You are here: HomeArticlesGeneralZu Ka Dawnkei!

Zu Ka Dawnkei!

Written by  ZM Tonsing Published inGeneral Saturday, 20 January 2018 15:08
Zu Ka Dawnkei!

~By : ZM Tonsing

 

Lawmte kiteng (thak) dek, a thian (theihpihtu/witness) a pang dia ahon chial ziak un Khristmas zoh in Kangkap lam ah lawmte bangzah hiam toh ka paitou uhi. Pai di ka chihni ua passenger pua a taituah gari omlouh ziak in gari neu zang in ka paitou uhi. Lamka toh Singngat kal, Teddim Road a leivui khu a vallua chih om hetlou a ka kibuah nung un Guite Road tawn thei di’n Singngat ka tung uhi. Nidang a Singngat toh Lamka kikal nai chik i sak leh tuazaw zuunlouh tuanglam tulpan a kailuat ziak hiam aw Lamka toh Kangkap kikal sang in le gamla ka sa zaw.

 

Guite Road tuh ana hoih viau ahi dia, long (ship) ah tuangkha ngeikei mahle’ng huai a tuang dan in ka kingaihtuah mawk hi. Lampi nuam ahihman in gari lian a kitai hihenla, lampi teng huamsuak in kitai zonzon maimah leh chihbang a lunggulh huai zozen hi. A tawnsuak a hoih hikei mahleh i gam ua hichibang a lampi hoihzek i muh chiang in kipahhuailua hinapi’n i phulouh lampi neikha bang a kingaihtuah in lehlamtak a kisuanlah huai zozen hi.

 

Kangkap a vangkim in phakha zelsek mahle’ng akhua a om den hial  a kihihlouh man in, naupang, a diak in khangthak lamte bang theihlouh a tam petmah. Upa lamte’n ahon theihna di ua nu-le-pa min ahon kansekte uh thil hithei mah hitah chihsim in om phing hi. Naupang lamte kithei vek kei mahleh anu-apa min uh kitheisam ahihman in.

 

Kumthak toh thak khawm ding chihdan ahi diam ah, lawmte’n kumthakni zing in kiten thakna ahon nei uhi. Zingkal ann nekma a kiteng hiau, huchia vaiveng ziau ahihman in thoven huai bang ka sa zozen hi. Pathian leh Saptuam’ dan palsat himahle uh lehlamtak a thoven huaizaw houh a dia aw peuh ka chi sim a.

 

Kiteng peuhmah in athupi thei bangpen a hih di chih thupiak sawm-te lak a om bangmai in tulai in neih-le-neihlouh genlou in i thupi bawl thei mahmah uhi. Thupitak a hihzoute mohsa i hipah kei himahleh hichibangte ziak a tamtak Saptuam’ thunun a omkha houh i maimah di ua aw chihkhawng lungsim ah hong dawk hi. Pathian leh theihpihtute’ mai a kitenna ahi a poimawhpen chisek mahle a taktak hial a zaw mite’ hih dan a hih nianua zouloute a dia zahlak huaipi khat leng suak mah hi.

 

Lawmte khat in, dan a zi neih zaw mipi hong uapte ann nekpih bang ut huai dia, sum senna di tamtuaklua chi’n gen hi. Khat in, “Ann nekpih teitei di chihna lah hilou a, zing ann nekma khawng a le kiten zualtheih thou eivele” achih leh ann nekma in kiteng lele “zing ann bek” chih hongngai veve thou di aka hia chi thouthou!

 

Zinta vevet khatvei mawngmawng gamgiak di chi’n Tuivai ah nga man di’n ka kisa uhi. Tuivai nga deihtawk a ne di; thau kingkeng a Lamka lam zinsuk nawn di chi’n lam-etna liantak toh Tuivai lam ka kidenna uhi. Ka va giak ngei ua himahleh gintak leh lam-et banglou tak in nahtang-um khawng peuh ka va meh maimah uhi! Nga nek sunsunte bangle atuitam a kihuan hilai. Mehzong dia kuan himahle ung kou meh di khop le man zoulou in meh ka va ngawl phialphial uhi. Meh ngawl hial sang in chi’a phalbi zan votpi nuai a kawngtan tum a nitak meh di tengkol i hon sawk tuh a zongsat huaikei khop mai! Ahi a, hichibang a hun zat tuh khopi nuntakzia ning huaitak banah i lak ua thu hoihlou leh lungsim hon kamthei thil tuamtuamte toh niteng hunzatkhawm sang in anuam zaw, a thoveng zaw, a chidam huaizaw!

