You are here: HomeArticlesGeneralTHANGHOU LEH LIANDOU TAANGTHU

THANGHOU LEH LIANDOU TAANGTHU

Written by  Dr Tualchin Neihsial Published inGeneral Thursday, 05 April 2018 18:53
THANGHOU LEH LIANDOU TAANGTHU

All India Radio/Imphal station a pan Paite drama text dia 2017 kum a ka gelh

THANGHOU LEH LIANDOU TAANGTHU       

[LEGENDARY STORY OF THANGHOU AND LIANDOU]

©Copyright reserved the author/script writer

Scripted by

Dr Tualchin Neihsial

                                                              

EPISODE- 1:

THANGHOU-LIANDOU A PA’N A SIHSAN NUNG IN A NU PASAL NEI DIIN TAI

Nidanglai in Geeltui[Geeltui khua pen Lamzang leh Phaileeng khua kikal ah om hi] ah Pu Thilzong leh Pi Zinniang in tapa nih – Thanghou leh Liandou a nei uh hi. Pu Thilzong in a tate a sihsan nung sawt lou in a nu uh Zinniang in a tate geel nusia in Falam gam a om Dallang khua ah pasal neihsan diing in a guuk in taikhiak sawm hi.

 

Liandou’ uum taw a guuk a vuhvangsak in a nu’n lui a tui tawi diing in Thanghou leh Liandou sawlkhia hi [A nu un tui tawi a a va kuan kal un pasal nei in ka kuansan diing chilungsim hi]. Thanghou in a uum ah tui a dim dim pah hi. Himahleh Liandou’ uum a tui a dipdip hang un a dim thei kei hi. Liandou in, “U, kei aa dim leh kiam, dim leh kiam, a bang chi hiam?” a ci hi. A unau ua tui sawtpi a dipdip hang un a dim thei tuan kei hi.

 

A tui tawi kal ua pasal nei dia a nu uh kuankhe dia kisagu ahi cih a nii un a theih ciang in, “Thanghou- Liandou aw, inn ah hong ciah mengmeng un, na nu pasal zong diing in kuankhia hi” ci a a sap ciang in inn ah hong ciah in, a nu taiguuk sawm hong lap uhi.

 

Tua ciang in a nu un, “Hiai unaute ziak a pasal kizong thei lou” ci in unau nihte’ kam sung ah zuha a dim in hensak in, a mit uh vaai buak in, kuangpi khuhkhum in, pasal nei diing in kuankhiaksan hi.

 

A nii un, “Thanghou-Liandou, koi a om na hi uh hiam?” ci a a sapsap hang in kuamah in a dawng kei uh hi. Inn sung teng a baan zonzon hang in mu zou mahmah lou in a nii un, “Thanghou leh Liandou ka meelmuhna diing in, hiai kuangpi beek tawi ning” ci a kuangpi a laak leh a nuai ah Thanghoute’ unau a na om uh hi. A nii un a mit ua vaite liahsiangsak in, a kam ua zuhate laakkhiaksak in a nu uh nung, “va delh uau” ci in uital toh a nungdelhsak hi.

 

(a) Ka tuunnu’n kuangpi hong khuhkhum e;

       Nuai ah buanlei suakta diing aw;

 

(b) Nuai ah buanlei suakta diing aw,

      Niinu’n gam guabang hong hah hi e.

