You are here: HomeColumnsSingngat SpecialSanghmingi

Sanghmingi

Written by  VL Mangzo Published inSingngat Special Wednesday, 18 July 2018 09:24
Sanghmingi

~ By : VL Mangzou

 

 

June 26, 2017 zingkar in New Bazaar a sa-lane ah bawngsa ka va lei a, a satpolh ser 2, a sung ser 1 leh a chek khai 2 leizou, pai dia ka kihei leh numei khat ka phukha a, oh ngaihdam chi in ka pawtkhia hi. Huai numei kua ahia chih ngaituah zui tuanlou in lamkhang ah pasikhom lom 3 ka lei a ka pai nawn hi. Red Cross road ka tunphei madeuh in Jimmy chih ging ka za aaa....... ka etkik leh den a ka phutkhak nuun hon en in a nui a.

 

Ka min Jimmy ahikei. Himahleh huchia on sam dan in ka za tlat a, ka lungsim ah kum 25 val paisa a Lamka College a ka kailai ahong lang guih hi. PUC ka sim lai ahi a eikhote ban ah lawmthak hunkhop ka nei a anuam mah2 hi. Huai ka lawmte lak ah Sanghmingi kichi nungak melhoih tak a om aaa.... A mit-hah a sexy raih a, mai bem, sam sau ngihngiah, kichei veekvuuk lou, hileleng, mawlchik a a-om kha nalh-a-nalh type ahi a.

 

Ni khat, College kong a hotel varanda ah kinungngat a kingaituah in ka tu ua, Jimmy tuni bang non meh aa ahon chi a, khaih, english min bang non phuahsak a ka chih leh ui min houh eidiam mo chi in a nui vak2 a. Hehnachi hikei mahleh nuam ka sa chiah kei a, ui tuklek a on mu na hi mo ka chihleh kisuanglah sim in a dingkhia a, tui on va suah ringot a. Huaiziak ahi amah loungal Jimmy chi a on sam diing a omlouh ziak a ka sa lei ni ziing a feel na khat ka neih a, ka nung et.

 

Ka va naihphei a, sihzou a leizoh in ka paikhia ua numei naupang khat a kai lat2 a, nang aa hia ka chih leh hi a uu Aizawl ah a-om a hiai chauh kon tonpih a chi a, hotel ah singpi ka dawn ua. Na pa un kha bang sem ahi ka chih leh kou kikhen aman zi dang nei a on chi a, ka phuguih a va dotsau chi hilou, houlimdan di le rem non chiahlou ahihman in ka pawtkhia ua ka ki anneklim ou phot uhi. Gangpimol auto a ka tuan sungteng in Sanghmingi in ka lungsim a luah hi.

 

Ka u te inn a om ka hi a, ka poimawh teng amau' on puthawk ahih ziak in a kisuanlahhuai a, nikhat chu meh di neng leh tangmai khawng paw din eikhua ah second trip in, a tung a tuang in ka va paitou hi. A zing a, zing bus a paikik in Singngat Tangmai a special deuh ka ten pum 7 leh meh di haichi tuam2 ka pawsuk a. College kai dia ka kuan in a dawng 1 leh a san 1 ka khai a, college gate ah Sanghmingi ana ding a on houpih hetkei hi. Hotel a valut in sun chiang a nek din ka Singngat tangmai nipthaih tegel ka va koih a ka pawtkik pah hi.

 

Sanghmingi in gate bul a handpump ah a khut ana sil a, Hmingi nong kuan baih ve ka chih leh, nuih leng nuilou in, zan a bangziak a hong kailou, koi a hoh e, kua toh for e, ba chia na kailouh di on theisak lou, thei hileng kei le kailou di hiveeng......a chi zung2 a... Court kaai ka himai! Bangziak a ka kailouh di nang kon hilh di la, leave letter ka gelh di mo? Love letter zaw hia na deih ka chih leh ahong nuikhia a, a ha pouthuah rasi nei deuhmai ka muhchim theihlouh ngeimai a hong dawk zel ve.

