You are here: HomeArticlesGeneralA Tanu Mouthak Ding Khakna a Pa Khat Thugen

A Tanu Mouthak Ding Khakna a Pa Khat Thugen

Written by  ZOL Nugget Published inGeneral Wednesday, 01 August 2018 11:22
A Tanu Mouthak Ding Khakna a Pa Khat Thugen

A Tanu Mouthak  Ding Khakna a Pa Khat Thugen

:-   ZOL Nugget

 

“Tuni in ka ka hamhaih in, gen ding leng ka tasam mahmah mai hi. Bangteng hileh,  ka lungsim sungnung pen a ka vei thu tamlou ka hon sekhe ding hi.  Mouneitute innkuan lampang a ding bik in abul ka hon pan ding hi.

 

I theihchiat uh leh, hiai a I paikhawm nasan uh ahihleh, ka tanu mouthak hi ding a ka baangkua  nosia a, nou  innsung a hong lut ding ahih ziak ahi hi. Amah a ding a, akoih poimoh masakpen ding ahihleh, nou innkuan hong hipahta ding  na hi uhi.  Ka tanu in a hinkhua azat touh zelna ding a poimohpen, nou hong hita ding na hihziak un, na kiang uah nget nop khat ka hon nei hi. Huai ahihleh, hehpihtak in, ka tanu na innsung uah kipak leh lungkim in na koih un, chih ahi hi. Hiai ka taltang ahi chih ka theih chian kilkel bang in, ka tanu na innsung uah bukim kisatak leh lungkim in na koih theih uh, chih leng ka theichian mahmah hi. Hiai ka innsung sangmah in, a innkuan thak hong hi ding – nou innsung nuam asa zaw ding ahi, chih leng ka ginglel hetkei hi.  A Pa ka hihna bang in - ka tanu in nuam asakna ding ka ngaipoimoh in, ka lunggulh pen ahi gige hi. Huaiziak in, ka gen nawnlai ding, KA TANU NA INNSUNG UAH LUNGKIM LEH NUAMSA IN NA KOIH MAHMAH UN AW……

 

Ka tanu ahihleh, kei a ding, ka innsung a ding in chikmah in lungkhamna tuntu, khotang leh Saptuam a minsiat lohna leh innkuan puakgik ahi ngei kei hi. Hi e, ka kipahna pen leh khovel  a ka hinsan, ka damsan amah ahi zomah hi. Tuni in, ka tanu in, a Pa innsung nosia in,  Pathian in mihingte hon siam dan dungzui in Pasal hon neihsan ding ahita hi. Piching samta ahipen di chu.

 

Hiai ka innsung a kipahna tuntu ahihsek mahbang in, a lutna ding, a mouthakna ding innsung ah leng kipahna leh vualzawlna tuntu vahileh ka chi hi. Ka khovel leh ka kipahna pen nou kiang a hon pekhe ding ka hita a; hehpihtak in, hiai paak vul a, vuai ningniang mailou ding in na enkol un aw.

 

Hiai ka tanu, ka mit a kumpi tanu leh suangmantam bang a thupi leh manpha, tuni in na khut uah ka hon pekhia a; hehpihtak in, kumpi tanu bang in na enkol un aw. Amah a ding a ka tha-le-zung, ka hun, ka lungsim leh ka neih-le-lam bang mah itlou a kana etkol piching ahi hi. A itna, a nunnemna, a taimakna leh a ngaihnat huainate’n a innkuanpih  thak hong hi dingte innsung enkol hen aw. Himahleh maw, ka tanu na innsung uah lungkim leh kipak in na koih un aw….

 

Na lungkimlouhna ding uh hiam, na deih danlou ua a hong khosa kha, om kha ahih zenzen leh, kidaam hetlou a na thuhilh in, akulna bang in na tai hilh unla; himahleh, simmoh bawl leh muhsitna tellou in, itna toh na thuhilh un aw. Hiai ka tanu ahihleh, tungbel bang a kitambaih bel ahi hi.

 

A beidot tongkhong chiang in, mangbang kisa a chihna ding theilou a ahamhaih chiang in, tangkhat vungvung akisaklouhna ding in ompih a, hehnem in, na ngaihsak un aw. Damlou a azawnkhal  chiang in, itna leh hehpihna toh na enkol unla; huaite mah, amah a ding in damdawi hoih pen ahi hi.

 

Na innkuan sung ua - zi hi a, mou hi a, nu hi a, unu hiam, naunu hiam ahihna  a amohpuaknate zoulou ding khop a zawntatna toh a hong khosa kha ahihleh, hinkhua lampi dik leh tang kawkmuh ding in a tung ah thununna vanzat liik kisum hetkei unla; hihmahleh, itna leh hehpihna tel thununna hi hen. A innkuan thak, a hong lutna ah, hiai ka innsung a asinlai sinkhiakte kizang theilou maithei a; sinlai bu thak pek phen a, na innsung ua sinlai thak sin  ahihdan na manghilh kei un. Huaiziak mah a, theihsiamna leh ngaihdamna kiphamoh ahi hi.

 

Ka hinkhua a poimohpen a ka koih, ka tanu nou kiang a omta ahih chiang in: hiai hon ngen in, ka gen nawn lailai ding – kipak leh nuamsa in na koih un aw.

 

Ka makpa deih tak leh duattak, tuni in ka thugen na theisiam naikei ahi maithei hi. Himahleh, Pathian in tunung chiang in gou manpha, gil a gah goutan -tate hon piak hun a hong om ding a, tanu bang leng  na hon nei ngei ding in ka gingta  hi. Tuni in ka thugen ahihna diktak  leh, a laimu tak theisiam in, man kholkei mahle chin, huai hun chiang in na theisiam ding hi. Huaiziak in, kisuanglahlou hial in, ka tanu lungkim leh kipak in na koih in,  chi in ka hon ngen ngam hi……..”

 

Read 233 times Last modified on Wednesday, 01 August 2018 12:21
Login to post comments