You are here: HomeArticlesInterviewInterview | K. Suanthang, PTC GHQ President

Interview | K. Suanthang, PTC GHQ President

Written by  Published inInterview Monday, 28 May 2018 18:32

ZOL: Pu Thang, PTC President nong chin kon kipahpih uhi.

KST: Kei leng ka kipak e.

 

ZOL: President na na lunggulh leh tupsa mah hia ahihkeileh mi hon deihtelna nial utlou? Na na tupsa ahihleh PTC President hileng hiai/huai ka sem ding chia nana ngaihtuah omtham ding hiven, huaite na hon gen zek thei diam?

KST: Ama in bel PTC khawng kei kibualphakna ding in ka na koih kei hi. Himahleh Three Bills i buaipih lai in sihna tuakte lak ah Paite kampau kitampen napi JAC-AATB apan a PTC a kiwithdraw chiang in kuapeuh lungphawng in, kipona in, lamdang kisa in khasiathuai leng kisa hi. Paite namte a ding a PA dinmun len a kingai PTC in atate gum ngamlou a taisan ahihna ah hihkhial kisa in, ami asate gum ngam ding khop PTC a puahphat ngai ahihdan muh in om hi.

 

PTC election a candidate khat ka hih in leng President hih ding tupna leh ngimna ka nei kei a, member khat hih ding ka na tum zaw hi. Himahleh lawm-leh-vualte deihsakna ziak a hiai tan kitung ahihchiang in mimal agenda sang in consensus decision a i nam maban ding gelkhawm hoih ka sa hi. Tu in bel kong bangkim ah PAITE priority in kikoih a, Paite nam a dia poimoh leh kul hi a theihte theihtawp suah in kisem ding hi.

 

ZOL: MLA kitel bang a manifesto toh campaign hikhollou na hihna uah President na hong chin in na ngaihtuahna ah bang hong om a?

KST: President dia propose ka hih in kei ah kisitna leh chinlou kisakna lianpi om a, himahleh nial vual hi nawnlou ahihman in leh mimal deihtelna sang a teamwork poimoh zaw hi a thei in, a chinlou pen himahleng hiai dinmun ka pomta hi.

 

ZOL: President dia hon propose te’n nang hon deih, hon propose na san uh bang khong ahi dia?

KST: Maban tup-le-ngim leng genkhawm luat om thei nai kei, a ziak bel immediate a hih ding etskn: Block leh unit tamzaw thamte term beisa ngen, khenkhatte kum 10 val election neilou ahihna uah leh, assembly nanung a thupuknate sepsuah pah ngaite a concentrate phot kisawm hi.

 

ZOL: Houlim theih ding a tam dia, dotkhak khak hong kidong suk mai ding ahi. Amasa leh a nanung le om tuanlou in. Ahihleh, tulai alian-aneu akuapeuh in utteng a gentheihna uh social media lam ah hun na pezel hia?

KST: WhatsApp, Facebook, Twitter leh Instagram khawng ka en zel sam.

 

ZOL: I social media zatdan - mimal/pawl kikaptuah ahihkeileh kidemna, kigensiatna chih khong le om tham ding ahihman in hichidante in society leh pawl kivaipuakna khong sukha leh nongkai sak thei hi in na koih hia?

KST: Social media zatna ahihleh a hoihna leh hoihlouhna leng a om tham a, himahleh ei sung ah bel a hoihna sang in a hoihlouhna – kidemna kigensiatna lam a tamzaw hiin ka mu. Hoih deihna sang a society sung tohbuai utte sulnung tamzaw hi in ka thei. Mahni guplouh lam dem teitei utna mentality i nei un ka thei. Society / organisation khat thilhihte nungthuaptu hih sang a gensiat hamham tupna tam ka sa.

 

ZOL: PTC President na hih chiang in Paite toh kisai deuh in lutsuk mai ni maw.  Khenkhat in kong bangkim ah Paite te keniam/kiakniam lam manoh, aziak: nam kideihkhop/kiliansak/ kisaktheih luat ziak hidan in a gen ua, nang bang na chi muh?

KST: Paite nam keniam hiam kiakniam lam manoh i hihna tan leng om ka sa mah hi. Mawlchik a gen in State leh Central a Civil Services a examnate ah Paite muh ding tawm mahmahta, om nawnlou phial leng kihita hi. Administrative line a i om kei leh mi thunuai a i kun gige ngai ding chihna ahi hi. Huaiziak in i nam in pan lakthak poimoh mahmah hi in ka thei. Matric zoh chiang in state pawlam ah a hi thei liai teng i kisawlkhia ua, graduate zoh chiang in coaching kai chiin hun leh sum tampi i senbeh ua, himahleh i success rate uh niam mahmah ding in ka mu.

