You are here: HomeColumnsZokhualZodawn Kho’ Hausate Thuneihna Tungtang A Policy Decision Bawlsate Etkik Hoih

Zodawn Kho’ Hausate Thuneihna Tungtang A Policy Decision Bawlsate Etkik Hoih

Written by  Khamkhokam Guite Published inZokhual Sunday, 18 February 2018 13:08
Zodawn Kho’ Hausate Thuneihna Tungtang A Policy Decision Bawlsate Etkik Hoih

Gelhtu :- Khamkhokam Guite

 

Khatvei ka veng ua kipan gamlalou ah Iron Rod pua Truck khat in tuahsia tuak a, a hektupa taimang hi. A handyman leng kimu zoulou ahihchiang in, amahleng taimang hi ding in gingta uhi. A khonung a a van puak - Iron Rod te lom khatkhat a ahepkhiak uleh, huai siklomte nuai ah handyman tangvalnou khat siluang, jam kam’ ding singbuk khat  tawi kawm mu uhi.

 

Hiai atung a I gen handyman in ahihleh, athiltuah - thiltung phut ahihziak in, huai Truck leh a ma’n tuahsia atuahkhak ding ngaihtuah manlou a; nidang leh hun dang a ahih dan ngeina bang in, jam kam’ ding singbuk toh diang khia a, huai Truck nungtawnlouhna ding in a khe ah jam kam’ tum  hi. Ahihziak in, lampitou lua leh kochik lua ahihchiang in, jam kam manlou in Truck in lamkhang ah kiakpih in, ama’n leng sihloh hi.

 

I gensa mah bang in, hiai a tung a I gen handyman in athiltuah ahihleh, thiltung phut ahihziak in, a decision bawl hoih leh hoihlouh velchetna ding hun neilou hi. Ahihziak in, I hinkhua a Policy Decision i bawlte leh, gam-le-nam kivaipuakna thil a Policy Decision I bawlsate ahihleh, vangphat huai tak in etkik in, velchet zel theih hi. Huaiziak mah in, nidanglai a Greek mipil khat in “Etkik ngeilouh hinkhua, hin taklou hinkhua ahi” na chi hi. Huanah, “Dotna dong’ ngeilou minam damkhosuak ngeilou ahi” leng na chi hi. Huaiziak in, mimal hinkhua hi in, minam hinkhua hitaleh etkik zelzel a, bawlphat ngaite bawlphat zelzel poimoh lua ahi, chih hon sinsak hi. Huai ding in, anuai a kigen Zodawn kho’ Hausate toh kisai a Policy Decision nidang a kibawlsa  I velchian sin ding uhi:

 

Nidang deuh in Zodawn kho’ Hausate’n khosung kivaipuakna aa thuneihna tuhlou in, mipite kiang ah thuneihna (khosung vaihawmna) pia uhi. Huai hunlai ahihleh, Zodawn khuate a nop hunlai tak ahi a; huchih  hunlai in Lamka leh Singngat khopite sang in, Zodawn khuate ah laisiam piang tamzaw ua;  a nam pumpi inleng a hoih lam ah ma kisawn mahmah in, nam sung kithutuahna leng om hi.

 

Ahihziak in, Zomi Re-Unification Organisation (ZRO) hong dinkhiak  tung in, ZRO/ZRA in bangziak hiam in, Zodawn kho’ Hausate kiang ah thuneihna pekik nawn uhi. Gam leitang humbitna toh kisai a poimohna om ding a agintak ziak uh hi maithei hi. Thadou-Kukite ngaihdan etton taak khollou khat,  koppih kha settawk I hih bel, I gingta hetkei hi!

 

Thuneihna/power himhim zatkhelh theih a; huan ah, I theih chiat mah bang un, thuneihna(power) in mihing mizia bang leng hih lamdang thei hi. Huaiziak mah in, koimun peuh ah – solkar, corporate, NGO, Saptuam hitaleh, thuneihna kuahiam/kuate hiam piak ahih chiang in, ‘check and balance’ chi ua, huai thuneihna zatkhelh ahihlouhna ding in a khaamtu/ control tu ding omsa in pia uhi. Democracy kivaipuakna gam a Ruling Party poimohna toh kibang a, Opposition Partyte leng poimoh ahi uh, akichihna ziak leng hiai ziakmah ahi hi.

