You are here: HomeColumnsZokhualSum Leitawi Zongsangpa

Sum Leitawi Zongsangpa

Written by  Khamkhokam Guite Published inZokhual Monday, 09 October 2017 12:53
Sum Leitawi Zongsangpa

Lettu : Khamkhokam Guite

 

Office kai tawp hun ahita a, office akipan pawtkhe dia ka kisaklai in ka khekol za-ip akipan in leiba sikna lai pek  nih dim a kigelh ka sawk-khe kha hi. Lohlak ni ding ahihleh,  a sawt mahmah lai hi. Lohlak hun ma a ka leiba ka dit theihna ding in kua sum bat d’in ka ngen mah de aw, chi in ka kingaihtuah hi. Huchi bang a ka kingaihtuah lai a ka kiang nai a ding omsun ahihleh Don ahi hi. Ka za-ip akipan laipek ka pholhkhiak lai leh, ka lu thakloupi ka khuat lai hon na en kawm in, “ Lawmpa, ka chetsiat lai sangmah in na chese zaw in ka thei kachi” hon na chi hi.

 

Don In Kei Hon Muh Dan

“Bang ziak in maw?” chi in ka hap bawl phei pah hi. Ka aw gindan akipan in mualphou khak ding ka lau mahmah chih a kilang hi. Don ahihleh khamtheih ngolvei dam nawn ahi chih, mi teng in athei uhi. A lohngaihna om nawnlou hial khop a ngaih ahih nung in, bang chichi hiam in ngei hon oh nawn hamham hi. Amah toh tehkak ding bang a tuh, kei ka hihleh mi hoih huntawk tak – Biakinn a kikhawm taima tak mai, high school ka kailai bang ale skul naupangte heitu a pang thei, Oklahama a ka omlai bang ua tuh Graduate-te lawi chairman  hiphaban, tangval fel leh omdan hoih, advertiment lam a nekzong dia New York khopi a pemlut ngat ka hi hi.

 

Don te khawng ahihleh etmai inle ka kikhe mahmah uh chih haih vuallouh in kilang chian mai hi. A baan tawn in tattoo akigelh dim neinuai a, a sam phek in, bilbah san khat bat zomah lai hi. Ahihziak in, a thugen in hon kiguihsak hi. Leiba ka hauh luat ziak a a guk a ka buai dan leh, leiba neilou bang a mite muh a om ka tup nasat dan hon theihpihtu hi in ka thei hi. Ngaihmuang tak in ka om thei nawn vualta kei hi.

 

“Brian, mi hoihtak khat zaw na hi a; ahihziak in, genta maimai le hang, lamdang honsa kenla, kholak pawtna khawng a Metro (subway) tuan man leh, kholak a nek ding neuhneuh lei chiang a ,‘Ka sum bawm ka manghilh kha’ chih hun hau lua chin a, piak kep ngai mun lua na hi. Khatvei leh hon din  chin a, a hun tamzaw atuh hon din nawnlou nei ve. Ka chetsiat lai a ka omdan sang a le chese zaw tham a hon  thei ka hi” hon na chihkhum lai zomah hi.

 

Kei leh Kei Ka Kimuh Dan

Mi zahtak huaitak khat hi a ka kingaih lai a, hiai khamtheih hih zongsang damnawn maimai khawng in leiba ngaihsaklou  mihing khat ka hihlam maitang a hon hilh bang tuh, pom dan siam haksa kasa mahmah mai hi. Etna ding vang mahmah hi. Zu leh khamtheih dang ah ka buai ngei kei hi. Ahihziak in, hichi bang a taihilh ngai ka hih dan ahihleh, vuallelhhuai lua  in ka ngai a, ka lungsim a na’ vengveng hial hi.