 

I kiakniamna ziak pen kideihkhop/kiletsak/kisaktheih ziak ahi khol kei ding a, i attitude ziak ahi pen mai de aw ka chi hi. Huaiban ah kuhkalna leh tupguhna omlouh ziak leng hi in ka thei. Atangpi a gen in competitive examna ding a om chiang in a form fill-up i thanuam ua, a examna a lohching dia kiginkholhna taktak omlou in ‘experience neihna din’ chiin a exam ua, experience hauh a lohchin ding hilou in lohchin tum a kisakkholhna ziak a lohchin ding hi zaw hi.

 

ZOL: Paite te i hun tuah khong leh kimkiang kikhek dungzui a kibawllem siamte i hi in na thei hia asiamlou lam ki hizaw?

KST: Hiai hi theih haksa ka sa, ego liantak neite i hihziak un.

 

ZOL: Paite nam a ding a mahni masial deuh ding chih leh lungpi gel a kisacrifice zawk ding chih gelnate kidou hileh kilawm. Bang na chi muh a?

KST: Politics a survivena ding in mahni masial deuh a pai ngai leh kilawm ka sa. Tuabang a i kalsuanna a i lohchin leh mite adia belhtak leh zuihtak hi ding in ka kikoih.

 

ZOL: Paite mite’n Paite hihna a theichiang/theisiam uh na thei hia?

KST: Paite miten Paite i hihna theichiang zoulou deuh i hi de aw chih hun a tam. Paite pau zang leh Paite nam sum pe tengteng Paite a i pom theih a kisam. Beh leng phung a kisutsut hun a hi nawn kei. Mite nawlkhin theihna ding zonzon sang in a tamsem huailut theihna ding (inclusive) poimoh zaw ka sa.

 

ZOL: Midang (Paite hiloute) in Paite te bang hon chi muh un na thei?

KST: Ka na muhdan in nidang in miten heutu dinmun a hon mu uh hi in ka thei a, tuchiang in i sung a lungvei luat ziak in mi nuihzabuk lel kisuak houh hita hia ka chi hi. Ahi alah, a kikhel a hi kei a, tu apan a i pankhawm siam a, i kithutuah leh mite zuih leh belh ding mah i hi lai thou hi. Pankhawm i siam kei leh midang hon belh san ding ua, ei kia kihawm khai khong ding bang ka sa.

 

ZOL: PLS leh ZCLS te’n Moreh a lai lama thukimna ana neih uh, Moreh tunma a Paite nam pumpi in hun sawtpi genkhawm a decision lak hi dan a gen in om mahleh tulai in social media khong ah Moreh Resolution dei­hlouhna, Paite laimal A, AW, B, CH hi ahihdan kigengen in khangthakte lungbuai sak thei ding hi. Chihbel school ah PLS bikhiah dan MIL a sin ding uh, social media a lah atuam za zel ding uh. PTC in bang a chi muh?

KST: Hiai thu tulai a mite bildoh leh sensitive tak ahi a, ngaihdan vagen geih ding a haksa. PTC muhdan hilou in kei mimal muhdan in bel Manipur lamten Moreh Resolution zui mahle hang i unaute un huai resolution zui uh ahi chihna ding ka thei khol kei hi. A laigelhte uh i et chiang in eilam mahbang in amau style chiat kizuih uhi. Moreh Resolution omlam phawklou uh a diam chih hon ngaihtuah sak hi. American English leh British English ombang in Manipur ah A AW B CH mah zang leng a Paite sung ah kituahna om zaw din ka gingta hi.

 

ZOL: PTC leh YPA, SSPP GHQ te kizopna leh paizia na mimal muhdan leh PTC muhdan khong non gen thei diam?

KST: Kei muhna tan ah PTC leh YPA leh SSPP kal ah kilemlouhna bangmah ah a om kei a, himahleh khenkhat ngaihdan a PTC leh YPA kilemlou hi a ngaihna om pen hunbi thak ahihtoh kiton in nahluite pulhta hi. Kam a lei leh ha kikeikha zualbang in ka ngaihtuah.

 

ZOL: Recognised Tribe tuamtuam kikhaikhopna ZC, ZRO chihte PTC in nakpi leh khauhtak a support ahatsak ding a diam ahihkeileh kidangkoih deuh zaw ding? Hiai ah PTC in bang role nei leh hoih in na gingta a?

KST: ZC leh ZRO chihte Paite nam in a phuhkhiah himahleh, tuni chiang in nambing kuate khaikhawmtu ahi ua, PTC kia in a support ziak a hatna ding a om tuan kei. ZC/ZRO pen singkung hi henla, a sung a om nam kuate a zungbang in ngaihtuah le. A singkung hoih mah leh a zungte a kip kei leh chikchiang hiam in pukse ding hi. Huaiziak in nam omte amau nam sung chiat ah kithutuak a, nam pumkhat in om le uh, huai in ZC a suhat zaw ding in ka gingta. A zungte a lungvei leh a singkung amah kia in dinglou ding hi.

