You are here: HomeArticlesGeneralPTC kiteelni a ka thugen

PTC kiteelni a ka thugen

Written by  Vz Siam Published inGeneral Monday, 07 May 2018 08:43
PTC kiteelni a ka thugen

PTC kiteelni a ka thugen

~ By : Vz Siam

 

 

Ni khat inn a ka na om maimai leh theih ngei ngellouh pasal kum sawmli veel ding mi ka inn uah a hong luut a,  a hong kan a, bang ding hiam chih ka na kanleh lai khat hon piakkawm in, ‘Tutung na khua ua PTC khawmpi leh kiteelna kithuah ding ah thugenna saulou hong nei le teh chi hi ve ung aw,’ ahon chi laizang a, April ni khat ahih toh hong chiamnuih hi peuhmah in teh chia lai ka hon leh PTC-te’ lailu (letterhead) ana himah ngei ngut a, limtak a ka simsuk leh mipa’ hong thugen tuh dikmah hileh kilawm. Ahi a, lawm kuate hiam in hon chiamnuih uh hi ding in ka koih lailai a, ka gingta utkei. Mipa toh ka houlim ua, huchia sawtsim ka hong houlimtak un tuh a taktak mah hi’n teh ka chithei khong hi. ‘I namsung a dia mipil leh suanhuai pawl na hih toh, nou khua a khawmpi omdek a hihkawm toh deihsak thugenna hong nei le teh chi hi ung,’ a hon chi a, mi’n ‘mipil’ khawng a hong chih uleh zaw kinui vuam thou ahi. Ahi a, kei pentak banghang a hong chial sese uhiam ka theikei. Banghang pentak a pil hon chi hiam le ka theikei. Bangteng hileh mi’n mipil chi a i thugen ngainuam tuh va genmai ding hilou di hia chi’n ka na aw hi. Lah tuma a kiteel tungthu a hichi buai vengvung ua, huai ni chiang in leng buaina peuh a hong piang mai de aw chi’n ka lauthawng gusim hi.

 

A ni a hong tung a, milian-milal teng bang le kim phial ahihman in ka kithalawp sim a, lah ka huphulh sim zel hi. Kei leh kei kihanthawn in kei hun a tun tak in dohsang ah ka va ding geugau maisam hi. Mipi ka enkual a, hangsan mahmah leh lauhthawng mahmah ka thuah a, ka thugen di bang ka panzok theikei zezen hi. A tawp in hu thuukpi a la in ka pan khong hi.

 

“Heutu zahtaakhuai hong paikhawm, akhual-atual ate, na vek un chibai ka hon buuk masa hi. Tuni a kua theihphaak le hi hetlou kei pentak thugenna hun saulou zang dia na hon chial mawkmawk uh lamdang ka sa a, lah mi’n deihsak a hon chial hi ve’n chia hong ding tuh ka hita mai ve. Ka thugen ding a saukei a, khum leng khum khol ke’n teh. Himahleh no’n chial ngal uleh tuh ka gengen nana ngaihkhiak mai ding uh hi’n teh.

 