 

Hihzaw himah e, tunai teng in sum lam ah ka haksa mahmah hi. Tanchinbu changkangte ah advertisement ka zuak sek a, kha khat in dangka nuai bangzah hiam ka lohkhe zel hi. Sum leng tui zat in ka zang hi. Ahihziak in, ka nna akipan tawpsak in ka om a, huai nungsiah ka hih fuh thei nawn himhim kei a, Net magazine ah advertistment ka zuak nawn hi. Lohching ngeingei dia ka kikoih lai in, ka gintak a hong bang hetkei zel hi. Thil zuaktu dia lakthakte lawi in,  thil lei dia hong paite bang na chi zawl ding, bang na chi sai ding chih sinsaktu ding in goih in ka om nawn hi. Ahihziak in, hiai nna ahihleh, kha khat a nipi kal nih kia sep ding ahi hi.

 

Huchi in ah, ‘Hichi bang dinmun haksa tak a ka om zaw, hun tomchik sung a ding kia ahi a. Ka dinmun leh ka manphatna diktak zaw tua ka dinmun sang a sang zaw tham ahi’ chih khawng ngaihtuah in, kei leh kei ka kinem sek hi. Tunung sawtlou chia, tua ka dinmun haksatak – huihmut mah bang a hong veng guih mai ding a, kha khat a tua ka sum muhzah leh thum bang sum lalut ding in ka kingaihtuah hi. Ka dinmun diktak hi a ka ngaih, khaloh tampi ka lak lai mahbang in ka khosatou den hi. Huchi bang a khosa dia ka sum laklut in daihlou ahih chiang in, credit card zang in sum ka batlaktou zel hi. Credit card a sum leitawi theih zah ka tun chiang in, ka lawmte sum ka leitawi pan nawn hi.

 

Don Thuhilhna

Lawmte khat kiang a ka sum bat ka ditna ding in, lawm dang khat kiang ah ka leitawi nawn zel a; huchi bang in aguk in ka leitawi kualkual mai hi. Ka leiba akipan kitutkhiak tum in sum ka leitawi tam deuhdeuh a, ka leitawi tam deuhdeuh chiang in, leiba kokhuk ah ka tum thuuk deuhdeuh zomah hi. Huchi bang a, mite khem kual a, mite lak a mi bang tak bang a tel thei zel a ka kingaihtuah lai in, khanvual pawl phaban a leng ka ngaihlouh Don te khawng maimai in leiba ka hauhlam bang chibang a na thei kha ade aw?

 

Ka leiba hauhziak aguktak a thei kawmkawm in, “Bangziak a leiba hichi hauh kha ka mahmah hiam, kenle theikhe zoulou hi mah veng aw” chi in Don thugen ka dawng hi.

 

Aman ahihleh, “A bul I pat dan kibang kei mahleh, atawp a I thuak dan leh a mangbat huai dan zaw kibang ding hi ve aw. Ken, haksatna ka pal gaalkai ahih leh khamtheih ahi a; nang na tuah lel lel ahihleh leiba hauhluat hi in ka thei hi. Na lohlak sang in na sum zatna a tam zaw a, huai in, khamtheih ka hihlai a ka haksatna bang haksatna hon tun hi in ka thei” chi in gen behlap touzel zomah hi.

 

Khamtheih hihte ki-etkolna Thukhun, Kalbi-12 (12-step programme) achih uh, Don in hon hilh hi. ‘Ana hi phiangsan mah ve maw! Kei bang tuh, nang bang a khamtheih ngolvei, mi simmoh huaite khawng dan hi zenzenlou ka’ ka hia. Khamtheih hih zongsat leh leiba hauh chih khawng thil kibang hetlou ei ve’, lungsim a chi kawm in, kei leh kei siam ka kitan thouthou hi.

 

“Sum leitawi zongsat luat ahihleh, khamtheih hih toh thil kibang thou dan a ngaihtheih ahi hi. Khamtheih toh kibang thou  in, leiba hauh luat leng a lauhhuai a, a hihtu kia hilou in – a innkuanpihte natan un a kiaksiat loh sek ua”, chi in lungsim guk a ka  ngaihtuah thei hileh kilawm in hon hilh sumzom hi.