 

Kuamah for pih di nei mah2 khang, ka khua uh ka va pha a na tangmai nek di den in kon khai koihkoih vele ka chih a, lungkim deuh di ka sak leh nungak te va mu cheuh cho... on chi zel a, huailai tak in Nghathal nungak melhoih Muani ahong pai chiah a, ka houlimna uh a tuam ta a, ka thohuai hial hi. Class 2 ka lakzoh ua pawtkhia in, Tanpui, Chingi leh Khaiminlien zawn in Muani leh Hmingi toh tangmai ka va ne ua, him a sa khopmai uh. Ka tawp un Hmingi in a inn ua hawh din hon zawn teitei a kei leng inn va pha zual in tangmai 1 toh ka pawtkhia hi.

 

Hmingi te chu mi neizou lua a hih tuak kei na ua mahni khom a khosathei ahih mel uh. Apollo veng a a inn uh huchitel in a hoih tuankei, amau (Mizo ahi) assam type achih te uh ahi a, rice mill a nei uh. Hmingi kikhek kar a, ka tangmai tawi a ni, mibang chiahlou ka piak leh kipaklua in ahon hih thiamthuam a a nuam kholkei. Sawtlou nung in pawtkhe ni a chiphut a, New Bazaar a dawr khat ah on lutpih a, a Nun chow, sawhchiar chih vel zuak ana hi a......Donga (Mizo ten pasal te u le chi khollou uh) chow kinekdem di, a gai tawm zaw2 in sum piak di chi in kuang 2 hon tung pah mawk a, utlouh theih lah hilou ka buaigu sim mah2 a.. hilele anek hat lam in ka pang a aman a liau….

 

Kum 1990 November ahi a, a ni zaw ka thei nonkei. Lamka College a Boys Common Room a carrom ka kaap lai un Sanghmingi a hong lut a, ka panpihpa kiang a hiai ah phu leng bang a chi di ka chih leh Hmingi'n a darh di ana chi khauh a.....nuikawm a ka phuut leh a darh tak2 a tang 2 a lut zomah hi.

 

"Na Siam ve".

"Nang na siamzaw ve le, na gendik chiah, a darh aa tang 2 a lut".

"Na zohsuak leh kon treat di".

 

Amah ka enthak a, huailai in a min leng ka thei naikei. Nui hiuhiau kawm in nou deuhmai in on melh a, ka nervous sim a, hileleng ka hon kaap leh ka zousuak tak2 a......

 

"Na siamlua, hong pai ole".

"Koi ah la?".

 

Hong pai le chin, chi in, omzenei deuh in a liang in on phu a, a pawtkhe daih a. Ngaihsaklou a carrom ka kaap zom leh sawtlou nung in hong lutnawn a, ka kimawl a laklawh ziak a ka na ngaihsak kholkei leh ka khut hong phu a, ka zohkei loh hi. A-re chi a ka et leh a mit a hon sign in a pawtkhia hi. Ken leng ka va zui ta khong a ......

 

"Bang di a, 50 board eive ka kaap uh".

"50 deih mo, kon pe diam?"

"Ahuai lampang hilou inchin, a kimawl pen nuam eivoi".

 

Zing chiah le kimawl theih chi in hon kai a, campus sung a midang le a om ziak un a khut ka khinkhia a, hotel ah ahon lutpih hi. Kum 18 lel ka hi. Amah leng huchi vual mah ahi a, gen ding vak ka theikei uh. Huailai a chu College kiim lak a singpi leh puri kaan le nek di omlou. U Sanglian in, "Lamka i zin a, hotel ah singpi leh nektheih ne di i chi a, a min theihlouh i duh sim khawng va kawkchot lah ki utlou, a min theih2 puri leh singgara kia kine kha2 mai" a chih bangdeuh ahi.

 

Inn ka tunkik in lupna tung a thallup in ka kingaihtuah nilouh a. Hiai minu on ngaihvendan a riau om hiveh o, chih kha net hatlou chik a YouTube a et mai hilou, Kaizalal te video a et bang mai in chiang hi. Laisim haksa khop in nitak in leng ka ngaihtuah a, eikhua a leng chihsimsim khat kinei a, hiai nungak melhoih takmai khat in hon hichi vilbawl mawk chu a buaihuai khopmai. Bang ka chih di la? chi a  thuumna mual a va hawh hial na chii lah ahikei!