Ut in utkei leng Manipur huamsak in i om ua, Talpakte’ thunuai ah i om uhi. A hoihlouhna teng un ei leng ahon loh a, neekguuk, sepna mun a pai utlou, sepna lei thoh, ofis kai ginatlouh leh a dangdangte eite’ a leng a hong hita hi. India a paidan chi khat tuh a migilou teng in mipi vaihawmna let ahi. Huaiziak in MLA leh MP chih khawng ah migilou tampi mahmah om uhi. India a om i hihman in ei lak leng a huchiloulaw tuan kholkei maithei. Huaiziak in MLA hiam MP hiam MDC hiamte khawng i gup hun in leng pilvan mahmah tuak ahi. Khente zaw leng a mite it a hong kipan a hikha ding uh. Himahleh khente tuh thuneihna muhna dia a mite hon zang ahi uh. Gen kulkul mai le’ng, tuni Zomi min a thuneihna a ngah theih ding uleh Zomi min in hon bumhai ding ua, zingchia Paite min a thuneihna a ngah ding uleh Paite min in a hon bumhai ding uhi.  Tua bang mah in min dangdang zang in. Hamphatna delh a nungzui heutu bangzah hiamte’n gam leh nam min veek in mipite hon khem ding ua, i awn duaiduai ding uhi. Thuneih theihna ahihnak leh Congress, BJP leh a dangdang khektheite’n Paite, Zomi, Kuki, Tribal chihkhawng a kheektheihlouh ding uh gingtake’n. Tuma kum sawmnga sung khawng a i khangthu uh suut leng huai ah kitel mahmah hi. Amau thuneihna ngahna ding a hihnaak leh hamphatna ngak a gin-om a sihngam a nungzuite a hon bumhai ding uh. Huan ah Phaipi ah talpak heutu a neih uh leng phawk gige ni. Election nawn chia leng thuneihna mah deihtouzel ding ahihman un a talpak heutute uh leng a suk lungkim mahmah uh kuulkha ding hi. Huaiziak in akua-akua nung i zuih in leng kidawm ni. A nung uh i zuihzuih kawm in i zuihte enkhiakna nei zel ni. I pilvankei leh amaute’ ziak in i innsung, i vengsung, i khosung,  i namsung, i gamsung ah meima a kai ding a, itu-itate’n tua meima damsiang theilou a buaipih nilouh ding ua, huchih kaal in mi’n va-uk in a lenmangsan ding uhi. Hon lenmangsan le hitalou ahi u! Himahleh thukipahhuai bel ei makaite huchi bang a omlam uh i theikei a, tuni bang a kithutuaktak a kuapeuh i kithuah dialdial uh i hamphatna uh ahi. Houh tukhawm dedap napi a lungsim a kilampipi houh i hi uh hia leh? Khaile, hiai tuh thumapi ahi a, sau i genkei ding.

 

Tuni in heutu thak i kiteel ding a, heutu thakte’n a hon semtouh ding ua ka deih tamlou hon kumlai leng ka ut hi. Tua heutu lellelte’n ana semta uhia sem nailou chihbel ka theikei. Ka kihelkhakna leng ahihlouh ziak in.

 

I gam keu gawp tul gawpta zuun ngai mahmahta. Hiai etkailouh a i koih nilouh leh denchiang a bawldik zoh nawnlouh khop a sing-leh-gua leh ganhingte a manthat hun in hon lap ding hi. Huaiziak in i gam a thilhingte kibuukkimna (ecological balance) hoihtak tungding thak ni. Tua ding in a baihlam pen a gen in khua khat ahihkaleh hausa khat in a gamsung a gamlak za a sawm hiam sawmnih hiam beek gammang di’n hawi henla, sing-le-lou himhim sat hikei henla, gamsa bang leng bethun-betlouh hun deuh om henla, tua bang hileh zu-le-va leng kibehlap mahmah ding in gintakhuai hi. Tua bang in hih le hang tunung kum sawmnga chiang bang in gampalak i gam ah hong om nawn ding a, singkung lianpipi hong om nawn ding a, tua singkung lianpipite’n kohawm lianpipi hon nei ding ua, i hawlmang sa vaphualte bang leng hong kiik theinawn ding uhi. I luidungte etkai a poimoh a, tengkol sawkhun, sawklouh hun, tomtuak, siittuak, chihte hoihtak in enkai leng denchia a vangzou ding eimah i hi. Government in i gam a thu hong neihluat a, Keilam sangtuary khawng peuh a hon chihsak i ut ngelkei hi. Tua bang in eite’n vaihawm siamtak in i gam enkai le hang government kiang a hong kidaihlah ke’n, gamlak etkolna kichiantak nei ka hi uh, chithei phial ding i hi.

 

Neekzonnalam ah i zoudawnlam a singtanglou neih gige kheekkhiatna ding i ngaihsut uh hun mahmahta. Huaiziak in khangnou siamsinte bang leng zattaklouh ding pi sin a i om nenaw sang un a phatuam ding agricultural science lam bang, food processing lam bang, leh a tuamtuam khawng kawkmuh in, i singtangloute kheekkhe theita leng lunggulhhuai mahmah hi. Israelte bang in a gam uh gamdai a neek-le-taak tampi a piansak theih uleh en ba i gam hing dipdip a neek mulah ding? Tuk-le-khoi a tua sang a baihlamzaw leh piangzaw i mite’ a di’n zonkhiatsak ni. Huan ah zoudawn a haksatak a a khohkhiatte uh man nei deuh a khotheihna ding bang uh leng vaihawmsak ni.