 

EPISODE-2:

THANGHOU LEH LIANDOU IN A NU UH PASAL NEI DIA TAI NUNGDELH UH, GAALTE APAN SUAKTA UH

Thanghou leh Liandou in zong a nu uh nungdelh pah ua, a nu uh a gaalmuh ciang un Thanghou in a nu kiang ah, “Nu aw, hon na ngaak aw” ci a gaalsap in kikou hi. Himahleh a nu’n,“Lamsak leh lamkhang ah na nau leh na uital sawnpaai inla, nang vuak in hon delh in” a ci hi. Thanghou in, “Nang sang in ka nau leh ka uital it zaw ing” a ci hi. Tua khit in a nu’n, “Na pute’ miimphual ah na giak un” ciin ngaak lou in taaisan thouthou hi. A nu’ cih mah bang in a pute’ miimphual ah a giak uh hi. Lampi ah gaalte leh a nu a kituak ua, gaalte’n a nu uh a thah dek ciang un a nu’n, “Kei n’ong thah sang un paam a miimphual a Thanghou leh Liandoute unau va that zaw un” ciin sawl hi.

 

A nu uh sawlna bang in gaalte’n miimphual naih pah vengveng in teipi in miimphual a dawt kawikawi uhi. Vangsiat huaitak in Liandou’ khepi a dawtkha sese uh hi. Liandou in a U kiang ah, U, ka kap diam?” ci a a dot leh, a U in, “Kap ken la, ciikciik ci in” a ci hi. “Ciiikciik,” ci a Liandou a hong haam ciang in gaalte’n zusa om hi ci in mei in miimphual a haal uh hi. Meikhu zui in Thanghoute’ unau a taikhia ua, vompi kua khat ah hong taailuut uh hi.

 

EPISODE-3:

VOMPI A MATKHAAKNA UH

Vompi ko sung a tun ciang un a unau un tui duh in a dangtaak mahmah uh hi. Liandou in Thanghou kiang ah, “U, tui duh ing” a cih leh, a U in, “Ka naptui dawn in, neu” a ci a, “Naptui duh keng, tui mah duh ing” ci a, a nau in a cih ciang in a U in, “Ka zun tui dawn in, bawi” a cih hang in dawn nuam tuan lou hi. A U in, “Tua ahihleh na pau mahmah kei in, tui k’on va tawisak diing” ciin tui tawi diing in Thanghou va kuankhia hi.

 

Tui tawi dia Thanghou a va kuankhiak kal in a ko sung ah vompi hong luut a, vompi’ mul in Liandou’ naakvang holhkha hi. Liandou a hehciai leh lau mahmah a vompi a tai leh a khangkeen ah tuuklum hi.

 

Thanghoute’ unau in vompi khat man hinapi in sa semna diing tem leh vanzat dang bang mah a nei kei uh hi. Thanghou in a nau kiang ah, “I sa mat semna diing in i gang kiang ah tem va kheel inla, bang diing hiam? ci a hong dotleh ka thaang peu suihna diing uh hi ci in” ci in a nau a vaikhaak hi. A gang kiang ah Liandou in temta khelh dia a va nget leh a gang un, Bangdiing hiam?” ciin na dong petmah hi. Liandou in, “Ka thaang peu suihna diing” ci a a dawn hang in a gang un gingta lou in dong teitei a, a tawptawp in dongkhe khong hi. Liandou in a gang kiang ah, “Vompi khat man ung a, ka semna diing uh hi a ci hi.

 

Mi khel cih mahtak, a gang un a khosung uah tangkou in, “Thanghoute unau in vompi khat man in a sa po diing in khekhaai thei peuhmah hong kuan un” a ci hi. Thanghoute’ sa matsa po diing in a khozaang un a va kuan uh hi. A mun a tuntak un sutgawp in a gilpi kia a pia uh hi. Thanghou dah mahmah in a kapkap hi. Liandou in a U Thanghou hehnem in, “U aw, kapkap kei in, a gilpi sung ah a ging ialial khat om lai hi” a ci hi.

