You are here: HomeArticlesGeneralGamdang Tung Zomite - 5

Gamdang Tung Zomite - 5

Written by  Rev. Dr. J.M. Ngul Khan Pau Published inGeneral Monday, 09 October 2017 12:47
Gamdang Tung Zomite - 5

Rev. Dr. J.M. Ngul Khan Pau

 

A beisa hun sungin manlahna tuamtuam hangin ka laigelh kong zomto thei kei hi. Gamdang tunna tawh kisai zong a hun tawh kizilin hong kikhel pian hi. Nidangin gamdang kileng ziahziah a, kha khat sungin gamthak tung bangzah hiam om hi. Ahi zongin tuhun ciangin tua bang hong kikhaat mahmah ta hi. Kawlgam hun hoihzaw hong tun man leh gamdangte zong kihong nawn lo ahih man hi thei hi. Tua bang kawmkalah pawlkhatte gamthak lah tun ding ki-um nawn lo, Kawlgam ah ciahkik ding lah haksa a sa tampi ki-om ding hi. Israel mite nung lamah Faro galkapte’n delh, mailam lah Tuipi San (Red Sea) in khakcip a om tawh kibang cihna hi. Tua bangte laitak Moses in Israel mite’ kiangah, “Lau kei un, kiptakin om un. Note adingin tuni a hong sep ding Topa’ hotkhiatna mu un. Bang hang hiam cih leh tuni-a na muh uh Egypt mite, note in na mukik nawn kei ding uh hi. Topa in note adingin hong dosak ding a, note ahih leh na om hithiat ding uh hi bek hi,” a cih thu phawkhuai hi (Pai. 14:13-14).

 

TOPA HOIH HI: (June 20-27, 2017)

 

Pasian’ huhna tawh Dallas, Texas ah Zomi Agape Churchte kiangah hunzatna ka neih zawh uh ciangin Dallas panin Kansas City dong vanleng tawh ka leng uh hi. Nitak lam nai 3:00 in Daniel Gin Sian Mung in hong na muak a, innkuanin US leitangah hong kimusak Topa Pasian’ min ka phat hi. Mite’n thupi hong sakpih loh ding hangun, ko innkuan in komau hatna, siamna tawh hi peuhmah loin hong hehpihna hang bek hi cih ka phawk uh hi. Nitakin innkuan thungetna ah zong hih bangin US ah ka tate uh Master kah tuaktuak cih ka ngaihsut ciangin keima khang sung bek zong a kilamdang mahmahin ka ciamteh hi. Tua nitak ka lungsim sungah bang hong suak hiam, cih leh Topa ka tungah hoih mah si cia, cih bekbek ka ngaihsun hi.

 

Innkuana US leitangah kikholhna hun hong ngahsak Pasian tungah lungdam thu ka puak hi. Daniel Mung in Master of Photojournalism a sinna University of Missouri pen US sungah a hoihpen nga lakah kihel hi. Amah zong scholarship online in a nget leh huhna nei lo ci uh hi. Ahi zongin a nau Toshi Mang graduation ah 2015 in hong zui thei a, University of Missouri ah va hawh uh hi. India ah Master of Social Work zo khin a hih man le World Vision of India kum thum sung Communication Assistant a sep sungin a manzaihte a et uh ciangin amau zong na deih mahmah uh a, Assistant to Professor scholarship na pia uh hi. Hite khempeuh Pasian hoihna vive hi.

 

A nau Toshi Mang zong Sound Engineer hong zawh ciangin Nashville khuapi “Music City” ah nasep ding ngaihsun hi. Ahi zongin Pasian in ama ngaihsut loh lamah a nuntakna hong heisak a, Colorado Springs-a Gateway Church in amau biakna ah guitar tumsak ding le biakinna awginna (sound) lam huh dingin na sam uh hi. Topa in tua biakinn ah a sep sungin ama nasem dingin a sap lam na zasak a, ama’n zong, “Topa aw, na nasem dingin nong deih leh kong kipia hi,” na ci hi. Halleluijah! Topa phatin om hen. Tu’n M.A. in Leadership Denver Seminary ah sin hi.