 

Card khat hon pholhkhia a, huai card a Debtors Anonymous chih kigelh ka muthei hi. “Biakinn nuai a Hall ah akimu khawm zel ua. Vasiim sin himhim mah dih. Hon panpih thei ding ua gingta hi veng aw” chi lai zomah hi.

 

Ki-im zoh vual ding hilou khop in Don in hon theih chian a, bang chi bang a athugen dawng ka hia chihle ka thei khe zou nawn kei hi.

 

Hiai ka za-ip, sum a omphot leh, chikmah chiang a muhkik nawnlouh ding a zatgaih pahpahna ka za-ip sung ngei ah: leiba hauh luat ziak a chimoh leh mangbangte pawl Card ka vom a, Manhattan West Side lam a ka pindan luah(Studio apartment) lamzuan in ka paita hi.

 

Nopsak Utluatna

Sumdawnna khovel a ka meltheih khenkhatte ahih uleh, ki-show phangphang nuamsa chi ahi uhi. Khat veivei annek khawm khawng a sawm guih ua. Car mantam taktak a hek ua, a paina peuh uah Gold leh Platinum Credit Card khawng a zang ua, a hinkhua uh nuamsalaw tuam uh hileh kilawm in akilang uhi. Kei ka hihleh huchi bang ka hi kei a, kuamah hauhsakna gou ka luah kei hi. Ka naupanlai akipan in mite kongtual loupa’ meetmai in ka kiloh a, singpi hotel ah ka sem nawn a, ka veng sung uah encyclopedia busah pipi  zuak in ka vialvak a, thil zuak ahihleh ka siamna lamtak ahi hi. Ka thil zuak lei nuamphaloute bang le, hoihtak a ka genpih chiang in hon leisak ding in ka thuzoh zou sek a; ka kamsiam a, thathou tak in ka sempeih zel bok hi.

 

Ahihziak in, mite thugen nial leh mite ngetna athawn a koih, ka kisuanlahna lamtak ahi hi. Ka sem-gim bok a, ka khaloh leng a tam hi. Ka sepgim ziak in nopsak phu liahliah in ka kithei a; ka khosakna a sang a, sum-le-pai leng ka zang hek mahmah hi. Ahihziak in, huai dinmun ka omna ding diktak hi-a ka theihziak in, ka khosak dan ka hih niam thei maikei a, khamtheih sal a tangte mah bang thou in, nopsak utluatna sal ah tang hi ding dan ka hi. Ahihziak in, ka hihna ka pom thei hetkei hi.

 

Sum a om chiang in  haksa a om kei hi. Sum a omlouh chiang in ahihleh, sum leitawi ding ahi mai hi. Credit Card company te akipan in leiba siikna ahong tung tam deuhdeuh hi. Leiba siiktute’n hon chiamteh ua, Bank-te hon meltheih dan ahong dikkei panta hi. Huaite theina pi in, theilou dan in ka omtou zel hi. ‘Zing ni, thai ni mah a ka leiba teng dinkhin duak ding ka’ ka hia’ chi in ka ngaihtuah hi. Ka dinmun zumhuai mahmah ka hih fel mai thei kei a, kitheih khem-mohbawl lam in ka pang zodaih mai hi.

 

Hong Kilang Kheta Hi

Zan khat tuh ka pindan luah kongkhak ah kisuankhe ding a theihsakna laigelh hong kitak khe dengdong tamai hi. Kongkhak ka hon kawm in huai laigelh kitak tuh ka botkhia a, nuailom in niinbawm ah ka pai hi. Ka lumsuk mai hi. Ahihziak in, huchi bang a hihfel maitheih ding chi hilou hi. Court ah sap in ka om a, din ding in ka kichiam a; ahihziak in, a ditna ding sum ka nei hetkei hi. Mualphoulaw mahmah dia ka kitheihziak in, Biakinn kikhop tawp in Saptuam Upa khat kiang ah ka gen khong hi.