 

Eilak ah ahihleh, Zodawn kho’ Hausate thuneihna piak hi ua; ahihziak in, a thuneihna uh a zatkhelh uleh zat dik uh etkaipihtu ding - akawilai bawltang a, akuakte vukdimsak a, apawng luate tou niam saktu ding omlou hi in kilang hi. A power uh blank cheque kipiak toh kibang hi’n kilang hi. Huchibang power ahihleh, Mangkangte’n ‘absolute power’ na chi ua; Paite pau in ‘bikhiahtan omlou thuneihna’ chi in I let ding hi. Huan ah, Sapte mah in “Absolute power corrupts absolutely” na chi uhi. “Bikhiah

 

I theihchiat mah bang un, Zodawn khuate, a sattu Hausa masa in bel, a khua-le-tuite it taktak mah hi. Tuni a Zodawn khua a Hausate ahih uleh, a khua sattu akipan khang bangzahna hiam hita ua, a khua sattu ngaihtuahna leh tuni a kho’ Hausate ngaih dan bel kikelki’ mahmah maithei hi. A kho’ sattu ‘kha’ tanbang, tuni a Zodawn Hausa atamzote’n tangkha nawnlou uh ahihchiang un, thuneihna piak a a-om uleh, a thuneihna uh azatdan uh etkai pih poimoh mahmah hi.

 

Bangziak a Zodawn khua khenkhat bubit ua, khenkhat muih gawp ahi ding uh? Bukpi kho’ Hausate’n a kho’ zawngte uh kiang uah, “Tengkhawm ni in, I neknek  ne khawm ni” chi thei ua. Tuni in Bukpi khua bubit hi. Khodang khat, tangthu saupi nei leh, nidang a inn 100 val tenna khua khat om hi. Tuni in, inn 12 vel teng uhi. Nidang a inn 100 val in a nek uh gam, inn 12 vel in a nek chiang un, kidaih mahmah a, dainai chikchik lougam ding in hoih mahmah hi. Ahihziak in, Hausapa’n lou a hawm chiang in, gamla pipi pe sese hi. A kho’ mipi omsunte’n dainai deuh a nget chiang un, “Tua k’on piakna le hampha kisa ve ua” chihsan ahi, kichi hi. Hausapa’n gam leitang hiam, sing-le-gua hiam, anih hiam in zuak nuam himaithei hi! Hausapa’n hichi bang lungput aneihziak mah a, a khua-le-tuite’n akhua ua sumphuk hii leng mah bang a pemkhiak san zungzung ana hi uhi. ZRO in hausate thuneihna a piak ma un, hiai khua - khonuam mahmah hi a, thu-le-la leh, laisam leh lam tuamtuam a heutu hoih pianna khua leng ahi hi.

 

Huanah, ZRO in Hausate ‘thuneihna bikhiah omlou’ apiak ma ua thil om ngeilou, tua om ahihleh, khomite khua akipan apemkhiak chiang un, a inn van uh puak hiam, a inn lui uh zuak hiam phallou in, Hausate’n a inn uh laksak zel uh hi. Koimun peuh ah, khopi hi’n Zodawn ah hitaleh, innlam I chih thil olsam ahi kei a; Innkuan khat in inn a lam chiang un, a inn lam ua sing-le-mau/gua leh sikkilh azat teng uh tanpha a tangthu genthei ding hial khop a, a innlamtu leh a innlam’ kilaiguizop ahihziak in: eilam Zodawn loungal ah, Municipal hi’n, State Solkar hitaleh, Central Solkar tanpha in pemkhiak ziak maimai a mimal  inn kisuhsak chih om ngeilou hi.

 

Khatvei Zodawn lam skul om nawnlouh poi ka sak thu uh Zodawn lam papi khat toh ka genkhawm kha uhi. Tua papi’n “ Ni khat Lamka a  khua a LP Schoolpute skul kai ginatlouh thu lawmta hon in Hausapa tel a genkhawm kha ung a” chi hi. “Ka genkhawm khawm uleh, kihehsuah gawp in, MDCte office ah vagen ni kichi ung a, Tuibuang a MDCte office a kavalut uleh,  kho’ Headmasterpa  na om in chin; Hausapa’n a awm a phaam a ‘Bang dia skul nong kai ngeilouh?’ achihleh, Headmasterpa’n ‘Non huchih mawk a Hausapa, skul nong kaikai ngai kei, sum huaizah khateng in hon pe gige lechin himai chi chin a, a sum hon pe gige ing a’ chi maimah a, aban gendi vang mahmah” chi hi.  Huchi bang in, Zodawn lam a District Council leh State Solkar skulte bei tungtang thu ah kho’ Hausa tampite’n  zekhemtu - Setan dinmun luah kha uh hihtuak hi.

