You are here: HomeColumnsZokhualBuaina A Om Chiang In : PTC, YPA Leh HKL

Buaina A Om Chiang In : PTC, YPA Leh HKL

Written by  Khamkhokam Guite Published inZokhual Thursday, 04 January 2018 14:41
Buaina A Om Chiang In : PTC, YPA Leh HKL

~ By : Khamkhokam Guite

 

Buaina a om chiang in, a phelhtu leh, thulai gentu dia kilawm om hi. A kisubuai tegel a ding in- heh leh thangpai a thugen leh thil hih tampi a om nung a, lemna thugen dia a bulpantu hih ding, kiniam khiaktu hih  ding thil haksapi khat ahi hi. Hiai ahihleh, eite kia hilou in, mihing tengteng mizia ahi hi. Huanah, vuallel kisa hiam, vualtungtuang lua dan a kilang a om chiang in, i lemna bawl - lemna buching leh lemna kuitung hi theilou hi.

 

Ahihleh, Lamka khopi a mipi sousang a, mob rule om a, siluang a leikhiak ding khop a thil hoih leh manpha I loh khiak ding uh omlou pi a, bangziak a tuailaite hinna khahsuah sek i hi ding uh? Abultak ahihleh, mipite’n thudik a vaihawmna omlou a, kuamah athudontu ding omlou a atheihziak ua, beidong tongkhongna ziak ahipen hi. Huanah, buaina apian chiang a, neitu tan tang a, mahni hinna leng phal a, buaina pianna mun a, “Naute aw, hichi ding hikei veh” chi a banzaktu ding a omlouh ziak hi in leng kilang hi. Huchi bang a banzaktu in  ‘moral authority’ aneih ding ahi a; mipite’n –“Aman hon it ahi, aman I nam it ahi. Aman achih leh zaw dik inteh” achih theih ding uh mihing I neihlouh ziak in buaina tuaksek I hi un leng kilang hi.

 

Bangziak a mipite’n a muan ngam ding uh, ‘moral authority’ nei heutu neitheilou I hi ding uh? Hiai dotna I dawnna ding in dotna dang nih I kidong ding hi. Bangziak a Pathian in meidil leh vaan-gam bawl ahi ding? chihleh, Bangziak a solkarte’n suangkulh bawl ahi ding uh? Aziak ahihleh, ahoihlouh chiang un mihingte gawt ngai uhi. Mihingte’n a hoih lampang I teel theihna ding in, a hoihloute gawtna ding suangkulh leh meidil bawl  ngai a, bawl inleng  om hi.

 

India bang a kiteelna gam ah leng heutu hoihloute gawtna ding leh heutu hoihte pahtak ding dan feltak Dan ah om hi. Heutu hoihlou bang chi gawt ding? A inn hal ding hiam, suang a den ding chihna hilou in, kiteel nawn chia teel nawnlouh a, a dinmun ua kipan lakkhiak ding hi mai hi. Heutu hoih I neih matan vote tungtawn a heutu khek khek bangleng poihetlou hi. Heutu hoihlou I chih nam adia hamsia leh virus lauhuai ahihziak in, ahoihlou pipi khawikhawi ding hilou hi. Heutu hoihlou I khawikhawi chiang in, nam vangtah  kisuak thei hi. Huanah, Heutu hoih I neih chiang a, I vote a hong lei ziak hiam hilou a, nam-le-gam a dia ahoihziak a, eimah deihtelna diktak ziak a i teelching nawn zel ding ahi hi.

 

Israelte tangthu enle hang, kumpi thulimlou, milim bia khawng a neih khak chiang un, mipite’n milim besuk mai uhi. Mipite’n I theihlouh kal in, heutute mizia  kinaklak lua hi. Israelte’n kumpi hoihlou aneihchiang un, a sahkhua uh natan hih buahthah in om a; a mizia uleh namzia uh segawp a, huaiziak mah in, a khotang uh buai a; a pawlpi tuamtuamte uh ki-ngiik tuah in; huai in a nam khuampite uh nget gawpsak in, anam thagui uh muih a; huchi in, atuak teng in chilphih ngam uhi. A sabiakna uh a buahthah chiang in, Jehova in  a thohlawmte uh, a halmang kithoihnate uhleh, ni poimoh a Amah a biaknate uh kihhuaisa hi. Huai in a gahsuah ahihleh, Pathian  in amaute nung-ngatsan in, suak-le-sal a kaihmang tanpha in om sek uhi. 