 

Saptuam a dia mi taima leh phatuam ngaitak ka hihlai a huchi bang  haksatna ka tuah mai hih ka Upa un poi asa mahmah hi. Ken, mite kiang a ka kigen sek dan bangthou in, Upapa’n leng ka haksatnate sawtlou nungchiang a fel duak ding in a gingta hi. Paukam  siam takleh, mi ginom melpu deuh mai leng ka hi hi. Saptuam Committee in ka tungtang a ngaihtuah ua, ka pindan luah man ka bat tengteng gawmkhawm chiahchiah cheque gelh in, inn neitupa kiang ah hon piaksak uhi. Huchi in, ka thoveng huai tadih hi.

 

Ka Saptuam Upa un Debtors Anonymous a tel ding in hon genpih kei hi. Sum leitawi ngolvei lauhhuai dan leng hon hilh kei hi. A hon genpihlouhna san ahihleh, huaikhawng a tel ding khop a dinmun sia dan a akiang a ka kigenlouh ziak ahi mai hi. Midangte kiang a ka kigendan mah bangthou in, hunsawtlou nung chiang a thilteng hihfel duak mai didan a ka kigen ziak ahi hi. Paukam ka siam a, huai ka paukam siamna zang in Upa-pa ka khem ahi pen mai hi.

 

Ka dinmun hoihlou tak tuh ka Saptuam Upa uh ka hilh ngam louh kia hilou in, kei ngei inleng ka thei ngam kei hi. Ka leibat bangzah mawngmawng pha ahia, chi a gawmkhawm ka ut hetkei a, leiba siikna laithon ka muh khenkhatte bang tuh hon leng ka hong nuam kei hi. Nna hoih zaw ka muh peuhmah chiang a hihfel mai ding in ka kikoih hi. ‘Ka chet buai lam,  nna hoih zaw ka muh ma in zaw ki-im bikbek maileh, sawtlou chik chiang a kihihfel mai na ding ka hih chia’n’ chi in ka ki-ngaihtuah hi.

 

Ka Nu leh Ka Pa

Ka nu leh ka pa ka ngaihtuah kha sek hi. Ka pa ahihleh ukil ahi hi. Sum tungtang ah ka pa deih dan chitchiat in, khelkhel thei mahmah hi. ‘Sumtang piak ngal ding na neih keileh, bangmah lei ken’, chih  thupi in nei hi. Ka nu ahihleh skulpu ahi a, kei bang thou in sum zat a olsam sak mahmah hi. Sum a zang khe zungzung a, alungsim in veina leh ngaihtuah zuina anei himhim kei hi. A nih un sum zatdan tungtang ah akinial deuh gige ua, ninhuai kasa thei mahmah hi. High School ka kailai in akikhen namah uhi. Ka pa kiang a sum ka nget chiang in, ka piak kik dan ding fel thipthep in hon bawl sak hi. Ka nu’n tuh hon pe mai a, a phawk nawn kei hi. Ka credit card neih nanung pen leng ka nu’n hon hihpih ahi a, ka bat tengteng ama bat bang in apom a, poi asak chi hetkei hi.

 

Ka khaloh tawm chik ahi a, dollar 400 leh 500 (Rs 26,000/32,500) vel kia ahi a; ahihziak in, kha thak lohlak chia dit ding  chi in mun tuamtuam ah leiba ka nei zengzung hi. Ka nna ahihleh, kha kimkhat kia(nipi kal nih) sep ding ahi hi. Ahihziak in, kha pumlum khaloh la bang in sum ka zang hiauhiau mai hi. Khaloh tamzaw la dia ka kingaihtuah lai in, ka la thei mai boksi kei a; a za-a-sim mun tuamtuam a ka bat zengzungte gawmkhawm in hon gaakton deuhdeuh tamai hi.

