You are here: HomeArticlesGeneralTANGMAI FESTIVAL

TANGMAI FESTIVAL

Written by  Muang Khuptong Published inGeneral Monday, 30 July 2018 09:43
TANGMAI FESTIVAL

TANGMAI FESTIVAL

~ by : Muang Khuptong

 

                Leitung ah festival (vualnop) simsenglouh om a, huaite a pilpil in biakna , gam, nam, tawndan, ngeina, nek leh dawn, louma a piang haite leh theihgahte in khen theih hi. Haihuai taktak tampi om mahleh omzia leh tup leh ngim hoihtak nei tampi om veve hi. Amin khatpeuh hitaleh a huapkhak leh tup zahuap mahmah leng atam hi. Bangteng ahizong in, nopbawlna leh nekkhawm-dawnkhawm toh kisai lampang ana hi peuhmah hi.

 

                Tutung a Young Paite Association phualpI in ‘TANGMAI FESTIVAL’ neih ahon sawm uh bang tupna nei leh bang ziak a haichi leh theigah hiai zahta i gam a piang a omlai a TANGMAI (cucumber) pentak hon deihtuam uh adiam chih ka thei kei a, theihchian sawm in leng kuahiam ka dong ngei tuan kei. Bang chi bang a sai sawm ua, bangteng huapsak sawm uh hiam chih leng ka thei tuan kei. Himahleh whatsapp tungtawn a houlimna khenkhat ah bel Tangmai tuhte unau’ tangthu loungal hiai festival toh kisai a gen leh sak ka zakha/simkha khol kei. Hiai tangthu dan in bel Tangmai huchitel a thupibawl leh ngaihnathuai hi in ka the kei.

 

                Ahihhang in ka theihsun bel Tangmai i chih lim mahmah leh manphatak hinapi sawt daihlou, sepah, ahou hiam athu (um) hiam a bawl a koihching theihlouh khat ahi. Khenkhatte’n bel achar(pickle) a bawl in kembit thei uhi. Tuipaai mahmah ahi a, 90% tui ahi. Khanglui/ thukhunlui lai chile’ng i theisiam zaw ding ua, huai hunlai pek apan a Aigupta gam khawng a ana nekpi khat uh ahi. Mi neizoute’ nektak ana chih hial uh himahleh chipha leh hingnuam ahi dia, baihlamtak a gahsuang ahihman in mizawngte tanpha in a nek theih ding un kidaih leh kiningching in piang a baihlamtak a kuapeuh nek theih ding in om hi.

 

                Israelte ngial in houh gamkeu-gamdai a vakvaihlai ua, bah leh sawlsam a a om chiang un leh manna (Pasian’ piak ann) kia a neknek chiang ua chimtak in, Aigupta sal a a tanlai ua ana neksek uh Tangmaite lunggulh vungvung in, “ Aigupta a zaw ngasa i duh lamlam lei sese louh a ne thei mai hihang a. TANGMAITE, mazelte, phulun sialnekte, vaiphulunte, phulunngoute i thei gige uhi.” ana chitanghial uhi (Nambars 11: 5). Gamkeu- gamdai a dangtak mite adi’n tuh tangmai sang a lunggulh zawk ding a vang mahmah ngut hi. (Kuahiam khat in gen hroihhroih maile chu  a ngaihnuam awm mang e aw !!!!)

 

                Tangmai i chih India a kipan hi a, chi tampi mahmah om a gen ahi. India pan in Greece leh Italy ah puaklut hinawn hi. Romante’n duh mahmah uh chih ahi. Huai nung in China tung hi. Kumzabi 8na/9na hunlai in Charlemagne in ahuan ah tangmai ana chiingta hi. Kumzabi 14na in England ah ana chiing panta mahle uh, ana mangthang a, kum 250 nung in puaklut in om nawn hi. Tuni chiang in leitung gambung (continents) teng ah omta hi.

               

                Romante’n aikam (scorpion) in a keihte etkolna damdawi ding in ana zang ua, mit hatlou damdawi ban ah zusa hawlmangna ding in zang uhi. Ta nei ut nupite bang in (khau a tangmai khil in) a kawng uah gak ua, naudawmtute bang inle huchibang a gak in, naungek a pian/ a neihkhit chiang un huai tangmai kawnggak lakhia/paihkhia uhi.

 

                 PAITE PUANDUM a a vom nihte kikal a a ngou a JEM pai pen hoihtak in en lechin TANGMAI MU (seeds) enton a kibawl ahi. Hiai thuguk theilou hunkhop om ding in ka gingta, abiktak in pasalte leh tulai khangthakte. Tua ahihhman in Paite leh Tangmai in kinaihna riau khat ei ua, kikhen thei mawk ding hilou hi. Huaijiak in eite adding in tuh TANGMAI FESTIVAL ding mah hitah chih hon ngaihtuahsak.