 

Khatvei college tawp a ka omna ahong phak ziak un ka U'n a nung in on tai a, laisimlai in nungak buaipihlouh di chi in. A ninawn in mood fuhlou deuh in ka kuan a, Hmingi toh leng ka kihou buai sim ua....

 

"Donga, na kholam uah va hoh le"

"Bang hih din la"

"I mu ut voi"

"Hou mai2, kuate inn ah na tung dia eita"

"Nou inn ah eike"

"Koi ah na lum dia la"

"Na kiang ah"

"Na taw"

 

"Na taw" ka chih kha a ngaihdan hi vaklou ei diam a hostel building kibawlthak lam ah a paiphei veng2 hi. Ken le ka ngaihsak tuankei a, sawtlou nung a ahong paikik in ahon en guau a, kanuihsan leh hehmeel deuh in on en sok a, hilelele, kihehsak mai2 ahi chih a nuihguukdan apat ka theih ziak in ka va awlmawh tuankei a. Class ka zohvek un gate bul ah ahong pawt ka na ngak a, ahon houpih hetkei. Hmingi ka chihleh Hmuia veng te khat toh bajaj scooter in a kipua ua, et leng hon enlou in taailiam uhi.

 

Kar khat vel kihoulou in ka om ua, 2nd year ka sim kum ua annual sports ka neih un bel thil omdan ahong ki something dek sim aa..... Football ah ka tel a ka zou tou2 vanglak ua, final ah BA 1st year te zoukei mahle ung goal 9 khum in top scorer in ka pang hi. Hmingi in leng hon kipahpih mah2 a, ka kar uh leng kinaihsem dandeuh in ahong om a, midang te mitmei ven ding a tam hiai2 hi.

 

"Na prize bang in a na lop di, non treat ngai lou di?"

"Zing chiah Singngat ah ka va hoh dia tangmai tampi kon paw di, huai in lawm le himai".

 

A gintaakdan a dawng khalou keidiam a, a kiheidaih a. Nang on lopsak di eizaw vele ka chih leh, hong pawt oleh, ka inn uah vaai atam mai, na duh zah2 na ne di on chi a, on simmohbawl deuh ka sak ziak in ka kipaak vak kei.

 

"Hmingi, khatvei ui non chita a, tu'n vok bangmai in non hou nawn a, ka theisiam kei".

 

A nui uar2 a, kei chu ka nuih a za kei. Mi' inn a om mai2 ka hi a, kholam a ka inn-le-lou leh ka khosakna uh ka ngaihtuah a, mite' chiamnuihbuuk mai2 ka hizaw maw chihna in ahon tuam hi. Hmingi, thilkhat kon gen di, amasa in, nungak feltak, melhoih, lehkhasiam, mi khosathei tak tanu na hi a, kon ngaisang mah2. Lawmhoih tak bang a na hon kithuahpih kei a di'n ka phuulouh ahi. Hilele, kei chu mo.... a chang in Ui ka hi a, a chang in Vok ka hi. Huaiziak in ..., chi a ka khawl leh, Bang ahon chi a..... na lawm diing lel inle ka phuu kei ka chi a, ka paikhiaksan a, ka khasiat lam2 a suak hi.

 

Ninih vel chu kihoulou in ka om ua, himahleh, hong kailou hia le, kaw om ei dia o chi reng2 in ka buai veve hi. Midang toh kithuah mahleh a omdan apat hon zonbawl ahi chih ka thei, ahihziak in ka kiseel tei2 aa....Nitaklam khat, campus sung a singliim nuai a tutna kidoh khat a ka tut leh ahong pai a, Merchant of Venice chih ka lesson uh ka na etthak laitak ahi aa....

 

"Lunglut tuak ve".

"Lunglut khol khang, lawm di lah omlou a chimhuai a ka et mai2 hi".

