You are here: HomeArticlesGeneralKristmas Mutpuak

Kristmas Mutpuak

Written by  Songsawmlian Published inGeneral Thursday, 20 December 2018 00:10
Kristmas Mutpuak

Tuktui kangta a, phavang huihvot nung hiauhiau panta hi. Nitaklam chianga sai-ip dimzen  a buh-hum pua Meiteite bawng gari in a innsak ua lampi tawnkha zel hi. Bawng gari pei kihet ging ngiatngait innsung apan a zaktoh kiton in a endi’n taikhe sek hi. A khenchiangin a theihpha tawp in delh a, a phakchiangin a nungah vakiluai gawi-gawi hi. Naupang thathou leh nuihmai tak ahihna toh  bawngpute’n le ana pakta mahmah ua, a changin a buhtung ah tuangtou sak uhi. A huchih chiangin a bawng pute' chiang tawi ngen a, a bawng hawldan uh enton in – arrr-arrr; tii-tii-arrr chikawm in sau khoptak vatuang sek hi. 

A kumtawp exam na’ng kal bangzah hiamlel in sam a, laisim nidang sangin kisa'n zawtham hi. Nitak khat a laisimna dawhkan tung a tha-ittak a lai a simlai in, a ut mahmah khat ngaihtuah kha a, utna leh kilawpna toh ngaihtuah khaden ahihmanin, a kam a a laisim khiatte a ngaihtuahna in ana theihpih khanawn lou hi. A tawpin a common room ua a Pa laibu sim a tawldam kiang a a ngaihtuahna gendi'n dingkhia hi.

 

‘Bangchik chia buh kila zou di a?’ chi in a Pa dong a, ‘loubawl te’n hon hilh nailou uh hivo’ a Pa’n dawnna pia hi.

‘Tu- November khatawp a khophat hoihni khat hi zou maithei’ a Pa’n chih behlap hi.

Aman, ‘ka final exam ma in kila zou leh kachi e, buhlak chia shaktiman nungkuang a buh kisedim tung a tu a, a tai kawm a phalbi huihvot in hon muut hiauhiau mahmah nuam sa inga, buhlak chia ka omlouh di zaw ngaitheilou kahi, Pa’ chi in a Pa kiang ah gen tuantuan hi. A genkhiat louh khat  ‘buhlak ni chia skul kailouh di’ in phursak hizaw sim, hilim hi.

 

A Pa’n a tutna sautung ua lumkawm a William Shakespeare laibu HAMLET a sim sunzom hi. Amanle a laisim sunzom di’n a room ah lut nawn a, ihmu tawldam dia a lup matan lungluttak in a laisim sunzom hi. Amah naupang kum 9 a upa ahi a, amin  Tangsam ahi.

 

A lametdan takin thil hongpai kha a, a kumtawp exam kipatma in a buh uh laktheih di’n hong lemthei hi. Huaini skul kailou in a lou uah buhla in kuan hi. Zingkal phalvak hoihma in A Nu-leh-pa, a michialte uhtoh loulam zuan uhi. Lou a tun un tangval bangzah hiamte’n buh ana sat puak dupdup uhi. A buhsat di uh bang va puakpih a, nuamsa lua ahihman in a gimlam phawkpha louhial hi. A duhthusam takin buhla a pailam un shaktiman tung a tu in, Pathian silbawl sing-leh-lou, mual-leh-tangte kilawmdan a lungsim ngaihtuahna a pan en in, lungkim mahmah hi. A taina lampi ua buhla khenkhat toh a kituah chiangun kipahpih etsakna in nuihmai melpu in a khut va’n laplap zel hi. Ahihziakin a  gari taina nung ua leivui khu mahmah diik a innlam zuan a lampaite' amuhchiangin kisuanlahna in dim hi.

 

Buh kila khinta, na kumtawp examna a na pass zohna di’n na lai hoihtakin non simnawn di aw’ chi in a Nu’n kamdam in Tangsam kiangah gen hi.

 

‘Awle  aw, Nu. Nu, ka pass leh bang non leisak dia?’ a Nu kiang ah phurmel tak in dawnna pekawm in dong zom ngal hi.

A Nu’n, ‘na Pa’n loh a lak manleh na Kristmas puanak di bang, sum a kidaihleh na khedap di bang I lei d aw’ chi’n khamuan hi.

