You are here: HomeArticlesGeneralPhotoshoot

Photoshoot

Written by  ZM Tonsing Published inGeneral Saturday, 28 July 2018 08:01
Photoshoot

Photoshoot

~by: ZM Tonsing

 

Nupi khat in a lim luideuh mai khat passport a sawp di'n hon tawi hi. Nang lim mah hilou maw kilathak zaw ve, a kilakman om tuanlou, hoih zaw di na hi ka chih leh utlou. Huai lim kilak naa lah hilou a kilathak suk in ka chih kawmkawm in tulai khangthakte lim kilak a ut theihtheih maizen uh toh maw ka chilai hi. A tawp a tuh amah le kilak hong utthak, a latupa ka siamziak a diam ah hoihsa hi'n teh ka nungaklai mah ka bang behbah zozen a chi hial aka. A kisik hetkei.

 

Blue Star a kailai a principal pa'n "nidanglai a lim kisawp inchin tulai a ki-delete ahi" ahon chihleh dik ka sa mahmah. Hiai a thugen tungtang ah thukhenna bawl a, mark pe   di hile'ng a tanau hauhziak, a sum hauhziak leh mi zahtakhuai ahihziak hizawlou in a thugen dik ka sak ziak in full mark ka pe himhim di. Mai-et a mark tampi va piak le ngailou, thudik hi a i theihtuh gup gingen di. Kua hiamkhat lalna dia lubuk phalzen a kipumpiak chihkhawng haina chikhat ahi. Ah! Hiai lam thu zaw ka gennop pen le hikei. Ka tawp!.

 

Nidanglai a lim kilakchia lim i muhna dia sawpkhiat teitei ngai, tulai a tuh sawpkhiat sese louh  ale lim kimutheipah, ahoih keileh delete geih. Ahuchihlouh tawp ale ahoih theitawp dia zut a zut mam, a taktak toh lim a mel kibanglou zou hialkhop a bawl lamdang theih. Vangsiatthu in mang na khat bang nei mawk lele lim tungtawn a zonsuah theihlouh di hialkhop a kibawl lamdang. Lim sawpkhiat ahihnung nangawn ale hoihlou lailaite tuh hoihlou taktak mah hi di eive ua!

 

Tulai bang lim kilak baihlam, a baihlam ziakmah le ahi dia tamtakte'n limlak ziak in minsiatna i tuak ua, Khuga Dam VIDEO Clip ziak in sihna tan hial bang i tuah kholoh maimah ngei uhi. ‘Westernization’ i chihchih uh, tumlam gamte' om dan leh khosak dan bangkim in i lak ahon zelsuak a, i nek-le-dawn, khosakdan leh kicheidante kia hilou in lim kilakdan natan ah ahon thuzoh zou mahmah uhi. Kiten chiang a ‘photoshoot’ neih teitei di chih thupiak sawmte lak a omkha bangmai in i poimoh ngaih ua, alou theilou bang hial in i koihta uhi.

 

Ahi, hiai kitenni a lim kilak a sia ka chi zenzen kei, mihing damsung a dia hun poimoh leh thupi penpente lak a khat ahihziak in kilak tham di mah ahi. Muk leh muk kihettuah guigui a lim kilate le ka mohsa keilai, amau zaw nupa ahita ua, a ut leh dah in om uheh poikei. Nupa ahihma ua le bangteng hihkhawm uh a chih i theisam a! Tulai kitenna i chihkhawng ‘nupa ahita ua, a ut dandan in a om theita uh’ chih ‘official’ a puankhiatna lel hilou amaw?! Ka zuau hizaw hia leh, ka theichiang kei!.