 

EPISODE-4:

THANGHOU-LIANDOU VANG HONG KIPATNA, GEELLTUI KHUA NUUTSIATNA

Sa gilpi sem diing a hong kisak ua leh vasa khat in, “Thanghou-Liandou, khang diak ah” va ci hi. Liandou in, “U aw, tua vasa’ haam in khang diak ah ci a hih ciang in khanglam naihsuk ni ci hi. A khang diak a sem dia hong kisak ua leh tua vasa mah in, “Thanghou-Liandou, khang diak ah va ci leuleu’ ahihman in a khang lam ah a kisuansuk nawn uh hi. A gilpi sem dia hong kisak ua leh vasa in, “Thanghou- Liandou, khang diak ah” ci zel a, Liandou in a U kiang ah, “U aw, gaalte toh kinai hikha in teh, khang diak ah sem ni” cin a khang diak naih in huai ah a sem uh hi.

 

Sa gilpi a sem uh leh a sung ah khitang hoih mahmah tampi leh daaktal bu khat a na om a, a unau un a kipaak mahmah uh hi. Thanghou in, “I khi khilna diing in i nii kiang ah miimkhau va ngen in la, bang diing hiam ci a hon dotleh, ka thaangkhau diing uh hi ci in”ci in Liandou sawl nawn leuleu hi. A nii un miimkhau liim khat pia a, tua toh a khilkhil uh leh a khau in daih lou in a nii uh kiang ah miimkhau ngen diing in kisawl nawn uh hi. A nii un zong miimkhau liim khat mah na piakbeh a, tua teng toh a khi teng uh khilkhin zou pan uh hi.

 

A unau un nuam mahmah uh a, a daaktal bu uh a tum zelzel uh hi. A khopihte un a daakbute uh a suhkhaak diing uh a lauhman un,a kaal laklakak in, uumkeek peuh a tum kheemkheem uh hi. Ni khat, Thanghou in a nau kiang ah, “Tu laitak in i nii hong paileh hiai pia ning” a cih leh, Liandou in simkhi guicing mahmah khat lak in, “Tulaitak in i nii hong paileh hih pia ning” a ci hi. Thanghou in zong khibah vuui khat lak in, “Tu laitak in i nii hong paileh hiai pia ning” a ci hi. A nii un a thugente uh na zagu in, “Naute, den a na gen uh bang ahi hiam?” ci a a dot ciang in, “Bang mah gen kei ve ung, nii” ci a kilep in a kheem uh hi. A nii un, “Tulaitak in i nii hong paileh hiai pia ning na chitawk ve ua acih ciang in bang dang gen tuan nawn lou in a nii uh khivuui khat tuak a pia uh hi. Huai ni a kipan in a nii un Thanghou leh Liandoute unau ciahpih in a inn uah a keem hi. A nii leh a gang’ teenna Dimpi khua a khosa diing in Thanghou leh Liandou in Geeltui khua a nutsiatsan uh hi.

 

A gang un Thanghou leh Liandou’ nasep diing guan in, “Thanghou in aaktaang hong in la, Liandou in sial cing in” a ci hi. A nii un Thanghou kiang ah, “Na aak honkawm in, sailungtang leh taangtang hualkhawm in ci in sawl a,Thanghou in zong a nii’ sawl bang in sailungtang leh taangtang a hualkhawm hi. A gang in hiai thu a theih ciang in heh mahmah in inn nuai buanciim lak ah Thanghou khesuk hi. A nii leh gangte’ inn nuai ah vok leh Thanghou in an nekhawm in, a sialte uh toh giakkhawm hi. Thanghou in hiai thu a phuahna in hichi in a ci hi:

 

(a) Ka gangpa keibang a laan lai in,

     Lulvok toh laikuang ka umkhawm e;

 

(b) Lulvok toh laikuang ka umkhawm e,

     Sawmsial nutuun in ka nei hi e.

 

An a neek ciang un inn nuai a om Thanghou neek diing in awngvang ah a nii leh Liandou in a guuk in an khiak pahpah uh hi. Khatvei houh a gang un a nii leh Liandou kiang ah, “Nou geel ma liau diak na e” a cih a leh “A nget hi” ciin dawng uh hi. Khatvei a an neek laitak un awngvang ah a gang’ ciltang kaisukkha a, Thanghou in kawlkai sa a a kaihsakkhaak aleh a gang heh mahmah in a unau un inn pan a hawlkhia hi. Thanghou leh Liandou’ unaute zong beidongtak in Geeltui khua hong tungkik uh hi.