"Nang heh mo?"

"Mawk eive, ka hehna di bang a om aa e?"

"Hon hehsan na bang a eivoi, genkhelh ka neih leh hon ngaidam in o....Donga".

"Hehsan lou ee, genkhelh le na neikei, non koihdan dan kha ka phuutawk ahi a, ka kipak, ken chu kon ....iiii..".

"Bang e, bang e, kon bang e?"

"Kon hua !"

"Bachiaa la?"

"Kon ngai aaaa"

"Hahaha...awmkei thou, na khua ua kha nungak fel leh melhoihtak Nenem om mawle?"

"Huchibang min nei nungak a omlam ka theikei".

"Haha....Huuiiii.... deuhveeeelllll.....".

"Bang ei dia o, lialua".

 

Koikoi apat thil le ana thei ei diam a, Nenem min khawng on genkhiak? Ka Nu a damlouh ziak in eikhua ah ka va paitou a karkhat ka va om hi. Ni khat college ka kailouh a bawn  court kai ngai, karkhat kailou a ka om chu, ka tunkik in hurricane thuak bangmai ka hi! Hmingi kha a sual hilou in, hon miss lolam in hon hehsan ahizaw a. Ataktak a, nungak-tangval lai khawng a i kihehsan deuhvel te khawng a nopna tak khat om inchin.

 

"Mang on sa ing a police station a missing report va piak di hia ka chih leh na hong lang nawn vanglak a..."

"Investigating Officer mo nang?"

"Hilou"

"Non suizui ve leh?"

"Kon suikha ngei a eita? Nang eivele bangmah genlou a karkhat sung college kailou a, ka lungsim hon sui.....pilh eive"

"Hahaha....... na chiil nuh veeee"

"Nui zomah koh!"

"Ka Nu damlou a inn lam ka va pha a hi"

"Na zuau"

"Chimawk eivoi"

"Nenem na ngaihman a va pai hi teh"

"Na ngaihdan-dan ahimai ke, nang' on ngailou hi ve chin...

"Kuan kon ngai a chi a eita?"

"Kuaman"

 

"Kuan kon ngaikei a chi a eita?" chih sawm zaw hi di hia ahong nuikhia a, kei chu ka nuikei a lialua eive ka chihsan a. Ka Nu damlou a Lamka a hong kipawsuk, tua damdawi inn a om ahihdan ka gen leh nitaklam a ka va hawh in hon zui hi. Ka nau a muh in "Nenem hia?" on chi a, na ** hia ka chi man dektak a, thui, ka nau eivele ka chih leh aw a chi hiat vanglak a.

 

Kei chu mi inn a om, ka poimawh teng, pentui nasan hon leisak uh ahi a sum ka nei ngeikei hi. Hmingi chu khauphan leh siamgat chihte a hun-awl zatna ahih ziak in pocket money (U Hnunlian in roket money chi mo ahih) a nei gige a, khatvei, Lighthouse a cinema en diin ahon zawn hi. Sum ka neikei lah kichi ngamlou, aman a seen tel di lah nuamlou suanlam kilawm khat bawl in ka kihemkhe thei a,  1942 A Love Story enkhalou ka kei.

 

Achang in chu ka omdan uh gimhuai ka sa. Kon ngailua kichi siilou in, kingai viau napisi in kingailou, lawmta mai2 dan in ka om uhi. Nikhat chu class break sung in gate kong a hotel ah ka tu ua, bangmah genlou in hon en a anui ringot zel hi. Ka napkhem a dawk a hia, ka mit-ek khawng a om a hia, chih khawng ka ngaihtuah a ka romol in ka kinuul vel a. Huchi lampang hilou in, gen ut nei, numei in apat dia lah nuam salou, ken lah amah ka deih dan leh ka itna thu gen ngeilou, close deuh a kithuah si ka hihman un hichiin ahon chikhe khong a....

 

"Donga, eigel omdan kha bang chiah ale i relationship?"

"A boy and an ugly girl kihehsan gige, hilele....."

"Hilele, bang?"

