You are here: HomeArticlesGeneralNupa' Lupkhawm Masak Zan

Nupa' Lupkhawm Masak Zan

Written by  ZOL Titbits Published inGeneral Wednesday, 28 June 2017 01:38

:- ZOL Titbits

 

A vokpi natan uh nuamtuam ding khop a na it leh ngaih ‘amah’ toh, mattress leh rizai khat na kikop masak zan uh ahihleh, na hinkhua a ding a tehpih ding omlou khop a zan poimoh leh chiamteh taak ahi hi. Huchi bang khop a zan poimoh himahleh, ‘Nupa Lupkhawm Masak Zan’ a omdan dingdan, chindan hoih leh kilawm tungtang ah kithuhilhna leh kisinsakna zak ding vaang mahmah kia mai hilou in, om ngeilou himhim chih ding ahi hi. Hiai na lupkhawm masak zan ua thiltung leh tungloute’n, na nupa hinkhua uah damsung daih ding khekhaap poimohtak – ahoih lam hiam, ahoihlou lam hiam nose den  thei hi. Aziak ahihleh, adiak in numei in nupa kipolhna aa a experience hoihlou uh, sawtpi thei in, khenkhatte bang houh, huai ‘kaupi’ in a damsung uh kei den thei hi.

 

Mi beven tamloute ziak in nungak tampite akullou in muanmoh kai khasek mahle uh, I nungakte uh ahihleh pasal neihma a ‘sex’ lampang a pasal toh kinel kha ngeilou ahi deuhvek  uhi. Hiai a nungakte I va chih sese na ziak ahihleh, pasal banglou tak in, lungsim leh taksa a akipeih ma ua numei polh in, nupa sex leh a pasalte uh amuh dan a  lamdansak thei ziak ahi hi. Huan ah, “A nuam ah bang, a haksa ah bang ………” I chih khawmpih a, teek khawmpih dia I tel toh lupkhawm leh, zi/pasal neihma a tuailai haiman hiam, ‘ta-khial kha’ chih ziak hiam ahihkeileh, vangtah ziak a ‘sex’ I na zat khaak thil kibang hetlou  ahi hi.

 

Huan ah, ei Zomi tangvalte lak ah nupa lupkhawm masak zan toh kisai in ngaihdan diklou tampi om hi. Huaite lak a khat ahihleh, “ Mi khat in a kiten zan ua, a zi a polh kei leh, zing a thoh phet a, a zi in nuak tai san” chih khawng ahi hi. Nidanglai a tangvalte haam a agiah khawmlai ua, val upate chiamnuihna himai thei hi. Ahihziak in, tangval tampite’n   numeite thei chian taktaklou ahih chiang un, mite chiamnuihna khawng ataktak ding bang sa in, akiten ni zingchiang ua, azi in ataisan khak ding bang lau pha mahmah uhi!

 

Pasal khenkhatte’n lah, “Huai mipa, a zi neih zan a 7vei pang” chih bang  thupi luatna dan in ngai uhi. Nupa kipolh I chih: ki-itna, kingaihnatna, kinuamtuamna leh tu-le-ta neihna  ding a Pathian hon piak ahi hi. Huaiziak in,  zite hi in, nupa kipolhna hitaleh, pasalte ki-elna, kisialna leh kimawlna ding hilou  himhim hi. Quantity/atam lam/a(hih) mun lam  sang a, a quality/a lungkim huaina lampang  poimohna mun ahi hi.

 

A diktak in, tangvalte’n a ngaihzawngte uh enlah mahmah ua; a awmbawk uleh, a kawngbom khawng  un  duangtham  gu bang zen ngeingei zouhial hi. Aziak ahihleh, Pathian in mihingte hiai khovel lianpi petmah luah din dia deih ahihtel chiang in, huai mohpuakna nase takmai semkhe ding in, huchi bang mizia  pasalte aneih uh ngai hi ding in I gingta hi. Huai lohchinna ziak mah in, tuni in  ‘virgin birth’ om hetlou in, khovel ah mihing maktaduai 7000 val bang pha theita hi.

 

Ahihziak in, kiten ni in ahihleh, vaisai ding, ngaihtuah ding, buaipih ding leh sen-le-panna ding mah tam a, nupa kipolh lamlam lungsim ah lang khollou hi. Huan ah, a tamzaw thamte ahihleh, zi/pasal aneih ni uh a manglam uh bang meimuai in thei ua; a dinmun thak uh – nupi/papi ahihna uh ‘a taktak mah a de aw’ chih khawng a lungsim un ngaihtuah  vengveng uhi. Huaiziak in, nupa kipolh ngaihpoimoh pen hikha khollou hi. Huai ding mah ahi a, a ziak ahihleh nang aa hita a, damsung teng huai ding in hun omta hi.