 

I theihchiat mahbang in, I damlouh chiang in, zanni hiam, tuzing a I nek hiam, i dawn hiam ngohsek mahle hang, I natna hong kipatna diktak  ahihleh, sawtpi akipan tep-le-muan hiam, dawn hiam, I kuva hailuatte akipan awl awl a  (natnate) hong kipan hisek hi. Huchi mahbang in, I minam damlouhnate uh leng sawtpi akipan a I thilhih ziak uhiam, I hihlouhte uh  ziak hiam  hi naknak hi. Huan ah, hihlouh dingpi I hihkhak ziak bang leng hi thei hi.

 

Huaikhawng I gen leh, tulai a Paite namsung buaina – PTC leh YPA kikal tungtang I lungsim ah hong lang hi. History hiam, revolution hiam a pangkha- actorte’n huchi ahihlam a theih khollouh uh ahihleh, ‘muhtheihlouh khut in’ chessboard a ‘sa-te’ bang a vial khinkhin a, khatvei leh ‘sa’ dang nekna dia zang, khatvei leh amau neek a om uh, akhintu in alangpa dalna(block)  dia azat hun bang om; ahihkeileh, ‘sa’ dang tawmkaan sak hi.  Tulai a PTC leh YPA buaina i theihchetna ding ahihleh, phamsa Pu N.Gouzagin hun nunglam a Paite kampaute’n I vote uh I zatdan un thupo ding in I gingta hi. Tutung in ahihleh, huai lampang I sui kei ding hi.

 

PTC , YPA  leh Pu Hangkhanlian(HKL):

PTC leh YPA kal buaina leh, bangchi hih vaiveng ding chih, I ngaihtuah chiang in, I thupatna a I gen, “ Buaina a om chiang in, a phelhtu leh, thulai gentu dia kilawm om hi “ I chih lungsim ah hong langlou theilou hi. Pu Hangkhanlian (HKL) in amah dem nuam(gige??) dan in hon na ngai kei henla; hiai buaina hih vaivengtu ding ahihleh amah ahi, chi nuam dan i hi!

 

Khatna ah, Paite  hikei leh, Pu HKL, tua MLA achinna Constituency a chinglou ding hi.  Milawngte hiam, kuate hiam hileh, a deposit tanpha loss ding hi. Huaiziak in, amohpuakna a bing-a-la (compartmentalised) theilou a, Paite nam sung a buaina, chidamlouhna khatpeuh hitaleh, Gilead singnai nuh a damsak, ama mohpuakna liauliau ahi hi.  Paite nam sung a lawi khat heutu(factional leader) dan a akikoih ding hilou himhim hi. Paite nam pumpi’ heutu ahi a; huchi bang a akilat a, mipi inleng huchi bang a amuh  uh poimoh hi.

 

I tenna gam bang a multi-party election gam koimunpeuh ah, a ut leh peihteng in election tuh zoizoi ua;  vote zonlai in kigense kheukhou uhi. Paite innkuan sung ahihleh, election lai a akigense ngamlou lampang I hi zaw uhi. Hiai ahihleh, Gam Dan(Law of the Land) in aphal ahi a; thillamdang lua leh  kithutuahlouhna dan a ngaih ding leng hilou  hi. Ahihziak in, election zohchiang in ahihleh, a vualtungtuang pen in  lungsim liantakpu a, miteng uapzou a vai ahawm ding  ahi a; vote zonlai a ki-phuai keh khaknate, ki-akpi samphainate leh, kisik-keh khaknate awlmohna toh hihdam atup ding ahi. Eilawi I hihleh,  election chiang a a nambing a vote kipia  hihchiang in, huai poimoh kholdiak hi. Huchi ahihkeileh, MLA election kisiatloh zaak ding  I hi uhi. MLA election khawng maimai a kise ding khop a nam mawl leh nam tuantual kihi nawnlou hi. Huaiziak in, I dinmun toh kituak nawnloupi a khosak ding hilou himhim hi!

