You are here: HomeArticlesGeneralVa-Ak Utong Kineih

Va-Ak Utong Kineih

Written by  jamin h vualnam Published inGeneral Tuesday, 29 August 2017 00:40

-jamin  h  vualnam

 

Leitung, tuisung leh huihkhua ah ganhing chituamtuam simsenglouh tampetmah a, a mel-le-puam uleng kibanglou in tuamchiat tiltel uhi. Tuabang mah in khovel/leitung bup ah mihing tampi petmah ki-om a, himahleh tua ganhingte mah bang in kituam chiat in kibanglou vek hi hang. Gam/Nation tuamtuam tampi om a tuate lak ah India kichi leng gam/nation khat ahi hi. Huan tua gamkhat sung ah gambing/state/province tuamtuam omsawn nawn in, tua state sung ah leng district tuamtuam in kikhen sawnsawn hi. Huai district te leng khua/village tuamtuam in kikhen leuleu a, tua khua leng veng/colony tuamtuam in kikhensawn zel hihang. Hunta chilou in huai vengsung ah leng Innkuan tuamtuam a kikhen sawn tiltel ihihman un mihing kitam petmah ahi chih chiang huntawk hi.

 

Huchibang ahihman in; I minam, ibeh-le-phung, pau-le-haam, igam leh khuate a kibang om mahleng, mimal khat-le-khat kibang sitset chih omlou himhim hi. Innkuan khat, unau laiguizom, suangtu kibang hitawk mah leng  kuamah akibang omlou tazen hi hang. Kei ut-thu leh deihdandan a kikheng thei mi kahihlouh man in kilimbawl bawl in phattuamna leh manphatna neituanlou khading hi. Va-ak pe’n Utong ut tawk mah leh chikmah chiang in Utong asuak ngeikei dia, huan keileng Korean/ Japanese/Sapkang te hih ut in kisasa mah leng chikmah chiang in kasuak tuan kei ding. Tuabang ahihlai in  Lamka (adiak in) ah:

 

  • A piangthak loupi piangthak kineih a phaphetlou kitam mahmah pheenphaan hi.
  • Khami hetlou a sami petmah, ahihziak a ki khamisak de’uda’u a om deendaan kitam lua.
  • Itna leh awlmohna neiloupi, a iit leh awlmoh lua hidan a omdeuh ngeei ngaai.
  • Heutu leh makai theileng hilou phetlou a, chitna neihetlou napi, heutu leh makai hih ut a sawktheih teng sawk, a sak a khang a sukdian toudian a thutak leh diktatna khutchin vomchia leng neilou khop a mifel kitam vang lak.
  • Athei taktak leng hilou, thilteng thei hidan a ki pilsak mahmah, dang naal kisa a omveuvau leh hak lalap mi tam lota.
  • Hausa leh neizoulua hidan a khosa ziahziah leh nuamtat mahmah, ahihziak a niteng a kilohtawm a nektaak zong hi lel tak.
  • Pil kisa leh tei kisa a midang te thusim lou vengvang, himahleh a thugen, kampau leh gamtat khohei I et-et leh a mawldan leh teilouh dan, mi a phaklouh dan chiang deuhdeuh.
  • Hoih kisa mahmah a awphoi/awkaih bang hihdeuh chatchat a khenglamdang zeih zomah, mi’n a nunglam a a nuihsan leh a muhpeih louh ahihlam kitheilou a paikawi ngaihngaih lai.
  • Gam-le-nam iitt, khua-le-tui awlmoh ki chichi, a diktak a amah gilpi leh angsung kia iitt a awlmoh hilel tak.
  • Amah diktat, gin-om, thutak leh hoih bukim kisa a midangte moh sa gige. A siang siang in chileng, amah a zulhzau pen, huaiham pen, diktat loupen, gin-om loupen leh thutaklou a muanhuai loupen hi zomah.
  • Saptuam ke’m leh Heutu/Makai hidia thaunilhna tang kisa a phaphetlou. Ahihziak a omdan, gamtat khohei, nek-le-dawn leh I hinkhua in siangthouna leh khrist a nungjuihna a gen neilou himhim thaunilh kitam lua.
  • Zu leh khamtheih guihtheih hih a guta lata te simmoh leh muhsit toh thuah a koihna khat nei. Eilah isepna mun a leng omtuanlou, semlou leh kaai seselou a khaloh tampipi la, sawm a khat leh thohlawm tampipi thoh in hih hoih leh dik kisa mahmah lai.
  • Sepna leh kaam deih kisa a golhguk theihna leh khemtheih na liaisiah a thaang kam seuhsouh. Awkpetmah, ahihziak a sempeih tuanlou, a taangdia midang sawlson nalai (Etsakna’n ; Govt Teacher, Nurse etc).
  • Inn leh lou, gou leh gam nei kisa a kithupisak, sepna hoihpi kineisak leh koimun hiam khong a ahipen dan a pauthau lanlan. Tuabang teng lah nekguk takguk na leh golhgukna te ziak a, a sim a tham a aneih hi leltak.
  • Motor hoih leh changkang taktak a tuang a kitholh hanhan, midang te niam muh leh simmoh bawl veuvau. A diktak in chileng, tagah meithai liangvai te leh daikilkal a mite’ a dia panpihna om sunsun te lakmang sak a, huaite kitholh pih hilel tak.
  • Muhnadiklou leh siangthou loutak a sum-le-pai, inn-le-lou, gou-le-gam nei phetphut, Huchikom pi a le’ng; Toupa, Toupa chi a ki khamisak mahmah, a hoihpen leh dikpen, siangthou pen leh thutak pen kisa a phaphet lou. “Eilawi, Va-ak  Utong kineih hilim vehang Aw”.

 

Tuabang Khristian kichi itamluat ziak ua: saptuam, khosung vengsung, gamsung leh innsung chidamlou a buaina leh haksatna te’n hon pumtuam ahi maidiam maw? A hihkei leh tuabang mite’ ziak a Pathian thangpaihna leh gawtna itung ua hongtung ahi diam chih ut huai hial hi. Huaiziak in Va-ak hize’n pi Utong kineihneih hunte beisak in kilim bawlbawl non kei maileng ei a di’n ahoih dia, igam inam, khua-le-tui, saptuam leh mimal te lak ah; Muanna, bitna, kituahna, khantouhna, ki-itna, lemna a omdia, huchi in lei ah leng I damsawt zoding uh. Kei ah bangmah suahkhiat ding leh lahding omlou pi a kilimbawl in: hoihloupi kihoihsak, neiloupi kineisak, dikloupi kidiksak, chinloupi kichinsak, itloupi ki-itsak, theiloupi kitheisak, siamloupi kisiamsak, piangthakloupi kipiangthak sak leh khamiloupi kikhamisak non kei ni. Kei’ kamsiam ziak, genzoh ziak leh pautheih ziak a ka Va-ak hihna Utong suahthei tuanlou ding kahih man in. Khatveitei ka kelluphum dawk thouthou ding ahihdan theikom in kahihna diktak mah toh: paihtuakte pai-in, khektuakte khek in, pikpik chi leh pukpuk chi teng khentuam dan leh koih tuamdan siam mahmah ta ni. Toupa, Pathian’ hehpihna, azahngaihna leh lainatna te’n a hon taihsat ma in; Va-ak Utong kineihneih non kei ni.

Read 120 times
Login to post comments