"Ngaaaa kingai, mawle?"

 

Hon dawnglou in a nui a, gazza, Kungi muuk hi omtak a khii pheihphoih a nek kawm in hon en a.....

 

"Kingai chih chu friendship maimai mo?"

"Abaan aa le hithei"

"Abaan a bang oi?"

"Mihai,LOVE asih dia"

 

Ahong nuikhe vak a, na tak2 mo on chi in a singpi a dawn phot a, ka thil gente ziak in a heh kei hial chih kha a sam a huui kawm a on melhdan leh kun kawm a a nuihmai gige in a taaklang hi. Huai ni in Sanghmingi hoihdan ka muchian hi. T-shirt vom, a aang a Calvin Klein chih kigelh a silh a, jeans dum dup lampang leh puan khedap ngou in a kithuam a, a muuk san lawlou, nou hiuhiau lel a a nuh leh a nuih chiang a a biang kuak tiuhteuh in hon jeelsuak vek a, film khawng a i muh, electric in mi a shock chiang a current vaak kimu zuap2 te ka bang.

 

Ka Nu kha in Singngat ah ka va paitou a Lamka ka tunkik in thu kipahhuai vaklou in hon na dawn hi. Ka omna ka u te Champhai a kisuan dek uh, inkuan a paivek sawm uh. Ka mood a off vek a class leng ka lunglutlouh ziak in pawtkhia in lecturer te garrage gei ah ka va ding a, ka kingaihtuah vung2 hi. Sawtlou nung in Sanghmingi hong pawt a......

 

"Bang hih e?"

"Bangmah"

 

Lehlam a nga vauh a,  bangtan hiam paulou a ka om nung un ....

 

"Donga , ka tung a lungkimlouhna nei mo, non dawngbul ngei?"

"Neilou, ka lung kham"

"Bangziak la?"

"Nang theih a phatuam di hikei"

"Zeeellll o, kidaihlah kha zeell, sorry........ kikhen umo?"

"Appollo Veng a Sanghmingi in hon ngaikei a ka lungkham hiveh"

 

A nui a, a sam huih in a mutleeng siau2 a, mun fianrial deuh hileh zaw hon ngailua keive chi a kuah ngoih2 ka ut. A pau zosam omlou a college ground a naupang football pek te ka et lai un Lalmalsawma hong pai a....

 

"Hmingi, rawn kal teh. He Paite pa nen eng e in tih?"

"Bachiaa Paite pa non chih kher?"

"Mihring, Hmingi hi ka bialnu a nih hi, i hria em?"

"Aw... ahihziak in houpih a kithuahkhom theihlouh ahi tuan a hia?"

"Theihloh, i be tur a ni lo, melh pawh melh tawh suh ang che, a nihloh chuan, i chak lo khawp ang, Hmela"

 

Hmingi utlou sasa a kaikhia a, ahon houdan zakdahhuai mahleh ka kideek teitei hi.

 

Karkhat nung in ....

 

"Donga, theisiam in aw, zanlam a thiltung kha, hong hel sek a ka deihlouh ziak a heh ahi"

"Hmingi, a thra a lawm, kei chu eng mah ka ni lova, min hrethiam la min theih hngilh tawh mai rawh. Mahse kei chuan......."

"Eng?"

"Ka hmangaih reng ang che.....ka damchhung in"

 

Mizo pau a ka gen ngat in chu aman leng ka thugen ngaihven biik in ka thei a, hon en zauh in a kun raih a, a lungsimlou lamtak genkha ka hi chih a mel ah lang mahleh, huai laitak in a ngaihhuaina a lian sem2 a. Kingaise siim kei diam a, ka lung a leeng ringot a, field siik a lawmte toh guitar tum a ka sak sek uh la khat ka lungsim ah ahong lang hi.

 

"Van a tung solkhapi a taan laiteng hong ngilh ngeikei ning ee, meitei-guun a tui a luan lai teng in lailung ah hong ngilhkei ning ee........ Inn-le-lou, sum-le-paai bangmah nei lou in, neekding bangmah nei lou zong, ngaih nang toh om le'ng mun khempeuh nuam e, kei' kiang pan paikhia nawnken mo Ngaih aw......."

