You are here: HomeColumnsZokhualHichi Zodeuh leh Chih Ding Omlou

Hichi Zodeuh leh Chih Ding Omlou

Written by  Khamkhokam Guite Published inZokhual Sunday, 10 September 2017 18:01

Voksa Hou Sihzou Tangal Pok Huan Dan

 

Gelhtu : Khamkhokam Guite

 

Punjabite’n  Chicken Tanduri nei ua; Tamilte’n leng Dosa nei uhi. Huchimahbang in, China te’n Chow nei ua; Japante’n leng Sushi kineih uhi. “Kou ka hi uh” chi a, namdangte maitang en ngam minam teng in amau aa tuam liauliau meh kineih chiat uhi. Ahihleh, huchibang khovel ah Zomite dinmun bang ahi dia le? Heutute thilsai bang hong lohching taktak taleh (thilsai nei ding un limsiam tale hang!), meh neilou minam hih ding bel thasial huai mahmah ding in I um hi. Tua I thugen lungsim a vom tinten kawm in,  ‘khopi kulh kongkhak kiang a Zomi Upate leh namdangte akihou chiang ua’ - Minam Meh chih ding neihlouh ziak a Zomi Upate  mualphou tak a, selphou leh zahlak a a-omlouhna ding un, nam-le-gam itna ziak kia liauliau in, Minam Meh neih hoihsa in, ngaihdan hong kilui khia hi.

‘Huchi kawm kal ah’, ‘hun paita sa ah’ Minam Meh official in nei kei mah lehang,  ‘tu-le-tu in’, Zomite adia meh poimoh mahmah khat - Voksa Hou Sihzou Tangal Pok, thu-thak om ma a, Minam Meh bang a zuun a, chei tadih ding in thusun hong kipolut hi. I pom theih chiat uh leng I kilamen hi. Huchi ahihna ah, Minam Meh nana na hoih bukim a huandan I lunglutna lam uh hi ding a I gintak ziak inleh, khovel pumpi  in leng hon lametna uh hi ding ahihziak in, tutung in ahihleh, huai lampang I kikum ding uhi.

Heutupa Rev. H. Nengzachin (L) in vaan gam a hilhchet dan in “Huchi zodeuh leh, chih ding omlouhna mun ahi” ana chi hi. Gendan dang khat in, “Hoih bukim” chihna ahi pen hi. Carbon molecules lepkhawm a kibawl mihing maimaite a ding in ahihleh ‘hoih bukim’ ahihkeileh, ‘huchi zodeuh leh chih ding omlou’ a thil bawlkhiak – Sihzou Tangal Pok huandan tel in, thil haksa tak ahi chih leng I haih kei hial hi. Huchibang dinmun ahihleh, vaan gam I tunchiang ua I hihna ding ahi hi. Ahihziak in, ‘hoih bukim’ lamzuan a khual zin I hihna uah, Upate’n “Tupna a san leh kiakna (tunna tan) sang ahi” ana chi ua; huaiziak tak in, ‘huchih zodeuh leh chih ding omlou’ hiam, ‘hoih bukim’ bel I tup ding mah ahi, hon chisak hi. Huaiziak in, “Huchi Zodeuh leh Chih Ding Omlou, Voksa Hou Sihzou Tangal Pok Huan Dan” chih thulu in hong kizang hi.

Voksa Hou Sihzou Tangal Pok huan ding in ahihleh, hiai anuai ate kinamsa diam a  koih ding ahi hi (innkuan khat a piching 5 bang om ding in I suangtuah ding uhi):

  1. Antang – Phailel Sawk (Pava nou/dutnou) sehthum suah a seh khat.
  2. Voksa Hou – A tawm pen in baak 3 beek atneen sa in.
  3. Sihzou – Lom khat/Tel khat, malsa a koih ding ahi.
  4. Tangal/Soda – Tamlou.