 

Siamsinnalam ah, ei politics saite hiai a, huai a, chia sih muhdah a kimudah a, lungsim a i kigaalbawl gigelai in saptuamte leng ana om maimai tuansamkei ua, kho neuchik ah leng saptuam skul khatkia om theilou in nih leh thum bang a om ton a om hi. Zoudawn papi khenkhat in amau saptuam’ skullou a a tate uh kaisak ding sih zaakdah in zadah uhi. Lamka zaang ah bel PCI-te a, EBC-te a, Catholic-te a chih omlou in i utnana ah i kaisak hi. Tua bang lungput i zoudawn unaute putsak hunta hi. Huchi hileh saptuam khat in khua khat ah skul hoihtak in hong thei ding ua, saptuam dang in kho dang ah. Huchi hilou a khoteng a skul a hon chiat chiang un ginatak in enkai zoulou uhi. Government skul lah hoihsakzou mahmahlou i hih chiang in ah. Laipau (literature) bang leng i awlmoh uh hunta hi. Laipau a hausa nam tuh nam khangtou ahi naaknaak uh. Huaiziak in khangthakte lak a laipau a lunglutna a hong om a, huai in i laipau a hauhsak sak theihna ding in pan la ni.

 

Kilawmna leh sianthouna leng i ngaihpoimoh mahmah uh hunta hi. I gamsung a hun-awl zatna ding gam-awng bang a tam theilam i neih uh hunta. Khokiim khawng ah awlawl in a hong dingkheta a, himahleh Lamka zaang bang a tua bang kinei himhimlou. Ngaihsut phaak a ana kineilou. Huaiziak in gam-awng, mun kilawm (recreational park) bang leng mihing omna teng a mun sehtuam, tu leh tu a i bawlzoh naikei leh leng awl a bawl ding a mun sehtuam i neih uh hunta hi.

 

I khangthu uh bang leng lunglut a, puah hunta in ka thei hi. Guite Innpi a ton nanung na khua Hanship bang muih ding hita. Innpipa Pu Kamzamang khomun hinawnkei mahleh a khomin himhim leng pammaih ahihman in hiai khuate khawng puah a, Paitete’ kia hilou a Zomite’ a dia Heritage site a puantheih mun ahi. Zomite tengteng bulpi lah Guite chih kuama’n i haihkei ua. Huaiziak in i gam a mun leh mual tua bang a khangthu a mun poimohte, mun kilawmte leh nuamte puah le hang tualsung khualvehna (domestic tourism) hong pung ding a, mitampite’ a dia neekzonna hithei ding hi.

 

A tawpna pen di’n nampi makai i hihna ah zahtaakhuaina paai i sawm ding uh ahi. I limlakte kholak a a kithehthang chiang a loukuan dek mah i bat neelnuullouh ding uh ahi. Isilh-iteen a leng zahtakhuai i hih ding ahi. Hithei liai le tuh i PTC innpi bang uh leng mun liandeuh ah hi henla, inn thupi deuh hi leh. I puanlap bang uh leng a keeklou deuh, mite’ zahtaak tham ahih ding ahi. Huan ah huai innpi tuh suamhaatte, neekguukhaatte leh angmasialte’ munpi chih a theih hikei henla, mipilte omna mun, mizahtakhuaite omna mun, diktatna mun, mun siangthou, naupang lungsim siangthoute’n a galmuh chiang ua a let chiang ua huai a om a lunggulh tuntun ding khop ua mun kilawm leh etlahhuai hileh. Guite Innpi bang houh England kumpi bang in thuneihna neihetlou ding in tawisang in, ex-officio dinmun bang pe leng khantouhna ahi diam, ahihkaleh kiakniamna? Nidanglai in tulpipa tellou in nopna dahna vai kipan theilou a, tu chiang in bel mipi’ vaihawmna hita ahihman in tulpi kingai poimoh nawnlou hi. A lungleng theite a di’n bel lunglenhuai mahmah.

