You are here: HomeArticlesGeneralKhristmas thilpiak manphapen

Khristmas thilpiak manphapen

Written by  VzSiam Published inGeneral Thursday, 20 December 2018 00:02
Khristmas thilpiak manphapen

-VzSiam

 

Nikum khawng hi leh hiai bang thu ka gelh dek kei ding. Keite khawng’ thugen-lagen ngaikhe ding kuamah na om kei ding uh. Himahleh tutung khristmas in ka hinkhua a hon lumlehsak ziak lel a hiai thute gen a gelh ngam hilel ing.

 

Ka hinkhua a kum in tamlaw kei mahleh a sau lampang a sau mahmah. Gen kithalawphuai leng ahi kei. Himahleh huai khristmas zan a ka hinkhua lumleh a om tangkoupih lou thei lou ka hihman in ka hon gen ding. Vualzawlna, lohchinna leh vualzohna hinkhua ahi kei a, lohsapna, vakvaihna leh kihhuai hinkhua ahizaw.

 

A kipatdan zaw hinkhua dangte bang in kipansam veh e. Nu leh pa leh pi leh pu. Itna leh lainatna. Kipahna leh khamuanna. Himahleh huaite kei’ hinkhua a poimoh het lou mah bang in kum sawm ka pelh zek lai in ka nu, ka pa, ka pi leh ka pute khatkhat a lakmang in a om uhi.   A huchih chiang in tanaute kiang a koih in ka om a, himahleh nu-le-pa a pan kingah itna leh lainatna zaw koimah dang ah muh ding ahi kei. Sep utlouh teng semtu, hih utlouh teng hihtu in ka hong pangta a, a limlou teng, a khing teng ka tang a, ka hinkhua tuh hichi a hong hi mai hi. Innmun a ngaihnatlouh na nana tuh hon ngaina kholak a lawmte’ kiang ka hong utzawta hi. Itna leh lainatna kiching ngah lou na nana tuh awlawl in kei leh kei leng ka hong ki-it kei hiaihiai a, a tawp in ka pumpi tuh hoih lou chi teng a ding in ka pekheta hi.

 

A tuung in denrite khawng in ka hon pan ua, huai zoh nganza, damdawi tang chihte in awlawl in ka hong kaltou ua, sawt lou chik sung in a kikap thoh ka hong tung uhi. A tuung in zaw a nuam nainai simna a, a hong sawtsawt chiang in tuh ning kitelna loungal lohtaak bangmah ka mu kei. Himahleh deihsak a hon taihilh ding leng om lou, kampha a hon houpih ding leng om lou, omna lamlam a mite’ mullit kei bangbangte a ding in kibawlhoih ding leng thil kihtakhuaipi ahi kei. Huaiziak in huai ningkitelna hawlmangna di’n a uang semsem ah ka bual a, lungnopna ngah tuan lou in ning kitelna thuuk semsem ka ngahzaw hi. Ka neulai hunte ka ngaihsun a, ka nu leh pa’n hon dampih sawt deuh hile uh hichi tel lou ding hi ing a chia ka khasiat hun bang a tam hi. 

 

Ka nu leh pa toh ka khosaklai in khosung a naupang hoih pawl ka na hi a, naupangte’ ni khawng in kitaitehna tuamtuam ah peel lou in ka tel zel a, kipahman saanlouhlai ka nei kei. Ka pa’n nitak chia laisiangthou a tangthu hon hilh zelte’n laisiangthou sim utna hon pia a, huaiziak in ka neuchik a pan in kei khom in laisiangthou ka na simthou sam hi. Naupang chialpi chih bang om pahpah ahihman in pianthakna thu leng a kithei neelnual thousam hi.

 

Ka thilchiin ah ka luut thuk seemseem a, bazar lai a vaak in teng sawm-sawmnih muh theihna ding in ninneng peuh tom in ka hun ka hon zangta mai hi. Huchih louh kaal in guuk theih ding zong in asun-azan in ka vialvak hi. Zumzou ding in ka khosa nawn kei. Tua bang a ka thilchiin hoih loute’ ziak a innsung a lah ta lou, vengsung a lah ta lou in ka vakvai a, ka neulai khawng ngaihsutsut chiang in lungsim tawng ah Pathian bang ka hon ngai mahmah hi.