 

Ka credit card ahihleh, ka nu toh ka kikop uh ahihziak in, ka sum zatdan tengteng ka nu’n ana theithei vek zel hi. Ni khat, ka nu’n hon phone in, “I leiba uh tam lawta a, ka dinzou nawn mahmah kei di” achi hi.

 

Huai tung in leng “Nu, na lungkham kei le chin, nna hoih zaw hon mu ding ka’ ka hia. Huai hun chiang a I leiba tengteng din khe ziau mai ding ka hi” ka chi suk mai hi.

 

Bilvuhlouh Hinkhua

Ka lawmte khat in mun tuamtuam a, tamlou lou a sum   leitawi zengzung lou a, bank akipan tamtham deuh loan la ding in hon thuhilh hi. Bank ah loan ka va-ngen a, ka hihdan ngeina bang in gendan siamtak in kava kiphat vel a, Dollar sing khat (Rs 6,50,000 vel)loan lak  hon na phal sak mai uhi. Ahihziak in, ka dit nawnna ding a sum pung tam lua ahi, chih thei kawmkawm in sumzat ka kidek zou mahmah kei hi. Huai sumte zat kal ka ngaklah luat ziak in ka leibate le dinloupi in, Caribean tuikulh gam lam ah ka zinpih daih mai hi. Ka lawmte bang in ka thil hih dan lamdang asak thu uh ka na thei hi. “Ka dinmun haksa lotel mahmah in chin, khawltawldam kiphamoh lua ka hi” chi in kei leh kei ka kizumzel in, ka kigen hoihtawm hi.

 

Huchi in, Krismas  ka zangkhin a, innkuan pihte veh kual ding in Oklahama lam ah lenna in ka leng phei vangvang hi. Innkuan khosak haksat vanglai a ka lenna tuan man tamdan lemchang a la in, ka U Robby in hon taihilhna in na zang ngal hi.

 

Chimoh Beidong

Ka nu inn a tutna pindan ah ka tukhawm ua, ka U in heh mahmah kawm in “Brian, nang ziak a I nu’n leiba a ditzohlouh ding neihloh ahi. A sum dinmun akisiat gawp thu (Bankruptcy) a puankhiak mai ngai ahita hi. Huai loungal ahih dingdan dang om nawn mahmahlou hi” hon chi hi.

 

A puak zakta hi. Im ngaihna a om nawn mahmah kei hi. Ka dip khawng in hon phu lutlut a, lungtang puak-kham a si  mai ding ka hi de aw, ka chi manhial hi. Ditsak zou ding hileh kilawm tak in, “Bangzah khawng ahia akiphamoh?” chi in kana dong khempeuh hi.

 

“Sing nga… huai le a tawm pen in….”

 

Kei ziak in maw, ka nu’n dollar sing nga (Rs nuai 32 val)  leiba aneih? Ka nu Account zang in huai zahzah maw ka na bat tak? Huai zahzah zangbei ka hihlam ka phawk mahmah kei hi. Zangbei hita lengle, koi a ka zatbei hi ding? Bang khawng ahia ka thil lei? Dollar sing nga man ding bang thil kol ka nei ale? Khat leng kol himhim ka neikei hi.

 

Huchi in, ka U Robby toh, ka nu toh, ka thum un Oklahama khopi a Dan thei mite office ah ka hoh khawm uhi. Ka khabe sepsiamna zang a ka leibat mualphou huaitak, kana im sekte tu’n  Dan dungzui a  puanzak ding ahita hi. Ka zumlaw mahmah a, etna ding mit nei mah leng, et ngam ding himhim ka neita kei hi. Mi hai bang mai in, khopi tuamtu vaan dum kiikiai kia mahmah ka mitsuan vungvung ringot mai hi. Ka sunglam  ling keuhkeuh in ka thei hi. Ka nu, ka pianna nu mahmah tung a bangziak a hiai khelhna hih  ka hi  mahmah diam aw?