 

Nupa lupkhawm masak zan ahihleh, pasal a ding in ‘nervous’ huaithou mahleh, numeite a ding in ‘nervous’ huai zotham a; numei  khenkhatte bang in houh, huphulh mahmah uhi. Huaiziak in, na zi thak liklek kiang ah, a zan masa a kipolh phutluihlou, apoimoh pen a ngailou na hihlam  hilh le chin, na zi’ lungsim thoveng huai mai thei ding hi. Nupa kipolh I chih lungsim leh taksa a anih ua akiman ua, akipeih chiang ua kipolh nuam penpen in leh, itna, kingaihnatna leh lungsim tak a kizopna pungsak pen hi. Huaiziak in, na lupkhawm masak zan un ahihleh, kipolh lamsang in, houlim zan, kitheihsiam tuah zan, lungsim taktak kihilhtuah zan in zang le uchin, na damsung teng ua na ki-nupatna uh bawl lem in, bawl hoih zouhial ding hi. Hiai ahihleh, akingaizawng a kiteng hilou a, nu-le-pa gawmte a ding in poimoh kholdiak a; ahihziak in, kingaizawng a kitengte a ding in leng a poimohna dau tuanlou hi. Huan ah, nupa a kithutuahna ahih naak leh, kipolh hetlouh ding chihna leng hi zenzenlou hi. Ahihziak in, akuazo samsam adia le, ‘piaklouh theihlouh bang a ngaih ziak a piak’ ahihlouh ding ahi hi.

 

Nupa tampite ahih uleh, kiten zan in lungsim leh taksa a gim leh tawl law mahmah ahih chiang un, kitenna-puan tanpha suahkhe  manlou liang a ihmu suk biimbeem bang leng omtham uhi. Huai leng thil poi hilou in; na zi/ na pasal a gimluat leh, tawldam sak in; damsung pumpi hunlem neita na hihchiang un, kinhuailou hi.

 

Huan ah, numeite ahih uleh, zumthei timtem in kilang mahle uh, Pathian bawl dan in, houlim aa thil genkhawm ut leh nuamsa mi ahi uhi. Thil khatpeuh, nupa kipolh tanpha gen pih in, houlim pihle chin: na omdan leh paukam a na haanthawn nakleh, gen ngamlouh leh, hon hilh ngamlouh neilou ding uhi. A kholdiak in, nupa kipolh tungtang a deihdan, deihlouhdan leh thil bangkim gen khawm ngeingei ding ahi hi(Hiai ahihleh, kiten zan khelkhellou aleng chin dan a neih hoih hi). Huan ah, nupa kipolhna tungtang a houlimna ahihleh, lupna pindan sung sangmah in,ahihtheih liai leh,  mundang a genkhawm hoih zaw ahi, chi uhi.

 

Numeite’n kam a agenlouh uh - sign, signal leh body language a gen ching mahmah uhi. Huaiziak in, na zi in sign leh signal honpiakte ngeingaih mahmah inla, theihsiam tum in. Huan ah, numeite theih ding ahihleh, pasal tengteng phial in a zite un sign, signal leh body language a athil gente uh theithei hetlou chiitchiat ua; huaiziak in, na pasal theih dia na deihte, a heem khawng a genlou in, ama theihsiam theih ding in chiang tak in genkhia in. Genloupi leh hilhloupi a, thei mai ding a koih bang le neihlouh ding ahi hi. Na pasal in na thei mailou hial ding hi!

Read 2530 times Last modified on Wednesday, 28 June 2017 01:47
More in this category: « EIMI Zan Khat Kia Hi »

  • whoami
    whoami
    Wednesday, 28 June 2017 14:56

    Zi chu nei tei sam, tanglou hial a om sek hi di. A zi in sik sik mai hih tuak in; a nu kiang a "Nu, aman hon sik sik.....". " Hon sik leh a tungah kal aw..." chi a dawng zel. Lawipa lupna khuam a kaltou gawng gawng...chih khong om hia le?

  • zokhual
    zokhual
    Wednesday, 28 June 2017 16:03

    Penglam zi inlah, a khel a umkek bang koih ngai zezen a maw. Mi ciatciat kibatlouh theih tak ahi. Hahaha.

Login to post comments