 

Kal khat vel gamgiak di chi himahle ung meh di taksapna lianpi ka tuah ziak un ka tup tan uh giak zoulou in ka pai maimah uhi. Sepna maban lakloh taktak taisan a zin ngen a kihihna ah Lamka lam ka kiktou pah uhi. Gari neu zang himahle ung lampi nopziak in lamkal ah haksatna tuak hetlou in Lamka khomial tung, gari hattai laitak in ka tung uhi. Teddim Road tawn a tai, lampi ka kan dek laitak un ei ut leh utlouh dot himhim omlou in activa khat in hong phu chot mawk a, ahon phu pa tel in asak-akhang ka kidenna zelzul maimah uhi.

 

Kou bel ka gari uh a siat chihlouh bangmah chilou vanglak hilele ahon phu kha pa aliam zek ziak in Damdawi inn lam bang ka tungloh maimah uhi. A liam nasa lua ki-omlou ahihna ah vangpha khat suak himahle ung ka tuahsiat dan uh ngaihtuah chiah hehhuai deuhdeuh hi. Side light ka piak, lampi leng kan khin hisimta; midangte’n le hon pel a, ahon taihsan diamdiam lai ua khat in hong phu buk mawk! Hong hattai petmah, muh toh kiton a hon phu! A hattai dan tuh full kilometer-per-speech bek hi’nte!

 

Hiai thu kei-le-kei kisiamtan sawm a hon gelh ka hikei a, ahon phukha pa le mohsa hipahkei mahle’ng neuchik tua sang a pilvang leh hong awltai zaw deuh hileh hiai pumpelh theih tuahsiatna ka tuah uh ka gingta kei. I paunak ah “Sa-me in khum lawta ning achih leh akha” chihdan in, ahohna di kinlua, hong hattai luat leh tung zoulou maimah!.

 

Hon phukha pa liam ahihman in ei dik-le-diklouh gen chih omlou, damdawi inn lam ka diangsuak uhi. Zoudawn a hong kipan, bag kuah lenglung leh niin nengnung banah leivui khu bang thiauthuau a kihihna ah khenkhat a dia zohthoh huai leh ngapthoh huailua kihi kha inte, Thangzam Road bul a kipan Damdawi inn tan auto bahara in Rs. 100 ka sengtoih uh aka! Tam ka sa sim a lah ka sel nuamkei a, tu’n zaw auto hekpa crorepati khawng hita inte!

 

Lamka a om chi’n kichethei sak viau, Zoudawn a teng leh khosa te bangmah a simlou, es-a-esti (ST) bawl! Khemtheihna chiteng a khem. Job Card leh BPL Card holder lah hivek si! Khristian kichilai zaw mah! Ei nasan in Zoudawn a i mihinpihte i hichibawl ua le tuh i market leh economy uh hon control tu Vaite’n bang ana chi bawl di ua aw, ngaihngam huai hetlou. Zoudawn lam a i unaute uh khualna in amaute’ a di’n complaint leh helpline chihdan khawng om theileh nak hoih na’n chia. A huchih louh tawp inle a kul leh poimawh hun a enkai di heutu khat khawng om leh maw, heutu i ut theihtheih uh toh!

 

Damdawi inn a bangtan hiam ka om nung in ka gari uh police-te’n a laksuk ziak un police station lam ka diangsuk hi. Police station tung, police-te khat in zu kham a gari hek na hi chi’n honna ngawhta ek mawk! Amah kua lamte hi a, kua taw sawn a, a kua muang a huai honna chi a diam ah! Ka nuih bang a za zozen a, gen masak di le ka theikei. Dawnlou ka hi ka chihchia le gingta nuam hetlou. Numei’ zu i chih zozen uh beer gen taklouh grape juice nasan le dawn theiloupa’n zu ka khamna di thu nak omlouh law zen a. Khovel a zu kichi om keikei le poi ka nak saklouh!

 

Ahon phukhapa’n zu kham hia khamlou chih ka theikei, test leng ka test sak kei bok. Ahimhim a gari accident peuhmah zu kham a ngohpah chih bangle dikkhin khollou ding hi. Zu kham ziak a gari accident zaw tam kha mah inte hilele accident teng zu kham hiveklou ahi chih theih poimawh hi. Huaisang in, khopi sung a kum chinglou a gari hek, speech limit leh traffic rules-te hoihdeuh a etkai hi gige leh accident tamtak kipumpelh ding a, a kikhel nung a kithuhilh vak leh zu kham a kipawng ngawh ek chihte a dan hong om zaw deuh diam maw, Sap pa?

 

Zoudawn a lam-etna liantak toh nga tui hang hawp dia om lai ka hihlouh tawp ua le Lamka hong paisuk nailou hile ung hichibang tuahsiatna tuakkha khollou di hi ung ua. Huan ah, Rayburn a ka kai lai ua SSPP heutu di a ut omlou; a diak a president di bang kimuzoulou a ka om liailuai laikhawng uh ngaihtuahna a hong dawk hetlou di hive’n. Hai n’on naksak mah d’uh maw President di a ut omlou chihtel!. Hiaiteng in hunsak photni, tutung khawmpi!.

 

© ZM Tonsing | 18012018

Read 239 times
Login to post comments