 

Nihna ah,  Manipur Asembly election a Pu Phungzathang(PZT)  leh Pu Hangkhanlian(HKL) constituency khat a kituh ua; Pu PZTching a, Pu HKL a chinlouh chiang in, Paite nam pumpi in buaipih luailuai ding khop a haksatna piang ngeilou hi. Ahihziak in, Pu PZT chinglou a, Pu HKL achin chiang in buaina om gige hi(1998, 2017). Hiai tungtang ah, ngoh ding omtham ding hi. Ahihziak in, ngoh ding hoihtak I neih ziak a lungkim sukmai ding hilou hi. Aziak ahihleh, huai in I  haksatnate/problem hih vaivenglou hi.

 

Kaikuang in Temtatpu chil a khatvei dawtna ahihleh, thil omthei mah ahi. Temtatpu in kua’n a chil dawt nuam di’a ngaihtuah khollou a, zawntat tak a na tu lehluah leng hithei hi. Ahihziak in, Kaikuang in Temtatpu chil 2vei, 3vei dawt thei taleh, bang ngaihdan I nei ding? Kaikuang I chih Kaikuang hi a; Kaikuang bang a khosa himai hi. Huaiziak in, a khatvei experience ziak in Temtatpu in sinlai hoih na sinkhia in, na kihui siam deuh henla, akim-le-kiang na khiang khol khaleh, hon chisak hi.

 

Tribal society I hi ua; a khilkhil, a bawngbawng a om leh, ‘pawlpi’ poimoh taktak bang leng nei I hihna uah, Pu HKL in ‘inn sian, lou sian’  thoih kimlouh nei bangleng  hithei hi. Ningol Chakkouba a abuainate leng vengta ding ahihna toh, Minister-pu in lungsim liantak toh thathak la a, a homework hon hih ding in I ngen nuam hi! Huai hih Paite nam pumpi a ding a poimoh ahi hi.

 

Huan ah, Paite nam suangphum tung a kinga ‘pawlpi’ te’n leng, hut tuam, paihtuam neilou a, a kingakna uh suangphum a linlouhna ding a, nam sung kithutuahna a ngaihpoimoh ding uh ahi hi. Huchi ahih keileh, “Khuangbai a sih hun atun chiang a, akhe akipan amah leh amah kine toutou a, a lutang kia a om chi’a, kam khat kisuah phuau” achih utoh kibang ding uhi. Huanah, nam kithutuahna ding in, ‘pawlpi’ in kiniamkhiak leh, akul leh(kul lua!), vuallelh bangleng akizil ding uh ahi hi. Kithutuahna leh, vualtungtuang  zaw hih gem-gam gige tup  kituaklemlou hi!

 

Thumna ah, PNC min a siluang kikham, lubuk phal leh PNC na vakvaihpih mi tampi na omta uhi. Huchi bang a ‘PNC tak a’ zing na thou a,  PNC adi’a ginomtak a sunni tum a na khosate’n  ‘Nation’ akipan ‘Tribe’ a hihnung tanpha in a ginomna uh PNC akipan PTC ah olsamtak in na nga thei uhi. PTC heutute ahuchi uh chihna hihetlou in, huchi bang a mi ginom tampite ziak in, PTC heutute’n  pawlpi sumsinna in nei in, “PTC in k’on support ding ua, sum/contract huaizah hon pia in” chi khawng in election teng in na vial tai le uh leng, PTC taisanlou ding mi ahun khop om hi. Huaiziak in, ‘PTC support’ chih ahihchiang in, vote zon luat ngailou in, vote etlah tham muh ding chiangsa om hi. Sazuk in aki’ pha sihpih hi. Ngeina dan in, kum 2022/23 vel chiang in Manipur Assembly election om nawn ding hi. Tua buaina leng huaiziak hi ding in  mi tampite’n gingta uhi!

 

Paitete’ paunak in “Sapi in leng a nekna nung uap” chi hi. Huaiziak in, Paitete’n mi inn a gilvahtak a an ne khin in, innkong a kamkhuahna sia in paipahlou uhi. Sawtlou bek anekna mun uah tuzek  uhi.

 

PTC heutute I chih hardcore comunistte hiam, cult memberte hiam dan a a ideology uhiam, a thugin uh hiam sihpih ngam ding khop a ideology leh thugin kip nei hilou uhi. A nekna nung uh bel Paite diktak ahih chiang ua, uap maithei uhi. Hiai in, PTC heutute kia hilou in, ‘pawlpi’ khenkhat leng huamtel ding in I gingta hi. Huaiziak in, Ministerte maipha I zon dan ua kipan in: Cabinet Minister khat mai leng hilou, District in-charge hial a ding a ‘maban limchitak’ chiam a zawlkhiak, thil hitheilou hi ding in I koihkei hi!