 

“Kei Mipa, Ngolvei Ka Hi”

Zum tuntun kawm in New York khopi lam ah ka kiknawnta hi. Hon panpihtu ding gentaklouh, houlimpih ding natan ka muzou nawn kei hi. Saptuam in ka innluah man hon piaksakta ahihchiang un, nget beh chi ahi nawn kei hi. Nopsak melpu, sum hauh mel leh lungsim thoveng tak nei hihleh kilawm tak a khosak in a selguk, ka hihna diktak – mial sahtak in atuam  tuh ka lawmte’n amuta ua. Huchi bang dinmun a ding kawm a thoven chitak a khosak a phatuam kei hi.

 

Huchi bang in, a ko tawp ah, lawm dia le ka deihlouh, hon pawl phaban dia le ka koih ngeilouh, khamtheih hih zongsang akipan damnawn Don in ka dinmun diktak hon hilh hi. ‘Sum leitawi addict ka hi. Leibataddict ka hi.’ Pomsiam haksa mahleh, ka pom a ngaita …… Ka pomthei tuan mahmah kei.

 

Ka pindan sung ah ka tu hi. Leibat ngolvei, Debtors Anonymous-te kimuhkhawmna address kigelhna card, Don hon piak ka pholh khia a, card nunglampang a kigelh akimuhkhawm hun uh ka chiamteh hi. Addict chih ahihleh, haipih ding khop a thil hoihlou chiin zongsatna, tawp tumlou a hih sunzomzel  ahi hi. Mi paukamsiam tak ka hi a, addict-te dinmun hoihlouh dan leh beidot huai dan gen ding bang hitaleh tuh, ka gen siam zuahzuah mahmah ding hi! Kei, huchi bang addict-te hikha maw? ‘Zenzen, laizang, kawitha-it ei ve! Kei bang tuh leibat ngolvei ka hi zenzen sam a, lampaam sik-khial khazual maimai kei vele’ – chi in ka hihna diktak pom utlou in, kei leh kei ka kingaisiam teitei sek hi.

 

Atak Gam

Dohkan ah ka tu a, ka mazawn a leiba sikna laithon kichiang venvonte, a envelope - hon leng ka hon noplouhte ka en vungvung hi. Hiai laithonte zuau hia le? Ka manglam khovel hia le? Hilou, a taktak ei voi. A envelope tung a min kigelh kei min mahmah ahi hi. Hiaite limsiam tawm ahi kei uhi. Leibatu ahihleh, kei mahmah ka hi hi – chi a kingaihtuah in, kei leh kei ka kiphong halh panta hi.

 

Ka hihna diktak pom lengle, ka pom toh kiton in ka leiba zouzaite a bei guih zenzen kei hi. Sum chil deuhta ding chi lengle, sum chil di le ka nei nawn himhim kei hi. Khat veivei bang ka dohkan drawel kawmkal khawng a sum nen om kha zenzente, nidang a bang mah a ka ngaihlouhte khawng ka zong khawm hi. Nidanglai sumsik, collector-te kiang a mantam deuh a zuak dia ka koihte khawng ka khonkhawm a, gil a hong kial taktak chiang in mantam zodeuh a zuakthei ding dinmun ah ka dingta kei hi. Ka za-ip ah ka vom a, nek ding leina in ka zangta hi.

 

Hichi mai in zaw, maban ding ka nei kei hi. Don thugen dik ei ve. Hon impih a, hon zumzeltu ding sang in, hon panpihtu ding ka kiphamoh zota hi. Ka haksatna ahihleh, kei sang a lian zaw ahita uhi.

 

Sum Leitawi Zongsangte Lak Ah

Huchi in, a tawptawp in, New York Fifth Avenue kongzing a Biakinn lianpi khat sawng nuai a kimuhkhawmna pindan khat ah ka vaklutlou theita kei hi. Leiba hauh luat ziak a mi mangbang leh chimohte panpihtu Debtors Anonymous pawlte kimuhkhawmna ah ka vatelta hi.