 

Election anai chiang a MLA leh MDC candidatete’n Zodawn kho’  Hausate maipha a zon dan uh et in, Hausate’n vote tamtham tak ‘Command’ uh hihtuak hi. Huaiziak in, Hausate’n power azatkhelh uh bawldikna ding in, kum 5 dan a vote zong ding MLA/Minister te leh MDCte a ding a malak thil haksapi mahmah suak hi.

 

Ahihziak in, lungkiakna ding omlou hi. Aziak ahihleh, Hausate power petu ZRO/ZRA ahi ua. ZRO/ZRA te’n kum 5 dan hiam, kum 10 dan tanpha aleng  vote zong a Hausate khe asilsak uh ngailou hi. Huai ziak in, amau ‘Hi hen’ achih nak uleh, himai ding hi. Tua I gente louleng, Zodawn a tengte haksatna I theihpih khollouh tampi om maithei a; khedap kingaak lua bulh bang a, kuamah theihpihlouh a athuak velvul uh tampi om maithei ding in I gingta hi. Huaiziak in, I Suahtakna Sualtute’n, haksapi a akungkah ngailou a, niamchik leh naichik a om, amau a ut uleh apiak theih uh, Suahtakna I mipite un akiphamoh a piak theih uh a omleh, pe ding in I ngetsak hi henla.

 

Huchi bang a I minam hoihna ding hi a I ngaih, nidang a Policy Decision I na bawlte bang achi a, I gintak bang in ahoih taktak na hiam chih I etchet a, I velchian zel ngai hi. Huanah, policy hoih pente leng a sepkhiakna a hoih keileh, thilhoihlou tak hon tun theithou hi. Policy Decision I chih, a hun leh a mun toh kituak a bawl hi a; a ‘circumstances’ akikhek chiang a, ahun leh amun toh kituak ding a  bawllem thak a, akul leh a hoih zaw a khek khiak zel ding ahi hi.

 

Zodawn kho’ Hausa I chih, kiluahsawn thil ahi hi. Huaiziak in, tuni a Bukpi khua hiam, Suangdoh khua hiam in Hausa hoih a neih uleh, hikha zenzen, accidental thil suak hi. I minam vang(fate) hikha zenzen, accidental thil a ngakngam huailou a; I minam vang(fate/destiny) I kibawl a, I deih dan bang a tungman bang a I mek ding uh ahi hi. Huai mah A deihziak a Pathian in khut-le-khe leh, khuak tanpha  A hon got lemluamte  I hi uhi.

 

Huai ding in, I Policy Decision bawlsate uh, enkik thak a, policy i bawllai a hoih mahmah, ahihziak a, tuchiang a paih hiam, bawllem thak hiam ngaite I paih hiam, a kinlam a I bawllem keileh, abultung a I gen handyman-pa mahbang in, a minam pumpi a hoih deih mahmah kawm in, jam kam’ ding tawikawm a nam vangtah leh nam mawl kia mai hilou a, nam mangthang bangleng suahkhak theih hi. ZRO te bang a nam-le-gam it penpente’n, huai mun a hon tunpihlouh uh I kinem ngam hi!

 

PS :- Zodawn kho’ Hausate a hoih kei vek uh I chi kei a; ahoih bang leng omtham uhi. Huchi bang a Hausa hoihte zahtakna chibai I buk hi.

 

_________________X_________________

Read 514 times

  • tempawng
    tempawng
    Monday, 19 February 2018 12:30

    Hausa power ZRA te piak ahithah da hia oi, bangchi le iset uh kachi.

    Hausa chauh hilou a khawmipite le kivelchet thak chu poimoh leh kilawm mo......tua dan hi

  • whoami
    whoami
    Wednesday, 21 February 2018 10:41

    Hausa benevolent takte ngaihsn huai kia hilou in khua-leh-tui adia bitna hi uh. Hausa te teng tuabang hikim lou- thuneihna kia deih, election hun chiang bang a khomite talkaih sawm chih bang om thei zel, khua khenkhat ah. A huaikhawm siam leh khua-leh-tui ittak hausa tuh zahtakhuai, ithuai lua!

Login to post comments