 

 

TIME MANAGEMENT: (Hun Zeekzia)

 

Hun zeekzia tawh kisai-in a kicingin kigelh thei lo ding hi. Ahi zongin Pawlpi hun zeekna tawh kisai tawm khat ka gelh nuam hi. Biakinn nei i om hangin a tamzaw in Mikang biakinn kizang hi. Hun nai nih sung bang kingah ahih hangin hun zeek a kisiam loh manin nai nih sung tawm kisa lua thei hi. Ei biakinn nei leng i ut tantan kikhawm ding i cih hangin khangnote’n tua pen san haksa uh hi.

 

Zogamah i om lai-in nitak kikhop cih ciangin khuamui hun kikhop hunin kituat hi. US ah kikhop hun a nai tawh a kigen hangin nitum hak ahih manin hun man ding haksa kisa hi cih kimu thei hi. Hun zeekdan zong Kawlgam om lai bangin hun kizeek hi. US ah mite’ kikhopna ah i kihel theih bangbangin kihelin amau tung panin sin ding kisam ka sa hi. Thugenna hunzang mite’n zong minute 40 sung bangin i gen ding bangbang zawh ding kisam hi. Hunpi hi lo thu tom gen dingin dingto napi-in, “ut tantan gen theih ding hi lo hia maw,” ci-in thu tom gen pen sau gen tawh kilamdang lo hi. Tua ciangin Pawlpi hun zeekna ah kigelh lo, thun behlap tam lua ahih manin kikhopna hun sawt thei lua cih bang om thei hi.

 

Lasakna kikhopna ah i neih a nop mahmah hangin la tam lua in zong hun zeekna buaina hong tun thei hi. Lasakna tawh Pasian in a zat mahmah cih bang hi leh tha kingah mahmah tawntung hi. Ahi zongin lasa ding zong a ut peuhpeuh hisak loin deihteel thei leng a hoihzaw ding hiam ka ci hi. “Teci panna” i zat ciangin a kisam pen Pasian in nang kikalah bang thu teng piang cih gen ding hi a, eima tangthu gen nading hun hi lo hi.

 

Thugen dingin i dintoh ciangin i thungai mite maipha etna tawh phatphatin i ngimna taktak pen Pasian kammal gen sangin amau huhna, amau tawh kizopna lametna ahih ding lauhhuai mahmah hi. Pasian thugen kici napi-in Lai Siangtho sung thu gen vet loin eima ut thu peuh zawng singmat ihih zong kidophuai hi.

 

 

ANNEK VAI TAWH KISAI:

 

An tawh kisai i gen ciangin ngaihsutna i khek ding kisam ka sak tawh pan masa leng hoih ding hi. An i cih pen i nek khat peuhpeuh an bangin ngaihsut hoih hi. Keima tuahkhak khat hong gen leng, West Virginia Baptist Convention ah 1999 kumin pawlpi bangzah hiam ka veh hi. Mikang nupa khat innah zintungin, amau an ni li sung hong nekpih khit uh ciangin, ka ciah ni dingin ka zinpa in, “Zomite’n an na cih uh bang hiam?” hong ci hi. Ken zong kei adingin Mikang an pen lim ka sa hi, kum nih sung Mikang innah amau an ne-in ka om hi. Ahi zongin, “Zomite’n an ka cih uh ‘Buh’ hi,” ka ci hi. Tua ciangin ama’n a zi Margaret samin, “Margaret, you’ve not been feeding Pau for four days,” ci hi. (A beisa ni li sung Pau an na pia kei hi).

 

Mikang gamah vaimim, kawlkai, baal, mai, cihte anpi bangin kingaihsun hi. Amau vaimim gaphuan bang anpi taktakin tuat uh hi. Zomite’n vaimim gaphuan, kawlkai le baal khawng ne leng, “an sia ne” bangin i kituat uh hi. Mikang gam tung khin napi-in moh (bread) zong ne vet loin buh bekbek an mahin i ngaihsut khekhuai ka sa hi. Nu le pate’n buh mah a cihcih lai-un a tate un, Pizza, Burger, khawng sanginn ah ne ahih manun Zo an pen hong duhpih loh hun hong tungpah ding hi.

 

Mikang gamah ankamteh, kawlkaiteh,  beteh, anzo le mehnal ahi zongin kingah a, Zomi huan nei khempeuh in amau huanah ciing uh hi. Tua bang mehteh mehgah nek ding neite hampha kisa hi. Kawlgamah eima huan pan i nek theih hampha ihih lam kiphawk lo hi. Mikang gamah organic ahih leh mantam a, Zogamah organic bekbek ne ihih lam kiphawkkha lo hi.

