

Thudik ahi. Haqeeqat ke baat hai. Lam-etna khat omlai. A thunon ah.

"Jesu ah lungnopna bukim hi."

Dik sa teng in khutlaam, khut bengkawm in awng ziahziah ni.

Amen!

 

Ka khekolte'n kawng gaklua in nileng in ka om lemsak hetlou hi. Zankhat kal a hicia ka silhlai puante khannelh zouhial dia lah thakhat thu a khan-guihna vitamin kine lou a. Kum 160 bang dam di hitale le, seh li suah sehkhat bang kihi thamta a manglam ahihhial keileh kimawk khan dia gingtalou zel. Ci zenzen le ka birthday ni bang ana hizawmah.

Ke’n mangngilh.

Ka zi'n le hon mangngilhpih. Naw prawbs.

Nitaklam vaipai a lawmte khat, kum 6 val bang kimuh khaklouh nung in hon na wish kuau mawk hiveh aw, whatsapp message a. Lamdang! Sawt hon na theihpih lawzen a. Ka kipahdan cu. Kei a nu le ana hilhgu hidi hiven cin, tuike nuih veivuai lel in teh. I mukha ka.

A omtheilua thu ahi hi.

Inn ka tun a ka pa kiang a, “Pa, Na khekol va tengkha keivoi tuni,” ka cihleh, "Hia?" ci in lamdang sak tuak mahmah phet.

 

Khaile, gennop lam ah lutta ni. Pate' vante bang silhzouta in, hon gak zezenta mahleh (neulai a i lunggulh leh ngaklahluat tangtungta), i pate' thalang (veilam tha) le kituk zou mahmahlou cih mukhe sansan ing. Nek le tak, silh le ten, khawsakna vai a poimawh a sum le pai kaikhawmtu leh pawluttu na/ka himaithei. Huaiteng le amah ziaka hihthei, na himawk hi. Khat veivei om fengfang, hi feufau, hi gega, hi gamgam, hi fenfan, hi fefa, hi phenphan a i om ngamna ziak i pate ziak khawng nana hi leltak. Ahihkeileh, hi ceicai, hi beibai, hi beubau, hi ei-ai, eu-au, hi memmam, hi rehrah, hi salsal, hi bahbah, hi taaitaai, hi ngaingai, hi heuhau a i omtheihna te bang le pate' ziak mah na hithou. Na tilou ong, Lhing?

 

Tuate phawkkhe thak kawm in, tunitak cia tuh ka pa kiang ah a damsung zuihdia kilawm thugukte, nek-le-dawn, kampau a akidekzawhna thugukte; ahihke’h nuam asakte, lim asakte, noplou asakte, hon pahtakna, hon pahtaklouhna, amah neulai thute, a tangvallai thute, kou neulai thute amah’n atheihdan, khawluilam thute, a lunglenna thute khawng dong a houlimpih di ka ci gu tenten hi. Hucia amah hon dawndan dungzui a hinkhaw kilawm leh manpha sem ziltouh theihna di, cih lam-etna in. Leh, neulai a “Ka let cia ka hihdi,” cia ka limsit gukte ka hih tangtun zawhna dia lampi hon kawkmuhna di’n. Huanah, ei le kei kihanciam leh kihaksial gu in, "Pate' thupha ngahtheihna diing in kei-le-kei ka kihanciam di," ka ci a. Himahleh, kal bangzah hiam kihal khit tanpha in pan nailou nilouh dan in ka omkha netnut a.

 

Ahi, bangteng sawm in bangte’n gen in, nu-le-pa’ tha ciah pha in, khup zezen in, kheng zezen mah lehang kei le hi, amau hon oihna la uh bang in a tha uh khekzou kisa mahle hang, noule hithou di’n ka gingta. Bang mahmah kihih kawdok zou tuanlou, banglam mahmah a kipha zou tuanlou ahihdan ka cian semsem, lianta le’ng le.

Read 291 times
More in this category: « Kuanglai Politics
Login to post comments