 

Tua Manipur a I paidan un ahihleh, Minister-pa, YPA heutute, kei leng nang bangleng PTC in hon represent kha mawk hi. Huaiziak in, PTC beisak mai ni, chi I hihkei leh, election toh kisai a  PTC zatphattuamna lam kia enlou a, zahtak huai deuh a etkol hoih ding hi. Huai ding a, ahilou theilou ahihleh, mi zahtak huai deuhte’n PTC a makaih ding uh ahi hi.

 

PNC/PTC I chih nidang in Paite nam sung a pawlpi thupi pen, zahtak huaipen leh, Paite nam khaikhawmtupen  hi sek a; YPA leh SSPP I chihte leng akhazak nuai a khosa ahi uhi. Tuni a Paite nam sung a PTC dinmun in I hihna uh a ensak diam? Thilteng kisegawp, hou zouvek leh, kichim zaak vek adiam? Ahihkeileh, PNC/PTC in politics ana saisek dan I nam un khan-nelhta a, huchibang pawlpi kiphamoh nawnlou I diam? Ngaihtuah tham ching hi. Thudang khat ah, ‘Unao Sohpih’ te web site khenkhat a kimu dan in, tua PTC heutute hun sung in, Bijang leh Tuitha suahlampang a kipan PTC a kipete’n, PTC belh taksalou in, taikhe nawn vek uh ahi, chi hi. Adik leh diklouh ahihleh, ken ka thei hetkei hi.

 

Ali-na ah, bangziak a YPA heutute’n PTC heutute hichi lawmlawm a iplah a, khutkha a, a office natan kalhsak ahi ding uh ? Atunglam Para nihna a I gentoh ki-zawitawn ding hi. Huaiziak in, PTC leh YPA kikal hiai tantan atun ma a banzak a thulai gen a, hih vaivengtu ding a omlouh ziak hipen hi. Huaiziak in, YPA heutute’n YPA tak a, amau theihdan a vai ana hawm chiang ua, hiai tan tung kha hi ding in I gingta hi. Hiai ahihleh, Paite nam sung a, elected memberte lohsapna lianpi kilatna leng ahi hi.

 

Tuni in, YPA heutute’n a ngaihdan uh a ‘mawpi’ pen inleng a theihsiam theih di’a kilang sakta uh ahihchiang in, hunsa phot ding in I ngen hi. Huai ahihkawm in, YPA heutute ‘lungsim kam thu’ ngaih poimohpih kawm a, hiai buaina, langleih omlou a hih vaiveng ding in, Minister-pu, Paite nam sung a elected memberte leh, akuapeuh I ngen nuam hi.

 

I thutawpna ding in, ahilou theilou ahihziak a  PTC leh YPA kikal tungtang a Saptuam in malak a ngaihtak leh, Saptuam heutute chih bangbang, Saptuam heutute thupukna bangbang, Paite nam pumpi in – I lungsim tengteng, I hatna tengteng a Pathian kiang a thu-ngetna toh  I kithuahpih ua, I pom chiat ua, I sepsuah ding bangbang I sepsuah chiat uh leng I kingen hi. 

Read 1179 times Last modified on Thursday, 04 January 2018 16:25

  • ngaihanglaimah
    ngaihanglaimah
    Saturday, 06 January 2018 05:30

    Comment sauhsauh le eivoi... thipbeh a i omleh tam kigenkhe zaw cih ngaihdan nei na hi umaw leh?

  • whoami
    whoami
    Tuesday, 09 January 2018 11:50

    Ki thutuahna leh pankhawmna om theihna dia a nuailut zaw deuh bang om ngai inchin.Leitung sangpi khat, neu tak a kel(ganhing) nih ki phutuah dek, lungsim neitak a khat pen bok, a tung a khat paiphei, bittak a kipel thei uh...chih khawng ngiahtuah kha hang in............ Mihingte bel ganhingte' sang a ngaihtuahna hoih zaw nei ngen hi hang a!

Login to post comments