 

Awlmoh tampite lak a tawmchik keleu kia luikhia i hi a, hiaite tangtak a va sepkhiat theih leng ahi kholkei maithei. Himahleh nampi makai i hihna a i thuneihna bangchi hiamhiam a zang a sepkhiat theih ding ngenta ahi uh. Mipite’ lak a kikhenna leh kilemlouhna tutna dia i thuneihnate i zat sang in phatuamzaw mahmah ding hi. Politics ngenta gen hinapi in hiaisa politics zawte le genkhalou hi hang. Huaite bel taptung kho houlim tiptip ding hi henla.

 

Saupi in i genmankei, hun sau i neihlouh ziak in. Hiai a ka gente tengteng ka gen masakna ahikei a, tuma kum sawm sung khawng a ka na gentai-saktai dimdem sa ahi. Himahleh ke’n sepkhiat dia hoih ka sakte mi’n hoihsa khollou uh ahiam ah tutan kuaman semkhelou uhi. Kei leltak ngaihsutna a  a hong kilatleh tuh noute’ ngaihsutna ah leng hong suak lawtel ding hi. Huan ah en awlmoh in gengen leng leng a semkhe dia kilawmte’n huailamte buaipih a neikhalou in contract khawng, sepna khawng, leh hamphatna dangdangte khawng kia a buaipihzaw ua, a gengen a a gelhgelh leng chimtaak a, tangkoukou peihnawnlou le mi tampi om kha’n teh. Contract leh mahni gilpi a ding kheel a gam leh nam it i om ngeilouh ziak in mite’ nelhsiah leh simmoh in i omta. Ei houh kitauhtauhta lai hang. Khatte a hong kipan ua, gam it a awlmoh taktak i sa a lah hituanlou. Khatte a hong kipan leuleu ua, i na gingta dek geekgeek a lah midangte’ puukna mah a puukzel. Huaiziak in awlmoh bang leng chimtakhuai khong hileh kilawm. Tuni in ahihleh thugen ding a chial ka hihtoh ka hong tangkou thak a ahi. A tawpna leng ahita ding. Huaiziak in tuni apan kuapeuh in eimah a ding i geel kawmkawm in i nampi a ding leng geel in, eimah a ding sang in i nampi a ding masasak hamtang leng a hampha ding eimah hi veve i hi.”

 

Huchia a tawpna bawl dia ka kisaklai in kikhopna buuk konglam ah bomb  a hong puakzoi a, ‘iiihih, ka lauhlauh mah. Buai ahi peetmahta maw,’ chih toh ka thugenna maitam a kibu dia ka tutsuk leh ka lu ka tatkha laizang a, ka kiguih zot hi. Awl a hak a ka daaktouh leh koilak gampalak PTC election hina ve, ka lupna tung a lum ka na hi maimah a, mang nuamtak a pan khanglou ka hi nengnawn hi. Sungte an thuukte’n a kuang uh sukia ua, huai in hon phawng ana hi maimah hi. Koilak mipil hih malak ah mi kipilsak, omna mun a mi soiselsel thei phet, kamtam mahmah napi a thulaak ding le genkhelou, sungte’ zing an neek lap a leng thoukhe ngeilou khat ka na hi maimah ve.   Zan a ka innkhang ua PTC kiteelna a neih uh ka lungsim ah a hong lang a, tawpna thumna leng ngak zoulou a result puankhiat a hihzoh a kichibai sosouh a a pai duamduam ua, tawpna thumna nei ding pa bang lakloh tak a a koih bang uh ka ngaihsun khia a, nampi makai paikhawmte leng hichi hitel hang a maw, dahmah tel hang, chi’n sunkhua a duhthusaam saam ding ka thoukhia hi.

 

Pu-le-pate’n zaw-

U-le-nau simthu kidawng diildial ni

Tou chiilchial in siambel tuu bang chiing le’ng

Tou chiilchial in e siambel tuu bang chiing le’ng

I hawmkhelh zong ziin hawmkhelh chi ve ni,

 

ana chi mah uh hive’n! Ahi a, pu-le-pate le khokhat leh khokhat ana kisimtou ngiitngeet hitel ua maw. Amau toh teh a tuh khangtou mahmah i hi. Kipahhuailua! Tua bang a kisim utna chii i lak ah chikchiah a bei tam maw!

Read 205 times
Login to post comments