 

EPISODE-5:

THANGHOU LEH LIANDOU IN PI A NEIHNA UH

Tua hun a kipan in Thanghoute unau hong zawnggawp in hong genthei pha diak uh hi. Ahihhang in a unau ua ki-it mahmah leh kideihsak mahmah in miimtang-taangtang nangawn phelhawm in a nekhawm uh hi. A lou khohna diing uh tuu leh hei nei lou napi in, a lou gei uah luai nuam mahmah khat voh in, huai luai a khopih loukuante a luai kaal un a tuu leh heite uh kheel in lou singte a phuuk in loupate a khoukhe somsom uh hi. Lou haal hun ciang in mite hihdan in lou haal in, a nii un sailungtang leh taangtang a hualkhopsak in a loulai uh a kaap kawikawi uh hi.

 

Ni khat taanghaam a boh laitak un, a tung uah mu in guul tuah a leeng a muh ciang un, “Tung a mu leeng aw, na tuah hon khiak ve” a cih uh leh khiaksuk pah hi. Tua guul a muh ciang in Liandou in, “U aw, ciah ta ni, i sa huan nuam hang” a cih ciang in a U in, “I ma i tut ciang in inn ah ciah ni” ci in dawng hi.

 

A ma uh a tuttak un,loubuuk a a guul koih uh a va et uhleh a guul a na om nawn lou hi. Tua guul in a pii kiang a tai in, Nu aw, tuni in a si diing kimlai unau nih in hong honkhia uh hi, tua unaute va siam ning” a cih leh a pii in, “Nang siam thei kei ni teh, ken va siam ning ci in mihing a kibawl in Thanghoute’ inn ah meitoh in an va huan hi.

 

Thanghoute unau vai hong ciah uh a, khomual pan in a inn uah meikhu gaalmuh uh hi. Liandou in, “U aw, i inn uah meikhu om” a cih leh Thanghou in, “I inn nuaite aa in a zelhtouh  hi in teh” a ci hi. Inn a hong tuntaak un a inn uah piteek khat a na om a, Thanghoute unau in lamdangsa mahmah uh hi. Tua piteek in, “Tute aw, tui va tawi un” ci a a sawl ciang in amau, “pii aw, bang huan diing i hi hiam?ci a a dot ciang un,a pii un, “Tui tawi in va kuan le uh teh  a huan diing zaw ke’n hong thei na ning” a ci in sawl teitei hi. Piteek’ thumanna in a unau un tui tawi diing in a kuankhia uh hi. Thanghou in a guuk a a et leh piteek in a khutcin kawm, a niik kawm, a puan kawm khawng a sin leh miimtang-taangtang ke nainai a, tuate a huan hi. A pii un an a thuuktak in Liandou in a ne pah hi. Thanghou in a pii thil hih teng mu ahihman in kih in a ne nuam pah kei hi. Liandou in an ne dia  a sawl teitei ciang in hong ne mahleh khamzou lou in, “Pi, a om lai hia?” a cih leh, a Pi in, “A om mah keh” ci in a thuukbeh hi.

 

EPISODE-6:

A PI UN THANGHOU LEH LIANDOU ZI GUAN IN VUALZAWL

Thanghou-Liandou’ pi in, “Tute, taang a sauta hiam?” ci a adot ciang in, “Taanghaam boh phata hi a ci uh hi. A pi un, “Tute, taang bang cita hiam?” ci  a a dot zel ciang in, “vui pan hi a ci uh hi. “Min nai lou hiam?” ci a a dotnawn ciang in “valta hi a ci uh hi. Huchi ahih leh beem phan diing in a sawl hi. A tute in, “Pi aw, bang koih diing i hi hiam” a cih hang un, a pi un, “keiman thei na ning, phan peuhmah phot un” ciin beem tampi a phansak hi. Taang a min ciang un a kheltat man in a gang un taang la diing in a khozaang in zawn a, a khozaang un Thanghoute’ taang laakpih uh hi. Himahleh a kim-a lang zong a lakhin zou kei uh hi. Piteek in Thanghou leh Liandou kiang ah, “khozaang va cial un ci a a sawl bang in taang la diing in a khozaang bup a a kuan hang un la khin zou tuan lou uh hi.

 

Taang po diing in a khozaang buppi’ tha cial nawn uh a, a suun meh diing un a pi un siingmeh na leemsak in, nungakte kiang ah, “Thanghou leh Liandou a ngai peuhpeuh in tam pipi meh un” a ci hi. A khopih nungakte un, “Ei hong deihkhaak uh leh” ci in tam pipi meh uh hi. Ahihhang in mittaw khat leh kheelbai khat in, “Ei zaw kua mah in hong deih ken teh” ci in a neek taang uh a nu leh pate uh a puak uh hi. A nu-le-pate un, “Nou ne khin maw? ci a a dot ciang un amau, “He, kham zou ung” a ci uh hi.

 

Thanghou’ pi in hiai thu a theih ciang in, “Hiaite geel pen a lungsim uh hoih hi “, “Thanghou leh Liandou in kiteenpih un” a ci hi. Himahleh amau, “Pi aw, mittaw-kheelbai pi zi in bangchi neih diing?” aci uh hi. A pi un, “Lunghimoh kei un ciin a mit uh leh a kheel uh liahsak in a hong hoih tuak uh hi. Thanghou leh Liandou in tuate geel kiteenpih in nuamsa in hong hausa mahmah uh hi.

 

EPISODE-7:

NGEINA LEH TAWNDAN A SUKBUKIMNA UH

Thanghou leh Liandou hong hauh mahmah ciang un Zoumi ngeina a miim-aih, taang-aih, sa-aih, gaal-aih leh ton cihte a baanbaan in hon hihtou ziahziah uh hi. A tonna uah a nii un puandum teengsak in mipi lak ah laam diing in sawl hi. Thanghou in hiai thu a genna in la phuak in,

 

(a) Ka niinu’n taang laam aw hong ci e,

      Dumpuan ka kawng ah hong vehsak e;

 

(b) Dumpuan ka kawng ah hong vehsak e,

      Buuktual khuva tawn ka bang hi e”a ci hi. Hun dang khat ah a niite’ kongtual ah dialsan khim a laam dia a sawl uh leh, hi ciin dawng leuleu hi:

 

(a) Thanghou aw na dialsan hong khim ve aw,

      Niinu’ tual ah taang hong laam ve aw;

 

(b) Kei poh taang laam in ka lawm lou e,

      Ka seen vual kai in ka zak hi e.

 

Zawng mahmah leh genthei mahmah a om lai ua a na khelbawl leh a na simmoh mahmahte pen giitlouhna a thuk lou in hoihna leh siamna in thuk uh hi:

 

(a) Thei ka seen a mel hong mate’n,

      Thaitong siang ah buhzu hong ngen e;

 

(b) Buh n’ong piak a buhvai n’on piak,

      Sa n’ong piak a aguhbawk n’ong piak;

 

(c) Ka kiang a thuumthuumte aw e,

       Nemnem tam pe ve aw thai Tong aw e;

       A hauh- a phat uh a phuahna un:

 

(a) Ka sial aw, na pain a pai inla,

     Ka khua Geeltui lam na tawn in;

 

(b) Geeltui suak mualphei a pha,

     Sang leh lai lapna’n a pha;

 

(c) Niinu’n nal guabang hong hahta e,

      Geeltui ah nibang ka luun hi e;

 

(d) Geeltui ah nibang ka luun hi e,

      Khokhang phaipi paak ka bang hi e” a ci uh hi.

