You are here: HomeArticlesGeneralFESTIVAL LEH EITE

FESTIVAL LEH EITE

Written by  Muang Khuptong Published inGeneral Monday, 30 July 2018 09:45
FESTIVAL LEH EITE

FESTIVAL LEH EITE

~by : Muang Khuptong

 

                Festival i chih mawltak a gen in nopbawlna leh nekkhawm - takkhawmna hunnuam chihna ahi a, biakna toh kisai a nopbawlna lam a kawkdeuh hi. Ban ah louma a haichite theh/tuh/suan hun leh a gah lak/at hun a kipahthugenna hunnuam leh nopbawlna hun a zat hi a, nekkhawm-takkhawmna toh leng kithuah deuhsim hi. Huai ziak mah in haichite leh theigahte ziak a festival hun atam mahmah hi. Khawlni (holiday) a zat leng ahitangpi hi.

 

                Eite’n ‘Kut’, ‘Pawi’  i chi ua, tunai in PLS in ‘Sawng’ chih hon zang hi. Gam/nam/pawl khat in amau’ zungpi, khangthu, sahkhua, ngeina, tawndan, zuih leh upte toh kisai a a thupi leh poimoh ngaihte uh theihgigena leh huaite pansan a kibawl ahihban ah, a lunggulh leh tupte uh theihthakna leh kihanthawnna, thathak lakna hun in zang uhi. Ban ah nam, tawndan leh chindan, deihdan, tup leh ngim kibang neite’ kipolhkhawmna deuh ahi. Thamlou in, omzia leh etsak neitak ban ah tup leh ngim nei a kibawl ahi tangpi hi.

 

                Gamsung a thilpiangte, theigah leh haichite/haigahte ban ah mahni siamlamte (talents) - khutsiam-silbawl, lasak, tumging, lemchin, lemgelh, laigelh, chiamnuih leh adg - lahkhiakna dia hunhoih leh lemtang ahi. Nidangin in bel veng khat, khua khat, chi leh nam hiam gammite kia in ana zat uh himahleh tuchiang in khovel mun tuamtuam apan khualzinmite leh thuthaksaite mah in uapta ahihman in, khovel theih dia thehjak baihlam mahmahta hi.

 

                Leitung ah festival tuamtuam tampi om a, haihuai pipi bang leng tam mahmah hi. A min pen thutuam hileh a huapkhak leh tup zapi ana hi thei hi. Philippines gam ngial ah houh festival 42,000 val om a, ni khat in festival bangzah a omzou diam ah!!

 

Religious festival:           Biakna/sahkhua toh kisai in ei Kristiante’n Christmas, Easter, adg i neih bang in sahkhua dangte’n leng amau aa chiat tampi anei uhi. Gindan tuamchiat jui himah lehang  biakna toh kisai vualnop ahi.

 

Arts festivals:                    Khuakpilna leh khutsiamna vualnop hun ah telsuina (science), laipau (literary) leh tumging (music) toh kisai a siamna leh lohchinnate lahkhiakna(showcase) hunlem ahi. Hiaite lak ah chiamnuih, tumging, laphuah, lemchin, tangthugen leh adg ahi.

 

Food and drink festivals:              Gamsung a piang nektheih leh dawntheih tuamtuamte nekkhawm-dawnkhawmna vualnop leh huaite lahkhiakna hunhoih ahi. United States ah National Peanut Festival (mungphal) leh  Gilroy Garlic Festival (phulunngou), Ireland ah Galway International Oyster Festival (tuikep), Spain ah La Tomatina (mehthuk). Germany a Oktoberfest (for beer).  Ei lam ah Lengthei, Sekkhum leh adg.  Maban ah TANGMAI.

 

Seasonal and harvest festivals :                Hunbi nei leh theigah leh haichite lak hun/pawltak vualnop genna ahi. Chapchar Kut, Chavang Kut, Khuado Pawi. Lower Subansiri District, Arunachal Pradesh a Apatani namte’n kumteng July 4-7 sung in Dree Festival kichi louma haichi gahphatna dia thuumna/ kithoihna vualnop zang gige uhi.

 

                Festival himhim, i gensa bang in a ziak, poimohna leh omzia neitak ngen ban ah tup hoihtak nei tangpi ahi. Leitung ah festival haihuai leh nuihzathuai simsim bang mahleh tup leh ngim hoihtak nei a kibawl tampi om hi. Etsakna tawmchik  enjual ni.