 

Mi zawng leh genthei, geep nimnemte lak a vatel ding ka kisak leh, ka gintaklouh dan tak in, huai pindan sung ah mi zahtak huai pipi, kichei nalh taktak, sum leitawitu hilou a- sum leitawi petu dia kilawm taktak, a-za-a-sim ding a na tu khepkhup mai uhi.

 

Khat khat in amau tanchin akigen chiat uhi. Sumchiil dan theilou a sum a zat ziak ua a kiaksiat thu khawng uh, Court a sap a a om dan khawng uh, a lawmte uleh a innkuanpihte uh hoihna suang a sum a leitawi kual dan khawng uh  leh, amau ittute a sukmualphou nasat dan khawng uh, a khut ua sum a om phot leh, leiba omsate dit malak a, nopbawlna khawng maimai dia zat a ut tuntun dan khawng uh agen uhi. Huai a thugente uh ka zak chiang in kana zum tuntun hi. A thugente  uh, kei tanchin ngen ahi hi.

 

Leiba Maituah 

Ka lungtang vaan a khai mah bang in ka kithei a, naksam a sisuk mai ding ka bang hi. Utlou pipi kawm in leiba siikna bawmte tuh khatkhat in ka hong hi. Ip khat bang leng gik mahmah goigoi in ka thei hial hi! Mangbang lua ka hih chiang in, dohkan tung ah ka bokkhup ringot hi. Thumna ka nei a, Pathian kiang ah ka leibate hon ditsak ding in ka ngen ngam kei hi. ‘Toupa, thutak maituah ngam ding in hatna hon pia in aw’, chi in mangbang chimoh in thu-ngetna ka nei zota hi. 

 

Ling kouhkouh kawm in huai envelope-te a ban a ban  in ka hong tou zel hi. Ka sum batte a gelh in ka gawmkhawm tou zel hi. Ka leiba tengteng gawmkhawm thutak mulkimhuai hina maizen e!

 

Bang chi dan a leiba hiai zahzah neithei ka hi de aw, chih ka ngaihtuah chiang in, ka theikhe zou mahmah kei hi. Zum tuntun a phatuam kei a, kisikna in phattuamna a nei kei, lauh in omzia anei kei a, kigelguksan theih leng hilou himhim hi. Sumchil chi in ka Pa kana dem sek hi. Ka nu thil phalna phaze sa in, ka nu hichi bang in ka hih mualphouta hi. Tua tuh, kei mualphouna kia hilou in, ka innkuan uh hihzahlaktu ka hong hita hi.  Hihtheih dang ka nei nawn mahmah kei hi.

 

“Toupa….Nang Tellou a Zaw Maw….”

Leiba tuilipi a tum-mang kawm a leiba neilou bang a kilat tum; zawngsanpa hi kawmkawm a, mihausapa bang a kilat tum sek; paukamsiam a mikhem hatpa Brian khovel atawpta hi. Brian diktak, genthei-le-liangvai, mi beidong leh lungsim sung a liamheihawi a, na-saa’ a thum hut hut leh, a leibatte a ngaihsaklouh   gige ziak a a lawmte leh a innkuanpihte tengteng minsesak gige tu Brian  tuh, pindan tuanglai ah ka khukdin suk nop hi. “Toupa, nang tellou a zaw maw, bangmah hi mahmahlou kei ve; hatna himhim ka nei kei; ngaihdam taklou,  kei Brian, ka khelhna tengteng toh na mai-ma ah ka hong pai hi…..” chi in Toupa ka samta hi.  

 

Pathian kia loungal in a hepsiang zohlouh ding khop a nok, mahni singphuksa nok a taang kawm in, mahni  hatna leh mahni mi khemsiamna zang a thil hihfel  tumsek kana hi nengnawn hi.