 

China Study laibu a gelhte’n China gamah pai-in research bawl uh a, khua neu khawngah mite’n sa nipi khat sungin khatvei khawng ne-in, mehteh mah lim nekzaw mu uh hi. Tuate’n cikhum zong ne zo loin sathau tawh meh tamveipi kang zo lo uh hi. Tua hangin amau sawtpipi dam uh hi. Sikhum le sikhang nei loin tek le vuai dong mah na dam uh hi. Amau khua sung panin US a tungte pen nisimin sa ne uh a, nek le tak tam ahih manin kidawm het lo uh ahih manin thauna, lungtang natna, sikhum le sikhang natna nei na tam mahmah uh hi. Tua ciangin lungphu khawlna hangin a si zong na tam uh hi.

 

US ah nasemte’n air condition sungah semzaw uh ahih manin khua-ul tampi luang cih bang tawm mahmah uh hi. Tua bek hi loin nasepna ah thahat nading ci-in energy drinks “lipu” na dawn uh a, tuate sungah cikhum tamlua ahih manin sikhum nei tampi om uh hi. Nek le tak vai pen kidop ding kisam mahmah hi. Tua hi kei leh sih hun lopi-in sih theih nading tam hi.

 

 

PASIAN MIN TAWH KHUALZIN:

 

Pasian huhna tawh US visa ngah ding hong olzaw ahih manin hamphathuai ka sa hi. Hih bang hamphatna eima ut thu tawh a piang hi peuh mah lo hi cih kithei hi. Tua ciangin US a om pawlpite’n zong siate zin le leng kimat ahih manin amau Pastorte’n pulpit kha nih kha thum ka ngah zo nawn kei a ci tam uh hi. Tuipi gal khat panin Lungdamna Thu tawh hong zinte tawh kikholhna hun neih manpha mahmah ahih hangin, lengla hong zinte anvak bek tawh i pawlpi khangto lo ding cih theihhuai hi. “Kiallap” dingin hoih a, ahi zongin picinna taktak pen Pawlpi siate mah in kha an Nipi ni simin a vak ding uh kisam hi.

 

Tua ciangin khualzin a pai siate’n zong, Pawlpite tungah gimna tawlna i piak ding kidophuai ka sa hi. Nidangin inn lam siate lunggulhna lian mahmah a, an lim khat ahi zongin puansilh khat peuh piak nopna nei uh hi. Tuhun ciangin sia semsa le sem dinga kithawi ahi zongin kizin ciatin, pawlpi khenkhat bangah sia nih le thum i kituntuah uh hi. Ei lam panin i khatvei paina ahih hangin i mite adingin nipi kalsim hong suak ahih manin hong gimpih tawlpih kha ding uh hi.

 

Pawlpi upa khat in, “Tu laitak bel sia hong kinawh lua mahmah ahih manin, kilel mahmah hi,” hong ci ngeungau hi. “Kha ann” piak ding tampi nei a zin siate bangzah takin manpha, sum tawh kigen thei ding hi lo hi. Ahi zongin, “Malaysia lam pai leng sum teng 20-30 khawng kingah, US pai leng teng 70 panin100 bang kingah,” cih kammalte lunghihmawhhuai hi. Pasian nasem hi nawn loin “sum thalawh” ihih ding dahhuai hi. Thuciam Lui ah sum thalawh kamsang Balaam i bat khak ding lauhhuai lua ka sa hi. Sum thalawh ahih manin Pasian zong mu nawn peuhmah loin a tuanna lano in amah sangin khuamuzaw hi. Sum in mit hong mialsak bek hi loin i lungsim hong sunpailet gawp thei hi.

 

Ka lunghihmawh khat gen lai leng, ei Pawlpi veha zinte pawlpi mi u le naute’n hong itin sum le pai, nikten puansilh hong vaihawmpih om thei hi. Pawlpi khat ka hawhna ah, “Sia puan-ak” kong leisak nuam uh hi,” hong ci uh hi. Ka lungsimah bang om masa pen hiam cih leh, “Pawlpi siapa” ading kileisak lo ding ahih leh kei ading hong leisak uh hoih khin lo ding hi cih ngaihsutna ka nei hi. Sun le zan hong kem siate pahtawina kipia khol loin zan nih zan thum a zinpakte hong kilim bawl zong hoih ka sa kei hi. Tua ciangin a zinpak siate’n zong Pawlpi kem siate zahtakna piak siam kisam ka sa hi. Amau a gim a tawlteng na semin, e’n amau gimpih nasepna tungah hamphatna ngah ihih lam mangngilh loh dingin hoih ka sa hi. 