      A khopih- a tuipihte un Thanghou- Liandou  a phuahna un,

 

(a) Thanghou leh Liandou seen sanggah e,

     A mi kai e, mi za luang kai e;

 

(b) A mi kai e, mi za luang kai e,

     Khuacin kai e, lawibang thang na e.

 

EPISODE-8:

A NU UN THANGHOUTE UNAU HONG VEH

Thanghou-Liandou hau mahmah leh nuamsa mahmah ahi uh cih khokiim- khokiang a kithang vengvung ahi cih thu a nu un a zaak ciang in, “Thanghoute unau hau leh nuamsa uh ahihleh va veh ning” ciin seeng dim khat uisuul pua in hong kuan hi. Geeltui kho nawl ah a lawmte toh Liandou in sial a na cing a, a nu’n meel theih nawn lou in, “Pu aw, Thanghou leh Liandoute’ inn koi lai ahi hiam? ciin dong hi. Liandou in, “Hih sial kaangpi nung zui inla a luutna ah luut le cin, huai mun hi pah diing hi ciin a gen hi. A nu in a theihnawn louh thu teng pen Liandou in la in hon phuak hi:

 

(a) Sawmsial cing taanggual va kawm ing e,

     Tuunnu in meel a hong ma hi e;

 

(b) Tuunnu in meel hong ma hi e,

      Dohsuang ah puvon a hong sa e.

      A hong hauh mahmah ciang un a nii un la phuak in,

 

(a) Thanghou leh Liandou a nu’n kuangpi khuhkhum e;

     A nuai ah siatlei a suak hi e;

(b) Siatlei suak albang a dah man in,

     Geeltui ah nibang a luun hi e” a ci hi.

 

Thanghou’ nu’n sial kaangpi nung a zuihzuih leh Thanghoute’ inn a tunpih hi. A silate in an na su ziahziah uh a, zaam leh daak in an zuankhete doh uh hi. Niik leh puan hoih pipi kiphou ziahzuah a muh in a nu uh luut ngam pah lou in, kongkhaak biang a beel kawikawi hi. Ui in tawngtawng a, “Kua a hi hiam?”ci a a va et uh leh Thanghou-Liandou’ nu seeng dim a uisuul pua, inn kong biang a ding innsung ah va samluut uh hi.

 

A lup diing ciang un a nu uh kiang ah, Nu, koi lai ah na lum nuam hiam?”ci a a dot uh leh, aman, “Mun khat peuhpeuh ah lum ning”acih dungzui in taangbeem tung ah puanbu phah in huai ah a giaksak uh hi. Zaanciang in inn nuai a a sialte uh kisi in inn a liing hi. Sial kisi a inn a liin ciang in a nu’n, “Thanghou’ kosah, Liandou’ kosah, hon singta luapluap uh teh, nop kei si, ihmu thei lou in hong koih uh teh” ci a hang in phunden hi.

 

A ziingsang in a tate’n, “Nu, tuzaan bang gengen na hi hiam?”ci a a dot ciang un, “Bangmah ci keng e, Thanghou’ sawmsial aw, Liandou’ lengkeel aw, hong sing lianlian ta uh teh, nuam na lawmlawm e ci bek ing” ci in kilep hi.

 

EPISODE-9:

A NU UH SIHNA LEH SUMTAWNG BIAKNA HONG KIPATNA

A nu uh inn lam a a ciah diing ciang in a innkiimkot ua aakbubah khat ciat apan aaktui khat ciat la in a nu uh a got uh leh a nu’ seeng dim pah hi. Thanghou in, “Nu aw, na sih ciang in zu khat va khat in hong kihil in maw” ci in vaikhaak hi.