 

Ka U te'n zirtawpni a kipuakkhiak a sawm ziak un kei le nilaini khawng a pai di'n ka kisa hi. Seppatni in Hmingi a hong kai kei a, thawmhauhuai ka sa mawk a, bangchi a de aw, damlou houh hia chi in ka ngaihtuah hi. Sepnawnni in a hong kai a ka muhphet in, ama' hon chihdan in, zan a bachiaa hong kailou, koi a hoh, kua toh, bang hih, Malsawma toh for mo ? ka chih zung2 leh a nui top a....... a pa a BP sang a abuai ziak a damdawi inn lut uh, tuzing a pawt uh ahihdan a gen a.....

 

"Kei zing chiang a ka khua ua pai di"

"Bachiaa ?"

"A ngai a"

"Ka ngai a e?"

"Hi...... ka U te mundang a kisuan dek unchin paikhe vek dek ua, inn lam ah ana om mai oh hon chi ua"

"Hehehe"

"Kipah tuak ve, ka pai di......  Khat pa le kipak inteh"

"Het, don't say zahmawh"

 

Paulou in a om nilouh a, Teiseng taang lam khawng a en vong2 a. A humsam hui in a bil ah a zep a, a neh petkawm in hon en a, a mit ah nguaina alang chih a muhtheih hi. Gen di a vaang khopmai, a last hour ah ka itna thu gen leng a phatuam nawn diam, aman bangchiin hon dawng dia aw chihte ka ngaihtuah a, huai ni chu class leng la lou in Boy's Hostel kong ah ka tu nilouh ua.

 

"Hmingi"

"Hawi"

"Ka lungleeng"

"Bachiaa?"

"Theilou"

"Ngailua maw?"

"Hi, nang. Na ngaihhuai mah di Hmingi"

"Na khua uh tung lechin non phawkpha nawn kei di"

"Kon phawk lotel di, ka manglam in le kon phukha  zezen di"

"Hehe......ken kon ngaizaw di"

 

Kientuah in ka nui ringot zel ua. Nidang teng sang in huai ni in Hmingi hoih ka sa a, loupa khat botkhia a khoih kawm in ngaihtuah sautak nei hileh kilawm in om hi. Kamis pian a ngou a silh a, puan plane nuainawk rong teeng in khedap naran a bun a, a kithopdan pouh kilawm ahihman in ka enchim theikei. Amah chu natural beauty a chihte uh ahi. Salvation Army ahi ua, Pathianni khat a kikhawm di a uniform toh ka mukha a, kilawm hina maizen e!

 

Nitak in lunglutlou chik in lai ka sim a daak 9 in ka lum hi. Ka ihmu kei. Ngaihtuahna saupi a pai a, Hmingi toh ka kizopna uh kha duhthusam leh suangtuahna lel hi in ka thei a, khaw tuam  ah om le ung kimuh lah vaang dia, ka ki-itna uh mei kuangkhe dek liak2

pan pen guitung zou tak2 din lametna ka neikei a, mit pah din ka gingta hi. Mihingte hi i kimuh mun a i kithuah tam leh kingaihnatna om a, a gal apat kingaihtuah lel zaw meipi ziing banglel ahi a, a theng kik nawn pah. Kei lah eikhua a ka kik louhtheihlouh!!

 

Nitaklam in Zogam Travels in ka paitou a lampi siatluat ziak in khomial nung in ka tung uhi. Huai nitak chu pawtkhe lou in ka lumpah a ihmut chu a haksa thou. Thil kha ngaihtuah lou di cchimawk lele i lungsim a om miau chu phawklou a om theih hilou hi. Sanghmingi ch7k chiang in ka mu nawn dia aw chi a lungleng tak a ka om lai in kholak a guitar tum a la sa te'n Paunou la, "Ka pham zong ka laukha'n lung a hong ngilhlou diing, ngaih aw i pham leh thangvan ah zaila in naubang awi2 ni eeeeee" chih a sak ngolh2 un ka lung a khoih mah2 hi.