 

Khosung leh saptuam sung a mihoih mahmahte’ a ding in hotdamna kulh (camp) khawng a kibawl zel a, ei lah huaite khawng a kitelphaban lou, kua’n le hong zawn lou, a ut-ut tel theih hitawk lele ei khawng zot deuh lou a tel ngam dite kihi lou. Zanpuan neihlouh gentaklouh isilh-iteen mahmah le milak a ompih taak hi lou. I paina lamlam a mi kikhiin diamdiam uh. Mite’n bel a kiphasak, a pil thei lou, a kibawlhoih ut lou a hon chi ding ua, lungsim khat ah zaw mite bang a mihoih hihsam uthuai mah ve e. Pathian le kilunggulh thousam mah veh e. Himahleh hiai tan a thuuk a i tum nung a zaw panpih zeklouh a hoihzoh ding ahi nawn kei.

 

Tua bang munte a tazou lou hinapi in ka hihtheih khomkhom in Pathian ka zongsam hi. Laisiangthou sim theihna ding hunlem ka neih chiang in laisiangthou ka sim a, ka gintak nana Romete, Galatiate, Hebrewte, ka sim a, bangchi hiam a Pathian houpihna za phut ding bang in ka kingaihsun hi. Himahleh ka simnate le ka neulai a ka simsa ngen ahi a, ka lung leng a hon khoih tuan kei ua, hul in a hul hi. Khenchiang in Pathian’ thu le hi tatak ke’n teh peuh ka chi hi. Thugentute’ thugen bang ka lunggulh tha a suak a, chialpi hiam, khawmpi hiam a om chiang in ka delh a, milak a lah va kihel ngam lou in a kizakphakna a nawl deuh khawng ah miallak a kibu kawm in ka va ngai zel hi. Himahleh huai mun a leng mi’n a hong tuahkhak chiang un, ‘Bang guuk di zong e,’ chih bawl in a hon en ua, kisuanlahna ngen in a kidim a, lungmuangtak in leng a ngaih theih kei. Tua bang in thugentute a guuk in delhdelh zel mah leng koi mahmah a kei a ding in houpihna a om tuan kei. A laisiangthou ah lah houpihna ka mu kei a, a thugente tungtawn in leng lah ka mu kei a, kei a dia houpihna hun kikheelta hi’n teh peuh ka chi a, ka patau mahmah hi.

 

Khristmas leh kumthak chihte lah hong tung lou thei lou ahi ua, a hong tun chiang un mite’n nuamtak in a zang siausiau ua, en leng i nu-le-pa toh nuamtak a i na zat hun omsamte ngaihsutna in lung a leng a, kua theihpihlouh khitui a kinul zelsam hi. Mite’ khamtheih goih, lungsim tengteng le mawkkhin, limsak taaklouh a a hon koihlai un lungsim guuktak zaw pil kiukiau samlai veh e. I mit a pan khitui leng pawttheilai buang veh e.

 

Neulai in khristmas zingsang in sagoute kiang ah va kihoh a, a vok dawt haam teetteet khawng uh va en in den chia a zunbuh a hon piak ding uh kilam-en in a va kingak neinai zel hi. A hon pe ngei ua, lawmte toh sunkhua in huai a kipek zel hi. Bang a chia hinkhua tua bang a nuamtak a zangden ding a vaang in hon siam mai lou a de aw chi in vangtah ka kisa a, ka khase thei mahmah. Huchi bang a lungleng a ka om chiang in sihmai bang ka ut a, tamveipi overdose a si mai ding a ka kikap hun leng a om. Himahleh sihna in leng a hon deih kei.

 

Nikum khristmas tuh ka lung a leng diak. Mi a innkuante toh kiton helhel a kikhawm dia kuan siausiau ka muh chiang in kei leng a na hichi lou hi leng zi bang neisamta ding ing a, ta bang leng neita ding hi ing a chi in ka kisulungleng thei mahmah hi. Ka kha a thawmhau mahmah a, mite’ omkhawmna mun ka ngai a, hulumna ka lunggulh mahmah hi. Himahleh sun hun khawng a tuh biakinn kelkong tan a leng om ngam ka hi kei. Mite’ hon muhlouhna ding munte ah lungleng pipi in ka va kibu zel hi. Khristmas nitak a bel thawmhau law mahmah ka hihman in biakinn kelkong beek ah mite’ husa ka va ngaikhe di chi in nidang a ka sundes skul kaizelna Hebron biakinn kelkong bul ah ka va tu hi. Biakinn sung ah lasa in a lum dupdup ua, a mas la sakte uh ka na zui nimnim a, huai a kipaktak a omte’ lak a khat hisam leng ut na’ng e ka chi a, lah ka tantawk tuh kelkong bul ahi lel hi. Kuamah mohsa bel ka hi kei. Kei leh kei kibawl a hiai bang dinmun tang ka hilel.