 

1. The Battle of Oranges:

                Kumteng in  Ivrea, Italy ah mipite pawl nih kisuah in, kum 1194 a kumpipa paihkhiak sawm a  mipite’  kiphinna lem ching(recreate)  jel ua, himahleh galvan hilou in sekkhum zang in kidou uhi. Italy’s biggest food fight chih ahi.

 

2. Wife Carrying World Championship:

                Zi puak kidemna, or Finnish a ‘eukonkanto’ kichi 1992 in  Sonkajärvi, Finland ah kimawlna dan a ana kipan ahi. 1800 laivel a suamhat minthang, a guk thilte leh khota numeite taimangpih jel tangthu pansan ahi. Pasalte’n a zite uh bungbutun a nungpuak in, 253.5-metre a sau taipih ua, a kinpen, hatpen leh kichei siam leh etnoppen kiang ah kipahman in a zi’ gikna zahzah ‘beer’  piak hijel hi.

 

3. World Toe Wrestling Championships:

                Khepi kibuanna, Staffordshire a Wetton khota ah 1970 laivel in ana kipan hi. UK in khovel a amau aa tuam leh amau’ patkhiak hichibang kidemna/kimawlna chi khat neih himhim a ut ziak a ana kipankhia ahi. Kikhutbuan toh paidan kibang, best of three a kizoh ahi.

 

4. Boryeong Mud Festival, Korea

                Korea a festival minthangpen leh lunpen ahi. Buannawi lak a kibuan, kitholh, kisil leh adg ahi. Haihuai sim bang mahleh hiai mun a buannawi in manphatna nei a, huai buannawi pansan a damdawi (cosmetics) a bawlte uh khovel theih a lahkhiakna di’a hunlemtang a zat ahi. Nitak hun in tuipiaute ah tumging leh meipi chih a nopbawlna in a zang uhi.

 

                Festival (vualnop) in poimohna leh manphatna tampi nei hi. I sahkhua, tawndan leh ngeinate kepbitna ding leh khovel theih a phoukhiakna, nam khat, tawndan leh ngeina kibang neite kingaihnat leh ki-ittuahna, huaite hon ngainasaktu ahihban ah kimelmakna beisaktu in leng pang thei hi. Thamlou in, gamtuam leh mun tuamtuam a om i mi leh sate kaikhawmtu, kimuhkhawmna hunhoih hi a, kipahna, nopna leh muanna thehjak leh hawmjakna ding a hunhoih ahi. Upalamte’n a zungpi uh, tawndan leh khangthute ban ah thiltuahsate genna hun nei theijel ahihman un, hiaite toh kisai a tuailai leh khangthakte adia kisinsakna hun poimoh leng ahi

 

                Sumsinna leh nekzonna toh kisai a kongkhak lianzaw hon honsaktu hi a, sumsinmite ading in hunlemtang ahihban ah mipite ading in van tuamtuam leh nek-le-tak baihlam leh kimantak a muhtheihna hunlemtang ahi. Louma a haichite zuakkhiakna dia hunhoih hi a, khutsiam-silbawlte lahkhiakna hun lemtang ahihban ah mimal siambikna neite adia kiphousuahna hunlem ahi.

 

                Kimukhawm mengmeng lou lawmte leh tanaute kimuhkhawm leh kithuahkhawmna hunnnuam ahihban ah, inkuan a polam a kithuahkhawmna, nekkhawm-taakkhawmna hunnuam leh mimal hinkhua chimhuai apan kitohhalhna leh hon thathousaktu ahi. Thuumna leh kipahthugenna hunnuam ahihban ah, kimeltheihna, kinelna, ki-ittuahna, kingaihnatna, kipumkhatna hoihsem tungsaktu ahi

 

                Zalen, awngthawl leh kipaktak a kopolhlimna hun i zat tawm luat ziak ua, i lungsim uh neugawp leh kochikgawp adiam? Hun-awl zatna ding leh kisuklimna ding mun leh hun kinei tawm lua in, i hinkhua uh chimhuaitak a zang gige i hikha ding uh. Hon tok-halhtu ding festival tamsem – mehpok festival, sathubai festival, ban ah zupi festival leh zuha festival chihkhawng -  poimoh i hikha ding uh e!! !!!

 

muangkhuptongmuangkhuptong290720182141hrsnipiniroshanbaghmurshidabadwestbengal

Read 284 times
Login to post comments