 

Aman,’Nu, ka Kristmas balloon di le hon leisak ve’ chi a.

‘Eimahve, ka genkha kei a, na KRISTMAS MUTPUAK di le a liante I lei di’ a Nu’n chi hi.

Lamdang sakmel takin ‘Mutpuak? Mutpuak bang awi Nu.’ 

A Nu’n (nui), ‘Balloon nachih pen eivoi’ chi in hilhchian hi.

 

‘Va kihahsiang inla, a zoh nitak ann I ne di uh aw’chi in a Nu’n kihahsiang di’n sawl hi. A nitak a a Nu toh a kihounate a ngaihtuahkik chiangin kipahna, phurna leh hahkat nopna in dim a, a laisim aw ging bang ngaihdeuh deuh hi.

 

A kumtawp examna dia hahtak a kisakkhol ahihmanin a aw bang heu thiauthiau zawzen a, skul ah a lawmte’n ‘lai hah sim mahmah neive maw’ a chihchiangun, ‘mawkmawk, kahitang sim a hi’ a zumluat man in chikha sek hi.

 

A kumtawp exam ma ua a skul kaitawp nipen un a lawmta un kikhelah mahmah ua, ‘All the best!’ kichituah in, a exam khitchiang ua a thilhih sawm te uh bang, a duhthusam te uh bang  ki pautuh zen in genkhawm ek uhi.

 

A lawm khatna pen in, damleh exam khitchia ‘a Nute toh Shillong a a Pute kiang a vazin dek’ahihdan uh gen a.

Lawm Nihna pen in,‘singtanglam a pute kia va zin a, Kristmas va zat sawm’ ahihdan gen a.

Lawm thumna pen in, ‘tumging kilawm tring-trang zil sawm’ahihdan gen hi.

Aman bel, ‘marble kotis te kimawl ding, Lamka College field a lehkha-leeng a chaih  sawm dan bang,  football le pekzel ut leh sawm’ ahihdan gen hi.

 

A skul chowkidar pa un  tawpna dak akhet in, nidang-hundang bangloutak in kikou thawm husa omlou hi. A class pumpi un kikhelah in ki entuah liakliak uhi. Tangsam in pautam lou hial in a classroom sung uh enkimvel thakthak a, a lawmte khat in, paihun a chihtakin nungkaihvei tak in innlam zuan hi.

Kumtawp exam apat un khua vot mahmah tahi.  A exam di chianga beldeuh a skul tun ut ahihmanin  kuanpah pah hi. Exam room a lut dekchiangin in a lawmte ‘All the best’ chi in deihsakthu khakzel hi. A exam zohni nitaklam un a lawmte toh sum kithohkhawm in bazar a Vaite hotel ah puri sabji a limthei pen, gilvah theipen di'n va nekhawm ua, zalen kisakna toh nuam leh kipaktakin hun zangkhawm uhi.

 

Exam dam leh duhthusam tak a zoukhia ahihman in a result suahni di bang ngaklah mahmah hi. A result suah di nitakin ihmu kip theilou hial hi. A zingkal a BMX cycle toh result en dia  akuankhiat dekin, a Nu’n - a pailam chia a nektheih leina di’n sum teng nga pia hi.

 

Skul a tun in mi ana tamsim a, a di’n sanglua ahihlouhman in notice board a result kitak muthei pahlou hi. Awl in mi kal ah kihenlut a, a malam va tungthei khong hi. A lawmte min ban et masa a, a zohin ama a en hi. Amah le pass, a lawmte leng pass vek ahihman un kipak mahmah hi. A kiklam in Teddim road a vaite singpi hotel khat ah ‘halwa’ a Nu’ sumpiak tengin lei hi.

 

Inn a tun in, a Nu kiang ah, ‘Nu kei pass, ka lawmte le pass vek uh’chi’n kinoh sim thethu in kipaktak in gen lop-lop a, a halwa lei nidangteng sang a limzaw in ne hi. A nitak meivakni hikha chet zawmah ahihmanin kipak kholdiak a, huai nitak nana tuh lungmuang  takin Tv sawtpi mahmah en hi.