 

 KHA KHANLAWHNA: Pasian hehpihna tawh pawlpi tuamtuamah cialpi kinei in, Kha khanlawh nading hungeelna i nei theita uh hi. Hihte hangin Topa tungah lungdam i ko uh hi. Tutung US lam ka zin sungun thudotna a tam mahmah khat ahih leh tuhun Kha khanlawhna thu tawh kisai hi. Pasian hehpihna tawh i thungetnate hong kidawngin ama’ vehna i ngah uh hi. Ka lungdam mahmahna khat ahih leh Pasian ah dangtakna i neih uh tua mahmah hamphathuai ka sa pen hi. Leitungah deih ding tampi a om hangin Topa mah tawh kikholh ding lunggulhna nei nungak tangval hong kikhawmte in tha hong pia mahmah hi. Pasian Kha nasepzia “hih bangin hong sem ding hi” i cih theih khit loh hangin Lai Siangtho tawh kituak loin sem ngei lo hi. Tua ciangin Pasian minthan nading le amah a siantho bangin siantho nopna hong guan teitei ding hi. Kha khanlawhna tawh kisai i gen ciangin, a puatham a kimu thei pen:

 

  • Khitui naptui tawh kahna bang om thei hi
  • Thaltukna, kipukna om thei hi
  • Nuihna zong om thei hi
  • Diang in, laamna zong om thei hi
  • Awtgawpna, kikona cih bang zong om thei hi
  • Kamtuam pauna zong om thei hi

 

I ngaihsut ding kisamzaw pen ahih leh, Kha tawh kidim mi khat na hih leh:

  • Na mawhna, na siantho lohna na mu semsem ding hi; hih pen Pasian tawh kinaih semsem leng a kimu semsem cihna hi.
  • Topa’ hehpihna le hong hotkhiatna hangin lungdamna tawh na kidim ding hi. Amah phatphat nopna in na lungsim hong luah ding hi.
  • Na nuntakna hong kilamdang ding hi. Kha in hong luah takpi na hih leh mi muhdahna, mite maisakna, na it ngei lohte itna cih ahi zongin mawhna seh ngei lohte zong nutsiat nopna na nei ding hi.
  • Nusiat ding tampi na neih lam na muh bangin a pha a hoih tampi nang adingin na la ding a, tuate hangin na nuntakna a beisa tawh kibang nawn lo ding hi.
  • Kha Siangtho hong kipiakna a hang lian pen Pasian adingin “teci” pang ding ci-in Jesu in na gen khin hi (Sawl 1:8). Kha tawh kidim ci napi-in midangte gupna ngah nading veina lah nei lo, eima nopsakna ciang bek ahih leh Lai Siangtho vai het lo ahih lam phawkhuai hi.
  • Kha Siangtho tawh i kidim leh Pawlpi khantohna le hatna hong hi ding hi. Kha tawh ka kidim cih hangin Pawlpi thakiamna a manawh leh i kingaihsut phat ding deihhuai hi.
  • Kha tawh kidim ahih hangin leiba thangba bang mah thudon lo na hih leh na kingahsut ding kisam cihna hi. Na loh khinpah zo kei zongin leiba na neihte awlmawhna le siansak nopna na nei ding hi.
  • Kha tawh kidim mite’n zuau gen lo uh hi. Zuau tawh mite vatvat nawn lo uh hi. Thuman thutak hong pianna Pasian tawh kidim ci napi-in zuau le ciamnuih thanghuai khawng tawh a hun uh beisak lo uh hi.
  • Kha tawh na kidim leh na zi na pasal na itna khang semsem ding a, na kidim taktak lam amau mahmah in thei masa penpen ding hi. A gah zong innkuanpihte’n hamphatna ngah masa ding uh hi.

 

Tutungin hih teng tawh khawl bawl phot ni. Topa Pasian in thupha hong pia ciat ta hen.

Read 296 times Last modified on Monday, 09 October 2017 21:08
Login to post comments