 

Khua a vot mahmah teuteu a, puannaklum gina ka nei kei. A nei taak leng ka hi kei. Van hoih deuh i neih chiang a lah khatvei hihna ding lel hon daih di ahihleh leng kizuak utzaw zel a. Dawr kaite’n a paih uh thil tuunna bawm ka kaikhawm a, huaite silh in ka tu hi. Huchia ka tutlai in ka ihmut bang a hong suak dek mawkmawk a, khovot nuai ah ka lusu piansim hi.

 

Huchih laitak in ka lu a hong kikhoih guih a, ka kiguih zot zezen hi. Dongkholh hon sa om uh hitan teh chia kisuanglah tak a ka daktouh leh pitek khat ana hi a, ‘Vot sa lou maw bawi? Hiai lai a bang hih na? Na nute’n zaw hon lunghimoh law di uh hive’n maw. Hi, hiai beek silh inla, na inn uah pai in,’ chi in a puanza silhlai a hon pe mawk hi. Ka nu’ aw za mah ka bang a, ka dawnna ding leng ka thei kei a, lam-et hetlouh hiai bang itna ka tung a hong bua ka muh in ka hamhaih a, ka khasia a, a hon puanza piak sang dek lah bang, sang lou dek lah bang a ka om leiluai lai in ka liang ah a hon baatsak a, tua puanza la in tomchik ka veel a, hon pia piteek nu ka et touh leh ana om nawn kei a, koilam a pai hi ding ahia chia ka dakbawl leh leng ka mu kei hi. Ka nu leh pa’ hon paisan nung hichitel a ka kipah leh lungnop ka theikah kei. Himahleh kipahthu beek le ka gen man kei.

 

Ka lungsim ah ka nu a hong lang a, hichia ka om mai hon muleh a lungsim nana mah ngut in chia maw chih ka ngaihsut leh ka lungsim hon sun mahmah a, ka nu’ hon itna ka lungsim ah a hong lang a, kham vuallouh khitui a hong luang a, ka men pempom hial hi. Ka nu tua piteeknu a hong kilak a, kei hong sam bang in ka thei a, ‘Nu aw, k’on na sulungkham na ngei ngut e maw! Hong kiik leng na kiang ah kei a di’n mun a omlai diam?’ chi in kidek zou lou in ka kapkhe tang hial hi. Pathian kiang ah ngaihdam ka ngen a, nidang a ka laisiangthou simte ka lungsim ah a hong luut zungzung ua, ‘Hina ngei e maw Toupa, nang zaw n’onna ngaihdamna sawtta hi ve’n maw, kei ka hong zekaikha a ahi. Hiai tan ka zekai nung a leng hun na hon bawlsak lailai kipak hina tel ing e,’ chi in huaizan in Pathian a ding biakinn kelkong bul ah ka hinkhua ka lankhia hi.

 

Tua piteknu’ kua hihiam ka thei kei. Kan leng ka kankhe bun kei. Himahleh hon puanpuak hoihtak in ka kem hi. Silh leng ka silh ngam kei. Thugente’ thugen a leng ka zaklouh, laisiangthou ka simsim a leng ka muhlouh Pathian thu tuh tua minu’ kammal tawmchik ah ka mu a, a hon puanpiak tuh kei a ding in Pathian thu’ baanna puansiangthou hi in ka sep a, khristmas thilpiak tengteng lak a thilpiak manphapen in ka sep hi.

 

Tua ahihman in tu khristmas in mite’n na Pathianthu gen ah Pathian mulou thei ua, na laisiangthou sim ah Pathian thu zalou thei ua, himahleh na itna leh lainatna ah bel na gintaklouhpen in leng Pathian’ aw zathei hi. Nang tungtawn a mite’n Pathian a muhtheihna ding un biakinn sese kuul lou a, kelkong lel ah leng muthei uhi. Tua ahihman in tu khristmas in itna leh lainatna a tamtheipen mite’ kiang ah thilpiak in pia in!

Read 152 times
Login to post comments