 

Hiai toh kisai in PTC GHQ in heutu masate sasin-salung nekna kitaisanlou ding hi.

 

ZOL: PNC in Chin Reunification chi in India kumpi ah 1960’s memo na khia hi. Huai lai apan Paitete lungpi khual leh kigawm na lunggulh chia gen theih ding ding hi. Huchia gen theih ding ahihleh tuni a bang chidan a hichi vengvung a om i hi ding?

KST: Huai memo pen delhzui ana hilou hi. Delhzui na hi leh bangtanhiam tungta ding in ka gingta a, tuni a i buaina vengvungte uh leng om khollou maithei hi. Huainung a Pu Tunkhopum in movement hon pat lah na gum ngamlou i hihman in ZNC movement hong om a leng na dou lai i hihman in leh electoral politics hatlua ahihman in hiai tan kitung hi zaw hi.

 

Huaiban ah kituahlouhna tuntu khat hi a ka theih ahihleh i politics saidan ahi. I minam khantouhna ding politics sailou in election politics chiang lel i buaipih uh hiin ka thei. Party base a pailou a individual base a i paina un hiai tan hon tun hi in ka thei hi. Party base a pai hile hang election hun in kikhinna om mahleh i nam issue ah i kigawm thei zel ding a, tuabel individual base a pai ahihman in kuahiam in i nam adia thilhoih ahih in leng hihtu i panpih lam ahihkei leh gum nuamlou, melma bawl a dem teitei hi hang.

 

ZOL: Nangma mimal ah kikta le. Nidang hi in tuhun ah hitaleh nam a ding a nana awlmoh leh vei tampi om ding hiven, PTC President thak na hihna ah sepsuah masak na sawm 3 khong non gen thei diam?

KST: Assembly nanung a thupuknate sepsuah pah ngaite a concentrate phot kisawm hi. Ban ah term masa a heutute na patsa Committee on Protection of Churachandpur District toh kisai, Sialkal Range Development Council toh kisai leh a tuamtuam sep zui ding om hi. A tunglam a gensa bang in sepsuah masak ding a omte ahihleh Block leh unit tamzaw thamte (Block 13 lak ah block 4, unit 111 lak ah unit 98 ) term beisa ngen, khenkhatte kum 10 val election neih saklouh hi uhi.

 

ZOL: Kum 20 paita sung in Paite nam khangtou in na thei hia?

KST:I nam hiam khotang sang in mimal a kikhangtou zaw hi in ka thei. Politics ah bel bangmah masawnna neilou hiin ka kithei.

 

ZOL: Tuban kum 20 in Paite te koi ah bang i chi om dia chih na muhkholh dan thei nuam hang.

KST: Tubang zel a i pai leh ( kidemtuah leh, MDC, MLA election tan lel muban ) tua sang in i keniam zaw ding un ka um. Lungsim za zaw leh etna lian zaw i neih leh District khat bek zaw i puah theita ding.

 

ZOL: Na hun manpha non piak ka kipak uhi.

KST: Kei le ka kipak hi, houlimna hun hoihtak na hon piak man un.

 

 

Bio-data:

Ka pa (L) Kamkhogin leh ka nu Vialzaniang kal a goutan masapen ding in March 5, 1964 in Phaibok Munlian, Vangai Tang ah ka piang hi. Ka pa government teacher ahihman in Suangdoh, Mualtam chih khawng ah ka tengkha ngei uhi. Unau guk -pasal 5 leh numei 1 ka pha uhi. Class-V tan Suangdoh JB School ah ka kai a, Class VI leh VII, Childrens Training School, Lamka ah ka kai hi. Class VIII kantan in Vungzagen High School, Mata ah Class IX leh X sin in, 1980 in Matric ka pass a, 1984 in Lamka College apan ka graduate hi. October 1982 apan January 31, 1987 tan ADC nuai ah Teacher nna ka sem a, Feb 2, 1987 in State Bank of India ah Probationary Officer in ka lut a, June 4, 2011 tan ka sem hi.

 

Bank a ka sep sung in Manipur, Meghalaya, Mizoram leh Assam ah ka posting kha hi. Bank apan ka khawl nung in Paite pau a monthly The Lamka Chronicle kichi, Pu Thangzalian Thomte, Editor, The Lamka Post publishna in November 2012 a kipankhia in, founding editor in ka pang hi. March 2015 apan in tunitan in Tongluang monthly editor in ka pang hi.

 

Laigelh ka lunglutna ahihman in ka laigelh khenkhatte SSPP Annual Magazines, Saphu, Tangsam, Tongluang, The Teeenager leh SBI inhouse magazine khawng ah suakkha ngei hi.

 

Ka zi Theizavung toh ta thum ka nei ua, amau teng leh ka nu toh Convention Road, New Lamka ah ka khosa lel uh. 

Read 754 times Last modified on Thursday, 31 May 2018 07:32
Login to post comments