Hiai ah, ‘Hoih Bukim’ a Voksa Hou Sihzou Tangal Pok huan tum I hihziak in, ‘Hichi Zodeuh leh Chih Ding Omlou, Voksa Hou Sihzou Tangal Pok’ om ding dan (attribute) bangchi bang hi hiam, chih a I chian kilkel phot uh ngai ding hi. Huai ding in, hiai anuai ate alou theilou a ngaihpoimoh a, phakchiam a I koih  ding ahi hi:

  1. A mel et in, na mehpok huan a limchiit mel ding ahi hi. Na laphuah, athu hoih tawk mahleh, a kaih(tune) ahoih keileh, kuaman sa nuamlou ding uhi. Tuachi mahbang in, na mehpok huan, a mel in asak keileh, kuanam chiam/ne nuamlou ding uhi. Naupangte bang in en in,”Duh keng” chi mawk ding uhi. Huai ahihleh, a huantu a ding a lohsapna lianpi ahi hi. ‘Huchi Zodeuh leh Chih Ding Omlou’ a mehpok huan tum I hi, chih manghilh keile hang maw! Huai ding in, na antang, khovel a mehpok kichi mukhetute – Zogam a Zodawn a Zomite antang ahih ding ahi hi (Zodawn antang omlouhna ah, lungsit tak kawm in Manipur antang achihte uh zat theih hi).  Aziak ahihleh, tua I gen antangte ahihleh, amin chiang un, naang ni-nia ua; mehpok khah, mehpok  bangsak khol diak uhi. Vai antang – basmati rice a chih khawng uh na zat leh, naang theilou in, na mehpok huan - miksitui/phaivangtui mah bang pelpul ding hi.
  2. A gimsi a namtui ding ahi hi. Hiai a gim namtui I chih, mehkan gim namtui hiam, ahihkeileh, nungakte bang a namtui vengveng ding chihna hilou in - Sihzou, Antang, Ta-ngal/Soda  leh Sahou te ahi ding bang a, ahoih huntawk a asepkhawm ziak ua, gimlim/namtui, I mehpok huan in thildang toh kikoplou a namtuina tuam liauliau aneih huai gen I hi hi. Huai na mehpok huan gim a zak chiang ua, agimdiiktute chilphul sak a: a nu sisa hiam, hing lai hiam, ahihkeileh,  a neulai uh hiam phawk khe sak thei – sahou sihzou tangal pok lou in apiak khiak theihlouh, gim namtui apiak khiak ding ahi hi.
  3. Singtuah a anhuan nawnlou I tam tak ziak un, tangal khaih bang leng, a biiktak in, khopi a tengte lak ah I om nawn  kei uhi. Huaiziak in, tangal chihna mun ah Soda(sodium bicarbonate) chihna dan in I lungsim un I thei ding uhi. Soda leh Tangal ahihleh, zatkop/zat-helh theih ahi chih theile hang hoih ding hi. Huan ah, mehlak a khaak/soh zah ding, Tangal/Soda leng, anhuantu in chep zeuhzeuh a hun I chih chia hun himai ahi, I chi ding hi. Huan ah, Sihzou leng – Sihzou  hou hiam, akeusa hiam hilou in, ateh hinglai, lohthak hileh, deih huai sese hi. Hoih bukim, huchi zodeuh leh chih ding omlou a sihzoupok  huan tum I hi uh!

A Huan Dan :-

Khai le, tu in ahihleh, atak gam ah I diang lutta ding uhi.