               

 

                Naupanlai a ka theihkhak/ jakkhak khat ahihleh, naungek nawi nelai (nawitui loungal thildang a nek theih ma) a eklak ah tangmai tang(seed) om thei mawk a, anu’n tangmai a nek chiang a a tangte a nawitui a paisuak adiam chi in lamdang kisa mahmah hi. Huchi taktak adiam chih zaw ka thei kei. Huailou in, Tangmai kha velvul (bitter) khawng i nekkhak chiang in, upate’n gul(snake) in a kaan/vakkhum ahi chijel uhi. Jalmang a tangmai i muhleh thilhoih a ngaih ahi, leiba dinzou ding chihna hi in gen uhi.

 

               

                Leitung ah tangmai chi tuamtuam hunkhop om a, huaite lak ah tamlou enjual le, theihtei maimai ding in:

English cucumber. Lian in  avun hingdup a, a tang/mu tawm hi.

Armenian, or snake cucumbers: Sau in kawi a, ahawng pan in hingdup in vuaipian hi. Achar dia zat ahi.

Japanese cucumbers: Hingdup in neu hi. Ahawng phok in apum a nek vek theih.

Kirby cucumbers: Hawng pan ngot leh hul(crispy), atang tamlou. Achar a bawl chi.

Lemon cucumber: Sekthuk bang in bem in ahawng dah hi/engpian hi. Khum in lim hi.

Persian cucumbers: Tom in bempian/lian (thausuak) teihtaih hi. Puak giapgiap(crunchy).

Wild cucumber, or Echinocystis lobata, North America a om, khangthei mahmah, nek theihlouh ahi.

 

                Eilam ah hawng hing, duppian ban ah engpian hiuhiau leh hawng ham gipgiap a san-eng piante kimu tangpi hi. Atung a chi tuamtuam i gente bang in nip leh nem ngeingei, khum leh tuipaai mahmah bang, puak giapgiap bang, thuuk(sour) chihte khawng atangpi  ahi. Aneulai a ahawng toh nekkhawm giapgiap a lim mahmah bang leng om a, amin/san nung a maltavui toh sohbawl a lim mahmah, pumsan, ahawng bang ham phitphiat pawl bang leng om hi.

 

                Huailou in, tangmai i chih damtheihna ding leh taksa hoihna/etlawmna, sam leh vun ading bang a hoihna tampi nei ahi. Khanglui lai pek apan nek ding leh damdawi a zat ding in India ah ana kichiingta hi. Mediterranean diet ah ana telkha ngitnget hi.

 

                Tangmai ah tui tam in calories, fat, cholesterol leh sodium tawm hi. Kholumlai a nek in keuna/sawlsam apan hon veng hi. Ice cream sang in tangmai in i taksa votsak zaw a, sawt daihzaw hi. Ahawng toh nek theih pawl om a, salad leh atuamtuam in nek theih hi. Achar a bawl theih leng om hi.

 

                Na tui dawn ding lak ah tangmai leh pudina(mint) hel lechin tui tampi na dawn zou ding. Ne tam lechin na sung dam in, sungpuak apan hon ven ban ah, na kal(kidney) khuahsiang gige in kal a suang om ding dal hi.

 

                Anhaizanna panpih in, sungpuak, kal/kailing, huut, zunkhum leh cancer damdawi a kigen ahi. Ha adia hoih, pengnawng damdawi ahihban ah, lungtang natna, taksa, guhnatna leh Alzheimer’s damdawi ahi. Taksa gikna kiamsak in, blood sugar enkoltu ahihban ah taksa khophawkna lam(Nervous System) panpihtu leng ahi. Ban ah sampulh ding veng a, sam hoihna ding a leng zat ahi.

 

                Vun toh kisai in, chibawk, chithak leh sa ban ah nisa ziak a vunkatna damdawi ahi. Vun nousak in  avuai ding dal a, pheipi a thau ziak a bawkte beisak thei in, mitnuai a vundup damsak thei hi. Ihmut khamlouh leh laisim/tv etna ziak a mitsip leh khamte tangmai beu mittung a koih in damsak hi. Ban ah vun toh kisai buaina tuamtuamte apan veng in damsak thei hi. Toner leh  Face pack in leng kizang hi.

 

                Thamlou in , na taksa damtheihna ding a poimoh ‘balanced diet’ hon petu ding ‘nutrients’ kidaih huntawk  leh taksa adia poimoh tuamtuam tangmai a om ahihman in, kidamlou hial a beihthruai mai ding ahi.

 

                Huchi kawmkal ah TANGMAI FESTIVAL zang dia kisa mimal leh i nam in i theih ding uah hoih mahmah Tangmai Tuhte Unau’ tangthu apan sinlai hoihtak i lak uh deihhuai. Huai tuh ‘mahni tantawk a lungkimlou a deihgohna leh huaihamna in zahlakna leh siatna thupitak hon tun a, huchibang mah in, itchil leh mahni angmasialna in lungkimna leh kipahna hon tun tuanlou’  ahi chih. Huchih hilou a, hiai unau nihte’ gitlouhna leh khelhna kigawmkhawm neitu i hih lehbel ‘ Jerusalem/Zion’ tanu bang in ‘ Grep huan a venbuk leh TANGMAI HUAN (field of cucumber) a buk bang leh melmate’ umkual a om khopi bang a nutsiat in’ i omkha ding !!!(Isai 1:8)

 

                Bangteng hileh TANGMAI FESTIVAL zatnuam.

Read 514 times
Login to post comments