 

Zingkal a thohphet in a lawmte, a veng naupangpihte, a kivualpihte toh lamnawl a marble kotis te kimawl di’n diangkhe pah hi. Suunchiang in lai-leeng bawl a, Lamka College field ah vachaih zel hi. A changchangin a lawmte toh aipi-gawthau a kidoutuah in kidelh tuah vengvung uhi. Suun chianga a lawmte toh hunnuam a zatkhawm chiangun a Krismas Mutpuak di lamlam ngaihtuahkhak in neikei mahleh, kipahna bukim toh a hunte zangkha veve hi. Leivui khu lak a diangdiang, mawlmawl ahihmanin, a muk, a bil dang, a gawl, a khut leh khe khii hi.

 

A changin a U te, a lawmte uhtoh Tuilou tangkuang, buh kilakkhitna nung a Leimanna bang, tangkuang bang tou dingleh, khaupe man di bang a kuan chiangun va zuizel hi. Inn a tunkik chiang un a thiltohte uh, a matte' uh a lim theipen di'n bawlkhawm nainai ua, buh-sih toh nekhawm zaizai zel uhi. A lawmte toh sazu kua tou di peuh in kuansek a, gawphel tawi kawm in vakang kap kawmzel uhi. A lawmte mahtoh tuitha lui ah a vangkim in va kiliau zel uhi. A changin a lawmte toh sai-liim leh gawphel tawi in a vengsung uah thankik kap zel ua, a matte' uh vok neite' kiang a zuakzel in, a zuakman un Double-roti bread leizel ua, dialdial a kihawmin limtak in nekhawm zel uhi.

 

Khatvei vei nitaklam inn a a om sunsun chiangin, dak 3:30pm a gintoh kitonin a varendah ua khodak kawmin a Pu toh AIR Imphal a kipan kikhah khia Local programme te a Philips radio uh tungtawnin ngaikhe khawm zel uhi. A ngaihkhiat kawm un, Tangsam dak velvel a, Mission Compound mualpang a nitumkuan  tummang mai dia kisa etlawmtak enliam vungvung zel hi. Khua a mui toh kiton in a innsak ua lamkhuang kung a kipan the' hong hamkhe ziai-ziai kizathei tahi.

 

Nitaklam khat a lawmte toh gilkial phawklou zen a marble kotis te kimawlkhin inn a pai in, a Nu’n, ‘na Kristmas puanak leh khedap di kon lei hong kitest awle’ chi in innsung ah samlut ngal hi. Kihahsiang di lam phawk kha nawnlou in a Nu’n a Kristmas van dia a leite kitest zokzok a, hoih leh kilawm kisa mahmah a, limlang  mai a dingin, ki en tuantuan hi. Kihahsianglou a  a van dite kitest ahihmanin, a - chiniin belh khazek hi.

 

A kipahna supuang sawnsawn di’n, a Nu’n a Kristmas mutpuak di lei manghilhlou ahihmanin, Tangsam kipah chihtakin kipak maimah hi. A Kristmas mutpuak  mutpah utmahleh Kristmas  zingkal a a mutdi’n a Nu kemhoih sak lai mai hi.

 

Kristmas ni a hong nai hiaihiai a, naichik leh a-gal a meivak vak kilawm rong chituamtuam a te’ selsel te bang, laipuan leh plastic a kibawl aksi vak phihphiah vanlam a sangtak a kitungtou te meivak nitak chiangin muhtheih in omhi. Nitak leh zingkal chiangin Kristmas laa kikhah gingte’n vengsung-khosung hulum sak mahmah hi. ‘Aw zansiangthou’ ‘Zankhua dai' ‘Kou mipil thumte’ laa aw ging kilawmtak a kikhah khakchiangin, Tangsam in ama zakkhop in zui hauhau sek hi.  Michih in kristmas kipahhuai dam a muh kilamen in, ahihtheih dan chiat un taksa leh lungsim ah kisakkholna thupitak nei tek uhi.

 

Kristmas tunkim ni zanin a Nu’n Biakinn kaipih hi. Laa sak di dan theisiam law nailou ahihman in laa a kisak chiangin a kam kasak lou hial a, Biakinn tunglam khong en in ana dak kimvel sek hi. Biakinn tunglam a etlouh chiangin Biakinn sung mawltak leh kilawmtak a kichei en kimvel zel hi. Kikhop tawpin a Nu kiang a mutpuak deih lawta ahihdan thu hilh a, inn a tun un a Nu’n Tangsam mutpuak dia thum a leisak te lak a khat, mut puaksak in pe mai hi. Tangsam in kipahpih mahmah a, a khut in vanlam ah bengtou a, a khe bangin pek zel hi.  Meiphu aam-san phimphem tung a tukkhak dek chiangin, ‘eih! A tamkha di’ chi in Tangsam lam ah ana betkhiat sak zel uhi, meiphu awi te’n.