  1. Belsung ah, akimkhat sang a tamzaw deuh tui sung/leih inla, thuktung ah suang in. ‘Kisinsakna skul’ (school of learning) khenkhat, a kulmut kholdiakte’n -  na belsuan a tui asou chiang chauh a antang leh voksa hou (atneensate) na khak pat ding ahi, chih in na sinsak ua. Ahihziak in, hih tamthu(experience) a theih dan in (empirical knowledge) ahihleh, belsung a tuisou ngak ngailou in, antang leh voksa hou atneen te belsung a tui souma inleng  khak ngal poilou hi. Voksa I chih, sa minbaih ahihziak in, amah vuak a uilut lut /huan min phot ngailou hi.
  2. “A ngak peihte’n thupha ngah” na chi ua. Na antang khak ahong malh a, a hong min mahmah tan sousak inla,  ngak ngitnget in. Antang a hong min hoih chiang in, sihzou malsate belsung ah kha in.  Sihzou I chih panchik ahi a, amin zohlouh khak ding lauh huailou hi. Huan ah, a sial in ne lehang leng, gilnalou ding chi ahi hi. Sihzou I khak baihluat chiang in, min zaan-gawp in, heu semsom thei uhi. I mehpok huan, lim-le-limlouh lampang khoih buai kei mahleh, sihzou heu semsom in, I mehpok huan mel susia a, ‘bukimlou’ suaksak hi.
  3. Sihzou na khak khitchiang a, hoihtak a ahong sou nawn chiang in, chi (chi-al) leh soda/tangal kha inla. Chi leh soda/tangal khak zah ding ahihleh, hihtam thu a theih ahi a; huan ah, a hut leh hutlouh, meh huanlai chep zeuhzeuh inleng theihtheih mai hi. Chi leh soda / tangal ahihleh, a khak hun kikhel mengmenglou ahihna ah, amasa a tam lawmlawmlou khak phot a, akul leh poimoh dan a zil a, khak behlap theihzel  hi. Sihzou tangal pok ne-a-khang khia Zomite’n ahihleh, mehpok al lotel velvul kei henla, buhsih toh akikim in meh mawimawi le uh, nuamsa hun lel uhi. “Mehpok tam deuhdeuh I meh leh, mehpok lak a asa bang leng kimeh kha mun deuh ahi” chi uhi!
  4. Soda/tangal na khak khit chiang in, meh hong phul ding hi. Meh phul ding na taan/venna kawm in, keu in na tok ding hi. Mehpok I huan chiang in (keu a) toh poimoh mahmah a; a ziak ahihleh, huai in mehpok naang sak in - meh pok, meh pok bang sak kholdiak hi. Ahihziak in, meh toh bang leng lungsim nei a toh ding ahi a; toh ding hitah, chih thu a I mawk toh toh chiang in, atung a Sl. No 2 tawplam a kigen mah bang in, sihzou heu semsom sak a, I mehpok huan mel suse thei hi.
  5. Mehpok I huan chiang in, tui I leihzah ngei ngaih mahmah ding ahi hi. Aziak ahihleh, thuk tung a asou lai a atui hun mahmah a I theih leng, suankhia a, a hong khin/daih deuh chiang in, a tui kang in/ tawm deuh in, dat meihmoih thei hi. Khenkhat, a kho-ngei ngailoute’n mehpok a huan chiang un, mehpok lah bang, lah, buhsih mah bang meimawi in huan uhi. Huchi bang ahihleh, Minam Meh huan ding dan hilou himhim hi! Huaiziak in, thuktung a asou lai in ahihleh, a tuigel deuh/ tui tam deuh zek in kilang leh, I suankhiak chiang in, I mehpok huan, dat dan’ hunlel nuam mahmah hi.

A tawpna taktak ding in, a tui a tawm deuh leh, leih behlap inla. Huan ah, tui I leih beh chiang in, tok hetlou a sou sak nawn phot ding ahi a; asou nawn ma a mawk tohtoh ding hilou ahi, chihna ahi hi. Huai khit chiang in, hoihtak a ahong sou nawn chiang in, a al dan a hun hiam chih chiam inla, chi soh beh angaih leh, soh behlap zek inla; hoihtak a sousak a, toh zek phot ding ahi hi. Huai khit chiang in, a pok naang zizia a, na mehpok huan mel leng engsim ngiingei a ahong om chiang in, hunta chihna ahi hi. Thuk akipan suan khia inla, nek theihta hi.

Bon appetite.

 

Theihtuak : Hiai a Voksa Hou cihna mun ah - Bawngsa hou, Sazuksa Hou leh Sakhisa Hou leng zat theih veve hi. Bawngsa, Sazuk leh Sakhi sate ahih uleh, Voksa bang in min baihlou ua; a sa vuak antang toh  Sihzou khak ma a, sawt deuh ahihtak leh leng, huan min phot ding ahi hi.

Bawng ahih ciang in, India kumpite’n “Nu aw…” acih ngelhngelh uh ahi cih leh, Sazuk leh Sakhi te thah aa asa nek hiam, asa ne in ne keitale le, thah himhim Solkar poikhoihna ahi, cih ahihleh I theih luatsa uh ahi hi.

Read 434 times
Login to post comments