 

Inn a tun ciang in a pasal kiang ah, Ka van hong saang in” a cih leh a pasal in, “Nang aaktui hi zah pipi bang lak a na ngah? Na zulhtat man a na ngah hi hiam?” ciin a sang nuam kei hi. A nu uh maizum lua in taangbaan pet in a si hi. Vasa khat in Thanghou leh Liandou kiang ah, “Thanghou-Liandou, na nu uh si ciin va haam hi. Thanghou in,“Sita leh, mangta leh ka sialpi kaang in va vui na veng”a ci hi.

 

A nu uh gaal diing in a unau un Geeltui pan in a va kuankhia ua, a nute’ inn a hong tuntak un a panawn un,“Thanghou leh Liandou a hau a hau ci uh teh, vut khu vai khu in hong pai uh a na ci hi. Thanghou leh Liandou in a puan uh kheek in a hoih tata a hon silh uh leh a panawn uh zum lua in a maizum sihpih hi. Thanghou leh Liandou in a inn uah a nu uh luang pua in, ngeina bang loutak in, taangbeem sung ah vui uh hi. Tua hun a pan in Thanghou leh Liandou’ hauhna hong kiam hi.

 

[Tate taisan a pasal dang nei nu laakkik pen khanglui upate’n zek [sianglou] in koih uh hi].

 

Tua teng a tun khit in a pi un, “Ka tute aw, tuin kei lah teek lawta ka hih ciang in k’ong sihsan pah ta diing hi. Ka sih khit ciang in kumsim in sumtawng ah voknou dawng khat in hong bia un”[khenkat in aakpi siakkawi ahi ci pawl leng om] ci in a vaikhaak hi. Huai nung sawt lou in sumtawng ah meii a kaai in a tummang hi. A pi’ vaikhaahna bang in Thanghou leh Liandou in kum teng in voknou dawng khat in sumtawng biakna/thoihna a nei uh hi. [Thanghou- Liandoute’ unau siamtu in ei zong hong siam thei hi cih upna toh Paite minamte leh nam dangdang in sumtawng dawi pen pusa in kinei hi].

 

EPISODE-10:

GUUNTUI KAANNA LEH LIANDOU’ ZI SIHNA

Liandou’ puzonte’n zupi ne dia Liandoute a sap dungzui un a zi leh a silate toh guun-gaal ah zu siim diing in va kuan uh hi. A kuan lam ua guun tui lian lou in nuamtak in pal gaalkaai mahle uh a hong kiiklam un guultui lian in na khang hi. Khut kileenkawm a guuntui kaan uh himahleh a tui a hat luat ziak in a zi tui in taai in si hi. Hiai thu a phuahna in Liandou in,

 

(a)” Ka kuanlam in pal sialsial ing,

      Ka ciahlam in guuntui a lian e;

(b) Guuntui tung a sawnbaan a kaih,

      Ka thai Tong aw na paam lua hi e.”

 

(c) Thai aw thou aw ningzu luup aw,

       I suumtual ah seenvual kawlva laam bang e;

 

(d) Ningzu duh in tunggap sawk ua,

      Aisa duh in ka laaknuai hong en ve ua”

      ci hi.

 

Thanghou sang in Liandou si masa zaw a, Khodou ni khat Liandou’ haan ah Thanghou va hoh in hiai la phuak hi:

 

(a) Dou na lingling, dou na lingling e,

      Gual in kum khua dou na lingling e;

(b) Gual in kum khua dou na lingling e,

      Dou’ haan ah naubang ka kap hi e;

(c ) Naubang kap, khaubang va ciahta’ng e,

      Khua leh Ciantui taang na siilsial e.