 

Lou ka kuan sek a, a chang in Pa Sangkim' gari zui in ka kilawh zel hi. Lawm ngai mi ka hi a, nitak a lawmte toh nungak hel, guitar tum a lasakkhom leh singbeam tung a tu a chiamnuih bawl a nuih vak2 chihte nuam ka sak zawng ahihman in laisim a haksa hi. Exam na di a nai taak ziak in lai chu sim zek him2 ngai a, laibu ka keeu chiang in Hmingi nuihmel ka mit in a mu zel a, Korean film Green Rose a a nungak Lee Da Hae album en ka bang.

 

May kha kimlak in exam di'n Lamka ah ka paisuk a, kar khat chauh hi na chi in Chienkonpang a lawmte ka va beel ringot a. Amasa ni in Hmingi zonbawl nilouh mahle'ng ka mukha kei, ama' subject telkha lou ahi di. A ninih ni in, ka zekai deuh ziak in exam pat hun ka lap ham2 a, exam hall sung ka lut in ka nervous sim a, ngaih lolou a hmm chi ka zak a ka et leh Hmingi ahi a, a pen pet kawm in nuihmai deuh in hon en hi.

 

Ken ka zawhbaih zawk ziak in gate bul ah ka na ngat a, Muani leh a lawmnu hong pai ua "ngak chi ou" omzenei deuh a nui kawm in hon chi ua, paisuak in hotel ah lut uhi. Hmingi a hong pai in kou leng hotel ah ka lut ua. Hmingi in a mehpih di a va buaipih sung in Muani te lawmta in hon chiamnuih nilouh ua.....

 

"Donga, na siam hia?"

"Siam mah2 khang, pass mark le kimu kenteh"

"Hmingi a siam na voi mo, hehehe......kikop mai ua"

"Mawk zezen"

"Eivoi, na kiteng hak nawnkei du mo?"

"Aaaa, ringot, kua toh eita?"

"Hmingi toh"

"Ha ha.....  hon deih ngal di hia ei khawng"

"Im-im le te le kithei thou eive"

 

Bang eita na theih ka chih laitak in Hmingi hong pai a bang gen kahi ua chih hon kan pah a ka nuihsan lel uleh a thei  ut deuh2 a. Singpi ka dawn zoh un amau' inn lam manoh in ka pai ua lamtawn a houlim in ka nui zel ua.

 

"Hmingi, na hih hoih hia?"

"Hoih thou, English chu a haksa deuh na a, nang la?"

"Kei le hoih chih di hi, a subject ka lunglut him2 a"

"Exam zou le bang na hih dia?"

"Lou khawng kuan2 di himai lou di hia, nang la?"

"Aizawl a ka Ni te'n na khawl sung hong om oh hon chi ua"

"Non-ngal, Lamka leh kou khaw kikar le gamla ka sak2 toh"

"Non phawkpha pouh aa hia, eikhawng?"

"Nang ka phawk ken kua ka phawkk dia?"

 

Ka theihlouh kar un a inn petna bul uh ka tung ua, tui beek hong dawn oh a chih ziak in ka va lut a, sawtlou tu zek in ka pai hi. Lamtawn in Aizawl a gen ka ngaihtuah a kigamla deuh2 di chih ka ngaihtuah a, Aizawl tangval hausa pipi te tang di un ka suangtuah a, ka haza ringot. Result a suah in Aizawl ah college a kai ngal a, kithuzak phalou ka hihman un, ken leng a hunsawt zir in ka mangngilh hiai2 a, huchin zi leh pasal tuamtuak nei in ka kawsa uhi. June 26, 2017 zingkar a New Bazaar sa-lane a ka kimu zen2 uh chu, lunglui a leeng ngei mai. Sanghmingi, nuthoi himah lechin kon iaii kei rengreng. Kei le ka pathoi lai in kituakkha le zaw maw, melhoihnu?

 

(beita mah2 heh)…

Read 602 times Last modified on Sunday, 22 July 2018 14:45
Login to post comments