 

Nitak a lup in a lupna tung apan a-gal a Kristmas laa kikhah gingte’n ihmu sak theipah lou a, Kristmas nizing a a om didan khawngpeuh ngaihtuah in nei hi.  Zingkal chia a Kristmas mutpuak a lawmte a lah di kal bang ngaklah mahmah hi.

 

A zingkal, Kristmas zingkal in a Nu’ phawn ngaiselou in thoukhe pah hi. A Nu’n  Biakinn a hohpih in, Kristmas damtak a innkuan kim ua musak Toupa Thutak Pathian kiang ah kipahthu genna vaneih pih hi. Inn a tunkik un a Nu’ annhuanna kiang a meiphu awi kawm in Paite pau a kisuah Newspaper a sim theih dandan in sim a, Kristmas thu leh laa kigelhte bang a simkhak chiangin , a Kristmas mutpuak  toh Biakinn a kaikal ngaklah diak a, a Nu kiang ah,’Ash! Kikhop hunta maileh kachi e, Nu’ peuhchi in om muang theilou hial hi.

 

Zingkal  ann a nekma un nidang hundang a neihsek mahbang un Innkuan kikhopna nei uhi. A  Pa’n innkuan kikhopna makaih a, laate’ bang sa in,kipah thugenna thumna in zou uhi. Kristmas Ni ahihtoh Biakinn kikhawm di mitam ding, kuan'pah keileh Biakinn sung a tutna tanglou khathei chihziakin ann nepah ua, kuanpah uhi.

 

Kikhawm dia a kisak khit a a Nu’n, a mutpuak nih omlai te a piaktakin, Tangsam kipak in tawm vongvong zezen hi. ‘Nu, ka kipak’ chi hi.

A Pu innkong a nisalum awi a tu a mutpuak mutdi’n vasawl ngal hi. A Pu in a Kristmas mutpuak a lianpha theipen di'n ana mutpuak sak a, a gong khawlkhau a khihsak in, a khekol kawng ah gak taang sak hi.

 

A innveng a a lawmte lak di’n taikhe ngal a, a lawmte kiang ah,’ken mutpuak nei’ chi in va selh bawl hi. A lawmte’ sungkuante’n, ‘Tangsam,na Kristmas mutpuak a lian ngei e. Kua hon leisak awi? Kei honpe ve’ chi’n ana thoh uhi.

 

Kikhawm dia a kuan in a kawng ah gak a, huihzang nungte’n mutleng sak  va-vauh hi. Biakinn lampi a a kituahpih khak te’n, ‘Tangsam, na mutpuak toh na kilawm lua’ a chihchiangun kipahna in dim a, tawm le-lek zezen hi. Biakinn sungah le  gakin kisaktheihpih mahmah lai hi. Biakinn  sung a lut takin, mutpuak leh Kristmas Singteh nalhtak a kichei muguih a, kamka heu-hou zen in en hi. Nalhsa lua ahihmanin.  A tutmun apan ama Kristmas mutpuak  toh Biakinn sung cheina dia mutpuak kizangte koi ahoih zaw de aw' chi in a ngaituahna ana buaisak hi.

 

Kikhawm a tawp un a Nu kiang ah, ‘Nu, Kristmas nawnchia'  sum I hauh ualeh enle Kristmas mutpuak tampi leh Kristmas Singteh innsung a koih di aw’ chi in lametna liantak toh a KRISMAS MUTPUAK  beng lauhlauh kawm in innlam zuankik hi.

 

“Tungnungpen ah Pathian thupi henla, leitung a a kipahpih mahmah mihingte lak ah lemthu leng hen,”

“Glory to God in the highest heaven, and on earth peace among those whom he favors!’

Luke 2:14

 

 

Gelhtu – Songsawmlian

©12 December 2018

Read 171 times
More in this category: « Khristmas thilpiak manphapen
Login to post comments