 

Pathian’ mai-ma a ka kipuan kawm in, ka mi hinpihte tung a thil ka hihkhelh tamdan zouzai ka ngaihtuah khia hi. Mite lungsim kana hih nat khak tengteng, Pathian tung a khelhna ana hi hi.

 

Gamkeu, Gamdai Hinkhua

Huchi bang a ka hihna diktak ka puankhiak nung in hon hehpih a, hon panpihtu(sponsor) ding mi khat a om hi. Ahihziak in, ka khosak dan leh hin dan ngeina tengteng ka khek khiak vek ahong ngaita hi. Nidang a ka nek-le-dawn bangbang ka ne in ka dawn phazou nawnta kei a, ka kizepna ka khen a ngai a, nidang a car a tuang sek, khe a ka pai angaita hi. Ka hihna ki-imlou in, ka hihna bangbang in lawmte lak ah leng ka kiphoulangta hi.

 

Hon panpihtu in, “Sum bat leh sum zatdan ngaihpoimohlouh,  zu ngolveite bang a ngolvei theihthou ahi uh” achi hi. Ama phalna lou in sum ka leitawi thei kei a, ka budget le ka hihsang ngam hetkei hi. Ka meetna di ngeingei a ka theihte ah leng, sum sen ngai ahih nakleh hon kham a, ama chih bangbang in ka khosatou zel hi.

 

Suahtakna Thupi, Suahtakna Lamdang

Huchi in, nidang a ka khaloh kimkhat vel chauh loh in NGO khat ah hun pumlum(full time )in ka sem hi. Kum 6 sung mahmah , awl awl in ka leiba ka dintou zel hi. Kum 6 a hong bei hial leh zaw, ka leibat tengteng ka din gai sipsipta hi. Leiba suak-le-sal akipan ka suahtak sang inleng, khalam a ka puksiatna akipan ka thohnawn thupi ka sa zaw hi.

 

Mihing kipaksaktu sum-le-pai ahi chih ka gingta nawnta kei hi. Mi khenkhatte’n wine nou khat dawn a, hun asak uh ka theihsiam pihta hi. Ahihziak in, sum zat leh sum leitawi ngolveisa kei bangte a ding in ahihleh, nunlui leh hindan lui a kiknawn utna sung-gil ah asi taktak thei kei hi. Huchi bang khemna akipan vualtungtuanna ahihleh Pathian hehpihna akipan kia ahi, chih genlou theilou in ka kikoih hi.

 

Tu’n ahihleh, kisaktheihna toh ka leiba tengteng ka dinkhinta e, chih khovel zak ding in ka puangkhe ngamta hi. Advertisment lam ah bok ka dianglut nawnta hi. Tu’n ahihleh, ka sum zatna, aneupen tanpha leng ka gelh khia in, ka chiamteh gigeta hi.  Ka khaloh akipan suut vengvenglouh in sum ka leitawi nawn kei hi. Mahni a kimuang ngam ka hih nung inleng Debtors Anonymous pawlte kimuhkhawmna ah ka tel gige hi. Paukamsiam tak a thil zuak bangleng ka pan nawnta hi. Ahihziak in, ka hihna loupi hi dan a kilimsiam ka tum ngei nawn kei a, thil diklou a om chiang in  zawntat tak in ka koih dap maimai nawnta kei hi.

 

Don ka mu kha ngei nawn kei hi. Pathian kiang a ka thum chiang in ahihleh, amah ka phawk gige hi. Ka siat lai pen a, midang kuamah in hon hilh noplouh lai ua, hon thu hilhtu amah ahi hi. Ka kiaksiat vek nung a hichi bang a Pathian angsung nuam a ka puklut theih zenzen leng vangpha  ka kisa thei mahmah hi.

 

Gelhtu : Brian Robbinson, New York.

----------------------------

Read 344 times Last modified on Monday, 09 October 2017 21:07
Login to post comments