You are here: HomeArticlesInterviewInterview | Pu P. Thangpu Zou, Intending Candidate, 23 Muallum ADC

Interview | Pu P. Thangpu Zou, Intending Candidate, 23 Muallum ADC

Written by  ZOL Team Published inInterview Friday, 24 April 2015 13:01

Pu P. Thangpu Zou, Intending Candidate, 23 Muallum ADC toh houlimna

 

Pu P. Thangpu Zou ahihleh Pu (L) Lunkap, Ex- President United Zomi Organization (UZO) tapa upapen ahi. Amah ahihleh neih dandan, septheih dandan a Zomite, adiak a Zou tribe, adia sih poisalou a pang khat ahih ban ah Zomite lak a mi tha-hat a minthang khat ahi hi. 1968 lai Mizo National Front (MNF) gal hatlai a miteng lau-leh-liing a a om lai un Pu (L) Lunkap  UZO president in ana pang hi. Huailai apan in Pu Thang  apa toh gam-leh-nam adi’n na ana semtou panta hi. Mi kingai niam leh publicity deihlou khat ahih ban ah mi adia neih-leh-lam itlou a, dong hutu apang tawntung mikiphal khat ahi hi. A pianpih unau-sanggam leh a sungkuanpihte toh 15th April, 2015 a thupukna alak tungtawn in 23 Muallum ADC a member khat hidi’n a hong kisa hi.

 

Pu P.Thangpu Zou : TP | ZogamOnline : ZOL

 

Zol: Pu Thang, hichi bang na hun bichilh kawmkal a kou toh kihou thei dia hun non piak ziak in ka kipak petmah uhi,

TP:Khovel pumpi huop a information hawmzah thei noute toh kihou thei ding a ka om pen kei ading in hamphatna ahi hi.

 

Zol:  Pu Thang, ahihleh bang ziak a Muallum a ADC member dia din sawm na hia ?

TP:Hing bulsut deu vang in, ana ngai siem unla. 1982 apat ka thei khomkhom in Pu (L)Thangkhanlal, Pu (L) Gougin, Pu Gouzadou chite kana zui a, Pu Zatawn hun inzong Chief Agent tanpha in kana pang hi. Tualeh Pu Thangso Baite zong term 3 vingveng kana zui a, tualeh Pu Ginsuanhau zong kana zui hi. Ama utoh pangkhawm in gam-le-nam a ding in ahithei tan in kana pang a, ADC election masapen in zong kana kisa hi. Hinanleh lamkaite thumanna in kana khawlkia hi. Tutung pen mipite deina leh keima utna toh kagam, ka mi-le-sate toh pangkhawm a nasem ding a hing kipekhie kahita hi.

 

Zol: “Sawtpi ana suffer” achihte uh nahi di maw leh ? Ahileh bang bang ahia na tup thupi deuhte, gen theih non nei diam ?

TP:Kei kahileh lekha kana siemsih hi. Tuami ka puohnatna a beithei sih a, khovel changkang dungzui in lekha simna lam ma ka pibawl ut masapen hi. Zawn-le-ngau zieh a igam a laisiem, Engineer, Medical, Management leh stream tuomtuom a ching, hinanleh nu-le-pate’n a chawm jouloute zong kei mama in ka panpi ut hi. Government scheme tuomtuom hawmtu maimai in ka pang ut sih a, ka pienna gam a ka mipite kei bawltheina tan in dopsang ka ut hi.

 

Etsahna in, ka pienna khuo Muollum leh akiim a singtang khuo khenkhat bang a tuineh hamsa gige. Tambang a mipi gentheina pen keima gentheina bang in ka ngai a, government toh pangkhawm a bawldih dingdan lampi sui ka ut hi.

 

Zol: Na tup-leh-ngiimte hoih kasa thei mahmah ua, ahoih chih tan a beitheilou ahihna ah teelching a om bang hita lechin, bangchi’n sepsuah na sawm a ?

TP:Kei pilna leh siemna toh pang ding kahisih a, ka mipite, pawlpi tuomtuom a lamkaite toh pangkhawm a sem ding chi kei deidan ahi. Keipen a lampi siel ding maimai kahi a, a sem tahtah ding pen hausa-upa leh lamkaite ahi bou uhi. Mipite deisahna toh nasem ding a kipekhie kahi a, mipite deina bang in na kasem toujel ding hi.

 

Zol: Ahihleh Muallum ah candidate tamsim abang a, bangziak tak a mipi’n nang deih biik dia gingta nahia ?

TP:Muallum area ka pienna ahi a, kei bang a it a omsih ding hi. Tualeh social worker khat kahina toh mipite hamsat-genthei nate kei sang a theisiemzaw om ding in ka gingta sih a, experience zong keisang a neizaw a omlou ding hi (intending candidate lah ah). Kei pilna leh siemna suong a hing kipan kahisih, thuneina leh letna dei mi zong kahisih a, mipite deina liulieu toh nasep tahtah sawm a hing kipan doh kahi bou hi.

 

Zol: Ahihleh Pu Thang, na hong lohchin kon deihsak petmah ua, hiai tan hun non piak ziak in ka kipak petmah uh. Hong lohching inla, na tup leh ngiimte hong tangtun teitei sawm in aw !

TP:Kei ka kipahzaw sih diai ! I gam a ding in semkhawm toujel vai. ZogamOnline Damsawt hen !

 


Read 2350 times Last modified on Thursday, 18 January 2018 21:46
Login to post comments