 

Ka gennop tak tuh mi neihlouh nei le hilou, mi a sang a hoihzaw leh pawngzaw deuh nei chihle hisamlou dia i lim kilak utdante khawng un lamdang sa ka hi ve. Khovel a magazine minthang pen cover a tuang di bang hial khop a ngawntang phial a ki-pose gehgah. Mi ‘sexy’ deuhkhawng a lim a kilak chiang ua maw sum tam pipi luakkhe meihmuih uh eive, eilak a tuh teng khat le lohlou dia kila ngam hitel hang a! I man uh tawm thei law deuh hive aw. Sum i lohlouh tawp a le ‘social media’ khawng a koihkhe ngam a, ‘like’ leh ‘comment’ tamdeuh khawng muhna di hileh nengchik a dan om deuh di hi a, huai dia lah koihkhe ngam tuanlou, a phattuamna himhim omlou, om mahmah lou. Camera bang le pakta khengval law deuh houh i di ua aw chihsim in om hi.

 

Zatna di omlou kia hilou a, lohneilou a ‘photographer’ khat’ mai a ngawntang phial a ki-pose hianhuan ngam nana-na in tuh amah leh amah lim kilakna, lim thanghuai bang chituk in a hau dia aw? Mi a kilak ngam nakleh kei buaipih di om kei himahleh tua limlakte ahong kilatkhiat ni tuh minsiatna leh mualphouna in hon vaidawn di ahi chih i theih poimoh hi. Thil himhim theihlouh dia kiselgu bangmah  a om kei, tua ziakmah in ‘nude pic’ leh ‘VIDEO Clip’ tamtak ana ‘leak’ ta a, hong ‘leak’ zellai diing bang hi. Bawltawm/phuahtawm (fabricated) chi in leh paulam tuamtuam zangsek mahle hang chengkhat hilai makhai suak toh kibang lelta hi.

 

Lim kilak a sia ka chikei, model – melhoih, duangching leh etlawm tamtak hong om henla, i nampuan leh tawndante khawng uh hon phoulak ziiziai le uh etlawm in mit tai mahmah ding hi. Himahleh, tuate khenlam a kalsangzaw ahon tawi chiang ua ahi i chih. I chihsa mahbang a mi a sang a hoihzaw leh nalhzaw, chituamna riau khat nei ihihleh tuh zum leh zahlakna a ngailou in, world record bang le i bawlkei di ua hia! Poilou. Huchilou a zaw eilak a minsiatna lou ngal a dang a  zatna di om mahmahlou tadih phot ahi.

 

Pasal khat in numei khat lim la in chin, a kilakzohtak ua a limlapa’n numeinu kia sum 2k piakbehlap chihbangle thuthang omsak hilou ihi umaw? Bang kichi lak le a tel di uam ah! Lim latute kiang a lak a om te’n limlakman kipezel i sak leh amau’ paidan ana tuam mawk, hon pei lung-am, kisibup dek eivoi. Khemna i chihkhawng nuam i sak zawng, i lunglut leh utna lam mah a hong kipan himawk in chin, tua i lunglutna a hong kipan khemna  pen douzou dia pan i lak poimoh hi.

 

Hun paisate a i lutkik theihna om sun tuh limlak khawng lel ahihman in hoih leh hoihlouh thutuam, lim kilaktam a siatna omlou mah ahi, himahleh a huntan theini. Kou inkuan ngialhouh lim kilak ana chilbawl lawkha ka di uam ah, inkuan kim a lim kilakna neikhalou, neikha ngei nawnlou himhim di kihita. Tulai dan khawng hileh tuh tamveipi kilak tuan zotzot a, hoihlou i sakte delete di, hoih i sakte a hoihzaw sem dia bawl zaw mah di’n, mi, a mukhate’n hiaite inkuan melhoih theina sepsup uh e hon chimai d’uh hi a.

 

Nupinu’n a poimoh tettet passport maimai kilak bangle sih lit a a lit lai a khenkhat te’n mun lemlou chik, bathroom leh dailenbuk sung khawng peuh a chipumteng dawksuak pengpong a kila! Mi kiang a midang a khaksawn louh dia pekhe zaw mah. Gum himhim. Sapte’ thupil, thupil le ahi pouhna diam ah nalh ka sak mahmah – “A secret is something you tell everybody to tell nobody”. Hiai chet ahihtuh, lim pen in aneitu’ kiang a denkik nawnchia chuu...himai...kichai...kichaivot! Ka thugelh le kichai!.

 

© ZM Tonsing | 26072018

Read 172 times
Login to post comments