 

 

EPILOGUE

Script gelhtu a pan thu tam lou

A gelhthoh a tangthu ciamtehna nei loute’n a tangthute uh la leh kam in a na kihilhsawn in ana kipesawn uh hi.Kam a kihilhsawnte leh late pen kibang kim sipsip thei lou a,a mi,a khua leh a hun/kum a tuam dungzui in a tangthute zong hutheeu in kikhat vek nawn lou in,a tuamtuam om thei hi.A kip-le-kawi a tangthu a kibat louh hang in zuau pumluum leh phuahtawm [fiction/novel, myths]ahi uh cihna bel hi zenzen lou hi.Etsakna diing in,PENGLAM ci a i theih uh Falam leh Khalkha lamte’n BENGLAM/TENGLAM a na chi ua,sai’ zawi[sul]zui a a paina uh tam in a min nihna diing in Hmar leh Luseite’n SURA/CHHURA [Chhurbura] peuh a na ci uh hi.

 

Thanghou leh Liandou’ taangthu i cih zong Luseite’n Liandova hon cihpih na pi un, Thanghou’ min pen a inn sial hauh/a inn sial neih tamsak in a min nihna diing in TUALSIALA peuh a na ci sese uh hi.[Unau Mizote’n a gam ua Christian missionaries a luut masa leh nanung min diing na guan mengmeng uh hi. Etsakna, Pu Buanga,Talmitsapa[Col.John Shakespear],Pi Zaii, Zosaphluia [D.E.Jones],Zosapthara etc].

 

Paite sung ah Dapzal,Lousau,Bukpi leh adangdangte ban ah Lusei,Gangte leh adangdang in Liandou upa zaw in koih ua,Lamzang,Val leh Tedim gam buppi in Thanghou upa zaw in koih uh hi.

 

A upa zaw a Liandou koihte’n vasa nihte zong Liandou pen a san,Thanghou pen a eng a ci ua,Thanghou upa zaw a koihte’n a san pen Thanghou, a eng pen Liandou ahisak leuleu uh hi.

 

Folklore toh kisai a research ka bawlna ah Thanghou-Liandoute pen a taktak a omkha ngei lou leh kiphuaktawm hi zenzen lou in,historical persons,a taktak a tangthu a na om ahihhang a contemporary historical written records a om louh ziak lel a legendary story/epic story dan suak hi in ka mu hi.Beh 300 vel omte lak ah Lethil behte’n ka Pu uh Lethil’ ta Pu Vangthang,Pu Vangthang’ ta Pu Thilzong, Pu Thilzong’ ta Pu Thanghou Leh Pu Liandou ahi uh ci uh hi…Liandou in zi nei napi in ta nei man lou in si hi.Thanghou in bel a zi Neihtong toh tapa Pu Zongkham nei a, Pu Zongkham in tapa Houvungh nei a,Pu Houvungh in tapa Vunghkhoi nei a,Pu Vunghkhoi in tapa Zongvungh nei a,Pu Zongvungh in tapa Vunghgen nei hi. Pu Thilzong a kipan Pu Vunghgen tan, khang giat sung, GEELTUI ah na teeng uh cih ahi hi.

 

A innveengte’ theihna sang a a mi- a sate [innteekte] theihna bulphuh a nei a hiai tangthu hong kisuut ahihman in Thanghou pen a upa zaw dan in ka hon gelh hi.

 

LAIBU SIIKSAN LEH ETTE:

Langh Thawn Pau, 2006: Lethil Innkuan Khangthu, Yangon

Zolai Simbu Bawl Kawmite, 1977: Zolai Simbu [Tan Li],Tedim

Ngin Suanh, 1978: Kalzang-Suante Beh Tangthu Le Khang Ciamtehna, Tedim

Sing Khaw Khai, 1981: Suangpi Mualsuang, Tedim

Tualchin Neihsial, 1988: India-Burma Gamgi Bul a Singtangmite’ Dinmun, Lamka

Tualchin Neihsial, 2004: Paite Late Leh Thute, PLS/Lamka

Board of Secondary Education, Manipur, 1995: Paite Pau Sinna For Classes IX & X, New Lamka

                                                                                   

Dr Tualchin Neihsial 

Script writer

Read 261 times
Login to post comments